1. Jé Yéhôva a dañe fombô be bebo bisaé bé?

YÉHÔVA ZAMBE “a yene mvaé be bôte bé.” (Bs. 149:4) Jam ete da soo bia abui mevak. Yéhôva a yene mbamba mefulu bi bili, a mam bi ne ngule ya bo. A volô fe bia na bi bo bemvôé bé. Nge bi kele ôsu a wulu ba’aba’a a nye, élate jangan a nye jé tabe nnôm éto!​—Jean 6:44.

2. Amu jé bobejañ béziñ ba yen ayaé ya buni na Yéhôva a nye’e be?

² Bobejañ beziñ be ne jô bebiene na, ‘Ma yeme na Yéhôva a nye’e ékôane jé, ve jé ja kate ma na a nyoñe ngap a zezé môt ane ma?’Jé é ne bo na môt a sili émien avale nsili ete? Oksana, * sita éziñ a nga tôban abui minjuk éyoñ a mbe mongô, a jô na: “Me mbe mevak éyoñ me nga duban a taté ésaé nkpwa’a mefan. Ve éyoñ me nga bi mimbu 15, me nga beta taté na ma simesane mbia be mam be nga kui ma éyoñ me mbe mongô. Nde me nga buni na Yéhôva a nye’e ke fe ma.” Yua, sita éziñ a ne nkpwa’a mefan, nye fe a nga tôban abui minjuk éyoñ a mbe mongô. A jô na: “ Me nga ve mamien ngumba be Yéhôva amu me mbe me kômbô’ô ve nye nlem avak. Ve me mbe me jô’ô mamien na Yéhôva a vo’o nye’e ma môs éziñ.”

3. Jé bia zu yen ayé’é di?

³ Aval ane besita bete bebaé, éko éziñ wo fe wo nye’e Yéhôva abui, ve teke buni na nye fe a nye’e wô. Amu jé bi nji yiane simesane na Yéhôva a nye’e ke bia, a jé é ne volô bia na bi titane mbia ôsimesan ate? Bia zu yene biyalane ya minsili mite.

4. Amu jé bi nji yiane simesane na Yéhôva a nye’e ke bia?

⁴ Nye’an wo ve bia ngule ya bo Yéhôva ésaé. Éyoñ bia kôme yeme na Yéhôva a nye’e bia a na a su’u bia, bia bo nye ésaé a nlem ôse, to’o éyoñ bia tôbane minjuk. Ve nge ô taté na wo bi biyebe, a simesane na Yéhôva a nye’e ke fe wo, wôna “ngule jôé [ja ye bo] tyôtyoé.” (Min. 24:10) A nge mbunane wôé wo tek, wé kate wosane Satan.​—Beép. 6:16.

5. Jé é nga kui bobejañ beziñ éyoñ be nga taté na ba simesane na Yéhôva a nye’e ke fe be?

⁵ Mbunane Bekristen beziñ ô nga tek éyoñ be nga taté na ba buni na Zambe a nye’e ki fe be. James, mvendé éziñ, a jô na: “Akusa bo me mbe me saé’ Béthel, me bo’o fe ésaé nkañete jam akônda ya nkobô ôfe, me mbe me sili’i mamien nge Yéhôva a wô’ô fo’o ésaé ma bo nye mvaé. E nga kui kui fe na me sili mamien nge Yéhôva a wô’ô meye’elane mam.” Eva, sita mfe a saé Béthel a jô na: “Me nga yene na éyoñ bia simesane na Yéhôva a nye’e ke fe bia, nalé a ne tu’ulan ésaé ése bia bo nye. Bi nji beta bi mevak, nge bi nkômbane ya bo mame Zambe a nye’e.” Michael a ne nkpwa’a mefan ya éyoñ ése, a ne fe mvendé. A jô na: “Nge ô nji tabe ndi na Yéhôva a nye’e wo, wé ke nye ôyap.”

6. Jé bia yiane bo éyoñ bia taté na bia simesane na Yéhôva a nye’e ki fe bia?

⁶ Jam e nga kui bobejañ bete da liti abim avé mbia b’asimesan be ne te’elane mbunane wongan. Jé ô ne bo nge jam ete da kui wo? Wo yiane ji’a wosane mbia b’asimesane bete. Sili’i Yéhôva ngule ya vaa mbia b’asimesan, a fole be a “mvo’e Zambe, nje éte ja ye ba’ale nleme wôé a minsimesane miôé.’ (Bs. 139:23; Beph. 4:6, 7) Nde fe, te vuane na ô nji bo étam. Bobejañ befe be tele été éte. To’o bebo bisaé be Yéhôva ya melu mvus be’efe be nga wosan avale mbia b’asimesan ete. Bi tame yen éve’ela nlômane Paul.

7. Mam mevé me mbe me tyelé’ Paul nleme yôp?

⁷ Ye ô wô’ô wô’ôtane biyoñ biziñ ve ane mimbe’e mise ô bili mia dit? Paul fe a nga wô’ôtan nalé. Nlem ô mbe ô tyele  nye yôp sa ve asu akônda da étam, ve ‘ajô ya mekônda mese.’ (2 Bec. 11:23-28) Ye ô bili aval ôkon e vo’o saban, a nalé a tya’a wo nlem angôndô? Yeme’e na Paul fe a mbe a bili ‘éyo minsôn été.’ Éyo éte é mbe é yiane be beta ôkon, a ôkon ôte ô mbe ô ndeñele’e nye nya abuii. (2 Bec. 12:7-10) Ye ô wô’ô bili atek biyoñ biziñ amu wo wosane mbia minkômban miziñ? Paul fe a nga tebe été éte. A nga jô na a ne “éngôngole môt,” amu a mbe a wosa’ane kom ése a mbia minkômbane miziñ ya minsône mié.​—Bero. 7:21-24.

8. Jé é nga volô Paul na a dañe minju’ a mbe a tôba’ane mie?

⁸ Akusa bo minju’u mise Paul a nga tôbane mie, a nga ke ôsu a bo Yéhôva ésaé. Jé é nga volô nye? A mbe a yeme’e na a be’e metyi ya abé, ajô te a nga futi ndi nlem jé ntañ. A mbe a kôme’e yeme ngaka’a Yésus a nga bo nyi: ‘Môt ase a buni [Yésus] . . . a ye tabe ényiñ ya melu mese.’ (Jean 3:16; Bero. 6:23) Teke va’a nge beté, Paul a mbe nsamba bôte ô nga liti na wo buni Yésus a ntañ. A mbe a to ndi na Yéhôva é jamé môt ase a jôban abé dé a sili nye njaman, to’o ba be nga bo mbia minsem.​—Bs. 86:5.

9. Jame Paul a nga jô Begalate 2:20 da ye’ele bia jé?

⁹ Paul a mbe fe a to ndi na Yéhôva a nye’e nye nya abuii, amu Yéhôva a nga lôme Mone wé na a zu wu asu dé. (Lañe’e Begalate 2:20.) Ye wo te yene bifia Paul a te belane bie memane ya éfus éte? A jô na: “Mone Zambe . . . a nga nye’e ma, a ve émien amu ajô dam.” Paul a mbe a yeme’e na nye’ane Zambe ô nji bi minné. A nji jô na: ‘Ma yeme na Yéhôva a nye’e bobejañ a bekale bam. Ve mfa’a wom, a vo’o nye’e ma’. Paul a nga kate bobejañ ya Rome na: “Éyoñ éte bi ngenan bebo mam abé, Krist a nga wu señe jangan.” (Bero. 5:8)

10. Kalate Beromain 8:38, 39 a ye’ele bia jé?

¹⁰ Lañe’e Beromain 8:38, 39. Paul a nga yene na nye’ane Yéhôva ô ne nya ngulu. A nga jô na teke jôm éziñ é ne “bo ngule ya va bia mfa’a ya nye’ane Zambe.” Paul a nga yen aval avé Yéhôva a nga jibi ayoñ Israël, a aval a nga mvamane nye émien. Bi ne jô tyi’ibi na Paul a mbe a fase’ avale di: ‘Mbôle Yéhôva a nga lôm atyi’i Mone dé na é zu wu asu dam, ye ma yiane beta sôane na a nye’e ma?’​—Bero. 8:32.

11. 1 Timothée 1:12-15 a jô na Paul a nga bo mbia be mam ôsusua na a bo Kristen, ve amu jé a mbe a to ndi na Zambe a nye’e nye?

 ¹¹ Lañe’e 1 Timothée 1:12-15. E nga yiane fe kui Paul biyoñ biziñ na a wô’ô nlem mintaé amu mam a nga bo ôsusua na a bo Kristen. Paul a nga jô na nnye a ne mbo mam abé “ôsu,” a bia wô’ amu jé a nga jô nalé. A mbe a kele’ a tibili Bekristen minlam minlam, a futi’i beziñ mimbôk, a tindi’i ke bôte na be wôé ba bevok. (Mam. 26:10, 11) Tame ve’ele simesan avale Paul a mbe ve wô’ôtan éyoñ a mbe a tôba’an ésoé Kristen ézin bebiaé be nga wu amu nye? Paul a mbe a yeme’e na a vo’o tyendé mam me nga bobane melu mvus akusa bo a mbe a maneya sili Yéhôva a bobejañ njaman. A nga kañese na Yésus a nga wu fe asu dé, jôm ete nje a nga jô na: “Amu mvame Zambe, me nto [môt] me né.” (1 Bec. 15:3, 10) Jam ete da ye’ele wo jé? Kañese’e fe na Yésus a nga wu asu dôé, a na a nga ve wo fane ya bi mbamba élat a Yéhôva. (Mam. 3:19) Jame da dañe mfi mise me Yéhôva e ne ésaé bia bo éyoñ ji, a ji bii bo melu ma zu, sake bikop bi nga bo melu mvus, to’o bi mbe Bengaa be Yéhôva éyoñ éte nge momo.​—És. 1:18.

12. Aval avé 1 Jean 3:19, 20 a ne volô bia éyoñ bia yene biabebiene zezé?

¹² Éyoñ wo simesane na Yésus a nga wu a butane mam abé môé, ô ne jô womien na: ‘Me nji yian abime mvam ete’. Jé é bo na ô simesane nalé? Minlem miangan mi ne ju’u bia, a bo na bi yene biabebien zezé. (Lañe’e 1 Jean 3:19, 20.) Éyoñ nalé a kui, bia yiane tabe ndi na “Zambe a dañe minlem miangan.” Bi kusa simesane na Yéhôva a nye’e ke bia nge ke na a jamé ke bia, ve mfa’a wé, Yéhôva nye a  ke ôsu a nye’e bia, é ke fe ôsu a jamé bia. Bia yiane ke ôsu a yemete ndi nleme jangan na Yéhôva a nye’e bia. Asu na bi bo de, bia yiane bi fulu ya yé’é Kalate Zambe, bi ye’ela’ane mban, bi yeñe’e fe a bobejañ. Aval avé mam mete melal me ne volô bia?

13. Aval avé Kalate Zambe a volô bia? (Fombô’ô nka’ale ô ne nlô ajô na “ Kalate Zambe a nga volô be.”)

¹³ Yeké’é Kalate Zambe môs ôse. Nge ô bo de mban, wé tu’a yeme mefulu me Yéhôva, éyoñe te fe wé yen abim avé a nye’e wo. Éyoñ bia bindi Mejô me Zambe môs ôse, nalé a volô bia na bi sôan ôsimesane wongan a mam me ne bia minlem été. (2 Tim. 3:16) Kevin, mvendé éziñ, a mbe a yene’ émien zezé biyoñ biziñ. A jô na: “Éyoñ me nga lañ a bindi Besam 103, me nga kui na me sôan ôsimesane wom, a wô’ôtan nye’ane Zambe.” Eva bia te jôô nye yôp a jô na: “Mame ngô’é mese, me wô’ô nyoñe mon éyoñ asu na me bindi Kalate Zambe. Nalé a bôône ma nlem si, a mbunane wom wo tu’a bo ngu.”

14. Aval avé meye’elane me ne volô wo?

¹⁴ Ye’ela’ane Zambe éyoñ ése. (1 Bet. 5:17) Nge wo kômbô bo mvôé môt éziñ, wo yiane bo ô laan a nye, ô kate’e nye mam ne ne wo nlem été. Aval ete da da, éyoñ bia kate Yéhôva mam ma tyelé bia minlem yôp a avale bia wô’ôtan, bia liti nye na bi to ndi a nye’ane wé. (Bs. 94:17-19; 1 Jean 5:14, 15) Yua bia te jô nye yôp a jô na: “Éyoñ ma ye’elan, me nji su’u ve na ma kate Yéhôva mame mese ma te bobane môs, ma kate fe nye avale ma wô’ôtan. Nalé a nga volô ma na me yene Yéhôva sake ane masa a jôé bebo bisaé bé, ve ane mbamba Ésaa a nyoñ ngap a bone bé.”​— Fombô’ô nka’ale ô ne nlô ajô na “ Ye ô lañeya kalate ate?”

15. Aval avé Yéhôva a nga liti na a nyoñ bia ngap?

¹⁵ Lôte’ éyoñ a bobejañ. Be ne das da so be Zambe. (Jc. 1:17) Yéhôva a nga liti na a nyoñ bia ngap éyoñ a nga ve bia beta ékôane bobejañ a besita ba ‘nye’e bia éyoñ ése.’ (Min. 17:17) Éyoñe Paul a nga tili bobejañ ya Colosse, a nga kobô ajô Bekristene béziñ be nga su’u nye. A nga jô na bobejañ bete “be mbe [nye] mvolan nlem.” (Beco. 4:10, 11) Yésus émien fe a mbe a yi mvolan biyoñ biziñ. E nga kui na bôte beziñ, to’o beéngele, be volô nye, a nalé a mbe a va’a nye ngule nyul.​—Luc 22:28, 43.

16. Aval avé bobejañ be ne volô bia na bi subu Yéhôva bebé?

 ¹⁶ Ye wo bu’ubane fo’o mbamba mewoso Yéhôva a nga ve wo akônda? Éyoñ bia kate éwôlô Kristen mam ma tyelé bia minlem yôp, nalé a nji tinane na bi ne ate’e nsisim. Jam ete da volô bia na bi ba’ale ngule mbunan. James bia te jôô nye yôp a jô na: “Biwôlô Bekristen ya akônda bi nga volô ma nya abuii. Éyon mbia b’asimesan ba so ma nlem, ba vô‘ôlô ma a ôjibi ôse, ba kate fe ma abim avé ba nye’e ma. Mvolan wôp ô nga bo na me wô’ôtane nye’ane Yéhôva.” Ngo’o nge bia bese bia ke ôsu a bo nlatan nye‘ane Zambe été!

17-18. Za nnye bia yiane vô’ôlô, a amu jé?

¹⁷ Satan a yi na ô bili atek, a na ô lume Yéhôva mvus. A yi na ô simesane na Yéhôva a nye’e ke wo, a na ô nji yiane mvame Jé. Ve bia te yene na teke jam éziñ é ne nalé.

¹⁸ Yéhôva a nye’e wo. Ô ne édima mise mé. Nge wo tôñ éve’ela Yésus a bo Yéhôva mewôk, wo fe wé “tabe” nye’ane wé été nnôm éto. (Jean 15:10) Ajô te, te vô’ôlô minsos mi Satan nge ke ve womien bijô. Vô’ôlô’ô Yéhôva kom ése, amu nnye étam a yeme mbamba mefulu ô bili. Te ve’ele vuane na “Yéhôva a yene bôt bé mvaé,” wo fe ô ne ngabe ya bôt bete.