1. Cosa ta mira si Jehova na de suyu maga siervo?

“ALEGRE si Jehova na de suyu maga siervo.” (Sal. 149:4) Ta hace este kanaton bien alegre! Ta mira si Jehova con el diaton maga buen calidad. Ta nota le con el diaton potencial y ta hace kanaton cerca con ele. Si esta kita fiel, hay esta kita cerca con ele hasta para cuando!​—Juan 6:44.

2. Porque el cuanto tan dificil creé que ta ama kanila si Jehova?

² Posible el cuanto habla, ‘Sabe yo que ta ama si Jehova con el de suyu maga siervo como un grupo pero paquemodo yo puede asigura que importante yo con ele?’ Cosa posible causa con el un persona para pregunta se? Si Oksana, * quien ya sufri cuando bata le, ya habla: “Bien alegre yo cuando ya bautiza yo y ya principia man pioneer. Pero despues del 15 año, ya acorda yo con el maga mal cosas que ya sucede conmigo de antes. Ya pensa yo que nuay mas yo el favor de Jehova y gendeh yo conviene ricibi con el de suyu amor.” Si Yua, un pioneer hermana quien ya tiene tambien manada problema cuando bata, ya habla: “Ya dedica yo el de mio vida con Jehova cay quierre yo con ele hace alegre. Pero, ta creé yo que gendeh le puede ama conmigo.”

3. Cosa kita considera na este articulo?

³ Igual con el maga fiel hermana que ya menciona, ta ama gayot tu con Jehova pero posible tan duda tu si ta ama ba le contigo. Porque tu necesita queda convincido que deverasan le interesao contigo? Y cosa puede ayuda contigo si tiene tu negativo pensamiento? Considera kita con el maga contestacion de este maga pregunta.

4. Porque peligroso si tan duda kita si ta ama ba kanaton si Jehova?

⁴ Poderoso el amor. Si convincido kita que ta ama y ta suporta kanaton si Jehova, hay manda este move kanaton  para sirvi con ele con todo corazon maskin pa na dificultad. Pero si tan duda kita si interesao ba kanaton el Dios, “hay menora el [diaton] fuerza.” (Prov. 24:10) Y si tan luya kita y principia pensa que gendeh kanaton ta ama el Dios, mas facil ya kanaton ataca si Satanas.​—Ef. 6:16.

5. Cosa el resulta cay yan duda el otro si ta ama ba kanila el Dios?

⁵ El cuanto maga fiel Cristiano na diaton tiempo ya queda maluya na espiritual por causa na duda. El un anciano que si James ya habla: “Maskin pa ta sirvi yo na Bethel y alegre yo na de mio ministerio na un foreign-language congregation, ya puede yo pensa si deverasan ba ta acepta si Jehova con el de mio maga sacrificio. Ya principia pa gane yo man duda si ta oi ba gayot si Jehova con el de mio maga rezo.” Si Eva, quien ta sirvi tambien full-time, ya habla: “Ya aprende yo que peligroso si tan duda kita si ta ama ba gayot kanaton si Jehova cay ta afecta este con el todo cosa kita ta hace para sirvi con ele. Hay causa este para perde el de tuyu gana na maga espiritual cosas y el de tuyu alegria na servicio con Jehova.” Si Michael, un regular pioneer y un anciano, ya habla: “Si gendeh tu ta creé que interesao el Dios contigo, hay queda tu lejos con ele.”

6. Cosa kita debe hace si ta principia kita pensa que gendeh kanaton ta ama el Dios?

⁶ Este maga experiencia ta dale mira si paquemodo de peligroso na espiritual si tiene kita negativo pensamiento. Pero, cosa kita debe hace si ta principia kita pensa que gendeh kanaton ta ama el Dios? Debe kita dayun descanza pensa con ese! Pidi con Jehova que quita con el de tuyu “maga lingasa” y dale contigo ‘el paz del Dios que hay guarda el de tuyu maga corazon y maga pensamiento.’ (Sal. 139:23; Fil. 4:6, 7) Y acorda que gendeh tu solo. El otro maga fiel hermano y hermana tiene tambien maga negativo pensamiento. Maskin el maga siervo de Jehova de antes, ya enfrenta tambien con ese maga dificultad. Considera si cosa kita puede aprende na ejemplo de apostol Pablo.

7. Cosa el maga problema que ya enfrenta si Pablo?

⁷ Ta sinti ba tu tiene vez que manada tu responsibilidad y gendeh tu ta puede hace con este? Si ansina, puede tu relata con Pablo.  Ya sinti le lingasa, gendeh lang para na un congregacion sino ‘por causa del todo del maga congregacion.’ (2 Cor. 11:23-28) Ta perde ba el de tuyu alegria cay tiene tu grabe problema na salud? Si Pablo ya tiene “tunuk na pellejo” que posible un problema na salud y bien quierre le quita con este. (2 Cor. 12:7-10, El Nuevo Testamento) Tan luya ba tu por causa na de tuyu mismo maga imperfeccion? Ya sinti tambien se si Pablo. Ya habla le que “miserable gayot” ele cay pirmi le necesita hace esfuerzo para hace si cosa el justo.​—Roma 7:21-24, El Nuevo Testamento.

8. Cosa ya ayuda con Pablo para puede enfrenta con el de suyu maga problema?

⁸ Maskin pa ya enfrenta le maga diferente problema, si Pablo ya continua sirvi con Jehova. Onde le ya saca fuerza para hace con ese? Maskin pa sabe le el de suyu maga imperfeccion, tiene le fuerte fe na rescate. Familiar le na promesa de Jesus que “todo quien ta cree con [Jesus] . . . ay tene Vida hasta para cuando.” (Juan 3:16; Roma 6:23) Asigurao que uno si Pablo de aquellos quien ya creé o ya demonstra fe na rescate. Convincido le que si Jehova preparao perdona maskin con aquellos quien ya comete serioso culpa si arripinti sila.​—Sal. 86:5.

9. Cosa kita puede aprende na maga palabra de Pablo na Galacia 2:20?

⁹ Tiene tambien fe si Pablo que ta ama con ele el Dios cay ya dale Le se mira por medio con el Cristo. (Le con el Galacia 2:20.) Nota con el maga palabra na fin de ese versiculo. Si Pablo ya habla: “El Anak del Dios . . . ya ama conmigo y ya dale su cuerpo para muri por causa dimio.” Si Pablo nuay pone limitacion con el amor del Dios que dol ta habla, ‘Sabe yo si porque ta ama si Jehova con el de mio maga hermano pero gendeh gayot ele ama conmigo.’ Si Pablo ya hace acorda con el maga de Roma: “Si Cristo ya muri por causa diaton cuando pecador pa kita.” (Roma 5:8) Nuay gayot limitacion el amor del Dios!

10. Cosa kita puede aprende na Roma 8:38, 39?

¹⁰ Le con el Roma 8:38, 39. Sabe si Pablo si paquemodo de fuerte el amor del Dios. Ya escribi le que nuay cosa “puede separta canaton na amor del Dios.” Sabe si Pablo que bien paciencioso si Jehova con el nacion de Israel. Sabe tambien le que ya dale con ele mira lastima si Jehova. Entonces dol ta habla si Pablo, ‘Ciendo ya imbia si Jehova con el de suyu mismo Anak que muri para conmigo, tiene ba yo razon para man duda con el de suyu amor?’​—Roma 8:32.

11. Maskin pa ya comete pecado si Pablo, igual con el cosa le ya menciona na 1 Timoteo 1:12-15, porque le asigurao que ta ama con ele el Dios?

 ¹¹ Le con el 1 Timoteo 1:12-15. Posible, tiene maga tiempo que ya pensa negativo si Pablo si ta acorda le con el cosa le ya hace de antes. Poreso, gendeh mas kita estraña si porque ya llama le con el de suyu mismo cuerpo como “el mas grande pecador.” Antes le sabe el verdad, si Pablo ya persigui con el maga Cristiano na manada ciudad, ya pone con el cuanto na preso y ya suporta con el decision que mata con otro. (Act. 26:10, 11) Puede ba tu imagina si cosa sinti si Pablo si conoce le un joven Cristiano que el mayores ya muri por causa con ele? Ya arripinti si Pablo con el maga kamali que ya hace le pero sabe le que gendeh mas le puede cambia con el cosa ya sucede de antes. Ya creé le que ya muri si Jesus para con ele y con confianza le ya escribi: “Pero si cosa man yo ahora ya queda, todo ese ta debe yo por el gran favor que Dios ya dale conmigo.” (1 Cor. 15:3, 10, El Nuevo Testamento) Cosa el leccion para kanaton? Acepta que ya muri el Cristo para contigo y ya hace este posible para tiene tu cerca relacion con Jehova. (Act. 3:19) El importante con Dios amo si cosa kita ta hace ahora y na futuro, y gendeh el maga kamali que ya hace kita de antes—maga Testigo de Jehova ya man kita de aquel tiempo o gendeh pa.​—Isa. 1:18.

12. Paquemodo el maga palabra na 1 San Juan 3:19, 20 puede ayuda kanaton si ta sinti kita nuay valor o gendeh kanaton debe ama?

¹² Si ta pensa tu que ya muri si Jesus para tapa con el de tuyu maga pecado, baka habla tu, ‘Gendeh yo conviene con ese precioso regalo.’ Porque tu posible sinti igual ansina? El diaton imperfecto corazon posible engaña kanaton y manda kanaton sinti que nuay kita valor y gendeh kanaton debe ama. (Le con el  1 San Juan 3:19, 20.) Na ese maga tiempo, necesita kita acorda que “el Dios alto pa con el diaton conciencia” o con el diaton corazon. El amor y perdon del diaton Tata na cielo mas poderoso pa na maskin cosa negativo sentido na diaton corazon. Necesita kita convinci con el diaton mismo cuerpo que acepta si paquemodo kanaton ta mira si Jehova. Para hace se, debe kita regular estudia con el de suyu Palabra, reza pirmi con ele y man junto con el de suyu maga leal siervo. Porque bien importante que hace con este maga cosas?

13. Cosa el beneficio si estudia kita con el Palabra del Dios? (Mira tambien con el cajon “ Si Paquemodo Kanila Ya Ayuda el Palabra del Dios.”)

¹³ Estudia con el Palabra del Dios cada dia y mas claro tu puede mira con el maga bonito calidad de Jehova. Puede este ayuda para entende tu que ta ama gayot le contigo. Si medita tu con el un porcion del Palabra del Dios cada dia, puede este ayuda para mas claro tu puede pensa y “guia” este con el de tuyu pensamiento y corazon. (2 Tim. 3:16) El un anciano que si Kevin, quien ya sinti que nuay le valor, ya habla: “Cuando ya le yo con el Salmo 103 y ya medita con este, ya puede se ayuda conmigo para corecta con el de mio pensamiento y entende si cosa gayot ta pensa si Jehova acerca conmigo.” Si Eva que ya menciona enante ya habla: “Na fin del cada dia, ta dale yo tiempo para medita si cosa el importante con Jehova. Ta ayuda este conmigo para queda calma y ta hace fuerte con el de mio fe.”

14. Paquemodo kanaton puede ayuda el rezo?

¹⁴ Reza pirmi. (1 Tes. 5:17) Si quierre tu man amigo con el un persona, debe tu con ele pirmi man cuento y habla si cosa tu ta sinti. Ansina tambien na diaton amistad con Jehova. Si ta habla kita con ele na rezo si cosa kita ta sinti, ta pensa y tan lingasa, ta dale kita mira que ta confia kita con ele y sabe kita que ta ama le kanaton. (Sal. 94:17-19; 1 Juan 5:14, 15) Si Yua que ya menciona enante ya habla: “Si ta reza yo, gendeh lang yo ta habla con Jehova si cosa ya sucede conmigo na entero dia. Ta habla yo con ele si cosa gayot yo ta pensa y ta sinti. Hinay-hinay, ya puede yo mira que si Jehova gendeh como un manager na un compania. Sino, un Tata le quien ta ama gayot con el de suyu maga anak.”​—Mira con el cajon “ Ya Le Ya Ba Tu con Este?”

15. Paquemodo si Jehova ya dale mira personal interes kanaton?

¹⁵ Man junto con el maga leal amigo. Regalo sila estaba con Jehova. (Sant. 1:17) El diaton Tata na cielo ta dale kanaton mira personal interes y ta hace se ele por medio na diaton espiritual familia de maga hermano y hermana quien “ta ama na todo tiempo.” (Prov. 17:17) Na de suyu carta para na maga de Colosa, ya  menciona si Pablo con el cuanto Cristiano quien ya suporta con ele y ya habla que “grande el consuelo” ya dale sila con ele. (Col. 4:10, 11) Maskin si Cristo Jesus ya necesita y ya aprecia con el suporta que ya ricibi le estaba na de suyu maga amigo​—maga angel y gente.​—Luc. 22:28, 43.

16. Paquemodo el maga leal amigo puede ayuda kanaton para queda mas cerca con Jehova?

¹⁶ Ta pidi ba tu y ta acepta ayuda estaba con el de tuyu maga amigo y amiga na congregacion? Si ta habla kita con el diaton maga lingasa na un mature amigo, gendeh se quierre decir que mahina kita. Sino, puede se protege kanaton. Considera si cosa ya habla si James que ya menciona enante: “Ya puede gayot ayuda conmigo cay tiene yo maga amigo que maga mature Cristiano. Si ta puede yo pensa maga negativo, este maga precioso amigo ta oi conmigo con paciencia y ta hace acorda que ta ama sila conmigo. Por medio kanila, ta puede yo sinti con el amor y interes de Jehova para conmigo.” Bien importante que tiene kita buen amistad con el diaton maga espiritual hermano y hermana!

17-18. Con quien kita debe oi y porque?

¹⁷ Quierre si Satanas que descanza kita hace si cosa el justo. Quierre le creé kita que gendeh kanaton ta ama si Jehova y gendeh kanaton conviene salva. Pero como cosa kita ya discuti, gendeh gayot se deverasan.

¹⁸ Ta ama contigo si Jehova. Precioso tu na de suyu ojos. Si obedece tu con ele, hay “esta [tu] firmi na su amor” hasta para cuando igual con Jesus. (Juan 15:10) Poreso, no oi con Satanas o con el de tuyu corazon. En vez, oi con Jehova quien ta mira si cosa el bueno con el cada uno kanaton. Queda convincido que “alegre si Jehova na de suyu maga siervo,” incluido ya tu!