Nsunzo 17
Yehova Onowukwela!
‘Yehova onokwela nlogo naye.’—MASAL. 149:4.
JIBO 108 Mulugu Ddokwela-wene
DHINASUNZE IYO *
Babihu wa wirimu ‘onomukwela’ muttu-muttu wa iyo (Kang’ana ddima 1)
1. Txini enoona Yehova na nlogo naye?
YEHOVA MULUNGU, “onokwela nlogo naye.” (Masal. 149:4) Eji enonipangarhaza vaddiddi! Yehova onoziwa mikalelo dhehu dhapama, onowoona vangomela guru dhehu, vina onofuna okala ofiyedheya na iyo. Nigamuroromelagavi, iyene onele okalavi ofiyedheya na iyo!—Jo. 6:44.
2. Txini enattukulela attu ena orutxiwa orumela wila Yehova onowakwela?
2 Ena txino onofiyedha ologa, ‘ddinoziwa wila Yehova onokwela nlogo naye, mbwenye ddinakuluvele dhavi wila iyene onoddikwela?’ Txini enimuttukulela muttu okosa nivuzo ntti? Oksana, * ogumanilena makattamiho mwihimani mwaye ohiloga: “Mbatizeliwemi nanda baddiroma olaba ninga pionera ddahagalala vaddiddi. Mbwenye mvireli vyaka 15, ddahiroma wubuwela esile dhiddipadduwele mundduni. Ddahifiyedha wubuwela wila Yehova kandditanala vina kaddinfwanyela okweliwa na iyene.” Yua, murogora wa pionera ogumanilena makattamiho bali mima ohiloga: “Eddittukulele omperhekela Yehova egumi yaga jawi ddanfuna omwagalaliha. Mbwenye miyo ddobuwela wi iyene txipo kagadhile oddikwela.”
3. Ninasekeserhe eni mwari mwa nsunzo ntti?
3 Dhahene ninga Akristu aba ororomeleya alogiwe mundduni, wila wunuwihe omukwela wawo Yehova onofwanyela okuluvela wi iyene vina onowukwela. Enfuneyelani okana nikuluvelo wi iyene onowutanaala? Vina txini enanikamihedhe okwaranya dhubuwelo esi dhawobaniha? Ndoweni none dhowakuladha.
JAWOPIHA WAGANYEDHA OKWELA WA YEHOVA
4. Wopiha gani onda sabwa ya waganyedha okwela wa Yehova?
4 Okwela, guru ennittukulela okosa elobo. Nigakuluvela wila Yehova, ononikwela vina ononikamihedha, ninela ottukuleleya omulabela iyene na murima wetene masiki nigumanena makattamiho. Mwa mpaddi mwina, akala iyo ninowaganyedha wila Yehova ononikoya, ‘murima wehu kulibile.’ (Gano 24:10) Iyo nigakumuwa vina nigaganyedha okwela wa Mulugu, kinanirutxe ogwela mmadani mwa Satana.—Ef. 6:16.
5. Waganyedha onikwela wa Mulugu onapatta dhavi abali na arogora ena?
5 Masaka abano Akristu ena ororomeleya anowobana mpaddi womuyani sabwa ya waganyedha. Tiago, oli munddimuwa wa mulogo ohiloga: “Miyo ddinowubuwela wila ddilabaga o’Betel, ddanziveliwa venjene na mabasa olaleya ddikamihedhaga mulogo wa elogelo yina, vina kaddaganyeedha wila Yehova onowagalala na mabasaya. Mbwenye wahifiya mudhidhi waromile miyo waganyedha akala Yehova wanvuruwana malobelo aga.” Eva olabile vina mabasa a mudhidhi wotene ohiloga: “Miyo ddihinonelamo wila waganyedha okwela wa Yehova elobo yawopiha, sabwani enopatta mabasa otene omuyani ankosihu. Mobuwelo obu onofiyedha wuttukulela ohizuzumelaga dhilobo dhomuyani, vina orimeeliwa wagalala wa omulabela Yehova.” Michael, oli pionero vina munddimuwa wa mulogo ohiloga: “Akala weyo kunrumela wila Mulugu onowutanaala onoroma omutxatxama olapelagana na iyene.”
6. Txini enfwanyelihu okosa akala ninokaana dhubuwelo dhawi Mulugu kannikwela?
6 Dhotagiha esi dhinowooniha wopiha olivo wa wanganyedhaga wila Yehova kannikwela. Ninfwanyela okosa eni nigaroma waganyedha wila Mulugu kannikwela? Jofuneya orabela mobuwelo obu momaguva-mwene! Omukumbirhe Yehova wila awukamihedhe wi otxinje ‘mobuwelo wawo wohifwanyeelela’ dhahene ‘murenddele wa Mulugu ompitta ttontto ya muttu onere okoya murima na mobuwelo wawo.’ (Masal. 139:23; Fil. 4:6, 7) Vina kudduwale wila kuli weka. Abali na arogora ena ororomeleya anowanana dhubuwelo dhawobaniha. Masiki adhariyá a Yehova a masaka a mundduni ahiwanana dhubuwelo dholigana na esene. Koona txini enasunzehu na yotagiha ya murumiwi Paulo.
TXINI ENSUNZEHU NA YOTAGIHA YA PAULO
7. Makattamiho gani agumanana Paulo?
7 Weyo ohittomeliwa mabasa menjene ofiyedha wubuwela wila kunawodhe wakwaniha dhetene? Akala pumwenemo onele osunza na yotagiha ya murumiwi Paulo. Iyene kazuzumela mutugumano mmodha bahi, mbwenye ‘mitugumano dhotene.’ (2 Kor. 11:23-28) Weyo ohikana makattamiho a eredda agafuniliwe ninga agome? Paulo wahikana makattamiho amutabutxa ali ninga ‘mwinga wamulata,’ enooneya ninga mwingaya obo ali makattamiho a egumi yafuniye ninga agome. (2 Kor. 12:7-10) Weyo onodhugudheyaga sabwa ya okala muttu wohiligana? Mudhidhi mwina Paulo wewamo dhawene. Iyene wahifiyedha ologa “ntowa gani nina miyo!” mazu aba ologile sabwa ya owanana makattamiho ohiligana.—Rom. 7:21-24.
8. Txini emukamihedhile Paulo owanana makattamiho aye?
8 Masiki na makattamiho ofwarelana agumanana Paulo vina amudhugudha, iyene wandhowavi amulabelaga Yehova. Txini emukamihedhile okosa ejuwene? Masiki aziwaga wi wali muttu wohiligana, wankuluvela venjene mukutto wa yobolo. Iyene vina wanziwa nipikirelo ntti na Yezu ‘onddiroromela onele ottidda egumi yohimala.’ (Jo. 3:16; Rom. 6:23) Paulo wali mumodhani na abale aroromela mukutto wa yobolo. Iyene wankuluvela wi Yehova oli womala-nawale wi aalevelele otene ankosa yottega enddimuwa nanda batxinuwa na murima wotene.—Masal. 86:5.
9. Ninsunzavo eni na mazu a Paulo anfwanyeya va Galásia 2:20?
9 Paulo wanroromela wi Mulugu wanimukwela venjene sabwani ohimuruma Yezu wi amukwele. (Kengesa Galásia 2:20.) Katanalela mazu omariha anfwanyeya versu eji. Paulo bela dhahi: “Mwana Mulugu . . . oddikwela, ovilevela miyo.” Paulo kaganyedha okwela wa Mulugu, nona kobuwela wi iyene ‘wali muttu wabure vaddiddi ofiyedha Mulugu ohimukwela.’ Paulo wahawubutxedha akadda Roma, wi ‘Kristu ovilevela opeliwa iyo, valihu athegi.’ (Rom. 5:8) Okwela wa Mulugu kuna maddile!
10. Txini ensunzehu na mazu anfwanyeya va nleboni na Roma 8:38, 39?
10 Kengesa Roma 8:38, 39. Paulo wankuluvela guru enna okwela wa Mulugu. Iyene ohileba wi kuli elo enwodha “onimwalaniha n’okwela wa Mulugu.” Paulo wanziwa wi Yehova wahivilela venjene nlogo na Izrayel. Iyene vina wahinonelamo wi Yehova, wahimweddela ttagaraga. Na mazu mena Paulo waloga dhahi, ‘Mmurumile Yehova Mwanaye wi addikwele, miyo kaddinaganyedha okwela waye.’—Rom. 8:32.
Elitxi ya ttima vamentoni va Mulugu ku okosa efunelo yaye ovanene vina enakosihu musogorho, ottiya dhovonya dhikosilihu mundduni (Kang’ana ddima 11) *
11. Masiki na dhottega dhikosile Paulo ninga munlogela nlebo na 1 Timóteo 1:12-15, txini yamukuluveliha wi Mulugu wannimukwela?
11 Kengesa 1 Timóteo 1:12-15. Enkala ninga Paulo wantabuwa venjene agobuwela dhilobo dhikosiliye wale ahinakala Mukristu. Nona kanintikina na mazu alogiliye wi muttegi “wothabwayámo” ddi miyo! Ahinatti oziwa ebaribari, Paulo wannafwara-fwara Akristu ofiyedha watota mmittetteni mwadhowani, wannafugeliha mukambura oku ena wannattongela opiwa. (Mer. 26:10, 11) Onowodha otanalela mukalelo wakubanya Paulo, aganfwanya Mukristu wa muzombwe wapihiliye amambali aye? Paulo wahitxinuwa na dhotega dhaye, mbwenye iyene wanziwa wi kagawodhile otxinja dha mundduni. Iyene wankuluvela wi Kristu wahimperhekela egumi yaye vina na nikuluvelo notene iyene ohileba: “Apa na mahala a Mulugu, elimi, jijene ekalilemi.” (1 Kor. 15:3, 10) Eji ennisunziha nni? Kakuluvela wi Kristu ohileva egumi yaye awukwelaga weyo vina ohikasa dila enukamihedha okana mandano oliba na Yehova. (Mer. 3:19) Elitxi ya ttima vamentoni va Mulugu ku okosa efunelo yaye ovanene vina enakosihu musogorho, ottiya dhovonya dhikosilihu mundduni, peno banilivi Anamoona a Yehova obe nne.—Iza. 1:18.
12. Mazu anfwanyeya vanleboni na 1 Joau 3:19, 20 annikamihedha dhavi nigobuwela wi kanina ttima vina kaninkweliwa?
12 Sabwa ya okwa wa Yezu wi oleveleliwe dhottega dhawo, txino onodha wubuwela wi ‘Miyo kaddinfwanyela.’ Onubuwelela nni dhawene? Murima wehu wohiligana onodha oninyegentta, banifiyedha wubuwela wi kanina ttima vina kaninkweliwa. (Kengesa 1 Joau 3:19, 20.) Nigaroma wubuwela dhawene, ninofwanyela otanalela wi “Mulugu onopitha murimehu.” Okwela wa Babihu wa wirimu vina efunelo eniye y’onilevelela, enddimuwa vaddiddi opitta dhubuwelo dhohifwanyela dhimpatta murima wehu. Ninofwanyela oziwa wi Yehova ononikwela. Wi eji epadduwe, jofuneya osunza Nzu naye, olobela mudhidhi wotene vina otugumanaga na nlogo naye. Okosa dhilobo esi ekaleleni yamakamaka?
OMUSUNZA BIBILIA, OLOBELA VINA AMARHO OKULUVELEYA ANONIKAMIHEDHA
13. Osunza Nzu na Mulugu ninnikamihedha dhavi? (Kang’ana kasha “ Nzu na Mulugu Nakamihedhile Dhavi.”)
13 Omusunza Bibilia labo na labo, enele wukamihedha ononelamo venjene sabwa ya Yehova vina mikalelo dhaye dhapama. Weyo vina onele ononelamo wi iyene onowukwela venjene. Otanalela Nzu na Mulugu labo na labo enele wukamihedha okaana mukalelo wofwanyelela vina ‘wogola’ murima wawo na dhubuwelodha. (2 Tim. 3:16) Munddimuwa wa mulogo onkuweliwa Kevin awanana ekalelo y’ohivyonana ttima ohiloga: “Wengesa vina otanalela nlebo na Masalmo 103 eddikamihedha otxinja mubuwelo waga vina ononelamo mukalelo onddoona Yehova.” Eva, ologiwe omaromo ohiloga dhahi: “Vati vagaribaga ddinotalelaga venjene mobuwelo a Yehova. Okosa eji enoddikamihedha okana murenddele vina olibiha nroromelo naga.”
14. Olobela onnikamihedha dhavi?
14 Olobela mudhidhi wotene. (1 Tes. 5:17) Wi attu eli akaane mandano oliba anofwanyela wili-wili ologaga vamodha. Yakene jimpadduwa na mandano ehu na Yehova. Nigamutapulelamo na nlobelo esile dhiniwamo iyo, dhinubuwelihu vina dhinnizuzumiha, ninolagiha wi ninomukuluvela vina ninoziwa wi iyene ononikwela. (Masal. 94:17-19; 1 Jo. 5:14, 15) Yua, oromoliwe omaromo ohiloga: “Miyo ddigalobelaga kaddinloga bahi esile dhiddipadduwele valaboni. Ddinomwaddela Yehova ejile eniwamo miyo vina enubuwelimi. Vang’ono-vang’ono, ddahiroma omoona Yehova ninga Babi onakwela anaye ottiya omoonaga ninga fumu w’omabasani.”—Kang’ana kasha “ Wahiromaga Wengesa Nivuru Ntti?”
15. Yehova onlagiha dhavi wi ononitanaala?
15 Weeddege na amarho okuluveleya, awene nvaho ondha wa Yehova. (Tia. 1:17) Babihu wa wirimu onowoniha onizuzumela waye modhela onivaha anamudhi omuyani abali na arogora ‘annikwela mudhidhi wotene.’ (Gano 17:17) Karta yalebeliye akadda Kolosi, Paulo wahalogamo Akristu amukamihedhile, iyene bela: awene ‘baddipangarhazile.’ (Kol. 4:10, 11) Yezu wanfuna vina wantamaalela nikamihedho navahiwiye na angelo vina attu ali amarho aye.—Lk. 22:28, 43.
16. Amarho okuluveleya annikamihedha dhavi okala ofiyedheya na Yehova?
16 Weyo onopurelamo venjene sabwa yokaana amarho okuluveleya ali nvaho ondha wa Yehova? Ologa makattamiho ehu na marho woliba mpaddi w’omuyani, kintapulela wi nroromelo nehu ttawobana; mbwenye nintamela nikamihedho. Katanalela elogile Tiago oromoliwe omaromo iyene bela dhahi: “Okana mandano apama na Mukristu woliba mpaddi w’omuyani enoddikamihedhaga venjene. Ddigakana dhubuwelo dhinddikubanyiha, amarho aba okweleya anofwaseyela oddivuruwana vina anoddubutxedha wi awene anoddikwela. Sabwa ya nikamihedho nawa, miyo ddinowodha wona wi Yehova onoddikwela vina onodditanala.” Jamakamaka wunuwiha mandano ofiyedheya na abali vina arogora omuyani!
KALAVI MUKWELANI MWA MULUGU
17-18. Bani onfwanyelihu onvuruwana, nanda sabwaya jani?
17 Satana onfuna wi iyo nittiye okosa ejile eli yapama. Iyene onfuna wi nubuwelege wila Yehova kannikwela vina kanili ofwanyela ovuniwa na iyene. Mbwenye ninga munoonela iyo, eji kahiyo ebaribari.
18 Yehova onowukwela. Weyo oli wattima vamentoni vaye. Ogamwiwelela Mulugu, onele ‘okalavi mukwelani mwaye,’ ninga mulogile Yezu. (Jo. 15:10) Kunvuruwane Satana vina kuvuruwane murima wawo wohiligana. Ottiya ejo, kamvuruwane Yehova, onimoona muttu-muttu wa iyo na mukalelo waderetu. Kakuluvela wi iyene “onokwela nlogo naye” vamodha na weyoya!
JIBO 141 Nakwelege attu nirihe egumi
^ par. 5 Abali na arogoraya ena, anorutxiwa orumela wila Yehova onowakwela. Mwari mwa nsunzo ntti, ninela osekeserha sabwaya enfwanyelihu okuluvela wila Yehova onomukwela muttu-muttu wa iyo. Ottiya ejo, ninela osekeserha mukalelo onfwanyelelihu okwaranya waganyedha wehu mwaha wa onikwela wa Yehova
^ par. 2 Mazina mena ahitxinjiwa.
^ par. 67 FOTO YA NIKUKU: Paulo ahinatti osunza ebaribari, wannafwara-fwara Akristu vina wannafugeliha enjene mukambura. Murumeeleliye ejile yamukoseli Yezu, wahitxinja merelo aye vina wanapangarhaza abali na arogora, enaya ali amudhi abale afwara-fwarigiye.
