1. Kuzê ki Jeová sabe sobri se povu?

JEOVÁ DEUS ‘ta fika kontenti ku se povu’. (Sal. 149:4) Nu ta fika txeu kontenti di sabe kel-li! Jeová ta odja nos kualidadi, el konxe nos kapasidadi i el ta djuda-nu ser se amigu. I si nu kontinua fiel pa Jeová, el ta bira nos amigu pa tudu ténpu! — João 6:44.

2. Pamodi ki otus algen pode atxa difísil di kridita ma Jeová ta ama-s?

² Alguns algen talvês ta fla: ‘N sabe ma Jeová ta ama tudu se povu. Má modi ki N pode ten sertéza ma el ta ama-m?’ Pamodi ki alguns ta duvida di kel-li? Oksana *, ki sufri txeu kantu el éra mininu, fla: “Kantu N batiza, N fika txeu kontenti i N kumesa ta sirbi di pionera. Má dipôs di 15 anu, lenbransa di kes kuza mariadu ki kontise ku mi kantu mi éra mininu, kumesa ta tormenta-m. N txiga ti di pensa ma Jeová ka sta kontenti ku mi más i ma N ka mereseba se amor.” Yua, ki é un pionera ki tanbê tevi txeu prubléma kantu el éra mininu, fla: “N da nha vida pa Jeová pamodi N krê pa el fikaba kontenti. Má N tinha sertéza ma Jeová nunka ka ta ben amaba mi.”

3. Kuzê ki nu sta ben odja na kel studu li?

³ Sima kontise ku kes dôs irman ki dja nu pâpia di es, bu pode ten un amor fórti pa Jeová, má bu ten dúvida si el ta ama-u. Na kel studu li, nu sta ben odja respósta di kes dôs pergunta li: Pamodi ki bu meste ten sertéza ma Jeová ta ama-u? I kuzê ki ta djuda-u vense kes pensamentu mariadu?

4. Pamodi ki é prigozu nu ten dúvida ma Jeová ta ama-nu?

⁴ Amor é un forsa ki ten txeu puder i ki ta pô-nu ta aji. Si nu ten sertéza ma Jeová ta ama-nu i ma el ta apoia-nu, kel-li ta djuda-nu sirbi-l di tudu korason sikrê ku prublémas ki nu ta pasa pa el. Má si nu ta atxa ma Deus ka ta preokupa ku nos, nos ‘forsa ta fika poku.’ (Pro. 24:10) I óras ki nu fika dizanimadu i nu perde nos fé na amor di Deus, ta fika más fásil pa nu kai na armadilhas di Satanás. — Efé. 6:16.

5. Kuzê ki kontise ku alguns irmon pamodi es fika ku dúvida ma Jeová ta ama-s?

⁵ Dúvida poi fé di alguns irmon ta bira fraku. Un ansion ki txoma James, fla: “N staba ta sirbi na Betel i ta apoia un kongregason di língua stranjeru. Má, N kumesa ta duvida si Deus staba ta seta nha sirvisu ki N ta fazeba pa el. N txiga ti di pergunta: ‘Jeová sta ta obi nhas orason?’” Eva, ki tanbê sta na sirvisu pa ténpu interu konta: “N ta atxa ma ten dúvida di amor di Jeová é prigozu, pamodi kel-li sô ta pô-u más pa baxu. Kel-li ta pô-u ta ten poku interesi pa kuzas spritual i ta xinti poku alegria na bu sirvisu pa Jeová.” Michael, ki é pioneru fíksu i ansion, fla: “Si bu ka ta kridita ma Deus ta preokupa ku bo, bu pode kumesa ta afasta di el.”

6. Óras ki nu kumesa ta ten dúvida ma Jeová ta ama-nu, kuzê ki nu debe faze?

⁶ Kuzê ki kontise ku kes irmon li, ta mostra ma nos fé pode bira fraku si nu ten dúvida ma Jeová ta ama-nu. Má kuzê ki nu pode faze, si nu kumesa ta pensa si? Nu ten ki tra kel pensamentu di kabésa kel óra! Pidi Jeová pa djuda-u troka kes pensamentu ki sta inkomoda-u pa kel ‘pas di Deus ki ta guarda bu korason i bus pensamentu’. (Sal. 139:23; nóta di rodapé; Fil. 4:6, 7) I lenbra, bu ka sta bo sô. Otus irmon ku irmans tanbê sta luta pa vense sentimentus mariadu. Ti mésmu kes sérvu di Jeová di ténpu antigu, tevi ki lida ku es dizafiu. Nu ben odja kuzê ki nu pode prende ku izénplu di apóstlu Polu.

7. Ki prublémas Polu tevi ki lida ku el?

⁷ Di vês en kuandu bu ta xinti ma bu tene txeu responsabilidadi i bu ta atxa  difísil di kuida di tudu es? Nton, bu ta konsigi ntende situason di Polu. El ta xintiba txeu preokupason ka sô pamodi un kongregason, má pamodi ‘tudu kongregasons.’ (2 Cor. 11:23-28) Bu ten un prubléma di saúdi ki ta tra-u bu alegria? Polu tevi ki lida ku un ‘spinhu na karni’, talvês un prubléma di saúdi ki pô-l ta sufri txeu. Polu tinha gana di fikaba sen kel prubléma la. (2 Cor. 12:7-10) Bus inperfeson ta pô-u ta xinti dizanimadu? Alvês Polu tanbê ta xintiba asi. El fla ma el éra un ‘ómi mizeriadu’ pamodi el staba sénpri ta luta kóntra se inperfesons. — Rom. 7:21-24.

8. Kuzê ki djuda Polu lida ku se prublémas?

⁸ Polu pasa pa situasons ki pô-l na próva i ki dizanima-l, má el kontinua ta sirbi Jeová. Modi ki el atxa forsa pa faze kel-li? Nbóra Polu sabia ma el éra inperfetu, el tinha un fé fórti na resgati. Tanbê el konxeba kel promésa di Jizus ma ‘tudu kel ki mostra fé na [Jizus] ta ten vida pa tudu ténpu.’ (João 3:16; Rom. 6:23) Di sertéza Polu tinha fé na resgati. El staba konvensidu ma Jeová tene gana púrdua ti mésmu kes ki faze pekadu gravi, má ki rapende. — Sal. 86:5.

9. Kuzê ki nu ta prende di kes palavra di Polu na Gálatas 2:20?

⁹ Polu tanbê ta kriditaba ma Deus ta amaba el pamodi el sabia ma Deus manda Jizus pa móre pa el. (Lé Gálatas 2:20.) Odja kes palavra di Polu ki ta anima-nu na fin di kel versíklu li: ‘Fidju di Deus ki ama-m i ntrega se kabésa pa mi.’ Polu ka ta atxaba ma amor di Deus éra sô pa alguns algen. El ka ta pensaba: ‘É fásil di ntende pamodi ki Jeová ta ama nhas irmon, má nunka el ka ta konsigi ama-m.’ Polu lenbra kes irmon na Roma di kel-li: ‘Kristu móre pa nos timenti nos éra pekador.’ (Rom. 5:8) Amor ki Jeová ten pa nos ka ten limiti!

10. Kuzê ki Romanos 8:38, 39, ta inxina-nu?

¹⁰ Lé Romanos 8:38, 39. Polu tinha tudu sertéza ma Deus ta amaba el txeu. El skrebe ma nada ‘ka ta konsigi sipara-nu di amor di Deus’. Polu sabia ma Jeová tevi txeu paxénxa ku kes israelita. I tanbê el ta lenbraba modi ki Jeová mostra-l mizerikórdia. Na verdadi éra kel-li ki Polu krê flaba: ‘Si Jeová manda se Fidju pa móre pa mi, N ka ten ninhun motivu pa N ten dúvida ma el ta ama-m.’ — Rom. 8:32.

11. Nbóra 1 Timóteo 1:12-15 ta pâpia di alguns kuza mariadu ki Polu fazeba, pamodi ki el tinha sertéza ma Jeová ta amaba el?

 ¹¹ Lé 1 Timóteo 1:12-15. Pode ser ki Polu ta xintiba kasábi óras ki el ta pensaba na kes kuza ki el faze antis di el bira kriston. É pur isu ki el fla ma el éra un di kes prinsipal pekador. Antis di el konxe verdadi, Polu ta pirsigiba kristons na un sidadi tras di kel otu. El poi txeu di es na prizon i ti el konkorda pa mata otus kriston. (Atos 26:10, 11) Dja bu imajina modi ki Polu pode xintiba si el nkontraba ku un jóven kriston ki fika órfu pamodi el? Di sertéza el ta xintiba uma kasábi. Polu dja rapendeba di kes kuza mariadu ki el fazeba. Má el ka podia fazeba nada pa mudaba pasadu. El seta ma Kristu móre pa el. Polu skrebe: ‘Pamodi kel bondadi di Deus ki ka meresedu ami é kel ki mi é.’ (1 Cor. 15:3, 10) Kuzê ki nu ta prende? Seta ma Kristu móre pa bo i pamodi kel-li bu ta pode ten un amizadi fórti ku Jeová. (Atos 3:19) Talvês bu ta xinti kulpadu pa un kuza mariadu ki bu fazeba antis ô ti mésmu dipôs ki bu bira un Tistimunha di Jeová. Lenbra ma pa Jeová é ka kes kuza mariadu ki nu faze na pasadu ki ta nporta, má é kel ki nu sta faze gósi i ki nu ta ben faze na futuru. — Isa. 1:18.

12. Si nu ta xinti ma nu ka ten valor ô nu ta atxa ma nu ka merese amor di Jeová, modi ki 1 João 3:19, 20 pode djuda-nu?

¹² Óras ki bu ta pensa ma Jizus móre pa nos pekadu, talvês bu ta fla: ‘N ta atxa ma N ka merese es prezenti di grandi valor.’ Kuzê ki bu pode faze si bu xinti si? Nos korason inperfetu pode ngana-nu i pô-nu ta pensa ma nu ka ten ninhun valor ô ma nu ka merese amor di Jeová.  (Lé 1 João 3:19, 20.) Óras ki nu kumesa ta pensa asi, nu meste lenbra ma ‘Deus é más grandi di ki nos korason’. Amor i perdon di nos Pai na Séu é mutu más fórti di ki kalker sentimentu negativu ki nu ta ten. Nu meste prende seta ma Jeová ta ama-nu. Pa kel-li, nu ten ki studa Palavra di Deus sénpri, kontinua ta faze orason pa el i seta tudu ajuda ki nos irmons ta da-nu. Pamodi ki é inportanti faze kes kuza li?

13. Modi ki studa Bíblia pode djuda-nu? (Tanbê odja kuadru “ Modi ki Palavra di Deus djuda-s”.)

¹³ Studa Palavra di Deus tudu dia. Asi bu ta prende kada bês más txeu sobri kes kualidadi bunitu di Jeová. Bu ta fika ta ntende modi ki el ta ama-u txeu. Midita na un párti di Palavra di Deus tudu dia, pode djuda-u koriji bu manera di pensa ô ‘poi kuzas na kaminhu’ na bu menti i na bu korason. (2 Tim. 3:16) Un ansion ki txoma Kevin i ki tinha poku kunfiansa na se kabésa i ki ta lutaba kóntra kel sentimentu li, fla: “Lé Salmo 103 i midita na el, djuda-m poi kabésa na lugar i ntende kuzê ki Jeová ta pensa di mi di verdadi.” Eva, ki dja nu papiaba di el antis fla: “Na fin di dia, sénpri N ta tra un ténpu pa midita na kuzê ki é inportanti pa Jeová. Kel-li ta da-m pas na nha korason i ta omenta nha fé.”

14. Modi ki orason ta djuda-nu?

¹⁴ Faze orason sénpri. (1 Tes. 5:17) Si nu krê ten un amizadi fórti ku un algen, nu meste pâpia ku el sénpri i fla-l modi ki nu sta xinti. Ta kontise mésmu kuza ku nos amizadi ku Jeová. Óras ki nu ta faze orason pa Jeová ta konta-l kuzê ki nu ta pensa, modi ki nu sta xinti i sobri nos preokupason, nu sta ta mostra ma nu ta kunfia na el i ma nu sabe ma el ta ama-nu. (Sal. 94:17-19; 1 João 5:14, 15) Yua, ki dja nu papiaba di el antis, fla: “Óras ki N ta faze orason, N ka ta konta Jeová sô kes kuza ki N faze na kel dia. N ta abri nha korason pa Jeová i N ta konta-l modi ki N sta xinti di verdadi. Poku-poku, N sta prende odja Jeová ka sima dónu di un inpréza grandi, má sima un Pai ki ta ama se fidjus di verdadi.” — Odja kuadru “ Dja bu lé kel livru li?”

15. Modi ki Jeová ta mostra ma el ta preokupa ku kada un di nos?

¹⁵ Seta tudu ajuda ki irmons ta da-u. Es é un prezenti ki Jeová da-nu. (Tia. 1:17) Nos Pai na Séu ta mostra ma el ta preokupa ku kada un di nos, pamodi el da-nu un família spritual di irmons ku irmans ki ta mostra amor ‘tudu óra’. (Pro. 17:17) Na se karta pa kes kriston na Kolosus,  Polu pâpia di alguns kriston ki djudaba el. Polu fla ma es éra un ‘fonti di grandi konsolu’. (Col. 4:10, 11) Ti mésmu Jizus ta mesteba di ajuda di se amigus. El fika gratu pa ajuda ki anjus i pesoas li na Téra da-l. — Luc. 22:28, 43.

16. Modi ki nos irmons pode djuda-nu ten un amizadi más fórti ku Jeová?

¹⁶ Bu sta djobe i bu sta seta tudu ajuda ki irmons ta da-u? Si bu konta un irmon ki ten más spiriénsa modi ki bu sta xinti, kel-li é ka un sinal di frakéza. Pode ser un proteson pa bo. Odja izénplu di James ki dja nu papiaba di el antis. El fla: “Ten un bon amizadi ku kes irmon ki ten más spiriénsa sta ta djuda-m txeu. Óras ki N ta xinti dizanimadu pamodi kes sentimentu mariadu, kes amigu li ki ten txeu valor pa mi, ta obi-m ku paxénxa i es ta fla-m ma es ta ama-m. Jeová sta uza-s pa mostra-m ma el ta preokupa ku mi i ma el ta ama-m di verdadi.” É txeu inportanti nu dizenvolve i mante un amizadi fórti ku nos irmons i irmans!

17-18. Na kenha ki nu debe kridita i pamodi?

¹⁷ Satanás krê pa bu dizisti di luta pa faze kel ki é dretu. El krê pa bu kridita ma Jeová ka ta ama-u i ma bu ka merese salvason. Má sima dja nu odja tudu kes kuza li é sô mintira.

¹⁸ Jeová ta ama-u txeu. Si bu obi ku el, bu ta ‘kontinua na se amor’ pa tudu ténpu sima Jizus. (João 15:10) Pur isu, ka bu kridita na Satanás nen na bu korason óras ki el ta kondena-u. Envês di kel-li, kridita na Jeová ki ta odja kes bon kualidadi ki nu ten. Bu pode ten sertéza ma ‘Jeová ta fika kontenti ku se povu’ i ku bo tanbê!