DISOLO YA KULONGUKA 17
Yehowa Ke Zolaka Nge Mingi
“Yehowa ke zolaka bantu na yandi.”—NK. 149:4.
NKUNGA 108 Zola ya Kwikama ya Nzambi
MAMBU YINA DISOLO YAI KE TUBILA *
Tata na beto ya zulu “ke zolaka” konso muntu na kati na beto (Tala paragrafe 1)
1. Inki Yehowa ke monaka na bansadi na yandi?
YEHOWA NZAMBI “ke zolaka bantu na yandi.” (Nk. 149:4) Yo ke pesaka beto kiese mingi. Yehowa ke monaka bikalulu na beto ya mbote. Yandi ke zabaka nde beto lenda kuma bantu ya mbote mpi yandi ke sadisaka beto na kukuma banduku na yandi. Kana beto ke bikala ya kwikama na yandi, yandi ta landa kuvanda nduku na beto mvula na mvula.—Yoa. 6:44.
2. Sambu na nki bampangi ya nkaka ke ndimaka ve nde Yehowa ke zolaka bo?
2 Bampangi ya nkaka lenda tuba nde: ‘Mono me zaba nde Yehowa ke zabaka bansadi na yandi yonso kansi nki lenda ndimisa mono nde Yehowa ke zolaka mono kibeni?’ Inki lenda pusa muntu na kudiyula mutindu yai? Mpangi-nkento Oksana * kutanaka ti bampasi mingi ntangu yandi vandaka mwana-fioti. Yandi ke tuba nde: “Mono vandaka na kiese mingi ntangu mono bakaka mbotika mpi ntangu mono kumaka mupasudi-nzila. Kansi bamvula 15 na nima, mono yantikaka kuyindula mambu ya mbi yina kuminaka mono ntangu mono vandaka mwana-fioti. Mono monaka nde Yehowa ta ndima mono ve mpi nde yandi ke zolaka mono ve.” Mpangi-nkento Yua kele mupasudi-nzila; yandi kutanaka mpi ti bampasi ntangu yandi vandaka mwana-fioti. Yandi ke tuba nde: “Mono kudipesaka na Yehowa sambu mono vandaka kuzola kusepedisa yandi. Kansi mono vandaka kuyindula nde Yehowa ta zola mono ve ata fioti.”
3. Inki beto ta tadila na disolo yai?
3 Bonso bampangi zole ya kwikama yina beto me tubila, nge ke zolaka Yehowa mingi kansi bantangu ya nkaka, nge lenda ndima ve nde Yehowa ke zolaka nge. Sambu na nki nge fwete ndima kibeni nde Yehowa ke zolaka nge? Inki lenda sadisa nge ntangu nge ke yindula nde Yehowa ke zolaka nge ve? Beto tadila ntangu yai bamvutu na bangiufula yai.
KUNDIMA VE NDE YEHOWA KE ZOLAKA NGE KELE KIGONSA
4. Sambu na nki yo kele kigonsa kana beto ke ndima ve nde Yehowa ke zolaka beto?
4 Zola ke pusaka beto na kusala mambu mingi. Kana beto ke ndima kibeni nde Yehowa ke zolaka beto mpi ke sadisaka beto, beto ta landa kusadila yandi na ntima ya mvimba ata ntangu beto ke kutana ti bampasi. Kansi kana beto ke ndima ve nde Nzambi ke zolaka beto, ‘ngolo na beto ta vanda fioti.’ (Bing. 24:10) Kana beto me lemba nitu mpi ke ndima ve nde Nzambi ke zolaka beto, beto ta nunga ve Satana.—Baef. 6:16.
5. Inki kuminaka bampangi ya nkaka yina ndimaka ve nde Nzambi ke zolaka bo?
5 Bubu yai, Bakristu ya nkaka ya kwikama ke ndimaka ve nde Yehowa ke zolaka bo mpi yo me lembisaka lukwikilu na bo. Mpangi James yina kele nkuluntu ke tuba nde: “Ata mono vandaka kusala na Betele mpi mono vandaka na dibundu ya ndinga ya nzenza, mono vandaka kudiyula kana Yehowa vandaka kibeni kusepela ti kisalu na mono. Nkutu bantangu ya nkaka mono yantikaka kudiyula kana Yehowa vandaka kuwa bisambu na mono to ve.” Mpangi Eva yina kele na dibuta ya Betele ke tuba nde: “Mono bakisaka nde yo kele kigonsa na kuyindula nde Yehowa ke zolaka beto ve sambu yo ta sala nde beto sadila ve Yehowa mbote. Yo ta sala nde beto yambula kusadila Yehowa mpi beto sadila yandi ve na kiese.” Mpangi Michael yina kele mupasudi-nzila ya ntangu yonso mpi nkuluntu ke tuba nde: “Kana nge ke ndima ve nde Nzambi ke zolaka nge, yo ta sala nde nge vila nzila ya kukwenda pene-pene na yandi.”
6. Inki beto fwete sala kana beto me kuma kuyindula nde Nzambi ke zolaka beto ve?
6 Mambu yina bampangi me tuba ke monisa nde kana beto ke yindula nde Yehowa ke zolaka beto ve, yo lenda bebisa kimpeve na beto. Ebuna nki beto fwete sala kana beto me kuma kuyindula nde Nzambi ke zolaka beto ve? Beto fwete katula bangindu yina nswalu. Samba Yehowa sambu yandi sadisa nge na kukatula ‘bangindu yina ke yangisa’ nge mpi nge yingisa yo na ‘ngemba ya Nzambi yina ta tanina ntima na nge mpi mabanza na nge.’ (Nk. 139:23; Bafil. 4:6, 7) Kuvila ve nde nge kele ve nge mosi. Bampangi ya nkaka ya kwikama ke nwanaka mpi ti bangindu ya mbi. Ata bansadi ya Yehowa ya ntangu ya ntama mpi vandaka kunwana mpi ti bangindu ya mutindu yai. Beto tadila malongi yina beto lenda baka na mbandu ya ntumwa Polo.
MALONGI YINA BETO KE BAKA NA MBANDU YA POLO
7. Inki bampasi Polo kutanaka ti yo?
7 Keti nge ke mona nde nge kele ti mikumba mingi mpi nge ke kuka ve kulungisa yo? Kana yo kele mutindu yina, mbandu ya Polo ta sadisa nge. Yandi vandaka kudiyangisa sambu na bampangi ya ‘mabundu yonso.’ (2 Bak. 11:23-28) Keti nge ke belaka maladi yina ke manaka ve mpi yina ke manisaka nge kiese? Polo vandaka ti maladi yina vandaka kumana ve yina yandi bingaka nde “nsende na nsuni.” Yo ke monana nde maladi yai vandaka kuniokula yandi mingi mpi yandi vandaka na mfunu nde yo mana. (2 Bak. 12:7-10) Keti bifu na nge ke lembisaka nge nitu? Bantangu ya nkaka, Polo mpi vandaka kulemba nitu sambu na bifu na yandi. Yandi kudibingaka nde “muntu ya mawa kibeni” sambu yandi vandaka kusala yonso sambu na kusala mambu ya mbote.—Bar. 7:21-24.
8. Inki sadisaka Polo na kukanga ntima na bampasi?
8 Ata Polo kutanaka ti mambu mingi ya mpasi, yandi landaka kaka kusadila Yehowa. Inki sadisaka yandi? Ata yandi zabaka mbote bifu na yandi, yandi vandaka kukwikila na kimenga ya Yezu. Yandi zabaka mpi mbote mambu yai ya Yezu tubaka: ‘Konso muntu yina ke monisa lukwikilu na Yezu ta baka luzingu ya mvula na mvula.’ (Yoa. 3:16; Bar. 6:23) Ya kieleka, Polo monisaka lukwikilu na kimenga ya Yezu. Yandi ndimaka kibeni nde Yehowa ke lolulaka na luzolo yonso muntu yina me sala disumu ya nene kana yandi me balula ntima.—Nk. 86:5.
9. Mambu yina Polo tubaka na Bagalatia 2:20 ke longa beto nki?
9 Polo ndimaka nde Nzambi ke zolaka yandi mingi kibeni sambu yandi zabaka nde Nzambi tindaka Yezu na kufwa sambu na yandi. (Tanga Bagalatia 2:20.) Beto tala bangogo ya ke pesa kikesa ya kele na nsuka ya verse yai. Polo tubaka nde: “Mwana ya Nzambi . . . zolaka mono mpi fwaka sambu na mono.” Polo yindulaka ve nde yandi vandaka muntu ya mbi kibeni mpi nde Nzambi lenda zola yandi ve ata fioti. Yandi tubaka ve nde, ‘Mono me bakisa sambu na nki Yehowa ke zolaka bampangi na mono kansi yandi ke zola mono ve.’ Polo songaka Bakristu ya Roma nde: “Ntangu beto vandaka ntete bansumuki, Kristu fwaka sambu na beto.” (Bar. 5:8) Ata kima mosi ve lenda kanga Nzambi nzila ya kuzola beto.
10. Inki dilongi beto ke baka na mambu yina kele na Baroma 8:38, 39?
10 Tanga Baroma 8:38, 39. Polo vandaka kundima kibeni nde Nzambi ke zolaka beto. Yandi tubaka nde: “Ata kima mosi ve ta kuka kukabula beto na zola ya Nzambi.” Polo zabaka nde Yehowa monisilaka bantu ya dikanda ya Izraele ntima-nda. Yandi zabaka mpi nde Yehowa wilaka yandi mawa. Na kutuba ya nkaka, Polo zolaka kutuba nde: ‘Sambu Yehowa tindaka Mwana na yandi na kufwa sambu na mono, keti yo ke monisa ve nde yandi ke zolaka mono?’—Bar. 8:32.
Diambu ya mfunu sambu na Nzambi kele mambu yina beto ke sala bubu yai mpi na bilumbu ke kwisa kansi ve bifu yina beto salaka bilumbu me luta (Tala paragrafe 11) *
11. Ata Polo salaka masumu mu mbandu yina 1 Timoteo 1:12-15 ke tubila, sambu na nki yandi ndimaka nde Nzambi vandaka kuzola yandi?
11 Tanga 1 Timoteo 1:12-15. Yo ke monana nde Polo waka mpasi kibeni ntangu yandi yindulaka mambu ya mbi yina yandi salaka na ntwala ya kukuma Mukristu. Yo ke yitukisa ve mutindu yandi kudibingaka, “muntu ya ntete” yina salaka disumu. Na ntwala ya kukuma Mukristu, Polo vandaka kuniokula Bakristu na bambanza mingi, yandi vandaka kutula bankaka na boloko mpi yandi ndimaka nde bo fwa Bakristu ya nkaka. (Bis. 26:10, 11) Ntembe kele ve nde Polo zolaka kuwa mpasi mingi kana yandi kutana ti leke mosi ya Mukristu yina bo fwaka bibuti na yandi sambu na Polo. Polo waka mpasi mingi sambu na bifu na yandi ya ntama kansi yandi zabaka nde yandi lendaka kusoba yo ve. Yandi ndimaka nde Kristu fwaka sambu na yandi mpi yandi sonikaka nde: “Sambu na ntima ya mbote ya nene ya Nzambi, mono kele mutindu mono kele.” (1 Bak. 15:3, 10) Inki dilongi beto ke baka? Ndima nde Kristu fwaka sambu na nge mpi pesaka nge dibaku ya kuvanda ti kinduku ya mbote ti Yehowa. (Bis. 3:19) Diambu ya mfunu sambu na Nzambi kele mambu yina beto ke sala bubu yai mpi na bilumbu ke kwisa kansi ve bifu yina beto salaka na bilumbu me luta, yo vanda beto vandaka Bambangi ya Yehowa to ve.—Yez. 1:18.
12. Inki mutindu mambu yina kele na 1 Yoane 3:19, 20 lenda sadisa beto ntangu beto ke yindula nde beto kele mfunu ve?
12 Mutindu nge ke zaba nde Yezu fwaka sambu na masumu na nge, nge lenda tuba nde: ‘Mono me fwana ve sambu na kubaka dikabu yai ya mfunu mingi.’ Sambu na nki nge lenda yindula mutindu yai? Ntima na beto lenda kusa beto mpi yo lenda pusa beto na kuyindula nde beto kele mfunu ve mpi nde ata muntu mosi ve ke zolaka beto. (Tanga 1 Yoane 3:19, 20.) Kana beto ke kudiwa mutindu yai, beto fwete vila ve nde “Nzambi kele nene kuluta bantima na beto.” Beto fwete ndima nde Tata na beto ya zulu ke landaka kuzola beto mpi yandi ke lolulaka beto. Beto fwete ndimisa mpi ntima na beto nde Yehowa ke zolaka beto. Sambu na kusala yo, beto fwete longuka Ndinga na yandi mbala na mbala, beto fwete samba yandi mbala na mbala mpi kuvukana mbala na mbala ti bansadi na yandi ya kwikama. Sambu na nki kusala mutindu yai kele mfunu mingi?
MUTINDU KULONGUKA BIBLIA, KISAMBU MPI BANDUKU YA MBOTE LENDA SADISA BETO
13. Inki mutindu kulonguka Ndinga ya Nzambi ke sadisaka beto? (Tala mpi lupangu “ Mutindu Ndinga ya Nzambi Ke Sadisaka Bo.”)
13 Kana nge ke longuka Ndinga ya Nzambi konso kilumbu, nge ta bakisa bikalulu ya mbote ya Yehowa. Nge ta bakisa nde yandi ke zolaka nge mingi. Kana nge ke yindulula Ndinga ya Nzambi konso kilumbu, yo ta sadisa nge na kusoba bangindu mpi banzala na nge ya mbi. (2 Tim. 3:16) Mpangi Kevin yina kele nkuluntu mpi yina yindulaka nde yandi kele mfunu ve ke tuba nde: “Ntangu mono tangaka Nkunga 103 mpi yindululaka mambu yina yo ke tubaka, yo sadisaka mono na kubakisa bangindu ya mbote yina Yehowa ke vandaka na yo sambu na mono.” Mpangi Eva yina beto me tubila ke tuba nde: “Na nsuka ya kilumbu, mono ke yindulaka mambu ya mfunu sambu na Yehowa. Yo ke pesaka mono ngemba ya mabanza mpi yo ke kumisaka lukwikilu na mono ngolo.”
14. Inki mutindu kisambu lenda sadisa beto?
14 Samba ntangu yonso. (1 Bate. 5:17) Kana nge ke zola kukuma nduku ya mbote ya muntu mosi, nge fwete solula ti yandi mbala na mbala mpi na masonga yonso. Yo kele mutindu mosi mpi sambu na kinduku na beto ti Yehowa. Kana beto ke songa yandi mutindu beto ke kudiwa, bangindu na beto mpi mambu yina ke yangisa beto, beto ta monisa nde beto ke tudilaka yandi ntima mpi nde beto me zaba nde yandi ke zolaka beto. (Nk. 94:17-19; 1 Yoa. 5:14, 15) Mpangi Yua yina beto me tubila ke tuba nde: “Ntangu mono ke sambaka Yehowa, mono ke songaka yandi ve kaka mambu yina me salama na kilumbu yina kansi mono ke songaka yandi bangindu na mono mpi mutindu mono ke kudiwa. Malembe-malembe, mono me bakisaka nde Yehowa kele Tata yina ke zolaka kibeni bana na yandi kansi yandi kele ve bonso mfumu mosi ya kompani yina ke bakaka kaka balukanu.”—Tala lupangu “ Keti Nge Me Tangaka Yo?”
15. Inki mutindu Yehowa ke monisaka nde yandi ke zolaka beto?
15 Vukana ti banduku ya mbote; bo kele dikabu yina Yehowa me pesaka beto. (Yak. 1:17) Tata na beto ya zulu ke monisaka nde yandi ke zolaka beto mutindu yandi me pesaka beto bampangi ya dibuta ya kimpeve yina ke “zolaka konso ntangu.” (Bing. 17:17) Na mukanda yina Polo sonikilaka Bakolosai, yandi tubilaka Bakristu yina sadisaka yandi mpi tubaka nde bo ‘lembikaka yandi mingi.’ (Bakol. 4:10, 11) Kristu Yezu mpi monisaka ntonda sambu na lusadisu yina banduku na yandi pesaka yandi, yo vanda ya bawanzio mpi ya bantu.—Luka 22:28, 43.
16. Inki mutindu banduku ya mbote ke sadisaka beto na kukuma banduku ya ngolo ya Yehowa?
16 Keti nge ke sosaka mpi ke ndimaka lusadisu yina bampangi ke pesaka nge? Yo kele mbi ve na kusonga mpangi mosi ya kuyela na kimpeve mambu yina ke yangisa beto sambu yandi lenda sadisa beto. Mpangi James yina beto me tubila ke tuba nde: “Kuta kinduku ti Bakristu ya kuyela na kimpeve me sadisaka mono mingi. Ntangu bangindu ya mbi ke kwisilaka mono, bampangi yai ke widikilaka mono ti ntima nda yonso mpi bo ke songaka mono nde bo ke zolaka mono. Ntangu bo ke salaka mutindu yina, yo ke sadisaka mono na kubakisa nde Yehowa ke zolaka mono mpi ke kebaka mono.” Yo kele kibeni mfunu nde beto vanda ti kinduku ya mbote ti bampangi.
BIKALA NA ZOLA YA YEHOWA
17-18. Beto fwete widikila nani mpi sambu na nki?
17 Satana ke zolaka nde beto yambula kusala bikesa sambu na kusala mambu ya mbote. Yandi ke sosaka kundimisa beto nde Yehowa ke zolaka beto ve mpi nde beto me fwana ve sambu Yehowa kugulusa beto. Mambu yai yonso kele luvunu.
18 Yehowa ke zolaka nge. Nge kele mfunu mingi na meso na yandi. Kana nge ke lemfukila yandi, nge ta ‘bikala na zola na yandi’ mvula na mvula bonso Yezu. (Yoa. 15:10) Yo yina, kundima ve mambu yina Satana ke tubaka mpi mambu ya mbi yina ntima na nge ke yindulaka. Kansi ndima mambu yina Yehowa ke tubaka sambu yandi ke monaka bikalulu ya mbote yina konso muntu ke vandaka ti yo. Ndima kibeni nde Yehowa “ke zolaka bantu na yandi” ti nge mpi.
NKUNGA 141 Kimangu ya Luzingu
^ par. 5 Bampangi ya nkaka ke ndimaka ve nde Yehowa ke zolaka bo. Na disolo yai, beto ta tadila mambu yina ta ndimisa beto nde Yehowa ke zolaka konso muntu na kati na beto. Beto ta tadila mpi mambu yina beto lenda sala ntangu beto ke ndima ve nde Yehowa ke zolaka beto.
^ par. 2 Beto me soba bazina ya nkaka.
^ par. 67 NTENDULA YA BIFWANISU: Na ntwala nde Polo kukuma Mukristu, yandi tulaka Bakristu mingi na boloko. Kansi ntangu yandi zabaka mambu yina Yezu salaka sambu na yandi, yandi sobaka mpi pesaka Bakristu ya nkaka kikesa. Mbala ya nkaka, bankaka na kati ya Bakristu yango vandaka bampangi ya Bakristu yina yandi niokulaka.
