1. Kiko Yehova ta mira den su pueblo?

YEHOVA ta stima su pueblo masha hopi mes. (Sal. 149:4) Esei ta hasi nos masha felis! E ta mira nos bon kualidatnan; nos potensial i ta hala nos serka dje. Si nos keda fiel na dje, lo e keda serka nos pa semper!—Huan 6:44.

2. Dikon pa algun ruman ta difísil pa kere ku Yehova ta stima nan?

² Tin ruman ta pensa: ‘Mi sa ku Yehova ta stima su pueblo komo grupo, pero kon mi por sa sigur ku e ta stima ami?’ Kiko por pone un ruman pensa asina? Oksana, * kende tabatin un infansia hopi difísil, a bisa: “Mi tabata masha kontentu ora ku m’a batisá i a kuminsá traha pionero. Pero, despues di 15 aña, tur e kosnan malu ku m’a pasa aden na chikitu a kuminsá bini bèk na mi mente. M’a kuminsá pensa ku m’a pèrdè Yehova su aprobashon i ku mi no meresé p’e stima mi.” Yua, un pionero ku tambe tabatin un infansia difísil, a bisa: “M’a dediká mi bida na Yehova pasobra mi tabata kier a hasié felis. Pero, mi tabata konvensí ku nunka e por stima mi.”

3. Kiko nos lo analisá den e artíkulo akí?

³ Meskos ku e rumannan ei, bo ta stima Yehova hopi. Pero, kisas bo ta duda ku e ta stima abo. Dikon bo mester ta konvensí ku e ta stima bo di bèrdat? I kiko por yuda bo ora bo kuminsá pensa ku Yehova no ta stima bo? Laga nos kontestá e preguntanan ei.

4. Dikon ta peligroso pa duda ku Yehova ta stima bo?

⁴ Ora bo ta konvensí ku Yehova ta stima bo, lo bo hasi bo esfuerso pa sirbié lo mihó posibel, aunke bo bida ta difísil. Pero, si bo ta duda ku Dios ta stima bo, bo “forsa ta keda limitá.” (Pro. 24:10) Anto ora bo desanimá i kuminsá pensa ku Dios no ta stima bo, lo bo no tin forsa pa lucha kontra e atakenan di Satanas.—Efe. 6:16.

5. Kiko a pasa ku algun ruman ku a duda ku Yehova tabata stima nan?

⁵ Algun di nos rumannan a kuminsá pensa ku Yehova no ta stima nan ni ta interesá den nan, i esei a suak nan fe. Un ansiano ku yama James, a bisa: “Aunke mi tabata sirbi na Bètel i tabata sirbi na un kongregashon di otro idioma, mi no tabatin sigur ku Yehova lo a aseptá mi sakrifisionan. Dado momento m’a kuminsá puntra mi mes si Yehova tabata skucha mi orashonnan.” Eva, kende tambe ta sirbi na Bètel, a bisa: M’a siña ku ta masha peligroso pa duda ku Yehova ta stima bo, pasobra tiki tiki bo ta bai atras emoshonalmente te ku bo ta pèrdè smak i goso den sirbi Yehova.” Michael, un pionero regular i ansiano, a bisa: “Si bo no ta kere ku Yehova ta stima bo, lo bo drif bai for di dje.”

6. Kiko nos mester hasi ora nos kuminsá duda ku Yehova ta stima nos?

⁶ Loke e rumannan ei a pasa aden ta mustra ku si nos ta duda ku Yehova ta stima nos, esei por kaba ku nos spiritualidat. Kiko nos mester hasi si nos kuminsá haña e pensamentunan negativo ei? Rechasá nan mesora! Pidi Yehova pa remplasá nan ku ‘e pas di Dios ku lo protehá bo kurason i bo mente.’ (Sal. 139:23; Flp. 4:6, 7) I kòrda, bo no ta e úniko ku tin e pensamentunan ei. Tin hopi ruman ku tambe ta lucha ku nan. Asta sirbidónan di Yehova den pasado a lucha ku pensamentunan negativo. Laga nos wak kiko nos por siña for di e ehèmpel di Apòstel Pablo.

7. Ki difikultat Pablo a hañ’é kuné?

⁷ Bo tin hopi responsabilidat i ta sinti ku ta difísil pa bo kumpli ku nan tur? Si ta asina, Pablo tambe a sinti meskos.  E tabata preokupá no solamente pa un kongregashon, sino “pa tur e kongregashonnan.” (2 Kor. 11:23-28) Bo tin un malesa króniko ku ta kita bo goso? Pablo tabatin “un sumpiña den karni” ku e tabatin masha gana pa e kita. Kisas esei tabata un problema ku su salú. (2 Kor. 12:7-10) Bo sa sinti bo desanimá debí na bo imperfekshonnan? Pablo tambe a yega di sinti asina. El a bisa: “Pober di mi!” El a bisa esei pasobra konstantemente e mester a lucha pa hasi loke ta korekto.—Rom. 7:21-24.

8. Kiko a yuda Pablo sigui sirbi Yehova apesar di su difikultatnan?

⁸ Aunke Pablo a pasa den tur e difikultatnan ei, el a sigui sirbi Yehova. Di unda el a haña e forsa pa hasi esei? Aunke e tabata sa ku e tabata imperfekto, e tabatin fe fuerte den e reskate. E tabata sa tambe ku Hesus a primintí ku tur hende “ku pone fe den [Hesus lo] no bai pèrdí, ma [lo] haña bida eterno.” (Huan 3:16; Rom. 6:23) Sí, Pablo tabatin fe den e reskate. E tabata konvensí ku Yehova asta ta pordoná esnan ku a kometé un piká serio pero ku a arepentí.—Sal. 86:5.

9. Kiko nos ta siña for di Pablo su palabranan na Galationan 2:20?

⁹ Pablo tabatin fe ku Dios ta stim’é masha hopi mes pasobra e tabata konvensí ku Dios a manda Hesus pa muri p’e. Wak loke el a bisa: “E Yu di Dios . . . a stima mi i a entregá su mes pa mi.” (Lesa Galationan 2:20) E no a sinti ku e no tabata meresé Yehova su amor, pensando: ‘Mi por komprondé dikon Yehova ta stima mi rumannan, pero hamas lo e stima mi.’ Mas bien, ora Pablo a skirbi e romanonan el a bisa: “Kristu a muri pa nos miéntras ku nos tabata pekadó ainda.” (Rom. 5:8) Pues, Yehova stima kada un di nos sin eksepshon!

10. Kiko nos ta siña for di Romanonan 8:38 i 39?

¹⁰ Lesa Romanonan 8:38, 39. Pablo tabata kompletamente konvensí di kuantu Dios ta stim’é. El a skirbi ku nada “lo por separá nos for di e amor di Dios.” Pablo tabata sa ku Yehova tabatin masha pasenshi ku e israelitanan. E tabata sa tambe ku Yehova a mustra miserikòrdia na dje. Pues, ku otro palabra Pablo tabata bisando: ‘Siendo ku Yehova a manda su mes Yu pa muri pa mi, mi no mester duda ku e ta stima mi.’—Rom. 8:32.

11. Aunke Pablo a kometé e pikánan menshoná na 1 Timoteo 1:12-15, dikon e por tabatin sigur ku Dios tabata stim’é?

 ¹¹ Lesa 1 Timoteo 1:12-15. Lo tabatin biaha ku Pablo a sintié malu di tur e kosnan ku el a hasi den pasado. I no ta sorprendé nos ku el a yama su mes e pekadó “di mas notabel.” Promé ku el a haña e bèrdat, el a persiguí e kristiannan den un stat tras di otro, a sera algun den prizòn i a vota pa ehekutá algun di nan. (Echo. 26:10, 11) Bo por imaginá bo kon Pablo lo a sinti si el a topa un hóben kristian, kende su mayornan el a aprobá nan ehekushon? Pablo tabatin duele di loke el a hasi, pero e tabata sa ku e no por a kambia pasado. El a aseptá ku Kristu a muri p’e i a skirbi: “Pa medio di e bondat inmeresí di Dios, mi ta loke mi ta.” (1 Kor. 15:3, 10) Kiko nos ta siña? Aseptá ku Kristu a muri pa bo i a habri kaminda pa abo tin un amistat será ku Yehova. (Echo. 3:19) Loke ta konta pa Yehova ta loke bo ta hasi awor i den futuro, no e fayonan ku bo a kometé den pasado; sea ku bo tabata un Testigu kaba òf nò.—Isa. 1:18.

12. Kon e palabranan na 1 Huan 3:19 i 20 por yuda nos si nos ta sinti ku nos no ta bal nada òf ku niun hende no por stima nos?

¹² Tin biaha, nos kurason imperfekto por engañá nos i pone nos sinti ku nos no ta bal nada òf ku niun hende no por stima nos. (Lesa 1 Huan 3:19, 20.) Esei por pone bo pensa ku Hesus su sakrifisio no ta kubri bo pikánan. Ora nos kuminsá pensa asina, nos tin ku kòrda ku “Dios ta mas grandi ku nos kurason.” Nos mester konvensé nos mes ku ketu bai nos Tata selestial ta stima nos masha hopi mes i ke pordoná nos. Pa nos logra  esei, nos mester studia su Palabra regularmente, hasi orashon frekuentemente na dje i pasa tempu ku nos rumannan. Laga nos wak kon e tres kosnan ei por yuda nos.

13. Kon studia Dios su Palabra por yuda nos? (Wak tambe e kuadro “ Beibel Ta Yuda Nan.”)

¹³ Studia Beibel tur dia. Esei lo yuda bo komprondé Yehova su bunita kualidatnan mas i mas. Lo bo komprondé kuantu e ta stima bo. Ora bo meditá riba Beibel tur dia, bo por pensa mas mihó i bo por “rektifiká” e kosnan den bo mente i kurason. (2 Tim. 3:16, nota) Un ansiano ku yama Kevin, ku ta lucha ku sintimentu di no ta bal nada, a bisa: “Loke a yuda mi korigí mi pensamentu i komprondé kiko Yehova di bèrdat ta pensa tokante mi, tabata di lesa Salmo 103 i meditá riba dje.” Eva, menshoná anteriormente, a bisa: “Na final di kada dia mi ta tuma tempu pa pensa kon Yehova ta mira kosnan. Esei ta duna mi pas den mi kurason i ta fortalesé mi fe.”

14. Kon orashon por yuda nos?

¹⁴ Hasi orashon frekuentemente. (1 Tes. 5:17) Un bon amistat ta basá riba komunikashon frekuente i di kurason. Meskos ta konta pa nos amistat ku Yehova. Ora nos bisa Yehova loke nos ta sinti, pensa i loke ta preokupá nos, nos ta demostr’é ku nos tin konfiansa den dje i ku nos sa ku e ta stima nos. (Sal. 94:17-19; 1 Huan 5:14, 15) Yua, menshoná anteriormente, a bisa: “Ora mi ta hasi orashon mi no ta konta Yehova solamente e kosnan ku a pasa ku mi e dia ei. Mi ta habri mi kurason na Yehova i ta bis’é kon di bèrdat mi ta sinti mi. Tiki tiki m’a kuminsá mira Yehova, no komo un manager den un kompania grandi, pero komo un Tata ku di bèrdat ta stima su yunan.”—Wak e kuadro “ Bo A Les’é?”

15. Kon Yehova ta demostrá ku e ta stima kada un di nos?

¹⁵ Pasa tempu ku bo rumannan. Nan ta un regalo di Yehova. (Sant. 1:17) Un manera ku nos Tata selestial ta demostrá ku e ta stima kada un di nos ta di duna nos rumannan den kongregashon ku “ta stima tur ora bai.” (Pro. 17:17) Den e karta ku Pablo a skirbi pa e rumannan na Kolósas, el a bisa ku nan tabata “un fuente di gran konsuelo” p’e. (Kol. 4:10, 11) Asta Hesus tabatin mester di yudansa di su amigunan. E tabata masha gradisidu pa e yudansa ku el a haña for di tantu hende komo e angelnan.—Luk. 22:28, 43.

16. Kon nos rumannan por yuda nos hala mas serka Yehova?

 ¹⁶ Bo ta benefisiando kompletamente di Yehova su regalo, esta, e rumannan den kongregashon? Ora bo papia ku un ruman maduro tokante bo problemanan, esei no ta nifiká ku bo fe ta suak. Al kontrario, esei por protehá bo. Wak loke James, menshoná anteriormente a bisa: “Bon amistat ku rumannan maduro a yuda mi masha hopi mes! Ora pensamentu negativo ta keda drei den mi mente, e rumannan akí ta tene pasenshi ku mi i ta kòrda mi ku nan ta stima mi masha hopi mes. Pa medio di nan, mi por realisá ku Yehova ta stima mi i ta interesá den mi.” Ta masha importante pa nos sera amistat ku nos rumannan den kongregashon.

17-18. Na ken bo mester skucha, i dikon?

¹⁷ Satanas ke pa nos stòp di lucha i stòp di hasi loke ta korekto. E ke pa nos kere ku Yehova no ta stima nos, i ku nos no ta bon sufisiente pa Yehova salba nos. Pero manera nos a mira, niun di e kosnan ei no ta bèrdat.

¹⁸ Yehova di bèrdat ta stima bo. Den su bista bo ta un tesoro presioso. Si bo obedes’é, lo bo “keda den su amor” pa semper, meskos ku Hesus. (Huan 15:10) No bai tras di loke Satanas ni bo kurason ta bisa bo. Mas bien, skucha Yehova. E ta wak e bon den kada un di nos. Sea konvensí ku e ta stima su pueblo. Sí, anto esei ta inkluí abo tambe!