KJOAʼMIYA XI CHOTʼAYA 17
Je Jeobá tsjoake nga jngó jngó choʼndale
“Je Jeobá sasénkon je naxinandále” (SAL. 149:4).
KJOAJNDA 108 Je kjoatsjoachale Jeobá
XI TÍNCHJA̱NI *
Je Jeobá tsjoa tjínle xi tʼatsaan (Chótsenlai párrafo 1)
1. Jméni xi kuenta sʼín je Jeobá.
TSJOA satío tokoán nga tsjoa tjínle Jeobá xi kao naxinandále (Sal. 149:4). Je Jeobá kui kuenta sʼín jñani nda nʼia, be nga koa̱nná kʼoasʼiaan xi ndatjín kʼoa miyo tsoná. Tsa kixi kjuintʼalee yaa tjen tíjnakaoná ngantsjai (Juan 6:44).
2. Ánni kʼoasʼin síkjaʼaitsjen kʼani ndsʼee nga tsín tsjoake je Jeobá.
2 Tsakui nichxin tjínkʼa xi i̱ kuitso: “ʼBeña nga tsjoake Jeobá je naxinandále. Tonga a tsjoakena an”. Ánni nga sakʼoa kʼoasʼin síkjaʼaitsjen kʼani je ndsʼee. Kataʼyala je choa̱le Oksana, * xi tse kjoa jaʼatojin nga sʼa ʼndí kji. Itso: “Kʼianga kisʼe̱nngindá kʼoa nga precursora sʼin kisixá nʼio tsjoa kisʼe tokoan. Tonga kʼianga jexjaʼaon nó jaʼato, kui jaʼaitsjenna jmeni xi koantʼen ngasʼa. Kʼoa kʼoasʼin kisikjaʼaitsjen nga tsín tinda tijnaña ngixko̱n Jeobá kʼoa nga tsín bakinna nga tsjoake koa̱nna”. Ijngo tichjaa xi precursora sʼin tísíxá, xi Yua ʼmi, xi kʼoati tse kjoa jaʼatojin nga sʼa ʼndí kji, itso: “Kitsjoatʼale yaona je Jeobá nga̱ kui xi koanmena nga tsjoa katasʼe kon, tonga kʼoasʼin kisikjaʼaitsjen nga tsínkʼia tsjoake koa̱nna”.
3. Jmé xi chótʼayajiaan i̱ kjoaʼmiya jebi.
3 Tojo tso nga jao tichjaa jebi, kʼoajin tinʼio tsjoachaa je Jeobá, tonga tsakui nichxin kʼoasʼin nikjaʼaitsjeen nga tsín tsjoakená. I̱ kjoaʼmiya jebi kui chótʼayajiaan nga jao koya jebi: ánni machjénni nga kʼoéjngoaa tokoán nga tsjoakená je Jeobá, kʼoa jméni xi sʼiaan tsa to jao sʼená nga tsjoakená.
ALIKUI JAO KʼOÉ TOKOÁN NGA TSJOAKENÁ JE JEOBÁ
4. Ánni tsín ndatjínni tsa jao kʼoé tokoán nga tsjoakená je Jeobá.
4 Tsa ñaki kʼoatjío tokoán nga tsjoakená je Jeobá, tosi tondajin je si̱xálee ninga tse kjoa kuitjátojiaan. Tonga tsa to jao sʼe̱ná nga tsjoakená je Jeobá, kjuinroajenjin tokoán (Prov. 24:10). Tsa si̱kinroajeen tokoán kʼoa kʼoasʼin si̱kjaʼaitsjeen nga tsín tsjoakená je Jeobá, ngisajin ñʼai koa̱nná nga chókjoajinná jmeni xi koatiobasenná je Na̱i (Efes. 6:16).
5. Jóma kʼa je ndsʼee nga kʼoasʼin síkjaʼaitsjen nga tsín titsjoakeni je Jeobá.
5 Tjínkʼa ndsʼee xi kʼoasʼin síkjaʼaitsjen nga tsín titsjoakeni je Jeobá kʼoa kui nroajenni je kjoamakjainle. Jngo ndsʼee xi chjotajchínga sʼin tíjna, xi James ʼmi, itso: “Ningalani ya Betel kisixá kʼoa ya kitsjoanganʼioa ya jtín jñani kjaʼaí én nokjoa, kui kisikjaʼaitsjen tsa ñaki sasén kjoaixile je Jeobá jme xi tisʼian. Saʼnda kʼoasʼin kisikjaʼaitsjen nga tsín nrʼoéna kʼianga bʼetsʼoale”. Je tichjaa xi Eva ʼmi, xi kʼoati to xále Niná tísʼín, itso: “Alikui titsjoa sʼeni tokoán kʼianga nixálee je Jeobá tsa jao sʼená nga tsjoakená”. Kʼoa jngo ndsʼee xi Michael ʼmi, xi precursor regular sʼin tísíxá kʼoa xi chjotajchínga sʼin tíjna, itso: “Tsa tsín tjínjngo tokoán nga mandosinle Niná xi tʼatsaan bijbi makjinlee”.
6. Jmé xi sʼiaan tsa sakʼoa kʼoasʼin nikjaʼaitsjeen nga tsín tsjoakená Niná.
6 Tojo tso je ndsʼee xi jekanikʼaxkiaa, alikui nda bichómani tsa kʼoasʼin si̱kjaʼaitsjeen nga tsín tsjoakená Niná. Tokjoan kʼoakʼuínlee je Jeobá nga katabasenkaoná tsa jekʼoasʼin tinikjaʼaitsjeen nga tsín titsjoakeniná. Kʼoakʼuínlee nga katabasenkaoná nga nda katasʼe tokoán, kʼoa nga tsín tikʼoasʼin si̱kjaʼaitsjenñá (Sal. 139:23; nota; Filip. 4:6, 7). Kʼoati kuenta sʼiaan nga tjín je ndsʼee xi kʼoati satío kon nga tsín tsjoake je Jeobá. Kʼoati tsakatio kʼa nichxin kjoatse je choʼndale Jeobá xi kʼoati kisatio kon. Kataʼyala je choa̱le pastro Pablo.
XI BAKÓYANÁ CHOA̱LE PABLO
7. Jmé kjoa xi jaʼatojin Pablo.
7 Kʼianga tse xá kjinená, a sakʼoaa kʼoasʼe tokoán nga tsín kuitjosonná. Kʼoakisʼe kon je pastro Pablo. Kʼoakitso nga nʼio koankjáojinle xi tʼatsʼe ngatsʼi chjotale Cristo (2 Cor. 11:23-28). Kʼiatsa táo chʼin bʼetʼaná, a sakʼoaa tsín tsjoa satío tokoán. Je pastro Pablo kʼoati kichobele nga tse kjoa jaʼatojin, tsakui nichxin chʼin tsakʼetʼale (2 Cor. 12:7-10). Joni Pablo, a sakʼoa nikinroajeen tokoán tʼatsʼe jñani tsín nda nʼia. Kʼoakitso nga tsín nda kisʼe kon nga̱ tsín choa ñʼai koanle nga kui kʼoakisʼin xi ndatjín (Rom. 7:21-24).
8. Jmé xi tsakasenkao je Pablo nga tosi tonda kisixále je Jeobá ninga tse kjoa jaʼatojin.
8 Ningalani nʼio tse kjoa jaʼatojin je Pablo tosi tonda je Jeobá kisixále. Je xi tsakasenkao nga kichokjoajinle je kjoa xi jaʼatojin kuinga koankjainle nga je Jesús tsakʼéchjíntjainá. Kʼoati be nga kʼoakitso je Jesús nga sʼe̱le kjoabijnachon ngantsjai ngatsʼi xi koa̱nkjainle xi tʼatsʼe (Juan 3:16; Rom. 6:23). Koankjainle Pablo nga jetsakʼéchjíntjainá je Jesús, kʼoa ñaki kʼoatsakʼé kon nga síchatʼaná je Jeobá tsa kʼoamaniná ninga ai jée kabijnyaa (Sal. 86:5).
9. Jmé xi bakóyaná jokitso je Pablo tojosʼin faʼaitʼa Gálatas 2:20.
9 Je Pablo ñaki kʼoatsakʼé kon nga nʼio tsjoake Niná, nga̱ koankjainle nga je Niná kisikasén ʼNdíle nga kʼienntjai. Nʼio tsjoánganʼioná jmeni xi tso jña to jefetʼani Gálatas 2:20 * (tʼexkiai). Je Pablo i kitso: “ʼNdíle Niná, xi tsjoake koanna kʼoa xi kitsjoa kjoabijnachonle xi totʼatsʼan”. Je Pablo alikui kʼoasʼin kisikjaʼaitsjen nga tsínkʼia tsjoake koa̱n je Niná. Alikui i̱ kitso: “ʼBeña nga tsjoake Jeobá je ndsʼe, tonga alikuila kʼia tsjoake koa̱nna an”. Tosaa i̱ kitsole je chjotale Cristo xi Roma tsʼe: “Cristo kʼen xi tʼatsaan, kʼia nga tojo chjotajée nía” (Rom. 5:8). Je Niná tsjoakená ngantsjai.
10. Jmé xi bakóyaná Romanos 8:38, 39.
10 (Tʼexkiai Romanos 8:38, 39). * Je Pablo ñaki kʼoatsakʼé kon nga tsjoakená je Niná. Itso xi kiski: “Nitojngojinsa xi xá kisʼendani xi koa̱n kjoaʼaxinná je kjoatjaochale Niná”. Koanjinle nga nʼio tsejta koan je Jeobá xi kao chjota israelita. Kʼoati be je Pablo nga tsakakóle kjoamatokon je Niná. Joxi ini kitso je Pablo: “Tsa je Jeobá kisikasén je ʼNdíle nga an kʼienntjaina, alikuijin koa̱n jao kʼoe tokoan nga nʼio tsjoakena” (Rom. 8:32).
Je xi kuenta sʼín Niná kui jmeni xi tinʼia ndʼaibi kao jmeni xi sʼiaan nichxin xi sʼa nroa, ali tsakuijin jmeni xi kinʼia ngasʼa (Chótsenlai párrafo 11) *
11. Ningalani kui kʼoakisʼin je Pablo jmeni xi síkʼaxki̱ 1 Timoteo 1:12-15, ánni ñaki kʼoatsakʼéni kon nga tsjoake je Niná.
11 (Tʼexkiai 1 Timoteo 1:12-15). * Sakʼoajin tsín nda kisʼe kon je Pablo jmeni xi kisʼin ngasʼa. Kʼoakitso nga je xi ngisasa tse jée tsakajngi. Nga kjesa chjotale Cristo majin, nʼio kitjenngike je chjotale Cristo, totaon tsabe, tjínkʼa xi ndoyá kisikatíoʼya kʼoa saʼnda kitsjoanganʼio nga kinikʼien kʼa (Hech. 26:10, 11). Si̱kjaʼaitsjenla jókisʼe kon je Pablo kʼiatsa tsabexkon nga koanskanni je tile chjotale Cristo xi kʼoakinikao. Tonga kʼoati koanjinle nga tsín tikoa̱n sikʼantjaiyani jmeni xi kisʼin ngasʼa. Ñaki kʼoatsakʼé kon nga je kʼienntjai Cristo, kʼoa i kitso: “Kao kjoandale Niná kʼoakjoan jo kjoan” (1 Cor. 15:3, 10). Jebi kui bakóyaná nga tjínnele kʼoéjngoaa tokoán nga ñá kʼienntjainá je Jesús, kʼoa nga kʼoakisʼin koaan miyole Jeobá koaan (Hech. 3:19). Je xi kuenta sʼín Niná kui jmeni xi tinʼia ndʼaibi kʼoa jmeni xi sʼiaan nichxin xi sʼa nroa, ali tsakuijin bʼéjinkon jñani tsín nda kinʼia ninga jetestigole Jeobá maa kʼoa ninga kje (Is. 1:18).
12. Tojo tso 1 Juan 3:19, 20, jméni xi tjínnele sʼiaan tsa kʼoasʼin nikjaʼaitsjeen nga tsín jme chjíná kʼoa nga tsín bakinná nga tsjoacha koa̱nná.
12 Sakʼoajin kʼoasatío tokoán nga tsín jme chjíná kʼoa nga tsín bakinná nga sa̱kóná kjoatsjoacha (tʼexkiai 1 Juan 3:19, 20). * Tsakui nichxin kʼoasʼin si̱kjaʼaitsjeen nga tsín sichatʼaná je Niná ningalani kʼienntjainá je Jesús. Kʼiatsa kʼoasatío tokoán, si̱kjaʼaitsjenjiaan nga “ngisa ngʼa tíjna Niná kaoni tsa ni̱ma̱ná”. Je Niná tsjoakená kʼoa síchatʼaná ningalani kʼoasatío tokoán nga tsín síchatʼaná kʼoa nga tsín tsjoakená. Kuinga machjénni nga kʼoéjngoaa tokoán. Nyaon nyaon kʼoéxkiaa je Énle Niná, kjitʼa kʼoétsʼoaa, kʼoa si̱kʼayalee nichxin je ndsʼee. Kataʼyala ánni nga nʼio chjínile nga kʼoasʼian.
JÓSʼIN BASENKAONÁ NGA CHOTʼAYÁ, NGA BʼETSʼOAA KʼOA KAO JE NDSʼEE
13. Jósʼin binyakaoná kʼianga ntsjaintsjai chotʼayá je Énle Niná (kʼoati chótsenlai je recuadro “ Jósʼin binyakao je Énle Niná”).
13 Nyaon nyaon chótʼayá je Énle Niná. Tsa kʼoasʼiaan, jchañá jokjoan je Jeobá kʼoa kʼoati jchaa nga nʼio tsjoakená. Tsa si̱kjaʼaitsjenjiaan jmeni xi tso je Biblia koasenkaoná nga nda si̱kjaʼaitsjeen kʼoa nga sʼe̱jngo tokoán (2 Tim. 3:16). Jngo ndsʼee xi chjotajchínga sʼin tíjna xi Kevin ʼmi, xi tsín nʼio chjí tsabekon yaole, itso: “Kʼianga bʼexkia kʼoa nga sikjaʼaitsjenjian jmeni xi tso Salmo 103, ngisaa bʼéjngo tokoan josʼin síkjaʼaitsjen Jeobá xi tʼatsʼan”. Je Eva, xi sa jekanikʼaxkiaa ya párrafo 5, itso: “Kʼianga jemaxon kui sikjaʼaitsjenjian jméni xi ngisa chjí be je Jeobá. Kui xi nda bʼé tokoan kʼoa xi nʼio síkʼéjna kjoamakjainna”.
14. Jósʼin basenkaoná nga bʼetsoaa.
14 Kjitʼa kʼoétsʼoaa (1 Tes. 5:17). Nga tjínná miyo kjitʼaa chjakaonajmiá. Kʼoatisʼinni xi kao Jeobá, tjínnele kjitʼa chja̱kaonajmiá. Kʼianga kʼoaʼmilee jotjín tokoán, jmeni xi nikjaʼaitsjeen kʼoa jmeni xi makjáojinná, kʼoasʼin bakonilee nga je ninʼiotʼaa kʼoa nga ʼyaa nga tsjoakená (Sal. 94:17-19; 1 Juan 5:14, 15). Je Yua, xi sa jekanikʼaxkiaa ya párrafo 2, itso: “Kʼianga bʼetsʼoale Jeobá bʼeyanajmíle jmeni xi kasʼian bʼajnda nichxin kʼoa kʼoaxinle jotjín tokoan. ʼNdele nga tokʼoasʼin skoekoan je Jeobá joni jngo chjota xi fábrica séntítjonle, tosaa kʼoasʼin ʼbekoan joni jngo Nʼai xi nʼio tsjoake je ʼndíxtile” (chótsenlai je recuadro “ A jetsakʼexkiai”).
15. Jósʼin bakó je Jeobá nga mandosinle xi tʼatsaan.
15 Si̱kʼayalee nichxin je ndsʼee, nga̱ jngoo kjoatjao xi je Jeobá tsjoáná (Sant. 1:17). Je Jeobá kʼoasʼin bakóniná nga mandosinle xi tʼatsaan nga tjío je ndsʼee kao tichjaa xi tsjoakená (Prov. 17:17). Kʼianga kiskile chjotale Cristo xi Colosas tsʼe, je Pablo kisikʼaxki kʼa je ndsʼe̱ xi kitsjoanganʼiole (Col. 4:10, 11). Je Jesús kʼoati koanchjénle nganʼiole miyole kʼoa kitsjoaa kjoanda nga tsakinyakao je ánkje kʼoa kao je chjota (Luc. 22:28, 43).
16. Jósʼin basenkaoná je ndsʼee nga nichriantʼalee Jeobá.
16 A kʼoaʼmilee je ndsʼee xi tjío ya jinjtín nga katabinyakaoná. Koaan kʼoéyanajmílee jmeni xi makjáojinná jngo ndsʼee xi nda tísíxále Niná. Nga kʼoanʼia, ali tsakuijin xi tsonile nga tínroajen kjoamakjainná. Kuentala sʼiaan jmeni xi tso je James, xi sa jekabʼaxki̱ ya párrafo 5, itso: “Nʼio basenkaona nga je simiyoa ndsʼee xi nda tjíosíxále Niná. Kʼianga tsín nda sʼe tokoan, je ndsʼee ngasin nganda nrʼoéna kʼoa kʼoasʼin ʼbeña nga mandosinle xi tʼatsʼan. Kʼoasʼin ʼbeña nga tsjoakena Jeobá kʼoa nga mandosinle xi tʼatsʼan”. Nʼio binyakaoná nga nimiyoaa je ndsʼee.
TOSI TONDA KATASʼENÁ KJOATSJOACHALE NINÁ
17, 18. ʼYáni xi tjínnele kuinóʼyalee, kʼoa ánni.
17 Je Na̱i kui xi mele nga si̱kʼajenlee tokoán kʼoa nga kui kʼoasʼiaan xi chʼaotjín. Kui xi mele nga kʼoasʼin si̱kjaʼaitsjeen nga tsín tsjoakená je Jeobá, kʼoa kʼoatso nga tsín bakinná nga kuitjo̱ntjé. Tonga tojosʼin tiʼyaa, alikui kʼoatjín jebi.
18 Je Jeobá tsjoakená, kʼoa nʼio chjí bekon nga jngó jngó je choʼndale. Tsa si̱tjosonlee je Jeobá, tsjoake koa̱nná ngantsjai josʼin tsjoake je Jesús (Juan 15:10). Alikui kuenta sʼiaan jmeni xi tso je Na̱i kʼoa tsínkui kjuinñá tsa kʼoasatío tokoán nga tsín tsjoakená je Jeobá. Tosa je Jeobá kuinóʼyalee, nga̱ kui kuenta sʼín jñani nda nʼia. Ñaki kʼoakʼoé tokoán nga tsjoa tjínle xi tʼatsaan.
KJOAJNDA 141 Je kjoabijnachon jngoní kjoatjao
^ párr. 5 Tjínkʼa ndsʼee xi kʼoasʼin síkjaʼaitsjen nga tsín tsjoake je Jeobá. I̱ kjoaʼmiya jebi kui jchaa ánni kʼoéjngosíñá tokoán nga tsjoakená Jeobá nga jngó jngoá. Kʼoati jchaa jósʼiaan kʼianga kʼoasʼe tokoán nga tsín tsjoakená je Jeobá.
^ párr. 2 Alikui tsa ñaki kʼoaʼmi kʼa chjota xi bʼaxki̱ i̱bi.
^ párr. 9 Gálatas 2:20 (TNM): “Joxi yaa kʼoati kʼientʼakoa yá je Cristo. Alikui tiʼanña xi tijnakoan, totʼatsʼe Cristo nga tijnakoan. Kʼoa kʼoasʼin fikoa yaona ndʼaibi nga makjainna tʼatsʼe ʼNdíle Niná, xi tsjoake koanna kʼoa xi kitsjoa kjoabijnachonle xi totʼatsʼan”.
^ párr. 10 Romanos 8:38, 39: “Tokui jebi ñaki tjíjngole koan, nga nikjoabiyajin, nikjoabijnachonjin, niʼánkjejin, ni xi ngʼajko̱lejin, nijejin xi tjínle nganʼio, ni xi ndʼaibijin, nije xi sʼa nroajin, 39 ni xi ngʼajin, ni xi nangijin, nitojngojinsa xi xá kisʼendani xi koa̱n kjoaʼaxinná je kjoatjaochale Niná nga tiyokoaa Cristo Jesús Nainá”.
^ párr. 11 1 Timoteo 1:12-15: “Tsjoale kjoanda je xi kitsjoana nganʼio, Cristo Jesús Nainá, nga̱ kʼoasʼin nʼiotʼakonna nga tsakaséjnana je xábi. 13 Ngasʼa kinchjaʼoan Cristo, kitjenngikontrale, taon tsaʼbe, tonga tsabemakonna, nga̱ tjíchjoa xkoan nga kʼoakisʼian, nga̱ tsínkui koankjainna. 14 Tonga je kjoandale Nainá kjaínga koannkjínyana josʼin nga makjainna josʼin nga tsjoake̱ nga tijnakoa Cristo Jesús. 15 Je énbi xi ñaki kʼoatjín, xi bakinle nga chjóbé ngatsʼiaa: Cristo Jesús jaʼai i̱ sonʼndebi, jaʼaikʼasjentjai chjotajée. An nía xi chjotajéetítjoan”.
^ párr. 12 1 Juan 3:19, 20: “Kʼoasʼin ʼyanía nga ñábi tsʼe xi kjoakixi, kʼoa nʼio nda tíjna ni̱ma̱ná ngixko̱n nga je. 20 Tsa ni̱ma̱ná bánginá, ngisa ngʼa tíjna Niná kaoni tsa ni̱ma̱ná. Je ñaki be ngayije kjoa”.
^ párr. 71 XI TÍNCHJA̱NI SÉN XI FAʼAITʼA: Nga kjesa bejin xi tʼatsʼe Niná je Pablo, nkjín chjotale Cristo xi ndoyá kisikatíoʼya. Kʼianga koanjinle nga ngatsʼiaa kʼienntjainá je Jesús, kisikʼantjaiya yaole kʼoa kitsjoanganʼiole je ndsʼe̱. Tsakui nichxin je chjotale Cristo xi tsakinyakao Pablo xínkjín ma kʼani je xi kitjenngike ngasʼa.
