1. Ta eo Jeova ej loe ippãn armej ro doon?

JEOVA ANIJ “ej m̦õn̦õn̦õ kõn ro doon.” (Sam 149:4, UBS) Men in el̦ap an kalañlõñ kõj! Jeova ej lo kadkad ko rem̦m̦an ippãd; ej lo maroñ ko ad im ej karuwaakl̦o̦k kõj ñan e. El̦aññe jenaaj dãpij wõt ad tiljek ñan Jeova, enaaj epaake wõt kõj ñan indeeo!​—Jon 6:44.

2. Etke epen an jet tõmak bwe Jeova ej lukkuun yokwe er?

² Jet armej remaroñ l̦õmn̦ak, ‘Ijel̦ã bwe Jeova ej yokwe aolep armej ro doon, bõtab ewi wãween aõ jel̦ã bwe Jeova ej lukkuun yokwe eõ?’ Ta eo emaroñ kõm̦m̦an bwe juon armej en bõk kain l̦õmn̦ak rot in? Oksana, * juon jeid im jatid kõrã ej ba: “Iar lukkuun m̦õn̦õn̦õ ke iar peptaij, joñan iar jino bainier. Ijoke 15 iiõ ko tokãlik, iar bũrom̦õj kõn aõ ememejtok wãween ko reppen iar iiooni ke iar dik, men in ear kõm̦m̦an bwe in pere el̦aññe Jeova ej buñbũruon ippa im el̦aññe ekkar bwe en yokwe eõ.” Yua juon jeid im jatid kõrã me ej bainier eo ear bar iioon wãween ko reppen ke ear dik, ej ba: “Iar ajel̦o̦k mour e aõ ñan Jeova kõnke iar kõn̦aan kabuñbũruon, bõtab iar jab tõmak bwe Jeova ej yokwe eõ.”

3. Ta eo jenaaj etale ilo katak in?

³ Ejjel̦o̦k pere bwe el̦ap am̦ yokwe Jeova, bõtab kwõmaroñ bar bõk eñjake eo an Kũrjin rein retiljek me ej kab m̦õj ad kõnono kake er, kwõmaroñ jaadin pere bwe Jeova ej yokwe eok. Etke kwõj aikuj tõmak bwe ej lukkuun kea kake eok? Im ta eo emaroñ jipañ eok ñe ejiktok l̦õmn̦ak ko rekabbweerer?  Eokwe jenaaj etale uwaakin kajjitõk kein itulal̦.

4. Etke ekauwõtata ñan pere yokwe eo an Jeova ñan kõj?

⁴ Yokwe ej juon men ekajoor me emaroñ kõm̦akũt juon armej. El̦aññe jej lukkuun tõmak bwe Jeova ej yokwe im rejetake kõj, men in enaaj kõm̦akũt kõj ñan karejar ñan e kõn aolepen bũruod meñe jej iioon wãween ko reppen ilo mour ko ad. Ijoke, el̦aññe jej pere bwe Anij ej kea kõn kõj, enaaj dikl̦o̦k ad kajoor. (JK. 24:10) Im jel̦ak jino ebbweer im jako ad tõmak bwe Anij ej yokwe kõj, epidodo ad nãj po ilo kapo ko an Setan.​—Eps. 6:16.

5. Ta ko rar wal̦o̦k ñan ro me rar pere bwe Anij ej yokwe er?

⁵ Ewõr jet Kũrjin ro ilo tõre kein ad me em̦õjn̦o̦l̦o̦k tõmak eo aer kõn wõt aer pere. Juon em̦m̦aan ej lale eklejia etan James, ej ba: “Meñe iar jerbal ilo Betel̦ im elukkuun kar em̦m̦an ippa jerbal ilo juon eklejia ej kõnono ilo juon bar kajin, bõtab iar l̦õmn̦ak el̦aññe Jeova ej m̦õn̦õn̦õ kõn jerbal ko aõ. Im ekar wõr juon tõre me iar pere el̦aññe Jeova ej eo̦roñ jar ko aõ.” Eva, eo ej bar jerbalin full-time, ej ba: “Iar lo bwe ekauwõtata ñan ad pere yokwe eo an Jeova ñan kõj kõnke men in enaaj jelõt wãween ad karejar ñan E. Men in ej kõm̦m̦an bwe en dikl̦o̦k ad itoklimo kõn men ko l̦oor jetõb im bwe en dikl̦o̦k ad lañlõñ ilo ad karejar ñan E.” Michael, juon eo me ej rekũl̦ar bainier im ej juon em̦m̦aan ej lale eklejia, ej ba: “Ñe kwõjjab tõmak bwe Anij ej kaorõk eok, kwõnaaj jino ettol̦o̦k jãn e.”

6. Ta eo jej aikuj in kõm̦m̦ane ñe ejiktok l̦õmn̦ak eo bwe Anij ejjab yokwe kõj?

⁶ Bwebwenato kein rej kwal̦o̦k joñan an kauwõtata ñan bõk l̦õmn̦ak ko rekabbweerer. Ak ta eo jemaroñ kõm̦m̦ane ñe ejiktok l̦õmn̦ak eo bwe Anij ejjab yokwe kõj? Jej aikuj in m̦õkaj im julo̦k l̦õmn̦ak rot in! Kajjitõk ippãn Jeova bwe en jipañ eok ñan julo̦k l̦õmn̦ak kein rekabbweerer im en lewaj ñan eok ‘aenõm̦m̦an eo jãn Anij, eo el̦ap jãn jel̦ã otemjej [me] enaaj kõjparok bũruom̦ im l̦õmn̦ak ko am̦.’ (Sam 139:23; Pil. 4:6, 7) Im keememej bwe kwõjjab make iaam̦. Ewõr ro jeid im jatid retiljek me rej bar kajjioñ in julo̦k eñjake ko rekabbweerer. Bareinwõt ri-karejar ro an Jeova ilo iien ko etto rar aikuj bar kate er ñan julo̦k eñjake rot in. L̦õmn̦ak kõn ta ko jemaroñ katak jãn joñak eo an rijjilõk Paul.

7. Kain apañ rot ko Paul ear iiooni?

⁷ Ewõr ke iien kwõj eddodo kõn an lukkuun l̦ap eddo ko am̦, im kwõj lo bwe epen am̦ kajejjeti aolepeer? El̦aññe aet, kwõmaroñ mel̦el̦e kõn wãween an kar Paul eñjake. Ear l̦ap an Paul inepata “kõn aolep eklejia ko,” im jab kõn juon wõt eklejia. (2 Kor. 11:23-28) Ekkã ke an nañinmej ko rel̦l̦ap kwõj iiooni kõm̦m̦an bwe en jako am̦ lañlõñ? Paul ear eñtaan kõn juon “kãlõklõk ilo kanniõk” me eto an kar pãd ippãn; men in emaroñ kar juon nañinmej Paul ear iioone ilo ãnbwin, im ear lukkuun kõn̦aan bwe men in en jako jãne. (2 Kor. 12:7-10) Kwõj ke ebbweer kõn likjab ko am̦ make? Ewõr iien ko Paul ear bar bõk eñjake rot in. Ear kũr e make juon eo ‘el̦ap wõt an jerata’ kõn wõt an aikuj aolep iien tarin̦ae ippãn make ñan kõm̦m̦ani men ko rejim̦we.​—Rom 7:21-24.

8. Ta eo ear jipañ Paul ñan kijenmej wõt ium̦win apañ ko ear iiooni?

⁸ Meñe Paul ear iioon elõñ kain mãlejjoñ ko im wãween ko rekabbweerer, ak ear wõnm̦aanl̦o̦k wõt im karejar ñan Jeova. Ta eo ear kõmaroñ e ñan kõm̦m̦ane men in? Meñe Paul ear lukkuun kile im jel̦ã kõn likjab ko an, ak ear lukkuun tõmak ilo katok in mour eo an Jesus. Ear jel̦ã kõn kallim̦ur eo an Jesus me ej ba bwe “jabdewõt eo ej kwal̦o̦k an tõmak ilo [Jesus] . . . en bõk mour indeeo.” (Jon 3:16; Rom 6:23) Alikkar bwe Paul ear juon iaan ro me rar kwal̦o̦k aer tõmak ilo katok in mour eo an Jesus. Ear lukkuun tõmak bwe Jeova epojak in jol̦o̦k ad bõd, ekoba ro im rar kõm̦m̦ani bõd ko rel̦l̦ap, el̦aññe rej ukel̦o̦k.​—Sam 86:5.

9. Ta eo jej katak jãn naan ko an Paul ilo Galetia 2:20?

⁹ Paul ear bareinwõt tõmak bwe Anij ej lukkuun yokwe e ilo an kar jilkintok Christ. (Riit Galetia 2:20.) L̦õmn̦ak kõn naan ko rekaenõm̦m̦an an Paul ilo jem̦l̦o̦kin eoon in. Ear ba: “Nejin Anij . . . ear yokwe eõ im ajel̦o̦k mour eo an kõn ña.” Paul ear jab pere joñan yokwe eo an Anij ñan e im l̦õmn̦ak im ba, ‘Imaroñ mel̦el̦e etke Jeova ej yokwe ro jeiũ im jatũ, ak il̦ak lale eto bwe en yokwe eõ.’ Paul ear kakeememej ri-Rom ro im ba: “Christ ear mej kõn kõj meñe kõj rijjerawiwi.” (Rom 5:8) Ejjel̦o̦k men en̦ emaroñ kabõjrak yokwe eo an Anij ñan kõj!

10. Ta eo jej katak jãn Rom 8:38, 39?

¹⁰ Riit Rom 8:38, 39. Paul ear lukkuun tõmak  bwe ekanooj in l̦ap yokwe eo an Anij. Ear je im ba bwe ejjel̦o̦k jabdewõt men en̦ emaroñ “kõjepel kõj jãn yokwe eo an Anij.” Paul ear jel̦ã kõn joñan an kar Jeova kijenmej ippãn armej ro ilo aelõñin Israel. Ear bareinwõt jel̦ã kõn wãween an kar Jeova kwal̦o̦k tũriam̦o ñane. Ilo bar juon wãween, Paul ej ba, ‘Kiiõ ke em̦õj an Jeova jilkintok Nejin eo emake wõt bwe en mej kõn eõ, ewõr ke unin aõ aikuj in pere yokwe eo An ñan eõ?’​—Rom 8:32.

11. Meñe Paul ear kõm̦m̦ani jerawiwi ko me 1 Timote 1:12-15 ej kwal̦o̦k kaki, ak etke ear tõmak bwe Anij ej yokwe e?

¹¹ Riit 1 Timote 1:12-15. Emaroñ kar wõr iien ko Paul ear inepata im bũrom̦õj kõn men ko ear kõm̦m̦ani m̦okta. Jejjab bwilõñ kõn an kar ba bwe “el̦aptata” an jerawiwi jãn ro jet. Kõnke m̦okta jãn an kar Paul jel̦ã kõn m̦ool eo, ekõn etal jãn jikin ñan jikin im pukot Kũrjin ro bwe en likũt er ilo kalbuuj im ear rejetake pepe ko an ri-ekajet ro ñan m̦an er. (Jrb. 26:10, 11) Baj l̦õmn̦ak m̦õk kõn wãween an Paul maroñ kar eñjake el̦aññe ear iioone juon jo̦dikdik me ear mej jinen im jemãn kõn an kar rejetake pepe eo ñan m̦ane er? Paul ear ajl̦o̦k kõn bõd ko an, bõtab ear jel̦ã bwe ejjab maroñ ukoti men ko em̦õj aer wal̦o̦k. Ear tõmak bwe Christ ear mej kõn e, im ilo ejjel̦o̦k an pere ear je naan kein im ba: “Kõn wõt jouj eo el̦ap an Anij, ña ij juon rijjilõk.” (1 Kor. 15:3, 10) Ta eo kwõj katak jãn men in? Kwõn tõmak bwe Christ ear mej kõn kwe im ear kõpel̦l̦o̦k juon ial̦ bwe kwõn maroñ ejaake juon jem̦jerã epaak ippãn Jeova. (Jrb. 3:19) Men eo eaorõk ippãn Anij ej men ko jej kõm̦m̦ani kiiõ im ilju im jekl̦aj, im ejjab bõd ko jaar kõm̦m̦ani m̦okta, jekdo̦o̦n ñe jemaroñ kar juon iaan Ri-Kõnnaan ro an Jeova ilo tõre eo ak jaab.​—Ais. 1:18.

12. Ewi wãween an naan ko ilo 1 Jon 3:19, 20, jipañ kõj ñe jej bõk l̦õmn̦ak eo bwe ejjel̦o̦k tokjãd ak bwe ejjel̦o̦k en̦ ej yokwe kõj?

 ¹² Ñe kwõj l̦õmn̦ak kõn an Jesus kar mej kõn kwe bwe en maroñ kalbubuuk jerawiwi ko am̦, kwõmaroñ l̦õmn̦ak im ba, ‘Ijjab juon eo el̦ap tokjãn bwe in bõk kain jeraam̦m̦an rot in.’ Ta eo ej kõm̦m̦an bwe kwõn bõk kain eñjake rot in? Kõnke jejjab weeppãn, bũruod emaroñ m̦on̦e kõj im kõm̦m̦an bwe jen l̦õmn̦ak bwe ejjel̦o̦k tokjãd im bwe ejjel̦o̦k en̦ ej yokwe kõj. (Riit 1 Jon 3:19, 20.) Ilo iien rot kein, jej aikuj in keememej bwe “Anij el̦apl̦o̦k jãn bũruod.” Yokwe eo an Jemãdwõj ilañ im an jeorl̦o̦k bõd, ekajoorl̦o̦k jãn jabdewõt eñjake ko rekabbweerer me remaroñ pãd ilo bũruod. Jej aikuj kate kõj ñan bõk l̦õmn̦ak eo an Jeova kõn kõj. Ijoke ñan kõm̦m̦ane men in, jej aikuj in keini ad katak kõn Naan eo an, niknik ilo ad jar ñane, im ekkeini ad kobal̦o̦k ippãn armej ro an. Etke el̦ap an aorõk ñan kõm̦m̦ani men kein?

13. Ilo ad katak Naanin Anij, ewi wãween an men in maroñ jipañ kõj? (Bar lale bo̦o̦k eo etan, “ Wãween an Naanin Anij Jipañ Er.”)

¹³ Katak Naanin Anij kajjojo raan im enaaj l̦apl̦o̦k am̦ jel̦ã kõn kadkad ko rem̦m̦an kadkadin Jeova. Kwõnaaj kile an lukkuun kea kake eok. Im am̦ kõl̦mãnl̦o̦kjen̦ kõn men ko kwõj riiti jãn Naanin Anij kajjojo raan, emaroñ jipañ eok kakõm̦anm̦anl̦ok wãween am̦ kõl̦mãnl̦o̦kjen̦, ak “kammineneik” l̦õmn̦ak ko am̦ im bũruom̦. (2 Tim. 3:16) Juon em̦m̦aan ej lale eklejia etan Kevin me ekõn kar l̦õmn̦ak bwe ejjel̦o̦k tokjãn, ej ba: “Aõ riiti Sam 103 im kõl̦mãnl̦o̦kjen̦ kake, ej jipañ eõ ñan kile im mel̦el̦e kõn eñjake eo an Jeova kõn ña.” Eva, eo kar kwal̦o̦k kake m̦oktal̦o̦k, ej ba: “Ilo jem̦l̦o̦kin juon raan, ekkã aõ kõm̦m̦an iien bwe in kõl̦mãnl̦o̦kjen̦ kõn l̦õmn̦ak ko an Jeova. Aõ kõm̦m̦ane men in, ej kaenõm̦m̦an bũruõ im kõkajoorl̦o̦k tõmak e aõ.”

14. Ewi wãween an jar maroñ jipañ kõj?

¹⁴ Niknik ilo am̦ jar. (1 Tes. 5:17) Ekkã an ruo armej lukkuun epaake doon kõn aerro niknik in bwebwenato im kwal̦o̦k bũrueerro ñan doon. Ejjel̦o̦k oktak ñe ej itok ñan jem̦jerã eo ad ippãn Jeova. Ñe jej kwal̦o̦k eñjake, l̦õmn̦ak, im inepata ko ad ñane ilo jar, jej kwal̦o̦k bwe jej lõke e im bwe jejel̦ã bwe ej yokwe kõj. (Sam 94:17-19; 1 Jon 5:14, 15) Yua, eo kar kwal̦o̦k kake m̦oktal̦o̦k, ej ba: “Ñe ij jar, ijjab baj kwal̦o̦k wõt kõn men ko rar wal̦o̦k ilo raan eo. Ak ij bareinwõt kõpel̦l̦o̦k bũruõ ñan Jeova im kwal̦o̦k eñjake ko aõ ñane. Jidik kõn jidik, iar jino watõk Jeova ãinwõt juon Jemãn me ej lukkuun yokwe ajri ro nejin, im jab ãinwõt juon bo̦o̦j in juon kom̦bani.”​—Lale bo̦o̦k eo etan, “ Kwõnañin Ke Riiti?”

15. Ewi wãween an Jeova kwal̦o̦k an itoklimo kõn kõj?

 ¹⁵ Kobal̦o̦k ippãn ro jerad retiljek, rein rej juon menin letok jãn Jeova. (Jem. 1:17) Jemãdwõj ilañ ej kwal̦o̦k an itoklimo kõn kõj ikijjeen an letok juon ad baam̦le ilo tõmak me ej ejaakin ro jeid im jatid me rej kwal̦o̦k “yokwe iien otemjej.” (JK. 17:17) Ilo lõta eo an Paul ñan ro ilo Kolosse, ear je etan jet iaan Kũrjin ro rar jipañ e, ear ba bwe rein rar ro ‘ekanooj l̦ap aer kaenõm̦m̦ane.’ (Kol. 4:10, 11) Jesus ear bareinwõt aikuj jipañ jãn ro jeran; enjel̦ ro im armej ro jim̦or, im ekar l̦ap an kam̦m̦oolol kõn rein.​—Luk 22:28, 43.

16. Ewi wãween an ro jerad retiljek jipañ kõj ñan epaakel̦o̦k Jeova?

¹⁶ Kwõj ke lukkuun kortokjãn ro jerad retiljek me rej menin letok jãn Jeova? Ñe jej kwal̦o̦k inepata ko ad ñan juon jerad erũtto ilo tõmak men in ejjab mel̦el̦ein bwe jem̦õjn̦o̦, ijoke ej juon menin kõjparok ñan kõj. L̦õmn̦ak kõn ta eo James, eo kar kwal̦o̦k kake m̦oktal̦o̦k ej ba: “Aõ epaake ro rerũtto ilo tõmak ej juon men el̦ap an jipañ eõ. Ñe ejiktok aõ bõk l̦õmn̦ak ko rekabbweerer, rein jera rejitõnbõro ippa rej lukkuun roñjake im kakeememej eõ bwe rej yokwe eõ. Ikijjeen rein, ij kile an Jeova yokwe im kea kake eõ.” Joñan an aorõk men in bwe jen ejaak im dãpij wõt juon jem̦jerã epaak ippãn ro jeid im jatid me rerũtto ilo tõmak!

17-18. Wõn eo jej aikuj in roñjake, im etke?

¹⁷ Setan ekõn̦aan bwe jen bõjrak jãn ad kate kõj ñan kõm̦m̦ani men ko rejim̦we. Ekõn̦aan bwe jen tõmak bwe Jeova ejjab yokwe kõj, im bwe jejjab juon eo ewõr tokjãn ñan An lo̦mo̦o̦rene. Bõtab ãinwõt ad kar etale, ejjab m̦ool men in ñan jidik.

¹⁸ Jeova ej yokwe eok. Kwõj juon eo ekanooj in aorõk im̦aan mejãn. El̦aññe kwõj pokake e, kwõnaaj “pãdwõt ilo yokwe eo an” ñan indeeo, ãinwõt Jesus. (Jon 15:10) Jab roñjake Setan ak tõmaki eñjake ko kwõj bũki me rekabbweerer. Ijoke, kwõn roñjake Jeova, eo ej lo em̦m̦an ko ippãd kajjojo. Kwõn tõmak bwe “ej m̦õn̦õn̦õ kõn ro doon,” ekoba kwe!