1. Jehova oha konenene shike moshiwana shaye?

JEHOVA KALUNGA “okwa hokwa oshiwana shaye.” (Eps. 149:4) Osho ihashi tu hafifa tuu neenghono! Jehova oha tale komaukwatya etu mawa. Oku shii okudula kwetu nohe tu nanene kuye. Ngeenge otwa kala ovadiinini kuye, ota ka kala kaume ketu fiyo alushe. — Joh. 6:44.

2. Omolwashike hashi kala shidjuu kuvamwe okwiitavela kutya Jehova oku va hole?

² Vamwe otashi dulika va tye: ‘Ondi shii kutya Jehova oku hole oshiwana shaye shi li ongudu, ndele mbela ongahelipi handi dulu okukala noushili kutya oku hole nge pauhandimwe?’ Oshike tashi dulika hashi ningifa vamwe va pule epulo olo? Oksana, * oo a mona oixuna neenghono eshi a li okaana, okwa ti: “Onda li nda hafa neenghono eshi nda ninginifwa nonda hovela okukokola ondjila. Ashike konima yomido 15, onda li nda hovela okudimbuluka oinima ii oyo nda li nda ningilwa eshi ndi munini. Onda li nda fika pexulifodiladilo kutya Jehova ina hokwa nge vali noinandi wana okuulikilwa ohole kuye.” Yua, omumwameme omukokolindjila, oo naye a li a shakeneka omaupyakadi mahapu eshi a li munini, okwa ti: “Onda li nde liyapulila Jehova onghalamwenyo yange aishe, molwaashi onda hala oku mu hafifa. Ashike onda li nda tomhwa kutya ke na efiku a kale e hole nge.”

3. Oshike hatu ka kundafana moshitukulwa eshi?

³ Ngaashi ovamwameme ovadiinini ovo va tumbulwa, naave otashi dulika u hole Jehova neenghono, ashike owa limbililwa ngeenge oku ku hole ngoo. Omolwashike wa pumbwa okukala wa tomhwa kutya oku na ko nasha naave shili? Oshike tashi dulu oku ku kwafela ngeenge to diladila kutya  Jehova ke ku hole? Natu ka kundafaneni omanyamukulo omapulo oo.

4. Omolwashike sha nyika oshiponga okukala hatu diladila kutya Kalunga ke tu hole?

⁴ Ohole oyo hai linyengifa Jehova a ninge keshe shimwe. Ngeenge otwa tomhwa kutya Jehova oku tu hole nohe tu yambidida, ohatu ke mu longela nomutima aushe, kashi na nee mbudi kutya otwa taalela omashongo a tya ngahelipi. Kakele kaasho, ngeenge otwa limbililwa kutya Kalunga okwa fa ehe na ko nasha nafye, ‘eenghono detu otadi ka ninipala.’ (Omayel. 24:10) Nongeenge otwa teka omukumo nokukanifa eitavelo mohole yaKalunga, ohatu ka ninga oihakanwa yomaponokelo aSatana. — Ef. 6:16.

5. Oshike sha ningilwa vamwe ovo hava diladila kutya Jehova ke va hole?

⁵ Ovakriste vamwe ovadiinini vopefimbo letu ova nghundipala pamhepo omolwomalimbililo. Omukulunhuongalo wedina James okwa ti: “Nonande onda li handi longo koBetel nohandi hafele oukalele meongalo lelaka loshinailongo, onda kala nda limbililwa ngeenge Jehova okwa lenga ngoo omaliyambo ange. Pomhito imwe, onda li nda limbililwa ngeenge Jehova oha pwilikine ngoo komailikano ange.” Eva, oo naye e li moilonga yefimbo li yadi, okwa ti: “Onda mona kutya osha nyika oshiponga okukala wa limbililwa ohole yaJehova, molwaashi ohashi ku shunifa pedu pamhepo neenghono. Osho ohashi ningifa omunhu uha kale u na ohokwe moinima yopamhepo nouha kale wa hafa eshi to longele Jehova.” Michael, oo e li omukokolindjila wondjikilile nomukulunhuongalo, okwa ti: “Ngeenge ino itavela kutya Kalunga oku na ko nasha naave, ohashi ku ehenifa kokule naye.”

6. Oshike twa pumbwa okuninga ngeenge ohatu diladila kutya Kalunga ke tu hole?

⁶ Oimoniwa oyo otai ulike nghee sha nyika oshiponga okukala tu na omadiladilo mai hashi tu kumu pamhepo. Ndele mbela oshike tu na okuninga ngeenge otwa hovele okudiladila kutya Jehova ke tu hole? Otwa pumbwa okuhenuka meendelelo okudiladila ngaho. Pula Jehova e ku kwafele u pingene po ‘omadiladilo mai,’ ‘nombili yaKalunga oyo i dule eendunge adishe otai ka amena omutima nomadiladilo oye.’ (Eps. 139:23; Fil. 4:6, 7) Dimbuluka kutya haave auke ho diladila ngaho. Ovamwatate novamwameme vamwe ovadiinini navo otava kondjo nomadiladilo mai. Nokuli novapiya vaJehova vopefimbo lonale ova li va taalela omashongo a tya ngaho. Natu ka taleni osho hatu lihongo koshihopaenenwa shomuyapostoli Paulus.

7. Paulus okwa li a taalela omaupyakadi elipi?

⁷ Mbela omafimbo amwe oho kala u udite wa wililwa po koinakuwanifwa ihapu, nou wete ito dulu oku i wanifa po aishe? Ngeenge osho, oto ka uda ko onghalo yaPaulus. Okwa li e na oshisho, hasheongalo ashike limwe, ndele ‘oshomaongalo aeshe.’ (2 Kor. 11:23-28) Mbela ou na ouyahame wa kwata moiti, oo hau ku nyemateke? Paulus okwa li ha kala ta ningilwa nai ‘kekiya mombelela,’ olo tashi dulika la li ouyahame wopalutu nokwa li ha kala a hala e li kufwe. (2 Kor. 12:7-10) Mbela oho kala wa teka omukumo omolwokuhawanenena kwoye? Paulus osho kwa li ha kala e udite ngaho omafimbo amwe. Okwa li e liifana ye mwene kutya oku li “omulunde a shiya ko,” molwaashi okwa li ha kala ta kondjo noudiinini opo a longe osho shiwa. — Rom. 7:21-24.

8. Oshike sha kwafela Paulus a dule okuungaunga nomaupyakadi aye?

⁸ Paulus okwa twikila okulongela Jehova, nonande okwa li a taalela omaupyakadi e lili noku lili nokwa li ha kala a teka omukumo. Oshike she mu pameka a dule okuninga ngaho? Nonande okwa li e shii kutya ina wanenena, okwa li e na eitavelo la kola mekuliloyambo. Okwa li e shii nawa eudaneko laJesus olo tali ti kutya ‘keshe ou ta itavele Jesus ota ka mona omwenyo waalushe.’ (Joh. 3:16; Rom. 6:23) Paulus okwa li umwe womwaavo ve na eitavelo mekuliloyambo. Okwa li a tomhwa kutya Jehova okwe lilongekida okudimina po ovanhu, nokuli naavo va nyona omanyono a kwata moiti ngeenge ove livele ombedi shili. — Eps. 86:5.   

9. Oshike hatu lihongo meendjovo daPaulus odo tadi hangwa mOvagalati 2:20?

⁹ Paulus okwa kala e na eitavelo kutya Jehova oku mu hole neenghono, molwaashi okwa li a tuma Jesus e mu file. (Lesha Ovagalati 2:20.) Natu ka taleni eshilipaleko olo pexulilo lovelishe oyo. Paulus okwa ti: ‘Omona waKalunga oku hole nge nokwe liyandja ponhele yange.’ Paulus ka li a diladila kutya Kalunga ke mu hole. Ile a diladile kutya: ‘Ondi shii kutya Jehova oku hole ovamwatate, ashike otashi dulika ame ke hole nge.’ Paulus okwa dimbulukifa Ovaroma a ti: ‘Fimbo twa li natango ovalunde okwa yandja Kristus e tu file.’ (Rom. 5:8) Ohole yaKalunga yoku tu hola inai ngabekwa.

10. Oshike hatu lihongo mOvaroma 8:38, 39?

¹⁰ Lesha Ovaroma 8:38, 39. Paulus okwa li a tomhwa filufilu kutya Kalunga oku mu hole neenghono. Okwa shanga kutya kape na osho tashi “dulu oku tu tukula mohole yaKalunga.” Paulus okwa li e shii nghee Jehova a li a ungaunga nelididimiko noshiwana shaIsrael. Okwa li yo e shii nghee Jehova e mu ulikila onghenda. Oku shi  ngonga pauxupi, Paulus okwa li a hala okutya: ‘Ngeenge Jehova okwa tuma Omona waye a file nge, osha yela kutya oku hole nge.’ — Rom. 8:32.   

11. Omolwashike Paulus a li e na oushili kutya Kalunga oku mu hole nonande okwa li a ninga omanyono ngaashi oo a tumbulwa mu 1 Timoteus 1:12-15?

¹¹ Lesha 1 Timoteus 1:12-15. Otashi dulika Paulus a li ha kala e udite nai ngeenge ta diladila koinima ii oyo a ninga monakudiwa. Nomolwaasho a li e liifana ye mwene kutya oku li “omulunde a shiya ko.” Ofimbo Paulus a li ina shiiva oshili, okwa li a hepeke Ovakriste moilando noilando, a tulifa vamwe modolongo nokuyambidida etokolo lomhangu lokudipaifa vamwe. (Oil. 26:10, 11) Diladila nghee Paulus a li ha kala e udite ngeenge a shakeneka Omukriste omunyasha, oo ovadali vaye a dipaifa! Paulus okwa li e livela ombedi omolwomapuko aye, ashike nande ongaho okwa li e shii kutya ita dulu okulundulula onakudiwa yaye. Okwa li a dimina kutya Kristus okwe mu fila nokwa popya nomukumo a ti: “Ondi li omuyapostoli omolwefilonghenda laKalunga.” (1 Kor. 15:3, 10) Oshilihongomwa kufye oshilipi? Dimina kutya Kristus okwe ku fila nokwe shi ningifa tashi shiiva opo u dule okukala u na ekwatafano lopofingo elela naJehova. (Oil. 3:19) Osho sha fimana kuKalunga, oshosho hatu dulu okuninga paife nosho yo monakwiiwa, ndele hamapuko oo twa ninga monakudiwa, kutya nee pefimbo opo otwa li Eendombwedi, ile hasho. — Jes. 1:18.

12. Ongahelipi eendjovo odo tadi hangwa mu 1 Johannes 3:19, 20 tadi tu kwafele ngeenge otu udite tuhe na oshilonga, ile tuhe holike?

¹² Ngeenge owa diladila kutya Jesus okwa fya omolwoye, otashi dulika u tye: ‘Inandi wana okupewa oshali oyo ye likalekelwa.’ Omolwashike to dulu okukala u udite ngaho? Omutima wetu inau wanenena otau dulu oku tu pukifa noku tu diladilifa kutya katu na oshilonga noinatu wana okukala tu holike. (Lesha 1 Johannes 3:19, 20.) Ngeenge otwa kwatwa kediladilo  la tya ngaho, otwa pumbwa okudimbuluka kutya “Kalunga oku dule omitima detu.” Nonande otashi dulika tu diladile kutya Jehova ke tu hole, ile ita dulu oku tu dimina po, Tate yetu womeulu oku tu hole natango note ke tu dimina po. Otwa pumbwa okukala twa tomhwa kutya Jehova oku tu hole. Opo tu ninge ngaho, otwa pumbwa okukala hatu konakona Eendjovo daye pandjikilile, hatu ilikana nokukala hatu endafana noshiwana shaye shidiinini. Omolwashike sha fimana okuninga oinima oyo?

13. Okukonakona Eendjovo daKalunga ohaku tu kwafele ngahelipi? (Tala oshimhungu “ Nghee Eendjovo daKalunga de va kwafela.”)

¹³ Okukonakona Eendjovo daKalunga efiku keshe otashi ke ku kwafela u mone omaukwatya mahapu mawa aJehova. Oto ka mona kutya oku ku hole neenghono. Ngeenge owa kala ho dilonga kOmbiibeli efiku keshe, otashi ke ku kwafela ‘u yukife oinima’ momadiladilo nomomutima woye. (2 Tim. 3:16) Omukulunhuongalo wedina Kevin, oo a kala e udite ehe na oshilonga efimbo lile, okwa ti: “Okulesha Epsalme 103 nokudilonga kulo osha kwafela nge ndi kale handi diladila koinima iwa nondi mone kutya Jehova okwa tya naanaa ngahelipi.” Eva, oo a tumbulwa metetekelo, okwa ti: “Ohandi dilonga alushe pexulilo lefiku shi na sha nanghee Jehova ha diladila. Osho ohashi kwafele nge ndi kale nombili yopamadiladilo nohashi pameka eitavelo lange.”

14. Eilikano ohali tu kwafele ngahelipi?

¹⁴ Okwiilikana pandjikilile. (1 Tes. 5:17) Oukaume wovanhu ohau kala wa kanghamena kokukwatafana pandjikilile nokulombwelafana tashi di komutima nghee ve udite. Osho osha faafana filufilu noukaume wetu naJehova. Ngeenge ohatu mu lombwele meilikano omaliudo etu, osho hatu diladila naasho hatu lipula nasho, kungaho ohatu ulike kutya otwe mu lineekela notu shii kutya oku tu hole. (Eps. 94:17-19; 1 Joh. 5:14, 15) Yua, oo a popiwa metetekelo, okwa ti: “Ngeenge handi ilikana, ihandi lombwele ashike Jehova oinima oyo nda shakeneka mefiku. Ohandi mu lombwele osho handi diladila, naasho ndi udite. Onda mona kutya Jehova ke li ngaashi omunambelewa omukulunhu wehangano lonhumba, ndele oku li Tate, oo e hole shili ovana vaye.” — Tala oshimhungu “ Mbela embo olo owe li lesha ngoo?”

15. Jehova okwa ulika ngahelipi kutya oku na ko nasha nafye?

¹⁵ Kala ho endafana nookaume ovadiinini, molwaashi ove li oshali ya dja kuJehova. (Jak. 1:17) Tate yetu womeulu okwa ulika kutya oku na ko nasha nafye eshi e tu pa ovamwatate novamwameme, ovo have tu ulikile “ohole alushe.” (Omayel. 17:17) Monhumwafo oyo Paulus a shangela Ovakolossi, okwa tumbula mo omadina Ovakriste vonhumba, ovo ve mu yambidida nokwa popya kutya ove mu ‘hekeleka neenghono.’ (Kol. 4:10, 11) Nokuli naKristus Jesus okwa li a pumbwa nokwa pandula ekwafo olo a li a pewa  kookaume kaye, kutya nee okovaengeli, ile okovanhu. — Luk. 22:28, 43.

16. Ookaume ovadiinini ohave tu kwafele ngahelipi tu ehene popepi elela naJehova?

¹⁶ Mbela oho mono ngoo ouwa pauyadi moshali oyo twa pewa kuJehova yookaume ovadiinini? Ngeenge hatu lombwele kaume a pyokoka osho hatu lipula nasho itashi ulike kutya otu vanghundi, ndele ohashi tu amene. James, oo a popiwa pehovelo, okwa ti: “Okupanga oukaume nOvakriste va pyokoka osha kwafela nge neenghono. Ngeenge nda wililwa po komadiladilo mai, ookaume kange ohava pwilikine kwaame nelididimiko nokulombwela nge kutya ove hole nge. Onda mona kutya Jehova oku hole nge pauhandimwe noku na ko nasha naame okupitila muvo.” Inashi fimana tuu okupanga nokukaleka po oukaume novamwatate novamwameme!

17-18. Olyelye tu na okupwilikina kuye, nomolwashike?

¹⁷ Satana okwa hala tu sholole, opo tuha longe osho shiwa. Okwa hala tu dimine kutya Jehova ke tu hole nokatu na oshilonga. Ndele ngaashi twa mona, osho kashi fi shoshili nandenande.

¹⁸ Jehova oku ku hole nou na ondilo momesho aye. Ngeenge owa kala ho dulika kuye, ota ka kala ‘e ku hole’ fiyo alushe, ngaashi ashike e hole Jesus. (Joh. 15:10) Onghee hano, ino pwilikina kuSatana, ile komutima woye ngeenge to diladila kutya Jehova ke ku hole. Ponhele yaasho, pwilikina kuJehova, oo e shii omaukwatya mawa akeshe umwe womufye. Kala wa tomhwa kutya “okwa hokwa oshiwana shaye,” naave wa kwatelwa mo.