1. Tiheeni Yehova onooneiye wa achu awe?

YEHOVA MULUKU “onnahakalalano atchu awe.” (Sal. 149:4, NN) Ela ennanihakalaliha vancipale! Yehova onnoona mikhalelo sahu saphaama; owo onnoona ichu saphaama mwa hiyo nave onnanikhaviherya okhala asinthamwene awe. Wakhala wi nootitelela okhala oororomeleya wa yoowo, owo onahaala otitelela onaacamela okhala wookhala!—Yoh. 6:44.

2. Ntakhara heeni akina annoona okhala woovila ororomela wi Yehova onnaasivela?

² Akina ananwerya oloca, ‘Koosuwela wi Yehova onnaasivela achu awe ntoko nikhuuru, nyenya kini kiwerye hai ororomela wi Yehova onnakisivela?’ Ntakhara heeni muchu onanwerya wiipakela nikoho nenla? Oksana *, yoowo aahooxen’ye vancipale vaavaa aareiye mwaana, ooloca: “Kaatepa ohakalala vancipale vaavaa kaapatisiwaaka nave kipacerya opiyoneera. Nyenya iyaakha 15 ohoolo waaya kaapacerya wuupuwela ichu soonanara seeren’ye ni miyaano vaavaa kaaryaaka mwaana. Kaapacerya wuupuwelela wi Yehova haakeemererya nave wi nkaari muchu aaphwanela osiveliwa ni yoowo.” Yua piyoneera yoowo tho aarino makacamiho mancipale vaavaa aareiye mwaana, ooloca: “Kaaveleela ekumi aka wa Yehova nthowa nawi kaanachuna omuhakalaliha yoowo. Nyenya kaahilekecheya wi owo harwaru akisivela.”

3. Tiheeni nnahaalaahu othokororya mmwaha yoola?

³ Ntoko arokora yaala aromoliwe, nyuwaano munnamusivela vancipale Yehova nyenya munanwerya okhwa minikwa wi owo onnoosivelaani. Ntakhara heeni munaphwanelaanyu olekecheya wi owo onnoopwachaani chiryene? Nave tiheeni enahaala wookhaviheryaani vaavaa munuupuwelaanyu wi Yehova hanoosivelaani? Nnahaala othokororya maakhulo a makoho yaala.

4. Ntakhara heeni ti wawoopiha okhwa minikwa wi Yehova onnanisivela?

⁴ Osivela onnamweeriha muchu okhalano ikuru. Wakhala wi ninnaroromela wi Yehova onnanisivela, nnahaala ochuna omurumeela yoowo ophiyerya nnaweryelaahuvo, moohipwacha makacamiho a ekumi. Nyenya wakhala wi ninnakhwa minikwa wi Muluku onnanikhapelela, ‘ikuru sahu sinahaala ovukuwa.’ (Masi. 24:10) Nave vaavaa nnakhalaahu ooceecheya ni wuupuwela wi Muluku hananisivela, hiniwerya ovootha ohiphela wa Satana.—Éfe. 6:16.

5. Tiheeni yeeren’ye ni anna ni arokora yaawo yuupuwela wi Muluku hanaasivela?

⁵ Akristu akina oororomeleya mmahiku ahu aaceecheya omunepani nthowa na okhwa minikwa. Mutokweene awiichaniwa James ooloca: “Naamwi kaarumeela o Peteli ni opuha olaleerya mmuloko wa elocelo ya okhopela, nkaaroromela wi Yehova aanahakalala ni yeeyo keeraaka wa yoowo. Ophiyerya wi, kaanakhwa minikwa waakhanle wi Yehova aanawiriyana mavekelo aka.” Eva, yoowo onarumeela mmuteko wa elukuluku yoothene, ooloca: “Kohoona wi ti wawoopiha wuupuwela wi Yehova hananisivela nthowa nawi eyo ennavolowela echu eri yoothene yeeyo oneeraawe wi omurumeele yoowo. Eyo ennaneeriha ohipaka ichu ntakhara Muluku ni oyeleela ohakalala wahu mmuteko wa Yehova.” Michael, piyoneero a elukuluku yoothene nave tho ori mutokweene, ooloca: “Wakhala wi honaroromela wi Muluku onnoopwacha, onnahuwelihiwa.”

6. Tiheeni nnaphwanelaahu weera vaavaa minikwa vooloca sa osivela wa Muluku sinanirweelaaya mmuupuwelo ahu?

⁶ Saweereya seiha sinnooniherya mukhalelo nroromelo nahu nnavoloweliwaaya moonanara wakhala wi ninnuupuwela wi Yehova hananisivela. Nyenya tiheeni nnaphwanelaahu weera vaavaa nnapaceryaahu wuupuwela wi Yehova hananisivela? Mwawaakuveya nnaphwanela omaala wuupuwelela mmukhalelo yoowo! Mumveke Yehova wi ookhaviheryeeni oraceeliha muupuwelo yoowo ni ‘murecele wa Muluku yoowo onahaala okhapelela murima anyu ni sawuupuwela sanyu.’ (Sal. 139:23; Fil. 4:6, 7) Nave muupuwele wi, tahi muri mukhatiinyu munuupuwela hiihaa. Anna ni arokora akina annawaniha ni muupuwelo wooceecheiha. Ophiyerya tho akapuro a Yehova akhalai yaanawaniha ni muupuwelo wooceecheiha. Muthokororye yeeyo nnaweryaahu ohuserya orweela wa yootakiherya ya murummwa Paulo.

7. Makacamiho taani Paulo aareiyeno?

⁷ Apwanne ilukuluku ikina munniisoona okhala awaaceliwa nthowa na mirici muryaanyu nave onakhala woovila weera echu vyakala yeeyo munachunaanyu weera? Waakhanle wi ti hiihaa, munahaala omwiiwexexa murummwa Paulo. Owo aanuukhuwa ohiya nthowa na muloko mmoha nyenya “miloko yothene.” (2 Kor. 11:23-28, NN) Apwanne mookhalano makacamiho a ekumi yaawo anawiiyeryaani ohakalala? Paulo aakhalano nikacamiho nenlo naamweeriha ohooxeya vancipale. Nno akhweya naari nikacamiho na okumi, nave aanachuna naamanle. (2 Kor. 12:7-10) Mpwanne ilukuluku ikina munniisoona okhala ooceecheya nthowa na ohiphaameya wanyu? Paulo tho aanisoona hiihaa mu ilukuluku ikina. Owo aaloca wi aari “muchu ootakhaliwa” nthowa nawi ilukuluku soothesene aanawaniha wi eere yeeyo yaari yaphaama.—Aro. 7:21-24.

8. Tiheeni yaamukhavihenrye Paulo ovilela moohipwacha makacamiho awe?

⁸ Moohipwacha saweeha soohiyanahiyana aahooleleiye ni mikhalelo sooceecheiha, Paulo aatitelela omurumeela Yehova. Tiheeni yaamvaha ikuru wi eereno yeela? Naamwi owo aasuwela ohiphaameya wawe, owo aakhalano nroromelo noohicikinyeya ntakhara mukucho. Owo tho aanasuwela yoororomeliha ya Yesu yawi, ‘yaawo anamuroromela, [yoowo] anahaala waakhela ekumi yoohimala.’ (Yoh. 3:16; Aro. 6:23) Mweeparipari Paulo aari mmoha a yaale yaaroromela woopola. Owo aari oolekecheya wi Yehova aari ooreheryeya waakhurumuwela yaale apanke soocheka itokweene wakhala wi aacharuwa.—Sal. 86:5.

9. Tiheeni nnahuseryaahu orweela wa masu a Paulo anaphwanyeya mu Galasya 2:20?

⁹ Paulo tho aanaroromela wi Muluku aanamusivela vancipale woona wi owo aamurumiha Yesu wi akhwe ntakhara yene. (Mwaalakhanye Galasya 2:20.) Moone masu oohakalaliha a Paulo wookuchulani wa eversikulu yeela: “Mwaana a Muluku, yoowo okikhwenle, iiveleela mwaneene wa nthowa na miyo.” Paulo hoona wi pahiru osivela wa Muluku waaphariheleya wa achu akina. Owo huupuwela, ‘Kinnawerya woona mathowa anamweeriha Yehova waasivela annaka, nyenya harwa akisivela miyo.’ Paulo aahiwuupuxerya Aroma wi: ‘Kristu ookhwa wa nthowa na hiyo vaavaa naaryaahu achu oocheka.’ (Aro. 5:8) Osivela wa Yehova ntakhara hiyo hiwaanono makuchuwelo!

10. Tiheeni Aroma 8:38, 39 onanihusiheiye?

¹⁰ Mwaalakhanye Aroma 8:38, 39. Paulo aalekecheya moomalela ni osivela otokweene wa Muluku ntakhara yoowo. Paulo aarepa wi hiyaavo eni ‘ewerye onimwalanya ni osivela wa Muluku.’ Paulo aanasuwela wi Yehova aapisa murima ni Aisarayeli, nave tho owo aanuupuwelela mukhalelo  Yehova ammorenleiye ikharari. Nnanwerya oloca mwa mukwasu masu a Paulo anaphwanyeya mu Aroma mmukhalelo ola: ‘Waakhanle wi Yehova oomurumiha Mwanawe wi akhwe ntakhara miyo, hisaavo minikwa wi owo onnakisivela.’—Aro. 8:32.

11. Naamwi Paulo aapanke soocheka inalociwa mu 1 Timóteo 1:12-15, ntakhara heeni owo aanaroromela wi Muluku aanamusivela?

¹¹ Mwaalakhanye 1 Timóteo 1:12-15. Ti yawooneya wi Paulo aanuukhuwa nthowa na soohesa seiho aapankeiye khalai. Ophiyerya wi aaloca wi aari ‘awaapwaha’ anamacheka oothene. Ahaakumve osuwela eparipari, Paulo aanawiikara Akristu epooma ti epooma, aawalelaka akina mukariposo ni weemererya wiiphiwa wa akina. (Saw. 26:10, 11) Munnaanyiherya mukhalelo Paulo aahaaleiye woona mmuthukumanoni waakhanle wi omphwanya mmiravo yoowo aari ekwaasuni nthowa nawi Paulo teemerenrye wi asitiithi a mmiravo owo yiiphiwe? Paulo aniiphwanyerya mathowa ntakhara soocheka seiho aapankeiye, nyenya owo aahisuwela hi haahaala weera echu eri yoothene wi atoroke yeeyo evirale. Owo aaneemererya wi Kristu aakhwa ntakhara yoowo. Paulo aarepa: “Mwa mahala a Muluku, kiri ntoko kikhanlaaka.” (1 Kor. 15:3, 10) Tiheeni nnahuseryaahu? Mweemererye wi Kristu ookhwa ntakhara nyuwo, nave oheeriha okhala wooweryeya wa nyuwo wi mukhaleno onthamwene wawaacameleya ni Yehova. (Saw. 3:19) Akhweya munniisoona okhalano nthowa wa yoocheka yeeyo mwaapankaanyu muhaakumve, naari mmanle okhala Namoona a Yehova. Nyenya muupuwele wi Yehova onapwacha yeeyo nneeraahu hiihaano ni yeeyo nnahaalaahu weera omwaahiyu, ohiya soocheka nipankaahu khalai.—Isa. 1:18.

12. Wakhala wi ninniisoona ohikhala echweenevo naari wiisoona wi hinnaphwanela osiveliwa, ti mwawiihai 1 Yohani 3:19, 20 oneereiye anikhaviherye?

¹² Vaavaa munuupuwelaanyu wi Yesu aakhwa wi axipihe soocheka sanyu akhweya munanwerya oloca, ‘Kinoona wi nkinaphwanela waakhela  yamahala yeela yasisapo.’ Ntakhara heeni akhweya munniisoona mmukhalelo yoola? Murima ahu woohiphaameya onanwerya oniwoka ni oneeriha wuupuwela wi hineechweenevo naari hannaphwanela osiveliwa. (Mwaalakhanye 1 Yohani 3:19, 20.) Wakhala wi noopacerya wuupuwela mmukhalelo yoola, nnaphwanela wuupuwela wi “Muluku ti mutokotoko opwaha murima ahu.” Osivela ni okhurumuwela wa Tiithi ahu a wirimu, ti wakuruxa opwaha muupuwelo ori woothene wooheseya yoowo nryaahuno. Nnaphwanela ohuserya weemererya wi Yehova onnanisivela. Wi niwerye weerano yeela nnaphwanela ohuserya Masu a Muluku moohihiyererya, ovekela wa yoowo moohihiyererya, ni weemererya nikhaviheryo na annihu. Ntakhara heeni opaka ichu seiha ti woochuneya?

13. Ti mwawiihai omuhuserya Piipiliya oneeraaya wookhaviheryeeni? (Moone tho ekaaxa “ Mukhalelo Masu a Muluku Yaakhavihenryaaya.”)

¹³ Muhuserye Masu a Muluku nihiku ti nihiku, mweerano hiiha munanwerya ohuserya makhalelo mancipale aphaama a Yehova. Munahaala wiiwexexa ophiyerya mweeryo taani owo onoosiveleiyeeni. Wuupuwelela eversikulu emoha eri Mmasu a Muluku vanihikuni enanwerya wookhaviheryaani orehererya muupuwelo anyu, “weereryanyiha” ichu mmuupuweloni mwanyu ni mmurimani mwanyu. (2 Tim. 3:16) Mutokweene mmoha awiichaniwa Kevin yoowo owaninhe ni muupuwelo wa wiisoona ohikhala echweenevo, oriye: “Omwaalakhanya Salumu 103 ni wuupuwelela yeeyo kaalakhannyaaka, wookikhaviherya otoroka muupuwelo aka, ni wiiwexexa mukhalelo Yehova onakooneiye.” Eva, yoowo olociwe woopaceryani, ooloca: “Omakuchuwelo wa nihiku ti nihiku kinnaavya elukuluku wi kuupuwelele echu yeeyo eri yoochuneyaxa wa Yehova nave eyo ennakivaha murecele ni waaceererya nroromelo naka.”

14. Nivekelo nni nnikhaviherye hai?

¹⁴ Mvekeleke moohihiyererya. (1 Tes. 5:17) Wakhala wi nnachuna okhalano onthamwene woolipa ni muchu mukina, onnachuneya olocihana ni yoowo moohihiyererya, nlocaka miyoonelo sahu. Emohamoha tho enneereya ni onthamwene ahu ni Yehova. Vaavaa nnavekelaahu wa Yehova nimuleelaka yoowo muupuwelo ahu, miyoonelo sahu ni wuukhuwa wahu, ninnooniherya wi ninnamuroromela yoowo, nave tho wi noosuwela wi onnanisivela. (Sal. 94:17-19; 1 Yoh. 5:14, 15) Yua, yoowo olociwe wuupaceryani, oriye: “Vaavaa kinavekelaaka, kinnapaka sincipale ohiya pahiru oloca ichu seeren’ye mu nihiku nenlo, kinnahula murima aka wa Yehova nave kinnamuleela mukhalelo kiniisoonaaka. Vakhaani vakhaani kinnahuserya omoona Yehova, ohiya ntoko xeefi a empresa, nyenya ntoko Tiithi yoowo onaasivela anaawe.”—Moone ekaaxa “ Apwanne Mohintoko Omwaalakhanya Liivuru Ola?”

15. Ti mwawiihai Yehova onooniheryeiye wi onnampwacha mmoha ti mmoha a hiyaano?

¹⁵ Mweemererye nikhaviheryo na anna; awo yamahala yoorweela wa Yehova. (Tiy. 1:17) Tiithi a  wirimu onnooniherya wi onnampwacha mmoha ti mmoha a hiyo, moorweela wa onivaha emusi yoomunepani ya anna ni arokora, yaawo anooniherya osivela mu “ilukuluku soothene.” (Masi. 17:17) Mu ekaarata awe wa Akolose, Paulo aahaaloca Akristu akhwaawe yaawo yaamukhavihenrye. Paulo olonce wi awo yaari “nihakalaliho.” (Kol. 4:10, 11, BNM) Ophiyerya wi Yesu aanachuna nikhaviheryo na asinthamwene, hiiha ntoko ankeelo ni achu nave owo aathamalela nikhaviheryo naya.—Luka 22:28, 43.

16. Ti mwawiihai anna ni arokora ahu eneeraaya enikhaviherye okhalano onthamwene woolipa ni Yehova?

¹⁶ Apwanne munnakumihavo mphurelo wa yamahala yeeyo Yehova oovanheiyeni? Omuleela munna awiichwelavo omunepani sawuukhula sanyu, eyo henooniherya wi mwa muchu ooceecheya; nyenya munanwerya okhapeleleya. Moone yeeyo James, yoowo olociwe woopaceryani, olonceiye: “Okhalano onthamwene waphaama ni anna yaawo ari awiichwelavo omunepani nikhaviheryo, xaxaxa wa miyaano. Vaavaa kinakhalaaka awuukhuwa ni muupuwelo wooheseya, asinthamwene yaala aphaama annakiwiriyana moopisa murima nave annakileela wi annakisivela vancipale. Orweela mwa yaawo kinnoona mukhalelo Yehova onakipwacheiye chiryene, nave tho wi onnakisivela.” Mweeparipari, ti woochuneya vancipale wunnuwiha ni otitelela okhalano onthamwene woolipa ni anna ni arokora ahu!

17-18. Taani nnaphwanelaahu onwiriyana, nave ntakhara heeni?

¹⁷ Satana onachuna wi nyuwaano muhiye owaniha ntakhara yeeyo eri yaphaama. Owo onachuna wi mweemereryeke wi Yehova hanoosivelaani, nave tho wi himweechweenevo. Nyenya hiiha ntoko nihusenryaahu, eyo yawootha chiryene.

¹⁸ Yehova onnoosivelaani vancipale. Wakhala wi munnamwiiwelela yoowo munahaala ‘okhala mu osivela wawe’ okhala wookhala hiiha ntoko Yesu. (Yoh. 15:10) Mwawiihiiha muhinwiriyane Satana naari owiriyana murima anyu vaavaa oneereryaaya woothorihaani. Ohiya yeeyo, munwiriyane Yehova, yoowo onoona ichu saphaama mwa hiyo. Muroromele wi Yehova “onnahakalalano achu awe,” ophitaanyerya nyuwo!