STODI AATIKL 17
Jehoava Lov Yoo!
“Jehoava lov fi hihn peepl.”—PS. 149:4.
SANG 108 Gaad Laayal Lov Tuwaadz Wi
WEH WI WAHN DISKOS? *
Wi hevnli Faada lov eech wan a wi (Paragraaf 1)
1. Weh Jehoava si eena fi hihn peepl?
JEHOAVA GAAD “lov fi hihn peepl.” (Ps. 149:4) Dat mek wi feel veri hapi! Jehoava si di gud eena wi; hihn si how gud wi ku bee ahn hihn help wi fi bee fi hihn fren. If wee stay faytful tu hihn, den hihn wahn bee wi fren fareva!—Jan 6:44.
2. Wai sohn peepl bileev dat Jehoava noh lov dehn?
2 Sohn peepl mait seh, ‘Ai noa dat Jehoava lov fi hihn peepl az wahn groop, bot how Ai ku bee shoar dat Jehoava lov mee?ʼ Wai sohnbadi mait aks da kweschan? Oksana * mi sofa wahn lat wen shee mi smaal. Shee seh: “Ai mi veri hapi wen Ah mi geh baptaiz ahn staat tu painyaa. Bot 15 yaaz layta, Ah staat tu memba di bad tingz weh mi hapm tu mi wen Ah mi smaal. Ah staat tu tink dat Jehoava neva pleez wid mi nohmoh, ahn dat Ai neva gud inof fi mek hihn lov mi.” Yua, wahn sista weh mi aalso ga lata prablemz wen shee mi smaal, seh: “Ai mi dedikayt mi laif tu Jehoava bikaaz Ah mi waahn mek hihn hapi. Bot Ai mi shoar dat hihn kuda neva lov mi.”
3. Weh wi wahn diskos eena dis aatikl?
3 Yoo mait feel jos laik di too sista weh wi jos menshan. Yu lov Jehoava wahn lat, bot yu noh bileev dat hihn lov yoo. Wai yu haftu bee shoar dat hihn lov yoo? Ahn weh ku help yu wen yu tink dat Jehoava noh lov yu? Mek wi diskos di ansaz tu dehndeh kweschan.
IH DAYNJAROS FI DOWT DAT JEHOAVA LOV YU
4. Wai ih daynjaros fi dowt dat Jehoava lov wi?
4 Wen wee shoar dat Jehoava lov wi, den wi wahn waahn du wi bes fi serv hihn eevn wen wi di fays chalenjiz. Pahn di ada han, if wi dowt dat Jehoava lov wi, den wi “wahn geh week.” (Prov. 24:10) Ahn wen wi staat tu feel diskorij ahn tink dat Gaad noh lov wi, wi wahn kyaahn fait gens Saytan wen ih atak wi.—Ifee. 6:16.
5. Weh hapm tu som a wi bradaz ahn sistaz wen dehn tink dat Gaad noh lov dehn?
5 Som a wi bradaz ahn sistaz tink dat Jehoava noh lov dehn, ahn dat mek dehn fayt geh week. Wahn elda weh naym James seh: “Eevn doa Ah mi-di serv da Betel an Ah mi-di injai mi minischri eena wahn farin-langwij kangrigayshan, Ah neva shoar if Jehoava mi hapi wid weh Ah mi-di du far ahn. Ai mi eevn staat tu wanda weda er nat Jehoava mi-di lisn tu mi pryaaz.” Eva, wahn sista eena ful-taim servis, seh: “Ai laan dat ih daynjaros fi tink dat Jehoava noh lov wi, bikaaz dat afek evriting weh yu du eena yu servis tu hihn. Ih mek yu waahn stap du tingz fi Jehoava ahn yu noh injai yu servis tu ahn.” Michael, hoo da wahn regyula painyaa ahn wahn elda, seh: “If yu noh bileev dat Gaad lov yu, yu wahn jrif weh fan ahn.”
6. Weh wi need fi du wen wi staat tu tink dat Gaad noh lov wi?
6 Dehndeh ekspeeryens shoa wi dat ih daynjaros fi tink dat Jehoava noh lov wi, kaaz den wi fayt ku geh week. Bot weh wi need fi du wen wi staat tu tink dat Jehoava noh lov wi? Stap tink da way rait away! Aks Jehoava fi help yu stap wori ahn fi gi yu ‘di kaina pees weh wahn protek yu haat ahn main.ʼ (Ps. 139:23; Fil. 4:6, 7) Ahn memba, yoo da noh di onli wan weh tink da way. Ada faytful bradaz ahn sistaz di schrogl wid negitiv feelinz tu. Eevn servants a Jehoava eena di paas mi haftu fait gens dehndeh feelinz. Mek wi diskos weh wi ku laan fahn di egzampl a di apasl Paal.
WEH WI KU LAAN FAHN PAAL EKSPEERYENS
7. Weh prablemz Paal mi haftu deel wid?
7 Yoo eva feel laik yu ga tu moch rispansabiliti ahn dat ih tu haad fi du evriting weh yu need fi du? If yu eva feel da way deh, yu ku andastan how di apasl Paal mi feel. Hihn mi wori bowt ih bradaz ahn sistaz. Ahn hihn neva jos wori bowt di bradaz ahn sistaz eena wan kangrigayshan, bot hihn mi wori “bowt aala di kangrigayshan dehn.” (2 Kor. 11:23-28) Yoo sofa fahn helt prablemz weh mek it haad fi injai laif? Paal mi ga wahn seeryos prablem weh hihn seh da-mi laik wahn “prikl eena [ih] badi.” Ih pasabl dat da “prikl” da-mi wahn helt prablem. Ahn hihn mi reeli waahn geh rid a it. (2 Kor. 12:7-10) Yu eva feel diskorij bikaaz yu schrogl fi du weh rait? Paal mi feel da way sohntaim. Hihn mi kaal ihself wahn “mizarabl man” bikaaz hihn mi aalwayz haftu fait fi du weh rait.—Roam. 7:21-24.
8. Weh mi help Paal fi bayr op eevn doa ih mi ga prablemz?
8 Eevn doa Paal mi haftu bayr op wid aala dehndeh prablemz, hihn mi kip di serv Jehoava. Weh mi gi hihn di schrent fi du dat? Eevn doa Paal mi noa gud dat ih neva perfek, hihn mi ga schrang fayt eena di ransom. Hihn mi aalso noa Jeezas pramis dat “evribadi weh shoa fayt eena [Jeezas] . . . wahn liv fareva.” (Jan 3:16; Roam. 6:23) Yes, Paal mi ga schrang fayt eena di ransom. Hihn mi shoar dat Jehoava redi ahn wilin fi fergiv peepl eevn wen dehn komit seeryos sin, az lang az dehn ripent.—Ps. 86:5.
9. Weh wi laan fahn weh Paal mi seh da Galayshanz 2:20?
9 Paal mi aalso ga fayt dat Gaad mi lov hihn veri moch, bikaaz hihn mi noa dat Gaad sen Jeezas fi ded far ahn. (Reed Galayshanz 2:20.) Noatis di inkorijin werdz da di en a da vers. Paal mi seh: “Di Son a Gaad . . . lov [mee] ahn giv op ih laif fi mee.” Paal neva feel laik hihn mi soh wikid dat Gaad kuda neva lov ahn. Hihn neva tink tu ihself, ‘Ah ku si wai Jehoava wuda lov mi bradaz, bot hihn kuda neva lov mee.ʼ Paal mi rimain di Roamanz: “Krais ded fi [wee] eevn wail wee stilyet da-mi sinaz.” (Roam. 5:8) Di lov weh Gaad feel fi eech wan a wi noh ga no limit!
10. Weh wi laan fahn Roamanz 8:38, 39?
10 Reed Roamanz 8:38, 39. Paal mi noa how schrang Gaad lov. Hihn mi rait dat notn ku “stap Gaad fahn lov wi.” Paal mi noa how payshent Jehoava mi payshent wid di nayshan a Izrel. Hihn mi aalso noa dat Jehoava mi shoa mersi tu ahn. Soh da laik Paal mi-di seh, ‘Sins Jehoava mi sen ih oan Son fi ded fi mee, Ai noh ga no reezn fi dowt dat hihn lov mi!ʼ—Roam. 8:32.
Weh impoatant tu Jehoava da weh wi du now an eena di fyoocha, noh di mistayk dehn weh wi mek eena di paas (Paragraaf 11) *
11. Eevn doa Paal mi komit sinz laik di wan dehn weh 1 Timoti 1:12-15 taak bowt, wai hihn mi shoar dat Gaad lov ahn?
11 Reed 1 Timoti 1:12-15. Paal mi praabli feel reeli bad weneva hihn tink bowt aal di tingz weh ih mi du bifoa ih mi ton wahn Kristyan. Hihn mi kaal ihself di “wers” sina, ahn wi ku andastan wai! Bifoa hihn mi laan di chroot, hihn mi persikyoot di Kristyanz eena wan siti afta di neks. Hihn mi put som a dehn eena prizn, an ih mi sopoat di disizhan weh di koat mek fi kil sohn ada Kristyanz. (Aks 26:10, 11) Sopoaz eena dehn dayz, wahn Kristyan kopl mi ded sayka Paal, ahn den laytaraan ih meet wan a fi dehn pikni eena wahn kangrigayshan weh ih vizit. Yoo ku imajin how Paal wuda mi feel? Paal mi veri sari fi di mistayk dehn weh ih mek, bot hihn mi noa dat ih kyaahn chaynj di paas. Hihn mi aksep dat Krais mi ded far ahn, an ih mi rait: “Da onli bikaaz a Gaad grayt kainis dat Ai da wahn apasl.” (1 Kor. 15:3, 10) Wat da di lesn fi wee? Aksep dat Krais ded fi yoo ahn dat dat mek it pasabl fi mek yoo ga wahn kloas frenship wid Jehoava. (Aks 3:19) Weh impoatant tu Jehoava da weh wi du now an eena di fyoocha, noh di mistayk dehn weh wi mek eena di paas, weda wi da-mi wan a Jehoava Witnisiz er nat.—Isa. 1:18.
12. How 1 Jan 3:19, 20 ku help wi if wi feel laik wi noh wert notn er laik wi noh gud inof fi mek enibadi lov wi?
12 Wen yu tink bowt how Jeezas mi ded soh dat yu ku geh fergivnis fi yu sinz, yu mait tink, ‘Ai noh feel gud inof fi aksep dis preshos gif.ʼ Wai yu mait feel da way? Wi haat noh perfek, soh ih mait chrik wi ahn mek wi feel laik wi noh wert notn er laik if wi noh gud inof fi mek enibadi lov wi. (Reed 1 Jan 3:19, 20.) Wen wi staat tu tink laik dat, wi need fi memba dat “Gaad grayta dan wi haat.” Soh eevn if wee feel laik Jehoava noh lov wi er dat ih noh wahn fergiv wi, wi hevnli Faada stil lov wi ahn wilin fi fergiv wi. Wi need fi bileev dat Jehoava lov wi. Fi du dat, wi haftu stodi fi hihn Werd aafn, pray tu ahn aal di taim, ahn spen taim wid ada peepl weh wership ahn. Wai ih soh impoatant dat wi du dehnya tingz?
HOW BAIBL STODI, PRYAA, AHN LAAYAL FRENZ KU HELP
13. How Baibl stodi ku help wi? (Si di baks “ How Gaad Werd Help Dehn.”)
13 Stodi Gaad Werd evri day, ahn yu wahn andastan Jehoava kwalitiz moa ahn moa. Yu wahn geh fi andastan humoch hihn lov yu. Wen yu meditayt pahn Gaad Werd evri day, ih ku gaid yu tinkin soh dat yu ku “set tingz schrayt” eena yu main ahn haat. (2 Tim. 3:16) Wahn elda weh naym Kevin, hoo aalwayz yoostu schrogl wid negitiv feelinz bowt ihself, seh: “Wen Ah reed Psalm 103 ahn meditayt pahn weh Ah reed, ih help mi fi karek mi tinkin ahn fi andastan weh Jehoava reeli tink bowt mi.” Eva, weh wi menshan erliya, seh: “Da di en a di day, Ah tek wahn lee taim fi tink bowt weh impoatant tu Jehoava. Dat gi mi pees eena mi haat ahn schrentn mi fayt.”
14. How pryaa ku help wi?
14 Pray aal di taim. (1 Tes. 5:17) Wen yu waahn mek fren wid sohnbadi, yu haftu taak tu dehn aal di taim ahn tel dehn weh yu tink ahn how yu feel. Da di saym ting wid wi frenship wid Jehoava. Wen wi pray ahn tel Jehoava how wi feel, weh wi tink, ahn bowt di tingz weh mek wi wori, wi di shoa dat wi chros hihn ahn dat wi noa dat hihn lov wi. (Ps. 94:17-19; 1 Jan 5:14, 15) Yua, weh wi menshan erliya, seh: “Wen Ah pray, Ah chrai fi du moa dan jos tel Jehoava weh Ah du joorin di day. Ah chrai tel ahn weh Ah reeli tink ahn how Ah feel. Soh now, Ah noh si Jehoava az di baas a wahn kompni, bot az wahn Faada weh reeli lov fi hihn chiljren.”—Si di baks “ Yu Don Reed Dis Buk?”
15. How Jehoava shoa dat hihn inchrestid eena eech wan a wi?
15 Spen taim wid laayal frenz; dehn da wahn gif fahn Jehoava. (Jay. 1:17) Wi hevnli Faada mi shoa wi dat ih inchrestid eena eech wan a wi wen ih gi wi wahn spirichwal famili a bradaz ahn sistaz weh “shoa lov aala di taim.” (Prov. 17:17) Wen Paal mi rait ih leta tu di Koloashanz, ih mi menshan sertn Kristyanz weh mi sopoat ahn. Hihn mi seh dat dehn mi reeli “gi [hihn] lata komfert.” (Kol. 4:10, 11) Eevn Krais Jeezas mi need an apreeshiayt di sopoat weh ih mi get fan ih frenz, weda da mi fahn aynjelz er hyoomanz.—Look 22:28, 43.
16. How laayal frenz ku help wi jraa kloasa tu Jehoava?
16 Yoo di geh di ful benifit fahn di laayal frenz weh Jehoava gi yu? Wen wi taak tu wahn machoar fren bowt wi prablemz ahn woriz, dat noh meenz dat wi fayt week. In fak, dat ku bee wahn protekshan fi wi! James, weh wi menshan erliya, seh: “Di kloas frenship weh Ah gat wid machoar Kristyanz help mi wahn lat. Wen Ah staat tu tink eena wahn negitiv way, dehnya preshos frenz payshent wid mi, lisn tu mi, ahn rimain mi dat dehn lov mi. Dat shoa mi dat Jehoava reeli lov mee.” Yes, ih veri impoatant dat wi bee kloas frenz wid wi spirichwal famili!
KANTINYU FI BENIFIT FAHN JEHOAVA LOV
17-18. Hoo wi haftu lisn tu, ahn wai?
17 Saytan waahn mek wi stap fait fi du weh rait. Hihn waahn wi bileev dat Jehoava noh lov wi ahn dat wi noh gud inof fi mek Jehoava sayv wi. Bot laik weh wi diskos eena dis aatikl, dat noh chroo non ataal!
18 Jehoava lov yoo. Yoo da wahn preshos chrezha tu hihn. If yu obay ahn, yu wahn “kantinyu fi benifit fahn fi hihn lov” fareva, jos laik Jeezas. (Jan 15:10) Soh noh lisn tu Saytan ner tu yu oan haat wen yu staat tu feel laik Jehoava noh lov yu. Insted, lisn tu Jehoava, hoo si di gud eena eech wan a wi. Bileev dat hihn “lov fi hihn peepl,” inkloodin yoo!
SANG 141 Laif Da Wahn Gif Fahn Gaad
^ par. 5 Som a wi bradaz ahn sistaz noh bileev dat Jehoava kuda eva lov dehn. Eena dis aatikl, wi wahn diskos wai wi ku bee shoar dat Jehoava lov eech wan a wi. Wi wahn aalso laan weh wi ku du if wi dowt dat hihn lov wi.
^ par. 2 Som a di naym dehn chaynj.
^ par. 67 DI PICHA: Bifoa Paal mi laan di chroot, hihn mi persikyoot di Kristyanz ahn sen lata dehn da prizn. Wen hihn mi aksep weh Jeezas du far ahn, hihn mi chaynj ih wayz an inkorij ih Kristyan bradaz, eevn di wan dehn weh da-mi famili tu di saym wan dehn weh ih mi persikyoot.
