1. ¿Ti yˈijxypyë Jyobaa mä nyax kyäjpn?

¡JANTSY agujk jotkujk nnayjyäˈäwëm ko ‘Dios tyukxondakypy yëˈë nyax kyäjpn’! (Sal. 149:4, TY). Yëˈë yˈijxypy ko mbäät nmëdäjtëmë oybyë jäˈäyˈäjtën ets ko xypyudëkëyäˈänëm parë mëët nnaymyaˈayëm. Xëmë wingon yajpäädäˈäny mët ëtsäjtëm pën kyaj nmastutëm (Fwank 6:44).

2. ¿Tiko näägë nmëguˈukˈäjtëm tsip tmëbëktët ko tsojkëdëbë Jyobaa?

² Mbäät pën wyinmay: “Nnijäˈäwëbëts ko Jyobaa tsyojkypyë nyax kyäjpn. Per ¿wiˈixëts nnijawë ko xytsyojkpëts?”. ¿Tidaa ko näägë nmëguˈukˈäjtëm duˈun wyinmaytyë? Min nˈokˈijxëm wiˈix jyënaˈanyë Oksana, * diˈib axëëk jäjt këbajt ko myutskˈäjty, yëˈë jyënaˈany: “Kots nnëbejty, tats nduundëjkë prekursoora ets agujk jotkujkëts njantsy nyayjyäˈäwë. Per kyum 15 jëmëjt, tats njamyajtstääy wiˈixëts të nyeeky të nbety, nwinmääyëts ko kyajtsë Jyobaa xykyupëky ets ko kyajts xynyitëkë parëts xytsyokët”. Jatuˈugë prekursoora diˈib xyëwˈäjtypy Yua, nan pyatë amay jotmay ko myutskˈäjty. Yëˈë jyënaˈany: “Ndukwandakëtsë njukyˈäjtënë Jyobaa parëts agujk jotkujk nyajnayjyawëyaˈanyëty, per ijtpëtsë nety seguurë ko ninäˈäts xykyatsokäˈäny”.

3. ¿Ti nˈatsoowëmbitäˈänëm mä tyäˈädë artikulo?

³ Ëtsäjtëm, nan mëk ntsojkëmë Jyobaa duˈun extëmë tyäˈädë nimajtskpë nmëguˈukˈäjtëm, per waˈanë net nwinmäˈäyëm ko kyaj xytsyojkëm. ¿Tiko mbäät nˈijtëm seguurë ko  Jyobaa xyjyantsy tsyojkëm? Ets ¿ti mbäät xypyudëjkëm pën nwinmäˈäyëm ko kyaj xytsyojkëm? Min nˈokˈijxëm wiˈix yaˈˈatsoowëmbitäˈäny mä tyäˈädë artikulo.

4. ¿Tiko kyujotmayëty ko ngaˈijtëm seguurë ko Jyobaa xytsyojkëm?

⁴ Pën ijtëm seguurë ko Jyobaa xytsyojkëm, ta niˈigyë nmëdunäˈänëm, oy nuˈun nbatëmë amay jotmay. Per pën kyaj nˈijtëm seguurë ko xytsyojkëm, ta kyaj nekymyëdatäˈänëmë jot mëjääw (Prov. 24:10). Pën ëxtëkëwäˈkëm ets nyajtëjkëm mä jot winmäˈäny ko Jyobaa kyaj xynyekytsyojkëm, ta kyaj nekymyëdatäˈänëmë jot mëjääw ko netyë Satanás xynyibëdëˈkëm (Éfes. 6:16).

5. ¿Wiˈix näägë nmëguˈukˈäjtëm të jyattë ko kyaˈittë seguurë ko tsojkëdëbë Jyobaa?

⁵ Näägë nmëguˈukˈäjtëm të xyaamdë myëbëjkën, mët ko wyinmaytyë ko Jyobaa kyaj tsyokëdë. James, tuˈugë nmëguˈukˈäjtëm diˈib tuump mëjjäˈäy, jyënaˈany: “Ndunyëts Betel ets nˈyeˈeyëts mä tuˈugë kongregasionk mä wiink ayuk yajkajpxy, per kyajtsë nety nˈity seguurë pënë Jyobaa kyupëjkypy tijatyëts ndukmëduumpy. Axtë winmääyëts ko kyaj tnekymyëdoowˈity kots njamënuˈkxtaˈaky”. Eva, diˈib nenduˈun tuump Betel, jyënaˈany: “Kujotmay ko ngaˈijtëm seguurë pën xytsyojkëmë Jyobaa, yëˈko mbäädë net kyaj ti nekytyukmëdunäˈänëm ets kyaj nekytyukxondakëm ja tyuunk”. Michael, jatuˈugë nmëguˈukˈäjtëm diˈib tuump mëjjäˈäy ets prekursoor regulaar, jyënaˈany: “Pën kyaj mˈity seguurë ko Dios mmëmääy mmëdäjëp, ta wanaty wanaty xymyëjagamgaˈagäˈäny”.

6. ¿Ti mbäät nduˈunëm pën winmäˈäyëm ko kyaj xytsyojkëmë Jyobaa?

⁶ Extëmë tyäˈädë nmëguˈukˈäjtëm jyënäˈändë, yëˈë xytyukˈijxëm ko kujotmay nwinmäˈäyëm ko kyaj xytsyojkëmë Jyobaa. ¿Ti mbäät nduˈunëm ko duˈun nwinmäˈäyëm? Tsojkëp netyë nyajpëtsëˈëmëm mä jot winmäˈäny. Nˈokˈanmäˈäyëmë Jyobaa parë xymyoˈoyëmë agujkˈäjt jotkujkˈäjtën, tkuwäˈänëdë jot korasoon etsë jot winmäˈäny parë “kyaj nmëmäˈäy nmëdäjëm tijaty” (Sal. 139:23; notë; Filip. 4:6, 7). Jamyats ko ta nmëguˈukˈäjtëm diˈib nenduˈun nayjyäˈäwëdëp ko kyaj tsyokëdë Jyobaa. Ets nenduˈun nyayjyäˈäwëdë näägë Dios mëduumbë diˈib tëëyëp jukyˈäjttë. Per min nˈokˈijxëm ti xytyukniˈˈijxëmë yˈijxpajtënë apostëlë Pablo.

7. ¿Tijaty jotmay pyatë Pablo?

⁷ ¿Jantsy mayë tuunk xynyikëjxmˈaty ets mjäˈäwëp ko kyaj mbäät xynyekytyuundäˈäy? Pën duˈun, mjaygyukëyaampy extëm nyayjyäˈäwë apostëlë Pablo. Yëˈë jyënany ko kyaj nety jeˈeyë tmëmay tmëdäjy tuˈugë kongregasionk, nenduˈunë “nmëjotmaybyaaty nidëgekyë pënëty yˈaxäjëdëp ja Jesus extëmë Kristë” (2 Kor. 11:23-28). ¿Jam ti päˈäm xymyëdaty diˈib kyaj mˈokniwatsënë ets mbëjkxëp ja jotkujkˈäjtën? Pablo waˈanë nety yajpääty yuumëët päˈämmëët, pääty jyënany: ‘Jëduˈun pyiky yˈatony maajëts niniˈkxën ijxtëm apynyën’, ets axëëk yajnayjyäˈäwë mët ko kyaj nety mbäät yˈagëdaˈaky (2 Cor. 12:7-10, TY). ¿Axëëk näˈäty nnayjyäˈäwëm mët ko kyaj oy tijaty nduˈunëm? Pablo nenduˈun näˈäty nyayjyäˈäwë, yëˈë jyënany: “¡Përoobë ëj”. Pääty duˈun jyënany, yëˈko xëmë nety tsyiptakxëty ttunët diˈib oy (Rom. 7:21-24).

8. ¿Ti Pablo pudëjkë parë tmëduunˈadëtsyë Jyobaa oy nuˈun tpatyë amay jotmay?

⁸ Oy nuˈun tpatyë amay jotmayë Pablo, duˈunyëm tmëduunˈadëtsyë Jyobaa. ¿Pënën mooyë jot mëjääw? Pablo wäˈätsë nety tnijawë ko näˈäty kyaj oy tijaty ttuny, per myëbëjk ko Jesus ojts xykyuˈoˈkëm. Nan nyijäˈäwëbë nety wiˈixë Jesus jyënany ko niˈamukë pënaty mëbëjkëp, jukyˈattëp winë xëëw winë tiempë (Fwank 3:16; Rom. 6:23). Tyäˈädë yëˈë xytyukˈijxëm ko Pablo jyantsy myëbëjkën ko Jesus ojts xyjyuuybyëtsëˈëmëm. Ets ijtpë nety seguurë ko Jyobaa pyokymyaˈkxaampy axtë pënaty mëjwiin kajaa të pyokytyundë, per net pën jodëmbijttëp (Sal. 86:5).

9. ¿Ti xytyukniˈˈijxëm extëm jyënaˈanyë Galasyʉ 2:20?

⁹ ¿Tiko Pablo yˈijty seguurë ko mëkë nety tsyokyëtyë Jyobaa? Yëˈko tkejxyë yˈUˈunk parë kyuˈoogëdët (käjpxë Galasyʉ 2:20). Okˈix wiˈix jyënaˈanyë tyäˈädë tekstë mä jyëjpkëjxnë, Pablo jyënany: “Kristë [...] mët ko yëˈëts xytsyojk es nyayäjkë wintsëˈkën mët ëjtskyëjxm”. Pablo kyaj wyinmääy ko tsip parë Dios tsyokëdët ets kyaj jyënany: “Jyobaa tsyojkypyëtsë nmëguˈuktëjk, per ëjts tsipëts xytsyokët”. Pes duˈun tˈanmääy ja romanë jäˈäyëty: “Jesukristë oj xykyuˈoˈkëm määnëmë nety nbojpëjäˈäyˈäjtëm” (Rom. 5:8). Extëm nˈijxëm, Jyobaa niˈamukë xytsyojktäˈäyëm.

10. ¿Ti xytyukniˈˈijxëmë Romanʉs 8:38, 39?

¹⁰ (Käjpxë Romanʉs 8:38, 39). Pablo ijt seguurë ko mëkë nety tsyokyëtyë Dios. Pääty  tkujäˈäyë ko “nitii mbäät xykyatukmastutëm ja tsyojkën ja Dios”. Nyijäˈäwëbë nety ko Jyobaa nëgooyë ojts tmëmaˈkxtujknë ja israelitëty ets ko yëˈë mëjwiin kajaa nety të pyaˈˈayoyëty. Duˈunxyëp extëm jyënany: “Jyobaa kyajxë yˈUˈunk parëts xykyuˈook xykyutëgoyët. Pääty, ijtpëts seguurë ko yëˈë xytsyojkpëts” (Rom. 8:32).

11. Mä 1 Timotee 1:12-15 yajmaytyaˈaky ko Pablo pokytyuun, ¿per tiko yˈijty seguurë ko tsojkëbë netyë Jyobaa?

¹¹ (Käjpxë 1 Timotee 1:12-15). Waˈan näˈätyë Pablo axëëk jyantsy nyayjyäˈäwë ko tjamyejtsy tijatyë nety të ttuny mä kyajnëm tpanëjkxyë Jesus. Pääty jyënany: “Mä dëˈëmbë pyekyjyaˈayëty nik niˈigyë axëëk ëj”. Pyajëdijt ja Dios mëduumbëty mä kanäägë it lugäär, nääk tsyuum myäjts ets axtë ojts tniˈanaˈamë parë yˈooktët (Apos. 26:10, 11). Okpawinmay wiˈixxyëp jantsy axëëk nyayjyäˈäwë Pablo, koxyëp tˈixyˈajty tuˈugë mixyuˈunk diˈib ja tyääk tyeety yaˈoˈkëdë jäˈäy mët ko yëˈë ojts tniˈanaˈamë. Perë Pablo nyijäˈäwëbë nety ko diˈib të ttuny, të kyexy nyaxy. Ijt seguurë ko Kristë të nety tjantsy kyëyakyë jyukyˈäjtën mët yëˈëgyëjxm. Pääty tkujäˈäyë: “Dios tëts xymyayˈaty xykyuniˈxy esëts xypyëjtaky extëmë apostëlë” (1 Kor. 15:3, 10). ¿Ti xytyukniˈˈijxëmë yˈijxpajtën? Tsojkëp nˈijtëm seguurë ko Kristë ojts xykyuˈoˈkëm niduˈuk niduˈuk ets mbäädë net mëët nnaymyaˈayëmë Jyobaa (Apos. 3:19). Jyobaa kyaj yëˈë tˈixy wiˈix të njukyˈäjtëm o pën ojts ti nduˈundëgoˈoyëm ko nety të nnijäˈäwënë ja tëyˈäjtën, diˈibën yˈijxypy yëˈë wiˈix tyam njukyˈäjtëm ets ti ndunäˈänëm mä tiempë myiny kyëdaˈaky (Is. 1:18).

12. Extëm jyënaˈanyë 1 Fwank 3:19, 20, ¿ti mbäät nduˈunëm pën nnayjyäˈäwëm ko kyaj ti ntsoowˈäjtëm o ko kyaj xynyitëjkëm parë nyajtsojkëm?

¹² Mbäät näˈätyë jot korasoon xywyinˈëˈënëm mët ko nbokyjyaˈayˈäjtëm, etsë net nwinmäˈäyëm ko kyaj ti ntsoowˈäjtëm o ko  kyaj xynyitëjkëm parë nyajtsojkëm (käjpxë 1 Fwank 3:19, 20). Axtë mbäädë net nwinmäˈäyëm ko mëjwiin kajaa të ndëgoˈoyënë ets ko kyaj mbäät nekytyukˈoyˈäjtëm ko Jesus ojts xykyuˈoˈkëm. Ko duˈun nnayjyäˈäwëm, nˈokjamyajtsëm ko “Dios niˈigyë myëjjëty es këdiinëm ëtsäjtëmë njotˈäjt nwinmäˈänyˈäjtëm”. NDeetyˈäjtëmë tsäjpotmëdë, mëjwiin kajaa xytsyojkëm ets xypyokymyaˈkxëm, oy näˈäty nwinmäˈäyëm ko kyaj xytsyojkëm ets ko tsip xypyokymyaˈkxëm. Oy ko nˈijtëm seguurë ko xytsyojkëmë Jyobaa. ¿Ti mbäät xypyudëjkëm? Ko bom bom nˈëxpëjkëmë Biiblyë, xëmë nnuˈkxtakëm ets nyajnäjxëmë tiempë mëdë nmëguˈukˈäjtëm. Min nˈokˈijxëm tiko jyëjpˈamëty ets duˈun nduˈunëm.

13. ¿Wiˈix xypyudëjkëm ko nˈëxpëjkëmë Biiblyë? (Ix nenduˈunë rekuäädrë “ Wiˈix xypyudëjkëm ko nˈëxpëjkëmë Diosë yˈAyuk”).

¹³ Nˈokˈëxpëjkëmë Biiblyë bom bom. Pën nduˈunëm duˈun, ta niˈigyë Jyobaa nˈixyˈatäˈänëm ets nbëkäˈänëmë kuentë ko mëjwiin kajaa xytsyojkëm. Ko tuˈuk tuˈugë xëëw nbawinmäˈäyëm wiˈix jyënaˈanyë Biiblyë, xypyudëkëyäˈänëm parë nwinmäˈäyëm yajxon ets “nyaˈoˈoyëm” ja jot winmäˈäny etsë jot korasoon (2 Tim. 3:16). Kevin, diˈib tuump mëjjäˈäy, kyaj ijty nyayajtsobäätyëty, yëˈë jyënaˈany: “Kots ngajpxyë Salmo 103 etsëts nbawinmay, yëˈëts xypyudëjkëp parëts njaygyukë wiˈixëtsë Jyobaa xyˈixy etsëts nnayajtsobäädëdët”. Eva, diˈib të yajmaytyaˈaky mä parrafo 5, jyënaˈany: “Ko tsyuˈujënë, tats njuuytyë tiempë parëts nbawinmay wiˈixë Jyobaa tijaty tˈixy. Tyäˈädë, yëˈëts xyajnayjyäˈäwëp agujk jotkujk ets yajkëktëjkëbëtsë nmëbëjkën”.

14. ¿Wiˈix xypyudëjkëm ko nnuˈkxtakëm?

¹⁴ Nˈoknuˈkxtakëm xëmë (1 Tes. 5:17). Ko tuˈugë jäˈäy njantsy myëtnaymyaayëbëˈatäˈänëm xëmë mëët ngäjpx nmaytyakëm ets ndukˈawäˈänëm wiˈix nnayjyäˈäwëm, nenduˈunën jyaty mëdë Jyobaa. Ko ndukmëtmaytyakëm wiˈix nnayjyäˈäwëm, ti nwinmäˈäyëm ets tijaty nmëmäˈäy nmëdäjtëm, ta nyajnigëxëˈkëm ko ndukˈijxpajtëm ets ko ijtëm seguurë ko xytsyojkëm (Sal. 94:17-19; 1 Fwank 5:14, 15). Yua, diˈib të yajmaytyaˈaky mä parrafo 2, jyënaˈany: “Kots nmënuˈkxtaˈagyë Jyobaa kyajts yëˈëyë ndukmëtmaytyaˈaky wiˈixëts të nxënaxy, nyaˈˈawatsypyëtsë njot ngorasoon ets ndukmëtmaytyaktaabyëts wiˈixëts nnayjyawëty. Kots duˈun nduny, yëˈëts xypyudëjkëm parëts wanaty wanaty nˈixyë Jyobaa extëm tuˈugë uˈunkteety diˈib jyantsy tsyojkypyë yˈuˈunk yˈënäˈk, kyajts nˈixy extëm tuˈugë wintsën”.

15. ¿Wiˈixë Jyobaa dyajnigëxëˈëky ko xymyëmäˈäy xymyëdäjtëm niduˈuk niduˈuk?

¹⁵ Nˈokˈyajnäjxëmë tiempë mëdë nmëguˈukˈäjtëm. Jyobaa yëˈë diˈib të xynyamoˈoyëmë nmëguˈukˈäjtëm (Sant. 1:17). ¿Wiˈixë Jyobaa dyajnigëxëˈëky ko xymyëmäˈäy xymyëdäjëm niduˈuk niduˈuk? Ko dyajjaˈˈatyë nmëguˈukˈäjtëm diˈib yajnigëxëˈktëp ko xëmë xytsyojkëm (Prov. 17:17). Ko Pablo tnijäˈäyë ja Dios mëduumbëty diˈib Colosa, yˈanmääy wiˈix pyudëjkëdë ets wiˈix jyotkujkmooyëdë (Kol. 4:10, 11). Jesus, nan yajtëgoyˈäjtë naybyudëkë ets kyuˈëˈëw kyukäjpxë ko pyudëjkë ja myëtnaymyaayëbëty etsë anklëstëjk (Luk. 22:28, 43).

16. ¿Wiˈix xypyudëjkëmë nmëguˈukˈäjtëm parë niˈigyë Jyobaa nmëwingoˈonëm?

¹⁶ ¿Nˈëxtäˈäyëmë nyaybyudëkë nmëguˈukˈäjtëm ets ngupëjkëm wiˈix xyˈanmäˈäyëm? Ko tuˈugë nmëguˈukˈäjtëm diˈib oy Dios mëduump ndukmëtmaytyakëm tijaty nmëmäˈäy nmëdäjëm, kyaj yëˈë tˈandijy ko kyaj oy nekyˈijtëm  mëdë Jyobaa, pes mbäät xypyudëjkëm mëjwiin kajaa ko ndukmëtmaytyakëm. James, diˈib të yajmaytyaˈaky mä parrafo 5, jyënaˈany: “Kots nnaymyayëty mëdë nmëguˈukˈäjtëm diˈib oy Dios mëduundëp, mëjwiin kajaats xypyudëkë. Kots näˈäty axëëk nnayjyawëty, tsuj yajxon tmëdoowˈittë ets xyˈanmääytyëbëts ko xytsyojktëbëts. Ko duˈun ttundë, tats nbëkyë kuentë ko Jyobaa xytsyojkpëts ets kots xymyëmääy xymyëdäjpëts”. ¡Jantsy oy ko nnaymyaˈayëm mëdë nmëguˈukˈäjtëm!

17, 18. ¿Pën mbäät nmëjpëjtakëm wiˈix xyˈanmäˈäyëm, ets tiko?

¹⁷ Satanás xyjyamëmadäˈägäˈänëm parë kyaj nekytyuˈunëm diˈibë oy. Yëˈë tsyojkypy ets nwinmäˈäyëm ko Jyobaa kyaj xytsyojkëm ets ko kyaj xynyitëjkëm parë nbatëmë nitsokën. Per extëm të nˈijxëm, tyäˈädë kyaj tyëyˈäjtënëty.

¹⁸ Jyobaa mëjwiin kajaa xytsyojkëm ets xyajtsobatëm niduˈuk niduˈuk. Pën nmëmëdoˈowëm, ta xëmë nyajpäädäˈänëm mä ja tsyojkën duˈun extëm ttuunyë Jesus (Fwank 15:10). Pääty, kyaj mbäät nmëjpëjtakëmë Satanás ets ni yëˈë jot korasoon ko xytyukmëbëkäˈänëm ko Jyobaa kyaj xytsyojkëm. Nik oy ko yëˈë nmëbëjkëm wiˈixë Jyobaa xyˈanmäˈäyëm, pes yëˈë yˈijxypy wiˈix niduˈuk niduˈuk nmëdäjtëm ja oybyë jäˈäyˈäjtën. Nˈokˈijtëm seguurë ko ‘Dios tyukxondakypy yëˈë nyax kyäjpn’, ets mijts, nan mdukxondakëp.