1, 2. მუ რე გიშაჸიდირალ დო მუშენ მოსაჭირნა თინა?

მუჟამსით სრულყოფილ ადამიანქ, ადამქ, შეცოდ, თიქ მიოდინუ მარადიულ სიცოცხლეშ საშვალება, ხვალე მუშ დუდშო ვარინ, მუშ მომავალ სქუალეფშო ხოლო. ადამიშ საქციელს მუთუნნერ გამართლება ვა უღჷ. თიქ თენა შეგნებულო აკეთ. მარა მუშ რაგად შილებე თიშ სქუალეფშე? თინეფს მუთუნ ვემშუძნა ადამიშ ცოდვაშა (რომ. 5:12, 14). შილებედუო მუთუნიშ კეთება ადამიშ გამნარყიშ ღურაშე დარსხებელო, ნამუთ მუნეფიშ წინაპარქ მოუღ? იეჰოვაქ ადამიშ შეცოდებაშ უკულ ხეთეშე გაცხად, მუჭო დერსხენდჷ თიშ მილიონობით გამნარყის ცოდვა დო ღურაშე (დაბ. 3:15). დანიშნულ დროს იეჰოვა ზეცაშე გოუტენდჷ მუშ სქუას, ნამდა სიცოცხლე გაწირკო ბრელიშ გიშაჸიდირალო (მარ. 10:45; იოან. 6:51).

² მუ რე გიშაჸიდირალ? ქრისტიანულ-ბერძნულ წერილეფს გიშაჸიდირალ ნიშნენს თის, მუთ ქრისტექ გინიგ, ადამქ ოდინუნ, თიშ დართინაფალო (1 კორ. 15:22). მუშენ მოსაჭირნა გიშაჸიდირალ? მუშენდა იეჰოვაშ სამართლიან ნორმეფ, მუჭოთ თენა თიშ კანონეფშე იძირე, ითხინს, ნამდა სიცოცხლეშ მანგიორო სიცოცხლექ იჸუას გინოგაფილქ (გამ. 21:23, 24). ადამქ სრულყოფილ სიცოცხლე ოდინუ, ათეშენ იესოქ თიშ გიშაჸიდირალო ღორონთიშ სამართლიან ნორმეფიშ მიხედვით მიქცუ დო მუშ სრულყოფილ სიცოცხლე შეწირ (რომ. 5:17). თეშნერო თიქ „მარადიულ მუმათ“ გინირთჷ არძაშო, მით გიშაჸიდირალიშ რწმენას გიმირჩქინანს (ეს. 9:6; რომ. 3:23, 24).

3. მუჭოთ იოანეშ 14:31 დო 15:13-ს ჭარჷ, მუშენ რდუ იესო მზათ შეწირკო მუშ სრულყოფილ სიცოცხლე?

³ იესო მზათ რდუ, შეწირკო მუშ სიცოცხლე თი დიდ ჸოროფაშ გურშენ, ნამუთ ზეციერ მუმა დო ჩქინ მიმართ უღჷ (წეკითხით იოანეშ 14:31; 15:13). თე ჸოროფაქ თინა აღძრჷ, ღურაშა ართგურ ჸოფედკო დო შეასრულკო მუშ მუმაშ ნება. შედეგო, იეჰოვაშ დუდშეიან განზრახვა, ნამუთ კაცობრიობას დო  დედამიწას ოხუდ, შისრულებ. თე სტატიას გუვარჩიენთ, მუშენ დუშვჷ ღორონთიქ, ნამდა იესოქ ღურაშ წოხოლე მანგარო იტანჯკო. თეს გეძინელ, ქიგნვოჯინეთ ბიბლიაშ ართ-ართ მაჭარალიშ მაგალითის, მით მანგარო აფასენდჷ გიშაჸიდირალს. ბოლოს გუვარჩიენთ, მუჭო შემლებნა ვოძირათ, ნამდა ვაფასენთ გიშაჸიდირალს დო მუჭო შემლებნა გუვამანგარათ ჩქინ მარდულობა, თი მსხვერპლიშ მიმართ, ნამუთ იეჰოვა და იესოქ ჩქინო შეწირეს.

4. გეჭარით იესოშ ღურა.

⁴ წერმიდგინით, იესოშ მიწიერ ცხოვრებაშ ბოლო დღა. მართალ რე, თის შეულებ მუშ დაცვებელო ანგელოზეფიშ ლეგიონეფს ქუდუძახას, მარა რომაელ ჯარიშკოჩეფს უფლებას არზენს, ნამდა ოჭოფან დო სასტიკო გოლახან (მათ. 26:52—54; იოან. 18:3; 19:1). თინეფ ირინუანა თიცალ მართახის, ნამუთ ხორცის ეშასოფუნს თიშ სხეულშე. უკულ გოზისხირელ ოჭიშშა მოუბუნუანა მონკა ძელს. იესო იჭყანს თე ძელიშ ნთირუას თი ადგილშა, სოდეთ ოკო ჸვილან, მარა ჭიჭე ხანშა თექ გერენან, თინეფშე ართ-ართის ოღალაფუანა თის (მათ. 27:32). მუჟამსით იესო თი ადგილს ქიმიოჭირინუანს, სოდეთ ოკო ჸვილან, ჯარიშკოჩეფ თის ხელეფით დო კუჩხეფით მიკაჭკადანა. ძელს გეიოპონანან, იესოშ სხეულიშ წონა გიანჯირუ ლისმარელ ადგილეფს დო თინეფ ხოლო უმოსო ინწყუმუ. თიშ მეგობრეფს გურ აფნა ღურელ, დიამუშ ინგარს, მარა იუდეველ მართველეფ გაძიცანა იესოს (ლუკ. 23:32—38; იოან. 19:25). ართ აუტანელ საათის მაჟია მოჸუნს. თეცალ მდგომარეობას მიკობუნ თიშენ, თიშ გურ დო ფილტვეფ გლახათ მუშენს, ათეშენ იესოს შურიშ ღალა ხოლო უმოსო უჭირს. თის მეტ ვეშულებ დო ბოლო ლოცვას იჩიებ. თეშ უკულ დუდ გითუოლუ დო ღურუ (მარ. 15:37; ლუკ. 23:46; იოან. 10:17, 18; 19:30). იესოქ მართალო ჭიე-ჭიეთ, ტანჯებათ, ჭუათ დო დამცირებულო ღურჷ!

5. მუ აწუხენდჷ იესოს ღურაშე უმოსო?

⁵ იესოშო თეცალ ღურა ვა ჸოფე გამოცდაშ არძაშ უმოს გლახა ნაწილ. თის უმოსო თინა აწუხენდჷ, მუდგაშ გურშენ ჸვილუნდეს. იესოს ტყურა ეკაწამეს დო აბრალუაფდეს, ნამდა ვართ ღორონთის დო ვართ თიშ სახელს ვა ცენდჷ პატის (მათ. 26:64—66). თე ბრალდება იესოს მანგარო აწუხენდჷ დო იმენდ უღუდ, ნამდა იეჰოვა ეიოჩილითუანდჷ თეცალ შეურაცხყოფას (მათ. 26:38, 39, 42). მუშენ დუშვჷ იეჰოვაქ მუშ საჸოროფო სქუაშ ტანჯება დო ღურა? მორთ გუვარჩუათ სუმ მიზეზ.

6. მუშენ ოკო მიკაჭკადესკო იესო წამებაშ ბოძის?

⁶ პირველ, იუდეველეფ ჭყალაშე გათავისფალკონ, იესო ძელს ოკო მიკაჭკადესკო (გალ. 3:10, 13). თინეფს ღორონთშა პირობა აფდეს მეჩამილ, ნამდა დემორჩილებდეს თიშ კანონს, მარა თაშ ვაკეთეს. ათეშ გურშენ ადამშე მეღებულ ცოდვაშ სასჯელს ჭყალაქ ხოლო ქიგიაძინ (რომ. 5:12). ისრაელშა მეჩამილ ღორონთიშ კანონ იჩიებუდ, ნამდა ადამიან, ნამუთ ოღურალ ცოდვას გაკეთენდჷ, ოკო დოჸვილესკო. თეშ უკულ თიშ ღურელ სხეულ შილებე ძელს ქიმკაბუნუესკო. * კანონს თინა ხოლო ჭარუდ, ნამდა ძელს მუკობუნაფილ პიროვნება ღორონთშე ჭყელ რდუ (კან. 21:22, 23; 27:26). ათეშენ, ძელს მიკოჭკადუათ იესოქ მუშ დუდშა გეჭოფ იუდეველეფიშ ჭყალა, ნამდა თინეფ თავისფალ ჸოფედესკო თეშე დო იესოშ გიშაჸიდირალს თინეფშა ჯგირობუა ქუმუღალუდკო, თიშ უმკუჯინუო, ნამდა ვარია თქუეს თიშე.

7. მუ რე მაჟია მიზეზ, მუდგაშ გურშენ იეჰოვაქ დუშვჷ მუშ სქუაშ ტანჯება?

⁷ გუვარჩუათ მაჟია მიზეზ, მუდგაშ გურშენ დუშვჷ ღორონთიქ მუშ სქუაშ ტანჯება.  თინა ამზადენდჷ იესოს მომავალ პასუხიშმგებლობაშო, ნამდა ჩქინ მღვდელმთავარ ჸოფედკო. იესოქ გეგმოცად, მუნერ ძნელ რე ღორონთიშ მორჩილება მანგარ რთულ გამოცდაშ დროს. თინა დუდის თიცალ გლახათ გინაფლენდჷ, ნამდა „ხონარმაღალ ხვეწინით დო ჩილამურით“ ითხინდჷ მოხვარას. მუშო ოკო რაგად, თე ირფელიშ გინოღალაშ უკულ იესოს არჩქილე ჩქინ საჭიროებეფ დო „[ჩქინ] მოხვარა ხოლო შეულებ“, მუჟამსით გიმიფცადებუთ. მანგარ მარდულეფ ვორეთ იეჰოვაშ, მუშენდა თიქ გემრინუეს მოჭყოლოფე მღვდელმთავარ, მიდგას უჩქჷ, მუ „სისუსტეეფს ვობრძოლუთ“ (ებრ. 2:17, 18; 4:14—16; 5:7—10).

8. მუ რე მასმა მიზეზ, მუდგაშ გურშენ ღორონთიქ იესოშ სასტიკო ტანჯება დუშვჷ?

⁸ მასმა, იეჰოვაქ თიშენ დუშვჷ იესოშ სასტიკო ტანჯება, ნამდა ქიმიაჩკო პასუხიქ მნიშვნელოვან კითხვას: ქეშულებნანო ადამიანეფს, ვადინუან ართგურობა თიმწკუმა ხოლო, მუჟამსით სასტიკო გიმიცადებნა? სატანა იჩიებ, ნამდა თენა მითინს ვეშულებ დო ხალხ ხვალე სარგებელიშ მიოღებელო ომსახურ ღორონთის. თის ჯერს, ნამდა ადამიანეფს, მუნეფიშ წინაპარ ადამცალო, ვა უჸორა იეჰოვა (იობ. 1:9—11; 2:4, 5). მუშ სქუაშ ართგურობაშა დარწმუნებულ რდუნ, თიშენ დუშვჷ იეჰოვაქ თიშ უკანასკნელშა ტანჯება. იესოს ვა უდინუაფ უმწიკვლობა დო დამტკიც, ნამდა სატანა მეტყურე რე.

9. მუ მაგალით მუჩეს მოციქულ იოანექ?

⁹ გიშაჸიდირალიშ გურშენ გურაფაქ ბრელ ქრისტიანიშ რწმენა გამანგარ. თინეფ აგრძელენდეს ქადაგებას წინააღმდეგობეფიშ უმკუჯინუო დო მთელ ცხოვრებას ურზუდეს სირთულეეფს. დეფიქრით მოციქულ იოანეშ მაგალითშე. თინა სოდგარენ 60 წანაშე მეტ ხანს ართგურო ქადაგენდჷ ქრისტე დო გიშაჸიდირალიშ გურშენ ჭეშმარიტებას. 100 წანაშა ბრელ ვემუძუდუნ თეშ, რომაელ მართველეფქ თინა ოშქურანჯო მირჩქინეს დო ათეშენ კუნძულ პატმოსიშ ციხეს ქიმთახუნეს. მუშ გურშენ ჭოფეს იოანე? „ღორონთშე დო იესოშე ქადაგებაშ გურშენ“ (გამოცხ. 1:9). რწმენაშ დო მოთვინებაშ მუშმაჯგირა მაგალით რე!

10. მუჭო იძირე იოანეშ ნაჭარეფშე, ნამდა თინა აფასენდჷ გიშაჸიდირალს?

¹⁰ იოანე იესოშ დიდ ჸოროფას დო გიშაჸიდირალიშ მარდულობას ღორონთშე შთაგონებულ მუშ ნაჭარეფს გიმოხანტუნს. თიშ ნაჭარა წიგნეფს 100-შე მეტ ადგილს მეურს ჩიება გიშაჸიდირალშე ვარდა თიშე, მუ ჯგირობუა მოუღ თის. მაგალთო, იოანექ ჭარჷ: „მიდგაინ იშენ შეცოდენს-და, პჸუნა აკმარიგებელ მუმაწკუმა, მართალ იესო ქრისტე“ (1 იოან. 2:1, 2). იოანეშ ნაჭარეფ ყურადღებას თიშე ხოლო ამახვილენს, მუსხით მნიშვნელოვან რე იესოშ გურშენ ქადაგება (გამოცხ. 19:10). არგამა რე, იოანე მანგარო აფასენდჷ გიშაჸიდირალს. მუჭო შემლებნა ვოძირუათ, ნამდა თეს ჩქი ხოლო ვაფასენთ?

11. მუ მიმეხვარებნა, ქივეწინააღმდეგათ ცდუნებას?

¹¹ ქეწინააღმდეგით ცოდვაშ ცდუნებას. გიშაჸიდირალს ნამდვილო ქუვაფასენთ-და, თაშ ვეფიფქრენთ: „ცდუნებაშ დროს ვა რე აუცილებერ, მანგარო ქივეწინააღმდეგენ. შემლებ შეფცოდე დო უკულ იეჰოვას პატიება ქოფთხუე“. თეშ გინაწონს, მუჟამსით მუდგარენ გლახაშ კეთებაშ ცდუნებაშ წოხოლე გივორეთ, ჩქი ფთქუანთ: „ვარ! მუჭო შემლებ თეცალ მუდგარენ ვაკეთე თიშ უკულ, მუთ იეჰოვა დო იესოქ ჩქიმ გურშენ აკეთეს?“. თაშ ნამდა, ჩქი შემლებნა იეჰოვას ფთხუათ ძალა დო ვუწუათ: „ქიმმეხვარ, ცდუნებას ვევაჸუნე“ (მათ. 6:13).

12. მუჭო შემლებნა გიმიბრინუათ 1 იოანეშ 3:16—18-ს მოჩამილ რჩევა?

¹² გიჸორდან და დო ჯიმალეფ. ჸოროფაშ გიმორჩქინათ თის ხოლო ვოძირანთ, ნამდა  ვაფასენთ გიშაჸიდირალს. მუშენდა იესოქ მუშ სიცოცხლე ხვალე ჩქინო ვარინ, ჩქინ და დო ჯიმალეფშო ხოლო გაწირ. თინა ჩქინ თანაქრისტიანეფიშ გურშენ ღურაშო მზათ ქორდ-და, გიშურს, ნამდა მანგარ ძვირფასეფ რენა იესოშ თოლს (წეკითხით 1 იოანეშ 3:16—18). და დო ჯიმალეფიშ ჸოროფას ვოძირანთ თით, მუჭო ვოქცუთ თინეფს (ეფეს. 4:29, 31—5:2). მაგალთო, ჩქი ვოხვარუთ, მუჟამსით გლახათ რენა ვარდა გინუღნა სირთულეეფ, მუდგაშა სტიქიურ უბედრობეფ ხოლო მიშურს. მარა მუ ოკო ვაკეთათ, მუჟამსით თანამორწმუნე თიცალ მუდგარენს ორთჷ ვარდა იჩიებ, მუთ გურს ალმოჭუანა?

13. მუშენ ოკო ვაპატუათ შხვეფს?

¹³ თანამორწმუნეეფიშ მიმართ ჟღამს გურშა ხომ ვალედვანთ? (ლევ. 19:18). თაშ ქორენ-და, თე რჩევას ქიმიაჸუნით: „მუთვინით დო მთელ გურით ქაპატით ართიანს, თიმწკუმა ხოლო, მუჟამსით მიდგაინიშ წინააღმდეგ ჩიულიშ მიზეზ გიღნა. მუჭოთ იეჰოვაქ გაპატის მთელ გურით, თქვა ხოლო თეშ ქაპატით ართიანს“ (კოლ. 3:13). ირ შემთხვევას, მუჟამსით ვაპატიენთ და ვარდა ჯიმას, ჩქინ ზეციერ მუმას ვუმტკიცენთ, ნამდა ნამდვილო ვაფასენთ გიშაჸიდირალს. მუჭო შემლებნა გუვამანგარათ ღორონთშე მეღებულ თე ძღვინიშ მარდულობა?

14. მუ რე ართ-ართ საშვალება, მუდგათ შემლებნა უმოსო გემამგარათ გიშაჸიდირალიშ მარდულობა?

¹⁴ მარდულ რდათ იეჰოვაშ გიშაჸიდირალიშ გურშენ. 83 წანერ და, ჯოანა, ნამუთ ინდოეთის ცხოვრენს, იჩიებ: „ჩქიმ აზრით, მანგარ მნიშვნელოვან რე ირდღაშიან ლოცვეფიშ დროს გიშაჸიდირალიშ მოშინაფა დო იეჰოვაშა მადლობაშ რაგად“. პირად ლოცვეფიშ დროს ქეჩით იეჰოვას კონკრეტულ შეცდომეფიშ გურშენ, მუთ თიმ დღას დუშვით დო ქოთხით პატიება. მუშო ოკო რაგად, სერიოზულო ქეშეცოდით-და, უხუცესეფიშ მოხვარა ხოლო დეგესაჭირებნა. თინეფ ქუმოირჩქილუანა დო ჸოროფათ ქიმერჩანა რჩევას ღორონთიშ სიტყვაშე. უხუცესეფ თქვანწკუმა ართო ქილოცენა დო ქოთხინა იეჰოვას, ნამდა იესოშ მსხვერპლიშ საფუძველშა გაპატუან, შედეგო სულიერო გეგმიჯამრთელებუთ (იაკ. 5:14—16).

15. მუშენ ოკო გიმურთათ დრო გიშაჸიდირალშე კითხირს დო ფიქრის?

¹⁵ ქიფიქრით გიშაჸიდირალშე. 73 წანერ და, რაჯამანი, იჩიებ: „ირო, მუჟამსით იესოშ ტანჯებაშ გურშენ ბკითხულენქ, თოლეფ ჩილამურით ემაფშაფუ“. ღორონთიშ სქუაშ ტანჯებაშე ფიქრ შილებე თქვანო ხოლო ემოციურ რდას. მარა მუთ უმოსო  დეფიქრებუთ იესოშ მსხვერპლშე, თით უმოსო გეგემანგარებნა თიშ დო იეჰოვაშ ჸოროფა. ჯგირ იჸუაფ, თქვან გურაფაშ გეგმას ქინახუნუათ თე საკითხ, მუთ მიგეხვარებნა გიშაჸიდირალშე ფიქრის.

16. მუჭო შილებე მომღან ჯგირობუა შხვეფშა გიშაჸიდირალიშ გურშენ გურაფაქ? (ქოძირით სურათ გალენ გვერდის)

¹⁶ ქუდაგურეთ შხვეფს გიშაჸიდირალიშ გურშენ. ირო, მუჟამსით შხვეფს გიშაჸიდირალიშ გურშენ ვეჩიებუთ, ჩქინ მარდულობა თიშ მიმართ უმოსო ირდუ. ჩქი მანგარ ჯგირ საშვალებეფ მიღნა, შხვეფშა თიშ დაგურაფალო, მუშენ ოკო ღურკო იესოქ ჩქინ გურშენ. მაგალთო, შემლებნა გიმიბრინუათ მა-4 გაკვეთილ ბროშურაშ „სახიოლო ამბე ღორონთიშე!“ თე გაკვეთილიშ სათაურ რე, „მი რე იესო ქრისტე?“ ვარდა შემლებნა გიმიბრინუათ მა-5 დუდ წიგნიშ „მუს მოგურუანა ბიბლია?“ თე დუდიშ სათაურ რე, „გიშაჸიდირალი — ღორონთიშ დიდებულ საჩუქარი“. თეს გეძინელ, ირ წანას გოშინაშ ონჯუას დასწრებათ დო შხვეფიშ მთელ გურით დაპატიჟებათ უმოსო ვამანგარენთ გიშაჸიდირალიშ მარდულობას. მუშმადიდა პატი მუჩეს იეჰოვაქ, ნამდა ვოგურუათ თიშ სქუაშ გურშენ!

17. მუშენ რე გიშაჸიდირალ კაცობრიობაშა მეჩამილ ღორონთიშ არძაშ უმოს დიდ ძღვინ?

¹⁷ არგამა რე, ჯგირ მიზეზეფ მიღნა, ნამდა გუვავითარათ დო ვა ვოდინუათ გიშაჸიდირალიშ მარდულობა. გიშაჸიდირალიშ ჭყოლოფათ, შემლებნა იეჰოვაწკუმა ხოლოშიან ურთიერთობა მიღდან, თიშ უმკუჯინუო, ნამდა არასრულყოფილეფ ვორეთ. გიშაჸიდირალიშ ჭყოლოფათ, ეშმაკიშ საქმეეფ საბოლათ მისპუ (1 იოან. 3:8). გიშაჸიდირალიშ ჭყოლოფათ, დედამიწაშ გურშენ იეჰოვაშ დუდშეიან განზრახვა შისრულებ. მთლიან პლანეტა სამოთხეთ გინირთუ. არძას, მიდგას შეხვადუთ, უჸორდას იჸი იეჰოვა დო ომსახურდას იჸი თის. ათეშენ მორთ ირდღას დობგორათ საშვალებეფ გიშაჸიდირალიშ — კაცობრიობაშა მეჩამილ ღორონთიშ არძაშ უმოს დიდ ძღვინიშ — მარდულობაშ ოძირაფალო!