1. I vyani vino Yeova akalola umu antu yakwe?

YEOVA LEZA “akazangila umu antu yakwe.” (Masa. 149:4) Cii cikatulenga ukuya sana ni nsansa! Yeova akalola imiyele itu isuma, nupya akalola ukuti tungaya ya cuza yakwe asuma. Nga twatwalilila ukaya acisinka kuli aliwe alatwalilila ukupalama kuli sweswe amanda yonsi!—Yoa. 6:44.

2. U mulandu ci uno yamwi cikayatalila ukuzumila ukuti Yeova wayatemwa?

² Yamwi yangalanda ukuti, ‘namanya Yeova watemwa antu yakwe yonsi. Nomba ningasininkizya uli ukuti wantemwa?’ I cani icingalenga umwi ukuyuzya iuzyo lii? Oksana * uwacuzile sana lino wali umwance walanzile ukuti: “Nali sana ni nsansa lino nabatiziwe nu kutandika upainiya. Nomba lino papisile imyaka 15 natandike ukwiusya ivintu iviipe ivyancitikilanga lino nali umwance. Natandike ukwelenganya ukuti Yeova atapokelelanga vino namuombelanga nupya watile ukuntemwa.” Nkazi Yua painiya uwakweti intazi izingi lino wali umwance, walanzile ukuti: “Naipeezile kuli Yeova pano nalondanga ukumuzanzya. Lelo nasininkizye ukuti atange antemwe.”

3. I vyani vino tumalandapo umu cipande cii?

³ Wakwe ya nkazi yaili yano twalandapo, limwi namwe mwatemwa Yeova nomba mukatwisika ndi cakuti namwe wamitemwa. U mulandu ci uno mulinzile ukusininkizizya ukuti akamisakamala? Nupya i cani icingamwazwa ndi cakuti mukwelenganya ukuti Yeova atamitemwa? Lekini tulande pa masuko uku mauzyo yaa.

4. U mulandu ci uno citaziipila ukutwisika ndi cakuti Yeova watutemwa?

⁴ Nga twasininkizya ukuti Yeova watutemwa tulalondesya ukumuombela apapeezile amaka itu nanti cakuti ivintu ivitala umu umi. Nomba nga twatandika ukutwisika ndi cakuti Yeova akatusakamala amaka itu “yalacepelwa.” (Mapi. 24:10) Nupya ndi cakuti twatovooka nu kutandika ukwelenganya ukuti Leza atatutemwa, cilatutalila ukukana amatunko yakwe Satana.—Efes. 6:16.

5. I vyani ivyacitikile aina yamwi na ya nkazi aelenganyanga ukuti Leza atayatemwa?

⁵ Aina itu na ya nkazi yamwi yatandika ukutwisika ndi cakuti Yeova wayatemwa nupya akayasakamala na cico calenga yate ukuya nu utailo ukome. Eluda wi zina lyakuti James walanzile ukuti: “Nanti cakuti naombelanga pa Betele nu kuipakizya ukusimikila pamwi ni cilongano icaomvyanga ululimi lwa ku mpanga yuze, natwisikanga ndi cakuti Yeova wapokelelanga vino namuombelanga. Insita imwi natandike nu kuyuvwa ukuti Yeova atasukanga amapepo yane.” Eva uwaya umu mulimo wa nsita yonsi walanzile ukuti: “Nasambilile ukuti citazipa ukwelenganya ukuti Yeova atatutemwa pano kukalenga ufilwe ukuombela ningo Yeova. Kungalenga nu kuti ute ukwika amano kuli vyakwe Leza nu kuta ukuya ni nsansa lino ukuombela Yeova.” Michael painiya wa nsita yonsi nupya eluda walanzile ukuti: “Ndi cakuti utasininkizye ukuti Leza akakusakamala ala wanda umwi ulata ukumuombela.”

6. I vyani vino tulinzile ukucita ndi cakuti twatandika ukwelenganya ukuti Leza atatutemwa?

⁶ Ivyacitikile yano itulandapo vikulangilila iviipe ivingafumamo ndi cakuti tukwelenganya ukuti Yeova atatutemwa. Nomba i vyani vino tulinzile ukucita ndi cakuti twatandika ukwelenganya ukuti Yeova atatutemwa? Lilyo kwene sile tulinzile ukuta ukwelenganyapo! Mwalenga Yeova ukumyazwa ukulaelenganya sile pa mutende uno akamipeela ulatungulula umi winu ni myelenganyizizye inu. (Filipi 4:6, 7) Nupya mwaiusya ukuti, mutaya mwenga mwemuno mukaelenganya vivyo. Aina na ya nkazi na yauze nayo kwene yakacuula uku myelenganyizizye ya musango kwene uwo. Nanti aomvi yakwe Yeova aliko mpiti nayo kwene yakweti intazi zya musango uu. Lolini vino tungasambilila kuli vino vyacitikile umutumwa Paulo.

7. Iintazi ci zino Paulo wakweti?

⁷ Uzye insita zimwi mukayuvwa ukuti mwakwata imilimo iingi nupya cikamitalila ukuomba vyonsi vino mulinzile ukuomba. Ndi cakuti avino cili, mungamanya vino Paulo wayuvwanga. Atasakamile sile pa ina amu cilongano conga lelo umu “vilongano vyonsi.” (2 Kol. 11:23-28, NWT.) Uzya mwakwata intazi ya kulwalilila ikalenga mutaya nu luzango? Paulo wakweti intazi iyalenganga acuula sana, limwi yali intazi ya kulwalilila nupya walondanga intazi iyo isile. (2 Kol. 12:7-10) Uzye mukatoovoka pa mulandu nu kukanamalilika? Na Paulo kwene wayuvwanga vivyo kwene insita zimwi. Wayamile ukuti “Owe! Ne mulanda!” pa mulandu na vino wezyanga na maka pakuti sile acite icisuma.—Loma 7:21-24.

8. I cani icavwile Paulo ukuzizimizya asi mulandu ni ntazi zino wakweti?

⁸ Nanti cakuti Paulo wazizimizyanga intazi izingi watwalilile ukuombela Yeova. I cani icamwavwile ukuzizimizya? Nanti cakuti wamanyile ukuti atamalilika, wakweti utailo ukome umwi lambo. Wamanyile nu ulayo wakwe Yesu uwakuti ‘wensi wataila munoli . . . alaya nu umi wa pe. (Yoa. 3:16; Loma 6:23) Paulo wali pali yayo akweti utailo ukome umwi lambo. Wasininkizye ukuti Yeova akalondesya ukweleela yayo yonsi acisile imembu iziipisye ndi cakuti yalapila.—Masa. 86:5.

9. I vyani vino tukasambilila uku mazwi yakwe Paulo aya pali Galatiya 2:20?

⁹ Paulo wataile ukuti Leza wamutemilwe sana pano watumile Yesu ukwizafwa pa mulandu wakwe. (Belengini Galatiya 2:20.) Lolini amazwi ya kusyalikizya ali api lembelo lii aakulangilila ukuti wasininkizye vii. Paulo walanzile ukuti: ‘Mwana wakwe Leza, wantemilwe nu kupeela umi wakwe pa mulandu wane.’ Paulo atailolanga ukuti Leza atange amutemwe, nupya atelenginye ukuti ‘kwaya ivyalenga Yeova atemwe aina yane nomba nemo atange antemwe.’ Paulo wiwisyeko aina Loma ukuti “Lino twali tucili yakaifya Klistu watufwilile.” (Loma 5:8) Kusi icingalesya ukutemwa kuno Leza wakwata pali sweswe!

10. I vyani vino tukasambilila api lembelo lyakwe Loma 8:38, 39?

¹⁰ Belengini Loma 8:38, 39. Paulo wamanyile vino ukutemwa kwakwe Leza kwakwata amaka. Walemvile ukuti: “Kusi nanti cimwi icingatupaatukanya ku kutemwa kwakwe  Leza.” Paulo wamanyile ukuti Yeova watekeliile aina Izlaeli. Wamanyile na vino Yeova wamuyelile uluse. Mu mazwi yauze Paulo walandanga ukuti, ‘pa mulandu wakuti Yeova watumile umwanakwe kwizamfwila, ntalinzile ukutwisika ndi cakuti wantemwa.’—Loma 8:32.

11. Nanti cakuti Paulo wacisile imembu wakwe izyalandwa pali 1 Timoti 1:12-15, u mulandu ci uno wasininkizizye ukuti Leza wamutemilwe?

¹¹ Belengini 1 Timoti 1:12-15. Paulo afwile uvwanga uyi nga welenganya pa viipe vino wacitanga lino atatala waya Umwina Klistu. Tutange tuzunguke umulandu uno walandiile ukuti wali a “kaifya uwaluta onsi.” Lino Paulo atatala wasambilila icumi, wacuzyanga sana Aina Klistu umu misumba ipusanepusane nu kuzumilizyako ndi cakuti amu cilye yapingula ukuti umwi akomwe. (Mili. 26:10, 11) Paulo uvwanga sana uyi nga walola uwacance wino wazumilizye ukuti avyazi yakwe yakomwe. Paulo uvwanga sana uyi pali vino wacisile, nomba wamanyile ukuti pasi vino wali nu kucita. Wasininkizye ukuti Yesu wamufwilile nupya walemvile ukuti: “Ku cikuku cakwe, Leza wancita kuya vino ndi.” (1 Kol. 15:3, 10) I vyani vino tukusambililako? Mulinzile ukusininkizya ukuti Yesu wamufwilile na cico calenga mukwate ucuza usuma na Yeova. (Mili. 3:19) Icacindama kuli Leza i vintu vino tukacita ndakai na vino tulacita uku nkoleelo, asi vino twaluvyanyizye mpiti, nampo nga twali ya Nte Yakwe Yeova nanti foo.—Eza. 1:18.

12. Uzye amazwi aya pali 1 Yoane 3:19, 20 yangatwazwa uli ndi cakuti twatandika ukuyuvwa ukuti sweswe ya silesile nupya tutatemwikwa?

¹² Nga mwelenganya pali vino Yesu wamifwilile pa mulandu wa membu zinu limwi mungaelenganya ukuti ‘ntacindama sana uwakuti mpokelele u wila uu usuma.’ I cani icingalenga mwayuvwa vivyo? Pa  mulandu wakuti tutamalilika umwenzo witu ungatubepa tutandike ukuilola ukuti sweswe ya silesile nupya tutatemwikwa. (Belengini 1 Yoane 3:19, 20.) Nga twatandika ukuyuvwa vivyo tulinzile ukwiusya ukuti Leza wene umukulu ukuluta yakampingu itu. Nanti cakuti tungayuvwa ukuti Yeova atatutemwa nupya atalatweleela, Tata witu uwa kwi yulu alatwalilila ukututemwa nu kutweleela. Tulinzile ukusininkizya ukuti Yeova watutemwa, pakuti tucite vivyo tulinzile ukulabelenga Izwi lyakwe lyonsi, ukupepa kuli aliwe insita izingi, nu kuya sana capamwi na antu yakwe. U mulandu ci uno cacindamila ukucita ivintu vyonsi vii?

13. Uzye ukusambilila Izwi lyakwe Leza kungatwazwa uli? (Loliniko na kambokosi kakuti “ Izwi Lyakwe Leza Likayavwa.”)

¹³ Mwabelenga Izwi Lyakwe Leza cila wanda, nupya mulalola imiyele yakwe Yeova iingi isuma. Mulamanya vino wamitemwa. Nga mukwelenganya sana pali vino mukubelenga muli Baibo cila wanda cilamwazwa ukulaelenganya ningo nu kulungika ivintu vino mukwelenganya umu myenzo inu. (2 Tim. 3:16) Eluda wi zina lyakuti Kevin uwailolanga ukuti atacindama walanzile ukuti: “Ukubelenga Masamu 103 nu kwelenganyapo kwangazwa ukuvwikisya ukuti Yeova wantemwa nupya akaelenganya pali nene.” Eva wino itulandapo mpiti watiile: “Cila wanda nkaelenganya pa vintu vino Yeova akalola ukuti ali vintu vicindame. Kucita vii kukalenga naya nu mutende nupya utailo wane ukakomelako.”

14. Uzye ipepo lingatwazwa uli?

¹⁴ Mwapepa lyonsi. (1 Tesa. 5:17) Nga mukulonda ukuya na ucuza ukome nu muntu umwi mulinzile ukulalanzyanya nawe lyonsi nu kumulondolwela vino mukuyuvwa. Vikwene avino caya na kuli ucuza witu na Yeova. Nga tukumulondolwela vino tukuyuvwa, vino tukwelenganya ni vikutusakamika lino tukupepa kuli aliwe tukalanga ukuti twamutaila nupya twamanya ukuti watutemwa. (Masa. 94:17-19; 1 Yoa. 5:14, 15) Yua wino itulandapo mpiti walanzile ukuti: “Lino nkupepa, nsinena sile Yeova ivyativincitikila sile uwanda uwo nkamunena vino nkwelenganya na vino nkuyuvwa. Panono panono natandika ukulola Yeova, ukuti asi mukalamba wa pa kampani, lelo a Isi uwatemwa anakwe.”—Loliniko na kambokosi kakuti “ Uzye Mwalibelengapo?”

15. Uzye Yeova aakalanga uli ukuti watutemwa?

¹⁵ Mwaya pamwi na ya cuza acisinka; pano u wila ukufuma kuli Yeova. (Yako. 1:17) Tata witu uwa kwi yulu akalanga ukuti watutemwa pano watupeela aina na ya nkazi aakalanga ukutemwa “insita ili yonsi.” (Mapi. 17:17)  Muli kalata wino walembiile aina Kolose, Paulo walanzileko pa Ina Klistu yamwi amwavwile nupya watile “yakangazwa pakalamba cuze.” (Kolo. 4:10, 11) Nanti sile a Klistu Yesu wataizyanga pa wazwilizyo uno wapokelelanga kufuma kuli ya cuza yakwe angeli na antunze.—Luka 22:28, 43.

16. Uzye ya cuza ya cumi yangatwazwa uli ukupalama kuli Yeova?

¹⁶ Uzye mukalenga nanti ukuzumila uwazwilizyo ukufuma kuli ya cuza ya mu cilongano? Ukunenako cuza uwika mano kuli vyakwe Leza vino tukuyuvwa cisipiliula ukuti tutakwata utailo ukome, lelo kukatucingilila. Uvwini vino James wino itulandapo mpiti walanzile, watiile: “Ukukwata ya cuza aika mano kuli vyakwe Leza kwangazwa sana. Ndi cakuti natandika ukusakamikwa na melenganyo aipe, ya cuza yaa yakakutikisya nupya yakanteekelela nu kunena ukuti yantemwa. Nga ya kucita vivyo nkailuka ukuti Yeova wantemwa nupya akansakamala.” Cacindama ukuya sana ya cuza na ina na ya nkazi.

17-18. A weni wino tulinzile ukuvwila nupya u mulandu ci?

¹⁷ Satana akalonda ukututovoola lino tukucita ivisuma. Akalonda twalola kwati Yeova atatutemwa nupya asitusakamala. Nomba vivyo i vya ufi.

¹⁸ Yeova wamitemwa. Akamilola ukuti mwacindama. Ndi cakuti mukumumvila, “mulikala umu kutemwa” kwakwe amanda pe, wakwe vino Yesu wacisile. (Yoa. 15:10, NWT.) Fwandi mutauvwila Satana nanti ukulayuvwa ukuti Yeova atamitemwa. Nomba mwauvwila Yeova aakalola ivisuma muli swensi wenga na wenga. Mwasininkizya ukuti “akazangila umu yantu yakwe” kumwi namwe kwene.