1. Kansi Yehova owona chinji muli ŵanthu ŵake?

YEHOVA MULUNGU “okondwela na ŵanthu ŵake.” (Sal. 149:4) Kuziŵa vamene ivi kutikondwelesha ngako! Yehova owona minkhalidwe yasu iweme ndipo otiyavya kunkhala azishamwali ŵake. Keno sewo tingapitilije kunkhala okhulupilika kuli yove, yove apitilije kunkhala nshamwali wasu mpaka kale-kale!​—Yoh. 6:44.

2. Ndaŵa yanji ayakine owona kuti ni kovuta kusimikijila kuti okondewa na Yehova?

² Ayakine payakine anganene kuti: ‘Newo nuziŵa kuti Yehova okonda ŵanthu ŵake monga gulu, koma kansi newo ningasimikijile tyani kuti yove onikonda?’ Ndaŵa yanji ayakine okonsha konsho yoteti? Oksana *, wamene etamana ngako penze akali mwana, enena kuti: “Newo penibatizika, nikondwela ngako ndipo niyamba kutumikila monga mpainiya. Koma pavuli pa vyaka 15, niyamba kukumbukila vinthu viipa venzenichitikila panenze mwana. Newo nifwika pa mfundo yakuti Yehova waleka kunikonda ndipo nuwamilalini chikondi chake.” Mulongo muyakine wamene ni mpainiya zina yake Yua, wamene ekumanasoti na mavuto anyinji penze akali mwana, enena kuti: “Newo nilipeleka kwa Yehova ndaŵa nenzefuna kumukondwelesha. Koma newo nenzesimijila kuti Yehova anganikondelini olo patontho.”

3. Kansi mu nkhani ino tikambilane chinji?

³ Monga ni mwevichitikila kuli aŵa alongo aŵili ŵatatomola, mwewo mungankhale na chikondi chikulu pa Yehova, koma payakine mungokaikila kuti yove okukondani. Ndaŵa yanji mwewo mufunikila kusimikijila kuti Yehova okukondani? Komasoti kansi ni chinji chingakuyavyeni keno mwayamba kuganiza kuti Yehova okukondanilini? Tiyeni tikambilane mayankho a makonsho amene aŵa.

4. Ndaŵa yanji kukaikila kuti Yehova otikonda ni koyofya?

⁴ Chikondi ni mphamvu ikulu yamene yutichitisha kuchitapo kanthu. Kunkhala osimikijila kuti Yehova otikonda komasoti kutiyavya, kutichitisha kuti timutumikile na moyo wasu wonse olo kuti tukumana na mavuto pa moyo wasu. Koma keno tingokaikila kuti Yehova otiganizila, ‘mphamvu zasu zinkhale zitontho.’ (Miy. 24:10) Ndipo keno takhumudwa noyamba kuganiza kuti Yehova otikondalini, tingatang’ililelini ku mayeselo a Satana.​—Aef. 6:16.

5. Kansi ni chinji chichitikila abale na alongo ayakine amene enzeganiza kuti Mulungu oŵakondalini?

⁵ Vuto yokaikila ifokesha chikhulupililo cha abale ŵasu ayakine. M’bale muyakine wamene ni nkulu, zina yake James, enena kuti: “Newo nenzetumikila pa Beteli komasoti nenzeyavya mpingo uyakine wa chilaŵilo cha kuchalo chiyakine, koma nenzesimikijilalini kuti Yehova enzekondwela navo venenzemuchitila. Ndipo niyamba kulikonsha kuti, kansi Yehova omvwishila mapemphelo ŵangu?” Eva, wamene alisoti mu utumiki wa nthawe zonse, enena kuti: “Newo nuwona kuti kukaikila kuti Yehova okukonda ni koyofya, chifukwa ivi vukhuza chilichonse chauchita potumikila Yehova. Vamene ivi vutichitisha kuti tileke kuchita chidwi na vinthu vauzimu komasoti kutichosela chisangalalo chasu potumikila Yehova.” Michael, wamene ni mpainiya wonkhazikika komasoti nkulu, enena kuti: “Ukankhala kuti ukaikila kuti keno Yehova okukonda, mapeto ŵake ufutuka kuli yove.”

6. Tikayamba kukaikila kuti Mulungu otikonda, kansi tufunika kuchita chinji?

⁶ Vichitikila abale amene aŵa vuwonesha kuti maganizo akuti Yehova otikondalini angawononge chikhulupililo chasu. Lomba kansi tufunika kuchita chinji keno maganizo amene aŵa ayamba kutiwelela m’mutu mwasu? Tufunika kuŵafumyamo mokulumija! Sengani Yehova kuti akuyavyeni kuchinja ‘maganizo osoŵesha ntendele’ amene aŵa noikamo ‘ntedele wa Mulungu, wamene ukuti uteteze mitima yanu na maganizo ŵanu.’ (Sal. 139:23; Afil. 4:6, 7) Ndipo osaluŵa kuti mwewo mulilini mweka. Ayakine abale na alongo okhulupilika olimbana na maganizo okaikila kuti Yehova oŵakonda. Ndipo olo atumiki a Yehova akale elimbana na mavuto amene aŵa. Onani vatingaphunzilepo kufumila pa chisanzo cha ntumwi Paulo.

7. Kansi Paulo ekumana na mavuto otyani?

⁷ Kansi nthawe ziyakine mwewo mukumvwa kuti muli na maudindo anyinji komasoti kuti ni vovuta kuchita vonse vamufunikila kuchita? Keno n’tetyo, mwewo mungakwanishe  kumvwisha mwevenzele vinthu kwa Paulo. Yove enzedela nkhaŵa abale osati mpingo umozi tyala, koma “mipingo yonse.” (2 Akor. 11:23-28) Kansi mwewo muli na matenda asapola ndipo okuchoselani chisangalalo? Paulo enzefunikila kulimbana na “munga mmuŵili,” payakine yenze vuto ya matenda yemene imuchitisha kuti atamane ngako. Paulo enzefunishisha kumasuka ku vuto yamene iyi. (2 Akor. 12:7-10) Kansi mwewo nthawe ziyakine mukumvwa kukhumudwa chifukwa cha vinthu vamuchita chifukwa cha kusoŵa ungwilo? Paulo naye enzekumvwa teti nthawe ziyakine. Yove enena kuti enze “munthu wotamana,” chifukwa chakuti nthawe zonse enzelimbana na vinthu venzechita chifukwa cha kusoŵa ungwilo kwake.​—Aro. 7:21-24.

8. Kansi ni chinji chiyavya Paulo kuti apilile mavuto ŵake?

⁸ Paulo ekumana na vinthu vamene vimuyesa komasoti kumukhumudwisa, koma yove epitilija kutumikila Yehova. Kansi yove mphamvu ezifwana kuni kuti akwanishe kuchita vamene ivi? Olo kuti enzeviziŵa luweme vinthu venzephoniyesha chifukwa cha kusoŵa ungwilo kwake, Paulo enzeikhulupilila ngako dipo. Yove enzeiziŵasoti lonjezo ya Yesu yakuti ‘aliyense wamene angakhulupilile yove [Yesu] . . . azankhale na moyo wosasila.’ (Yoh. 3:16; Aro. 6:23) Kulaŵila chendi, Paulo enzeikhulupilila dipo. Yove enze wosimikijila kuti Yehova ofunishisha kukhululukila olo ŵala amene echita machimo akulu-akulu, koma elapa.​—Sal. 86:5.

9. Kansi tuphunzilapo chinji pa mawu a Paulo amene ali pa lemba ya Agalatiya 2:20?

⁹ Paulo enzekhulupililasoti kuti enzekondewa ngako na Mulungu, chifukwa enzeziŵa kuti Mulungu enze etumija Yesu kuti azamufwile. (Ŵelengani Agalatiya 2:20.) Onani mawu aweme a Paulo, kumapeto kwa vesi yamene iyi akuti: “Mwana wa Mulungu . . . enikonda nolipeleka yeka chifukwa cha newo.” Paulo aliyeganize kuti ni muipa ngako mwakuti Mulungu angamukondelini yayi, yove aliyeganize kuti, ‘ni kosavuta kuwona chifukwa chamene Yehova chakukondela abale ŵangu, koma newo anganikondelini olo patontho.’ Paulo ekumbusha Aroma kuti: “Mwakuti petenze ochimwa, Khilisitu etifwila.” (Aro. 5:8) Paliye chinthu chilichonse chingaleshe chikondi chalinacho Mulungu kuli sewo!

10. Kansi tuphunzilapo chinji pa lemba ya Aroma 8:38, 39?

¹⁰ Ŵelengani Aroma 8:38, 39. Paulo enze wosimikijila ngako vokhuza chikondi chikulu chalinacho Mulungu kuli yove. Yove elemba kuti, paliye chinthu chilichonse ‘chingakwanishe kutilekanisha na chikondi cha Mulungu.’ Paulo enzeziŵa kuti Yehova eŵalezela ntima ngako Aisiraeli. Yove enzeziŵasoti mwechimuwoneshela chikondi Yehova. Tingafotokoze mwachidule mawu a Paulo ŵechilembela Aroma kuti, ‘Keno Yehova etumija Mwana wake kuzanifwila, nufunikalini kukaikila kuti onikonda.’​—Aro. 8:32.

11. Olo pavuli pochita machimo monga ni ofotokozewa pa 1 Timoteyo 1:12-15, ndaŵa yanji Paulo enzesimikijila kuti Mulungu omukonda?

 ¹¹ Ŵelengani 1 Timoteyo 1:12-15. Payakine Paulo enzekumvwa chisoni akaganizila vinthu venzechita kale akaliyenkhala Nkhilisitu. Tetyo, ni vosadabwisa kuti elitomola yeka kuti ni wochimwa “ngako!” Paulo penze akaliyephunzila choonadi, enzetamanisha Akhilisitu mu tauni iliyonse, kuŵaika mu djeli komasoti kuvomekejana na khoti ikaganiza zopaya Akhilisitu ayakine. (Mac. 26:10, 11) Kulaŵila chendi, Paulo sembe edandaula ngako kuti enze ekumana na Nkhilisitu wachilumbwana wamasiye wamene makolo ŵake epaiwa chifukwa cha yove. Paulo edandaula ngako chifukwa cha vophoniya vake, koma eziŵa kuti angachinjelini vinthu vipita kale. Koma evomekeja tyala kuti Yesu echifwa chifukwa cha yove. Paulo elemba kuti: “Mwa kuwama ntima kukulu kwa Mulungu, nili monga mwanilili muno.” (1 Akor. 15:3, 10) Kansi sewo tuphunzilapo chinji? Tufunika kuvomekeja kuti Khilisitu etifwila sewo ndipo echitisha kuti sewo tinkhale pa ushamwali wotang’a na Yehova. (Mac. 3:19) Payakine mwewo muliimba mulandu chifukwa cha chimo yemwichita kuvuli, kapena yemwichita mwankhala kale Mboni ya Yehova. Koma kumbukilani kuti Yehova oŵelengela vala vamuchita lomba teti komasoti vamungachite kusogolo, osati machimo ŵemwichita kuvuli.​—Yes. 1:18.

12. Kansi lemba ya 1 Yohane 3:19, 20, ingatiyavye tyani keno tulimvwa kuti nise atyala-tyala olo kuganiza kuti tufunikalini kukondewa?

¹² Mukakumbukila kuti Yesu echifwa chifukwa cha machimo ŵanu, payakine mwewo mulaŵila kuti, ‘Nuwona kuti newo nuwamililalini mphaso yamene iyi.’ Ndaŵa yanji nthawe ziyakine mwewo mukumvwa tetyo? Ntima wasu wochimwa nthawe ziyakine ungatisemphe noyamba kulimvwa kuti nise atyala-tyala olo kuganiza kuti tufunikilalini kukondewa. (Ŵelengani 1 Yohane 3:19, 20.) Tikayamba kuganiza teti, tufunika kukumbukila kuti “Mulungu ni nkulu kupambana mitima yasu.” Olo keno tikumvwa kuti  Yehova otikondalini olo otikhululukilalini, Atata ŵasu ŵakululu akali tikonda mphela ndipo atikhululukile. Tufunika kuphunzila kuvomekeja kuti Yehova otikonda. Kuti tichite vamene ivi tufunika kuphunzila Mawu a Mulungu nsiku zonse, kupemphela kuli yove pafupi-pafupi, komasoti kusonkhana nthawe zonse na ŵanthu ŵake okhulupilika. Ndaŵa yanji kuchita vinthu vamene ivi ni kofunika ngako?

13. Kansi kuphunzila Mawu a Mulungu kungatiyavye tyani? (Onanisoti bokosi yakuti, “ Mwakuŵayavyila Mawu a Mulungu.”)

¹³ Mukophunzila Mawu a Mulungu nsiku zonse, mukochita tetyo, muphunzile vinyinji vokhuza minkhalidwe iweme ngako ya Yehova. Mumvwishe luweme kuti yove okukondani ngako. Kuganizilako kambali ka Mawu a Mulungu pa nsiku, kungakuyavyeni kuchinja maganizo ŵanu, “kuyondolola vinthu” m’maganizo mwanu komasoti muntima mwanu. (2 Tim. 3:16) M’bale muyakine wamene ni nkulu zina yake Kevin, wamene elimbana na maganizo olimvwa kunkhala watyala-tyala, enena kuti: “Kuŵelenga lemba ya Salimo 103 noiganizila, kwiniyavya kuchinja maganizo ŵangu nomvwisha vakuganiza Yehova vokhuza newo.” Eva wamene tamutomolako kale kuvuli, enena kuti: “Kumapeto kwa nsiku nthawe zonse newo nupatulako nthawe kuti niganizile vinthu vofunika ngako kwa Yehova. Vamene ivi vunipasa ntendele wa muntima ndipo vuyangijila chikhulupililo changu.”

14. Kansi pemphelo yutiyavya tyani?

¹⁴ Mukopemphela pafupi-pafupi. (1 Ates. 5:17) Mwewo mukafuna kunkhala pa ushamwali na munthu muyakine, mufunika kulaŵila naye pafupi-pafupi komasoti kumuuja mwamumvwila. Tingachitesoti chimozi-mozi na ushamwali wasu na Yehova. Tikopemphela kwa Yehova nomufotokozela maganizo ŵasu, mwatumvwila komasoti nkhaŵa zasu, tuwonesha kuti tumudalila noziŵa kuti yove otikonda. (Sal. 94:17-19; 1 Yoh. 5:14, 15) Yua, wamene tamutomolako kale kuvuli, enena kuti: “Newo nikopemphela kwa Yehova, numuujalini tyala vinthu vanichitikila pa nsiku yamene iyo. Newo numusegulila ntima wangu Yehova ndipo numuuja vonse vanuganiza komasoti mwanumvwila. Patontho na patontho nuphunzila kuwona Yehova, osati monga munecho wa kampani ikulu, koma monga Atata amene okonda chendi ŵana ŵawo.”​—Onani bokosi yakuti, “ Kansi mweiŵelengako kale iyi buku?”

15. Kansi Yehova owonesha tyani kuti odela nkhaŵa aliyense wa sewo?

¹⁵ Mukolondela thandizo yakupeleka abale; ove ni mphaso yofumila kwa Mulungu. (Yak. 1:17) Atata ŵasu ŵakululu owonesha kuti odela nkhaŵa aliyense wa sewo, potipasa banja yauzimu ya abale na alongo, amene owonesha chikondi “nthawe zonse.” (Miy. 17:17) Mu kalata yake yechilembela kwa Akolose, Paulo efotokoza vinthu vokhuza abale ayakine amene enze emuyavya pa nthawe iyakine, ndipo yove enena kuti amene awo “eniyavya na kunilimbikisa.” (Akol. 4:10, 11) Yesu Khilisitu naye efunikila kuyavyiwa  na azishamwali ŵake, angelo komasoti ŵanthu, ndipo etembeja ngako thandizo yawo.​—Lk. 22:28, 43.

16. Kansi abale angatiyavye tyani kuti tinkhale pa ushamwali wotang’a ngako na Yehova?

¹⁶ Kansi mwewo mupindula mokwanila na mphaso yechikupasani Mulungu? Kufotokozelako m’bale wotang’a mwauzimu nkhaŵa zanu, vutanthauzalini kuti nimwe wofoka; koma chingankhale chitetezo. Ganizilani vechinena James wamene tamutomolako kale kuvuli, yove enena kuti: “Kunkhala pa ushamwali uweme na Akhilisitu otang’a mwauzimu ni thandizo ikulu ngako kuli newo. Nikakhumudwa chifukwa cha maganizo aipa, azishamwali ofunika amene aŵa onimvwishila moleza ntima ndipo onikumbusha kuti ove onikonda ngako. Ove akochita vamene ivi, newo nulimvwa kuti Yehova onikonda komasoti kuti onisamalila.” Ni kofunika ngako kunkhala pa ushamwali wotang’a na abale na alongo ŵasu auzimu!

17-18. Kansi tufunika kumvwila ŵani, ndipo ndaŵa yanji?

¹⁷ Satana ofuna kuwona kuti mwewo mwasiya kulimbikila kuchita chinthu chiweme. Ndipo yove ofuna kuti mwewo musimikijile kuti Yehova okukondanilini, komasoti kuti mukolimvwa kuti nimwe chinthu chotaika. Koma monga mwatawonela kale, wonse wamene uyu ni wenye ukulu ngako.

¹⁸ Yehova okukondani ngako mwewo. Mukamumvwila yove ‘mupitilije kunkhala m’chikondi chake’ mpaka kale-kale, monga ni Yesu. (Yoh. 15:10) Tetyo, osamumvwila Satana, olosoti kumvwila ntima wanu keno ukusemphani kuti Yehova okukondanilini. Mmalomwake, mvwilani Yehova, wamene owona viweme mwa aliyense wa sewo. Nkhalani wosimikijila kuti Yehova “okondwela na ŵanthu ŵake,” ndipo vamene ivi vuyangijilapo munthu wofunika ngako kuli yove, wamene ni mwewo!