1. Jehofa o bona eng bathong ba gagwe?

JEHOFA MODIMO “o kgahlwa ke batho ba gagwe.” (Ps. 149:4) Seo se re thabiša kudu! Jehofa o bona dika tša rena tše dibotse e bile o bona dilo tše dibotse tšeo re ka kgonago go di dira. Ka baka leo, o re gogela go yena. Segwera sa rena le yena se tla dula se tiile ge e ba re dula re mmotegela!—Joh. 6:44.

2. Ke ka baka la’ng ba bangwe ba hwetša go le thata go dumela gore Jehofa o a ba rata?

² Ba bangwe ba ka re: ‘Ke a tseba gore Jehofa o rata batho ba gagwe ka moka, eupša nka tseba bjang gore nna Jehofa o a nthata?’ Ke’ng seo se ka dirago gore motho a botšiše potšišo ye? Kgaetšedi Oksana * yo a ilego a tlaišwa ge e be e sa le ngwana, mohlomongwe ka dilo tšeo batho ba ilego ba di bolela goba ba ilego ba mo dira tšona o re: “Ke ile ka thaba kudu ge ke be ke kolobetšwa, ke moka ka thoma go bula madibogo. Eupša ka morago ga mengwaga e 15 ke ile ka thoma go nagana ka dilo ka moka tšeo di ilego tša ntiragalela ge ke be ke sa le ngwana. Ke ile ka thoma go ipotša gore Jehofa ga a sa nkamogela e bile ga a sa nthata.” Kgaetšedi Yua wa mmulamadibogo yoo le yena a ilego a tlaišwa ge e be e sa le ngwana o re: “Ke ile ka ineela go Jehofa ke moka ka kolobetšwa ka gobane ke be ke nyaka go mo thabiša. Eupša ke be ke kgodišegile gore a ka se tsoge a nthata.”

3. Re tlo ithuta’ng sehlogong se?

³ Go swana le dikgaetšedi tše tše pedi, o rata Jehofa kudu eupša o belaela ge e ba yena a go rata. Ke ka baka la’ng o swanetše go kgodišega gore Jehofa o a go rata? Le gona o ka thušwa ke’ng ge e ba o nagana gore Jehofa ga a go rate? Anke ga bjale re boledišaneng ka dikarabo tša dipotšišo tše.

4. Ke ka baka la’ng go le kotsi go belaela gore Jehofa o a re rata?

⁴ Ge e ba re kgodišegile gore Jehofa o a re rata, seo se tla re thuša gore re dire sohle seo re ka se kgonago go mo hlankela le ge re na le mathata. Eupša ge re belaela gore Jehofa o a re rata, gona ‘matla a rena a tla hlaela.’ (Die. 24:10) Ge e ba re nyamile e bile re nagana gore Modimo ga a re rate, re ka se kgone go ganetša diteko tša Sathane.—Baef. 6:16.

5. Go ile gwa direga’ng ka bana babo rena le dikgaetšedi bao ba bego ba nagana gore Jehofa ga a ba rate?

⁵ Bana babo rena ba bangwe le dikgaetšedi ba ile ba thoma go nagana gore Jehofa ga a ba rate e bile ga a na taba le bona. Seo se ile sa dira gore tumelo ya bona e fokole. Mogolo yo a bitšwago James o re: “Le ge ke hlankela Bethele e bile ke thabela go šoma tšhemo le phuthego ya leleme le lengwe yeo ke lego go yona, ke be ke sa kgodišege gore Jehofa o be a amogela dilo ka moka tšeo ke bego ke mo direla tšona. Ka nako e nngwe ke ile ka ba ka ipotšiša ge e ba Jehofa o theetša dithapelo tša ka.” Eva yoo le yena a lego tirelong ya nako e tletšego o re: “Ke ile ka bona gore go kotsi go belaela ge e ba Jehofa o a go rata ka gobane seo se ama selo se sengwe le se sengwe seo o se dirago go mo hlankela. O ka ikwa o se sa thabela go hlankela Jehofa e bile o nyaka go tlogela.” Michael yo e lego mmulamadibogo wa ka mehla e bile e le mogolo o re: “Ge e ba o sa dumele gore Jehofa o na le taba le wena, ganyenyane-ganyenyane o tlo tlogela go mo hlankela.”

6. Re swanetše go dira’ng ge e ba re thoma go nagana gore Modimo ga a re rate?

⁶ Diphihlelo tše di re bontšha gore go nagana gore Jehofa ga a re rate go ka ba kotsi e bile go ka fokodiša le tumelo ya rena. Eupša re swanetše go dira’ng ge re thoma go nagana ka tsela yeo? Ntle le go senya nako, re swanetše go tlogela go nagana bjalo! Kgopela Jehofa a go thuše gore o se sa tshwenyega kudu, eupša a go fe ‘khutšo ya Modimo yeo e tlago go diša pelo ya gago le matla a gago a monagano.’ (Ps. 139:23; Bafil. 4:6, 7) Dula o gopola gore ga se wena o nnoši o naganago gore Jehofa ga a go rate. Bana babo rena ba bangwe le dikgaetšedi bao ba botegago ba fela ba nagana ka tsela yeo. Le bahlanka ba Jehofa ba nakong e fetilego ba ile ba lebeletšana le bothata bja go nagana ka tsela yeo. A re boneng gore re ka ithuta eng mohlaleng wa moapostola Paulo.

7. Paulo o ile a ba le mathata afe?

⁷ Na ka dinako tše dingwe o ikwa eka o na le dilo tše dintši tšeo o swanetšego go di dira eupša o hwetša go le thata go di dira ka moka? Ge e ba go le bjalo, o tla kwešiša kamoo Paulo a ilego a ikwa ka gona. O be a tshwenyega ka bana babo rena ba ‘diphuthegong ka moka.’ (2 Bakor. 11:23-28) Na o na le bolwetši bjo bo go dirago gore o se ke wa thaba? Paulo o be a tshwenya ke “mootlwa nameng” woo mohlomongwe e bego e le bolwetši bjo a bego a nyaka gore bo fole. (2 Bakor. 12:7-10) Na ka dinako tše dingwe o nyamišwa ke mafokodi a gago? Ge e ba go le bjalo o se ke wa fela matla ka gobane Paulo le yena o be a fela a nyamišwa ke mafokodi a gagwe. O ile a ipitša gore ke yena “motho yo a hlomolago pelo” ka gobane o be a dula a elwa le mafokodi a gagwe.—Baroma 7:21-24.

8. Paulo o thušitšwe ke eng go kgotlelela mathata a gagwe?

⁸ Paulo o ile a tšwela pele a hlankela Jehofa le ge a be a na le mathata a mantši. O thušitšwe ke’ng gore a dule a kgotleletše? Le ge a be a tseba gabotse gore o na le mafokodi, o be a na le tumelo e tiilego sehlabelong sa Jesu sa topollo. E bile o be a tseba tshepišo ya Jesu yeo e rego: ‘Yo mongwe le yo mongwe yo a dumelago go yena o tla ba le bophelo bjo bo sa felego.’ (Joh. 3:16; Baroma 6:23) Paulo le yena o be a na le tumelo sehlabelong sa Jesu sa topollo. O be a kgodišegile gore Jehofa o dula a ikemišeditše go lebalela le bao ba dirilego dibe tše dikgolo ge feela ba itshola.—Ps. 86:5.

9. Re ithuta’ng mantšung a Paulo ao a lego go Bagalatia 2:20?

⁹ Paulo o be a dumela gore Modimo o mo rata kudu ka ge a ile a romela Jesu gore a tlo mo hwela. (Bala Bagalatia 2:20.) Ekwa mantšu a kgothatšago ao a lego mafelelong a temana ye. Paulo o itše: ‘Kriste Morwa wa Modimo o nthatile gomme a ikgafela nna.’ Paulo o be a sa nagane gore ke yo mobe kudu moo e lego gore Modimo a ka se kgone go mo rata. Ga se a ka a nagana gore: ‘Ke a kwešiša gore ke ka baka la eng Modimo a ka rata bana bešo ba bangwe, e sego nna.’ Paulo o ile a gopotša Baroma gore: “Ge re be re sa le badiradibe Kriste o ile a re hwela.” (Baroma 5:8) Ga go na selo seo se ka thibelago Modimo gore a re rate!

10. Re ithuta’ng go Baroma 8:38, 39?

¹⁰ Bala Baroma 8:38, 39. Paulo o be a kgodišegile gore ga go na selo seo se ka thibelago Modimo gore a mo rate. O ile a ngwala gore ‘ga go na selo seo se ka kgonago go re aroganya le lerato la Modimo.’ Paulo o be a tseba gore Modimo ga se a ka a felela setšhaba sa Isiraele pelo. E bile o be a tseba le kamoo Jehofa a ilego a mo gaugela ka gona. Ka mantšu a mangwe Paulo o be a e ra gore: ‘Ka ge Jehofa a ile a romela Morwa wa gagwe gore a tlo nkhwela, ga se ka swanela go belaela gore o a nthata.’—Baroma 8:32.

11. Le ge Paulo a ile a dira dibe tša go swana le tšeo go bolelwago ka tšona go Timotheo wa Pele 1:12-15, ke ka baka la’ng a be a kgodišegile gore Modimo o a mo rata?

 ¹¹ Bala 1 Timotheo 1:12-15. Ka dinako tše dingwe Paulo o be a tshwenywa ke dilo tšeo a ilego a di dira pele e ka ba Mokriste. O ile a ipona e le “yo mobe” go badiradibe ka moka. Pele ga ge Paulo e ka ba Mokriste o be a tlaiša Bakriste, e bile a dumelelana le taba ya gore Bakriste ba bangwe ba golegwe le go bolawa. (Dit. 26:10, 11) O ka ipotšiša gore Paulo a ka ba a ile a ikwa bjang ge a be a kopana le Mokriste wa mofsa yoo batswadi ba gagwe ba ilego ba bolawa ka baka la gagwe. Paulo o be a itshola ka dilo ka moka tšeo a ilego a di dira, eupša o be a tseba gore a ka se di fetoše. O be a dumela gore Kriste o ile a mo hwela, ke ka baka leo a ilego a ngwala gore: “Ke seo ke lego sona ka botho bjo bogolo bja Modimo.” (1 Bakor. 15:3, 10) Re ka ithuta’ng go se? O swanetše go kgodišega gore Kriste o go hwetše e le gore o kgone go ba le segwera se sebotse le Jehofa. (Dit. 3:19) Sa bohlokwa go Modimo ke seo re mo direlago sona gona bjale le seo re tlago go mo direla sona nakong e tlago, e sego diphošo tšeo re ilego ra di dira nakong e fetilego, e ka ba re be re le Bakriste goba re be re se bona.—Jes. 1:18.

12. Mantšu ao a lego go Johane wa Pele 3:19, 20 a ka re thuša bjang ge re nagana gore ga re bohlokwa goba re ikwa eka ga se ra swanelwa ke gore Jehofa a re rate?

¹² Ge o nagana gore Jesu o hwetše dibe tša gago, o ka ipotša gore: ‘Ga ke swanelwe ke seo a ntiretšego sona.’ Ke ka baka la’ng o ka ikwa ka tsela yeo? Dipelo tša rena di ka re fora  gomme ra ikwa re se bohlokwa e bile re sa swanelege gore Jehofa a re rate. (Bala 1 Johane 3:19, 20.) Ge re thoma go ikwa bjalo re swanetše go gopola gore “Modimo ke yo mogolo go feta dipelo tša rena.” Le ge re ka ipotša gore Jehofa ga a re rate e bile a ka se tsoge a re lebalela, o tla no tšwela pele a re rata le go re lebalela. Re swanetše go kgodišega gore Jehofa o a re rata. Gore seo se kgonege re swanetše go dula re ithuta Lentšu la gagwe, re mo rapele ka mehla le go fetša nako le batho bao ba mo hlankelago. Ke ka baka la’ng go dira dilo tšeo ka moka go le bohlokwa?

13. Go ithuta Lentšu la Modimo go ka re thuša bjang? (Bona le lepokisi leo le rego “ Kamoo Lentšu la Modimo le ba Thušago ka Gona.”)

¹³ Ithute Lentšu la Modimo letšatši le letšatši, ke moka o tlo tseba dika tša Jehofa tše dintši tše di kgahlišago. E bile o tlo kgona go bona gore o go rata kudu. Go naganišiša ka seo o ithutago sona letšatši le letšatši go tlo go thuša gore o kgone go nagana dilo gabotse, le “go phošolla” dilo tše di fošagetšego tšeo di lego ka pelong le ka monaganong wa gago. (2 Tim. 3:16) Mogolo yo a bitšwago Kevin yoo a bego a fela a ikwa a se bohlokwa o re: “Go bala Psalme 103 le go naganišiša ka yona go ile gwa nthuša go fetoša tsela yeo ke bego ke nagana ka yona le go kwešiša gabotse tsela yeo Jehofa a ikwago ka yona ka nna. Eva yo re boletšego ke yena pejana o re: “Mafelelong a letšatši le lengwe le le lengwe ke ipha nako ya go naganišiša ka dilo tšeo Jehofa a bonago di le bohlokwa. Seo se dira gore ke be le khutšo e bile se tiiša tumelo ya ka.”

14. Go rapela go ka re thuša bjang?

¹⁴ Rapela ka mehla. (1 Bathes. 5:17) E le gore o be le segwera se se tiilego le motho yo mongwe o swanetše go boledišana le yena ka mehla e bile o mmotše ka tsela yeo o ikwago ka yona. Le segwera sa rena le Jehofa se swanetše go ba ka tsela yeo. Ge re mmotša ka tsela yeo re ikwago ka yona, dilo tšeo re di naganago le dilo tšeo di re tshwenyago, se se bontšha gore re a mo tshepa e bile re a tseba gore o a re rata. (Ps. 94:17-19; 1 Joh. 5:14, 15) Yua yoo go boletšwego ka yena pejana o re: “Ge ke rapela, ga ke no botša Jehofa feela ka dilo tšeo di diragetšego letšatšing leo. Ke mmotša le ka dilo tšeo ke di naganago le ka tsela yeo ke ikwago ka yona. Se se nthušitše gore ke se ke ka bona Jehofa e no ba molaodi wa khamphani e kgolo, eupša ke mmone e le Tate yo a ratago bana ba gagwe.”—Bona lepokisi leo le rego “ Na o Šetše o e Badile?”

15. Jehofa o bontšha bjang gore o na le taba le yo mongwe le yo mongwe wa rena?

¹⁵ Fetša nako le bagwera ba nnete. Bagwera bao ke mpho e tšwago go Jehofa. (Jak. 1:17) Tatago rena wa legodimong o bontšha gore o na le taba le yo mongwe le yo mongwe wa rena ka go re fa bana babo rena le dikgaetšedi ka  phuthegong bao ba re bontšhago “lerato ka dinako tšohle.” (Die. 17:17) Lengwalong leo Paulo a ilego a le ngwalela Bakolose o ile a bolela ka bana babo bao ba bego ba mo thekga gore ‘ke bona bao ba bego ba mo matlafatša’ kudu. (Bakol. 4:10, 11) Kriste Jesu le yena o be a leboga thekgo yeo a bego a e hloka yeo e tšwago go bagwera ba gagwe ba barongwa goba batho ba bangwe.—Luka 22:28, 43.

16. Bagwera ba nnete ba ka re thuša bjang gore re dule re na le segwera se sebotse le Jehofa?

¹⁶ Na o kgopela thušo go bana beno le dikgaetšedi ka phuthegong le go e amogela? Go botša Mokriste yo a nago le segwera se sebotse le Jehofa ka mathata a gago ga go re gore tumelo ya gago e a fokola, eupša go ka go šireletša. James yoo re boletšego ka yena pejana o re: “Go ba le bagwera ba nnete bao ba nago le segwera se sebotse le Jehofa go ile gwa nthuša kudu. Ge ke be ke nagana ka dilo tšeo di nnyamišago, bagwera ba ka ba be ba ntheetša ka go se fele pelo e bile ba mpotša gore ba a nthata. Ge ba be ba dira bjalo ke ile ka kgona go bona gore Jehofa o a nthata e bile o na le taba le nna.” Go bohlokwa kudu gore re be le bagwera ba nnete ka phuthegong!

17-18. Ke mang yo re swanetšego go dula re mo theetša, gona ka baka la’ng?

¹⁷ Sathane o nyaka gore re tlogele go dira dilo tšeo di lokilego. O nyaka re dumela gore Modimo ga a re rate le gore ga re bohlokwa gore Modimo a tle a re phološe. Eupša re a tseba gore seo ga se nnete.

¹⁸ Jehofa o a go rata. O bohlokwa kudu go yena. Ge e ba o mo theetša, o tla “dula leratong” la gagwe ka mo go sa felego go swana le Jesu. (Joh. 15:10) O se ke wa theetša Sathane le pelo ya gago ge e go fora ka gore Jehofa ga a go rate. Eupša o theetše Jehofa yoo a bonago dilo tše dibotse tšeo yo mongwe le yo mongwe wa rena a di dirago. Kgodišega gore Jehofa “o kgahlwa ke batho ba gagwe,” go akaretša le wena!