1. Ci Yihofa mikitini finawlan Ningra maˈaraway ko maanan hani?

SOWAL no Fangcalay Cudad, ‘maolahay ci Yihofa to finawlan Ningra.’ (ˈOlic 149:4) Mafanaˈ tonini tada mitemeray to falocoˈ ita! Misinanotay ci Yihofa to kangaˈayan ita, maˈaraway ko mahimeday a ˈicel ita, misolotayho kitanan miingid Cingranan. Ano madimadi kita Cingranan, wa tahadaˈoc maolah Cingra kitaanan!—Yohani 6:44.

2. O roma salikaka hano cato kaolah ci Yihofa cangranan saan miharateng hani?

² O roma salikaka saan ko harateng alatek: “Mafanaˈay kako to maolahay ci Yihofa to finawlan Ningra, kawra samaan kako pakasoˈlin to maolahay ci Yihofa takowanan hani?” Hano mahaen ko harateng nangra hani? Kaemangho ci Awkesana * tada kaadayayan ko kaˈorip, sanay cingra: “Ikor no micada to paputisem misatapangay misakafah kako, itiya tada mahemekay kako. Kawra ikor no 15 miheca, ka adayayan a demak miliyaway maharateng, tada pasemsemay takowanan. Malahdaway ko pihayda ni Yihofa takowanan saan ko harateng, awaay ko tatodong milifok to olah Ningra.” Ci Yoay o misakafahay, itini kaemang tatokian awaay ko lipahak no kaˈorip ningra, sanay cingra: “Makalimay kako pakahemek ci Yihofaan, mansa micada to paputisem, kawra tahadaˈocto cato ka maolah Cingra takowanan saan ko harateng ako.”

3. Oniya lalakaw wa milengo to maanan salicay hani?

³ Malecaday kiso toniya tatosa madimadiay fafahiyan salikaka  tangongolay ko olah ci Yihofaan alatek, kawra cisasaay to soˈlinay maolah Cingra tisowanan hokira. Hano wa pakasoˈlin kiso to ciharatengay ci Yihofa tisowanan hani? Ano cowa ka lahdaw ko masofaway a harateng, wa samaan ko hademak iso hani? Dotoc, wa milengo kita toniya salicay.

4. Cisasa to olah ni Yihofa kitaanan hano masakatalawan hani?

⁴ Taˈangayay ko ˈicel no olah. Ano pakasoˈlinay kita to maolahay ci Yihofa kitaanan, midamaay kitaanan, soˈlin pasangar ko kaˈorip, wa misarocod kita a midoko Cingranan. Kawra ano cisasa kita to olah no Kawas, wa ‘mimingto ko ˈicelˈ no mita. (Taneng 24:10) Ano matoled kita, cowa ka ciharateng ko Kawas kitanan saan miharateng, wa pasangarto miconged to saˈodis ni Satan.—Ifiso 6:16.

5. O roma salikaka cisasaay to olah no Kawas, samanay ko teloc hani?

⁵ Anini o roma madimadiay Krisciyang samanen iraay ko cisasaay harateng, telocto mafasaway ko pakasoˈlinay falocoˈ. Ci Canmos o malohemay malitengay, sanay cingra: “Soˈlin itiniay i Pitil matayal kako, maolahayho mitosil i roma ko sowal a kilac, kawra ira ko cecay liyad cowa cipinang kako, soˈlinay ci Yihofa mihayda to nano demak ako Cingranan hokira. Cisasaayho kako to mamitengil ci Yihofa to satolon ako hokira.” Ci Aywa o mieminay to toki misakafah a salikaka, sanay cingra: “Cisasa to olah ni Yihofa tada katalawanto, samanen o mamifiyor to midokoay a demak, ecato ka tawlik mirienag to midokoay a demak, pasangar to lipahak.” Ci Mayke o misakafahay ato malohemay malitengay, sanay cingra: “Ano cowa ka pakasoˈlin kiso to ciharatengay ko Kawas tisowanan, wa palidlid sa miliyas Cingranan.”

6. Ano misatapang kita cisasa to olah no Kawas, sasamaan ko hademak hani?

⁶ O nalifetan noniya salikaka mitadtaday, masofaway a harateng wa mipalak to kalalaˈed ita aci Yihofaan. Mihaen, ano misatapang kita cisasa to olah no Kawas kitanan, wa samaan ko demak hani? Wa tangsolen ita mifalah to mahaenay a harateng! Wa cangacangen ci Yihofa pafeli to rihaday, “midipot” to “falocoˈ ato ponoˈ” ita, palahdawto cisasaay harateng. (ˈOlic 139:23; Filipi 4:6, 7) Aka mapawan, cowa ko kiso aca misiˈayaway to mahaenay pakayraan a tamdaw, ˈalomanay madimadiay a salikaka misaˈicelay mifalah to masofaway a  harateng. Itini nolitengan, o madimadiay sikawdan ni Yihofa misiˈayaway to malecaday a pasangaray, nengnengen ita ko tinakoan no tarokos ci Pawlo.

7. Misiˈayaway ci Pawlo to maanan pasangaray?

⁷ Latekay karetengay ko ˈinorong iso, hato mapaekelay cato ka ngaˈay saselaˈ han? Ano mahaenay i, maedeng cipinangay kiso to nafalocoˈan ni Pawlo. Cowa ko cecayay aca kasakopang, o ‘polong a kasakopang ko kacarirawan’ ningra. (2 Korinto 11:23-28) Wa miemem kiso to halafinay a adada, pasangaray a lipahak han? Harateng ni Pawlo i tireng no niyah hato ‘mapacekay no ceka’ sanay. (2 Korinto 12:7-10) Oniya ceka o adada alatek, sapihepolaw ci Pawlo, kawra cowa pakahepol. Pakayni i cecay dangoc matoleday kiso to niyah han? Mahaenay ko harateng ni Pawlo. Padotocay cingra milowid to dangoc no niyah, mansa mihaen ko sowal ningra: ‘Tada marorayay kako!’—Loma 7:21-24.

8. O manan ko paˈicelay ci Pawloan misiˈayaw to pasangaray?

⁸ Soˈlin wa miemem to masakenaay a sapalifet ato pasangaray, kamayan ci Pawlo padadotoc midoko ci Yihofaan. O manan ko paˈicelay ci Pawloan mihaen to demak hani? Soˈlin mafanaˈay cingra adihayay ko dangoc no niyah, kawra pakayni sapatefoc iraay ko tanektekay a pakasoˈlin ningra. Mafanaˈay ci Pawlo na mikiˈokay ci Yis, ‘polong midoedoay cingranan a tamdaw wa milifok to tahadaˈocay ˈorip.’ (Yohani 3:16; Loma 6:23) O midoedoay ci Pawlo ci Yisan, pakasoˈlinay to sapatefoc a tamdaw. Pakasoˈlinay cingra, soˈlin pakidemay ko raraw no cecay tamdaw iˈayaw, ano mikifalocoˈ a pasasiyor, mamakahi ci Yihofa misodod.—ˈOlic 86:5.

9. Mikitini sowal ni Pawlo i Kalatiya 2:20 mamananam ita ko maanan?

⁹ Roma i, pakaynian no Kawas ci Kristoan paihkal to olah kitaanan. Pakasoˈlinay ci Pawlo to olah no Kawas. (ˈOsien ko Kalatiya 2:20.) Sinanoten samanay ko sowal ni Pawlo i saikor noniya sinael, sanay: ‘Wawa no Kawas . . . maolahay takowanan, pakayniay takowanan kinafalah to niyah.’ Citolasay ko olah ni Yihofa cowa ka saan ci Pawlo miharateng, cowa piharateng cingra: ‘Mafanaˈay kako hano maolah ci Yihofa to roma salikaka, kawra cato kaolah takowanan saan.’ Patalipaˈelalan ni Pawlo ko Lomaay a Krisciyang: ‘Tiya cirarawho kita i, maharekayto ci Kristo pakayni kitaanan a mapatay.’ (Loma 5:8) O olah no Kawas tada tangongolay awaay ko tolas!

10. Mikitini Loma 8:38, 39 mananam ita ko manan?

 ¹⁰ ˈOsien ko Loma 8:38, 39. Masongilaˈay ko pakasoˈlin ni Pawlo to tangongolay a olah no Kawas, ‘awaay ko maanan mamiconged to olah no Kawas kitaananˈ sanay cingra. Mafanaˈay ci Pawlo padadotocay mihadidi ci Yihofa to Israil tamdaw, matinakoay to samanay ci Yihofa siniˈada cingranan. Sakoniya sowal, tatodong no sowal ni Pawlo i: “Ano miocoran ni Yihofa ko Wawa ningra pakyani takowanan mapatay, iraho ko manan lalangian ako cisasa to olah Ningra hani?”—Loma 8:32.

11. Soˈlin mararaway ci Pawlo to misowalan i saka 1 Timoti 1:12-15 a raraw, hano ngaˈayho pakasoˈlin to maolahay ko Kawas cingranan?

¹¹ ˈOsien ko 1 Timoti 1:12-15. Latekay, maharatengay ni Pawlo ko demak no niyah i salakat, madeng makesemay ko falocoˈ, mansa somowal cingra ‘i lalomaˈay no mararaway a tamdawˈ ko niyah saan. ˈAyaw no malo Krisciyang ci Pawlo, na milalepelay to Krisciyang, mipalit to roma tamdaw, mihaiho mipatay to roma tamdaw. (Dmak 26:10, 11) Ano ira ko cecay romiˈad, malitemoh ni Pawlo ko kaemangay Krisciyang, mafanaˈ to pakayniyay i niyah ko sakapatay no wama wina ningra, wa ngaˈay haratengen iso samanay ko nafalocoˈan ni Pawlo han? Madeng o mamakesem ci Pawlo to nano demak no niyah i salakat, kawra mafanaˈay cingra cowa ko ngangaˈay mifalic to mataˈlifayto a demak. Pakasoˈlinay ci Pawlo pakayniay ci Kristo cingranan a kinafalah to ˈorip, mansa pakasoˈlin a somowal: ‘Pakayni mikiriwiˈay a sidaˈit no Kawas, hato iraay kako nohatini.’ (1 Korinto 15:3, 10) Mananamay iso ko maanan? Pakasoˈlinen pakayniay kisowanan ci Kristo mapatay, paira to toki iso malawidang ci Yihofaan. (Dmak 3:19) Tiya mararaw kita o Misawacayay Tamdaw ni Yihofa hokira, pakaynien i Kawas, kalimlaan i samaan ko demak  ita anini ato noikor, cowa ko raraw i salakat.—Isaya 1:18.

12. Ano awaay ko kapo no niyah, awaay ko tatodong kaolahen saan ko harateng ita, sowal no 1 Yohani 3:19, 20 wa ira ko manan sadama kitanan hani?

¹² Maharateng to pakayniay sapihepolaw to raraw iso mapatay ci Yis, saan kiso miharateng alatek: “Awaay ko tatodong ako saan miharateng.” Hano ira ko mahaenay a harateng ita hani? Samanen malipalaway no falocoˈ no niyah kita alatek, awaay ko kapo no niyah, awaay ko tatodong kaolahen saan. (ˈOsien ko 1 Yohani 3:19, 20.) Ano iraay ko hatiniay a harateng ita, haharatengen ‘ikakaay no falocoˈ ita ko Kawas.’ Ano samaanto kita masofaw ko pinengneng to niyah, kamayan ci Yihofa maolah kitanan, misodod kitanan. Ngaˈay kita misalof to harateng no niyah, minanam mikitini pakayraan ni Yihofa a minengneng to niyah. Sapidemakaw tonini, wa micerid kita micekiw to Fangcalay Cudad, padadotoc mitolon, miceridho macacawmaˈ to salikaka. Mihaen ko demak hano masakalimlaan hani?

13. Micekiw to Fangcalay Cudad wa ira ko manan sadama kitanan hani? (Nengnengen ko sapatongal lalakaw “ Kimad no Kawas Padamaay Cangranan.”)

¹³ To romiˈamiˈad micekiw to Fangcalay Cudad, mihaen wa matongal a mahapinang iso o maanan ko makapahay capeling ni Yihofa, matongalho ko pitinako to olah Ningra tisowanan. To romiˈamiˈad midotim to pina sinael wa ihkal ko maharatengay iso, ngaˈay ‘misalof’ to mararaway a harateng no falocoˈ. (2 Timoti 3:16) Cecay ci Kaywen malohemay malitengay marariday misakahmaw to niyah, sanay cingra: “Micekiw ato midotim to ˈOlic 103 fedengan padamaay takowanan misalof to harateng noniyah, mahapinangay samanay ci Yihofa minengneng takowanan.” O masowalay fafekang ci Aywa sanay: “Mahererek ko cecay romiˈad, misongilaˈay kako miharateng to pinengneng ni Yihofa, parihadayay konini to falocoˈ ako, matongalay ko pakasoˈlin to maolahay ci Yihofa takowanan.”

14. O satolon wa ira ko manan sapadama kitanan hani?

¹⁴ Padadotoc mitolon. (1 Tisalonika 5:17) Ano sapatirengaw to kalawidang ato tao, wa mararid mikifalocoˈ masasowal. Malecaday to kalawidang ita aci Yihofaan. Itini satolon ita pasowal ci Yihofaan to harateng no mita, nafalocoˈan ato kaciharatengan a demak, o paihkalay to mitadiˈcay kita Cingranan, mafanaˈho to maolahay Cingra kitaanan. (ˈOlic 94:17-19; 1 Yohani 5:14, 15) Sanay ci Yoay: “Ano mitolon kako i cowa ko malecaday o milomalay, edeng o pasowal aca ci Yihofaan to midemakan anini a demak, wa fohaten ko falocoˈ i Cingranan, pasowal Cingranan to soˈlinay a nafalocoˈan. Telocto, palidlid sanay mahapinang ako to cowa ko tawki no kaysiya ci Yihofa, o tada ciharatengay to wawa a Wama.” —(Nengnengen ko sapatongal lalakaw “ Maasipayto Iso Koniya Cudad Han?”)

15. Samanay ci Yihofa paihkal to tada ciharatengay Cingra kitanan o kahacecay tamdaw hani?

¹⁵ Kalacafay to madimadiay widang macacawmaˈ, o sapafeli ni Yihofa kitaanan a sapatelong cangra. (Yakop 1:17) O kakarayan Wama pafeliay kitanan to ˈalomanay ‘marariday paihkal to olah’ a salikaka, paihkalay to tada ciharatengay Cingra kitanan o kahacecay tamdaw. (Taneng 17:17) Masowalay ni Pawlo i Kolosay, roma Krisciyang padadotocay midama cingranan, pafeli cingranan to ‘taˈangayay a sahinom’ (Kolosay 4:10, 11) Ano ci Yisto misaaliay to sadama no widang, hanaca tada miakoˈiday cingra to padamaay cingranan a tamdaw ato coyoh.—Luka 22:28, 43.

16. O madimadiay widang hano ngaˈay padama kitaanan mitinako to olah ni Yihofa?

¹⁶ Pafeliay ci Yihofa kitaanan to madimadiay a widang malo sapatelong, micangacangay kiso to sadama nangra hokira? Pasowal to cecay matenesay a widang to cariraw no mita, cowa ko malonayay a waywayan, ao sadipot konini. Sanay ci Canmos: “Kao ngaˈayay iraay ko matenesay a widang, cowato ka mapadik no masofaway harateng kako. Mihadidiay cangra mitengil to sowal ako, saliyaliyaway cangra pasowal to maolahay takowanan. Samanen iraay koniya salikaka, mahapinangay ako tada maolahay ci Yihofa takowanan, ciharatengay takowanan.” Palahad ato padotoc malawidang to salikaka, tada kalimlaanto!

17-18. O cima ko pakasoˈlinen ita? Misamanay?

¹⁷ Mitokelay ci Satan matoled ko falocoˈ ita, ecato pisaˈicel midemak to ngaˈayay a demak. Papiharatengay cingra kitanan cowa ka olah ci Yihofa kitanan, awaay ko tatodong ita milifok to salidong ni Yihofa saan. Kawra malecad o sowal i fafekan, sahtoay o mangah konini.

¹⁸ Tada maolahay ci Yihofa tisowanan, tada kalimlaan kiso sanay ko pinengneng Ningra. Ano midofdof kiso Cingranan, wa malecad ci Yisan tahadaˈoc “materek i olah Ningra.” (Yohani 15:10) Aka pakasoˈlin ci Satanan ato falocoˈ no niyah, miharateng to awaay ko tatodong no niyah kaolahen ni Yihofa. Pakasoˈlinen ci Yihofa, maˈaraway Ningra ko ngaˈayay no kahacecay tamdaw. Haratengen, maolahay ci Yihofa to finawlan Ningra, tanekteken pakasoˈlin, tada maolahay Cingra tisowanan!