1. Antoy naiimano nen Jehova ed saray totoo to?

“PANLILIKETAN nen Jehova so totoo to.” (Sal. 149:4) Balibali itan ed liknaan awa? Labay ton ibaga, naiimano nen Jehova iray maong ya ugali tayo. Amta to no anto ni ray sarag tayon gawaen, tan iyaasingger to tayo ed sikato. No manmatoor tayo, mansiansia tayon kaaro to diad andi-anggaan!—Juan 6:44.

2. Akin et iisipen na arum ya agagi ya ag-ira inaro nen Jehova?

² Ompan isipen mo, ‘Amtak ya inaro nen Jehova iray totoo to bilang sakey ya grupo, pero say agak segurado et no kasin siak ya mismo et inaro to.’ Akin et ontan so iisipen na arum ya agagi tayo? Imanoen so imbaga nen Oksana, * sakey a sister ya aliwliway impanugaw to: “Nen nampabautismo ak tan nen nampayunir ak, talagan malikeliket ak. Balet kalabas na 15 taon, anonotan ko lamet iray aliwliwan agawad siak nensaman. Naisip ko laingen ya agnaliliketan si Jehova ed siak, tan anggano antoy gawaen ko et agto ak naaro.” Onia met so imbaga nen Sister Yua, ya payunir tan aliwliwa met so impanugaw to: “Indedikak so bilay ko ed si Jehova ta labay kon napaliket. Pero diad pusok, amtak ya agto ak balot naaro.”

3. Antoy pantongtongan tayo ed sayan artikulo?

³ Singa sarayan duaran matoor ya sister, seguradon inar-arom met si Jehova. Pero no maminsan, ompan say pakaliknam et agto ka inaro. Akin et kaukolan mon kombinsien so sarilim ya inar-aro ka nen Jehova? Tan antoy gawaen mo pian nalabanan moy negatibon naliliknam? Pantongtongan tayoy ebat ed saratan ya tepet.

4. Akin et mapeligro no panduaruwaan tayoy panangaro nen Jehova?

⁴ Say panangaro et gawaen to tayon mabisbiskeg. Kanian no kombinsido ka ya talagan inaro ka nen Jehova, manlingkor kad sikato anggano dakdakel so subok. Pero no panduaruwaan moy panangaro to, “onkapuy so liknaan mo.” (Pro. 24:10) Tan no nadidismaya ka tan iisipen mon agka inaro na Dios, mainomay ka lan atakien nen Satanas.—Efe. 6:16.

5. Panon ya naapektoan so arum ya agagi nen inisip dan ag-ira inaro na Dios?

⁵ Wala ray matoor ya agagi tayo ya kinmapuy so pananisia ra lapud inisip da ya ag-ira inaro nen Jehova. Oniay imbaga na elder ya si James: “Anggano manlilingkor ak ed Bethel tan nai-enjoy koy ministeryok diad kongregasyon mi ya foreign-language, agak balet segurado no napapaliket koy Jehova ed saray gagawaen ko. Aminsan ingen, naisip ko no kasin dedengelen to ray pikakasik.” Oniay imbaga nen Eva ya manlilingkor met ed Bethel: “Mapeligro no panduaruwaan moy panangaro nen Jehova. Asalik itan ya mismo. Onkapuy so espiritualidad mo kanian ontabang ka lad panaglingkor tan agka la maliket.” Onia met so imbaga nen Michael ya regular payunir tan elder: “No agmo panisiaan ya inaro ka na Dios, kalkalna ka met lan onarawi ed sikato.”

6. Antoy nepeg tayon gawaen no bilang ta iisipen tayon ag-itayo inaro na Dios?

⁶ Nanengneng tayod sarayan eksperiensya ya talagan makapuy so epekto na negatibon liknaan. Kanian antoy nepeg mon gawaen no bilang iisipen mo ya agka inaro na Dios? Ipikasim ya tampol ed si Jehova ya nalabanan mo itan, ya naekal komon ed nonot mo iray aliwliwan iisipen mo, tan ikdan to kay ‘kareenan na Dios a manbantay ed puso tan nonot mo.’ (Sal. 139:23; Fil. 4:6, 7) Tandaan mo ya agmo bukbukor. Lalabanan met na arum ya matoor ya agagi so ontan ya liknaan. Diad tua, alikna met itan na saray lingkor nen Jehova nensaman. Say sakey ed sikara et si apostol Pablo. Pantongtongan tayo natan no antoy naaralan tayod alimbawa to.

7. Anto ran subok so dinalan nen Pablo?

⁷ Kasin no maminsan et naiirapan ka lad dakdakel ya responsabilidad mo tan pakaliknam  et agmo la sarag? Alikna met itan nen Pablo. Aliwa labat ya saksakey ya kongregasyon so sankanonot to, noagta “amin a kongregasyon.” (2 Cor. 11:23-28) Kasin walay aanosan mon sakit ya lapud satan et agka la maliket? Abaybayag met ya inanosan nen Pablo so sakit to ya tinawag ton “sabit ed laman” ya labalabay to lan naekal. (2 Cor. 12:7-10) Kasin nadidismaya kad sarilim no makakagawa kay lingo? Alikna met itan nen Pablo. Tinawag to ingen so sarili to ya ‘pakaskasin too’ ta ag-ontutundan milalaban ed saray kakapuyan to.—Roma 7:21-24.

8. Antoy akatulong ed si Pablo pian naanosan to ray subok?

⁸ Agtinmundan nanlingkor si Pablo anggano nanduruman subok tan makapadismayan situasyon so dinalan to. Antoy akatulong ed sikato? Anggano amta to ya wala ray kakapuyan to, mabiskeg so pananisia to ed dondon. Amta to imay sipan nen Jesus ya “kada sakey a mangipapanengneng na pananisia ed [si Jesus] et . . . nawalaan na bilay ya andi-anggaan.” (Juan 3:16; Roma 6:23) Lapud manisia si Pablo ed dondon, sikatoy kombinsido ya anggan saramay akagawa na ambelat iran kasalanan et perdonaen nen Jehova basta magbabawi ira.—Sal. 86:5.

9. Antoy naaralan tayo ed samay imbaga nen apostol Pablo ya nabasad Galacia 2:20?

⁹ Kombinsido si Pablo ya sikatoy inaro na Dios lapud atalosan to ya imbaki na Dios si Jesus ya ompatey parad sikato. (Basaen so Galacia 2:20.) Imanoen iyan imbaga nen Pablo diad sampot na satan ya bersikulo: “Manbibilay ak natan unong ed pananisia ed Anak na Dios, ya angaro ed siak tan inter toy sarili to parad siak.” Ag-inisip nen Pablo ya walay pipilien na panangaro na Dios, ya singa to ibabagan, ‘On, inaro nen Jehova iray agagik, pero siak andi.’ Imbes, oniay impanonot to ed saray agagi ed Roma: “Anggano makasalanan itayo ni et inatey si Kristo parad sikatayo.” (Roma 5:8) On, anggapoy pipilien na panangaro na Dios!

10. Antoy naaralan tayo ed Roma 8:38, 39?

¹⁰ Basaen so Roma 8:38, 39. Indanet nen Pablo ya anggapoy makaamper ed panangaro na Dios. Insulat to ya anggapon balot so “makapangisian ed sikatayo ed panangaro na Dios.” Amta nen Pablo so abaybayag ya impananos nen Jehova ed bansan Israel. Tan anggan sikaton mismo et kinasian nen Aman Jehova. Kanian diad Roma 8:32, singa to ibabagan, ‘Akin et panduaruwaan ko ya inaro ak nen Jehova anta agto anggan  insiblet so Anak to ya ompatey parad siak?’

11. Anggano dakel so agawaan nen Pablo ya kasalanan ya singa saramay binitla tod 1 Timoteo 1:12-15, akin et kombinsido ya sikatoy inaro na Dios?

¹¹ Basaen so 1 Timoteo 1:12-15. Seguradon nakokonsiensian maong si Pablo kada no naiisip to iray ginawa to antis ya nagmaliw a Kristiano. Diad tua, imbaga to ya sikato so “sankamanunaan” ed saray makasalanan! Agla pankelawan ya imbaga to itan, ta antis ton naamtaan so katuaan et pinairap to iray Kristiano ed nanduruman syudad. Say arum et impaipriso to tan sinuportaan toy impamatey ed sikara. (Gawa 26:10, 11) Imadyin mo pa no antoy nalikna nen Pablo no walay nakabat ton ulila ya Kristiano, insan to naamtaan ya kaiba manaya ed impapatey to so atateng na saman ya ugaw? Seguradon nakonsiensian maong, pero siempre agto la nauman so apalabas. Kanian inisip to la ya inatey si Kristo parad sikato tan aperdona iray kasalanan to lapud “agnaparaan a kaabigan na Dios.” (1 Cor. 15:3, 10) Antoy naaralan mod saya? Tandaan mo ya inatey si Kristo parad sika tan lapud satan et posible la ya nakaarom si Jehova. (Gawa 3:19) Say importante ed Dios et no anto ray gagawaen mo natan tan no anto ni ray gawaen mo ed arapen, aliwan saray agawaan mon lingo ed apalabas, balanglan Tasi ka lad saman o andi ni.—Isa. 1:18.

12. Base ed 1 Juan 3:19, 20, antoy nepeg tayon tandaan no say pakalikna tayo et anggapoy kana tayo odino anggapoy mangaaro ed sikatayo?

¹² Pero ompan agmo nin siansia natanggap ya inatey si Jesus pian naperdona iray kasalanan mo tan ibagam ed sarilim ya, ‘Agak karapat-dapat ya nadondon ta anggapoy kanak ya too.’ Nayarin ontan so iisipen mo ta say ididikta na agperpekton pusom et anggapoy  maong ya nagagawaan mo tan anggapoy mangaaro ed sika. (Basaen so 1 Juan 3:19, 20.) No bilang ta ontan so nalilikna tayo, tandaan ya “say Dios et mas baleg nen say puso tayo.” Mas mabiskeg so panangaro tan panamerdona nen Jehova nen say antokaman ya negatibon liknaan tayo. Kaukolan tayon kombinsien so sarili tayo ya talagan inar-aro itayo nen Jehova. Pian talagan nakombinse ka, importante ya lanang mon aralen so Salita to, naynay kan manpikasi, tan regular kan miulop ed saray matoor ya lingkor to. Akin et importante iratan ya gawaen?

13. Panon ya makatulong ed sikatayo so inagew-agew ya panaral na Salita na Dios? (Nengnengen met so kahon ya “ Akatulong so Salita na Dios ed Sikara.”)

¹³ Inagew-agew mon aralen so Salita na Dios pian mas nakabkabat moy Jehova, naamtaan mo iray balibalin ugali to, tan naliknam ya inar-aro to ka. No inagew-agew mon dalepdepen so ibabaga na Biblia, nalinewan so nonot mo kanian nipetek iray negatibon iisipen mo. (2 Tim. 3:16) Oniay imbaga nen Kevin, sakey ya elder ya abayag ton nilabanan so liknaan ya anggapoy kana to: “Akatulong ya maong ed siak imay nabasad Salmo 103. Dinalepdep ko itan ya anggad atalo-talosan ko no antoy pakanengneng nen Jehova ed siak.” Oniay imbaga nen Eva ya abitla nen niman: “Kada labi, dadalepdepen koy panagnonot nen Jehova. Lapud satan et onkakalma so pusok tan ombibiskeg so pananisiak.”

14. Panon ya makatulong ed sikatayo so naynay ya pampikasi?

¹⁴ Naynay kan manpikasi. (1 Tes. 5:17) No lanang mon katongtong so sakey ya too tan ibabagam ed sikato iray naliliknam, onelet so pankakaaro yo. Ontan met ed pikakaaro tayod si Jehova. No lanang tayon manpipikasi tan ibaga tayod sikato so amin ya nalilikna, iisipen, tan pakakaaburidoan tayo, ipapanengneng tayo ya walay tiwala tayod sikato tan agtayo panduaruwaan so panangaro to. (Sal. 94:17-19; 1 Juan 5:14, 15) Oniay imbaga nen Yua, ya abitla nen niman: “No manpipikasi ak ed si Jehova, agko labat ibabaga iray ginawak ed sanagew. Ibabagak met so amin ya naliliknak. Nen onman so ginawak, diman ko alikna ya si Jehova et aliwan singa sakey ya presidente na kompanya, noagta sakey ya Ama ya inar-aro to ray ananak to.”—Nengnengen so kahon ya “ Abasam La Iyan Libro?”

15. Panon ya ipapanengneng nen Jehova so malasakit tod sikatayo?

¹⁵ Miulop kad saray matoor ya kakaaro; regalo ira nen Jehova. (Sant. 1:17) Say sakey ya paraan ya ipapanengneng nen Aman Jehova so malasakit tod sikatayo et inikdan to itayo na espiritual ya pamilya—saray agagi tayo ya “mangaaro ed amin a panaon.” (Pro. 17:17)  Nen sinulatan nen Pablo iray Kristiano ed Colosas, wala ray binitla ton agagi ya tinmulong ed sikato tan imbaga to ya “makapaligliwa iran maong.” (Col. 4:10, 11) Anggan si Kristo Jesus et pinabiskeg na saray kakaaro ton anghel tan totoo, tan seguradon inapresya toy tulong da.—Luc. 22:28, 43.

16. Panon ya makatulong iray matoor ya kakaaro pian lalo tayon onapit ed si Jehova?

¹⁶ Kasin wala ray kakaarom diad kongregasyon tan manpapatulong kad sikara? No ibagam iray problemam ed maespiritual ya kakaarom, agto labay ya ibagan makapuy so pananisiam. Diad tua, proteksion itan ed sika. Imanoen so imbaga nen James ya abitla nen niman: “Saray maespiritual ya kakaarok so batikan ko no nambabangil lay negatibo ya onseseksek ed isip ko. Maan-anos da ak ya dedengelen tan ipapaseguro dad siak ya inar-aro da ak. Uusaren ira nen Jehova pian nipalikna toy panangaro tan malasakit tod siak.” Importante sirin ya wala ray kakaaro tayod kongregasyon tan pabiskegen tayoy pankakaaro tayo.

17-18. Siopay dengelen tayo, tan akin?

¹⁷ Labay nen Satanas ya onsuko tayo lan manggawa na duga. Labay ton manisia tayo ya ag-itayo inaro nen Jehova tan agtayo lanlamang makaliktar ed Armagedon. Pero singa naaralan tayo, aliwan tua itan.

¹⁸ On, inar-aro ka nen Jehova. Importante ka ed sikato. No unoren moy Aman Jehova, ‘mansiansia ka ed panangaro to’ diad andi-anggaan, ya singa si Jesus. (Juan 15:10) Kanian agmo dedengelen si Satanas o say negatibon ididikta na pusom. Si Jehova so dengel mo ta amta to so kamaongan na kada sakey ed sikatayo. On, ‘naliliketan si Jehova ed saray totoo to,’ pati diad sika!