1. Tera ae e noria Iehova irouia ana aomata?

“E KUKUREI Iehova [ae te Atua] irouia ana aomata.” (TaiAre. 149:4) Ai kakukureira iangoan anne! E nori aroarora aika raraoi Iehova, e nori ara konabwai, ao e katikira nakoina. Ngkana ti teimatoa ni kakaonimaki nakoina, e na boni kaanira n aki toki!​—Ioa. 6:44.

2. E aera ngkai e kangaanga irouia tabeman bwa a na kakoauaa ae e bon tangiriia Iehova?

² A kona ni kangai tabeman, ‘I ataia ae Iehova e tangira ana botaki, ma N na kangaa ni kakoauaa bwa e bon tangirai Iehova?’ E aera bwa a kona n titiraki tabeman n aron anne? E taku Oksana * ae rinanon te kangaanga ae korakora ngke e uarereke: “I rangi ni kukurei ngke I bwabetitoaki ao ni moana au bwaiania. Ma 15 te ririki imwina, I a manga ururingi baika bubuaka ake a riki nakoiu ngke I uarereke. I a iangoia bwa e a bua akoau iroun Iehova ao I a aki tau n tangiraki irouna.” E taku Yua ae te tari te aine ae te bwaiania, ae e kaaitara naba ma te aekaki anne ngke e uarereke: “I katabua maiuu nakon Iehova bwa I kani kakukureia. Ma irou e bon aki kona n tangirai.”

3. Tera ae ti na rinanona n te kaongora aei?

³ N aroia Kristian aika kakaonimaki aika tibwa taekinaki, ko tangira naba Iehova, ma ko kona n nanououa bwa e tangiriko ke e aki. E aera ngkai ko bon riai ni kakoauaa bwa e bon tabeakiniko raoi? Ao tera ae kona ni buokiko ngkana ko a iangoia  bwa e a aki tangiriko Iehova? Ti na nori kaekaan titiraki akanne.

4. E aera ngkai e karuanikai bwa ti na nanououa n tangirakira iroun Iehova?

⁴ Ti kairaki n te tangira bwa ti na karaoa te mwakuri. Ngkana ti kakoauaa raoi bwa e tangirira Iehova ao e boutokaira, ti na boni kairaki iai bwa ti na beku ibukina ma nanora ni kabane n aki ongei kangaanga. Ma ngkana ti nanououa ni kaineti ma tabeakinara iroun te Atua, e na boni ‘karako korakorara.’ (TaeRab. 24:10) Ao ngkana a bwara nanora ao ti a iangoia bwa e a aki tangirira te Atua, ti na boni kai mwane n ana bwai ni kamwane Tatan.​—IEbe. 6:16.

5. Tera ae riki irouia taari tabeman ake a nanououa n tangirakia iroun te Atua?

⁵ A a tia Kristian tabeman aika kakaonimaki ni boong aikai ni mamaara aia onimaki ibukin te nanououa. E taku te unimwaane temanna ae arana James: “E ngae ngke I beku n te Betaera ao I kukurei n au mwakuri ni minita n te ekaretia ae kamanena te taetae ae kaokoro, ma I iaiangoia bwa e boni butimwaea au karea Iehova ke e aki. Bon iai naba te tai ae I a nanououa iai bwa e bon ongoraei au tataro Iehova ke e aki.” E taku Eva ae beku naba ni kabwanina ana tai: “I noria bwa e karuanikai bwa ti na nanououa n tangirakira iroun Iehova, ibukina bwa e rotaki iai am beku ibukina. Ko nang aki kani karaoa am beku ibukin Iehova ao e a bua kimwareireim.” E taku Michael ae te bwaiania ae katoatai ao te unimwaane n te ekaretia: “Ngkana ko aki kakoauaa ae e bon tabeakiniko te Atua, ko na boni betinako mairouna.”

6. Tera ae ti riai ni karaoia ngkana ti a moanna n nanououa n tangirakira iroun te Atua?

⁶ A kaotaki n rongorongo aikai bwa e kona n rotaki ara onimaki ngkana ti iangoia bwa e a aki tangirira Iehova. Ma tera ae ti riai ni karaoia ngkana ti a moanna n nanououa n tangirakira iroun te Atua? Ti riai ni waekoa n rawa nakon te iango anne! Butiia Iehova bwa e na buokiko ni kanakoi ‘raraoman am iango,’ ao ni karina ‘te rau are mairoun te Atua ae e na kawakina nanom ma am iango.’ (TaiAre. 139:23; kbn.; IBir. 4:6, 7) Ao uringnga ae tiaki tii ngkoe. A kaaitara naba ma te aeka n  iango anne taari tabeman aika kakaonimaki, ao ana toro naba Iehova aika kakaonimaki ake ngkoa. Iangoa reireiara ae ti kona ni karekea man ana katoto te abotoro Bauro.

7. Baikara kangaanga ake e kaaitarai Bauro?

⁷ Ko nanamakinna n tabetai ae ko a taonakinako n tabem aika bati ao ko a aki konai moaia? Ngkana ngaia anne, ko na bon ota n ana namakin Bauro. E aki tii tabeaianga Bauro ibukin te ekaretia teuana, ma “ibukin taian ekaretia ni kabane.” (2Kor. 11:23-28) Iai aorakim ae wenemaan n te aro ae e a bua iai kimwareireim? Iai ‘te bwai ni kateketeke n rabwatani’ Bauro ae tao taekan te aoraki teuana, ao e a rangi n tangiria bwa e na toki. (2Kor. 12:7-10) E bwara nanom n tabetai ibukin aki kororaoim? E riki naba anne irouni Bauro. E taekinna bwa bon te mwaane ngaia ae ‘kananoanga,’ ibukin ana kabokorakora ma aki kororaoina.​—IRom 7:21-24.

8. Tera are e buoka Bauro ni kaaitarai ana kangaanga?

⁸ E ngae ngke e kaaitara Bauro ma kangaanga aikai ni kabane, ma e teimatoa ni beku ibukin Iehova. Tera ae kakorakoraaki iai? E ngae ngke e ataia ae e aki kororaoi, ma e bon onimakina raoi te kaboomwi. E ataa raoi ana berita Iesu aei: “Ane e onimakinna [Iesu] . . . e na reke irouna te maiu are aki toki.” (Ioa. 3:16; IRom 6:23) Bauro bon temanna naba i buakoia naake a onimakina te kaboomwi. E kakoauaa raoi ae e tauraoi naba Iehova ni kabwarai aia bure naake a a tia ni karaoa te bure ae kakaiaki, ngkana a rairi nanoia.​—TaiAre. 86:5.

9. Tera reireiara man ana taeka Bauro are n I-Karatia 2:20?

⁹ E onimakina naba Bauro korakoran ana tangira te Atua are e kaotaki rinanoni Kristo. (Wareka I-Karatia 2:20.) Nori taeka aika karaunano n tokin te kibu anne. E taku Bauro: “Natin te Atua . . . e tangirai ao e anga ngaia ibukiu.” E aki iangoia Bauro bwa te Atua e tiatiana ana tangira. E aki kangai, ‘I ataia bwa e aera te Atua ngkai e tangiriia taari, ma e bon aki kona n tangirai.’ E kauringia kaain Rom ni kangai: “E ngae ngke taani bure ngaira ma e mate Kristo ibukira.” (IRom 5:8) Bon akea tian ana tangira te Atua!

10. Tera reireiara man I-Rom 8:​38, 39?

¹⁰ Wareka I-Rom 8:38, 39. E ataa raoi Bauro korakoran ana tangira te Atua. E koreia bwa bon akea te bwai teuana ae kona “ni karaureira ma tangirara iroun te Atua.” E ataa  Bauro aron ana taotaonakinnano Iehova nakon te natannaomata ae Iteraera. E ataia naba ae e a tia n nanoangaia Iehova. Ke n taekana teuana, ai aron ae e kangai Bauro, ‘Kioina ngkai e a tia Iehova ni kanakoa oin Natina bwa e na mate ibukiu, e aera bwa N na manga nanououa n tangirakiu irouna?’​—IRom 8:32.

11. E ngae ngke e a tia Bauro ni karaoi buure n aron ake a oti n 1 Timoteo 1:​12-15, ma e aera ngkai e kakoauaa bwa e bon tangiria te Atua?

¹¹ Wareka 1 Timoteo 1:12-15. E boni bae n iai taai ake e a manga uringaaba iai Bauro ibukini baike e kakaraoi ngkoa. E taekinna bwa boni “karotoia” taani bure ngaia, ao e bon eti anne. Imwain ataakin te koaua irouni Bauro, e kakorakoraa ni bwainikirinia Kristian n te kaawa teuana ma teuana, e kamatawarikia tabeman, ao e boutokaa kamateaia ake tabeman. (Mwa. 26:10, 11) Ko kona n iangoa ana namakin Bauro ngkana e a kaitiboo ma ataei ake e anga te kariaia bwa a na tiringaki aia karo? E uringaaba Bauro n ana kairua ake e a tia ni karaoi, ma e ataia ae e a aki kona ni bitii kanoan taai aika nako. E kakoauaa ae e mate Kristo ibukina, ao e korea aei: “N ana akoi ae rianako te Atua, ao I a riki n ai arou aei.” (1Kor. 15:3, 10) Tera reireiara iai? Kakoauaa raoi ae e mate Kristo ibukim ao ko a kona ni karekea am iraorao ae kaan ma Iehova. (Mwa. 3:19) E kakawaki iroun te Atua te bwai ae ti karaoia ngkai ao n taai aika a na roko, ma tiaki ara kairua ake ti karaoi ngkoa, e ngae ngke Ana Tia Kakoaua Iehova ngaira n te tai anne, ke tiaki.​—Ita. 1:18.

12. Ti na kangaa ni buokaki n 1 Ioane 3:​19, 20, ngkana ti a namakina ae akea uaara ke ti aki tau n tangiraki?

¹² Ngkana ko iangoa aron Iesu ni mate ibukin am bure, ko kona ni kangai, ‘E a bon aki tau n reke anne irou.’ E aera ngkai ko kona n namakina anne? E kona ni burebureira nanora ae aki kororaoi, n te aro are ti a  namakinna iai bwa akea uaara ao ti aki tau n tangiraki. (Wareka 1 Ioane 3:19, 20.) Ngkana ti a moanna n iangoa anne, ti riai n uringnga ae “e rianako riki aron te Atua nakon nanora.” E korakora riki ana tangira Tamara are i karawa ao nanona ni kani kabwarai ara bure nakon ara namakin aika aki raraoi ake a reke iroura. Ti riai ni kakoauaa ae e bon tangirira Iehova. Ngkana e na riki anne ti riai ni katoatai n ukeuke n reirei n Ana Taeka, n tatataro nakoina, ao ni bobotaki ma ana aomata aika kakaonimaki. E aera ngkai e kakawaki karaoani baikanne?

13. Ti kangaa ni buokaki n te ukeuke n reirei n Ana Taeka te Atua? (Nora naba te bwaoki ae “ A Buokaki n Ana Taeka te Atua.”)

¹³ Ukeuke n reirei n Ana Taeka te Atua ni katoabong, ao ko nang ota riki n aroaron Iehova aika tamaroa. Ane ko na ataia ae e bon tangiriko. Kananoan am iango n Ana Taeka te Atua ni katoabong, e na buokiko ni ‘kaetii bwaai’ ake n am iango ao i nanom. (2Tim. 3:16) E taku Kevin ae te unimwaane n te ekaretia ae e kabokorakora ma namakinan ae akea uaana: “Warekan ao kananoan au iango i aon Taian Areru 103, e buokai bwa N na kaeta au iango ao n ataa raoi ana iango Iehova ibukiu.” E taku Eva are taekinaki mai mwaina: “N tokin te bong, I karekea au tai ni kananoa au iango i aon ana iango Iehova. E reke iai raun nanou ao e kakorakoraa au onimaki.”

14. Ti na kangaa ni buokaki n te tataro?

¹⁴ Tatataro. (1Tet. 5:17) E boto reken am iraorao ma temanna man arom n rereitaki ma ngaia, ao ni kaota am namakin nakoina. Ai bon tii te arona naba anne ma ara iraorao ma Iehova. Ngkana ti kaota nakoina ara namakin, ara iango, ao tabeaiangara, rinanon te tataro, ti a kaotia iai bwa ti onimakinna ao ti ataia ae e bon tangirira. (TaiAre. 94:17-19; 1Ioa. 5:14, 15) E taku Yua are taekinaki mai mwaina: “Ngkana I tataro, I aki tii taekin nakon Iehova baika riki n te bong anne. I taekin naba nakoina au iango ma au namakin. N tokina, I a moanna n iangoa Iehova bwa te Tama ae tangiriia raoi natina, ao tiaki te bwaoti n te kambwana ae bubura.”​—Nora te bwaoki ae “ Ko a Tia ni Warekia?”

15. E kangaa Iehova ni kaota tabeakinara?

¹⁵ Bobotaki ma raoraom aika kakaonimaki. Boni bwaai n tituaraoi mairoun Iehova. (Iak. 1:17) E kaota tabeakinara Tamara are i karawa, man arona ni karekeia tarira ao mwaanera n te onimaki aika kaotiota “te tangira n taai nako.” (TaeRab. 17:17) N ana reta Bauro nakoia I-Korote, e mwanewei araia Kristian tabeman ake a boutokaia, ao e taekinia bwa “nibwani kabebetean [nanona].” (IKoro. 4:10, 11) E kainnanoa naba Iesu Kristo boutokaana  mairouia raoraona aika anera ao aomata, ao e kakaitau iai.​—Ruka 22:28, 43.

16. A na kangaa raoraora aika kakaonimaki ni buokira bwa ti na kaan ma Iehova?

¹⁶ Ko karekeia raoraom n te ekaretia ao ni butimwaea aia ibuobuoki? Tiaki nanona bwa ti mamaara ngkana ti taekina ara kangaanga nakon te Kristian ae e a ikawai n te onimaki. Ma ti kona ni kamanoaki iai. E taku James are taekinaki mai mwaina: “I rangi ni buokaki n au iraorao ma Kristian aika ikawai n te onimaki. Ngkana I a taonakinako n iango aika aki raraoi, a kakauongo raoi irou raoraou aikai ao ni kauringai bwa a bon tangirai. I a kona n nora tangirau ao tabeakinau iroun Iehova rinanoia naakai.” Ai kakawakira bwa ti na karikirakea ao ni kateimatoa ara iraorao ae kaan ma tarira n te onimaki!

17-18. Antai ae ti riai n ongo irouna, ao bukin tera?

¹⁷ E tangiria Tatan bwa ti na katoka ara kabokorakora ibukini karaoan ae eti. E tangiria bwa ti na kakoauaa ae e aki tangirira Iehova ao ti aki tau ni kamaiuaki. Ma n aron ae ti a tia n noria, bon akea koauan anne.

¹⁸ E bon tangiriko Iehova. Ko rangi ni kakawaki irouna. Ngkana ko ongeaba irouna, ko na bon “teimatoa n tangiraki irouna” n aki toki, n aron Iesu. (Ioa. 15:10) Ngaia are tai ongo iroun Tatan, ke nanom ae kabuakakako. Ma ko na ongo iroun Iehova ae nori raoiroira n tatabemanira nako. Kakoauaa raoi ae “e kukurei Iehova irouia ana aomata,” n ikotaki ma ngkoe!