1. Jehova ulemuhangañi kwa batu bahae?

JEHOVA MULIMU “ulata batu bahae.” (2 Makol. 2:11) Kuziba taba yeo kulutahiseza tabo yetuna! Jehova walemuhanga tulemeno totunde tolunani tona; waziba kuli lwakona kucinca mi uluhohelanga ku yena. Haiba luzwelapili kusepahala ku yena, ukaba mulikanaa luna kuya kuile!—Joa. 6:44.

2. Ki kabakalañi babañwi haku babelanga taata kulumela kuli Jehova wabalata?

² Batu babañwi bakona kubulela kuli: ‘Naziba kuli Jehova walata batanga bahae kaufela sina sikwata, kono kana wanilata na ka butu?’ Ki lika mañi zekona kutahisa kuli mutu abuze puzo yeo? Kaizeli yabizwa Oksana * yanaanyandisizwe hahulu inze asali mwanana, utalusa kuli: “Nenitabile hahulu hanikolobezwa, mi nakala kueza bupaina. Kono hamulaho wa lilimo ze 15 kuzwa fo, nakala kuhupula lika zemaswe zeneezahezi ku na inze nisali mwanana. Nakala kunahana kuli Jehova naatuhezi kunilata mi nenisa swaneli kulatiwa ki yena.” Kaizeli yabizwa Yua, yali paina wa kamita ni yena naaipumani mwa muinelo oswana hanaali mwanana, mi utalusa kuli: “Nenineezi bupilo bwaka ku Jehova bakeñisa kuli nenibata kumutabisa. Kono nenilumela kuli Jehova naasakoni feela kunilata.”

3. Lukanyakisisañi mwa taba ye?

³ Mwendi ni mina, sina likaizeli babasepahala bolunyakisisize, mwalata Jehova ka pilu yamina kaufela kono mwendi mwakakanya kuli wamilata. Ki kabakalañi hamutokwa kukolwa kuli Jehova wamiisa pilu luli? Mi ki lika mañi zekona kumitusa kutuhela kunahana kuli Jehova haamilati? Halunyakisiseñi likalabo za lipuzo zeo.

4. Ki kabakalañi kukakanya kuli Jehova walulata hakukona kutahisa butata bobutuna?

⁴ Lilato likona kulususueza kueza lika ka molukonela kaufela. Haiba luba ni buikolwiso bwa kuli Jehova walulata mi walutusa, lukaeza molukonela kaufela kumusebeleza ka pilu kaufela kusina taba ni miinelo yetaata yelukona kukopana ni yona mwa bupilo. Kono haiba lukakanya kuli Mulimu waluisa pilu, “maata [aluna] akaba amanyinyani.” (Liprov. 24:10) Mi haiba luzwafa ni kukakanya kuli Mulimu walulata, haluna kukona kutiyela twaniso ya Satani.—Maef. 6:16.

5. Ki sika mañi sesiezahezi kwa mizwale ni likaizeli babañwi bakeñisa kukakanya kuli Mulimu wabalata?

⁵ Mizwale ni likaizeli babañwi babasepahala ba mwa linako zaluna bafokozi kwa moya bakeñisa kukakanya kuli Jehova wabalata. Muuna-muhulu yabizwa James utalusa kuli: “Nihaike kuli nisebeleza fa Betele mi niswalisana ni puteho yeitusisa puo ya mwa naha isili, nenikakanyanga ka za haiba Jehova naaitebuha luli sebelezo yaka. Ka nako yeñwi, mane nakala kukakanya ka za haiba Jehova naateelezanga kwa litapelo zaka.” Kaizeli yabizwa Eva, ili yo ni yena usebeleza fa Betele, utalusa kuli: “Nenilemuhile kuli kukakanya kuli Jehova walulata kwakona kuluzwafisa ni kutahisa kuli lutuhele kueza zeñata mwa sebelezo yaluna ku yena. Taba yeo ikona kutahisa kuli lutuhele kueza lika za kwa moya ni kufelelwa ki tabo mwa sebelezo yaluna ku Jehova.” Muzwale yabizwa Michael, yali paina wa kamita ni muuna-muhulu mwa puteho, utalusa kuli: “Haiba mutu haalumeli kuli Mulimu wamuisa pilu, wakona kuyauluka ni kutuhela kumusebeleza.”

6. Luswanela kuezañi haiba lukala kukakanya kuli Mulimu walulata?

⁶ Zeezahezi kwa mizwale ni likaizeli bao libonisa kuli haiba lukakanya kuli Jehova walulata, tumelo yaluna ikafokola. Kono cwale luswanela kuezañi haiba lukala kukakanya kuli Mulimu walulata? Luswanela kutuhela kunahana cwalo kapili-pili! Mukupe Jehova kuli amituse kufelisa maikuto acwalo kono amife ‘kozo ya Mulimu yesileleza lipilu zaluna ni maata aluna a kunahana.’ (Mafil. 4:6, 7) Mi muhupule kuli haki mina feela babaikutwa cwalo. Mizwale ni likaizeli babasepahala babañwi ni bona banani maikuto acwalo. Mane nihaiba batanga ba Jehova ba  kwamulaho bakile baba ni maikuto aswana. Halunyakisiseñi zelukona kuituta kwa mutala wa muapositola Paulusi.

7. Ki butata mañi bwanaakopani ni bona Paulusi?

⁷ Kana fokuñwi muikutwanga kuimezwa kabakala kuli munani buikalabelo bobuñata, mi muikutwa kuli hamukoni kubupeta kaufelaa bona? Haiba ki cwalo, uzibe mwautwisisa muinelo wanaali ku ona Paulusi. Naaikalezwi za “liputeho kaufela,” isiñi feela puteho iliñwi. (2 Makor. 11:23-28) Kana mukatazwa ki mapongo atahisa kuli musike mwaba ni tabo? Paulusi naanani “muutwa mwa mubili,” ili wo mwendi neli butuku bobuñwi bwanaakula kwa mubili, mi naakupile kuli bufeliswe. (2 Makor. 12:7-10) Kana fokuñwi mwazwafanga bakeñisa mifokolo yamina? Paulusi ni yena fokuñwi naaikutwanga cwalo. Naabulezi kuli naali “mutu yamaibile luli” bakeñisa kuli nako kaufela naatokwa kuikataza kuli aeze sesilukile.—Maro. 7:21-24.

8. Ki lika mañi zenetusize Paulusi kutiyela miinelo yetaata yanaakopani ni yona?

⁸ Nihaike kuli Paulusi naakopani ni miliko yemiñata ni miinelo yezwafisa, naazwezipili kusebeleza Jehova. Ki nto mañi yene mutusize kuitiisa? Nihaike kuli naaziba hande kuli naasika petahala, naanani tumelo yetiile mwa sitabelo sa tiululo. Hape naaziba sepiso ya Jesu ya kuli “mutu kaufela yabonisa tumelo ku [Jesu] . . . [ukaba] ni bupilo bobusa feli.” (Joa. 3:16; Maro. 6:23) Kusina kukakanya, Paulusi naali yomuñwi wa batu bane babonisa tumelo mwa sitabelo sa tiululo. Naanani buikolwiso bwa kuli Jehova ulata kuswalela nihaiba babaezize sibi sesituna, ibile feela babonisa kuli babakile.—Samu 86:5.

9. Luitutañi kwa manzwi a Paulusi añozwi kwa Magalata 2:20?

⁹ Paulusi hape naanani tumelo ya kuli Mulimu naamulata hahulu kakuli naalumile Jesu kuli ato mushwela. (Mubale Magalata 2:20.) Mulemuhe manzwi asusueza anaabulezi Paulusi kwa mafelelezo a timana yeo. Naabulezi kuli: ‘Mwanaa Mulimu . . . naanilatile ni kufana bupilo bwahae kabakala ka.’ Paulusi naasika ikutwa kuli naali mutu yamaswe hahulu kuli mane Mulimu naasakoni kumulata. Naasika nahana kuli Jehova naakona kulata mizwale bahae, kono yena naasike amulata. Paulusi naahupulisize Bakreste ba kwa Roma kuli: “Hane lusali baezalibi, Kreste alushwela.” (Maro. 5:8) Hakuna nto niyekana yekona kupaleliswa Mulimu kululata.

10. Luitutañi kwa manzwi a kwa Maroma 8:38, 39?

 ¹⁰ Mubale Maroma 8:38, 39. Paulusi naanani buikolwiso bobutuna bwa kuli Mulimu unani lilato lelituna. Naañozi kuli hakuna nto niyekana yekona “kulukauhanya kwa lilato la Mulimu.” Naaziba kuli Jehova naabonisize Maisilaele pilu-telele. Hape naaziba kuli Jehova naamushemubile. Ka mubulelelo omuñwi, zanaatalusa Paulusi luli ki ze: ‘Haubona Jehova naalumile Mwanaa hae kuto nishwela, kana naswanela kukakanya kuli Mulimu wanilata?’—Maro. 8:32.

11. Ki kabakalañi Paulusi hanaanani buikolwiso bwa kuli Mulimu naamulata nihaike kuli naaezize libi zecwale ka zebulezwi kwa 1 Timotea 1:12-15?

¹¹ Mubale 1 Timotea 1:12-15. Paulusi mwendi fokuñwi naaikutwanga hahulu bumaswe hanaahupulanga lika zanaaezize kwamulaho asikaba kale Mukreste. Hakukomokisi kuli naaitalusize kuli naali muezalibi “wapili”! Paulusi asika ituta kale niti, naanyandisize hahulu Bakreste kuzwa mwa muleneñi omuñwi kuya ku omuñwi, akwalela babañwi mwa tolongo ni kuyemela katulo ya kuli babañwi ku bona babulaiwe. (Lik. 26:10, 11) Munahane feela mwanaaikutwezi Paulusi haiba naakile akopana ni mutangana, ili yo bashemi bahae nebabulailwe bakeñisa kuli Paulusi naayemezi katulo ya kuli babulaiwe. Paulusi naainyazize hahulu bakeñisa mafosisa anaaezize kwamulaho, kono naaziba kuli naasakoni kucinca mafosisa ao. Naalumela kuli Kreste naamushwezi, mi ka buikolwiso naañozi kuli: “Ki ka sishemo sa Mulimu hanili senili sona.” (1 Makor. 15:3, 10) Luitutañi kwa taba yeo? Mukolwe kuli Jesu naamishwezi mi ukonahalisize kuli mukone kuba ni silikani sesinde ni Jehova. (Lik. 3:19) Sa butokwa ku Mulimu ki lika zelueza ka nako ya cwale ni zeluka eza kwapili, isiñi mafosisa aluna ane luezize kwamulaho,  ibe kuli neluli Lipaki za Jehova ka nako yeo kamba kutokwa.—Isa. 1:18.

12. Manzwi añozwi kwa 1 Joani 3:19, 20 akona kulutusa cwañi haluikutwa kuli halu ba butokwa kamba kuli haluswaneli kulatiwa?

¹² Hamunahana za kuli Jesu naashwezi libi zamina, mwendi mukona kuikutwa kuli hamuswaneli kufiwa mpo yeo. Ki kabakalañi hamukona kuikutwa cwalo? Bakeñisa kuli halusika petahala, pilu yaluna yakona kulupuma, kutahisa kuli luikutwe kuli halu ba butokwa kamba kuli haluswaneli kulatiwa. (Mubale 1 Joani 3:19, 20.) Haiba luikutwa cwalo, luhupule kuli “Mulimu ki yomutuna kufita lipilu zaluna.” Lukona kuikutwa kuli Jehova haalulati kamba kuli haana kuluswalela, kono niti kikuli Ndataa luna ya kwa lihalimu usa lulata mi uka luswalela. Luswanela kuikolwisa kuli Jehova walulata. Kuli lueze cwalo, luswanela kubalanga Linzwi lahae kamita, kulapelanga ku yena, ni kuswalisana ni batanga bahae babasepahala kamita. Ki kabakalañi kueza cwalo hakuli kwa butokwa hahulu?

13. Kuituta Linzwi la Mulimu kulutusa cwañi? (Mubone ni mbokisi yeli, “ Mobatusezwa ki Linzwi la Mulimu.”)

¹³ Muitute Linzwi la Mulimu zazi ni zazi, mi mukaziba tulemeno twa Jehova totunde totuñata. Mukautwisisa kuli umilata hahulu. Kunahanisisa litaba zemubala mwa Linzwi la Mulimu zazi ni zazi kuka mitusa kuba ni mubonelo omunde, ili “kuotolola lika” zemunahana ni ze mwa pilu yamina. (2 Tim. 3:16) Muzwale yabizwa Kevin yasebeza sina muuna-muhulu mwa puteho, ili yanaaikutwanga kuli naasi wa butokwa, utalusa kuli: “Kubala ni kunahanisisa liñolo la Samu 103 kunitusize kuba ni mubonelo oswanela ni kuutwisisa hande mwaniingela Jehova.” Bo Eva, bababulezwi kwamulaho, batalusa kuli: “Zazi ni zazi manzibwana, ninahanisisanga litaba zebonisa mwaangela lika Jehova. Kueza cwalo kunitusanga kuli nibe ni kozo ya mwa munahano mi kutiisanga tumelo yaka.”

14. Tapelo ikona kulutusa cwañi?

¹⁴ Mulapelange ka nako kaufela. (1 Mates. 5:17) Hamubata kuli silikani samina ni mutu yomuñwi sitiye, muswanela kuambolanga ni yena kamita ni kumutaluseza momuikutwela. Luswanela kueza nto yeswana haiba lubata kuli silikani saluna ni Jehova sitiye. Halulapela ku yena kumutaluseza moluikutwela, zelunahana, ni lipilaelo zelunani zona, lubonisa kuli lumusepile mi lwaziba kuli walulata. (Samu 94:17-19; 1 Joa. 5:14, 15) Bo Yua, bababulezwi kwamulaho, batalusa kuli: “Hanilapelanga ku Jehova hani mutalusezangi feela lika zeezahezi lizazi leo. Nimutalusezanga zeninahana ni moniikutwela luli. Kueza cwalo, kunitusize kuli hanyinyani-hanyinyani niinge Jehova sina Ndate yalata bana bahae luli isiñi sina muñaa kampani yetuna yatokwa kubihelwa  misebezi yebapetile babeleki bahae.”—Mubone mbokisi yeli, “ Kana Muibalile?”

15. Jehova ubonisa cwañi kuli waluisa pilu?

¹⁵ Mueze siango ni balikani babande; balikani bao ki mpo yezwa ku Jehova. (Jak. 1:17) Ndataa luna wa kwa lihalimu ulubonisa kuli waluisa pilu ka kulufa mizwale ni likaizeli mwa puteho, ili baba lubonisa “lilato ka nako kaufela.” (Liprov. 17:17) Mwa liñolo lanaañolezi Bakreste ba kwa Kolose, Paulusi naatalusize kuli Bakreste babañwi neba mutusize, mi naabulezi kuli neba ‘muomba-ombile hahulu.’ (Makolo. 4:10, 11) Mane nihaiba Kreste Jesu naatokwa kutusiwa ki balikani bahae, ili mangeloi ni batu, mi naaitebuhile tuso yene bamufile.—Luka 22:28, 43.

16. Balikani babande bakona kulutusa cwañi kuikutwa kuli Jehova walulata?

¹⁶ Kana mwaitusisa hande mpo yamifile Jehova ya kuba ni balikani babande? Kutaluseza mulikanaa luna yahulile kwa moya miinelo yetaata yelukopana ni yona hakutalusi kuli tumelo yaluna yafokola; kono mane kueza cwalo kwakona kulutusa. Halunyakisiseñi zene babulezi bo James bababulezwi kwamulaho, batalusa kuli: “Kuba ni balikani babande babatiile kwa moya kunitusize hahulu. Hanizwafanga, balikani baka babande bao bateelezanga ku na ka tokomelo hani bataluseza moniikutwela, mi banihupulisanga kuli banilata. Habaezanga cwalo, nilemuhanga kuli Jehova wanilata mi waniisa pilu.” Kaniti luli, ki kwa butokwa kuli luzwelepili kuba ni silikani sesinde ni mizwale ni likaizeli baluna!

17-18. Ki mañi yeluswanela kuteeleza ku yena, mi ki kabakalañi?

¹⁷ Satani ubata kuli lutuhele kuikataza kueza sesilukile. Ubata kuli lunahane kuli Jehova haalulati, mi haluswaneli kupiliswa. Kono sina molunyakisiselize, taba yeo haki ya niti.

¹⁸ Jehova wamilata. Mu ba butokwa hahulu ku yena. Haiba mumuutwa, sina Jesu, ‘mukazwelapili mwa lilato lahae’ kuya kuile. (Joa. 15:10) Kacwalo, musike mwateeleza ku Satani kamba kwa pilu yamina yekona kuminyaza kuli hamu batu babande. Kono muteeleze ku Jehova yabonanga tulemeno totunde twanani tona mañi ni mañi waluna. Mube ni buikolwiso bwa kuli Jehova “ulata batu bahae,” kukopanyeleza cwalo ni mina!