TÖHAKÖÖPÖ ĀTIKÖL 17
Hangenlōn Yāvē Tö Meh!
“Pò ngam Mā Tēv nö hāngenlōn tö yip tarik re.”—2 KIN. 2:11.
TINKÖÖKÖ 108 Tökô-en Hanangenlōn Ngam Tēv
RAHËICHTAMAT *
Tö Yāvē nö “hangenlōn” tö yip taṙòkhöre tarik re (Ngëichkö ngam perekrāf 1)
1. Asup ngahëichkö Yāvē nö in hī?
“PÒ NGAM Mā Tēv nö hāngenlōn tö yip tarik re.” (2 Kin. 2:11) Höng ngëichkö nup tö vai tinrīken hī, pò ò nö ṙatö-ellōnre tö hī min halööktit ngam tinrīken re. Mihôiṅ min öi hol ò. Lökten anga-aṅ nö hanôlö hī. Yēḵ hī min haköpngöre in ò, ngaich örheūheu min anga-aṅ nö hol hī.—Yôh. 6:44.
2. Kūö yòh yip rīkre nö ngölōn tö Yāvē nö öt hangenlōn tö cha?
2 Ōt yip prötör sistör tö ngö ṙô lohten, ‘Akahalōn chin tö Yāvē nö hangenlōn tö yip tarikre, sitih inlahen pöri chū-ö ṙatö-ellōnre tö ò nö hangenlōn tö chu?’ Kūö yòh cha-a nö ngatī mufē? Yěn fēkö nuk inyëngenre cha-a, hē cha nö nyīö. Kò-òren hang ṙô Ôlina, * ngö ṙô anga-aṅ: “Ṙamlōn chū-ö hē chu kē ngam vinôkö ngaich ilöö kētöre öich rekulör painīör. Unôichrit tö 15 samyeūheu pöri chū-ö yīhi miṙivlōn öich fēkö nuk inyëngenre, hē nyinī-ö chu, lökten öich ngölōn tö Yāvē nö öt hangenlōn tö chu.” Ngatī mufē inrē ang Yôsikō ngòh painīör sistör: “Kētöre chū-ö öich löklōn Yāvē pöich hòṅ haṙamlōn ò. Sön pöri öich ngölōn tö Yāvē nö öt hangenlōn tö chu.”
3. Asuh öp min haköplö hī in ngih ātiköl?
3 Ngaich in taheui hang inlahen minā sistör tö nët tak, lohten më-eṅ inrē ngatī mufē tö Yāvē nö öt hangenlōn tö meh. Haköplu in min in ngih ātiköl, tö hī öi kūöyòh hòṅ ṙatö-ellōnre tö Yāvē nö hangenlōn tö hī? Hòṅ sitih inlahen öm min yěm ngatī mufē?
PINLĀNGEN YĒḴ HĪ ÖT ṘATÖ-ELLŌNRE
4. Sitih inlahen öi min yěi öt ṙatö-ellōnre tö Yāvē nö hangenlōn tö hī?
4 Yēḵ hī öt ṙatö-ellōnre tö Yāvē nö hangenlōn tö hī, ngaich mihôiṅ min öi ṙangenre öi löklōn ò. Yěn ngatī ngam mufē hī, tö Yāvē nö öt hangenlōn tö hī, ngaich mihôiṅ min öi haṙivlōn, ‘ngaich kūönngöre min ngam kumlēḵ hī.’ (Inch. 24:10) Ngaich ötkô min öi la-al ngam Sī-ö.—Efi. 6:16.
5. Sitih lōn yip rīkre prötör sistör tö ngam hanangenlōn ngam Tēv?
5 Ngölōn yip rīkre prötör sistör tö Yāvē nö öt hangenlōn hēk öt chumkūöṙen tö cha. Lökten cha nö kūönngöre ṙinatö-ellōn. Hang ṙô ngòh minṙöinylen ang Chēms nö ngöṙô: “El Pētěl chin la-evṙen hēk chuh el minë māṅ tö tahëngö ëlô. Kuchīken öich ahangköm tölöök inhānga. Hēṙu pöri öich ngölōn tö Yāvē nö öt ṙamlōn nö in chu.” Ēvā ön ngòh inrē kumheūttö ṙētakre nö löklōn ngam Tēv. Tö ngö ṙô: “Yēḵ hī ngölōn tö Yāvē nö öt hangenlōn tö hī ngaich öt löng ngam ṙòng e nö in hī.” Maiköl ngamòh inrē tö hěngtak nö minṙöinylen hēk painīör inrē, tö ngö ṙô: “Yēḵ hī min öt ṙatö-ellōnre tö Yāvē nö hangenlōn tö hī ngaich mihôiṅ min öi marôvat tö ò.”
6. Sitih inlahen öm yěm öt lööngö mufē öm in ngam Tēv?
6 Yěn ngatī inlahen yanīhi nup ‘töt löng mufē,’ ngaich mihôiṅ öm havëkö kūö Yāvē tö hinòlṙen re öm kēnyen u nö ṙa-ang ellōn meh. “Ngaich ngam lanāmö ngam Tēv, ngam chamööḵngö taṙòkhöre mikah min, nö aṅtö nômö.” (Sal. 139:23; Filip. 4:6, 7) Kööpölōn man, rö-ö man höng më-eṅ tö ngatī mufē. Pön pōyen misī yik lamöklōn Yāvē tö ngatī mufē. Ta-a töi ngëichkö inlahen Pôl.
HAKÖPLÖ HĪ ÖI IN PÔL
7. Asuh nuk pinṙūtölōn Pôl?
7 Kihngen öm tö nup la-en kinë-ekūö meh hēk vöö hòng yěm öt vāyö inlahen öm kēken u? Ngatī pinṙūtölōn misī ang Pôl nö fēkö ‘nuk māṅ nö ṙòkhöre.’ (2 Kòr. 11:23-28) Vahavö öm inrē töp lökten meh yīhi miṙivlōn. Ngatī miṙivlōn misī ang Pôl, pön aṅhav alaha tök invahre tö sā tö “lòklöre nö i alaha ò,” lohten anga-aṅ nö hòṅ kēngen e nö ṙa-ang in re. (2 Kòr. 12:7-10) Ngatī miṙivlōn öm më-eṅ inrē? Yěm ngatī miṙivlōn, ngaich mihôiṅ öm haköplu öm in Pôl. Pön ngatī misī ang Pôl nö hòṅ la-evṙen tö nup tölöök la-en, sön nö ötkô nö kēken u, tö kūö öt hanëtöre. Ngö ṙô anga-aṅ töre: “Ō chū-ö tötkôlò tarik!”—Rōm. 7:21-24.
8. Asuh ök mahayööken Pôl nöng iṙūöhen nö löklōn ngam Tēv?
8 Öt ṙangenre ang Pôl nö löklōn ngam Tēv pôrò anga-aṅ nö kihngen. Kūöyòh anga-aṅ nö ngatī? Pön ṙatö-ellōn re nö im tökitaknyu mahām Kristū. Akahakūö anga-aṅ töm kinlēḵngô Yēsū ‘tö vē ṙamatö-ellōnre nö in ò [Yēsū] . . . Nômu tö ngam tö-örheūheu aṅ.’ (Yôh. 3:16; Rōm. 6:23) Öt kintööngulōn anga-aṅ tö ngam Tēv nö hangenlōn tö ò. Yēḵ hī min ayī-ö haṙivlōn tö nup kahëkenre tö vaich ngaich halööktitre ngaich aṙělen hī min ang Yāvē.—Sal. 86:5.
9. Asup haköplö hī im ṙô Pôl ngam tö kūchi im Kalatī 2:20?
9 Ṙatö-ellōn re ang Pôl tö Yāvē nö kēḵten ngam kūön re ang Kristū nö chö-önyten tö ò. (Vë-evkūö Kalatī 2:20.) Kò-òren hang ṙô ngam mana-angrit ngam miröökö. Ngö ṙô ang Pôl: ‘Töm Kūön ngam Tēv, nö hāngenlōn tö chu, kēngöre inrē töpôkūö chu.’ Öt ngö mufē ang Pôl tö Yāvē nö pōyen hangenlōn tö ò ngaich kūönnen hanangenlōn tö yip tahëng. Fēlen yik Kristīön aṅ Rōma ang Pôl, nö ngö ṙô: “I saha hī ṙòngmö tötlöök, ngaich kapah Kristū tö pòkūö hī.” (Rōm. 5:8) Kò-en pöri ang Yāvē nö ṙòkhöre hanangenlōn tö yip tarikre.
10. Asuh öp haköplö hī im Rōma 8:38, 39?
10 Vë-evkūö Rōma 8:38, 39. Öt kintööngulōn ang Pôl tö ṙū-u ngam hanangenlōn ngam Tēv. Ngörô anga-aṅ, öt hěngtak takô “nö haköhngen hī tö ngam hanāngenlōn ngam Tēv.” Ngatī manööyö misī anga-aṅ nö in yik kūönre Israel. Akahalōn anga-aṅ inrē tö inlahen Yāvē nö aṙē-ělōn tö ò. Lökten mihôiṅ öi ngö ṙô, ‘Yěn öt ṙāḵlö nômö ngam kūön re ang Yāvē tö pòkūö chu, milip tī ang min nö hameuk töm hangenlōn re nö i taṙòkhöre?’—Rōm. 8:32.
What counts with God is what we do now and in the future, not the mistakes we made in the past (Ngëichköm perekrāf 11) *
11. Pōyen nuk fālen Pôl tö vënyu nö im 1 Timôtī 1:12-15, kūö yòh pöri ngam Tēv nöng hangenlōn tö ò?
11 Vë-evkūö 1 Timôtī 1:12-15. Kihngen hēk haṙivlōn ang Pôl yěn fēkö nuk inlahen tīre tö yik Kristīön misī. Pön pōyen yik in cha tö chaphötvö tö ò nö el chēl. Ṙamlōn anga-aṅ inrē yěn töölô finëlngö öp tö hěngtak. (Inl. 26:10, 11) Lökten ang Pôl nö kaheūköre nö kirööngen tökööl tö töng sitih tarik. Ötkô pöri anga-aṅ nö haṙīngen në tö ngatī inlahen mufē el kuilōnre. Ngö ṙô anga-aṅ: ‘Kūö lōn ngam Tēv chin töngamuh öich ōt.’ (1 Kòr. 15:3, 10) Asup haköplö hī öi in Pôl. Hòṅ ṙatö-ellōnre in tö Yēsū nö kapah töpòkūö hī, töp lökten hī mihôiṅ öi yihtöre öi hanôl ngam Tēv. (Inl. 3:19) Höng nup kahëken hī töngamuh hēk ip yamih ṙētak tö mötlö nö in ngam Tēv öt nuk tö ngaichngen fālen kahëken hī, pôrò misī öi im kanô-en hēk hö-ö inrē.—Isa.1:18.
12. Asuh öp min yanöölen meh yěm vë-ekūö ngam 1 Yôhan 3:19, 20 yěm ngölōn töre öm töt pōiṙāi?
12 Yěm hang inlahen Yēsū nö kapah tö pòkūö meh, kūöre nö hangenlōn töm, ngaich ngö lōn min më-eṅ öm kò-òren, ‘sitih inlahen min chū-ö ngatī ṙôken ṙāi?’ Köplōn man tö u nöng ṙô ellōn meh, pön öt ngatī mufē ngam Tēv nö in meh öm töt pōiṙāi. (Vë-evkūö 1 Yôhan 3:19, 20.) Hòṅ köplōn ayī-ö “pò ngam Tēv nö mööḵlö tö ellōn hī.” Sitih inlahen öm min? Örheūheu man vë-ekūö mat Paipöl, vë-ekūötēv, hēk kēnyö ṙētak re öm meuk kūö yip hol maneukre. Ngaich ngön min ngam ṙinatö-ellōn meh nö in ngam Tēv.
YANÖÖLEN VINË-EKŪÖ PAIPÖL, VINË-EKŪÖTĒV, HĒK HANÔL YIP HOLRE
13. Sitih inlahen öng ngam inkööpö mat Paipöl nö hayööken hī min? (Ngëichkö ngam pòks “ Hayööken Cha Ngam Paipöl.”)
13 Örheūheu man haköp mat ngam Paipöl. Asā inlahen hī haköp mat ngam Paipöl, ngatī hanëtö mat min öi meuk kūö Yāvē. Ngaich akaha elmat min ayī-ö tö ngam hangenlōn ngam Tēv nö kirööngen nö lā in hī. Hòṅ fēkö nup haköp re ayī-ö nup ‘mahalööktö nup mufē’ elkuilōn hī. (2 Tim. 3:16) Hang ṙô Kevin ngòh minṙöinylen nö ngö ṙô: “Akahngenre chū-ö öich höng hö-öv, hē chu pöri öich vë-ekūö ngam tö 103 Salmai fēkö minë ṙô e inrē, ngaich akaha elmat chū-ö tö mufē elkuilōn Yavē. Ngaich löökta ngam mufē chu.” Hang ṙô Ēvā inrē ngam tö kakka taheui tö hī, ngö ṙô anga-aṅ: “I mana-ang rit ngam sakamö chū-ö öich fēken nup taṙòkhöre töng sitih la-enre, inlahen ngam mufē ngam Tēv Yāvē nö in chu. Lökten in e ngaich chū-ö teūngen tö ngam lanamö ngaich sīöp ngam nganönö ngam ṙinatö-ellōn chu öich in ngam Tēv.”
14. Sitih inlahen öng ngam vinë-ekūötēv nö hayööken hī?
14 Örheūheu man vë-ekūötēv. (1 Tös. 5:17) Ngaich ngön min ngam innôlö hī nö in yip hol maneuk hī. Ngatī ṙēngen ngam inlahen hī yěi hanôlö Yāvē öi hòṅ vë-eny nup mufē elkuilōnre öi in ò, nup taṙòkhöre inrē töng afēkö hī, inmeuktö hī min angū-ö öi ṙatö-ellōnre tö ò nö hangenlōn tö hī. (Sal. 94:17-19; 1 Yôh. 5:14, 15) Hang ṙô Yōsikô ngam tö hangö inlahen taheui tö hī ngö ṙô anga-aṅ: “Yēḵ chu öich vë-ekūö Yāvē ngaich rö-ö chū-ö öich höng vë-eny nang ò tö nup taṙòkhöre la-enre iṙòtòng ngam sakamö. Vë-eny nang ò pöri chū-ö tö nup taṙòkhöre ṙô ellōnre. Ngaich sā tö röhta chū-ö öich in ò. Akaha elmat ngaich chū-ö tö Yāvē nö rö-ö nöng sā inlahen öp yöngkūö öp kömpöni öp kamheuk sakamö nö havëkö nup ripōt chu. Akaha-elmat pöri chū-ö tö ò nö inyööngö nö tö hangenlōn tö yip kūönre.”—Ngëichkö ngam pòks “ Ngaich Öm Më-eṅ Vë-ekūö E?”
15. Sitih inlahen ang Yāvē nö chumkūöṙen tö meh?
15 Hòṅ hanòl yip tököp in lamöklōn ngam Tēv Yāvē öi örheūheu. Kahëtö Yāvē yin më hol maneuk hī aṅ el minë māṅ më ‘tö örheūheu nö hangenlōn tö hī.’ (Inch. 17:17) Kò-en yin nö aṅ in Yāvē nö tö pōi ṙāi nö raneusö hī. (Yāk. 1:17) Löktö in e mikah lōn in tö Yāvē nö chumkūöṙen tö hī. I mat ngam chitri kahūich re ang Pôl nö eūken yik Kristīön aṅ Kòlòsī nö “mahaṙamkölōn” ò. (Kòl. 4:10, 11) Ngatī inrē ang Yēsū nö lōnu tö hī öi hanòlö ò. Hē yik mahaköp tö yik ma-ahāngö misī nö hayööken ò nö hangönken ò, ngaich ṙamölōn anga-aṅ nö in cha.—Lūk. 22: 28, 43.
16. Sitih inlahen yip min tö akaha hol nö hayööken hī röhta öi in Yāvē?
16 Kēḵ inyöökenre öm ṙung öm in yip tahëng hol maneuk re? Mihôiṅ in öi vë-eny nup kanihngen re, pinṙūtölōnre öi i yip tahëng, rö-ö pöri angū-ö nö tö ngö manah tö hī öi tö kūönen ṙinatö-ellōn. Pöi kò-en, yěi vë-eny nang yip holre min ngaich lanaklö ngam ṙinatö-ellōn hī min angū-ö. Hang ṙô Chēms ngam tö kakkö sin tö hī taheui. Ngö ṙô anga-aṅ: “Pōyen yanöölen chin öich lökten in yip holre ngaich tö ngömuh yěn yih ngam töt löng mufē chu öich ngö lōn tö ngam Tēv nö öt hangenlōn tö chu.” Ngaich akah elmat ngaich chū-ö öich kūö inyööken re tö yip hol maneuk re tö Yāvē nö kò-en nö hangenlōn tö chu. Kô-en ön ngam innôlö yip hol maneuk hī el ngam māṅ nö töt ṙanāngen.
HAKÖPNGÖRE IM HANANGENLŌN YĀVĒ
17-18. Hòṅ achīö öp tö hāngö ṙô, ngaich kūö yòh?
17 Hōten hī ngam Sī-ö öi ṙangenre, hēk ngölōn inrē tö Yāvē, tö ò nö öt hangenlōn tö hī, öt pōi ṙāi inrē öi imat ò. Hö-ö pöri angū-ö nö tölöng nö mufē.
18 Hangenlōn an Yāvē tö meh Yēḵ meh min öm hang nup ṙô ò, ‘köp min më-eṅ öm im hanangenlōn ò,’ sā inlahen Yēsū nö köp. (Yôh. 15: 10) Lökten um hangṙô ngam Sī-ö uh rēhěn öm hang ṙô ngam ellōn re, ngam tamöl ṙô meh öm ngatī mufē tö ngam Tēv Yāvē nö öt hangenlōn tö meh. Pītnyöre öm hang ṙô Yāvē, ngam töng ngamëichkö nup tö vai tinrīken meh. Köplōn “tö Yāvē nö hangenlōn tö yip taṙòkhöre tarik re” tö meh inrē.
TINKÖÖKÖ 141 Ngam pinngangkūö vinī-i hī
^ Par. 5 Pōyen yip prötör sistör tö ngö lōn tö Yāvē nö öt hangenlōn tö cha. Haköp in min öi in ngih ātiköl öi kūö yòh mihôiṅ öi öt kintöngulōn tö Yāvē nö ṙòkhöre hanagenlōn tö hī. Ngamuh min inrē haköp hī yēḵ hī min öi ngö lōn tö Yāvē nö öt hangenlōn tö hī, ngaich hòṅ sitih inlahen ayī-ö.
^ Par. 2 Haṙīki ngam Minë-eny.
^ Par. 67 VAMË-ËNY INLAHEN NGAM NYAT: Urěh sin ang Pôl nö kē yik Kristīön ngaich chaphöt cha nö el kinlōngö. Hē ò pöri nö hang ṙô Yēsū, ngaich halööktit re anga-aṅ ngaich hareuskö alaha yik hakihten re anga-aṅ.
