1. Lè Jéova ka gadé pèp a-y, ka i ka vwè adan nouchak ?

JÉOVA, Bondyé an nou, « enmé pèp a-y » (Sòm 149:4). Mi on bèl pawòl mi ! Jéova ka vwè tout bèl kalité kè nou ni, i ka vwè sa nou kapab fè é i ka fè-nou vin owa a-y. Si nou rété fidèl a-y, i ké zanmi an nou pou touttan ! (Jan 6:44).

2. Poukwa sèwten moun ni dimal a kwè kè Jéova enmé-yo ?

² Défwa ni sèwten frè é sè ki ka di : « An sav kè Jéova enmé tout pèp a-y, men é mwen pèwsonèlman, kijan an pé sèten kè Jéova enmé-mwen ? » Poukwa on moun pé rivé a pozé-y kèsyon-lasa ? Ni on sè non a-y sé Oksana *, é yo fè-y vwè bon mizè lèwvwè i té piti. Mi sa i ka di : « Lè an pran lèbatèm, é lè an vin pyonyé, an té kontan toubònman. Men 15 an apré, tousa an viv lè an té piti wouvin an lèspri an mwen. Sa fè-mwen soufè onlo. Kifè, an mèt an tèt an mwen kè an pa té ka fè Jéova plézi ankò é an pa té ka vwè kijan i té’é pé enmé-mwen. » Yua, sé on pyonyé ki viv menm biten ki Oksana lèwvwè i té piti. Mi sa i ka di : « An ba Jéova vi an mwen, pas an té vlé fè-y plézi. Men anfon a tchè an mwen, an té ka di-mwen, i pé’é jen enmé-mwen. »

3. Ka nou ké vwè adan awtik-lasa ?

³ Kon Oksana é Yua, sèten ou enmé Jéova toubònman, men ou pé ni dimal a kwè kè Jéova enmé-w. Poukwa fò-nou sèten kè Jéova enmé-nou poudèbon ? Ka ki pé édé-w lè ou ni lenprésyon kè Jéova pa enmé-w ? An nou réponn a sé kèsyon-lasa.

4. Lè nou ka mèt an tèt an nou kè Jéova pa enmé-nou, sa danjéré toubònman. Poukwa nou ka di sa ?

⁴ Si nou sèten kè Jéova enmé-nou, nou ké fè tousa nou pé pou nou sèvi-y èvè tout tchè an nou menmsi nou ka jwenn difikilté. Men si nou pa sèten kè Jéova ka pran swen an nou, nou « pé’é ni onlo fòs » (Pwov. 24:10). Lè moral an nou a zéro, é kè nou ka koumansé mèt an tèt an nou kè Bondyé pa enmé-nou, nou ka pèd fòs é sé a moman-lasa Satan ka pwofité pou ataké-nou (Éféz. 6:16).

5. Ka ki rivé sèwten frè é sè ki mèt an tèt a yo kè Bondyé pa enmé-yo ?

⁵ Ni sèwten frè é sè ki koumansé mèt an tèt a yo kè Jéova pa enmé-yo é pa’a pran swen a yo. Kifè, piti-a-piti fwa a yo fébli. Mi sa on ansyen non a-y sé James ka di : « An té ka travay an Bétèl-la é an té ka préché adan ondòt lang. Menmsi an té enmé fè sa, an té ka mandé-mwen si Jéova té ka aprésyé tousa an té ka fè ba-y. Onlè, an jous mandé-mwen si Jéova té ka kouté priyè an mwen. » Eva sé on sè ki ka travay an Bétèl-la osi, é mi sa i ka di : « An ka pansé kè lè ou ka mèt an tèt a-w kè Jéova pa enmé-w, sa danjéré toubònman pas sa ka anpéché-w sèvi-y byen konm i fo. Kifè, ou pa ni gou fè ayen pou Bondyé ankò. » Michael, sé on frè ki ansyen é ki pyonyé pèwmanan. Mi sa i ka di : « Si ou ka mèt an tèt a-w kè Bondyé pa enmé-w, ou pé’é bon bon zanmi èvè-y ankò. »

6. Lè nou ni lenprésyon kè Bondyé pa enmé-nou, ka pou nou fè ?

⁶ Sé ègzanp-lasa ka montré-nou kè lè nou ka pansé kè Jéova pa enmé-nou, sa pé fébli fwa an nou. Si anfon a tchè an nou sé sa nou ka pansé, ka pou nou fè ? Fò-nou woté sé mové lidé-lasa an tèt an nou tousuit ! É fò-nou priyé pou nou pé sa ni ‘lapé ki ka vin dè Bondyé, ki ké pwotéjé tchè an nou é lèspri an nou’ (Sòm 139:23, nòt ; Filip. 4:6, 7). Fò pa nou oubliyé kè nou pa tousèl pas ni dòt frè é sè ki ka goumé kont sé lidé-lasa osi. Menm adan Labib nou ka touvé ègzanp a sèwvitè a Bondyé ki goumé kont sé mové lidé-lasa osi. An-nou vwè ka ègzanp a lapòt Pòl ka aprann-nou.

7. Ki pwoblèm Pòl jwenn ?

⁷ Pétèt ou ni onlo rèsponsabilité é  défwa ou ka touvé ou pa ni asé kò pou fè tousa ou ni a fè. Si sé sa, sèten ou ké rivé konprann ka Pòl viv. Pa ègzanp, i pa té enkyèt enki pou onsèl lasanblé, men « pou tout sé lasanblé-la » (2 Kor. 11:23-28). Pétèt ou ni on maladi ki pa’a géri é sa ka rann-vou tris toubònman. Sé sa ki rivé Pòl. I té ni ‘on pikan andidan chè a-y’ é sa té ka fè-y soufè bon soufè la (2 Kor. 12:7-10). Pétèt kè pikan-lasa sé té on maladi, é konm i pa té ka rivé about a-y, délè, moral a-y té a zéro. Noutout ka fè érè pas nou enpawfè. Men ès vou, lè ou ka sonjé érè ou ka fè, sa ka kasé dé bra a-w ? Pòl pasé pa la osi. I té ni lenprésyon kè i pa té ni pon valè pas fò i té goumé pou fè sa ki jis. Sé pousa, dépawfwa sa té ka dékourajé-y (Wom. 7:21-24).

8. Menmsi Pòl jwenn onlo difikilté, i pa jen lagé. Ka ki édé-y ?

⁸ Magré Pòl jwenn bon difikilté, i pa jen lagé. Ka ki édé-y kontinyé sèvi Jéova ? Menmsi i té sav kè i té ka fè érè, i té ni fwa adan laranson. I té sav kè Jézi té di ‘tout moun ki ni lafwa adan-y pé’é détwi men ké ni lavi étèwnèl’ (Jan 3:16 ; Wom. 6:23). Pòl té ni fwa adan laranson menm, nou pa ni pon dout asi sa ! I té sèten kè si on moun té ka règrété on éré kè i fè, menmsi sé té on péché grav, Jéova ké toujou paré a padonné-y (Sòm 86:5).

9. An Galat 2:20, Pòl di dé bèl ti pawòl. Ka sa ka aprann-nou ?

⁹ Pòl té sèten kè Bondyé té enmé-y toubònman pas i té sav kè Bondyé té sakrifyé Gason a-y pou-y (li Galat 2:20). Ès zò vwè sa nou ka li an fen a vèwsé-lasa ? Mi sa Pòl di : « Gason a Bondyé [...] enmé-mwen é [...] bay vi a-y pou mwen. » Pòl pa jen mèt an tèt a-y kè i té two mové pou Bondyé enmé-y. I pa jen di nonplis : « Jéova enmé frè é sè an mwen, men mwen, an pa’a vwè kijan i pé enmé-mwen. » Pòl fè sé Women-la sonjé : « Kris mò pou nou alòskè nou té péchè toujou » (Wom. 5:8). Ayen pé pa anpéché Bondyé enmé-nou !

10. Ka Women 8:38, 39 ka aprann-nou ?

¹⁰ (Li Women 8:38, 39.) Pòl té sèten kè Jéova té enmé-nou fò. Sé pousa i maké kè ayen « pé’é pé séparé-nou dè lanmou-la Bondyé ni pou nou la ». Pòl té sav kè Jéova pran pasyans èvè sé Izraélit-la é kè i aji èvè onlo mizérikòd épi yo. An réyalité, sé konsi Pòl té ka di : « Si Jéova voyé Gason a-y mò pou mwen, sé kè i enmé-mwen, an pa ni pon dout asi sa » (Wom. 8:32).

11. Dapré 1 Timoté 1:12-15, Pòl fè onlo érè, men poukwa i té sèten kè Bondyé té enmé-y kanmenm ?

 ¹¹ (Li 1 Timoté 1:12-15.) Dépawfwa, lè Pòl té ka sonjé tousa i fè avan i té vin krétyen, sa dwèt té ka fè-y lapenn toubònman. Lèwvwè i té ka palé dè limenm, i té ka di kè li prèmyé i fè onpakèt érè. Avan Pòl té vin krétyen, i fè sé krétyen-la soufè onlo. I té k’ay adan sé vil-la pou pèwsékité-yo, i té ka mèt-yo lajòl, é lè yo té ka kondanné on krétyen a mò i té dakò èvè sa (Akt 26:10, 11). Alò, imajiné sa Pòl té’é rèsanti si i té ka jwenn on ti jenn adan lasanblé-la ki pèd paran a-y akòz dè-y. Sèten i té ka règrété sa, men i pa té pé fè ayen pou chanjé sa. Pòl té byen konprann kè Jézi té mò pou-y. Sé pousa i di : « Sé favè a Bondyé kè an pa mérité ki fè si an vin sa an yé la » (1 Kor. 15:3, 10). Ka sa ka aprann-nou ? Fò ou mèt fon an tèt a-w kè Jézi mò ba-w é kè grasa sa ou pé vin bon bon zanmi a Jéova (Akt 3:19). Pou Jéova, kèlkèswa érè nou fè, ki nou té Témwen, ki nou po’o té Témwen, lèpasé sé lèpasé, sa ki ka konté pou-y sé sa nou ka fè alèla é sa nou ké kontinyé fè pou sèvi-y (Iz. 1:18).

12. Si nou ni lenprésyon kè nou pa vo ayen é kè ponmoun pé’é jen pé enmé-nou, kijan sa ki maké an 1 Jan 3:19, 20 pé édé-nou ?

¹² Konm Jézi mò pou nou, Jéova pé padonné péché an nou. Lè ou ka sonjé sa, pétèt ou ka di-w : « An pa mérité bèl kado-lasa. » Men poukwa ou pé rivé a di sa ? Konm nou enpawfè tchè an nou pé kouyonné-nou, é fè-nou konprann kè nou pa vo ayen é kè ponmoun pé pa enmé-nou (li 1 Jan 3:19, 20). Lè lidé-lasa ka vin an lèspri an nou, fò nou sonjé kè « Bondyé pi gran ki tchè an nou ». Menmsi nou ni lenprésyon kè Jéova pa enmé-nou, é kè i pé’é jen  padonné-nou, an réyalité, Pap’an nou ki an syèl-la ké toujou enmé-nou é i ké padonné-nou. Jéova enmé-nou toubònman, fò-nou mèt sa fon an tèt an nou. Pou nou fè sa, fò nou étidyé Pawòl a-y touléjou, priyé-y souvan é frékanté moun ki ka adoré-y. Poukwa sa enpòwtan kè nou fè sé biten-lasa ?

13. Lè nou ka étidyé Pawòl a Bondyé, kijan sa pé édé-nou ? (gadé ti karé-la «  Pawòl a Bondyé édé-yo »).

¹³ Fò ou étidyé Pawòl a Bondyé chakjou, konsa, ou ké konprann pibyen ki jan dè moun Jéova yé. Ou ké vwè osi kè Jéova enmé-w fò. Si ou pran tan réfléchi asi déotwa vèwsé a Labib chakjou, sa ké édé-w woté tout mové lidé é tout mové lanvi ou pé ni é ou ké pé konsantré-w asi sa ou ka fè dè byen (2 Tim. 3:16). Kévin sé on ansyen, é i té ni lenprésyon kè i pa té vo ayen. Mi sa i di : « Lè an li Sòm 103 la é kè an pran tan réfléchi asi-y, sa édé-mwen chanjé mantalité an mwen piti-a-piti, é sa édé-mwen konprann kijan Jéova té ka vwè-mwen vréman. » Pi ho, nou palé dè Eva. Mi sa i ka di : « Touléjou, an fen a jouné-la, an ka pran tan réfléchi é an ka pran tan konsantré-mwen asi sa ki pli enpòwtan pou Jéova. Sa ka trankilizé-mwen é an ka santi kè fwa an mwen ka vin pli solid. »

14. Kijan lapriyè pé édé-nou ?

¹⁴ Fò ou priyé souvan (1 Tés. 5:17). Lè ou vé vin bon bon zanmi èvè on moun, fò ou ka palé èvè-y souvan é fò ou ka di-y sa ou ni anfon a tchè a-w. Sé menm biten-la pou Jéova. Lè nou ka priyé Jéova pou di-y sa nou ka pansé, sa nou ka rèsanti é sa ki ka enkyété-nou, sa ka montré kè nou ka fè-y konfyans é kè nou enmé-y (Sòm 94:17-19 ; 1 Jan 5:14, 15). Talè la nou palé dè Yua, mi sa i ka èspliké : « Lè an ka priyé Jéova, an pa ka kontanté-mwen dè di-y sa ki rivé-mwen an jouné-la, men an ka wouvè tchè an mwen ba-y é an ka di-y tousa an ka rèsanti. Piti-a-piti, an pa té ka vwè Jéova kon patron an mwen ankò men kon on Papa ki enmé timoun a-y vréman » (gadé ti karé-la «  Ès ou ja li sa ? »).

15. Kijan Jéova ka montré kè i enmé nouchak ?

¹⁵ Fò ou ni zanmi ki fidèl é fò ou pasé tan èvè yo, pas sé on kado ki ka vin dè Jéova (Jak 1:17). Pap’an nou ki an syèl-la enmé nouchak. Poukwa nou ka di sa ? Pas i ban-nou onlo frè é sè adan lasanblé-la ki ka ‘montré kè yo enmé-nou toutlè’ (Pwov. 17:17). Pòl maké on lèt pou sé Kolosyen-la é adan lèt-lasa i di kè sé krétyen-la ki té ka soutyenn-li la té vin  « on gran sous a konsolasyon » pou-y (Kol. 4:10, 11). Jézi té ni onlo zanmi an syèl-la é asi latè. I rèkonnèt kè i té bizwen yo pou soutyenn-li é i té ni onlo rèkonésans pou tousa yo fè ba-y (Lik 22:28, 43).

16. Lè ou ni zanmi ki fidèl yo pé édé-w vin pibon zanmi èvè Jéova. Kijan sa ?

¹⁶ Sé vré Jéova ban-nou dé zanmi ki fidèl, men lè nou mélé é kè yo vé édé-nou, ès nou ka aksèpté ? Lè nou ka palé èvè on zanmi dè sa ki ka enkyété-nou, sa vé pa di kè nou pa ni fwa. Men okontrè, sa pé pwotéjé-nou. Talè la nou palé dè James, mi sa i ka di : « An ni zanmi ki ni onlo èkspéryans é an pé di kè sé zanmi-lasa édé-mwen onlo. Dépawfwa, onpakèt mové lidé té ka vin an lèspri an mwen, é lè an té ka santi kè an té ka néyé anba a sa, zanmi an mwen té toujou la pou mwen. Yo té ka pran tan kouté-mwen, yo té ka di-mwen kè yo enmé-mwen, yo té ka fè-mwen sonjé kè Jéova enmé-mwen fò osi é kè i té ka pran swen an mwen. » Sa enpòwtan kè nou vin bon bon zanmi èvè frè é sè a lasanblé-la é kè nou rété bon bon zanmi èvè-yo.

17-18. Kimoun pou nou kouté, é poukwa ?

¹⁷ Satan vé kè nou arété goumé pou fè sa ki jis. I vé fè-nou kwè kè Jéova pa enmé-nou, é kè nou pa asé byen pou i sové-nou. Men kon nou vwè, sa pa vré ditou-ditou !

¹⁸ Jéova enmé-w. Ou ni onlo valè pou-y. Si ou kouté-y ou ké « rété adan lanmou » a-y pou touttan menmjan ki Jézi (Jan 15:10). Alò pa kouté Satan é pa kouté tchè a-w ki vé fè-w kwè kè ou sé on mové moun. Men olyé dè sa, kouté Jéova ki ka vwè tout bon biten kè ou ka fè é tout bèl kalité kè ou ni. Ou pé sèten kè « Jéova enmé pèp a-y » é kè i enmé-w osi !