1. Kai si iperdiateken Jahwe arah umatNa?

NINA Pustaka, “Keleng ate Jahwe umatNa.” (2 Kro. 2:11) Enda erban meriah ukurta! Iperdiateken Jahwe sipat-sipatta si mehuli, tehNa kita banci jadi kalak si mehuli, janah sampatiNa kita gelah banci rembak ras Ia. Adi terus kita setia man baNa, Ia pe tetap rembak ras kita seh rasa lalap.​—Joh. 6:44.

2. Engkai maka lit kalak si erpengakap maka la keleng ate Jahwe ia?

² Banci saja lit piga-piga si ngataken bagenda, ‘Kuteh nge keleng ate Jahwe umatNa, tapi uga carana gelah banci aku tek maka keleng ate Jahwe aku?’ Kai si erbanca maka turah penungkunen si bage? Oksana * si pernah ngenanami perbahanen si la mehuli sanga kitik denga ngataken, “Meriah kel ukurku sanga aku iperidiken, janah mulai aku merintis. Tapi 15 tahun kenca si e, kuinget mulihi kai si terjadi sanga aku kitik denga. Dungna kuakap lanai meriah ukur Jahwe ngidah aku janah la aku cocok ikelengiNa.” Yua sekalak perintis si ngenanami perbahanen si la mehuli sanga kitik denga ngataken, “Kubaktiken diriku man Jahwe perban kuban ateku meriah ukurNa, tapi sempat aku erpengakap labo mungkin keleng ateNa aku.”

3. Kai kari sibahas bas artikel enda?

³ Bali bagi turang seninata ndai keleng kel atendu Jahwe. Tapi banci saja sangsi kam kerna kekelengenNa man bandu. Engkai maka perlu petetapndu ukurndu maka situhuna ermediate nge Jahwe man bandu? Selain si e, kai  si banci nampati kam adi iakapndu la keleng ate Jahwe kam? Mari sibahas jawapen arah penungkunen-penungkunen e.

4. Engkai maka la mehuli akibatna adi sangsi kita nandangi kekelengen Jahwe?

⁴ Mbelin kel pengaruhna kekelengen. Adi tek kita maka keleng ate Jahwe kita, tersuruh me ukurta ngelayani Ia alu bulat ukur amin pe siadapi tentangen. Tapi, adi sangsi kita maka Dibata ermediate man banta, ‘gegehta pe reh kurangna.’ (Kua. 24:10) Adi kitik ukurta janah mulai siakap la keleng ate Dibata kita, la kita ngasup ngelawan serangen Setan.​—Ep. 6:16.

5. Kai si terjadi man piga-piga turang senina si akapna la keleng ate Dibata ia?

⁵ Piga-piga turang seninata erpengakap maka la keleng ate Jahwe ia janah e erban lemah kinitekenna. Sekalak pertua si gelarna James ngataken, “Amin pe aku ngelayani bas Betel janah meriah kuakap ngelayani bas runggun si nggunaken bahasa asing, tersungkun-sungkun aku ialoken Jahwe nge si kulakoken e ntah lang. Pernah ka aku tersungkun-sungkun ibegiken Jahwe nge totoku ntah lang.” Eva si ngelayani sepenuh waktu pe bage ka penggejapenna, nina, “La mehuli akibatna adi siakap la keleng ate Jahwe kita. E banci mpengaruhi pelayanenta. La kita semangat janah lanai meriah ukurta ngelayani Jahwe.” Michael sekalak perintis biasa ras pertua ngataken, “Adi siakap la ermediate Dibata man banta banci kari reh dauhna kita arah Ia.”

6. Kai si arus silakoken adi mulai siakap lanai keleng ate Dibata kita?

⁶ Pengalamen-pengalamen e ncidahken maka banci ceda kinitekenta adi siakap la keleng ate Jahwe kita. Tapi, kai nge si arus silakoken adi siakap la keleng ate Jahwe kita? Arus mis siambekken perukuren si bage. Pindolah penampat Jahwe gelah iubahNa ‘perukurenndu si la tenang’ alu ‘kedamen bas Dibata nari si banci njagai pusuh ras perukurenndu.’ (Ms. 139:23; Pil. 4:6, 7) Ingetlah kam labo sisada. Turang seninandu si setia si debanna pe sangana erjuang ngadapi perasan si bage. Umat Jahwe  si mbarenda pe pernah bage perasanna. Gundari, mari sibahas kai si banci sipelajari arah pengalamen Rasul Paulus.

7. Masalah kai si iadapi Paulus?

⁷ Pernah nge latihsa iakapndu perban melalasa tanggung jawap si arus ilakokenndu? Adi pernah, banci iangkaindu perasan Paulus. Labo sada runggun saja si man ukuren Paulus tapi “kerina runggun.” (2 Kor. 11:23-28) Bene nge keriahen ukurndu perban sangana mekelek pinakitndu? Lit sada masalah Paulus si erbanca latih kel iakapna rukur, banci saja e masalah kesehaten janah merhat kel ia gelah malem pinakitna e. (2 Kor. 12:7-10) Kitik nge ukurndu perban lit kelemahenndu? Paulus pe pernah bage. Perban arus ia lalap erjuang ngelakoken kai si benar, bagenda nina, “Uga narilah pe aku enda!”​—Rom. 7:21-24.

8. Kai si nampati Paulus gelah ngasup ngadapi masalahna?

⁸ Amin pe melala masalah si iadapi Paulus, terus ilayanina Jahwe. Engkai maka banci ia ngasup? Perban erkiniteken kel Paulus man tebusen. Labo lemah kinitekenna nandangi tebusen amin pe melala iadapina masalah perban la sempurna. Tehna ka kerna janji Jesus si ngataken maka “ise pe si erkiniteken man [Jesus] . . . ndatken kegeluhen si rasa lalap.” (Joh. 3:16; Rom. 6:23) Paulus termasuk i bas kalak si erkiniteken man tebusen. Tek ia maka nggit Jahwe ngampuni kalak si ertobat la soal uga belinna dosana.​—Ms. 86:5.

9. Kai si banci sipelajari arah kata-kata Paulus bas Galati 2:20?

⁹ Tek ka Paulus maka keleng kel ate Dibata ia, perban itehna enggo ibereken Dibata Jesus mate guna ia. (Baca Galati 2:20.) Cuba perdiateken kata-kata Paulus bas akhir ayat e, nina, ‘Anak Dibata engkelengi aku janah korbankenna dirina guna aku.’ Labo iakap Paulus maka la cocok ia ikelengi Dibata. Labo iakapna bagenda: ‘Kuteh nge keleng ate Jahwe turang seninaku tapi kuakap labo banci keleng ate Jahwe aku.’ Emaka, bagenda nina Paulus man kalak Kristen bas Roma, “Kristus mate guna kita sanga kita erdosa denga.” (Rom. 5:8) La lit kai pe si banci erban Dibata lanai engkelengi kita!

10. Kai si banci sipelajari arah Roma 8:38, 39?

 ¹⁰ Baca Roma 8:38, 39. Tek kel Paulus maka kekelengen Dibata mbelin kel kuasana. Itulisna maka “la lit si banci nirangken kita arah kekelengen Dibata.” Teh Paulus uga belinna kesabaren Jahwe sanga erurusen ras bangsa Israel. Tehna ka uga Jahwe ncidahken perkuah ate man bana. Emaka banci saja bagenda kesimpulen Paulus: ‘Adi enggo bere Jahwe anakNa mate guna aku, lit kin alasenku sangsi kerna kekelengen Jahwe man bangku?’​—Rom. 8:32.

11. Amin pe enggo lakoken Paulus dosa bagi si ikataken bas 1 Timotius 1:12-15, engkai maka tek ia keleng ate Dibata ia?

¹¹ Baca 1 Timotius 1:12-15. Banci jadi salah kel akap Paulus bana sanga ingetna mulihi kai si lakokenna mbarenda. Sope pelajari Paulus kebenaren, ianiayana kalak Kristen arah kota ku kota, lit si tamakenna ku penjara, janah idukungna keputusen pengadilen guna munuh kalak Kristen. Emaka labo ateta mamang sanga katakenna ia me kalak “si erdosana.” (Perb. 26:10, 11) Banci nge bayangkenndu uga perasanna sanga jumpa ia ras anak muda si orang tuana ihukum mate perban Paulus? Pasti menyesal kel Paulus perban kesalahenna e, tapi tehna maka labo banci ubahna kai si enggo terjadi. Tek ia maka Kristus mate guna ia. Emaka bagenda nina, “Banci aku bagenda gundari perban kiniulin Dibata si luar biasa.” (1 Kor. 15:3, 10) Kai pelajarenna man banta? Arus kam tek maka Jesus mate guna kam janah eme si erban kam banci rembak ras Jahwe. (Perb. 3:19) Labo pernah inget Jahwe kesalahenta si mbarenda, la soal kita enggo jadi Saksi Jahwe paksa si e ntah  lenga. Si pentingna akap Jahwe eme kai si enggo silakoken gundari ras wari si pepagi.​—Jes. 1:18.

12. Uga kata-kata si lit bas 1 Johanes 3:19, 20 banci nampati kita sanga la siakap merga banta ntah pe la siakap cocok kita ikelengi?

¹² Sanga ukurindu maka Jesus mate guna dosa-dosandu, banci jadi nindu, ‘Labo kuakap aku cocok ngaloken pemere si meherga e.’ Engkai maka banci turah perukuren si bage? Banci jadi itipu pusuhta si la sempurna kita janah ibanna kita erpengakap maka kita la meherga ras la cocok ikelengi. (Baca 1 Johanes 3:19, 20.) Adi bage perasanta, perlu siinget maka “belinen kap Dibata asangken pusuhta.” Arus sipetetap ukurta maka keleng kel ate Jahwe kita janah nggit Ia ngampuni kita. Gelah reh tekna kita kerna si e, arus rusur sipelajari Pustaka, ertoto, janah siban waktuta ras turang seninata. Engkai maka si e kerina seh kel pentingna?

13. Engkai maka mpelajari Pustaka banci nampati kita? (Nen ka kotak, “ Uga Pustaka Nampati Kalak e?”)

¹³ Alu mpelajari Pustaka tiap wari, reh buena tehndu sipat-sipat Dibata si mehuli. Alu bage, banci angkandu uga belinna kekelengen Jahwe man bandu. Adi tutus atendu ngukuri Pustaka tiap wari, reh beluhna me kam rukur, janah ‘ipekenana kerina’ si lit bas pusuh ras perukurenndu. (2 Tim. 3:16) Lit sekalak pertua si gelarna Kevin janah pernah la merga kapna bana. Erjuang ia ngelawan perasan e, nina, “Mbaca ras ngukuri Masmur 103 enggo nampati aku mpekena perukurenku ras banci kuangka uga perukuren Jahwe kerna aku.” Eva si ituriken ndai ngataken, “Tiap berngi kuban waktuku ngukuri uga perasan ras perukuren Jahwe. Enda erban dame pusuhku janah reh paguhna kinitekenku.”

14. Uga toto banci nampati kita?

¹⁴ Teruslah ertoto. (1 Tes. 5:17) Adi erteman atendu ras kalak si deban, arus kam rusur ngerana ras ia janah turiken uga perasanndu man bana. Bage ka me si arus lakokenndu adi erteman atendu ras Jahwe. Sanga situriken bas totota isi pusuhta, perukurenta, ras kai si erban kita kuatir, sibuktiken maka tek kita man Jahwe ras keleng ateNa kita. (Ms. 94:17-19; 1 Joh. 5:14, 15) Yua si ituriken ndai ngataken, “Sanga aku ertoto, labo si kulakoken bas wari e saja si kuturiken man Jahwe, tapi kuturiken ka uga situhuna perasanku. Reh dekahna, banci kugejapken maka Jahwe e bali ras sekalak Bapak si keleng ateNa anak-anakNa, labo bagi sekalak bos bas perusahan.”​—Nen kotak “Enggo nge Bacandu?”

15. Kai buktina ermediate Jahwe man banta?

 ¹⁵ Rusurlah ban waktundu ras teman-temandu si setia. Kalak e pemere arah Jahwe nari. (Jak. 1:17) Perban Bapakta si i surga ermediate man banta, bereNa turang senina bas runggun si “lalap ncidahken kekelengen.” (Kua. 17:17) Bas suratna man runggun i Kolose ijelasken Paulus kerna turang senina si enggo ndukung ia janah katakenna maka kalak e ‘si mpegegehi ia.’ (Kol. 4:10,11) Jesus pe perlu penampat arah teman-temanna eme malekat ras manusia, janah ergaina kel penampat si alokenna e.​—Luk. 22:28, 43.

16. Uga carana teman-teman si setia banci nampati kita reh rembakna ras Jahwe?

¹⁶ Nggit nge kam mindo ras ngaloken penampat arah turang senina bas runggun? Adi situriken masalahta man kalak si paguh kinitekenna, enda labo buktina kita kalak si lemah, tapi enda banci ngelindungi kita. Cuba ukuri kai nina James si enggo ituriken ndai, “Adi rembak aku ras kalak si paguh kinitekenna enda banci tuhu-tuhu nampati aku. Sanga negatip perukurenku, teman-teman si setia e nggit megiken aku alu sabar janah katakenna maka keleng atena aku. Arah kalak e banci kuidah maka keleng ate Jahwe aku ras ermediate Ia man bangku.” Tuhu-tuhu penting kel gelah terus siusahaken reh rembakna ras turang senina bas runggun!

17-18. Ise si arus sibegiken ras engkai?

¹⁷ Ate Setan ngadi min kita ngelakoken kai si benar. Usahakenna gelah tek kita maka labo keleng ate Jahwe kita ras la cocok iselamatken. Tapi bagi si enggo sipelajari ndai, si e labo tuhu.

¹⁸ Keleng ate Jahwe kam. Meherga akapNa kam. Adi patuh kam man baNa, banci kam “tetap bas kekelengenNa” seh rasa lalap, bali bagi Jesus. (Joh. 15:10) Emaka ula begiken Setan bage pe pusuhndu si ngataken maka labo keleng ate Jahwe kam. Tapi begikenlah Jahwe si ngenen kai si mehuli si lit bas kita sekalak-sekalak. Teklah kam maka “keleng ate Jahwe umatNa,” termasuk kam!