1. Nama utai ke ditemu Jehovah pasal nembiak Iya?

PETARA JEHOVAH “gaga ati ke nembiak Iya.” (Mas. 149:4) Ayat tu nunjukka Jehovah rinduka kitai. Jehovah nemu kualiti manah sereta penau kitai, lalu Iya deka kitai semak enggau Iya. Enti kitai mengkang tetap ati ngagai Iya, Iya deka mengkang semak ngagai kitai belama iya!—Jhn. 6:44.

2. Nama kebuah sekeda menyadi Kristian tusah deka pechaya Jehovah rinduka sida?

² Sekeda engka madah, ‘Aku nemu Jehovah rinduka bala nembiak Iya. Tang baka ni aku ulih pechaya Jehovah ngumbai aku berega?’ Nama utai ke ngasuh seseiku orang nanya tanya baka nya? Oksana, * ke kala napi utai ti enda manah lebuh iya agi biak, madahka: “Aku amat gaga ati lebuh aku dibaptisa lalu berengkah nyadi pengerintis. Tang 15 taun pengudah nya, aku berengkah ingatka utai ti enda manah ke kala nyadi lebuh aku agi biak. Aku berengkah berunding, Jehovah enda nerima aku agi. Lalu aku ngasaika enda layak dikerinduka Iya.” Yura, seiku pengerintis indu ke bisi penanggul lebuh iya agi biak madahka: “Aku nyerahka pengidup aku ngagai Jehovah ketegal aku deka ngasuh Iya gaga ati. Tang aku pechaya Iya enda sayauka aku.”

3. Nama utai ke deka dikerandauka kitai ba artikel tu?

³ Baka dua iku menyadi indu ke disebut tadi, nuan mega amat rinduka Jehovah. Tang nuan engka berasai kakang ati sekalika Iya rinduka nuan tauka enda. Nama kebuah nuan patut andal Iya amat ibuhka nuan? Lalu nama  ulih nulung nuan lebuh nuan berunding Jehovah enda rinduka nuan? Aram kitai berandauka saut ngagai tanya tu.

4. Nama kebuah enda manah kakang ati pasal pengerindu Jehovah ke kitai?

⁴ Pengerindu amat bekuasa. Lebuh kitai andalka Jehovah rinduka kitai, kitai deka nyembah Iya enggau naka ulih, taja pan pengidup kitai amat tusah. Tang enti kitai kakang ati pasal Petara ibuhka kitai, ‘pengering kitai deka lenyau.’ (J-lam. 24:10, NWT) Lalu lebuh kitai asa ati sereta berengkah ngumbai Petara enda rinduka kitai, kitai deka tusah nyeliahka diri ari serang Sitan.—Eps. 6:16.

5. Nama nyadi ngagai sekeda menyadi ke ngumbai Petara enda rinduka sida?

⁵ Sekeda ari bala menyadi kitai berengkah berunding, Jehovah enda rindu sereta ibuhka sida. Nya ngasuh pengarap sida nyadi lemi. Tuai gempuru ke benama James madah: “Aku gawa ba Betel sereta nulung ba eklisia ke ngena bansa jaku bukai. Taja pan aku gaga ati, tang aku berunding sekalika Jehovah nerima utai ti digaga aku ke Iya. Indah bisi sekali, aku berunding sekalika Jehovah ningaka sampi aku.” Eva, ke gawa penuh jam ke Jehovah mega madahka: “Aku sedar enti kitai ngumbai Jehovah enda rinduka kitai, nya ulih ngenusahka. Tu mai empas ngagai pengawa ke dikereja kitai ke Jehovah. Tu ngasuh kitai deka ngetu ngereja utai ke Petara lalu lenyau pengaga ati nyembah Iya.” Michael, seiku pengerintis biasa enggau tuai gempuru madahka: “Enti nuan enda arapka Petara ibuhka nuan, nuan deka belubah-lubah ninggalka Iya.”

6. Nama utai ke patut digaga kitai lebuh kitai berengkah ngumbai Petara enda rinduka kitai?

⁶ Peneleba ke dipadah tadi nunjukka enti kitai ngumbai Jehovah enda rinduka kitai, tu ulih ngerusakka pengarap kitai. Tang nama utai ke patut dikereja kitai lebuh kitai berengkah berunding Jehovah enda rinduka kitai? Kitai patut nulak runding ke baka nya enggau jampat! Minta Jehovah nulung nuan nukar runding nya enggau ‘pemaik Petara, ti deka nyaga ati enggau runding kitai.’ (Plp. 4:6, 7) Lalu kingatka, nuan enda  kediri! Bisi bala menyadi Kristian ke bukai ti napi asai ati ti enda manah. Indah bala nembiak Jehovah kelia menya mega napi penanggul ke baka tu. Peratika utai ke ulih dipelajarka kitai ari teladan rasul Paul.

7. Nama penanggul ke ditapi Paul?

⁷ Kati nuan bisi mayuh tanggung pengawa lalu nuan ngasaika tusah deka nembuka semua pengawa nya? Enti baka nya, nuan ulih meretika Paul. Iya berasai irau ukai semina ke siti eklisia, tang “ke semua eklisia.” (2 Kor. 11:23-28) Kati nuan napi penyakit raya ke ngasuh nuan lenyau pengaga ati? Paul mega bisi “penyakit” lalu iya keran deka digeraika. (2 Kor. 12:7-10) Kati nuan berasai asa ati ketegal pengelemi diri? Kekadang Paul mega ngasaika nya. Iya madah: “Naka meh penusah aku tu!” Tu ketegal iya seruran belaban enggau pengelemi diri.—Rom. 7:21-24.

8. Nama nulung Paul betan napi penanggul iya?

⁸ Taja pan Paul patut betan napi semua penanggul tu, iya terus nyembah Jehovah. Nama meri iya pengering ngereja nya? Taja pan iya nemu pengelemi diri, iya bisi pengarap ti besai ba tebus. Iya nemu semaya Jesus ke madah, “genap iku orang ke arapka [Jesus] . . . bulih pengidup ti meruan belama iya.” (Jhn. 3:16; Rom. 6:23) Au, Paul bisi pengarap ba tebus. Iya pechaya Jehovah sedia deka ngampun, indah sida ke ngereja dosa ti besai enti sida nesal ati.—Mas. 86:5.

9. Nama ulih dipelajarka kitai ari jaku Paul ba Galatia 2:20?

⁹ Paul bisi pengarap Petara rinduka iya laban iya nemu Petara udah nganjung Jesus nyerahka nyawa diri ke iya. (Bacha Galatia 2:20.) Peratika jaku ba pengujung ayat nya. Paul madah: ‘Anak Petara . . . rinduka aku lalu udah nyerahka diri ketegal aku.’ Paul enda ngasaika diri amat jai nyentukka Jehovah enda ulih rinduka iya. Iya enda berunding: ‘Aku nemu kebuah Jehovah rinduka bala menyadi Kristian ke bukai. Tang Iya engka enda rinduka aku.’ Paul ngingatka orang Kristian di Rome: “Lebuh kitai agi nyadi orang ke bedosa, Kristus mati ngarika kitai!” (Rom. 5:8) Au, nadai utai ulih nagang Petara ari rinduka kitai!

10. Nama ulih dipelajarka kitai ari Rome 8:38, 39?

 ¹⁰ Bacha Rome 8:38, 39. Paul nemu pemesai pengerindu Petara. Iya nulis, nadai utai ‘ulih nyeraraka kitai ari pengerindu Petara.’ Paul nemu Jehovah udah ngayanka pengeliat ati ngagai bansa Israel. Iya mega nemu Jehovah udah ngayanka pengasih ngagai iya. Nya alai, kitai ulih madah Paul bisi runding ke baka tu: ‘Laban Jehovah udah nganjung Anak Iya empu mati ke aku, kati aku bisi kebuah kakang ati Iya rinduka aku?’—Rom. 8:32.

11. Taja pan Paul udah ngereja penyalah baka ke ditulis ba 1 Timoti 1:12-15, nama kebuah iya andal Petara rinduka iya?

¹¹ Bacha 1 Timoti 1:12-15. Paul engka kala berasai besalah lebuh iya ngenang baru utai ke kala digaga iya sebedau nyadi orang Kristian. Iya madahka diri “orang ke pemadu jai” ari semua orang ke bedosa. Nama kebuah? Sebedau iya nemu pemendar, iya merinsaka orang Kristian ari siti nengeri ngagai nengeri bukai, nangkap lalu muai sekeda ngagai rumah jil, indah ngundi lebuh kot mutuska deka meri ukum bunuh ngagai orang Kristian nya. (SKR. 26:10, 11) Tentu mega, bisi sekeda ari nembiak ke nadai agi apai indai ketegal Paul ngemendarka apai indai nya dibunuh. Diatu uji gambarka baka ni asai ati Paul lebuh betemu enggau anak nya. Paul tentu berasai besalah enggau penyalah ke udah digaga iya. Tang iya nemu, iya enda ulih ngubah utai ke udah nyadi. Iya pechaya Jesus udah mati ke iya lalu enggau andal nulis: ‘Ulih pengasih Petara, aku nyadi aku ke diatu.’ (1 Kor. 15:3, 10) Nama ulih dipelajarka kitai? Pechaya meh, Jesus udah mati ke nuan. Ketegal nya, nuan tau  ngembuan kaul ti rapat enggau Jehovah. (SKR. 3:19) Ba Jehovah, utai ti beguna nya, utai ke dikereja kitai diatu sereta ke jemah ila, ukai penyalah ke udah digaga kitai suba, enda ngira enti maya nya kitai seiku ari Saksi-Saksi Jehovah tauka enda.—Isa. 1:18.

12. Baka ni jaku ba 1 John 3:19, 20 ulih nulung kitai enti kitai ngasaika diri nadai guna tauka enda dikerindu?

¹² Lebuh nuan berunding pasal Jesus mati ke dosa nuan, nuan engka ngumbai, ‘Aku enda layak nerima pemeri ti berega tu.’ Nama kebuah nuan ngasai baka nya? Ati ulih nipu kitai, ngasuh kitai berasai nadai guna, tauka enda dikerinduka. (Bacha 1 John 3:19, 20.) Maya nya, kitai patut ingat ‘Petara besai agi ari ati kitai.’ Indah enti kitai ngasaika Jehovah enda rinduka kitai, tauka enda ngampunka kitai, Apai ti di serega tetap rinduka kitai, sereta deka ngampun kitai. Kitai patut andalka diri empu dikerinduka Jehovah. Kena ngereja tu, kitai patut belajarka Jaku Iya ninting hari, seruran besampi ngagai Iya, lalu seruran begulai enggau orang ke nyembah Iya. Nama kebuah amat beguna kitai ngereja semua utai tu?

13. Baka ni belajarka Bup Kudus nulung kitai? (Peda mega kutak “ Baka ni Bup Kudus Nulung Sida?”)

¹³ Belajarka Bup Kudus ninting hari, lalu nuan ulih mereti enggau dalam pasal kualiti Jehovah. Nuan ulih nemu Iya amat sayauka nuan. Belematika Bup Kudus ninting hari ulih nulung nuan berunding enggau dalam, “ngaduka utai ti salah” ba runding enggau ati nuan. (2 Tim. 3:16) Tuai gempuru ke benama Kevin, ke enda entu andalka diri, madahka: “Macha sereta belematika Masmur 103 nulung aku ngemetulka runding sereta nemu runding Jehovah pasal aku.” Eva, ke dipadah tadi madahka: “Sebedau aku tinduk, aku belematika runding Jehovah. Tu ulih meri ati ti lantang sereta negapka pengarap aku.”

14. Baka ni sampi ulih nulung kitai?

¹⁴ Seruran besampi. (1 Tes. 5:17) Lebuh nuan deka bekaban enggau seiku orang, nuan patut seruran berandau enggau iya, lalu madahka asai ati nuan ngagai iya. Sama mega kaul kitai enggau Jehovah. Lebuh kitai madahka asai ati, runding, sereta pengirau kitai ngagai Iya dalam sampi, tu nunjukka kitai andalka Iya sereta nemu Iya rinduka kitai. (Mas. 94:17-19; 1 Jhn. 5:14, 15) Yura, ke dipadah tadi madahka: “Lebuh aku besampi, aku ukai semina madahka utai ke nyadi ba aku sehari nya. Tang aku madah ngagai Jehovah pasal runding sereta asai ati aku ti bendar. Nyau kelama  aku ulih meda Jehovah nya baka Apai ke rinduka anak, ukai baka tuke ba kompeni besai.”—Peda kutak “ Kala Nuan Macha Bup tu?”

15. Baka ni Jehovah nunjukka pengibuh ngagai kitai?

¹⁵ Begulai enggau kaban ti tetap ati; sida pemeri ari Jehovah. (Jas. 1:17) Apai kitai ti di serega ngayanka pengibuh enggau meri bala menyadi Kristian ke “seruran ngayanka pengerindu.” (J-lam. 17:17) Ba surat Paul ngagai orang Kristian ba Kolosi, iya madahka pasal sida ke nyukung iya. Iya madah sida “udah ngelantangka ati” iya. (Kol. 4:10, 11) Indah Jesus Kristus begunaka peransang lalu beterima kasihka sukung ke diterima iya ari bala kaban nyengkaum melikat enggau mensia.—Luk. 22:28, 43.

16. Baka ni kaban ti tetap ati ulih nulung kitai semak ngagai Jehovah?

¹⁶ Kati nuan ngiga tulung ari bala menyadi Kristian? Lebuh kitai berandau enggau bala kaban ke tegap ba pengarap pasal pengirau kitai, tu ukai reti nya pengarap kitai lemi, tang tu ulih nyaga kitai. Peratika James, ke disebut tadi madahka: “Bisi kaban ti tegap ba pengarap udah mayuh nulung aku lebuh aku bisi runding ti enda manah. Bala kaban mendingka aku enggau sabar, lalu ngingatka aku, sida rinduka aku. Nengah sida, aku ulih ngasaika Jehovah rindu sereta ibuhka aku.” Nya alai, amat beguna kitai ngembuan kaul ti rapat enggau bala menyadi Kristian!

17-18. Sapa ke patut didinga nuan, lalu nama kebuah?

¹⁷ Sitan enggai kitai ngereja utai ti betul. Iya deka kitai pechaya, Jehovah enda rinduka kitai, lalu kitai enda layak diselamatka. Tang baka ke udah dikerandauka kitai, semua utai tu bula.

¹⁸ Jehovah amat rinduka nuan. Nuan amat berega ba mata Iya. Enti nuan ngasika Iya, nuan deka “meruan dalam pengerindu Iya” baka Jesus. (Jhn. 15:10) Nya alai, anang mendingka Sitan tauka ati nuan ti nemu ngakal. Tang dingaka meh Jehovah ke ulih meda utai ti manah ba tiap iku kitai. Andal meh, Iya “gaga ati ke nembiak Iya,” nyengkaum nuan!