1-2. Ginihe nga motumo tumorii, na tipagine ani aidaha ti ni?

HO GU rengberengbe kumba nangia Adamu aingipai ni, ko azanga gu momu nga ga raka nyeanye kindi, angianga kina ko sa ya, ono agu awiriko naadu kumbatayo a. Pai aadunga ho Adamu arengbe ka gumbaha ki ya si du nasako ko mangi gupai re te. Ko ata ino aino kini mangi gu ingapai re. Ono na awiriko tigayo? I aafunga bee kandara tooni kuti ga Adamu ingapai te. (Rom. 5:12, 14) Si arẽarẽ Adamu kpi tipa gupai ko amangihe. Ono ya mo pai ho ka Yekova arengbe ka mangaha tipa gupai nga awiri Adamu raki nyeanye kindi? Ii! Nibasa tingbafuo Adamu ingipai, Yekova atona ka yugo wai ko nika batasa amirioni awiri Adamu be ingapai na kpio. (Bam. P. 3:15) Si adu nga Yekova nika keda wiriko ngbangbaturũ yo ti gu regbo da bangiriko tipa “ka tumo dungu yo ni ungako.”—Mk. 10:45; Yo. 6:51.

² Ginihe nga motumo tumorii? Ho i afura ni tipa motumo tumorii rogo Vovo Ndika yo, si nga gu motumo Yesu afuhe tipa ka ngbe guhe kubaha Adamu azangaha. (1 Kor. 15:22) Tipagine ani aaida na motumo tumorii ti ni? Bambiko gu ga Yekova gene mangaapai nga ga ruru sarangbanga nga gu du rogo aNdiko yo aape gupai nga i fu unga tipa unga. (Gate 21:23, 24) Adamu azanga ungako nga gu naadu ni rengberengbehe. Tipa gupai nga pai mangi ringbisihe kuti ga Mbori ruru sarangbanga, Yesu atumo na ungako nga gu naadu ni rengberengbehe. (Rom. 5:17) Rogo gi gene re, ko kini da ni nyenye “ba” fu agu aboro dunduko du na idapase kuti motumo tumorii.—Yes. 9:6; Rom. 3:23, 24.

3. Ringbisihe kuti Yoane 14:31 na 15:13, tipagine Yesu adu ti ni na nyemu ka fu ungako nga gu naadu ni rengberengbehe ni motumo?

³ Yesu adu na nyemu ka tumo na ungako mbiko gako bakere nyemuse tipa gu Bako du ngbangbaturũ yo na tipa rani. (Oni gedi Yoane 14:31; 15:13.) Mbiko gupai nga Yesu ima kpinyemu  Yekova gbiati rani ni bakerehe, ko adiberã ka nye ni ruruko rogo gako raka yo naabaha na ka digiso gupai Bako akpinyemuhe. Ko amangihe wo ni nye ko ni ruruko dakuti gu regbo ko akpi. Ni sangbana gipai re, gu ga Yekova ringbisapai naadu ti tonatonaha tipa ngbatunga aboro dunduko na tipa kpotosende nika digiso tihe. Rogo gi kekeapai re, ani nika sakapai tipa ndu gupai Mbori ambu Yesu ti ni ko gbiatiko na arungosiro ni kerehe gbe mbata fu ko kpi. Ani nika fugöpai a ni guruhe tipa gu kpiapai nga ga kura bake Baibiri sa nga guko naadu na bakere tambuahe tipa motumo tumorii. Na ni yangaraha tie, ani nika sakapai tipa wai rengbe ani ka yugo gaani tambuahe tipa motumo tumorii, na wai rengbe ani ka kiiso gaani tambuahe tipa gu motumo aYekova na Yesu afuhe furani.

4. Oni sakingo pai tipa wai Yesu akpi.

⁴ Oni berẽnga pa agu apai namangi rogo gu yangara uru naadu mbata fu i imi Yesu. Wa si avura du nga Yesu aima rengba ka yamba badungu amaraika tipa i ye ka bandako, ko aamanganga ha wo te, ko ambu tiko tipa agu abanzengere nangia ga Roma yo ziko, nga aguyo naata ko zanga nunga. (Mt. 26:52-54; Yo. 18:3; 19:1) I ata ko na gu kpudu ko aima õka behe ni kerehe. Kusa, i asako ko tindi rõrõi ngbunduru ngua giiko yo, na gu giiko yo re aima du na oro ti ni. Yesu aasadi ka tindaha ku rogo gu ba i aandu ka imoko rogoho, ono fuo bete regbo kusa, agu abanzengere nangia ga Roma yo kini ya fu gu kura kumba ko tindihe fuko. (Mt. 27:32) Ho Yesu ada ni rogo gu ba i aandu ka imoko rogoho, agu abanzengere re abanga abeko gbiati anduko na anari kuti ngbunduru ngua. Rõa Yesu asa gupai nga kpoto Yesu siri rogo agu aba aro anari adu rogoho. Abakurea Yesu adu rogo imisiri, na nako kini kpari, ono ga aYudo abazogo aasawia ko asawia. (Rk. 23:32-38; Yo. 19:25) Yesu adu rogo imisiri tipa dungu asa. Mbiko gu gene i ahasi Yesu ngbaha, si asa gupai nga ngbaduko gbiati pusa ko naamangasunge nyanyaki gbe na bakere ome, na si kidu ni mbumbuhe fuko ko naaonga. Yesu aima ino gupai nga ko aima du ni ruruko, na ngbutuko mbata fu ko kpi, ko amangi yangara kparakpee fu Yekova. Fuo gure, ko kini dua riko, kini kpi. (Mk. 15:37; Rk. 23:46; Yo. 10:17, 18; 19:30) Nirengo, gu kpio re aima du ni kere gbegberẽ iigirã kpio!

5. Ginipai nagberẽ ti Yesu ni kerehe gbe kisusi gu gene i aimiko ngbaha?

⁵ Tipa Yesu tigako, anga gu gene i aimi ko ngbaha nangia gupai nagberẽ ni kerehe kisusi rogo gako arungosiro yo te. Gupai ko adu na bakere gberãrago tipaha kisusi nangia gu ndupai i afuhe ki ya si i aimo ko ti ni. I akitingbanga ko ni ziree ki ya ko angia boro gberãngba yo—kidu ni gu boro naadunga na irisa tipa Mbori watadu tipa rimo Mbori ya. (Mt. 26:64-66) Pa berã Yesu gupai nga aboro nika kitangbanga ko nga ko na irisa tipa Mbori te asa gupai nga ko du rogo bakere gberãrago, na si ki sa ko ko du na gu maabangirise nga bako ambunga ko i wasi ko ngba gi gene re te. (Mt. 26:38, 39, 42) Tipagine Yekova ambu gu wiriko ti ni ko aima kpinyemuko ko gbia tiko na arungosiro na ki kpi? Ani wisigingo pai tipa nduapai biata.

6. Tipagine i aˈasi Yesu ti ni ti ngbunduru ngua-rungosi?

⁶ Ni bambatapai, si aidi gupai nga i hasi Yesu ti ngua tipa ka kusa aYudo kusayo tii motiwa. (Gara. 3:10, 13) I ada kuti gupai nga i nikaa irisa ga Mbori aNdiko, ono tie, ka i airisanga ha ya. Ni sangbana gipai re, gi motiwa re aye kurii yo, kurii gu motiwa nga ga kpio i agbiaha mbiko ga Adamu ingapai. (Rom. 5:12) Ga Mbori aNdiko fu aYisaraere aape gupai nga, gu boro ka mangi gu ingapai rẽ na kpio, i imi ni kusayo. Sidu, tingbafuo gure, i aima rengba ka hasa kangba ni ti ngua. * (Pa Rug. 21:22, 23; 27:26)  Sidu, ni asa yo Yesu ti ngua, ko asa gupai nga gi rikaaboro nangia aYudo nga aguyo naaima ká ko re gbia undo ti gako motumo tumorii.

7. Gini ue nduapai Mbori ambu Wiriko ti ni ko gbiatiko na arungosiro?

⁷ Oni bingo gu ue ndupai Mbori ambu Wiriko ti ni ko gbiatiko na arungosiro. Ko aaraba Yesu tipa gako bangiriba kumbatayo ni Gbiamotumo. Yesu aima bi wai nitiko duhe ni kpakarakpakaraha ka giasangba Mbori ti regbo kere asada. Ko adu rogo bakere imisiri si ki sa gupai nga ko mangi kparakpee tipa undo “na nyanyaki akpe du na aume.” Nirengo, wa duhe nga Yesu aima susa rogo gi kere aimisiri re, ko na rengba ka rugatiko na gaani azingo, na ko na ‘rengba ka unda rani’ ho ‘du ani ni ni asadiasadi rani.’ Nairiwo wai du ani na tambuahe fu Yekova tipa maa ko gu Gbiamotumo furani du na inapai nga guko rengbe ka “rungo na ani tipa gaani rungbura”!—Eb. 2:17, 18; 4:14-16; 5:7-10.

8. Gini biata ndupai Mbori ambu Yesu ti ni i asadiko ni kerehe gbe?

⁸ Biatapai nga, Yekova ambu Yesu ko gbiatiko na arungosiro ni kerehe tipa gupai nga ka karagapai kuti nyanyakipa sanahe: Ya mo aboro rengbe ka nye niruru yo fu Yekova i ki vura kaa gbia tiyo vurũ na kere aˈasada? Satana nabihe nga boro ho te! Ko nape gupai nga aboro nairiso Mbori mbiko kina agu aundo i agbiaha beko. Ko idi kuti gupai nga i akpingo nyemu Yekova te, kina wai Adamu aakpingo nyemu Yekova a ya. (Eyo. 1:9-11; 2:4, 5) Yekova adu na kido kuti gu padu ni ruruse nga ga Wiriko nga Yesu, ki mbu ko i asadiko kuho rengbe boro ka hipai kuhoni. Yesu abanda gako padu niruruse na ki yugu Satana ni iraziree.

9. Gini kpiapai gu mokedi nangia Yoane amoihe furani?

⁹ Badungu aKristano gu yugopai nga ga motumo tumorii nanyakasi gayo idapase. I nandu kindi kumbatayo kaa tungusapai i ki vura kaa gbiatiyo vurũ na sogote, na i ima hi ngbatunga akpakarapai dunduko rogo gayo raka yo naabaha. Oni bingo gu kpiapai nga ga gu mokedi nangia Yoane. Si nawira gupai nga ko atungusi gu rengo du tipa Kristo na tipa motumo tumorii tipa agarã naima susa 60. Garãko aima mbeda kuti 100, ono agu airangbii nangia ga Roma yo aberẽ gupai nga ko angia kere boro, na i kini kedi ko ku rogo gu kisanga nga Patemo, ko kidu yo bambukiso yo. Mbiko gine? Mbiko gupai nga ko aafura tipa “gu pai nga ga Mbori na gu dezire pai nga ga Yesu.” (Yugo. 1:9) Nairiwo gu bawene kpiapai nga ga idapase gbiati hipai Yoane amoihe re!

10. Waigu gu kekeapai nga ga Yoane ayugo gupai nga ko aima du na tambuahe tipa motumo tumorii?

¹⁰ Yoane ayugu gako bakere nyemuse tipa Yesu na gako tambuahe tipa motumo tumorii rogo agu awaraga yo ga Mbori toro adu kugiiko ko kekehe. Ko afura susi bara 100 tipa motumo tumorii watadu tipa gu weneapai motumo tumorii aye na ni. Ni kpiapai, Yoane akepai ki ya: “Ka boro ingi pai, Azarõ be rani yo du Mbori ni nga Ba nga Yesu Kristo, nga ruru boro.” (1 Yo. 2:1, 2) Ga Yoane kekeapai nanyakasapai a tipa wai nyakipa manga “gu dezirepai nga ga Yesu.” (Yugo. 19:10) Si tie ziazia nga, Yoane aima du na bakere tambuahe tipa motumo tumorii. Waigu rengbe ani ka yugo gupai nga ani na bakere tambuahe a tipaha?

11. Ginipai rengbe ka undo rani ani ká asada?

¹¹ Mo ká gu asada nga ga manga ingapai. Ka ani du nzunzu na tambuahe tipa motumo tumorii, ani nika ne gu berãpai nga: ‘Ndupai ho tipa mi mangi bakere asadatise tipa ka ne manga ingapai te. Mi ima rengba ka manga ingapai, na ki sanahe tipa mbupai.’ Kuba gure, ho ka ani du ni ni asadiasadi rani ka manga gbegberẽpai, ani nika ya: ‘Oó! Waigu rengbe mi ka manga gu ngbatungapai re na agi apai  dunduko aYekova na Yesu namangihe fere re?’ Na ngbanya na gupai re, ani rengbe ka sana Yekova tipa ome, ki zungodi ko nga: ‘Ka mo ngbé nga fere ku mbata yo sa asada ya.’—Mt. 6:13.

12. Waigu rengbe ani ka mangapai kuti gu rugute du rogo 1 Yoane 3:16-18?

¹² Mo kpinyemu awirinamo. Ho ani ayugo gu ngbatunga nyemuse re ni, ani nayugo tambuahe a tipa motumo tumorii. Tipagine? Bambiko Yesu afu ungako, angianga tipa kina rani sa ya, ono tipa awirinarani a. Ka si du nga ko adu regerege tipa ka kpi tipa yo, si ima du ziazia nga payo ima nyaka bangiriko. (Oni gedi 1 Yoane 3:16-18.) Ani nayugo gaani nyemuse tipa awirinarani rogo gu gene yo ani amangapai na yo ngbaha. (Ef. 4:29, 31–5:2) Ni kpiapai, ani naundo yo ho i awoka ni watadu ho i ahi kere aˈasada ni, kodihe na agu agberãngo naye be gu mangaapai nga ga ome zegino. Ono ginipai si aida ani mangihe ho kuarani Kristano namangi watadu nagumba gupai ni ba gberãrago tirani?

13. Tipagine si aida ani du ti ni ni agu aboro nambupai?

¹³ Ya mo sinoro du ningiaha dedede kaa kpipai kuti kuaro idipase? (Pa Mot. 19:18) Ka singia wo si nidu, mo pekefuo gu rugute naya: “Nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga.” (Koro. 3:13) Ai gu regbo ani ambupai fu wirinarani, ani nayugo gupai fu gu Barani du ngbangbaturũ yo nga ani ima du nzunzu na tambuahe tipa motumo tumorii. Waigu rengbe ani kaa kiiso gaani tambuahe kindi tipa gi gamahe naye be Mbori re?

14. Gini gene sa rengbe ani ka kiiso gaani tambuahe ngbaha tipa motumo tumorii?

¹⁴ Mo naafu tambuahe fu Yekova tipa motumo tumorii. Wirina du garãri nga 83 du rimori nga Joanna, nga guri naraka India yo aya, “Mi nabihe nga si ni nyanyakipa pai kaa pepa motumo tumorii na aˈuru dunduko rogo gimi akparakpee yo na kaa tambua Yekova tipaha.” Rogo agu akparakpee yo mo amangaha nisaro, mo berẽpa agu aingahe mo nimangihe rogo gu uru re na ki sana Yekova tipa mbupai. Ono ka mo mangi kere ingapai, si nika ida gupai a nga mo gbata gu undo nga ga abaakumba. I nika dega tuyo foro, na ki fu wene arugute foro rogo Fugo Mbori yo. I nika manga kparakpee na mo na ki sana Yekova ko mbupai foro tipa mo du na wene pagume berewe na ko—Yak. 5:14-16.

15. Tipagine si aida ani di regbo ti ni tipa ka gedapai tipa motumo tumorii na ka berãkuriihe?

¹⁵ Mo naaberãkurii pa motumo tumorii. Kura wirina sa du rimori nga Rajamani du garãri nga 73 aya, “Ai regbo mi agedapai tipa agu arungosiro Yesu agbiatiko na ni, kina aume nauka bangire yo.” Si ima rengba a kadu ni pa imisiri  foro ho mo aberã ni kuriipa wai wiri Mbori agbiatiko na kere arungosiro. Ono wa mo nikaa berã ni bakerehe kuriipa gu motumo tumorii Yesu afuhe, gamo nyemuse tipa ko na tipa Bako nika da ni bakerehe. Tipa ka undo ro mo berẽkuriipa motumo tumorii, si angba gbe ka mo di regbo ka wisigopai tipa gipai re wenengai ti regbo gamo wisigopai nisase.

16. Waigu pa yugo ani pai fu kura aboro tipa motumo tumorii narengbe ka undo rani? (Oni bi gu sura duti kpotoho.)

¹⁶ Mo naayugopai fu kura aboro tipa motumo tumorii. Ai gu regbo ani apepa motumo tumorii fu kura aboro, gaani tambuahe tipaha nakio. Ani na bawene aũsunge berãni, nga gu rengbe ani ka mangasunge na ni tipa ka yugo ndu gupai fu kura aboro si aidi Yesu kpi ti ni tipa rani. Ni kpiapai, ani rengbe ka mangasunge na wirikapai 4 nga ga gu burosua nga Gu Wene Pangbanga Naye be Mbori! Rii gu wirikapai re nga, “Da Nga Yesu Kristo?” Watadu ani rengbe ka mangasunge na kapita 5 nga ga gu buku nga Gini Apai Rengbe Baibiri ka Yugoho Furani? Rii gu kapita re nga, “Ga Yesu Motumo Nga Ga Mbori Bakere Gamahe.” Na rogo agarã yo dunduko, ani nakiiso gaani tambuahe tipa motumo tumorii ni du ani pati Tingida Pakpio Yesu na ni yamba ani aboro zaaza tipa i ye kadu pati ni na ani. Nairiwo gu bakerepa momu Yekova nafuhe furani nga ga yugopai fu kura aboro tipa Wiriko re!

17. Tipagine du motumo tumorii ti ni ni ga Mbori bakerepa gamahe kisusi fu ngbatunga aboro dunduko?

¹⁷ Zanga kapa, ani na bawene ndupai berani tipa ka sonosa bakere tambuahe tipa motumo tumorii na ki bandaha. Mbiko motumo tumorii, ani na mbembedi pabakure na Yekova, si ki vura du vurũ nga ani nga kpakpa aboro. Mbiko motumo tumorii, i nika gbarasa gu mangaapai nga ga bakitingbanga dunduko. (1 Yo. 3:8) Mbiko motumo tumorii, gu ringbisapai Yekova adu na ni ti tonatonaha tipa kpotosende nika da ti rengo. Kpotosende naabaha nika da ni Paradizo. Agu aboro dunduko ani nikaa gbia yo nika kpinyemu Yekova na kini irisiko. Sidu tie, ani naagbatanga agene agbata na aˈuru dunduko kaa yugo gaani tambuahe tipa motumo tumorii, nga gu du ni ga Mbori bakerepa gamahe kisusi fu ngbatunga aboro dunduko!