1. Ni myatsi yahi eyo Yehova akalangira oko bandu biwe?

YEHOVA MUNGU “akatsemera abandu buwe.” (Esy. 149:4) Ebyo kwenene ni binywa ebyuwene nga! Yehova akalangira emibere yetu mibuya; akalangira ngoko twanganabya bandu abuwene, kandi akatuwatikaya eriyitunda hakuhi naye. Twamayitsinga eribya bataleghula, inyakendiyitunda hakuhi netu kera na kera!​—Yoa. 6:44.

2. Busanaki likanakala oko bandu balebe erikirirya bati Yehova abanzire?

² Abandu balebe banganabugha bati, ‘nyinasi ngoko Yehova anzire abandu biwe mo kikumula, niki kyo kyangaleka inikirirya niti Yehova anyitsomene ingyuwene-wene kwehi?’ Niki kyo kyangaleka omundu iniayibulya eribulyo eryo? Oksana *, oyo waghalawa kutsibu omo bwana akabugha ati: “Munatsema kutsibu omughulu nabatisibawa n’eritsuka omubírí w’obupainia. Aliwe, enyuma sy’emyaka 15 munatsuka eryibuka emyatsi mibi eyo nalabamo omo bwana. Munalw’inabugha niti Yehova syakinyilighire kandi sinyikitolere olwanzo lwiwe.” Yua, omupainia oyo abya naye n’amaligho mangyi omo bwana bwiwe akabugha ati: “Munaherera engebe yaghe y’oko Yehova kundi nabya nyanzire erimutsemesya. Aliwe, nabya nikirirye niti syangatanianza n’ahake.”

3. Omo mwatsi ono tukendikania okuki?

³ Nawu wanganabya ng’abali betu bataleghula babiri aba, wanzire Yehova yo kutsibu aliwe wanganatika-tika erikirirya naye ng’anakwanzire. Busanaki litolere iwikirirya ngoko akutsomene kwenene-kwenene? Kandi niki kyo kyangakuwatikya omughulu ukalengekanaya uti Yehova syakwanzire. Muleke tusubiraye oko mabulyo ayo.

4. Busanaki ni hatari eritika-tika Yehova ng’anatwanzire?

⁴ Olwanzo luli n’akaghala k’erikuna omundu erikola. Twamikirirya kundu tuti Yehova atwanzire kandi ngoko atutsomene, itukendibya n’omuhwa w’erimukolera n’omutima wosi n’omo engebe yangabya mw’amaligho. Oko lundi luhande, twamabitika-tika oMungu ng’anatutsomene, ‘amaka wetu iniakendibya make.’ (Emis. 24:10) Kandi twamabitsuka erilengekania tuti oMungu syatwanzire, isitwenditoka eriyiteya oko bitegho bya Sitani.​—Efe. 6:16.

5. Niki kyo kyabirihikira Abakristo bataleghula balebe busana n’eritika-tikira olwanzo lw’oMungu?

⁵ Obwikirirya bw’aBakristo bataleghula balebe b’oko mughulu wetu muboloberera busana n’eritika-tika. Omusyakulu w’endeko oyukahulawamo James akabugha ati: “N’omo nanabya ngakolera oko Beteli n’eritsemera omubírí waghe w’omo ndeko y’omubughe w’ekindi kihugho, munayibulya Yehova ng’anabya inianalighire kwenene eriyiherera lyaghe. Mughulu mulebe, munayibulya nibya Yehova nganemuhulikirira emisabe yaghe.” Eva, naye ali omo mubiri w’omughulu wosi, akabugha ati: “Munalangira ngoko eritika-tikira olwanzo lwa Yehova ni hatari kundi likalobereraya ebyosi ebyo tukakola omo mubírí wa Yehova. Likaleka engumbu y’erikolera oMungu y’emyatsi milebe iyakeha kandi likaheraya obutseme bwetu bw’erikolera Yehova.” Michael, omupainia w’omughulu wosi kandi musyakulu w’endeko, akabugha ati: “Wamabya isiwikirirye ngoko oMungu akutsomene, iwukendiyihighula okwiye.”

6. Litolere itwakolaki omughulu eritika-tikira olwanzo lw’oMungu lyamingira omo bwenge bwetu?

⁶ Eby’erileberyako ebi bikakanganaya ngoko eribya n’amalengekania awatuwene, lyanganatsandya obwira bwetu n’oMungu. Aliwe twangakolaki omughulu erika-tikira olwanzo lw’oMungu lyamingira omo bwenge bwetu? Litolere itwaluitwalusya amalengekania ayo omo bwenge! Usabe Yehova akuwatikaye erilusya “amalengekania awakahanga-hangaya” n’erikuha ‘obuholo bw’oMungu obwasyateya emitima yenyu n’amaghaniryo wenyu.’ (Esy. 139:23; Flp. 4:6, 7) Kandi wibuke, sighuli iwuwene. Abandi baghala n’abali betu bataleghula bane n’amalengekania awali ng’ayo. Nibya n’abaghombe ba Yehova ba kera nabo mubalwa n’amaligho awali ngayo. Tulebaye ekyo  twangigha erilabira eky’erileberyako ky’omukwenda Paulo.

7. Paulo abya n’amaligho wahi?

⁷ Oko katambi kalebe ukanayowa nga ulitoherwe n’emibírí mingyi, neritaluka erikola eyosi? Byamabya bitya, iwukendiminya ngoko Paulo abya akayowa. Mwahangya-hangya, butsira busana n’endeko nguma nyisa aliwe “busana n’esyondeko syosi.” (2 Kor. 11:23-28, NWT) Unakwire obukoni b’omughulu muli obukaleka iwaherya obutseme bwaghu? Paulo mwaghalibwa “n’erihwa omo mubiri,” alinga bwabya bukoni bulebe omo mubiri, kandi abya iniabiritwa amaha w’erilama oko bukoni obo. (2 Kor. 12:7-10) Ukanahanga-hangaya busana n’eritendihika-hikana lyaghu? Paulo kw’abya akayowa atya oko ndambi silebe. Mwayahula mo “mundu w’obulighe” kusangwa mughulu wosi iniakalwa atoke erikola ebyuwene.​—Rom. 7:21-24.

8. Ekyawatikaya Paulo erilwa n’amaligho wiwe niki?

⁸ Nomo anabya akalengwako omo nzira mbiriri-mbiriri n’omo myatsi eyikabuna mutima, Paulo mwalola embere erikolera Yehova. Ekyamuha akaghala k’erikola atya niki? Nomo anabya inianasi ndeke eritendihika-hikana liwe, abya n’obwikirirya obuwatire omo mbanulo. Kandi abya inianasi ndeke omulaghe wa Yesu ono: “oyukikiriraya [Yesu] . . . abye n’engebe y’erikota.” (Yoa. 3:16; Rom. 6:23) Kwenene, Paulo abya mughuma w’oko ababya n’obwikirirya omo mbanulo. Abya ikirirye ngoko Yehova anayiteghekire erighanyira n’abakola amalolo awakalire bamabibindula emitima yabo.​—Esy. 86:5.

9. Tukighaki omo binywa bya Paulo ebikabanika omo Abanya Galatia 2:20?

⁹ Kandi Paulo abya n’obwikirirya omo butoki bw’olwanzo lw’oMungu ngoko Kristo abugha. (Soma Abanya Galatia 2:20.) Ulebaye ebinywa ebikasubaya mutima ebiri oko mwiso w’erisako eryo. Paulo mwabugha ati: ‘Omughala w’oMungu . . . Oyo wanyanza n’eriyiha busana naghe.’ Paulo mwatahiraho olubibi oko lwanzo lw’oMungu ng’eribugha ati, ‘nanganalangira ekyangaleka Yehova inianza abaghala betu, aliwe syangatanyanza n’ahake.’ Paulo mwibukya abandu be Roma ati: “Omughulu twabya tukine bakola-nabi, Kristo mwatuholera.” (Rom. 5:8) Olwanzo lw’oMungu okwitwe siluwite olubibi!

10. Tukighaki omo Abanya Roma 8:38, 39?

¹⁰ Soma Abanya Roma 8:38, 39. Paulo abya ikirirye kundu ngoko olwanzo lw’oMungu luwite akaghala kanene. Mwahandika ati sihali  kindu kyosi-kyosi ‘ekyangatoka eritughabula oko lwanzo lw’oMungu.’ Paulo mwaminya ngoko Yehova akanganaya ekihanda kye Israeli ky’omutima w’erilindirira. Kandi mwaminya ngoko Yehova abirimukangania olukogho. Tubughe omo kikuhi amalengekania wa Paulo, ‘kundi Yehova mwatuma Omughala wiwe erinyiholera, hane ekyangaleka inatika-tikira olwanzo lwiwe?’​—Rom. 8:32.

11. Nomo Paulo anakola amalolo awasosire awali omo 1 Timoteo 1:12-15, busanaki mwikirirya ngoko Yehova abya amwanzire?

¹¹ Soma 1 Timoteo 1:12-15. Alinga mohanabya endambi eyo Paulo ayowa muhanda busana n’ebya akola embere sy’eribya Mukristo. Sikiriswekaya erilangira ngoko mwayikaniako ati abya “mukola-nabi kwilaba bosi!” Embere sy’eriminya ekwenene, Paulo mwaghalya Abakristo nibya n’omo miyi y’ehali, eriboha abalebe bomo ngomo n’eriligha eritibwa ly’abandi. (Emib. 26:10, 11) Terilengekania Paulo ng’angayowire ati kw’ahindana omulwana Mukristo oyo ababuti biwe mubitibwa kundi Paulo mwabugha ati bamitwe! Paulo mwayibandya b’omo busana n’amalolo wiwe, aliwe mwaminya ngoko syangasyabindula ebyo akola embere. Mwaligha ngoko Kristo mwamuholera, kandi mwahandika n’obwikiriya bosi ati: ‘Nyiri ngoko nyine busana n’olukogho lw’oMungu.’ (1 Kor. 15:3, 10) Twamabana somo yahi? Litolere iwaminya ngoko Yesu mwakuholera n’erileka iwabya n’akanya k’eribya n’obwira obuwene haghuma na Yehova. (Emib. 3:19) Eky’omughaso oko Mungu by’ebyo tukakola lino n’ebyo tukendisyakola omo biro ebikasa, butsira amakosa awo twakola kera, n’omo twangabya itwabya baghuma b’oko Bimiri baYehova oko mughulu oyo kutse iyehe.​—Isa. 1:18.

12. Ebinywa ebiri omo 1 Yoane 3:19, 20 byangatuwatikya biti twamabiyowa nga situtolere kandi nga sitwanzirwe n’oMungu?

¹² Omughulu ukalengekanaya oko luholo lwa  Yesu eriswika amalolo waghu, wanganabugha uti, ‘sinyitolere olusunzo olo.’ Busanaki wangayowa utya? Omutima wetu owatahika-hikene anganatuherya, neryo itwalengekania tuti situtolere kandi tuti oMungu syatwanzire. (Soma 1 Yoane 3:19, 20.) Omughulu tukatsuka erilengekania tutya, litolere itwibuka ngoko ‘oMungu alengire emitima yetu.’ Olwanzo n’erighanyira lya Tata wetu w’elubula biri n’akaghala kanene kulenga amalengekania wosi-wosi mabi awangabya omo mutima wetu. Litolere itwigha erikirirya ngoko Yehova atwanzire. Erikola tutya, litolere itwasoma Ekinywa kiwe obuli kiro, erimusaba kangyi-kangyi, n’eribeghera erihindana n’abandu biwe bataleghula. Busanaki erikola emyatsi eyo ni ky’omughaso?

13. Erigha eKinywa ky’oMungu likatuwatikaya liti? (Ulebaye akasanduku “ Ngoko Ekinywa ky’oMungu kyawatikayabo.”)

¹³ Wighe eKinywa ky’oMungu obuli kiro, neryo ukendilangira olukogho lwa Yehova lo ndeke. Ukendiminya ngoko akwanzire kutsibu. Erilengekania buli oko kitswe kighuma ky’omo Kinywa ky’oMungu k’obuli kiro kyanganakuwatikya erilengekania ndeke kutsibu, ‘n’erihabula’ kutse eritondeka emyatsi y’omo bwenge bwaghu n’omo mutima waghu. (2 Tim. 3:16) Omusyakulu w’endeko oyukahulawamo Kevin oyo wabya akalengekania ati syatolere, akabugha ati: “Erisoma n’erilengekania buli oko Esyonyimbo 103 mubyaniwatikya erilangira ngoko kwenene Yehova anianzire.” Eva, oyulyakanibawako oho ndata, akabugha ati: “Ngabughirira omusibo wo ndeke omwilengekania buli oko malengekania wa Yehova. Erikola nitya likaniha omutima w’obuholo kandi likahimba obwikirirya bwaghe.”

14. Omusabe angatuwatikya ati?

¹⁴ Ubye ukasaba kangyi-kangyi. (1 Tes. 5:17) Obwira obuwatire n’omundu mulebe bukabya omwilolanako n’erikanirania butumbya erikalua oko mutima. Ko bine bitya oko bwira bwetu haghuma na Yehva. Omughulu tukamubwira omo musabe ebiri omo mutima wetu, amalengekania wetu, n’erihangya-hangya lyetu, tukakanganaya ngoko tuyiketere iye kandi ngoko twasi kw’atwanzire. (Esy. 94:17-19; 1 Yoa. 5:14, 15) Yua, oyulyahulawa embere, akabugha ati: “Omughulu ngasaba, ngayikasa eritendimanira okwikania ebyo niryakola omo musibo lisa. Ngakingulira Yehova y’omutima waghe n’erimubwira amalengekania waghe. Lyolo-lyolo, monatsuka erilangira Yehova, butsira ng’omukulu w’ekombanyi aliwe nga Tata oyo wanzire kwenene abana biwe.”​—Ulebaye akasanduku “ Wanabirisomakyo?”

15. Yehova akakanganaya ati kw’atutsomene?

¹⁵ Ubye n’abira bataleghula; ekyo ni kihembo erilua oko Yehova. (Yak. 1:17) Tata wetu w’elubula akakanganaya kw’atutsomene omwituha ekihanda ky’abaghala n’abali betu abakakanganaya  olwanzo “mighulu yosi.” (Emi. 17:17) Omo baruha yiwe oko Abanya Kolosayi, Paulo mwahula Abakristo balebe abamuwatikaya; akakanaya kubo ati “babirimuwatikya kutsibu.” (Kol. 4:10, 11) Na Yesu naye mwatsemera obuwatikya bwa bira biwe, abamalaika n’abandu.​—Luka 22:28, 43.

16. Abira bataleghula bakatuwatikaya bati eriyitunda hakuhi na Yehova?

¹⁶ Unemubana endundi y’omo kihembo ekikalua oko Yehova eky’abira bataleghula? Erikanirya erihangya-hangya lyetu omwira oyukulire bunya-kirimu si bughambu obwikirirya bwetu bwabirikeha, aliwe ekyo kyanganatuteya. Lebaya ebyo James, oyulyahulawa embere akabugha: “Eribya n’obwira obuwene haghuma n’aBakristo abakulire omo bwikirirya kyabiriniwatikya kutsibu. Omughulu amalengekania awatuwene akanihikira, abira babuya aba bakanihulikirira n’omutima w’erilindirira n’erinyibukya ngoko banianzire.” Ni ky’omughaso erinokya n’erikulya obwira bwa hakuhi haghuma n’abaghala n’abali betu abo tukaramaya nabo Yehova.

17-18. Nindi yo litolere itwikirirya, kandi busanaki?

¹⁷ Sitani anzire itwaleka amalwa w’erikola ekibuya. Anzire ati twikiriraye tuti Yehova syatwanzire, ati situli b’omughaso embere siwe. Aliwe, ngoko twamabilangira sihali ekyangatulusya omo kwenene.

¹⁸ Yehova akwanzire. Uli w’obughuli bunene omo meso wiwe. Wamabimowa ‘iwukendisikala omo lwanzo lwiwe’ kera na kera, ngoko Yesu akola. (Yoa. 15:10) Neryo isiwahulikirira Sitani kutse omutima waghu owakaleka iwalengekania uti Yehova syakwanzire. Omo mwanya w’ekyo, wikiriraye Yehova oyukalangira ebyuwene by’omo buli mughuma w’okwitwe. Wikiriraye ngoko “akatsemera abandu biwe,” naghu iwune mughuma wa kubo!