တၢ်မၤလိ ၁၇
ယဟိဝၤယွၤ ပာ်လုၢ်ပာ်ပှ့ၤနၤ
“ဘၣ်ယွၤအသးလၢ အပှၤဂီၢ်မုၢ်လီၤ.”—စံးထီၣ်ပတြၢၤ ၁၄၉:၄.
တၢ်သးဝံၣ် ၁၀၈ ယွၤအတၢ်အဲၣ်လၢအတီ
တၢ်မၤလိအံၤ အတၢ်တိာ်ပာ် *
ပပၢ်လၢမူခိၣ် “အသးအိၣ်” ပဝဲတဂၤစုာ်စုာ်လီၤ (ကွၢ်လံာ်အဆၢ ၁)
၁. ယဟိဝၤယွၤထံၣ် အပှၤဂီၢ်မုၢ်ဒ်လဲၣ်.
ယဟိဝၤယွၤဘၣ် “အသးလၢ အပှၤဂီၢ်မုၢ်လီၤ.” (စံးထီၣ်ပတြၢၤ ၁၄၉:၄) တၢ်ကတိၤအံၤ မၤသးခုပသးဒိၣ်မးလီၤ. ယဟိဝၤယွၤထံၣ်ဝဲ ပတၢ်ဂ့ၤတၢ်ဝါ, ပတၢ်ဂုာ်ကျဲးစၢး ဒီးအမၤစၢၤပှၤလၢ ပကကဲထီၣ်အတံၤသကိးလီၤ. ပမ့ၢ်သးတီဒီးအီၤန့ၣ် အဝဲကအိၣ်ဘူးဒီးပှၤ ထီဘိလီၤ.—ယိၤဟၣ် ၆:၄၄.
၂. ဘၣ်မနုၤအဃိ ပှၤတနီၤဆိကမိၣ်ဝဲလၢ ယဟိဝၤယွၤတအဲၣ် အဝဲသ့ၣ်ဘၣ်လဲၣ်.
၂ ဘၣ်သ့ၣ်သ့ၣ် ပှၤတနီၤတဲဝဲလၢ ‘ယသ့ၣ်ညါလၢ ယဟိဝၤယွၤအဲၣ်ဝဲ အပှၤဂီၢ်မုၢ်ဒီတဒူၣ်လီၤ. ဘၣ်ဆၣ် ယဟိဝၤယွၤအဲၣ်ယၤအနီၢ်ကီၢ်န့ၣ် ယသ့ၣ်ညါအီၤကသ့ဒ်လဲၣ်.’ ဘၣ်မနုၤအဃိ ပှၤတနီၤသံကွၢ်ဝဲ တၢ်သံကွၢ်ဒ်အံၤလဲၣ်. ဖဲဒီပုၢ်ဝဲၢ်မုၣ်အိးစၤနၤ * အနီၢ်ဆံးခါန့ၣ် အထံၣ်ဘၣ်ဒီး တၢ်လၢအမၤဘၣ်ဒိ အသူၣ်အသးလီၤ. ဒီးအတဲဝဲလၢ “ဖဲယဒိးဘျၢထံဒီး စးထီၣ်မၤပှၤလဲၤလၢညါအခါ ယသးခုဒိၣ်မး. ဘၣ်ဆၣ် ၁၅ နံၣ်ဝံၤအလီၢ်ခံ ယနီၣ်ဘၣ်က့ၤ တၢ်ကဲထီၣ်သးဒီးယၤ လၢယနီၢ်ဆံးခါလီၤ. အဃိ ယဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးယၤလၢၤဘၣ် ဒီးယတကြၢးဒီး အတၢ်အဲၣ်လၢၤဘၣ်.” ဒီပုၢ်ဝဲၢ်မုၣ်ယူအၤ လၢအမၤပှၤလဲၤလၢညါ ဒီးဖဲအနီၢ်ဆံးခါန့ၣ် အတၢ်အိၣ်မူပှဲၤဒီး တၢ်ကီတၢ်ခဲတဖၣ်စ့ၢ်ကီးလီၤ. အတဲဝဲလၢ “ယဟ့ၣ်လုၢ်ထီၣ်သးလၢ ယဟိဝၤယွၤအအိၣ်န့ၣ် မ့ၢ်လၢယအဲၣ်ဒိး မၤသးခုအသးအဃိလီၤ. ဘၣ်ဆၣ် ယနာ်နီၢ်နီၢ်လၢ အဝဲတအဲၣ်ယၤ နီတဘျီဘၣ်.”
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၃ ဒ်ဒီပုၢ်ဝဲၢ်မုၣ်ခံဂၤအံၤအသိး နၤစ့ၢ်ကီး နကအဲၣ်ယဟိဝၤယွၤ သပှၢ်ကတၢၢ်လီၤ. ဘၣ်ဆၣ် နတနာ်လၢ ယဟိဝၤယွၤအဲၣ်နၤဘၣ်. ဘၣ်မနုၤအဃိ နကဘၣ်နာ်လၢ ယဟိဝၤယွၤသူၣ်အိၣ်သးအိၣ်နၤ အနီၢ်နီၢ်လဲၣ်. ဖဲနဆိကမိၣ်လၢ ယဟိဝၤယွၤ တအဲၣ်နၤဘၣ်အခါ တၢ်မနုၤကမၤစၢၤနၤလဲၣ်. ပကတဲသကိး တၢ်သံကွၢ်တဖၣ်အံၤ အတၢ်စံးဆၢလီၤ.
ပမ့ၢ်ဆိကမိၣ်လၢ ယဟိဝၤယွၤတအဲၣ်ပှၤဘၣ်န့ၣ် အလီၤဘၣ်ယိၣ်ဒိၣ်မး
၄. ပမ့ၢ်ဆိကမိၣ်လၢ ယဟိဝၤယွၤတအဲၣ်ပှၤဘၣ်န့ၣ် ဘၣ်မနုၤအဃိ အလီၤဘၣ်ယိၣ်ဝဲလဲၣ်.
၄ တၢ်အဲၣ်န့ၣ် အစိကမီၤဒိၣ်မးလီၤ. ပမ့ၢ်နာ်သပှၢ်တၢၢ်လၢ ယဟိဝၤယွၤအဲၣ်ပှၤ ဒီးဆီၣ်ထွဲမၤစၢၤပှၤန့ၣ် ဖဲပထံၣ်ဘၣ်ဒီး တၢ်ကီတၢ်ခဲအခါဒၣ်လဲာ် ပကဂုာ်ကျဲးစၢးမၤ အတၢ်မၤလၢအဂ့ၤကတၢၢ်လီၤ. ဘၣ်ဆၣ် ပမ့ၢ်ဆိကမိၣ်လၢ ယဟိဝၤယွၤ တသူၣ်အိၣ်သးအိၣ်ပှၤဘၣ်န့ၣ် ‘ပဂံၢ်ပဘါမ့ၢ်အဆံးလီၤ.’ (ကတိၤဒိ ၂၄:၁၀) ဖဲပသးလီၤစၢ် ဒီးပမ့ၢ်ဆိကမိၣ်လၢ ကစၢ်ယွၤတအဲၣ်ပှၤဘၣ်အခါန့ၣ် ပတြီဆၢကွံာ်မုၣ်ကီၤလံၢ် တန့ၢ်လၢၤဘၣ်.—အ့းဖ့းစူး ၆:၁၆.
၅. ဒီပုၢ်ဝဲၢ်မုၣ်ခွါတနီၤ ဆိကမိၣ်ဝဲလၢ ယဟိဝၤယွၤတအဲၣ်အီၤဘၣ် အဃိ မၤဘၣ်ဒိအဝဲသ့ၣ်ဒ်လဲၣ်.
၅ ပဒီပုၢ်ဝဲၢ်မုၣ်ခွါတနီၤ ဆိကမိၣ်ဝဲလၢ ယဟိဝၤယွၤတအဲၣ်အဝဲသ့ၣ် ဒီးတကဟုကယာ်အဝဲသ့ၣ်ဘၣ် အဃိ အတၢ်နာ်လီၤစၢ်ဝဲလီၤ. တၢ်အိၣ်ဖှိၣ်သးပှၢ်လၢ အမံၤမ့ၢ်ကၠ့စ် တဲဝဲလၢ “ယမၤတၢ်လၢဘ့ၤသ့လး ဒီးယမၤစၢၤတၢ်အိၣ်ဖှိၣ်လၢ ပှၤကတိၤကျိာ်အဂၤန့ၣ် မုာ်ဒိၣ်မး သနာ်က့ တၢ်လၢယမၤအီၤန့ၣ် မ့ၢ်ယဟိဝၤယွၤဘၣ်သူၣ်ဘၣ်သးဧါန့ၣ် ယတသ့ၣ်ညါလီၤတံၢ်ဘၣ်. ဘၣ်တဘျီ ယဆိကမိၣ်ဘၣ်လၢ မ့ၢ်ယဟိဝၤယွၤဒိကနၣ် ယတၢ်ထုကဖၣ်စ့ၢ်ကီးဧါ.” ဒီပုၢ်ဝဲၢ်မုၣ်အံၣ်ဘၤ လၢအမၤကစၢ်ယွၤအတၢ်မၤ လၢဆၢကတီၢ်လၢပှဲၤန့ၣ် တဲဝဲလၢ “ယသ့ၣ်ညါဘၣ်လၢ နမ့ၢ်ဆိကမိၣ်လၢ ယဟိဝၤယွၤတအဲၣ်နၤဘၣ်န့ၣ် အလီၤဘၣ်ယိၣ်ဝဲဒိၣ်မး. နမ့ၢ်ဆိကမိၣ်ဘၣ်ဒ်အံၤန့ၣ် ကမၤဘၣ်ဒိၣ်ဝဲ နတၢ်ရ့လိာ်သးဒီး ယဟိဝၤယွၤလီၤ.” ဒီပုၢ်ဝဲၢ်ခွါမဲကၢၤ လၢအမ့ၢ်ပှၤလဲၤလၢညါ ဒီးကဲတၢ်အိၣ်ဖှိၣ်သးပှၢ်န့ၣ် တဲဝဲလၢ “နမ့ၢ်ဆိကမိၣ်လၢ ယဟိဝၤယွၤ တကဟုကယာ်နၤဘၣ်န့ၣ် နကယံၤထီၣ်ဒီးအီၤလီၤ.”
၆. ဖဲပစးထီၣ်ဆိကမိၣ်လၢ ယဟိဝၤယွၤတအဲၣ်ပှၤဘၣ်အခါ ပကဘၣ်မၤတၢ်မနုၤလဲၣ်.
၆ တၢ်လဲၤခီဖျိတဖၣ်အံၤန့ၣ် ဒုးသ့ၣ်ညါပှၤလၢ ပမ့ၢ်ဆိကမိၣ်လၢ ယဟိဝၤယွၤ တအဲၣ်ပှၤဘၣ်န့ၣ် ကမၤဘၣ်ဒိပတၢ်နာ်လီၤ. ဘၣ်ဆၣ် ဖဲပစးထီၣ်ဆိကမိၣ်ဘၣ်လၢ ယဟိဝၤယွၤ တအဲၣ်ပှၤဘၣ်အခါ ပကဘၣ်မၤတၢ်မနုၤလဲၣ်. ပကဘၣ်ထုးထီၣ်ကွံာ် တၢ်ဆိကမိၣ်ဒ်အံၤတဖၣ် တဘျီဃီလီၤ. နကဘၣ်ဃ့ ယဟိဝၤယွၤအတၢ်မၤစၢၤလၢ နကမၤလီၤမၢ်ကွံာ် “တၢ်ဆိကမိၣ် [“တၢ်သူၣ်ကိၢ်သးဂီၤ,” NWT]” လၢအတဂ့ၤဘၣ်တဖၣ်လီၤ. တကးဒံးဘၣ် နကဘၣ်ဆိကမိၣ်က့ၤ ‘တၢ်သူၣ်မံသးမုာ် လၢအဟဲလၢယွၤအအိၣ် လၢအဒိၣ်န့ၢ်ယိာ်န့ၢ်တၢ်လၢ နနၢ်ပၢၢ်အီၤသ့န့ၣ် ကပၢၤနသးဒီး နတၢ်ဆိကမိၣ်တဖၣ်’ လီၤ. (စံးထီၣ်ပတြၢၤ ၁၃၉:၂၃; ဖံလံးပံၤ ၄:၆, ၇) သ့ၣ်နီၣ်ထီၣ်က့ၤလၢ ပှၤလၢအအိၣ်ဒီး တၢ်ဆိကမိၣ်ဒ်အံၤန့ၣ် တမ့ၢ်ထဲနၤတဂၤဧိၤဘၣ်. ဒီပုၢ်ဝဲၢ်မုၣ်ခွါအဂၤတဖၣ်စ့ၢ်ကီး အိၣ်ဒီးတၢ်ဆိကမိၣ်လၢ အတဂ့ၤဘၣ်တဖၣ်ဒ်အံၤလီၤ. ယဟိဝၤယွၤအခ့အပှၤ လၢပျၢၤတဖၣ်ဒၣ်လဲာ် အိၣ်ဒီးတၢ်ဆိကမိၣ် လၢအတဂ့ၤဘၣ်ဒ်န့ၣ်အသိးလီၤ. ပကတဲသကိး ပမၤလိန့ၢ်တၢ်လၢ တၢ်မၢဖိပီလူးအအိၣ် ကသ့ဒ်လဲၣ်.
ပမၤလိန့ၢ်တၢ်လၢ စီၤပီလူးအအိၣ်ဒ်လဲၣ်
၇. စီၤပီလူးထံၣ်ဘၣ်ဒီး တၢ်ကီတၢ်ခဲမနုၤတဖၣ်လဲၣ်.
၇ တဘျီတခီၣ် မ့ၢ်နဆိကမိၣ်ဘၣ်လၢ နအိၣ်ဒီးနမူဒါအါတလၢ ဒီးကီလၢ နကဟံးထီၣ်ဖီၣ်ထီၣ်အီၤအဂီၢ်ဧါ. မ့ၢ်အိၣ်န့ၣ် နကနၢ်ပၢၢ် စီၤပီလူးအတၢ်အိၣ်သးလီၤ. စီၤပီလူးတသူၣ်ကိၢ်သးဂီၤထဲ တၢ်အိၣ်ဖှိၣ်တဖျၢၣ်အဂီၢ်ဘၣ်. အဝဲသူၣ်ကိၢ်သးဂီၤတၢ်လၢ “တၢ်အိၣ်ဖှိၣ်ခဲလၢာ်အဂီၢ်လီၤ.” (၂ ကရံၣ်သူး ၁၁:၂၃-၂၈) မ့ၢ်နအိၣ်ဒီးတၢ်ဆါ ယံာ်ယံာ်ထၢထၢ တုၤဒၣ်လဲာ် နတၢ်သးခုလီၤမၢ်ကွံာ်န့ၣ် အိၣ်တဘျီဘျီဧါ. စီၤပီလူးတဲဝဲလၢ ယဘၣ်ဒုးဒီး “တၤဆှုၣ်တၤမဲ လၢယဖံးယညၣ်အကျါ” နးနးကလဲာ်လီၤ. ဘၣ်သ့ၣ်သ့ၣ် အဝဲကအဲၣ်ဒိးတဲဝဲလၢ အထံၣ်ဘၣ်ဒီး တၢ်ကီတၢ်ခဲလၢ အတူၢ်ဘၣ်ဝဲနးမးလီၤ. စီၤပီလူးအတၢ်အိၣ်ဆူၣ်အိၣ်ချ့တဂ့ၤဘၣ်အဃိ အဝဲကအဲၣ်ဒိးလၢ အတၢ်ဆါကဘျါက့ၤဝဲစ့ၢ်ကီးလီၤ. (၂ ကရံၣ်သူး ၁၂:၇-၁၀) စီၤပီလူးကိးလီၤအသးလၢ “ပှၤလၢအနးသံ” ခီဖျိလၢ အဘၣ်ဒုးတၢ်ဒီးအနီၢ်ကစၢ် တၢ်ဂံၢ်စၢ်ဘါစၢ်ထီဘိအဃိလီၤ.—ရိမ့ၤ ၇:၂၁-၂၄.
၈. ဒ်သိးစီၤပီလူးကလဲၤခီဖျိ တၢ်ကီတၢ်ခဲတဖၣ်ကန့ၢ်အဂီၢ် တၢ်မနုၤမၤစၢၤအီၤလဲၣ်.
၈ စီၤပီလူးထံၣ်ဘၣ် တၢ်မၤကွၢ်အကလုာ်ကလုာ် ဒီးတၢ်အိၣ်သးလၢ ကမၤလီၤစၢ်အဂံၢ်အဘါတဖၣ် သနာ်က့ စီၤပီလူးဆဲးမၤ ယဟိဝၤယွၤအတၢ်မၤလီၤ. အဝဲကဆဲးမၤဒ်န့ၣ်အဂီၢ် တၢ်မနုၤမၤစၢၤအီၤလဲၣ်. စီၤပီလူးသ့ၣ်ညါဝဲလၢ အတလၢတပှဲၤဘၣ် သနာ်က့ အတၢ်နာ်ဘၣ်ဃးဒီး တၢ်ပှ့ၤက့ၤန့ၣ် တဟးဂီၤဝဲနီတဘျီဘၣ်. စီၤပီလူးသ့ၣ်ညါစ့ၢ်ကီးဝဲလၢ ယ့ၣ်ၡူးအၢၣ်လီၤဝဲလၢ “ပှၤကိးဂၤဒဲးလၢ အစူၢ်က့ၤနာ်က့ၤ[ယ့ၣ်ၡူး]န့ၣ် . . . ကန့ၢ်ဘၣ် တၢ်မူအထူအယိာ်” လီၤ. (ယိၤဟၣ် ၃:၁၆; ရိမ့ၤ ၆:၂၃) စီၤပီလူးပၣ်ဃုာ်လၢ ပှၤလၢအစူၢ်က့ၤနာ်က့ၤ တၢ်ပှ့ၤက့ၤအကျါလီၤ. စီၤပီလူးပီၢ်ယၢ်လီၤက့ၤအသးလၢ အမၤတ့ၢ်ဘၣ်တၢ်ဒဲးဘးလၢ အပူၤကွံာ်တဖၣ်လီၤ. အဃိ စီၤပီလူးနာ်ဝဲသပှၢ်ကတၢၢ်လၢ ယဟိဝၤယွၤသးအိၣ်ပျၢ်ကွံာ် အတၢ်ဒဲးဘးလီၤ.—စံးထီၣ်ပတြၢၤ ၈၆:၅.
၉. ပမၤလိန့ၢ်တၢ်လၢ စီၤပီလူးအတၢ်ကတိၤ ဖဲ ကလၤတံ ၂:၂၀ အပူၤဒ်လဲၣ်.
၉ စီၤပီလူးနာ်ဝဲလၢ ယဟိဝၤယွၤအဲၣ်အီၤသပှၢ်ကတၢၢ် မ့ၢ်လၢယဟိဝၤယွၤ ဆှၢလီၤဝဲအဖိခွါယ့ၣ်ၡူး ဒ်သိးကတူၢ်သံအသး လၢအဂီၢ်အဃိလီၤ. (ဖး ကလၤတံ ၂:၂၀ တက့ၢ်.) ပသ့ၣ်ညါဘၣ် စီၤပီလူးအတၢ်ကတိၤ ဖဲ ကလၤတံ ၂:၂၀ အပူၤန့ၣ်လီၤ. စီၤပီလူးတဲဝဲလၢ “ကစၢ်ယွၤအဖိခွါ . . . အဲၣ်ယၤဒီး ဟ့ၣ်လီၤကွံာ်အသးလၢ ယဂီၢ်လီၤ.” စီၤပီလူးတထံၣ်လီၤ အနီၢ်ကစၢ်သးလၢ အမ့ၢ်ပှၤအၢပှၤသီဒိၣ်တလၢ တုၤဒၣ်လဲာ် ကစၢ်ယွၤတအဲၣ်အီလၢၤဘၣ်န့ၣ်ဘၣ်. အဃိ စီၤပီလူးဒုးသ့ၣ်နီၣ်ထီၣ် ပှၤရိမ့ၤဖိလၢ “ခီဖျိ ခရံာ်တူၢ်သံအသး လၢပဂီၢ်အဃိလီၤ.” (ရိမ့ၤ ၅:၈) တၢ်လၢကမၤပတုာ် ကစၢ်ယွၤအတၢ်အဲၣ်ပှၤန့ၣ် တအိၣ်နီတမံၤဘၣ်.
၁၀. ပမၤလိန့ၢ်ဘၣ်တၢ်လၢ ရိမ့ၤ ၈:၃၈, ၃၉ အပူၤဒ်လဲၣ်.
၁၀ ဖး ရိမ့ၤ ၈:၃၈, ၃၉ တက့ၢ်. စီၤပီလူးသ့ၣ်ညါဝဲလၢ ကစၢ်ယွၤအတၢ်အဲၣ်န့ၣ် အစိကမီၤဒိၣ်မးလီၤ. စီၤပီလူးကွဲးဝဲလၢ တၢ်လၢက “မၤလီၤဖးပှၤဒီး ကစၢ်ယွၤအတၢ်အဲၣ်” န့ၣ် တအိၣ်နီတမံၤဘၣ်. စီၤပီလူးသ့ၣ်ညါဝဲ ယဟိဝၤယွၤပာ်ဖျါထီၣ် တၢ်ဝံသးစူၤလၢ ပှၤအံၣ်စရ့လးဖိအဖီၣ်ခိၣ် အါမးလီၤ. တကးဒံးဘၣ် အဝဲသ့ၣ်ညါစ့ၢ်ကီးလၢ ယဟိဝၤယွၤပာ်ဖျါထီၣ် တၢ်သးကညီၤလၢအဖီခိၣ်လီၤ. ပမ့ၢ်တဲလၢအဂၤတမံၤန့ၣ် စီၤပီလူးတဲဝဲလၢ ‘ခီဖျိလၢ ယဟိဝၤယွၤဆှၢလီၤအဖိခွါလၢ ဟဲတူၢ်သံသးလၢ ယဂီၢ်အဃိ ယတဘၣ်ဆိကမိၣ်လၢ ယဟိဝၤယွၤတအဲၣ်ယၤဘၣ်န့ၣ်ဘၣ်.’—ရိမ့ၤ ၈:၃၂.
တၢ်လၢအရ့ဒိၣ်ကတၢၢ် လၢကစၢ်ယွၤအဂီၢ်န့ၣ် မ့ၢ်ဝဲတၢ်လၢပမၤခဲအံၤ ဒီးလၢခါဆူညါ, တမ့ၢ်တၢ်ကမၣ်လၢပမၤတ့ၢ်အီၤ လၢအပူၤကွံာ်တဖၣ်ဘၣ် (ကွၢ်လံာ်အဆၢ ၁၁) *
၁၁. စီၤပီလူးမၤဘၣ်တၢ်ဒဲးဘးလၢ ဘၣ်တၢ်ပာ်ဖျါအီၤဖဲ ၁ တံၤမသ့း ၁:၁၂-၁၅ အပူၤ သနာ်က့ ဘၣ်မနုၤအဃိ အဝဲနာ်နီၢ်ကီၢ်လၢ ကစၢ်ယွၤအဲၣ်အီၤလဲၣ်.
၁၁ ဖး ၁ တံၤမသ့း ၁:၁၂-၁၅ တက့ၢ်. ဖဲစီၤပီလူးဆိကမိၣ်ထီၣ်က့ၤ တၢ်လၢအမၤတ့ၢ်တၢ်လၢ အပူၤကွံာ်တဖၣ်န့ၣ် အသးကဘၣ်ဒိဝဲဒိၣ်မးလီၤ. အဝဲကိးလီၤအသးလၢ အမ့ၢ်ပှၤတၢ်ဒဲးဘးဖိ “အဒိၣ်ကတၢၢ်” န့ၣ် တမ့ၢ်တၢ်လီၤကမၢကမၣ်ဘၣ်. ဖဲစီၤပီလူး တချုးကဲထီၣ်ခရံာ်ဖိအခါ အဝဲမၤအၢမၤနးဝဲ ပှၤခရံာ်ဖိတဖၣ်လၢ ဝ့ၢ်တဖျၢၣ်ဝံၤတဖျၢၣ်, တနီၤန့ၣ် အဝဲထၢနုာ်လီၤလၢဃိာ်ပူၤ ဒီးတကးဒံးဘၣ် အဆီၣ်ထွဲပှၤလၢကမၤသံ ခရံာ်ဖိတဖၣ်လီၤ. (မၤတၢ် ၂၆:၁၀, ၁၁) နထံၣ်တမှံကွၢ်ကသ့ဧါ. ဖဲစီၤပီလူးထံၣ်လိာ်သးဒီး ခရံာ်ဖိသးစၢ်လၢအမိၢ်အပၢ်သံ ခီဖျိလၢအီၤအဃိန့ၣ် စီၤပီလူးအသးကဘၣ်ဒိဝဲထဲလဲၣ်. စီၤပီလူးအသးကဘၣ်ဒိဝဲဒိၣ်မး ဘၣ်ဃးဒီးတၢ်ကမၣ်လၢ အမၤတ့ၢ်ဘၣ်ဝဲလၢ အပူၤကွံာ်တဖၣ်န့ၣ်လီၤ. ဘၣ်ဆၣ် စီၤပီလူးသ့ၣ်ညါဝဲလၢ တၢ်လၢအပူၤကွံာ်လံတဖၣ်န့ၣ် အမၤက့ၤဝဲ တသ့နီတမံၤလၢၤဘၣ်. တကးဒံးဘၣ် စီၤပီလူးနာ်ဝဲသပှၢ်တၢၢ်လၢ ခရံာ်ဟဲတူၢ်သံသးလၢအဂီၢ် အဃိ အကွဲးဝဲလၢ “ခီဖျိလၢ ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်အဃိ ယမ့ၢ်တၢ်လၢယမ့ၢ်လီၤ.” (၁ ကရံၣ်သူး ၁၅:၃, ၁၀) ပမၤလိန့ၢ်ဘၣ်တၢ်မနုၤလဲၣ်. နကဘၣ်နာ်သပှၢ်တၢၢ်လၢ ခရံာ်ဟဲတူၢ်သံသးလၢနဂီၢ် ဒီးမၤစၢၤနၤလၢ နကအိၣ်ဒီးတၢ်ရ့လိာ်သး ဒီးယဟိဝၤယွၤလၢအဂ့ၤန့ၣ်လီၤ. (မၤတၢ် ၃:၁၉) တၢ်အရ့ဒိၣ်ကတၢၢ်လၢ ယဟိဝၤယွၤအဂီၢ်န့ၣ် မ့ၢ်ဝဲတၢ်လၢပမၤအီၤခဲအံၤ ဒီးလၢခါဆူညါလီၤ. တမ့ၢ်တၢ်လၢအပူၤကွံာ် လၢပမၤကမၣ်တ့ၢ်အီၤတဖၣ် တချုးဖဲပကဲထီၣ် ယဟိဝၤပှၤအုၣ်အသးအခါ မ့တမ့ၢ် ပကဲထီၣ်ယဟိဝၤပှၤအုၣ်အသး ဝံၤအလီၢ်ခံန့ၣ်ဘၣ်.—ယၡါယၤ ၁:၁၈.
၁၂. ပမ့ၢ်ဆိကမိၣ်လၢ ပလုၢ်ပပှ့ၤတအိၣ်ဘၣ် ဒီးပတကြၢးဒီးပှၤဂၤ အတၢ်အဲၣ်ဘၣ်န့ၣ် တၢ်ကတိၤလၢ ၁ ယိၤဟၣ် ၃:၁၉, ၂၀ အပူၤ မၤစၢၤပှၤကသ့ဒ်လဲၣ်.
၁၂ ဖဲနဆိကမိၣ်ဘၣ်ဃးဒီး ယ့ၣ်ၡူးတူၢ်သံအသး လၢနဂီၢ်အခါ ဘၣ်သ့ၣ်သ့ၣ် နကတဲလၢ ‘ယဆိကမိၣ် ယတကြၢးဒီးတၢ်ဟ့ၣ်လၢ အလုၢ်ဒိၣ်ပှ့ၤဒိၣ်တခါအံၤဘၣ်.’ ဘၣ်မနုၤအဃိ နဆိကမိၣ်အီၤဒ်န့ၣ်လဲၣ်. ပသးန့ၣ် အလီန့ၢ်ပနီၢ်ကစၢ် ဒ်သိးပကတူၢ်ဘၣ်လၢ ပလုၢ်ပပှ့ၤတအိၣ်ဘၣ် ဒီးပတကြၢးဒီးပှၤဂၤ အတၢ်အဲၣ်ဘၣ်. (ဖး ၁ ယိၤဟၣ် ၃:၁၉-၂၀ တက့ၢ်.) ပတၢ်ဆိကမိၣ်လၢ အတဂ့ၤဘၣ်တဖၣ် မ့ၢ်ဟဲနုာ်လီၤန့ၣ် သ့ၣ်နီၣ်ထီၣ်က့ၤလၢ “ကစၢ်ယွၤန့ၣ် ဒိၣ်န့ၢ်ဒံးပသး” လီၤ. ပမ့ၢ်ဆိကမိၣ်လၢ ယဟိဝၤယွၤတအဲၣ်ပှၤဘၣ် ဒီးတသးအိၣ်ပျၢ် ပတၢ်ကမၣ်ဘၣ် သနာ်က့ ပပၢ်လၢမူခိၣ်န့ၣ် ဆဲးအဲၣ်ဒံးပှၤ ဒီးကပျၢ်ပတၢ်ကမၣ်သပှၢ်ကတၢၢ်လီၤ. ပကဘၣ်နာ်လၢ ယဟိဝၤယွၤအဲၣ်ပှၤလီၤ. ဒ်သိးပကနာ်အဂီၢ် ပကဘၣ်မၤလိလံာ်စီဆှံ, ဃ့ဘါထုကဖၣ် တကးဒံးဘၣ် ပကဘၣ်ရ့ဒီးဒီပုၢ်ဝဲၢ်မုၣ်ခွါတဖၣ် ထီဘိလီၤ. ဘၣ်မနုၤအဃိ အရ့ဒိၣ်ဒိၣ်မးလၢ ပကဘၣ်မၤတၢ်သ့ၣ်တဖၣ်အံၤလဲၣ်.
တၢ်မၤလိလံာ်စီဆှံ, တၢ်ဃ့ဘါထုကဖၣ် ဒီးဒီပုၢ်ဝဲၢ်မုၣ်ခွါတဖၣ် မၤစၢၤပှၤကသ့ဒ်လဲၣ်
၁၃. ပတၢ်မၤလိလံာ်စီဆှံန့ၣ် မၤစၢၤပှၤကသ့ဒ်လဲၣ်. (ကွၢ်တၢ်လွံၢ်နၢၣ်လၢမ့ၢ် “ ကစၢ်ယွၤအကလုၢ်ကထါ မၤစၢၤအဝဲသ့ၣ်ဒ်လဲၣ်” တက့ၢ်.)
၁၃ မၤလိကစၢ်ယွၤအကလုၢ်ကထါ ကိးနံၤဒဲးတက့ၢ်. နမ့ၢ်မၤဒ်န့ၣ် နကသ့ၣ်ညါအါထီၣ် ယဟိဝၤယွၤအတၢ်ဂ့ၤတၢ်ဝါတဖၣ်လီၤ. တကးဒံးဘၣ် နကသ့ၣ်ညါထီၣ်စ့ၢ်ကီးလၢ ယဟိဝၤယွၤအဲၣ်နၤထဲလဲၣ်န့ၣ်လီၤ. ဖဲနဆိကမိၣ်ထံ ကစၢ်ယွၤကလုၢ်ကထါ ကိးနံၤဒဲးအခါ ကမၤစၢၤနၤလၢ နကအိၣ်ဒီးတၢ်ထံၣ်လၢအဂ့ၤ ဒီးအက “ဃၣ်လိၤ” ထီၣ် နတၢ်ဆိကမိၣ်ဒီးနသးလီၤ. (၂ တံၤမသ့း ၃:၁၆) တၢ်အိၣ်ဖှိၣ်သးပှၢ် လၢအမံၤမ့ၢ်ခဲဘ့(န်)န့ၣ် တူၢ်ဘၣ်ဝဲလၢ အလုၢ်အပှ့ၤတအိၣ်ဘၣ်. အဝဲတဲဝဲလၢ “ယဖး စံးထီၣ်ပတြၢၤအဆၢဒိၣ် ၁၀၃ ဒီးဆိကမိၣ်ထံအီၤန့ၣ် မၤစၢၤယၤလၢ ယကဘၣ်ဆီတလဲက့ၤ ယတၢ်ဆိကမိၣ် ဒီးနၢ်ပၢၢ်ထီၣ် ယဟိဝၤယွၤအတၢ်ထံၣ်အိၣ်လၢ ယဖီခိၣ်ဒ်လဲၣ်န့ၣ်လီၤ.” ဒီပုၢ်ဝဲၢ်မုၣ်အံၣ်ဘၤ တဲဝဲလၢ “ဒီတနံၤကျၢၤဝံၤအလီၢ်ခံ ယဟံးန့ၢ်တၢ်ဆၢကတီၢ်လၢ ယကဆိကမိၣ်ထံ ယဟိဝၤယွၤအတၢ်ထံၣ်တဖၣ်လီၤ. ယမၤဒ်အံၤအဃိ ယသးမုာ်ထီၣ်က့ၤဒီး ယတၢ်နာ်ဟဲဆူၣ်ထီၣ်ဝဲလီၤ.”
၁၄. တၢ်ဃ့ထုကဖၣ် မၤစၢၤပှၤသ့ဒ်လဲၣ်.
၁၄ ဃ့ဘါထုကဖၣ်ထီဘိတက့ၢ်. (၁ သ့းစၤလနံ ၅:၁၇) နမ့ၢ်အဲၣ်ဒိးကဲထီၣ် ပှၤတဂၤအတံၤသကိးန့ၣ် နကဘၣ်တဲတၢ်ဒီးအီၤထီဘိ ဒီးတဲဘၣ်အီၤ နတၢ်တူၢ်ဘၣ်တဖၣ်လီၤ. ပမ့ၢ်အဲၣ်ဒိးကဲထီၣ် ယဟိဝၤယွၤအတံၤသကိးန့ၣ် ပကဘၣ်မၤဒ်န့ၣ်အသိးစ့ၢ်ကီးလီၤ. ပကဘၣ်တဲဖျါထီၣ် ပတၢ်တူၢ်ဘၣ်, ပတၢ်ဆိကမိၣ် ဒီးပတၢ်ဘၣ်ယိၣ်ဘၣ်ဘှီတဖၣ်လၢ ပတၢ်ထုကဖၣ်အပူၤလီၤ. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢပနာ်န့ၢ်အီၤ ဒီးပကသ့ၣ်ညါလၢအအဲၣ်ပှၤလီၤ. (စံးထီၣ်ပတြၢၤ ၉၄:၁၇-၁၉; ၁ ယိၤဟၣ် ၅:၁၄, ၁၅) ဒီပုၢ်ဝဲၢ်မုၣ်ယူအၤ တဲဝဲလၢ “ဖဲယဃ့ဘါထုကဖၣ်အခါ တၢ်လၢအကဲထီၣ်အသးဒီးယၤ လၢဒီတနံၤကျၢၤအတီၢ်ပူၤန့ၣ် ယတဲဘၣ်ယဟိဝၤယွၤလီၤ. ယတဲဘၣ်အီၤစ့ၢ်ကီးလၢ ယတၢ်ထံၣ်ဒီးယတၢ်တူၢ်ဘၣ်အိၣ်ဒ်လဲၣ်န့ၣ်လီၤ. လၢခံကယီကယီ ယထံၣ်ယဟိဝၤယွၤ ဒ်ပၢ်လၢအအဲၣ်အဖိတဖၣ်အသိးလီၤ. ဒီးယတထံၣ်ယဟိဝၤယွၤဒ်သိးဒီး တၢ်မၤခိၣ်တဂၤလၢ အအိၣ်ဒီးအပှၤမၤတၢ်ဖိဒီဒူၣ်န့ၣ်ဘၣ်.”—ကွၢ်တၢ်လွံၢ်နၢၣ်လၢအမ့ၢ် “ မ့ၢ်နဖးဘၣ်အီၤလံဧါ” တက့ၢ်.
၁၅. ယဟိဝၤယွၤသူၣ်အိၣ်သးအိၣ် ပဝဲတဂၤစုာ်စုာ်န့ၣ် အပာ်ဖျါထီၣ်ဝဲဒ်လဲၣ်.
၁၅ ရ့ဒီးဒီပုၢ်ဝဲၢ်မုၣ်ခွါတဖၣ်တက့ၢ်. ဒီပုၢ်ဝဲၢ်မုၣ်ခွါတဖၣ်န့ၣ် မ့ၢ်တၢ်ဟ့ၣ်လၢ အဟဲလၢယဟိဝၤယွၤအအိၣ်တခါလီၤ. (ယၤကိာ် ၁:၁၇) ပပၢ်လၢမူခိၣ်န့ၣ် သူၣ်အိၣ်သးအိၣ်ပှၤ ခီဖျိဟ့ၣ်လီၤပှၤဒီပုၢ်ဝဲၢ်မုၣ်ခွါတဖၣ် လၢနီၢ်သးတခီ ဒီးအဝဲသ့ၣ် “အဲၣ်တၢ် ကိးအဆၢအကတီၢ်ဒဲး” လီၤ. (ကတိၤဒိ ၁၇:၁၇) စီၤပီလူးကွဲးန့ၢ်ဝဲဒၣ် လံာ်ပရၢလၢ ပှၤကလီးစဲဖိအအိၣ်လီၤ. ပှၤလၢအမၤစၢၤအီၤတဖၣ်န့ၣ် စီၤပီလူးတဲဝဲလၢ “အဝဲသ့ၣ်ကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ယဂီၢ်ဒိၣ်မးလီၤ.” (ကလီးစဲ ၄:၁၀, ၁၁) ယ့ၣ်ၡူးဒၣ်လဲာ်လိၣ်ဘၣ်ဝဲ မူခိၣ်ကလူးဒီး ပှၤဟီၣ်ခိၣ်ဖိတဖၣ် အတၢ်မၤစၢၤ ဒီးအတၢ်စံးဘျုးစံးဖှိၣ်စ့ၢ်ကီးလီၤ.—လူၤကၣ် ၂၂:၂၈, ၄၃.
၁၆. ပတံၤသကိးလၢ အသးတီတဖၣ်န့ၣ် မၤစၢၤပှၤလၢပကဘူးထီၣ် ဒီးယဟိဝၤယွၤအဂီၢ်ဒ်လဲၣ်.
၁၆ မ့ၢ်နတူၢ်လိာ် နတံၤသကိးလၢတၢ်အိၣ်ဖှိၣ်အပူၤတဖၣ် အတၢ်မၤစၢၤစ့ၢ်ကီးဧါ. ပမ့ၢ်တဲပၠး ပဒီပုၢ်ဝဲၢ်လၢအဒိၣ်တုာ်ခိၣ်ပှဲၤတဖၣ် ဘၣ်ဃးဒီး ပတၢ်ဘၣ်ယိၣ်ဘၣ်ဘှီတဖၣ်န့ၣ် မ့ၢ်ဒၣ်ပဒီသဒၢလီၤ ပတၢ်နာ်လီၤ. ပအိၣ်ဒီးတၢ်ထံၣ်ဒ်အံၤန့ၣ် တမ့ၢ်လၢပတၢ်နာ်လီၤစၢ်အဃိဘၣ်. ဒီပုၢ်ဝဲၢ်ခွါကၠ့စ် တဲဝဲလၢ “ယရ့လိာ်သးဒီး ဒီပုၢ်ဝဲၢ်လၢအဒိၣ်တုာ်ခိၣ်ပှဲၤတဖၣ်အဃိ ကဲထီၣ်တၢ်မၤစၢၤလၢ ယဂီၢ်ဒိၣ်မးလီၤ. ဖဲယတၢ်ဆိကမိၣ်လၢ အတဂ့ၤဘၣ်တဖၣ် ဟဲနုာ်လီၤအခါ တံၤသကိးတဖၣ်အံၤ ဒိကနၣ်န့ၢ်ယၤလၢ တၢ်ဝံသးစူၤအပူၤ ဒီးအဝဲသ့ၣ်တဲဘၣ်ယၤလၢ အအဲၣ်ယၤလီၤ. ခီဖျိလၢအဝဲသ့ၣ်အဃိ ယသ့ၣ်ညါထီၣ်ဘၣ်လၢ ယဟိဝၤယွၤအဲၣ်ယၤ ဒီးကဟုကယာ်ယၤလီၤ.” အဃိ အရ့ဒိၣ်ဒိၣ်မးလၢ ပကဘၣ်ရ့ဒီး ပဒီပုၢ်ဝဲၢ်မုၣ်ခွါတဖၣ် ဘူးဘူးတံၢ်တံၢ်လီၤ.
ဆဲးအိၣ်လၢယဟိဝၤယွၤ အတၢ်အဲၣ်တၢ်ကွံအပူၤ
၁၇-၁၈. ပကဘၣ်ဒိကနၣ် မတဂၤအကလုၢ်လဲၣ် ဒီးဘၣ်မနုၤအဃိလဲၣ်.
၁၇ မုၣ်ကီၤလံၢ်အဲၣ်ဒိးဝဲလၢ ပကဟ့ၣ်ၡူကွံာ်တၢ်ဂ့ၤလၢ ပမၤအီၤတဖၣ်လီၤ. အဝဲအဲၣ်ဒိးဝဲလၢ ပကနာ်လၢ ယဟိဝၤယွၤတအဲၣ်ပှၤဘၣ်. ဒီးပတကြၢးဒိးန့ၢ်ဘၣ် ယဟိဝၤယွၤအတၢ်အုၣ်က့ၤခီၣ်က့ၤဘၣ်. ဘၣ်ဆၣ် ပသ့ၣ်ညါဘၣ်လၢ တၢ်သ့ၣ်တဖၣ်အံၤန့ၣ် မ့ၢ်ဝဲမုၣ်ကီၤလံၢ် အတၢ်လံၣ်တၢ်လီခဲလၢာ်လီၤ.
၁၈ ယဟိဝၤယွၤအဲၣ်နၤဒိၣ်မးလီၤ. နမ့ၢ်တၢ်လုၢ်ဒိၣ်ပှ့ၤဒိၣ်လၢအဂီၢ်လီၤ. နမ့ၢ်မၤထွဲ ကစၢ်ယွၤအကလုၢ်ကထါန့ၣ် နက “ဆဲးအိၣ်လၢ အတၢ်အဲၣ်အပူၤ” လီၤထူလီၤယိာ် ဒ်သိးဒီးယ့ၣ်ၡူးလီၤ. (ယိၤဟၣ် ၁၅:၁၀) အဃိ နတဘၣ်နာ်န့ၢ် မုၣ်ကီၤလံၢ်ဒီးနနီၢ်ကစၢ်အသးလၢ ယဟိဝၤယွၤ တအဲၣ်နၤဘၣ်န့ၣ်တဂ့ၤ. မ်နကနာ်သပှၢ်ကတၢၢ်လၢ ယဟိဝၤယွၤဘၣ် “အသးလၢ အပှၤဂီၢ်မုၢ်လီၤ.” အပှၤဂီၢ်မုၢ်န့ၣ် ပၣ်ဃုာ်ဒီးနၤလီၤ.
တၢ်သးဝံၣ် ၁၄၁ သးသမူအတၢ်လီၤလး
^ လံာ်အဆၢ. 5 ပဒီပုၢ်ဝဲၢ်မုၣ်ခွါတနီၤ တနာ်ဝဲလၢ ယဟိဝၤယွၤအဲၣ် အဝဲသ့ၣ်ဘၣ်. လၢတၢ်မၤလိအံၤအပူၤ ပကတဲသကိး ဘၣ်မနုၤအဃိ ပနာ်သ့လၢ ယဟိဝၤယွၤအဲၣ် ပဝဲတဂၤစုာ်စုာ်လဲၣ်. ပကတဲသကိးစ့ၢ်ကီး ပမ့ၢ်တနာ်လၢ ယဟိဝၤယွၤအဲၣ်ပှၤဘၣ်န့ၣ် ဒ်သိးပကသ့ၣ်ညါလၢ ယဟိဝၤယွၤအဲၣ်ပှၤအဂီၢ် ပကဘၣ်မၤတၢ်မနုၤလဲၣ်.
^ လံာ်အဆၢ. 2 ပှၤမံၤတနီၤ ဘၣ်တၢ်ဆီတလဲအီၤလီၤ.
^ လံာ်အဆၢ. 67 တၢ်တဲဖျါထီၣ်တၢ်ဂီၤ အခီပညီ– လၢအပူၤကွံာ်န့ၣ် စီၤပီလူးထၢနုာ်လီၤ ခရံာ်ဖိတဖၣ် လၢဃိာ်ပူၤလီၤ. ဖဲအဝဲသ့ၣ်ညါထီၣ်ဝဲ ယ့ၣ်ၡူးမၤန့ၢ်တၢ်လၢအဂီၢ်အခါ အဝဲဆီတလဲက့ၤ အတၢ်အိၣ်မူဒီးဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်မုၣ်ခွါတဖၣ်လီၤ. ဒီးပှၤလၢအဟ့ၣ်ဂံၢ်ဟ့ၣ်ဘါဝဲတဖၣ်န့ၣ် ကပၣ်ဃုာ်စ့ၢ်ကီးဒီး ပှၤလၢအမၤအၢမၤနးဘၣ်ဝဲတဖၣ် အဘူးအတံၢ်လီၤ.
