1-2. Die yen ọtanhirhe na, kẹ diesorọ avwanre vwọ guọnọ?

ỌKE rẹ Adam rọ dia ohwo ọgbagba vwo ru umwemwu nu, o de ku uphẹn rọ vẹ emọ rọyen che vwo vwo arhọ ri bẹdẹ kufia. Adam che se gun oma riase-e. Umwemwu arogba yen o ruru. Kẹ, emọ rọyen vwo? Ayen vwobọ vwẹ umwemwu rẹ Adam na-a. (Rom 5:12, 14) O vwo obo re se ru rere ayen sa vwọ vabọ rẹ abe rẹ ughwu rẹ ọsẹ rayen re re na? E! Adam ghwe vwo ru umwemwu nu, Jihova da vwẹ ememerha vwo dje obo ro che vwo sivwin oduduru buebun rẹ emọ rẹ Adam vwo nẹ umwemwu vẹ ughwu. (Jẹn. 3:15) Vwẹ ọke rọ ta phiyotọ, Jihova che ji Ọmọ rọyen nẹ obo odjuvwu rhe, rhe “vwẹ arhọ rọye tan ihwo buebu.”—Mak 10:45; Jọn 6:51.

² Die yen ọtanhirhe na? Vwẹ ẹbẹre ra vwẹ Grik si vwẹ Baibol na, ọtanhirhe na mudiaphiyọ osa rẹ Jesu hware rọ vwọ dẹ oborẹ Adam kpare kufia hirhe. (1 Kor. 15:22) Diesorọ a vwọ guọnọ ọtanhirhe na? Kidie arhọ yen a vwọ hwosa rẹ arhọ, kirobọ rẹ Urhi na djephia kpahen orhiẹn-abavo ri Jihova. (Ẹyan. 21:23, 24) Adam kpare arhọ ọgbagba rọyen kufia. Vwo nene orhiẹn-abavo ri Jihova, Jesu da vwẹ arhọ ọgbagba rọyen vwọ kpahotọ. (Rom 5:17) Ọ da rhe dia “Ọsẹ ri Bẹdẹ” vwọ kẹ ihwo ejobi ri dje esegbuyota phia kpahen ọtanhirhe na.—Aiz. 9:6; Rom 3:23, 24.

3. Vwo nene obo rehẹ Jọn 14:31 vẹ 15:13, diesorọ Jesu vwo vwo owenvwe rọ vwọ vwẹ arhọ ọgbagba rọyen kpahotọ?

³ Jesu vwo owenvwe rọ vwọ vwẹ arhọ rọyen kpahotọ fikirẹ ẹguọnọ ro vwo kpahen Jihova kugbe avwanre. (Se Jọn 14:31; 15:13.) Ẹguọnọ yena yen muro vwọ sẹro rẹ ọyọnregan rọyen toba, ji ru ọhọre rẹ Ọsẹ rọyen gba. Ọtiọyena, ọhọre ri Jihova kpahen otọrakpọ na kugbe ihworakpọ ko se rugba. Vwẹ uyono nana, a cha ta ota  kpahen oboresorọ Ọghẹnẹ vwọ vwẹ uphẹn kẹ Jesu nẹ ọ rioja mamọ tavwen o ki ghwu. A je cha fuẹrẹn udje rẹ ohwo ọvo ro si Baibol na ro vwo ọdavwaro okokodo kpahen ọtanhirhe na. Ukuotọ rọyen, a me ta ota kpahen obo ra sa vwọ kpẹvwẹ Jihova vwọ kẹ ọtanhirhe na, ji ru ọdavwaro re vwo kpahen ọtanhirhe rẹ Jihova vẹ Jesu ru kẹ avwanre na kodophiyọ.

4. Djisẹ rẹ oborẹ Jesu ghwu wan.

⁴ Roro kpahen obo re phiare vwẹ ẹdẹ rọ koba tavwen e ki hwe Jesu. Ukperẹ ọ vwọ nokpẹn rẹ ukẹcha rẹ emekashe buebun, ọ da vwẹ oma rọyen kpahotọ rere isodje ri Rom vwo muo, ji hwe mamọ. (Mat. 26:52-54; Jọn 18:3; 19:1) Ayen da fa oma rọyen vọn vẹ era. Ayen de mu urhe ọhọhọhọ phiyọ ugbuko rọyen ro hwẹ ọbara na. Jesu vwo kpono urhe na kpo asan re de che hwe, oma de bro ku, isodje ri Rom da vuẹ ohwo ọvo rọhẹ etiyin nẹ o mu urhe na. (Mat. 27:32) Jesu vwo te asan re de che hwe, ayen da vwẹ ibibẹn vwo hwe abọ vẹ awọ rọyen mu urhe na. Ọnyẹ rẹ oma rọyen da nẹrhẹ odjadja rẹ era rẹ ibibẹn na ganphiyọ. Igbeyan rọyen de muomaphiyọ, jẹ oni rọyen viẹ, ẹkẹvuọvo ilori rẹ ẹga rẹ ihwo ri Ju ke reyọ vwọ jehwẹ. (Luk 23:32-38; Jọn 19:25) Jesu rioja vwẹ inọke buebun. Fikirẹ ẹdia rẹ ugboma rọyen hepha, ọ da rhe dia bẹnbẹn rọ vwọ wẹn totọ. Tavwen o ki ghwu, ọ da nẹrhovwo rọ koba rhe Jihova. O vwo ru ọtiọyen nu, ọ da nuyovwin kpotọ, o de ghwu. (Mak 15:37; Luk 23:46; Jọn 10:17, 18; 19:30) Ọnana ghini ughwu rẹ oja vẹ ophọphọvwe!

5. Die yen ma da Jesu kparobọ vwọ vrẹ obo re hwere wan?

⁵ Ọ dia obo re hwe Jesu wan yen ma da-a. Obo rọ nẹrhẹ e hwe na yen ma da kparobọ. E gun efian nyẹ nẹ o muọghọ kẹ Ọghẹnẹ yẹrẹ odẹ rọye-en. (Mat. 26:64-66) Efian nana rọ riẹnre nẹ e che gun nyẹ ọyen na kpokpiro ẹwẹn mamọ, te ẹdia rọ vwọ rẹ Ọsẹ rọyen nẹ o sivwin ọyen nẹ ophọphọvwe na. (Mat. 26:38, 39, 42) Diesorọ Jihova vwọ vwẹ uphẹn kẹ ọmọ ọghanghanre rọyen nẹ ọ rioja ji ghwu? E jẹ a ta ota kpahen erọnvwọn erha re sorọ.

6. Diesorọ a vwọ kanre Jesu mu urhe rẹ oja?

⁶ Ọrẹsosuọ, e hwe Jesu mu urhe rẹ oja rere o se vwo sivwin ihwo ri Ju vwo nẹ ekan ọvo kiriguo. (Gal. 3:10, 13) Ihwo ri Ju sa yọnrọn Urhi rẹ Ọghẹnẹ kirobo rẹ ayen veri-i. Ọtiọyena, ọnana da ghwa ekan ọfa rhe ayen, vwọba ekan rẹ ayen riuku rọyen mie ọsẹ rayen Adam ro ru umwemwu. (Rom 5:12) Urhi rẹ Ọghẹnẹ vwọ kẹ ihwo rẹ Izrẹl tare nẹ e hwe ohwo ro ru umwemwu ro fo ughwu. Ọkiọvo, a me je vwẹ orivwin rọyen vwo ya urhe. * (Urhi 21:22, 23; 27:26) Fikirẹ urhe rẹ oja re hwere mu na, Jesu da nẹrhẹ ihwo rẹ Izrẹl re senrọ na vabọ rẹ ekan, je mrẹ erere vwo nẹ izobo rẹ ọtanhirhe rọyen.

7. Die yen orọnvwọn rivẹ rọ nẹrhẹ Ọghẹnẹ vwẹ uphẹn kẹ Ọmọ rọyen nẹ ọ rioja?

⁷ Gbe rhe ni orọnvwọn rivẹ rọ nẹrhẹ Ọghẹnẹ vwẹ uphẹn kẹ Ọmọ rọyen nẹ ọ rioja. Ọ guọnọ muegbe rẹ Jesu hẹrhẹ ọke rọ cha vwọ dia Orherẹn Rode. Jesu rhiẹromrẹ obo rọ bẹn te re vwo nyupho rẹ Ọghẹnẹ vwẹ ọke rẹ ọdavwini ọgangan. Ọdavwini ro hirharoku na gan te asan rọ  vwọ vwẹ “ekperẹ vẹ oviẹ” vwọ nẹrhovwo vwọ kẹ ukẹcha. Fikirẹ oborẹ Jesu rioja te, kọ sa riẹn ọdavwẹ rẹ avwanre, je “dia ọchuko” kẹ “ayen otu ra davwere.” Oma vwerhen avwanre mamọ nẹ Jihova vwẹ orherẹn rode ro gbe arodọnvwẹ, rọ je riẹn “ọdavwẹ rẹ avwanre” vwo mu!—Hib. 2:17, 18; 4:14-16; 5:7-10.

8. Die yen orọnvwọn rerha rọ nẹrhẹ Ọghẹnẹ vwẹ uphẹn kẹ Ọmọ rọyen nẹ ọ rioja?

⁸ Ọrerha, Jihova vwẹ uphẹn kẹ Jesu nẹ ọ rioja mamọ rere ọ sa vwọ kpahenphiyọ onọ ọghanghanre nana: Ohworakpọ sa fuevun kẹ Jihova siẹrẹ o de hirharoku ọdavwini ọgangan? Eshu tare nẹ ọyena cha sa phia-a! Ọ tare nẹ ihworakpọ ga Ọghẹnẹ fikirẹ ojevwe romobọ. O vwo imuẹro nẹ ayen ejobi họhọ ọsẹ rayen Adam ro jẹ ẹguọnọ rẹ Ọghẹnẹ evwo. (Job 1:9-11; 2:4, 5) Kidie nẹ o vwo imuẹro nẹ Ọmọ rọyen cha fuevun, Jihova da rhọnvwe nẹ a davwen Jesu ni, te asan rẹ ohworakpọ se chirakon te. Jesu sẹro rẹ ọyọnregan rọyen, o de dje Eshu phiyọ ọvwọrefian.

9. Udje vọ yen ọyinkọn Jọn phi phiyotọ kẹ avwanre?

⁹ Uyono rẹ ọtanhirhe na bọn esegbuyota rẹ Inenikristi rẹ uyota gan. Buebun rayen vwobọ vwẹ iruo rẹ aghwoghwo na, dede nẹ ayen hirharoku ẹvwọsuọ, ayen ji chirakon rẹ koka koka rẹ edavwini tobọ re te ọke rẹ ọghwo rayen. Roro kpahen udje rẹ ọyinkọn Jọn. Ọ nabọ fuevun ghwoghwo uyota ro shekpahen Kristi kugbe ọtanhirhe na vwẹ omarẹ ikpe re vrẹ 60. O vwo siẹkẹrẹ ẹgbukpe 100 re, Usuon ri Rom de no nẹ ọ kpokpo ayen, ọtiọyena, e de muo phiyọ uwodi vwẹ Patmọs. Die yen o ruru? O ghwoghwo “ota rẹ Ọghẹnẹ” ji se “oseri [kpahen] Jesu.” (Ẹvwọ. 1:9) Ọyena omamọ udje rẹ esegbuyota vẹ akoechiro!

10. Mavọ yen ẹbe rẹ Jọn siri vwo djephia nẹ o vwo ọdavwaro kpahen ọtanhirhe na?

¹⁰ Jọn dje ọdavwaro ro vwo kpahen ọtanhirhe na kugbe ẹguọnọ okokodo ro vwo kpahen Jesu phia vwẹ ẹbe ri Baibol ro siri. O djunute ọtanhirhe na yẹrẹ erere rọ ghwa rhe vrẹ abọ 100. Kerẹ udje, Jọn siri nẹ, “Ohwo de ru umwemwu, avwanre vwo obruche ọvo vwẹ obọ rẹ Ọsẹ, Jesu Kristi rẹ ọvwata na.” (1 Jọn 2:1, 2) Ọ je kanrunumu obo rọ ghanre te re vwo se “oseri” kpahen Jesu. (Ẹvwọ. 19:10) Kọyen o phẹnre dẹn nẹ Jọn vwo ọdavwaro okokodo kpahen ọtanhirhe na. Mavọ yen e se vwo djephia nẹ avwanre ji vwo ọdavwaro kpahọn?

11. Die yen sa chọn avwanre uko vwọ sen ọdavwini?

¹¹ Sen ọdavwini wo vwo ru umwemwu. Siẹrẹ e de vwo ọdavwaro kpahen ọtanhirhe na, e che se vwo iroro ọtiọna-a: ‘O vwo oboresorọ me vwọ davwẹngba vwọ sen ọdavwini-i. Mi de ru umwemwu na nu, ke me cha rẹ Ọghẹnẹ nẹ o vwo ghovwo uvwe.’ Ukperẹ ọtiọyen, siẹrẹ ọdavwini da rhe, avwanre me ta: ‘Ẹjo! Egbudugbu rẹ emu esiri eje rẹ Jihova vẹ Jesu ru kẹ vwẹ na, me me rhoma ru emu tiọna?’ Ọtiọyena, avwanre sa yare ukẹcha mie Jihova, avwanre me ta: “Wo suẹn avwanre ro ọdavwini-i.”—Mat. 6:13.

12. Mavọ yen a sa vwọ reyọ uchebro rọhẹ 1 Jọn 3:16-18 vwo ruiruo?

¹² Vwo ẹguọnọ rẹ iniọvo wẹn. Avwanre  de dje ẹguọnọ tiọyena phia, ke se dje ọdavwaro phia kpahen ọtanhirhe na. Diesorọ? Kidie ọ dia avwanre ọvo yen Jesu ghwu kẹ-ẹ, o ji ru ọtiọyen kẹ iniọvo rẹ avwanre. Jesu ghwu kẹ ayen, kidie ayen pha ghanghanre kẹ. (Se 1 Jọn 3:16-18.) Avwanre se dje ẹguọnọ kẹ iniọvo rẹ avwanre womarẹ obo re nene ayen yerẹn wan. (Ẹfe. 4:29, 31–5:2) Kerẹ udje, avwanre chọn ayen uko ọke rẹ ayen da muọga, ọke rẹ ayen de chirakon rẹ edavwini egangan, yẹrẹ ọke rẹ oghwọrọ ri kpregede de te ayen oma. Ẹkẹvuọvo, die yen ofori nẹ e ru siẹrẹ ọniovọ rẹ avwanre de gbe avwanre ku?

13. Diesorọ a vwọ reyọ vwo ghovwo?

¹³ Ọ bẹn kẹ wẹ ọkiọvo wọ vwọ reyọ vwo ghovwo oniọvo wẹn? (Liv. 19:18) Ọ da dia ọtiọyen, gbe nene uchebro nana: “Ovwan rhe chirakon rẹ ohwohwo, ohwohwo vwo ghovwo ohwohwo nẹ otọ rẹ evun rhe ọ da tobọ dianẹ e gbe avwanre ku. Kirobo rẹ Jihova vwo ghovwo ovwan na, eriyin we ji vwo ghovwo rhe.” (Kọl. 3:13, NW ) Kọke kọke re de vwo ghovwo iniọvo rẹ avwanre, jẹ avwanre dje kẹ Ọsẹ rẹ avwanre rọhẹ obo odjuvwu nẹ avwanre vwo ọdavwaro kpahen ọtanhirhe na. Mavọ yen e se vwo ru ọdavwaro re vwo kpahen okẹ nana kodophiyọ ọkieje?

14. Ọrhọ yen idjerhe ọvo re se vwo ru ọdavwaro re vwo kpahen ọtanhirhe na kodophiyọ?

¹⁴ Kpẹvwẹ Jihova vwọ kẹ ọtanhirhe na. Joanna rọ dia oniọvo aye rẹ ẹgbukpe 83 rọ dia India da ta: “Mi niro nẹ ọ pha ghanghanre mamọ mi vwo djunute je kpẹvwẹ Jihova vwọ kẹ ọtanhirhe na kẹdẹ kẹdẹ vwẹ ẹrhovwo mẹ.” Vwẹ ẹrhovwo romobọ wẹn, vuẹ Jihova kpahen erọnvwọn evo re chọ wẹ obọ vwẹ ẹdẹ yena, wọ me jẹ rẹ nẹ o vwo ghovwo uwe. Ẹkẹvuọvo, wo de ru umwemwu ọgangan, ofori nẹ wọ nokpẹn rẹ ukẹcha mie ekpako na. Ayen cha kerhọ wẹn, je vwẹ uchebro kẹ wẹ vwo nẹ Baibol na rhe. Ayen che nene uwe nẹrhovwo vwọ kẹ evwoghovwo, rere Jihova se vwo “sivwi” uwe yẹrẹ rhoma si we te oma.—Jems 5:14-16

15. Diesorọ o vwo fo nẹ e se, ji roro kokodo kpahen otanhirhe na?

¹⁵ Roro kokodo kpahen ọtanhirhe na. Oniọvo aye ọvo re se Rajamani rọhẹ ẹgbukpe 73 da ta: “Mi de se ikuegbe rẹ oja  ra vwọ re Jesu, ẹro mẹ kọ vọn vẹ ame oviẹ.” Ọ je cha da wẹ siẹrẹ wo de roro kpahen oja ra vwọ re Ọmọ rẹ Ọghẹnẹ. Wo vwo roro kpahen izobo ri Jesu kokodo ye, ẹguọnọ wo vwo kpahen Jesu kugbe Ọsẹ rọyen kọ cha ganphiyọ. Wọ da ghwọrọ ọke vwo se kpahen ọtanhirhe na vwẹ uyono romobọ wẹn, ku wo se roro kokodo kpahọn.

16. Erere vọ yen che no rhe siẹrẹ e de yono ihwo kpahen ọtanhirhe na? (Ni uhoho rọhẹ opharo ọbe na.)

¹⁶ Yono ihwo efa kpahen ọtanhirhe na. Avwanre vwọ vuẹ ihwo efa kpahen ọtanhirhe na ye, jẹ ọdavwaro re vwo kpahọn ganphiyọ. Avwanre vwo ẹbe vẹ ividio re se vwo yono ihwo oboresorọ Jesu vwo ghwu kẹ avwanre. Kerẹ udje, a sa vwẹ uyono 4 rẹ ibroshọ na Iyẹnrẹn Esiri Ro Nẹ Obọ Rẹ Ọghẹnẹ Rhe! vwo ru ọnana. Uyono yena vwo uyovwinrota na “Ono Yin Jesu Kristi?” Yẹrẹ e se nene ayen fuẹrẹn uyovwinrota 5 rẹ ọbe na Die Yen Baibol na Se Yono Avwanre? Uyovwinrota na yehẹ “Ọtanhirhe Na—Okẹ rọ Ma Rho ro Nẹ Obọ rẹ Ọghẹnẹ Rhe.” Vwọba, kukpe kukpe yen ọdavwaro rẹ avwanre vwọ ganphiyọ ọke re de kpo Ẹkarophiyọ rẹ ughwu ri Jesu, ji durhie ihwo vwo kpo irueru na. Jihova kẹ avwanre uphẹn rode re vwo yono ihwo efa kpahen Ọmọ rọyen!

17. Diesorọ ọtanhirhe na vwọ dia okẹ rọ ma rho ro nẹ obọ rẹ Ọghẹnẹ rhe?

¹⁷ Aphro herọ-ọ, o vwo oboresorọ e vwo vwo ọdavwaro kpahen ọtanhirhe na, ji ru ọdavwaro na ganphiyọ ọkieje. Ọ dia ọtanhirhe na-a, avwanre ihworakpọ ri jẹgba che se sikẹrẹ Jihova-a. Ọtanhirhe na yen cha nẹrhẹ a sa guọghọ iruo rẹ Idẹbono totọ riẹriẹriẹ. (1 Jọn 3:8) Ọyen je cha nẹrhẹ ọhọre Ọghẹnẹ vwọ kẹ otọrakpọ na rugba. Akpọ na cha dia iparadaisi. Ihwo ejobi re herọ ọke yena che vwo ẹguọnọ ri Jihova je vwẹ ẹga kẹ. Ọtiọyena, e jẹ avwanre guọnọ idjerhe re vwo dje ọdavwaro phia kẹdẹ kẹdẹ kpahen ọtanhirhe na rọ dia okẹ rọ ma rho rẹ Ọghẹnẹ vwọ kẹ ihworakpọ!