KUKWE JA TÖTIKARA 17
Nireta Jehová mike täte ye niara tä tarere
“Juta Jehovakwe ye käi jutobätä” (SAL. 149:4).
KANTIKO 108 Jehovata ni tarere metre
KUKWE NEBÄTÄ JA TÖTIKAI *
Ni itire itire ye käi juto krubäte Jehovabätä (Párrafo 1 mikadre ñärärä)
1. Jehovata juta kwe mike ñärärä ngwane, ¿dre tuata kwe?
“JUTA Jehovakwe ye käi jutobätä” aune ye tä kämike nuäre nibätä (Sal. 149:4). Ni töi meden meden kwin, ni raba dre dre nuainne kräke ye niara tä mike ñärärä aune tö ja ketai nibe. Ni ja ngwain metre käre ie ngwane, niara täi käre ni ken ni dimikakäre (Juan 6:44, TNM).
2. Jehovata ni tarere, ¿ye ñobätä ñaka nemen era ja mräkätre ruäre kräke?
2 Nitre ruäre raba kukwe ne erere niere: “Jehovata juta kwe tarere ye gare tie. Akwa tä ti tarere, ¿ye ñokänti raba nemen gare tie?”. ¿Ñobätä ja mräkätre ruäre tä kukwe ne erere ngwentari jai? Meri testiko kädekata Oksana * käkwe ja tuani kukwe ñaka nuäre ben nämäne monsore ngwane, ye tä dre niere ye ani mike gare jai: “Ti ja ngökaba ñöte aune ti ja mikaba prekursora ngwane, kä nämä juto krubäte tibätä. Akwa kä rikaba 15 ta yete ti nämä chi ngwane, ti ja tuaba kukwe ruäre ben ye rababa nüketa törö tie. Aisete Jehová ñaka nämä ti kain ngäbiti aune ñaka rabadre ti tarere jataba ruin tie”. Prekursora kädekata Yua nämäne monsore ngwane, ja tuani kwe kukwe ñan nuäre ben. Tä niere: “Ti ja diankaba mento Jehová kräke ñobätä ñan aune ti tö rababa kä tuai jutobätä, akwa niarakwe ñaka ti taredi jire ye nämä ruin tie”.
3. ¿Kukwe meden ngwantarita abokän nibike mike gare jai kukwe ja tötikara nekänti?
3 Meritre testiko nibu ne erere, Jehová tare nikwe, akwa Jehovata ni tarere ye ñaka tä nemen era ni kräke ruäre ngwane. Kukwe ja tötikara nekänti nikwe kukwe ketebu ngwantarita ne mikai gare jai: Jehovata ni tarere, ¿ye ñobätä rabadre gare era metre nie? Ni ñaka tä nemen töbike kwin ngwane, ¿ni raba dre nuainne?
JEHOVATA NI TARERE YE ÑAKA TUIN ERA NIE YE ÑAKA KWIN NI KRÄKE
4. Jehovata ni tarere ye ñaka tuin era nie ngwane, ¿ye ñobätä ñaka kwin ni kräke?
4 Jehovata ni tarere ye gare metre nie ngwane, kukwe tare ben nikwe ja tuai, akwa yebiti ta ni tö rabai sribire ja brukwä tätebiti Jehová kräke. Akwa Jehovata ni tarere ye ñaka rabadre era ni kräke ngwane, ni di ñaka rabai (Prov. 24:10). Ni ja di ngwain nekä aune Jehová ñaka ni tarere ruin nie ngwane, Satana kukwe gaikä ni rüere yebe ni di ñaka rabai jabätä (Efes. 6:16).
5. Jehová ñaka tä ja mräkätre ruäre tarere namani ruin ietre, ¿yebätä dre namani bare bätätre?
5 Ja mräkätre ruäre ñaka tuin ütiäte Jehovai ruin ietre ngwane, yebätä tätre di nekä kukwe ja üairebiti. Ni umbre ji ngwanka kädekata James tä niere: “Ti nämä sribire Betelte aune konkrekasion känti blita nämä kukwe madabiti yete ti nämä kukwe driere ye käi nämä nemen juto tibätä, akwa ti nämä dre nuainne ye Jehová ñaka nämä kain ngäbiti rababa ruin tie. Aune ruäre ngwane, ti nämä orasion nuainne Jehovai ye niara ñaka nämä kukwe nuin nämä ruin tie”. Eva, abokän tä sribire köbö täte Jehová kräke arato tä niere: “Jehovata ni tarere ye ñaka tuin era nie ngwane, ni ñaka töta kite sribidi niara kräke aune kä ñaka tä kite juto nibätä. Ne madakäre, nita sribire Jehová kräke ye ñaka tä kite tuin ütiäte nie”. Michael, abokän prekursor regular aune ji ngwanka konkrekasionte tä niere: “Jehová ñaka töita nibätä ruin nie ngwane, bätärekä bätärekä nita kite kämikekä niarabätä”.
6. Ni ñaka tä nemen töbike kwin ngwane, ¿ni rabadre dre nuainne?
6 Kukwe nieta ja mräkätrekwe nebiti nemen gare metre nie, Jehovata ni tarere ye ñaka tuin era nie ngwane, ye ñaka kwin ni kräke. Ni ñaka rabadre töbike kwin ngwane, ¿ni rabadre dre nuainne? Ni rabadre denkä bengwairebe ja töite. Jehová käkwe ni töi mikadre jäme, ni brukwä aune ni töi kriemikadre kwe ye nikwe ribedre ie, ne kwe ni rabadre töbike kwin (Sal. 139:23; Filip. 4:6, 7). Ja mräkätre ruäre tä ja tuin kukwe ye erere ben arato ye nikwe ngwandre törö jai. Nitre Ngöbö mikaka täte kirabe ie ja namani ruin ye erere arato. Dre raba nemen gare apóstol Pablo yebätä nie ye ani mike gare jai.
DRE RABA NEMEN GARE NIE PABLOBÄTÄ
7. ¿Kukwe medenbe Pablo ja tuani?
7 Kukwe keta kabre tä nuaindre nie, ¿aisete ni di ñaka nükebätä ruin nie? Kukwe ye erere ben Pablo ja tuani arato ñobätä ñan aune ñaka nämäne konkrekasion keteitibe töibikaire, ñakare aune nämäne konkrekasion jökrä töibikaire niebare kwe (2 Cor. 11:23-28). ¿Nita ja tuin bren tare krubäte ben abokän tä ni mike ulire? Ye namani bare Pablobätä arato. Kri tukwä nämäne niara ngrabare abokän nämäne niara ngwen di nekä niebare kwe, ye abokän bren tare ben nämäne ja tuin ni raba niere (2 Cor. 12:7-10). ¿Ni töi ngite ye tä ni mike ulire? Ye erere ja namani ruin Pablo ie arato. Bä kabre niara nämäne ja di ngwen kukwe metre nuainkäre ye nämäne niara mike ulire krubäte (Rom. 7:21-24).
8. Pablo ja tuani kukwe tare krubäte ben, ¿akwa dre käkwe niara dimikani sribikäre jankunu Jehová kräke?
8 Pablo nuaninte aune ja tuani kwe kukwe tare ben, akwa yebiti ta ja ngwani metre jankunu kwe Jehovai. ¿Dre käkwe niara dimikani? Kukwe nämäne nainte ie ye nämäne gare kwin ie, akwa nämäne tödeke kwatibe ni kökanintari ie. Ne madakäre, nirekwe tödekadre Jesubiti yekwe ja nire kärekäre rabai käbämikani Jesukwe ye nämäne gare kwin ie (Juan 3:16, TNM; Rom. 6:23, TNM). Erametre, Pablo nämäne tödeke kwatibe ni kökanintari ie. Aune nire tä ja mike ngite krubäte, akwa tä ja töi kwiteta ngwane, Jehová tä juto biarebe ngite juankäre ni yebiti ta ye nämäne gare kwin Pablo ie (Sal. 86:5).
9. Pablokwe kukwe niebare Gálatas 2:20, ¿ye tä dre driere nie?
9 Jehová nämäne Pablo tarere ye nämäne gare erametre ie ñobätä ñan aune Monso kwe juani kwe murie ketakäre ütiäre. Kukwe ütiäte nieta ni dimikakäre nebätä töbike, ye tä Gálatas 2:20 yekänti (ñäkädrebätä). * Pablo niebare: “Ngöbö Monsoi [...] ti tarebare aune ja nire biani kwe ti kräke”. Jehová nämäne ni ruäre tarere ye ñan nütübare Pablokwe. Ñodre, ñaka niebare kwe: “Ñobätä Jehovata nitre mada tarere ye nüke gare tie, akwa niara ñaka raba ti tarere”, ñakare aune kukwe ne ngwaninta törö kwe nitre romano ie: “Ni nämane ngite Ngöbö ngwärekri, ye ngwane Kristo krütani ni diäre amne ni kräke” (Rom. 5:8). Erametre Jehovata ni jökrä tarere.
10. Romanos 8:38, 39, ¿ye tä dre driere nie?
10 (Ñäkädre Romanos 8:38, 39 yebätä). * Jehovata ni tarere krubäte ye nämäne gare erametre Pablo ie. Yebätä kukwe ne tikabare kwe: “Jondron ñan tärä nun ötakäre ja tarekrä Ngöbökwebätä”. Jehovakwe nitre israelita ngübabare bätärekä. Aune niara mikani tuin bobre kwe jai ye nämäne gare metre ie. Aisete kukwe ne erere niebare kwe raba ruin nie: “Jehovakwe Monso kwe juani ja nire biankäre ti ütiäre. ¿Se ñobätä Jehovata ti tarere ye ñan rabadre era ti kräke?” (Rom. 8:32).
Nikwe ja mikani ngite käne ye ñan ai mikata ñärärä Jehovakwe, ñakare aune nita dre nuainne gwä ngwane aune nikwe dre nuaindi ja känenkäre ye bäri ütiäte niara kräke (Párrafo 11 mikadre ñärärä) *
11. 1 Timoteo 1:12-15 tä niere erere, Pablo ja mikani ngite, ¿akwa ñobätä Jehová nämäne tarere ye nämäne gare metre ie?
11 (Ñäkädre 1 Timoteo 1:12-15 yebätä). Pablo ja mikadre kristiano ye känenkri ja mikani ngite kwe yebätä ja nämäne ruin käme krubäte ie. Yebätä niara ja mikaka ngite krubäte ye niebare kwe. Nitre kristiano juta keta kabre känti ye rüere ja mikani kwe aune kitani ngite kwe bätä nitre ruäre murie ketadre ye nämäne debe kräke (Hech. 26:10, 11). Aune nitre kristiano ja mäkäninte murie ketani niara köböite ye monsoi rabadre gare ie ye bämike ja töite. ¿Ja rabadre ruin ño Pablo ie? Niarakwe ja mikani ngite ye ñan namani drere kräke. Akwa Jesukwe ja nire biani niara ütiäre yei niara nämäne tödeke kwatibe, aisete kukwe ne erere tikabare kwe: “Ngöbökwe ja moto mikani kuin tikrä abko köböire tita kore” (1 Cor. 15:3, 10). ¿Ye tä dre driere nie? Jesukwe ja nire biani ni ütiäre ye köböire ni raba ja kete kwin Jehovabe ye nikwe mikadre tuin erametre jai (Hech. 3:19). Nikwe ja mikanina testiko Jehovakwe o ñakare, ye ngwane ni ja mikani ngite ye ñan ai mikata ñärärä Jehovakwe, ñakare aune nita dre nuainne aune nikwe dre nuaindi ja känenkäre ye bäri ütiäte Jehová kräke (Is. 1:18).
12. 1 Juan 3:19, 20 tä niere erere, ni ñaka ütiäte aune ñaka ni taredre rabadre ruin nie ngwane, ¿ni raba dre nuainne?
12 Ni töi ngite yebätä ruäre ngwane ni ñaka ütiäte aune ñaka ni taredre ye raba nemen ruin ja brukwäte nie (ñäkädre 1 Juan 3:19, 20 yebätä). * Jesukwe ni kökanintari ye ñaka raba ngite juen ta nibiti raba nemen ruin nie. Akwa ja rabadre ruin ye erere nie ngwane, nikwe kukwe ne ngwandre törö jai: “Ngöbö bäri kri ni brukwä ngwä”. Jehová ñaka tä ni tarere aune ñaka ngite juen ta nibiti raba nemen ruin nie, akwa metrere ni Rün Jehová ye tä ni tarere aune tä ngite juen ta nibiti. Ni rabadre kukwe ye mike era jai. Akwa yekäre, ni rabadre ja tötike mantre jetebe Bibliabätä, orare käre aune ja ükökrö ja mräkätre ben. Ñobätä kukwe ketamä ne ütiäte krubäte ye ani mike gare jai.
JA TÖTIKA BIBLIABÄTÄ, ORASION AUNE JA MRÄKÄTRE YE TÄ NI DIMIKE ÑO
13. ¿Nita ja tötike Ngöbö Kukweibätä ye tä ni dimike ño? (Recuadro “ Ngöbö Kukwei tä niaratre dimike ño” ye mikadre ñärärä).
13 Nikwe ja tötikadre mantre jetebe Bibliabätä. Nikwe ye erere nuaindi ngwane, Jehová töi kwin keta kabre tärä aune tä ni tarere ye rükai gare nie. Aune nita ñäke Bibliabätä aune töbiketaribätä ye ngwane, ni rabai töbiketari kwin aune nikwe ja brukwä aune ja töi ükaite (2 Tim. 3:16). Kevin, ni umbre ji ngwanka konkrekasionte abokän ñaka nämäne töbike kwin jabätä. Niara tä niere: “Tita ñäke Salmo 103 yebätä aune töbiketaribätä ngwane, kukwe tuin ño Jehovai aune tä töbike ño tibätä ye tä nüke gare tie”. Eva, abokän kädrite párrafo ketarike yete, tä niere: “Kukwe tuin ño Jehovai yebätä tita kä denkä jai köbö kwatire kwatire töbikatarikäre ye tä ti töi mike jäme aune tä tödeka tikwe mike dite”.
14. ¿Orasion ye tä ni dimike ño?
14 Oradre käre (1 Tes. 5:17). Ni ruäre tä ja kete kwin jabe ñobätä ñan aune tä kukwe era erere niere jai aune tä blite käre jabe. Ye erere arato, ja ruin ño nie, dreta ni töite aune dreta ni ngwen töbike ye nita niere Jehovai ngwane, nita tödeke niarai aune niara tare nikwe ye nita bämike ie (Sal. 94:17-19; 1 Juan 5:14, 15). Yua, abokän kädrite párrafo ketebukäre yete, tä niere: “Tita orare ngwane, tikwe dre nuainba köbö yete ye ñan aibe tita niere Jehovai, ñakare aune tita blite ja brukwä tätebiti ben. Ja ruin ño tie ye tita mike gare ie. Niara ñaka nemena tuin tie jefe ye kwrere, ñakare aune ni rüne tä monso kwe tarere krubäte ye kwrere niara tuin tie” (recuadro “ ¿Mäkwe ñäkäbarerabätä?” ye mikadre ñärärä).
15. ¿Jehová töita ni itire itirebätä ye bämikata ño kwe nie?
15 Nikwe kä diandrekä jai ja ükarakrö ja mräkätre ben. Niaratre ye abokän kukwe ütiäte biani Jehovakwe nie (Sant. 1:17). Jehovakwe ja mräkätre kwati ja üaire biani nie abokän tä ni tarere kä jökrä ngwane. Yebiti niara töita nibätä bämikata nie (Prov. 17:17). Tärä Colosenses yete, Pablo käkwe nitre ruäre kädekaninte abokän käkwe niara töi mikani jäme nieta kwe (Col. 4:10, 11). Jesús dimikadre ye niara nämäne ribere jai aune ja ketamukotre kwe käkwe dimikani. Ñodre, angeletre aune ja ketamukotre kä tibienbätä käkwe niara dimikani yebätä debe biani kwe (Luc. 22:28, 43).
16. ¿Ja mräkätre konkrekasionte tä ni dimike ño nökrö bäri Jehová ken?
16 Ja mräkätre ünä kukwe ja üairebiti tä konkrekasionte, ¿ye nita känene ja dimikakäre aune nita kain ngäbiti? Kukwe meden tä ni ngwen töbike ye nita mike gare ja mräkätre ünä kukwe ja üairebiti ie ngwane, ni ngwarbe ye ñan ai nita bämike, ñakare aune ni raba nemen kriemikani. James, abokänbätä blitani párrafo ketarike yete, ye tä dre niere yebätä ani töbiketari chi: “Tita ja kete ja mräkätre ünä kukwe ja üairebiti ben ye abokän salvavida kwrere ti kräke. Ti ñaka tä nemen töbiketari kwin ja käne ngwane, niaratre tä ti kukwe nuin bätärekä aune tä ti tarere ye niaratre tä niere tie. Yebiti Jehová tä ti tarere aune tä ti töibikaire ye niara tä bämike tie”. Ja ketamuko ünä kukwe ja üairebiti yebe ni ja ketadre ye ütiäte krubäte.
JEHOVÁ NI TAREKÄ YE KEN NI TÄDRE
17, 18. ¿Nikwe nire kukwe nuadre aune ñobätä?
17 Nikwe ñaka ja ngwandre metre aune nikwe ja di ngwandre nekä ie Satana tö. Jehová ñaka tä ni tarere aune ni ñaka ütiäte krubäte mikakäre kwäre ye nikwe nütüdre ie Satana tö arato. Akwa nikwe mirira gare jai erere, kukwe ye ñaka metre.
18 Jehovata ni tarere aune ni itire itire ye ütiäte kräke. Nikwe Jehová mikai täte ngwane, niarakwe ni taredi, Jesús tarebare kwe ye erere (Juan 15:10). Jehová ñaka ni tarere ye Satana aune ni brukwä tö mikamana era jai ngwane, nikwe ñaka mikadre era jai, ñakare aune Jehovata dre niere ye nikwe mikadre ütiäte jai ñobätä ñan aune niarata ni töi kwin ye mike ñärärä. Juta kwe käi jutobätä aune mä käi jutobätä arato ye tädre gare metre mäi.
KANTIKO 141 Jehovakwe ja nire biani ngwarbe nie
^ párr. 5 Jehovata ja mräkätre jökrä tarere ye ñaka tuin era ja mräkätre ruäre ie. Jehovata ni itire itire tarere ye tädre gare metre nie. Aune ñaka era ni kräke ngwane, dre raba ni dimike ye rabai gare nie kukwe ja tötikara nekänti.
^ párr. 2 Nitre ruäre kä kwitani.
^ párr. 9 Gálatas 2:20, (TNM): “Tita metani kribätä Kristobe. Ti ñan aita nüne, ñakare aune Kristo tä nüne tibe. Aisete tita nire ja ngätärebiti nengwane ye abokän tita nüne tödekakäre Ngöbö Monsoi yei, niarakwe ti tarebare aune ja nire biani kwe ti kräke”.
^ párr. 10 Romanos 8:38, 39, (NGT): “Ne medenbätä gare metre tie, gata, ja nire, angeletre, ji dokwäte krikri, gobran krikri, jondron nengwane, jondron tä rakakakä, jondron mente kwin, jondron mente nguse, jondron bätäkä ngwarbe mada tä sribebare, ne jökrä ñan tärä nun ötaka ja tarekrä Ngöbökwebätä; ne medendre tä Jesús Gobran kri, Ji dokwäte nunkwebiti”.
^ párr. 12 1 Juan 3:19, 20 (NGT): “Nebätä ja rükai gare ni ie, ni abrä tä kukwe metre te angwane ja raba nemen ruin metre nie ja brukwäte Ngöbö ngwärekri. Ñobätä ñakare angwane ni brukwäkwe ñäkädi nie ngware, Ngöbö bäri kri ni brukwä ngwä, aune jondron jökrä gare niara ie”.
^ párr. 70 KUKWE MIKATA GARE ÜAIBÄTÄ: Kukwe metre jämi gare Pablo ie ye känenkri ja mikani kwe nitre kristiano rüere aune kitani ngite kwe. Akwa Jesús dre nuainbare kräke ye kani ngäbiti kwe ngwane, ja töi kwitani kwe aune ja mräkätre dimikani kwe. Ja mräkätre dimikani kwe ye mräkätre ruäre, rüere ja mikani kwe käne.
