1-2. Ano an lukat, ngan kay ano nga kinahanglan naton ito?

HAN nakasala an perpekto nga tawo nga hi Adan, nawara niya an oportunidad nga mabuhi ha waray kataposan diri la para ha iya kondi para liwat ha iya magigin mga anak. Diri gud mapapasaylo an ginbuhat ni Adan. Gintuyo niya nga makasala. Pero kumusta man an iya mga anak? Diri hira api ha pakasala ni Adan. (Roma 5:12, 14) May-ada ba mahihimo basi matalwas hira tikang ha sirot nga kamatayon nga angayan gud ha ira kaapoy-apoyan nga hi Adan? Oo! Katapos gud la makasala ni Adan, hinay-hinay nga iginpahayag ni Jehova kon paonan-o niya tatalwason an minilyon nga mga tulin ni Adan tikang ha sumpa nga sala ngan kamatayon. (Gen. 3:15) Ha iya itinanda nga panahon, ginsugo ni Jehova an iya Anak tikang ha langit basi “maghatag han iya kinabuhi sugad nga lukat para ha damu.”​—Mar. 10:45; Juan 6:51.

² Ano an lukat? Kon gin-uunabi ha Kristiano Griego nga Kasuratan, an lukat amo an kantidad nga iginbayad ni Jesus basi maibalik an nawara ni Adan. (1 Cor. 15:22) Kay ano nga kinahanglan naton an lukat? Tungod kay sumala ha suruklan ni Jehova ha hustisya nga iginpapakita han Balaud, kinahanglan maghatag hin kinabuhi para ha kinabuhi. (Ex. 21:23, 24) Nawara ni Adan an iya perpekto nga kinabuhi. Basi maipakita an hustisya han Dios, iginhalad ni Jesus an iya perpekto nga kinabuhi sugad nga tawo. (Roma 5:17) Salit hiya an nagin “Waray Kataposan nga Amay” ha ngatanan nga nagpapakita hin pagtoo ha lukat.​—Isa. 9:6; Roma 3:23, 24.

3. Sumala ha Juan 14:31 ngan 15:13, kay ano nga kinaburut-on nga iginhalad ni Jesus an iya perpekto nga kinabuhi sugad nga tawo?

³ Kinaburut-on nga iginhalad ni Jesus an iya kinabuhi tungod han iya daku nga gugma ha iya langitnon nga Amay ngan ha aton. (Basaha an Juan 14:31; 15:13.) Tungod hito nga gugma, nagin determinado hiya nga tipigan an iya integridad tubtob ha kataposan ngan tumanon an kaburut-on han iya Amay. Ginbuhat ito ni Jesus pinaagi ha pagpabilin nga matinumanon tubtob han  iya kamatayon. Sugad nga resulta, matutuman an orihinal nga katuyoan ni Jehova para ha mga tawo ngan ha tuna. Hini nga artikulo, hihisgotan naton kon kay ano nga gintugotan han Dios nga duro nga mag-antos hi Jesus antes hiya mamatay. Rirepasuhon liwat naton hin madaliay an ehemplo han usa nga parasurat han Biblia nga nag-apresyar gud han lukat. Katapos, hihisgotan naton kon paonan-o naton maipapakita an aton pagin mapasalamaton ha lukat ngan kon paonan-o naton mapapahilarom an aton apresasyon ha halad nga iginhatag ha aton ni Jehova ngan ni Jesus.

4. Ihulagway kon paonan-o namatay hi Jesus.

⁴ Imadyina an nahitabo ha ultimo nga adlaw han kinabuhi ni Jesus ha tuna. Bisan kon puydi unta hiya tumawag hin damu nga anghel basi proteksyonan hiya, ginpabay-an niya nga dakpon hiya han Romano nga mga sundalo nga waray kalooy nga nagkastigo ha iya. (Mat. 26:52-54; Juan 18:3; 19:1) Naggamit hira hin latigo nga nakakasamad han iya mga unod. Ha urhi, ginpapas-an hiya hin mabug-at nga kahoy bisan kon nagdidinugo an iya likod. Nagtikang pagdanas hi Jesus han kahoy ngadto ha lugar nga papatayan ha iya. Pero waray pag-iha, nagsugo an mga sundalo hin usa nga tawo nga dad-on an kahoy para ha iya. (Mat. 27:32) Pag-abot ni Jesus ha lugar diin hiya mamamatay, iginraysang han mga sundalo an iya mga kamot ngan mga tiil ha kahoy. Tungod han bug-at han iya lawas, nagtitikadaku an mga samad han ginraysangan. Nabibido gud an iya mga sangkay ngan nagtitinangis an iya nanay, pero hi Jesus gintitinamay han Judio nga mga magmarando. (Luc. 23:32-38; Juan 19:25) Nag-antos hi Jesus hin pipira ka oras. An iya kasingkasing ngan bagà nakukurian na paggana, salit nagtitikakuri na an iya pagginhawa. Antes hiya mautdan han iya gininhawa, nag-ampo hiya kan Jehova kay maaram hiya nga nagin matinumanon hiya. Katapos, dinuko hiya ngan iginhatag an iya kinabuhi. (Mar. 15:37; Luc. 23:46; Juan 10:17, 18; 19:30) An iya kamatayon hinay-hinay gud, masakit, ngan nakakawara hin dignidad!

5. Ano an mas nakapasakit gud kan Jesus?

⁵ Para kan Jesus, an paagi han pagpatay ha iya diri amo an nakapasakit gud ha iya. Mas nakapasakit ha iya an akusasyon nga nagin hinungdan ha pagpatay ha iya. Sayop nga gin-akusaran hiya nga nagpapasipara​—usa nga waray respeto ha Dios o ha ngaran han Dios. (Mat. 26:64-66) Ito mismo nga akusasyon nakapasakit gud kan Jesus salit naghingyap hiya nga unta ilikay hiya han iya Amay tikang hini nga kaarawdan. (Mat. 26:38, 39, 42) Kay ano nga gintugotan ni Jehova nga mag-antos ngan mamatay an iya hinigugma nga Anak? Hisgotan naton an tulo nga rason.

6. Kay ano nga kinahanglan bitayon hi Jesus ha pasakitan nga kahoy?

⁶ Siyahan, kinahanglan bitayon hi Jesus ha usa nga kahoy basi an mga Judio magkaada kagawasan tikang ha usa nga panhimaraot. (Gal. 3:10, 13) Inuyon hira nga tutumanon nira an Balaud han Dios pero waray nira ito tumana. Salit, labot la nga angayan hira mamatay tungod kay mga anak hira ni Adan, aada liwat ha ira ini nga panhimaraot. (Roma 5:12) An Balaud han Dios ha Israel nasiring nga an usa nga tawo nga nakabuhat hin sala nga angay sentensyahan hin kamatayon dapat patayon. Katapos, an iya patay nga lawas mahimo bitayon ha usa nga kahoy. * (Deut. 21:22, 23; 27:26) Tungod kay ginbitay hi Jesus ha usa nga kahoy, ginpahinabo niya nga magin posible nga an nasud nga nagsalikway mismo ha iya makapahimulos tikang ha iya halad.

7. Ano an ikaduha nga rason kon kay ano nga gintugotan han Dios nga mag-antos an iya Anak?

⁷ Ini an ikaduha nga rason kon kay ano nga gintugotan  han Dios nga mag-antos an iya Anak. Ginbabansay niya hi Jesus para ha iya papel ha tiarabot sugad nga aton Hitaas nga Saserdote. Naeksperyensyahan ni Jesus kon ano kakuri an pagsunod ha Dios kon naatubang hin makuri gud nga pagsari. Inabat hiya hin duro nga tensyon salit nag-ampo hiya para mangaro hin bulig “nga may mga pangaraba ngan mga luha.” Tungod kay nakaeksperyensya hi Jesus hin duro nga kasakit ha emosyon, sigurado nga nasasabtan niya an aton mga panginahanglan ngan “makakabulig hiya” ha aton kon “ginsasarihan” kita. Mapasalamaton gud kita kan Jehova tungod kay nagpili hiya para ha aton hin maloloy-on nga Hitaas nga Saserdote nga “napaid ha aton mga kaluyahan”!​—Heb. 2:17, 18; 4:14-16; 5:7-10.

8. Ano an ikatulo nga rason kon kay ano nga gintugotan han Dios nga makaeksperyensya hi Jesus hin makuri gud nga pagsari?

⁸ Ikatulo, gintugotan ni Jehova nga duro nga mag-antos hi Jesus basi mabaton an usa nga importante nga pakiana: Makakagpakita ba hin diosnon nga debosyon an mga tawo kon nakakaeksperyensya hin makuri gud nga pagsari? Siring ni Satanas, diri! Nasiring hiya nga an mga tawo nag-aalagad la ha Dios tungod han personal nga mga bentaha. Ngan natoo hiya nga​—pariho han ira kaapoy-apoyan nga hi Adan—​diri hira magpapabilin nga matinumanon kan Jehova. (Job 1:9-11; 2:4, 5) Tungod kay nasarig hi Jehova nga magpapabilin nga maunungon an iya Anak, gintugotan niya hi Jesus nga makaeksperyensya hin makuri gud nga pagsari. Gintipigan ni Jesus an iya integridad ngan ginpamatud-an nga buwaon hi Satanas.

9. Ano nga susbaranan an iginpakita ni apostol Juan para ha aton?

⁹ An pagtoo han damu nga Kristiano napaparig-on pinaagi han katutdoan han lukat. Padayon hira nga nagsasangyaw bisan pa han pagkontra ngan gin-iilob an ngatanan nga klase hin mga pagsari ha bug-os nira nga kinabuhi. Hunahunaa an ehemplo ni apostol Juan. Maunungon hiya nga nagsangyaw han kamatuoran mahitungod ha Kristo ngan ha lukat, posible ha sulod hin sobra 60 ka tuig. Han hirani na hiya mag-100 anyos, posible gud nga ginhunahuna hiya nga tarhog ha Imperyo han Roma, salit ginpriso hiya ha isla han Patmos. Ano an iya nabuhat nga sala? An “pagyakan mahitungod ha Dios ngan pagpamatuod may kalabotan kan Jesus.” (Pah. 1:9) Maopay gud ito nga susbaranan han pagtoo ngan pagpailob!

10. Paonan-o iginpapakita han mga sinurat ni Juan nga gin-apresyar niya an lukat?

¹⁰ Ha iya mga sinurat nga giniyahan han Dios, iginpahayag ni Juan an iya hilarom nga gugma para kan Jesus ngan an iya apresasyon ha lukat. Sobra 100 ka beses nga gin-unabi niya an mahitungod ha lukat o an mga benepisyo nga nagin posible tungod hito. Pananglitan, nagsurat hi Juan: “Kon may bisan hin-o nga makasala, may parabulig kita nga kaupod han Amay, an matadong nga hi Jesu-Kristo.” (1 Juan 2:1, 2) Ginpapabug-atan liwat han mga sinurat ni Juan an importansya han “pagpamatuod mahitungod kan Jesus.” (Pah. 19:10) Klaro nga gin-apresyar gud ni Juan an lukat. Paonan-o naton maipapakita nga gin-aapresyar liwat naton ito?

11. Ano an makakabulig ha aton basi maatohan an pagsulay?

¹¹ Atohi an pagsulay nga makasala. Kon gin-aapresyar gud naton an lukat, diri naton huhunahunaon ini: ‘Diri ko kinahanglan maniguro nga atohan an pagsulay. Okey la nga makasala ako, mangangaro na la ako hin kapasayloan.’ Lugod, kon ginsusulay kita nga magbuhat hin sayop, masiring kita: ‘Diri ko gud ito mahihimo katapos han ngatanan nga ginbuhat ni Jehova ngan ni Jesus para ha akon!’ Uyon hito, mahimo kita mangaro kan Jehova hin kusog ngan  mangamuyo ha iya: ‘Ayaw itugot nga masulay ako.’​—Mat. 6:13.

12. Paonan-o naton maiaaplikar an sagdon ha 1 Juan 3:16-18?

¹² Higugmaa an imo kabugtoan. Kon iginpapakita naton an sugad nga gugma, iginpapakita liwat naton nga gin-aapresyar naton an lukat. Kay ano? Kay iginhatag ni Jesus an iya kinabuhi diri la para ha aton kondi pati liwat ha aton kabugtoan. Kon hi Jesus nagin andam mamatay para ha ira, iginpapakita hito nga hinigugma gud niya hira. (Basaha an 1 Juan 3:16-18.) Iginpapakita naton an aton gugma ha aton kabugtoan ha paagi han aton pagtratar ha ira. (Efe. 4:29, 31–5:2) Pananglitan, ginbubuligan naton hira kon may sakit hira o kon naatubang hira hin makuri gud nga mga problema, pati na kon naaapektohan hira han mga kalamidad. Pero ano an dapat naton buhaton kon an usa nga bugto may nabubuhat o nayayakan nga nakakasakit ha aton?

13. Kay ano nga kinahanglan kita magin mapinasayloon?

¹³ Nakukurian ka ba usahay ha pagpasaylo ha usa nga bugto? (Lev. 19:18) Kon oo, sunda ini nga sagdon: “Padayon nga magpailob ha usa kag usa ngan hura nga magpasaylo ha usa kag usa bisan kon may hinungdan an bisan hin-o nga magreklamo kontra ha iba. Sugad la nga hi Jehova hura nga nagpasaylo ha iyo, kinahanglan ito liwat an iyo buhaton.” (Col. 3:13) Ha kada panahon nga ginpapasaylo naton an aton bugto, ginpapamatud-an naton ha aton langitnon nga Amay nga gin-aapresyar gud naton an lukat. Paonan-o naton padayon nga mapapahilarom an aton apresasyon hini nga regalo han Dios?

14. Ano an usa nga paagi nga mapapahilarom naton an aton apresasyon ha lukat?

¹⁴ Pasalamati hi Jehova tungod han lukat. “Para ha akon importante nga unabihon an lukat kada adlaw ha akon mga pag-ampo ngan pasalamatan hi Jehova tungod hito,” siring han 83 anyos nga sister nga hi Joanna nga taga-India. Ha imo personal nga mga pag-ampo, hunahunaa an imo sayop nga mga nabuhat ha bug-os nga adlaw, katapos, pangaro kan Jehova hin kapasayloan. Syempre, kon seryoso nga sala an imo nabuhat, kinahanglan mo liwat an bulig han mga tigurang. Mamamati hira ha imo ngan maghahatag hin mahigugmaon nga sagdon tikang ha Pulong han Dios. Mag-aampo hira kaupod mo ngan maghahangyo kan Jehova nga padayon nga makarawat mo an bili han halad ni Jesus ‘basi ka mag-opay’ ha espirituwal.​—San. 5:14-16.

15. Kay ano nga kinahanglan kita maggahin hin panahon nga basahon an mahitungod ha lukat ngan pamalandungon ito?

¹⁵ Pamalandonga an lukat. “Kon nagbabasa  ako mahitungod han pag-antos ni Jesus,” siring han 73 anyos nga sister nga hi Rajamani, “nakakatangis ako.” Bangin nasusubo ka liwat kon ginhuhunahuna mo an duro nga pag-antos han Anak han Dios. Pero kon mas ginpapamalandong mo an sakripisyo ni Jesus, mas maghihilarom an imo gugma ha iya ngan ha iya Amay. Basi mabuligan ka nga mapamalandong an lukat, mahimo mo pag-adman ini nga topiko ha imo personal nga pag-aram.

16. Paonan-o kita nakakapahimulos ha pagtutdo ha iba mahitungod ha lukat? (Kitaa an retrato ha kobre.)

¹⁶ Tutdui an iba mahitungod ha lukat. Ha kada panahon nga nagsusumat kita ha iba mahitungod han lukat, nagtitikahilarom an aton apresasyon para hito. May mag-opay gud kita nga garamiton nga magagamit ha pagtutdo ha iba kon kay ano nga hi Jesus kinahanglan mamatay para ha aton. Pananglitan, mahimo naton gamiton an leksyon 4 han brosyur nga Maopay nga Sumat Tikang ha Dios! Ito nga leksyon may ulohan nga “Hin-o hi Jesu-Kristo?” O mahimo naton gamiton an kapitulo 5 han libro nga Ano an Igintututdo ha Aton han Biblia? Ito nga kapitulo may ulohan nga “An Lukat​—Pinakalabaw nga Regalo han Dios.” Ngan kada tuig, napapahilarom naton an aton apresasyon ha lukat pinaagi ha pag-atender ha Memoryal han kamatayon ni Jesus ngan ha pagin madasigon ha pag-imbitar ha iba nga umatender kaupod naton. Daku gud nga pribilehiyo an iginhatag ni Jehova ha aton nga tutdoan an iba mahitungod ha iya Anak!

17. Kay ano nga an lukat an pinakalabaw nga regalo han Dios ha katawohan?

¹⁷ Waray ruhaduha nga may maopay kita nga rason nga kultibaron an hilarom nga apresasyon ha lukat ngan tipigan ito. Tungod han lukat, mahimo kita magin duok nga sangkay ni Jehova bisan kon diri kita perpekto. Tungod han lukat, bug-os nga wawad-on an mga buhat han Yawa. (1 Juan 3:8) Tungod han lukat, matutuman an orihinal nga katuyoan ni Jehova para ha tuna. An bug-os nga tuna magigin paraiso. Hihigugmaon hi Jehova han ngatanan mo nga igkikita ngan mag-aalagad hira ha iya. Salit, kada adlaw mamiling kita hin mga paagi nga maipakita an aton apresasyon ha lukat​—an pinakalabaw nga regalo han Dios ha katawohan!