1. Yehauvas pom nws cov neeg zoo li cas?

VAJTSWV TXOJLUS hais tias Yehauvas “txaus siab heev rau nws haivneeg.” (Phau Ntawv Nkauj 149:4) Peb zoo siab heev uas Yehauvas tseem pom tias peb muaj qhov zoo thiab yuav cob qhia tau peb nws thiaj rub peb mus ua nws cov phoojywg. Yog peb muab siab npuab rawv nws ces nws yeej yuav nrog nraim peb mus ib txhis.​—Yauhas 6:44.

2. Vim li cas muaj ib txhia thiaj xav tias Yehauvas yuav tsis hlub lawv?

² Muaj tej tug hais tias, ‘Kuv yeej paub tias Yehauvas hlub nws cov neeg tiamsis kuv ntseeg tsis tau tias nws yuav hlub kuv.’ Vim li cas muaj tej tug thiaj xav li ntawd? Tus muam Aus Xab Nam (Oksana) * uas raug ntau yam kev txom nyem thaum yau hais tias: “Kuv zoo siab thaum kuv ua kevcai raus dej thiab los ua ib tug tho kev. Tiamsis 15 xyoos tom qab ntawd kuv txawm cia li xav txog tej yam tsis zoo uas kuv raug thaum kuv tseem yau ces kuv txawm xav tias Yehauvas tsis txaus siab rau kuv thiab yuav tsis hlub kuv.” Tus muam Yua uas yog ib tug tho kev los kuj raug teeb meem ntau yam thaum yau thiab. Nws hais tias: “Kuv los ua kevcai raus dej rau qhov kuv xav ua haum Yehauvas siab. Txawm li ntawd los kuv pheej xav tias ntshe nws tsis hlub kuv li.”

3. Hauv zaj no peb yuav teb 2 lo lus nug twg?

³ Zoo ib yam li 2 tug muam no, koj yeej hlub Yehauvas tiamsis tej zaum koj ho xav tias xyov Nws puas yuav hlub koj tiag. Vim li cas thiaj tseem ceeb rau koj paub tias Yehauvas yeej hlub koj tiag? Thiab thaum koj xav hais tias Yehauvas  tsis hlub koj, koj yuav ua li cas? Zaj no peb yuav teb 2 lo lus nug no.

4. Vim li cas thiaj tsis zoo rau peb xav tias Yehauvas tsis hlub peb?

⁴ Qhov uas peb ntseeg tias Yehauvas hlub peb ntawd tseem ceeb heev. Rau qhov yog peb ntseeg tias Nws hlub peb ces peb yuav muaj siab zim thiab rau siab ntso teev tiam nws txawm hais tias peb yuav ntsib teeb meem li cas los xij. Tiamsis yog peb ntseeg tias Yehauvas tsis hlub peb ces peb yuav “tsis muaj zog” lossis tsis muaj siab teev tiam nws. (Pajlug 24:10) Qhov no yuav ua rau peb qaug zog thiab yuav yoojyim heev rau Xatas tawm tsam peb.​—Efexus 6:16.

5. Cov uas xav tias Yehauvas tsis hlub lawv, ua li cas rau lawv txojkev ntseeg?

⁵ Peb ib txhia kwvtij nkauj muam txojkev ntseeg tsuag lawm los twb yog vim lawv xav hais tias Yehauvas tsis hlub lawv. Ib tug txwj laus hu ua Ntsees (James) hais tias: “Txawm hais tias kuv ua haujlwm hauv Npe-ee thiab mus pab ib lub koom txoos uas hais lwm yam lus los kuv pheej xav tias xyov Yehauvas puas txaus siab rau tej uas kuv ua rau nws. Muaj ib lub caij kuv tseem xav tias xyov Yehauvas puas tseem mloog kuv tej lus thov thiab.” Tus muam Eva uas kuj ua haujlwm puv ntoob hais tias: “Kuv paub tias yeej tsis zoo rau peb xav tias Yehauvas tsis hlub peb. Yog peb xav li ntawd ces peb yuav tsis muaj siab thiab tsis xav ua ib yam dabtsi hlo li rau Yehauvas.” Mais Kaum (Michael) yog ib tug tho kev thiab ib tug txwj laus. Nws hais tias: “Yog koj pheej xav tias Yehauvas tsis hlub koj ces koj yuav txav deb zuj zus ntawm nws xwb.”

6. Thaum peb pib xav tias Yehauvas tsis hlub peb, peb yuav ua li cas?

⁶ Raws li peb pom ntawm cov kwvtij nkauj muam no, yog peb tsis ntseeg tias Yehauvas hlub peb ces tej zaum kuj yuav ua rau peb poob peb txojkev ntseeg los muaj thiab. Yog li ntawd, thaum peb pib xav tias Yehauvas tsis hlub peb, peb yuav ua li cas? Peb yuav tau tsum kiag tsis txhob xav li ntawd thiab thov Yehauvas pab kom peb ‘muaj kev kaj siab.’ (Filipis 4:6, 7) Thaum twg koj pib muaj tej kev xav tsis zoo, nco ntsoov tias Yehauvas cov tub qhe nimno thiab yav thaum ub los yeej muaj coob tus xav ib yam li koj xav thiab. Cia seb peb yuav kawm tau li cas los ntawm tus tubtxib Paulus.

7. Paulus ntsib tej teeb meem dabtsi?

⁷ Puas muaj tej thaud koj xav tias ua cas haujlwm yuav ntau ua luaj ua tsis tag li? Yog koj xav li no ces koj zoo ib yam li Paulus ntag. Nws tsis txhawj txog ib lub koom txoos xwb tiamsis nws “niaj hnub niaj hmo txhawj cov ntseeg uas nyob qhov txhia chaw.” (2 Kauleethaus 11:23-28) Koj puas muaj ib tug mob uas ua nyuaj rau koj teev tiam Yehauvas? Paulus hais tias nws “lub cev muaj ib qho mob” uas ua rau nws txom nyem heev uas nws xav kom ploj mus. (2 Kauleethaus 12:7-10) Puas muaj tej thaud koj tu siab rau koj tus kheej thiab? Paulus hais li no txog nws tus kheej: “Ua cas kuv yuav nyuaj siab ua luaj li?” Nws hais li ntawd los twb yog vim nws yuav tsum peem tiag nws thiaj ua tau qhov zoo.​—Loos 7:21-24.

8. Paulus ntsib ntau yam teeb meem tiamsis ua li cas nws ho teev tiam tau Yehauvas?

⁸ Txawm Paulus ntsib ntau yam teeb meem los nws yeej rau siab ntso teev tiam Yehauvas. Nws ua tau li ntawd los yog vim nws to taub zoo txog Yexus tus nqi txhiv thiab nco ntsoov Yexus cov lus cog tseg tias “tus uas ntseeg [Yexus], tus ntawd yuav tsis tuag, tiamsis yuav tau txojsia ntev dhawv mus ibtxhis.” (Yauhas 3:16; Loos 6:23) Paulus to taub tias tus nqi txhiv twb cawm nws dim nws tej kev txhaum lawm thiab nws ntseeg tias cov uas ua txhaum loj heev los yog lawv tso lawv txojkev txhaum tseg thiab thov Yehauvas zam txim rau lawv ces Yehauvas yeej yuav zam txim.​—Phau Ntawv Nkauj 86:5.

9. Paulus cov lus hauv Kalatias 2:20 qhia li cas rau peb?

⁹ Paulus kuj ntseeg tias Vajtswv hlub nws kawg Vajtswv thiaj xa Vajtswv tus Tub los tuag txhiv nws. (Nyeem Kalatias 2:20.) Paulus hais hauv nqi no tias: “Vajtswv tus Tub . . . hlub kuv thiab muab nws txojsia los txhiv kuv.” Nws hais li ntawd vim nws ntseeg tias Vajtswv yeej hlub nws tiag, nws thiaj tsis xav tias: ‘Kuv paub tias Vajtswv yeej hlub kuv cov kwvtij, tiamsis kuv tsis xav tias nws yuav hlub kuv.’ Paulus los kuj sau ntawv mus qhia cov kwvtij nyob hauv Loos tias: “Thaum peb tseem ua neeg txhaum Yexus Khetos tuag txhiv peb.” (Loos 5:8) Yog li ntawd yeej tsis muaj ib yam dabtsi yuav cais tau peb ntawm Vajtswv txojkev hlub.

10. Peb kawm tau li cas los ntawm Loos 8:38, 39?

¹⁰ Nyeem Loos 8:38, 39. Paulus ntseeg tias Vajtswv yeej hlub peb heev, nws thiaj hais  tias “yeej tsis muaj ib yam dabtsi cais tau peb ntawm Vajtswv txojkev hlub.” Paulus paub tias Yehauvas ua siab ntev npaum li cas rau haiv neeg Yixalayees. Thiab Paulus paub tias Yehauvas hlub thiab khuvleej nws heev. Twb yog vim li ntawd peb thiaj hais tau tias Paulus xav li no: ‘Yog Yehauvas twb xa nws tus Tub los tuag txhiv kuv ces kuv Yehauvas hlub kuv.’​—Loos 8:32.

11. Raws li 1 Timautes 1:12-15, Paulus ua phem kawg li ua ntej nws los paub Vajtswv tiamsis ua cas nws ho paub tias Vajtswv yeej hlub nws?

¹¹ Nyeem 1 Timautes 1:12-15. Muaj tej lub caij, tej zaum Paulus yeej tu siab thiab ntxhov siab rau tej uas nws ua yav tas los, nws thiaj li hais tias nws “yog tus muaj txim loj dua cov neeg uas muaj txim huv tibsi.” Vim rau qhov ua ntej nws los paub qhov tseeb, nws keev tsim txom cov Khixatia ib lub nroog rau ib lub, txhom lawv mus kaw, thiab nrog cov povthawj ua ib nqag thaum lawv muab cov Khixatia tua. (Tes Haujlwm 26:10, 11) Sim xav seb Paulus yuav ntxhov siab thiab tu siab npaum li cas yog nws ho mus ntsib cov tub hluas Khixatia uas lawv niam thiab lawv txiv raug tua vim Paulus ua ib nqag nrog cov povthawj. Tej Paulus ua yav tas los yeej phem kawg li thiab nws yeej tu siab heev tiamsis nws paub tias txawm li cas los yeej pab tsis tau lawm. Nws hais tias: “Vim Vajtswv txoj koob hmoov [lossis txojkev hlub], kuv thiaj tau ua ib tug timthawj.” (1 Kauleethaus 15:3, 10) Nws hais li no vim nws ntseeg tias Yexus tuag txhiv nws kom nws thiaj dim nws tej kev txhaum. Koj los yuav tsum ntseeg tias Yexus tuag txhiv koj thiab, koj thiaj muaj tau kev sib raug zoo nrog Yehauvas. (Tes Haujlwm 3:19) Tej peb ua txhaum yav tas los txawm thaum ntawd peb yog Yehauvas ib tug Timkhawv los tsis  yog, tsis tseem ceeb rau Yehauvas. Qhov tseem ceeb rau Yehauvas yog tej peb ua tam sim no thiab yav tom hauv ntej xwb.​—Yaxayas 1:18.

12. Cov lus hauv 1 Yauhas 3:19, 20 pab tau peb li cas thaum peb xav tias peb tsis muaj nuj nqis dabtsi thiab tsis tsim nyog leejtwg hlub peb?

¹² Thaum koj xav txog qhov uas Yexus tuag theej koj lub txhoj, tej zaum koj yuav xav tias: ‘Kuv twb tsis muaj nuj nqis, tsis tsim nyog kuv tau nws tus nqi txhiv.’ Twb yog vim peb zoo tsis tiav, muaj tej thaum peb lub siab thiaj xav tias peb tsis muaj nuj nqis thiab tsis tsim nyog leejtwg hlub peb. (Nyeem 1 Yauhas 3:19, 20.) Thaum twg peb pib xav li ntawd ces nco ntsoov tias “Vajtswv yog tus uas paub peb lub siab.” Nws txojkev hlub thiab kev zam txim ntau tshaj li qhov uas peb xav. Yog li ntawd tseem ceeb heev rau peb ntseeg tias Yehauvas yeej hlub thiab yuav zam txim rau peb. Tiamsis yuav kom peb ntseeg li no peb yuav tsum rau siab kawm Vajtswv Txojlus, thov nws tsis tseg, thiab nrog nraim Vajtswv cov neeg uas muab siab npuab nws.

13. Yog peb kawm Vajtswv Txojlus txhua hnub pab tau peb li cas? (Mus saib lub ntsiab me “ Vajtswv Txojlus Pab Tau Lawv Li Cas?”)

¹³ Kawm Vajtswv Txojlus txhua hnub koj thiaj yuav paub tias Yehauvas zoo li cas tiag thiab nws hlub koj npaum li cas. Thaum peb muab Vajtswv Txojlus los ua tib zoo xav yuav pab tau peb thaum peb xav “yuam kev.” (2 Timautes 3:16) Ib tug txwj laus hu ua Khev Veem (Kevin) uas keev xav tias nws tsis muaj nuj nqis dabtsi li hais tias: “Thaum kuv muab Phau Ntawv Nkauj 103 los ua tib zoo xav kuv thiaj to taub tias Yehauvas xav li cas txog kuv tiag.” Tus muam Eva uas peb tham tas los hais tias: “Kuv ua zoo xav txog tej uas tseem ceeb rau Yehauvas ua ntej kuv mus pw, thiaj txhawb tau kuv txojkev ntseeg thiab pab tau kuv muaj lub siab tus.”

14. Thaum peb thov Vajtswv pab tau peb li cas?

¹⁴ Thov Vajtswv tsis tseg. (1 Thexalaunikes 5:17) Peb cov phoojywg zoo yog cov uas peb niaj hnub nrog tham thiab cov uas peb tsis ntshai qhia dabtsi rau. Yog peb xav muaj kev sib raug zoo nrog Yehauvas los peb yuav tau ua ib yam li ntawd. Thaum peb thov Vajtswv es peb qhia nws txog tej peb xav hauv peb lub siab thiab peb tej kev txhawj xeeb ces twb yog peb tso siab rau nws thiab ntseeg tias nws hlub peb. (Phau Ntawv Nkauj 94:17-19; 1 Yauhas 5:14, 15) Tus muam Yua uas peb tham txog tas los hais tias: “Thaum kuv thov Vajtswv, kuv qhia nws txog tej uas kuv ntsib hnub ntawd thiab txhua yam uas nyob hauv kuv lub siab. Ntev mus ces kuv thiaj pom tias Yehauvas tsis zoo li ib tug los pav tiamsis nws yog ib Leej Txi uas hlub nws cov menyuam.”

15. Ua li cas peb thiaj paub hais tias Yehauvas hlub peb?

¹⁵ Nrog cov phoojywg uas muab siab npuab Vajtswv. Lawv yog cov uas Vajtswv muab los pab peb. (Yakaunpaus 1:17) Vim Yehauvas hlub tshua peb txhua leej txhua tus nws thiaj muab cov phoojywg uas “txawj sib hlub txhua lub sijhawm” rau peb. (Pajlug 17:17) Hauv Paulus tsab ntawv uas nws sau mus rau cov Kaulauxais, nws hais txog tus puav Khixatia uas pab nws los lawm hais tias lawv yog cov uas ‘txhawb nws lub zog.’ (Kaulauxais 4:10, 11, TT ) Txawm Yexus los nws yeej ris txiaj rau cov tubtxib saum ntuj thiab nws cov thwjtim hauv ntiajteb no uas yog nws cov phoojywg.​—Lukas 22:28, 43.

16. Cov phoojywg uas hlub Yehauvas yuav pab tau koj txav ze nws li cas?

 ¹⁶ Koj puas cia cov phoojywg hauv lub koom txoos pab koj? Thaum koj mus nrog ib tug phoojywg paub tab tham txog koj tej kev txhawj xeeb tsis yog tias koj tsis muaj kev ntseeg tiamsis qhov ntawd yuav tiv thaiv koj. Tus kwvtij Ntsees uas peb tham txog tas los hais tias: “Qhov uas kuv sib raug zoo nrog cov phoojywg uas hlub Yehauvas pab tau kuv ntau heev. Thaum kuv nyuaj siab ntxhov plawv, lawv ua siab ntev mloog thiab pab kuv. Lawv qhia rau kuv tias lawv hlub kuv. Lawv txojkev hlub pab kuv pom tias Yehauvas yeej hlub thiab tsom kwm kuv.” Vim li no thiaj tseem ceeb heev rau peb muaj kev sib raug zoo nrog cov kwvtij nkauj muam Khixatia uas paub tab.

17-18. Peb yuav tsum mloog leejtwg thiab yog vim li cas?

¹⁷ Xatas tsis xav kom peb ua li Vajtswv lub siab nyiam. Nws xav kom peb ntseeg tias Yehauvas tsis hlub peb thiab tsis tsim nyog nws cawm peb. Tiamsis Xatas dag xwb, tsis muaj tseeb li ntawd.

¹⁸ Yog li ntawd, tsis txhob ntseeg Xatas lossis koj lub siab uas hais rau koj tias Vajtswv tsis hlub koj. Tiamsis ntseeg tias Yehauvas yeej hlub koj thiab koj yeej muaj nuj nqis heev rau nws. Nws yeej pom qhov zoo uas koj muaj. Nws yeej “txaus siab heev rau nws haivneeg” thiab rau koj. Yog koj mloog nws lus ces koj yuav “nyob ruaj hauv nws txojkev hlub” mus ib txhis ib yam li Yexus!​—Yauhas 15:10, TT.