1. Éé ní e Jìhóvà nyímá ea kil ló pá a gbò e?

JÌHÓVÀ BÀRÌ “ólò ié lèèma mm̀ pá a gbò.” (Ps. 149:4) Ẹ̀b bé ea ẹ́ẹ̀lẹ̀i nyíe gè nyimá naa vó naaà! Jìhóvà nyímá gbò lé kpãa e íè; à nyímá nágé ló íb nú eé láá naa, vaá à ólò nvèè bá nèi kọ é láá dú a kóò. Be à gá náa vaá è kilsĩ́ gè bọ́ló dẹ̀lẹ̀ nyíé boo kìlmàé ló, àé kilsĩ́ gè dú bẹẹ kóò!—Jọ́ọ̀n 6:44.

2. Éé ní ea náa vaá à tavala ló sìgà gbò ge zìgà kọọ̀ Jìhóvà vulèè va ẹ́?

² Sìgà nen é láá kọọ̀, ‘M̀ nyímà kọọ̀ Jìhóvà vulè pá a gbò, sõò mósĩ́ deè ní em é láá àgala boo kọọ̀ à vulè nda ẹ́?’ Éé ní ea é láá naa kọọ̀ nen á bĩiná nakà bíbvá ẹ́? Oksana * ea beè mòn gã́bug tã̀àgã̀ tṍó ea beè di dí ńkem kọ́ọ̀: “Nyíém beè palàge ẹẹ tṍó em diìà múú vaá gbóó dààmà togó gè sí tóm gyà deè sĩ́ tóm. Sõò 15 gbáá aa ló tṍóá, m beè gbóó dààmà togó gè kẽ̀èa boo gbò pọ́lọ́ nú ea beè naaá ḿ ló tṍó em beè di dí ńkem. M beè gbóó tuumá kọọ̀ Jìhóvà náa ié nám lèèmá m, vaá ním bọ́ nà ló kọ á vùlèm.” Ene kà vígà pábia ea dú neǹ gyà deè sĩ́ tóm ea bée kọlà Yua ea beè mòn nàgé gã́bug tã̀àgã̀ tṍó ea beè di dí ńkem kọ́ọ̀: “M beè kìn nà lóó nè Jìhóvà boo béè kọọ̀ m beè gbĩ́ gè naa kọọ̀ nyíée á ẹẹ. Sõò m beè àgala boo kọọ̀ náa gé láá vùlèm.”

3. Éé ní eé ló bel boo mm̀ nakà togó bel ge nòí ẽ́?

³ Be à sẹlẹ ò palàge vùlè Jìhóvà, sõò nóo agàlà boo kọọ̀ à vulèè ni belí bé ea beè tõó ló bàà kà vígà pábia e beè kolí béeá naaá. Éé ní ea náa vaá à dú bíi kọ ó àgala boo kọọ̀ Jìhóvà ólò ẹ̀b nú ea kil ní ló é? Vaà éé ní ea é láá nvèè bá  nè ni tṍó eo íè bùlà kọọ̀ Jìhóvà náa vulèè ní ẽ́? Naanii eé ló bel boo ààlaà gbò bíbví.

4. Éé ní ea náa vaá gè ié bàà-bàà bùlà kọọ̀ Jìhóvà vulèi à dú gẹẹ-gẹẹ ló é?

⁴ Vulà ólò siè kpóó ló nen mm̀ tóm ea gé sí. Be à gá náa è àgala boo kọọ̀ Jìhóvà vulèi vaá àé nveè bá nèi, àé náa kọọ̀ é pììgà bé e bẹẹ kpóó sim tùlà naa gè fã̀é kèbá kọ̀láá kà tã̀àgã̀ e kpeè sĩ́ ló mm̀ dùm. Sõò, be à gá náa vaá née agàlà boo kọọ̀ Bàrì gé ẹb nú ea kilíí ló, àé náa kọọ̀ “lóói á ọọ.” (Pró. 24:10) Vaá tṍó e lóói ọọ vaá née dẹlẹ̀ nà nyíé boo kọọ̀ Bàrì vulèi, àé náa kọ é gá láá bé èlbá gbò ẹ̀bmà e Sétàn síimaí ló.—Ẹ́fẹ. 6:16.

5. Éé ní ea ni nááá ló sìgà pá vígà e bà náa àgala boo kọọ̀ Bàrì vulèè va ẹ́?

⁵ Bàà-bàà bùlà a náa kọọ̀ sìgà pá bẹẹ vígà á gá ié ná kà lé gbaa ló kilma ló Jìhóvà. Ene kà neǹ kànen mm̀ bõ̀ònatõ̀ò ea kọlà James kọ́ọ̀: “Náa kal ló béè kọọ̀ m̀ géè sí tóm Bẹ́tẹẹ̀l vaá de nágé kpéè ló gè zọ̀ pá vígà mm̀ bõ̀ònatõ̀ò e bà náa ólò ló nà dém bel gbá kọ́ kpẹ̀a, ním beè àgala boo kọọ̀ nyíé Jìhóvà ẹ́ẹ ló gbò tóm em gé sí. À íe tṍó em beè dààmà togó gè ié bàà-bàà bùlà kọọ̀ Jìhóvà náa gé dã́ nà gbò tã̀àgã ló.” Ene kà vígà pábia ea kọlà Eva ea ólò sí tóm gyà deè sĩ́ tóm kọ́ọ̀: “M beè mòn kọọ̀ gè ié bàà-bàà bùlà ea kil ló vulè Jìhóvà é náa kọọ̀ nen á gá láá fã̀ nà Jìhóvà leevè. Ge naa vó é náa kọọ̀ ó gá ie ná tàn ge sí tóm nè Jìhóvà vaá àé náa kọọ̀ ó gá ie ẹ́ẹ́ nyíé mm̀ o sìtóm nè Jìhóvà.” Ene kà neǹ kànen mm̀ bõ̀ònatõ̀ò ea dú nágé neǹ gyà deè sĩ́ tóm ea bée kọlà Michael kọ́ọ̀: “Be à gá náa vaá nóo agàlà boo kọọ̀ Jìhóvà gé ẹb nú ea kil ní ló, àé náa kọ ó dọ̀ ààẹ́ nvée.”

6. Éé ní eé náa tṍó e dààmà togó gè ié bàà-bàà bùlà kilma ló vulè e Jìhóvà ié kìlmàí ló é?

⁶ Gbò nú ea ni nááá ló pá vígà e géè ló bel ea kil va lóá, zógè bé e gè ié bàà-bàà bùlà kilma ló vulè Jìhóvà é láá naa kọ é gá ié ná zìgà naa. Sõò éé ní ea bọ́ló kọ é naa tṍó e dààmà togó gè ié bùlà kọọ̀ Jìhóvà náa vulèi é? Àé bọ́ló kọọ̀ é gbẹá boo nyaaná nakà bug togóá. Bàn Jìhóvà kọọ̀ á nveenìè bá neè ni kọ ó gá iè nàe “pọ́lọ́ bùlà” vaá ò baníe kọ á neè ni ‘fẹ́ẹ́ fẹẹ̀ ló Bàrì ea é kuma o nyíe nè o bùlà.’ (Ps. 139:23; ekk.; Fíl. 4:6, 7) Kẽ̀èa boo  kọọ̀ níì áá olo ní eo íè íb pọ́lọ́ bùlàí é nì. Sìgà pá vígà gé bé nágé bé ló íb gbò pọ́lọ́ bùlàí. Kọbèè gbò gyóòlo Jìhóvà e ba beè di tṍó ea kil nvéeá beè ié nágé íb gbò bùlàí. Bugi togó boo nú eé láá nó lọl ló neǹ tóm Pọ́ọ̀l.

7. Mókà gbò tã̀àgã̀ ní e Pọ́ọ̀l beè kpee sĩ́ ló é?

⁷ É kọọ̀ à ié tṍó eo beè tuumá kọọ̀ ò íèè gã́bug tóm gè sì, vaá à tàvàlà ní ló gè láá sí gbò tómá? Beè vó, òé láá dã́ ból ló nú ea beè naaá ló Pọ́ọ̀l. Níì áá pá vígà e bà di mm̀ ene kà bõ̀ònatõ̀ò ní ea beè ié tọa ló kilma lóé nì, sõò “dénè gbò bõ̀òna ló Kráìst.” (2 Kọ́r. 11:23-28) É kọọ̀ zọ̀ ló a náa kọ nyíé ni á gá ẹẹ na? Pọ́ọ̀l beè mòn tã̀àgã̀ bá “zél gbẹ̀” ea é láá dú zọ̀ ló, vaá a beè gbĩ́ kọọ̀ zọ̀ lóí á taẹ̀ẹ́ ló. (2 Kọ́r. 12:7-10) É kọọ̀ ge kọọ̀ à tavàlà ni ló gè naa nú ea lelà sìgà tṍó ólò ọọvẹ́ ni ló? A beè naaá nágé naa vó ló Pọ́ọ̀l sìgà tṍó. Pọ́ọ̀l beè kọọ̀ à dúè “kà ńsàn” boo béè kọọ̀ a beè olòó tavàlàẹ́ ló gè naa nú ea lelà sìgà tṍó.—Róm̀ 7:21-24.

8. Éé ní ea beè nvèè bá nè Pọ́ọ̀l kọ á láá ĩima kèbà gbò a tã̀àgã̀ ẽ?

⁸ Pọ́ọ̀l beè kilsĩ́ gè fã̀ Jìhóvà náa kal ló béè kọọ̀ a beè tení bá gã́bug ẹ̀bmà nè gbò dìtõ̀ò ea beè ọọvẹ́ẹ ló. Éé ní ea beè naa kọ á láá kilsĩ́ gè fã̀ Jìhóvà kèbá gbò dìtõ̀òá ẽ́? Náa kal ló béè kọọ̀ a beè nyimá gbò a ọ́ọ́-ọọ, a beè palàge dẹlẹ nyíé boo ú vààa gyọ́ọ̀ Jíízọ̀s. A beè nyimá nágé zìgànù Jíízọ̀s ea kọ́ọ̀: “Kọ̀láá nen e a dẹlẹ́e nyíe boo [naamá Jíízọ̀s] é . . . íe dùm e bè náa tá.” (Jọ́ọ̀n 3:16; Róm̀ 6:23) Pọ́ọ̀l beè di gbàà gbò e ba beè dẹlẹ nyíé boo ú vààa gyọ́ọ̀ Jíízọ̀s. A beè àgala boo kọọ̀ Jìhóvà é ia ló nè bã̀àna gbò e bà sí kà agẹbá pọ́lọ́ vaá bà ọgá ló.—Ps. 86:5.

9. Éé ní eé láá nó lọl ló gbò moǹ bel Pọ́ọ̀l ea di mm̀ kpá Gàlésìà 2:20 é?

⁹ Pọ́ọ̀l beè dẹlẹ nyíé boo kọọ̀ Jìhóvà vulèèe boo béè kọọ̀ a beè nyimá kọọ̀ Bàrì beè lẹ̀ẹ̀là Jíízọ̀s kọ á uèé boo. (Bugi Gàlésìà 2:20.) Nvèè kpíí ló gbò bel nvèà nyíé gbàà ea kọ́ mm̀ dee-deè nvéè gã́belá. Pọ́ọ̀l kọ́ọ̀: “Sã́áná Bàrì e a beè vùlèm̄ vaá úm̄ boo.” Pọ́ọ̀l náa beè tuumá kọọ̀ a síè pọ́lọ́ inmàè kiẽ́e e Bàrì náa gé láá vulè nàèe, vaá náa beè kọọ̀, ‘M̀ monì nú ea é náa kọọ̀ Jìhóvà á vùlè pá nà vígà, sõò ním moní nú ea é náa kọọ̀ á vùlè nda.’ Pọ́ọ̀l beè kẽeé nyíè pá vígà e bà di Róm̀ kọọ̀: “Tṍó e e di di e e géè sí pọ́lọ́á ní e Kráìst  beè úí boo é.” (Róm̀ 5:8) Tọ́ọ̀ nu náa é láá naa kọọ̀ Bàrì á gá vùlè nài!

10. Éé ní e nóò lọl ló nú ea di mm̀ kpá Róm̀ 8:38, 39 é?

¹⁰ Bugi Róm̀ 8:38, 39. Pọ́ọ̀l beè palàge nyimá bé e vulè Bàrì bọọ naa. A beè emí kọọ̀ tọ́ọ̀ nu náa “é láá kpòòlà beele lọl ló vulà súú dẽe ló Bàrì.” Pọ́ọ̀l beè nyimá bé e Jìhóvà beè ié ĩ̀ìmà ló pá Ízràẹ̀l naa. A beè nyimá nágé bé e Bàrì beè iée sàn nyíé ló naa. Èé láá kọọ̀ Pọ́ọ̀l géè kọọ̀, ‘Tã́gíní bé e Jìhóvà beè lẹ̀ẹ̀là a Sã́áná kọ á úḿ booá, é kọọ̀ à ié nú ea é láá naa kọ ḿ gá àgala boo kọọ̀ Bàrì vulèm?’—Róm̀ 8:32.

11. Náa kal ló béè kọọ̀ Pọ́ọ̀l beè sí gbò pọ́lọ́ ea di mm̀ 1 Tímotì 1:12-15, éé ní ea beè naa kọ á àgala boo kọọ̀ Bàrì vulèèe é?

¹¹ Bugi 1 Tímotì 1:12-15. Nyíè Pọ́ọ̀l beè olòó bììlà tṍó ea bugi togó boo gbò nú ea beè olòó naa besĩ́ à kálá dú nen ea gé nyoone nvéè Kráìst. Náa bọọí ló kọọ̀ Pọ́ọ̀l beè kọọ̀ ẹlẹ “ní nen pọ́lọ́ e a tõo lọ̀l vaá à lee é”! Besĩ́ à kálá nyoone nvéè Kráìst, Pọ́ọ̀l beè olòó biigè ló gbò e bà géè nyoone nvéè Kráìst aa bon dọ bon, a beè sii sìgà ọ̀và nvee kpọ́gọ́lọ́, vaá nvèè sãa kúm kọ bàá fẹ́ sìgà ọ̀và. (Tóm 26:10, 11) É kọọ̀ òó láá dòòmà dẽe ló bé ea gáẹ̀ láá tọá ló Pọ́ọ̀l naa be à gá náa vaá à mòn nen e ẹlẹ beè fẹ́ a tẹ̀ àbèè a kà? Pọ́ọ̀l beè ọgá ló gbò pọ́lọ́ ea beè sì, sõò a beè nyimá kọọ̀ náa gé láá nyaanàè gbò nú ea beè naa tṍó ea kil nvéeá. A beè zìgà kọọ̀ Kráìst beè uèé boo, vaá a beè emí kọọ̀: “Sàn nyíe Bàrì ní e a túm̄ naamá nen e m dú é.” (1 Kọ́r. 15:3, 10) Éé ní e níí nóòmài ẽ́? Zìgà kọọ̀ Kráìst beè uè boo olo vaá naa kọ ó láá ié kà lé gbaa ló kilma ló Jìhóvà. (Tóm 3:19) Nú ea bọọ́ ló Bàrì dú nú e náà kátogóí nè nú eé náa dì deè sĩ́, níì gbò pọ́lọ́ e beè sí tṍó ea kil nvéeá nì, kọbèè à  gá náa e beè dú enè Neǹ Ditõ̀ò Jìhóvà tṍó e beè sí pọ́lọ́á àbèè è gáà beè dù.—Àìz. 1:18.

12. Mósĩ́ deè ní e gbò moǹ bel ea di mm̀ 1 Jọ́ọ̀n 3:19, 20 é láá nvèè bá nèi tṍó ea tõoí ló belí kọọ̀ é gé ló tọ́ọ̀ nu àbèè kọọ̀ Bàrì náa vulèi é?

¹² Tṍó eo bugi togó boo kọọ̀ Jíízọ̀s beè ú boo o pọ́lọ́, òó gbóó láá tuumá kọọ̀, ‘Ním bọ́ọ̀ ló kọọ̀ à gáẹ̀ beè úḿ boo.’ Éé ní ea náa vaá àé láá tõó ni ló naa vó é? Bẹẹ nyíe e bè náa gbõoma é láá kẹlẹ́i vaá naa kọ é bugi togó kọọ̀ é gé ló tọ́ọ̀ nu vaá náa bọ́ló kọ Bàrì á vùlèi. (Bugi 1 Jọ́ọ̀n 3:19, 20.) Tṍó ea tõoí ló naa vó, àé bọ́ló kọ é kẽea boo kọọ̀ “Bàrì el boo nyíe e a dìí m.” Bé e bẹẹ Tẹ̀ ea di káála vulèi vaá ia ló bẹẹ pọ́lọ́ naa palàge bọọ èlmà kọ̀láá kà pọ́lọ́ bùlà eé láá ié. À bọ́ló kọ é àgala boo kọọ̀ Jìhóvà vulèi. Kọbé è láá naa vó, èé íè ge bugi Kpá Káí, tã̀àgã̀é ló lee, vaá zọ̀ pá a gyóòlo e bà bọ́ló dẹ̀lẹ̀ nyíé boo naaá nu. Éé ní ea náa vaá ge naa gbò nuí à palàge dú bíi é?

13. Mósĩ́ deè ní e gè olòó nó Kpá Káí é láá nvèè bá nèi ẽ́? (Ẹ̀b ńkpó ea kọ́ọ̀ “ Bé E Moǹ Bel Bàrì Beè Nvèè Bá Nè Va Naa.”)

¹³ Nó Kpá Káí buù dee, mè òé kpáá mòn gbò lé kpãá e Jìhóvà íe. Òé nyímá bé ea vulè ni naa. Ge bugi togó boo gbò nú ea di mm̀ Kpá Káí buù dee é náa kọ ó kpáá dã́ ból ló nu leevè, àé “lele dee bá” gbò nú ea dì ní bùlà nè nyíe. (2 Tím. 3:16) Ene kà neǹ kànen mm̀ bõ̀ònatõ̀ò ea bée kọlà Kevin ea beè olòó ẹ̀b a bá belí kọọ̀ á géè ló tọ́ọ̀ nu kọ́ọ̀: “Ge bugi kpá Psalm 103 vaá bugi togó boo gbò nú ea di mm̀ a nveè bá nèm kọ ḿ láá nyaaná pọ́lọ́ bùlà em beè ié vaá nyimá bé e Jìhóvà ẹbvím naa.” Eva e beè kòl bée dààmà togóá kọ́ọ̀: “Kọ̀láá bílá dee, m̀ ólò bugi togó boo bé e Jìhóvà ẹb nu naa. Vó ólò naa kọ ḿ ié dĩ̀ìnè ló bùlà vaá naa kọ ḿ ié agẹ zìgà.”

14. Mósĩ́ deè ní e tã̀àgã ló Bàrì é láá nvèè bá nèi ẽ́?

¹⁴ Olòó tã̀àgã ló Bàrì lee. (1 Tẹ̀s. 5:17) Ge olòó zọ̀ o kóò loá sọ́l lee é náa kọ bọọ gbaa ló á palàge agaló. Tẽ̀ènè áá báá, bé e bẹẹ gbaa ló kilma ló Jìhóvà dì naa ẽ́. Tṍó e kọ́ọ̀ bẹẹ bùlà nè bé e nu tọ́aí ló naa nèeé mm̀ tã̀àgã ló, à zógè kọọ̀ è dẹlẹ̀ẹ̀ẹ nyíé boo vaá è nyímà kọọ̀ à vulèi. (Ps. 94:17-19; 1 Jọ́ọ̀n 5:14, 15) Yua e beè kòl béeá kọ́ọ̀: “Níì áá gbò nú ea beè naaá ḿ ló deeá ní em ólò kọ́ nè Jìhóvàẹ nì. M̀ ólò kọ́ gbõ̀ònà bé e nu tọ́a ḿ ló naa nè Jìhóvà. Vó gbóó naa kọọ̀ ḿ gá ẹ̀b Jìhóvà dì belí nen ea íe pọ̀b kà tọọ̀ tóm ea ólò kọ́ nú e gbò nen é náa, sõò ḿ láá ẹ̀bvie dì belí Tẹ̀ ea palàge vùlè pá a nvín.”—Ẹ̀b ńkpó ea kọ́ọ̀ “ É Kọọ̀ O Beè Bugi?”

15. Mósĩ́ deè ní e Jìhóvà zógè kọọ̀ à íèè lèèma mm̀ buù bẹ̀ì e?

¹⁵ Zọ̀ pá vígà naaá nu; pá vígà dú dõ̀ònù  ea aa bá Jìhóvà. (Jém̀z 1:17) Bẹẹ Tẹ̀ ea di káála zógè kọọ̀ à íèè lèèma mm̀ buù bẹ̀ì tení dú ló gè nèi pá vígà mm̀ bõ̀ònatõ̀ò e bà ólò “vùlèi kọ̀láá tṍó.” (Pró. 17:17) Mm̀ kpá lẹ̀ẹ̀là tóm e Pọ́ọ̀l beè emí má pá vígà e ba di Kọ́lọsì, a beè kòl béè sìgà pá vígà e ba beè nvèèe sãa kúm, vaá kọ́ kìlmà vá ló kọọ̀: “Bà ólò palà ge nvèè bá nèm̄.” (Kọ́l. 4:10, 11) Kọbèè Kráìst Jíízọ̀s beè ié bíi ló nvèè bá vaá a beè zààva ló nvèè bá ea beè íe lọl bá gbò nyómá tóm nè gbò nen.—Lúùk 22:28, 43.

16. Mósĩ́ deè ní e gbò kóò e bà bọ́ló dẹ̀lẹ̀ nyíé boo é láá nvèè bá nèi kọ é láá kpáá tõo bã ló Jìhóvà ẹ?

¹⁶ É kọọ̀ ò gé íe gé bélè lọl ló pá vígà mm̀ bõ̀ònatõ̀ò e bà dú dõ̀ònù e Jìhóvà néi? Ge kọ́ bé e nu tọ́aí ló naa nè bẹẹ kóò e togóe ni tulà nu náa tõó dọ̀ kọọ̀ è dúù gbò ọ́ọ́-ọọ; tãa vó àé nveè bá nèi. Bugi togó boo nú e James e beè kọ́ nú ea kil lóá kọ́: “Ge bã̀àà kóò pá vígà e togó va ni tulà nu á palàge nvèè bá nèm. Tṍó em ẹbvì nà bá belí kọọ̀ ḿ gé ló tọ́ọ̀ nu, gbò kóòí ólò pãaném tṍ ló vaá kọ́ nèm bé e bà vulèèm naa. Tṍó e bà náa vó, à ólò naa kọ ḿ nyimá kọọ̀ Jìhóvà vulèm vaá à gé ẹb nú ea kilím ló.” Ẹ̀b bé ea palàge dú bíi gè bã̀àà kóò pá vígà vaá kilsĩ́ gè ié kà lé gbaa ló kìlmà vá ló naaà!

17-18. Mée ní ea bọ́ló kọ é pãane tṍ lóé, vaá ló éé?

¹⁷ Sétàn gbĩ́ kọọ̀ é òòà aa ló gè naa nú ea dú lé. À gbĩ́ kọọ̀ é tuumá kọọ̀ Jìhóvà náa vulèi, vaá née bọ́ọ̀ló gè di zèè gbò e Jìhóvà é duulà. Sõò dì belí bé e ni mon naa, gbò belá náa dú kà kà.

¹⁸ Jìhóvà vulè ni. Ò dúù ìènù ea palàge nvèè ka ló. Be ò gbaníe tṍ ló, òé ‘kilsĩ́ gè tõó mm̀ a vulà’ dì belí Jíízọ̀s dọ̀ dè-dè. (Jọ́ọ̀n 15:10) Vóà naa, ó gá pãane tṍ ló Sétàn àbèè o nyíe tṍó ea kọ́ọ̀ Jìhóvà náa vulè ni. Tãa vó, pãane tṍ ló Jìhóvà ea ólò mòn lé ea di mm̀ buù bẹ̀ì. Dẹlẹ nyíé boo kọọ̀ à “ólo ié lèèma mm̀ pá a gbò,” kọbèè olo!