1-2. Mang fare biyul, ma mang fan nib t’uf rodad?

NAP’AN ni denen Adam ni ir be’ nib flont, me mul e athap ko yafos ni manemus u pa’ ni kub muun pi fak ngay nra bad nga tomuren. Dariy e tawey rok Adam, ya lem rok ni nge denen. Machane uw rogon pi fak? Ya yad e dariy ban’en nib kireb ni kar rin’ed maku dar waliyed Adam ni nge denen. (Rom. 5:12, 14) Adam e bay tapgin ni nge yim’ ko kireb rok. Machane gur, bay ban’en nrayog ni nge rin’ Jehovah ya nge yag e yafos ni manemus ngak pi fak Adam, fa? Arrogon! De n’uw nap’an nga tomuren ni denen Adam, ma aram me tabab Jehovah ni nge dag rogon ni nge chuweg bokum milyon pi fak Adam u tan gelngin e denen nge yam’ ni ke af ngorad. (Gen. 3:15) Ra taw ko ngiyal’ ni ke dugliy, ma aram e ra l’og Fak u tharmiy nga fayleng ni nge “pi’ e pogofan rok nge biyuliy e girdi’ ni pire’ ngay.”​—Mark 10:45; John 6:51.

² Mang fare biyul? Nap’an ni yira weliy murung’agen fare biyul ko Pi Babyor ko Bible nni Yoloy Nsom’on ni Thin ni Greek, ma be yip’ fan e yafos rok Jesus ni pi’ ni nge yan nga lon e n’en ke mul u pa’ Adam. (1 Kor. 15:22) Mang fan nib t’uf e re biyul ney? Ya rogon e tin nib mat’aw u wan’ Jehovah ni be m’ug ko fare Motochiyel e be dag ni puluwon e pogofan e ku pogofan. (Ex. 21:23, 24) I mul u pa’ Adam e yafos rok nib flont. Ere thingari pi’ Jesus e yafos rok nib flont nib maligach ya nge yag ni puluw nga rogon e tin nib mat’aw u wan’ Got. (Rom. 5:17) Nap’an ni rin’ Jesus e re n’ey, ma aram e ke mang ‘Chitamangin’ urngin e piin nra mich fare biyul u wan’rad ni manemus.​—Isa. 9:6; Rom. 3:23, 24.

3. Mang fan nib m’agan’ Jesus ngay ni nge pi’ e yafos rok nib flont ni nge biyuliy e girdi’ ngay nrogon ni bay ko John 14:31 nge 15:13?

³ Bochan nrib t’uf rok Jesus e Chitamangin ni bay u tharmiy, maku arrogodad nri gad ba t’uf rok, ma aram fan nib m’agan’ ngay ni nge pi’ e yafos rok nib maligach. (Mu beeg e John 14:31; 15:13.) Ku re t’ufeg nem e aram e n’en ni k’aring ni nge dugliy u wan’ ni nge par nib yul’yul’ u n’umngin nap’an e yafos rok me  lebguy e n’en nib m’agan’ e Chitamangin ngay. Bochan e n’en ni rin’, ma aram fan nrayog ni nge lebug e n’en nib m’agan’ Jehovah ngay ni fan ko girdi’ nge fayleng aram ko tabolngin. U lan e re article ney e gad ra weliy riy fan ni pag Got Jesus ni ngari gafgow nib gel u m’on ni nge yim’. Ku gad ra weliy e n’en ni rin’ be’ ni yoloy boch e babyor ko Bible nri kub ga’ fan fare biyul u wan’. Ma tomur riy e gad ra weliy rogon ni ngad daged ni gad be pining e magar ko fare biyul ni kan pi’ nge rogon ni ngari ga’ fan u wan’dad fare maligach ni ke pi’ Jehovah nge Jesus ni fan ngodad.

4. Mu weliy rogon e yam’ ni tay Jesus.

⁴ Mu lemnag e n’en ni buch rok Jesus ko bin tomur e rran u m’on ni ngan li’ nge yim’. Yugu aram rogon nrayog ni nge pining yu ulung i engel ni ngar bad ngar ayuweged, machane me pag e pi salthaw nu Roma ni ngar koled ngemu’ mar toyed nib elmerin. (Matt. 26:52-54; John 18:3; 19:1) Ur toyed ko dimow nib gel nga i math’math’ yu yang u downgin. Boch nga tomuren, mar n’igined ni nge af ba ley i gek’iy nib tomal nga daken pon nge fek ni yugu aram rogon ni be lul’ e racha’ u daken keru’ nga but’. Ere guy Jesus rogon ni nge girngiy fare ley i gek’iy i yan ko gin ni ngan li’ riy. Machane de n’uw nap’an nga tomuren, ma aram me yog fapi salthaw nu Roma ngak yugu reb e pumoon ni nge mang ir e fek fare ley i gek’iy. (Matt. 27:32) Nap’an ni taw Jesus ko gin ngan li’ riy, ma aram me richibiy fapi salthaw pa’ nge ay ko fare ley i gek’iy. Nap’an ni suweg fapi salthaw fare ley i gek’iy nga lang, me gel boch e maad’ad ko gin ni kan richibiy u downgin Jesus ni bochan malngin. Ri kireban’ e pi fager rok mi i yor e chitiningin, machane pi tayugang’ ko Jew e ur moningniged. (Luke 23:32-38; John 19:25) Boor e awa ni gafgow Jesus u fithik’ e amith. I maruwel gum’irchaen nge worrum rok nib pag rogon ni bochan rogon ni bay u daken fare ley i gek’iy. Ere rib mo’maw’ rogon ni nge pogofan. Nap’an ni be n’en ni nge aw e fan rok, ma aram me meybil ngak Jehovah ko yay nth’abi tomur. Ngemu’ me thingeg lolugen ni ke aw e fan rok. (Mark 15:37; Luke 23:46; John 10:17, 18; 19:30) Riyul’ nrib sagaal e yam’ ni tay Jesus, mab gel e amith nge tamra’ riy!

5. Mang e kab gel e kireb riy u wan’ Jesus ko rogon e yam’ ni nge tay?

⁵ Rogon nni li’ Jesus nge yim’ e gathi ri aram e n’en nri i magafan’ ngay. Kab gel e magafan’ ni i tay nga rogon fan nnog ni ngan li’ nge yim’. Nni t’ar e thin nga daken nga nog ni ke darifannag Got nge fithingan. (Matt. 26:64-66) Ere ra lemnag Jesus rogon ni nga nog nib kireb e rok ni ke darifannag Got, ma rib gel e magafan’ ni k’aring ngak, ma aram mi i athapeg ni manga yigi dabi pag e Chitamangin ni ngan tamra’nag ni aram rogon. (Matt. 26:38, 39, 42) Mang fan ni pag Jehovah Fak nrib t’uf rok ni nge gafgow nge yim’? Ngad weliyed dalip i fan.

6. Mang fan nthingar ni tining Jesus nga ba ley i gek’iy?

⁶ Som’on e, thingar ni tining Jesus nga ba ley i gek’iy ni bochan e nge yag ni chuweg e pi Jew u tan e buch waathan ni keb ngorad. (Gal. 3:10, 13) Ke buch waathrad ni bochan e ra micheged ni ngar folgad ko Motochiyel rok Got ma dar rin’ed. Ere bay tapgin ni ngar m’ad ni bochan e yad pi fak Adam, nge ku bochan ni ke buch waathrad. (Rom. 5:12) Fare Motochiyel ni pi’ Got ngak piyu Israel e be yog ni faanra rin’ be’ reb e denen ni bay tapgin ni ngan thang e fan rok riy, ma susun e ngan rin’. Tomuren, ma aram min tining nga ba ley i ren. * (Deut. 21:22, 23; 27:26) Ere bochan ni kan tining Jesus nga ba ley i gek’iy, ma aram fan nrayog ni ngan chuweg e re buch waathan ney u daken e pi Jew, miki yib angin e maligach ni ke pi’ ngorad ni yugu aram rogon nra togopuluwgad ngak.

7. Mang e bin l’agruw i fan ni pag Got Fak ni nge gafgow?

 ⁷ Baaray e bin l’agruw i fan ni pag Got Fak ni nge gafgow. Be fal’eg rogon ni fan ko maruwel nra rin’ boch nga m’on ni ir e Prist Nth’abi Tolang. I guy Jesus gelngin e mo’maw’ riy ni ngan fol ko motochiyel rok Got u fithik’ e tin th’abi mo’maw’ e skeng. Bochan gelngin e mochuch ni tay, ma aram me yibilay e ayuw “ni ba ga’ laman u fithik’ e lu’.” Bochan e re n’ey ni buch rok Jesus, ma aram fan ni manang e tin nib t’uf rodad ma ‘rayog ni nge ayuwegdad’ u nap’an ni ke yib ngodad e “n’en ni ma waliy e girdi’ nge denen.” Ri gad be pining e magar ngak Jehovah ni ke pi’ ba Prist Nth’abi Tolang nrayog ni nge “kireban’ ngodad nga fadad meewar”!​—Heb. 2:17, 18; 4:14-16; 5:7-10.

8. Mang e bin dalip i fan ni pag Got Jesus ni ngari gafgow nib gel?

⁸ Bin dalip i fan ni pag Jehovah Jesus ni ngari gafgow nib gel e bochan e nge pi’ e fulweg u reb e deer nrib ga’ fan. Re deer nem e: Gur, rayog ni nge par e girdi’ ni yad ba yul’yul’ ngak Jehovah ngki mada’ ko ngiyal’ ni kar mada’naged e tin th’abi mo’maw’ e skeng? Satan e ke yog ndabiyog! Ke yog ni kemus ni fan ni be pigpig e girdi’ ngak Got e bochan ni yad baadag ni nge pi’ boch ban’en ngorad. Mab mich u wan’ nde t’uf Jehovah rorad ni bod rogon Adam. (Job 1:9-11; 2:4, 5) Ere ke pag Jehovah Jesus ni ngan skengnag nge yan i mus nga rogon nrayog ni ngan skengnag be’ nib girdi’ ni bochan e ba pagan’ ngak Fak nra par nib yul’yul’. I par Jesus nib yul’yul’ me micheg ni Satan e ba malulfith l’igin.

9. Mang e kanawo’ nib manigil ni ke dag apostal John nrayog ni ngad folwokgad riy?

⁹ Boor e Kristiano ni ke yag ni nge gel e michan’ rodad ni bochan fare machib u murung’agen fare biyul. Be yag ni ngar ululgad ko machib ni yugu aram rogon ni yibe togopuluw ngorad, ma kar athamgilgad u fithik’ urngin e skeng ni keb ngorad ke mada’ ko ngiyal’ ni kar pilibthirgad. Am lemnag e n’en ni buch rok apostal John. Rayog nib pag 60 e duw ni machibnag e tin riyul’ u murung’agen Kristus nge fare biyul. Nap’an ni ke chugur ni nge gaman 100 e duw rok, me lemnag e am nu Roma nra magawonnag rogon e pi n’en yad be rin’, ma aram fan nranod ra kalbusnaged ko fare donguch nu Patmos. Mang e ke rin’ nib kireb? Be “weliy e thin rok Got nge tin riyul’” u murung’agen Jesus. (Rev. 1:9) Rib manigil e kanawo’ ni ke dag John u rogon ni par nib gel e michan’ rok ma be athamgil!

10. Uw rogon ni m’ug u lan e pi babyor ni yoloy John nib ga’ fan fare biyul u wan’?

¹⁰ U lan fapi babyor ko Bible ni yoloy John e weliy riy rogon feni t’uf Jesus rok, nge rogon feni ga’ fan u wan’ fare biyul ni pi’. Ba pag 100 yay ni weliy murung’agen fare biyul, ara angin nra yib ngodad. Bod ni bay bang ni yoloy riy ni gaar: “Faanra chey nge denen be’, ma ba’ Jesus Kristus, ni be’ nib mat’aw, ni ma wenignagdad ngak e en ni Chitamangiy.” (1 John 2:1, 2) Ki tamilangnag John u lan e pi babyor ni yoloy feni ga’ fan ni ngan machibnag e “tin nib riyul’” u murung’agen Jesus. (Rev. 19:10) Ere ba tamilang nrib ga’ fan fare biyul u wan’ John. Me gadad, uw rogon ni ngad daged ni kub ga’ fan u wan’dad?

11. Mang e ra ayuwegdad ni ngad siyeged e pi lumel ni ma yib ngodad?

¹¹ Mu siyeg e pi lumel ni ma yib ngom nra waliyem ngam denen. Faanra rib ga’ fan fare biyul u wan’dad, ma aram e dabi lungudad u wan’dad: ‘Dariy rogon ni nggu athamgil ndab gu denen u nap’an nra yib e lumel ngog. Rayog ni nggu denen, ngemu’ mug wenig ni ngan n’ag fan rog.’ Ya n’en ni gad ra rin’ e nap’an nra yib e lumel ngodad ni ngad rin’ed ban’en nib kireb, ma ra lungudad: ‘Danga’! Gu ra lemnag urngin ban’en ni ke rin’ Jehovah nge Jesus ni fan ngog, ma dab gu adag ni nggu rin’ ban’en ni aray rogon.’ Ere gad  ra meybil ngak Jehovah ngad ninged gelngin, ma gad wenig ngak ni lungudad: ‘Dab mu pageg nggu aw ko pi lumel ni be yib ngog.’​—Matt. 6:13.

12. Uw rogon nrayog ni ngad folgad ko fare fonow ni bay ko 1 John 3:16-18?

¹² Mu t’ufeg pi walagem. Faanra ud daged e mit ney e t’ufeg, ma aram e ku gad be dag nib ga’ fan fare biyul u wan’dad. Mang fan? Ya gathi goo gadad e pi’ Jesus e yafos rok ni fan ngodad, ya kub muun pi walagdad ngay. Ere faanra ba m’agan’ ngay ni nge yim’ ni fan ngak pi walagdad, me ere ba tamilang nri yad ba t’uf rok. (Mu beeg e 1 John 3:16-18.) Gad ma dag nib t’uf pi walagdad rodad u rogon e ngongol rodad ngorad. (Efe. 4:29, 31–5:2) Bod ni gad ma ayuwegrad u nap’an ni kar m’argad, ara nap’an ni yad be mada’nag boch e magawon nrib gel e mo’maw’ riy nib muun ngay e yoko’, ara durru’, ara ku boch ban’en ni yima gafgow riy. Machane uw rogon ni faanra bay reb e walag ni ke rin’ ara ke yog ban’en ndubdad? Mang e susun ni ngad rin’ed?

13. Mang fan nsusun e ngaud n’aged fan e kireb ni kan rin’ ngodad?

¹³ Bay yu ngiyal’ nib mo’maw’ ni ngam n’ag fan e n’en ke rin’ reb e walag ngom, fa? (Lev. 19:18) Faanra bay, ma ngam fol ko re fonow ni baaray ni be gaar: “Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.” (Kol. 3:13) Urngin yay ni gad ra n’ag fan e kireb ni ke rin’ reb i walagdad ngodad, ma aram e gad be micheg ngak e Chitamangidad ni bay u tharmiy nrib ga’ fan fare biyul u wan’dad. Ere uw rogon ni ngad ululgad ni ngari ga’ fan u wan’dad e re tow’ath ney ni ke yib rok Got?

14. Mang reb e kanawo’ nra ayuwegdad ni ngari ga’ fan fare biyul u wan’dad?

¹⁴ Mu pining e magar ngak Jehovah ko fare biyul. Reb e walag nib pin ni ma par u India ni 83 e duw rok ni ka nog Joanna ngak e yog ni gaar: “Gu be lemnag nib ga’ fan ni ngaug uneg murung’agen fare biyul u lan e meybil nug ma tay ni gubin e rran, mug pining e magar riy ngak Jehovah.” Nap’an ni ga be meybil ni goo gur u reb e rran ngu reb, mag lemnag boch e oloboch ni kam rin’ e rofen nem, mag wenig ngak Jehovah ni nge n’ag fan rom. Machane faanra kam rin’ reb e denen nib ubchiya’, ma kub t’uf ni ga ra ning e ayuw ko piin piilal. Yad ra motoyil mar pied boch e fonow ngom ni kar feked u lan e Thin rok Got.  Gimed ra meybil u taabang, ma rogned ngak Jehovah ni nge n’ag fan e kireb rom ya nge yag ni ngki fel’ e tha’ u thilmew bayay.​—Jas. 5:14-16.

15. Mang fan nsusun e ngaud ted e tayim ni ngaud beeged murung’agen fare biyul ma gad be fal’eg i lemnag?

¹⁵ Mu fal’eg i lemnag murung’agen fare biyul. Reb e walag nib pin ni 73 e duw rok ni ka nog Rajamani ngak e yog ni gaar: “Nap’an nug ra beeg murung’agen e gafgow nni tay ngak Jesus, ma ma sugsug e lu’ nga owcheg.” Sana ku arrogon gur nnap’an ni ga ra lemnag murung’agen e gafgow ni tay Fak Got ma ri ma kireban’um ngak. Machane faanra um par ni ga be fal’eg i lemnag fare biyul ni pi’ Jesus, ma rra gel feni t’uf Jesus rom nge Chitamangin. Ere mang ndab mu tay ba ngiyal’ ni ngam fil murung’agen fare biyul u nap’an e fol Bible ni ga ma tay ni goo gur, ya nge yag ni ayuwegem ni ngam fal’eg i lemnag murung’agen e re n’ey?

16. Faanra ud filed ko girdi’ murung’agen fare biyul, ma uw rogon nra yib angin ngodad? (Mu guy e sasing ni bay u wuru’ e re ke babyor ney.)

¹⁶ Mu fil murung’agen fare biyul ko girdi’. Urngin yay ni gad ra weliy murung’agen fare biyul ngak be’, ma aram e ri be ga’ fan u wan’dad. Bay yu ken e babyor nge video ni kan ngongliy nib manigil ni be ayuwegdad u rogon ni ngad weliyed ngak be’ fan ni yim’ Jesus ni fan ngodad. Bod nrayog ni ngan fanayed e guruy ni 4 ko fare brochure ni Thin nib Fel’ ni Yib rok Got! ni kenggin e, “Mini’ Jesus Kristus?” Fa reb e rayog ni ngad weliyed e n’en bay ko guruy ni 5 ko fare ke babyor ni Mang e Ri Be Fil e Bible? ni kenggin e, “Fare Biyul e Bin Th’abi Fel’ e Tow’ath ni Pi’ Got.” Maku reb e, gubin e duw nri ma gel feni ga’ fan fare biyul u wan’dad u nap’an ni gad ra un ko fare Puguran ko yam’ ni tay Jesus, ngu nap’an ni gad be pining e girdi’ ni ngar uned ngodad ko re madnom ney. Ri gad ba tow’ath ni ke pi’ Jehovah e biney e maruwel ngodad ni ngad filed ko girdi’ murung’agen Fak!

17. Mang fan ni fare biyul e aram e bin th’abi fel’ e tow’ath ni ke pi’ Got ni fan ko girdi’?

¹⁷ Dariy e maruwar riy ni bay tapgin ni ngad maruweliyed ni ngari ga’ fan fare biyul u wan’dad mi i par nib ga’ fan u wan’dad. Bochan fare biyul, ma aram fan nrayog ni ngari chugur e tha’ u thildad Jehovah ni yugu aram rogon ndawor da flontgad. Maku bochan e re n’ey, ma yira kirebnag urngin e maruwel rok Moonyan’. (1 John 3:8) Ku aram e n’en nra bing e kanawo’ ni nge lebug e n’en nib m’agan’ Jehovah ngay ni fan ko fayleng. Ra paradis e fayleng ni ga’ngin. Urngin e girdi’ ni ga ra mada’nag e ba t’uf Jehovah rorad ma yad be pigpig ngak. Ere gubin e rran ni ngad athamgilgad ngad lemnaged boch e kanawo’ nrayog ni ngad daged riy nib ga’ fan fare biyul u wan’dad ni aram e bin th’abi fel’ e tow’ath ni ke pi’ Got ni fan ko girdi’!