LONGO DIA 17
Wana Khala nu Ndando Yavula gu Meso a Yehowa!
‘Yehowa wana zumba athu enji.’—NGI. 149:4.
LUNGIMBO 108 L’amour fidèle de Dieu
NDAGA JIDI MU LONGO EDI *
Tata wetu wa dilu ‘wana zumba’ muthu wagasue mukatshi dietu (Tala paragrafe 1)
1. Ndaga jitshi Yehowa ana tadila gudi akombeledi enji?
YEHOWA NZAMBI ‘wana zumba athu enji.’ (Ngi. 149:4) Ndaga eyi yana gutusuanguluisa muavula! Yehowa wana tadila makalegelo etu awaha, wana tadila nji gula tuajiya gubua athu a luholo lutshi nu udi gutukuatesa ha gukuata ufuta wakola nenji. Gila tuasala agujinginyina gudi muene, muene nji mbawusala wangujinginyina gudi esue mayilago!—Yone 6:44.
2. Mukunda natshi yakhala lamba gudi athu ako ha gutshigina egi Yehowa wana guazumba?
2 Athu ako ajiya guzuela egi: ‘Ngudi mujiya egi Yehowa wana zumba akombeledi enji agasue, uvi ngushigo mutangiza egi Yehowa wajiya gunguzumba hakhami.’ Itshi yajiya gutuma athu ako ha gutangiza ndaga jia luholo elu? Phangi wa mukhetu Oksana * wamonele lamba diavula tangua akhalele mona. Udi muzuela egi: “Ngakhadile nu gusuanguluga guavula tangua ngabatijiwe nu tangua ngasendesele mudimo wa muvundji wa njila. Uvi gungima dia ivo 15, ngasendesele guwunguluga malamba ngataganele nawo hangakhalele mona. Ngasendesele gutangiza egi Yehowa anago gungutshigina. Luko, ngushigo ngatagana hagula muene anguzumbe.” Phangi wa mukhetu Yua udi muvundji wa njila, wataganele nji nu malamba mu ulenge wenji. Udi muzuela egi: “Ngahanele monyo wami gudi Yehowa handaga ngakhadile mutshigina gumusuanguluisa. Uvi ngakhalelego mutshigina egi wajiya gunguzumba.”
3. Itshi tuza mutadila mu longo edi?
3 Gifua luholo luayimonesa aphangi awa a akhetu mbadi tuazuelela, yajiya gukhala egi aye nji wana zumba Yehowa muavula uvi wana tshiginago egi muene nji wana guguzumba. Mukunda natshi udi naye gusha mutshima egi Yehowa wana guguzumba? Itshi yajiya gugukuatesa gula udi mutangiza egi Yehowa wanago guguzumba? Tuza muheta mvutu jia mihu eyi.
GUKHALA NU BA DUTE MUKUNDA NU GUZUMBA GUA YEHOWA GUDI NDAGA YABOLA
4. Mukunda natshi gutangiza egi Yehowa anago gutuzumba gudi ndaga yabola?
4 Guzumba guana khala nu ngolo jiana gutuhana gikhesa. Gula tudi nu gutshigina egi Yehowa wana gutuzumba, mbayitukuatesa ha gutshita yagasue tuajiya gutshita ha gumukombelela ikhale tudi mutagana nu malamba mu monyo wetu. Uvi gula tudi nu ba dute egi Nzambi anago gutubamba, ‘ngolo jietu mbajileba.’ (Ish. 24:10) Gila tualeba muila nu tuabemba gutshigina guetu gudi Yehowa, mbayikhala yaleba gudi Satana ha gutuluisa.—Ef. 6:16.
5. Ndaga itshi yabuidile aphangi anyi akhalale mutangiza egi Nzambi anago guazumba?
5 Aphangi’etu ako a mala nu a akhetu asendesele gutangiza egi Yehowa anago guazumba nu guabamba, hene gutshigina guawo gualebele. Mukulu mumoshi mu jina dia James udi muzuela egi: “Ngakhadile gami mukalagala mudimo gu Betele, ngakhalele nji musuanguluga nu gulongesa mu hungu dia zuelelo diko, uvi ngakhalele gudihula gula Yehowa wana tshigina diago ndaga ngana kalagala. Ngasendesele nji gudihula gula Yehowa wana tegelela lume isambu yami.” Phangi wa mukhetu Eva udi nji mu mudimo wa tangua diagasue udi muzuela egi: “Ngakotelesele egi gutangiza egi Yehowa anago gutuzumba gudi ndaga yabola, handaga guana bolesa ndaga jiagasue tuana tshita ha gumukombelela. Tuajiya guleba muila ha gukalagala ndaga mukunda nu Nzambi, tuajiya nji gutotesa gusuanguluga guetu mu mudimo wenji.” Mukulu mumoshi mu jina dia Michael, wana khala nji muvundji wa njila. Udi muzuela egi: “Gula udi nu ba dute egi Nzambi anago gugubamba, wajiya gulolewa.”
6. Itshi tudi naye gutshita gula tuasendesa gutangiza egi Nzambi anago gutuzumba?
6 Ba eksperianse awa adi mumonesa egi gutangiza egi Yehowa anago gutuzumba gudi ndaga yabola nu guajiya nji gulebesa gutshigina guetu. Na itshi tuajiya gutshita gula ba dute a luholo elu atujila mu matangi? Tudi naye guakatula mu phushi! Toga ukuateshi gudi Yehowa ha gukatula ‘matangi awa abola’ nu hagula ‘aguhane guhuima mbagubamba mutshima waye nu matangi’aye.’ (Ngi. 139:23; Fili. 4:6, 7) Ujimbilago egi ishigo aye hakhaye wana khala nu matangi’a luholo elu. Aphangi ako agujinginyina ana gulua nu matangi a luholo elu. Akombeledi a Yehowa a mu tangua dikulu akhadile nji mulua nu matangi a luholo elu. Tutadilenu malongo tuajiya guzula mu gifezegeselo gia mupostolo Phaula.
MALONGO TUAJIYA GUZULA MU GIFEZEGESELO GIA PHAULA
7. Malamba atshi Phaula akhalele nawo?
7 Matangua ako wana gudivua egi udi nu inemo yavula nu idi lamba ha gukalagala ndaga jiagasue udi mutshigina ba? Gila idi ngenyi, wajiya gukotelesa muabonga luholo Phaula akhalele gudivua. Wakhalele muvua gikenene ‘mukunda nu mahungu agasue.’ Yakhalelego mukunda nu hungu dimoshi. (2 Kol. 11:23-28) Wana khala nu ukhashi mu muila wana katula gusuanguluga guaye ba? Phaula wakhadile nu ndaga imoshi yakhalele gumusagesa muavula. Yajiya gukhala egi wakhalele nu ukhashi, hene akhalele mutshigina egi amukatule nawo. (2 Kol. 12:7-10) Matangua ako wana leba muila handaga ushigo muthu watagana ba? Phaula nji wakhalele gudivua ngenyi. Wakhalele guditamega egi “muenya malamba avula,” handaga matangua avula wakhadile mukalagala ndaga jiabola.—Lomo 7:21-24.
8. Itshi yakuatesele Phaula ha gubinga malamba enji?
8 Phaula walanduile gukalegela Yehowa ikhale walolewe mu maluholo avula nu matangua avula muila wakhadile gumuleba. Itshi yamukuatesele? Ikhale wakhalele muthu ashigo watagana, wakhadile nu gutshigina guakola mu gibawu. Wakhadile nji mujiya kiawaha ndaga Yesu alayele egi “muthu wagasue wamonesa gutshigina guenji gudi [Yesu] . . . ahete monyo wa ivo nu ivo.” (Yone 3:16; Lomo 6:23) Yadiago, Phaula wakhalele nu gutshigina mu mulambu. Wakhalele nji mutshigina egi Yehowa wana khala hehi ha gutotesela athu agasue nu ene anyi akalegele gubola guakoma uvi abalumuna mitshima yawo.—Ngi. 86:5.
9. Malongo atshi tuajiya guzula mu mbimbi jia Phaula jidi mu Galatiya 2:20?
9 Phaula wakhalele mutshigina egi Nzambi wana gumuzumba handaga wakhadile mujiya egi Nzambi watumine Yesu ha gufua mukunda nu muene. (Tanga Galatiya 2:20.) Tala mbimbi jia gikhesa jidi gu suga ya verse eyi. Phaula wazuelele egi: ‘Mun’a Nzambi wanguzumbile nu wadihanele mukunda nu ame.’ Phaula akhalelego mutangiza egi Nzambi ajiyilego gumuzumba handaga udi muthu wabola. Atangijilego nji egi: ‘Ngudi gami mumona gishina Yehowa ana zumba aphangi’ami, uvi muene ajiyilego gunguzumba ame.’ Wawunguluishile Aklisto a gu Roma egi: ‘Hatuakhalele atshithi a ndaga jiabola, Klisto wafuile mukunda nu esue.’ (Lomo 5:8) Gushigo nga nu gima giajiya gukanga Nzambi njila ha gutuzumba!
10. Longo ditshi tuazula mu Lomo 8:38, 39?
10 Tanga Lomo 8:38, 39. Phaula wakhalele mujiya muabonga ngolo jia guzumba gua Nzambi. Wasonegele egi gushigo nga gima “giajiya gutukhaphumuna gu guzumba gua Nzambi.” Phaula wakhadile mujiya luholo Yehowa akalegele enya Isalele ndaga nu guhuiminyina. Wakhalele nji mujiya luholo Yehowa wamumonesele khenda jienji. Mu guzuela guko, Phaula wakhalele muzuela egi: ‘Yehowa watumine Mun’enji ha gufua mukunda nu ame, Ngajiyilego gukhala nu ba dute egi anago gunguzumba.’—Lomo 8:32.
Ndaga yana khala nu ndando gu meso a Nzambi ishigo inyi tuakalegele mualeha, uvi eyi tudi mukalagala mangino nu inyi mbatukalagala mu masugu adi muza (Tala paragrafe 11) *
11. Mukunda natshi Phaula washile mutshima egi Nzambi wana gumuzumba ngatshima watshitshile ndaga jiabola jidi muzuelewa mu 1 Timote 1:12-15?
11 Tanga 1 Timote 1:12-15. Yajiya gukhala egi gudi nu matangua mupostolo Phaula akhalele gudisagesa mukunda nu ndaga akalegele gutuama egi abue Muklisto. Tuajiyilego gudihula luholo aditamegele egi ‘wabalega atshitshi a gubola’ gubola! Gutuama dia gujiya giamatshidia, Phaula wasagesele Aklisto mu membo avula, wambile ako mu bologo nu wakhalele nji muhana mago gu desizio dia tribinale dia gushiya Aklisto ako. (Makal. 26:10, 11) Wajiya gutangiza luholo Phaula wakhalele naye gudivua gula watagana nu muvuala wa Muklisto yonu mvuaji jienji jiashiyiwe mu utuameji wenji ba? Phaula wakhadile muvua gikenene mukunda nu gubola guenji, uvi wakhalele mujiya egi ajiyilego gusombegesa ndaga jiabalegele gale. Wakhadile nu gutshigina egi Klisto wafuile mukunda nu muene, hene wasonegele egi: ‘Uvi mu khenda jia Nzambi, ngudi gami luholo ngudi.’ (1 Kol. 15:3, 10) Longo ditshi tuajiya guzula? Khala mutshigina egi Klisto wafuile mukunda nu aye nu walondele ndaga hagula wajiya gukuata ufuta wakola nu Yehowa. (Makal. 3:19) Ndaga yakhala nu ndando gu meso a Nzambi ishigo inyi tuakalegele mualeha, uvi eyi tudi mukalagala mangino nu inyi mbatukalagala mu masugu adi muza, ikhale tudi Matemue a Yehowa nga ndo.—Yesh. 1:18.
12. Luholo lutshi mbimbi jidi mu 1 Yone 3:19, 20 jiana gutukuatesa gula tudi mutangiza egi tushigo nu ndando nga ajiyilego gutuzumba?
12 Tangua wana tangiza luholo Yesu wafuile ha gugutotesela gubola guaye, wajiya guzuela egi: ‘Ngushigo ngatagana ha guheta luendu elu.’ Mukunda natshi matangi a luholo elu ajiya gugujila? Handaga mitshima yetu wa athu ashigo atagana wajiya gutuhuiga nu gututuma ha gutangiza egi tushigo nu ndando nga ndo ajiyilego gutuzumba. (Tanga 1 Yone 3:19, 20.) Gila matangi a luholo elu atujila, tushigo naye gubuita mutshima egi “Nzambi wabalega mitshima yetu gukoma.” Guzumba gua Tata wetu wa mu dilu nu khadilo dienji dia gutotesela diabalega matangi agasue abola ajiya gusagesa mitshima yetu. Tudi naye gutshigina egi Yehowa wana gutuzumba muavula. Ha guheta matangi a luholo elu, tudi naye gulonguga Mbimbi yenji nu gumukombelela tangua diagasue, tudi naye nji gubalegesa tangua hamoshi nu akombeledi enji agujinginyina. Mukunda natshi gutshita ngenyi gudi nu ndando?
UKUATESHI TUANA HETA MU GULONGUGA GUA BIBLIA, MU GISAMBU NU GUDI MAFUTA AWAHA
13. Luholo lutshi gutanga Mbimbi ya Nzambi guana gutukuatesa? (Tala nji galuanda “ Luholo Mbimbi ya Nzambi ya Akuatesele.”)
13 Khala mulonguga Mbimbi ya Nzambi lusugu nu lusugu, ngenyi mbawukotelesa diago makalegelo abonga a Yehowa. Mbawukotelesa nji egi Yehowa wana guguzumba muavula. Gula udi mutangigiza Mbimbi ya Nzambi lusugu nu lusugu, yajiya gugukuatesa ha gutangiza kiawaha mu ‘ndaga jidi mubela’ matangi aye nu mutshima waye. (2 Tim. 3:16) Mukulu mumoshi mu jina dia Kevin, wakhadile gudisagesa mukunda nu ndaga jiabola akalegele. Udi muzuela egi: “Gutanga nu gutangigiza Ngimbo 103 guangukuatesele ha gusombegesa matangi’ami nu ha gukotelesa ndaga Yehowa ana tshigina lume.” Eva tuazuelela gu thunda udi muzuela egi: “Gu suga ya lusugu luagasue, ngana zula tangua dia gutangigiza ndaga jidi nu ndando gu meso a Yehowa. Yana gunguhana guhuima mu mutshima nu yana kolesa nji gutshigina guami.”
14. Luholo lutshi gisambu giajiya gutukuatesa?
14 Khala mukombelela tangua diagasue. (1 Tes. 5:17) Gula udi mutshigina gukuata ufuta nu muthu, udi naye guta nenji maga tangua diagasue nu gumuwambela luholo udi gudivua. Idi nji luholo lumoshi nu ufuta wetu nu Yehowa. Tangua tuana gumuwambela luholo tudi gudivua, matangi etu nu ndaga jidi gutusagesa mu gisambu, tuana monesa diago egi tuana gumushila mutshima nu tudi mujiya egi wana gutuzumba muavula. (Ngi. 94:17-19; 1 Yone 5:14, 15) Phangi Yua tuazuelela gu thunda udi muzuela egi: “Tangua ngana kombelela Yehowa, nganago gumuwambela phamba ndaga jiangubuila mu lusugu luene gifua ngudi gumuhana rapore. Uvi ngana gumuwambela diago ndaga jiagasue ngudi mutangiza nu luholo ngudi gudivua. Mage-mage, ngana monago Yehowa gifua fumu wa société imoshi ngenyi, uvi gifua Tata wana zumba diago an’enji.”—Tala galuanda “ Wawutangele Gale Ba?”
15. Luholo lutshi Yehowa wana monesa egi wana gutuzumba?
15 Khala mubalegesa tangua nu mafuta awaha; adi kado Yehowa atuhuile. (Yak. 1:17) Tata wetu wa mu dilu wana monesa egi wana gutuzumba, luholo atuhanyile aphangi a mala nu a akhetu a mu hungu anyi ana ‘gutuzumba matangua agasue.’ (Ish. 17:17) Mu mukanda Phaula asonegele gudi Aklisto a gu Kolosai, watangele Aklisto ako anyi amukuatesele nu wazuelele mukunda nu ene egi: “Ana gunguhana diago gikhesa muavula.” (Kol. 4:10, 11) Klisto Yesu nji wakhalele nu funu ya mafuta. Wakhalele musuanguluga nu ukuateshi wa mafut’enji ikhale anjelo nga athu a ha mavu.—Luka 22:28, 43.
16. Luholo lutshi mafuta abonga ajiya gutukuatesa ha gusuena hehi nu Yehowa?
16 Wana kamba ukuateshi gudi aphangi’a mu hungu nu wana tshigina ukuateshi wene ba? Guwambela futa dia gukula mu nyuma ndaga jidi gutusagesa gushigo mukotelesa egi gutshigina guetu gudi gualeba, uvi guajiya gutubamba. Phangi James tuazuelela gu thunda udi muzuela egi: “Ufuta wawaha nu aphangi agukula mu nyuma wangukuatesele muavula. Gula matangi abola angujila, mafuta ami ana gungutegelela nu guhuiminyina guagasue nu ana gunguwambela egi ana gunguzumba muavula. Ukuateshi wawo wana gungutuma ha gukotelesa egi Yehowa wana gunguzumba nu wana gungubamba.” Gukuata ufuta nu aphangi a gukula mu nyuma guana khala diago nu ndando yavula!
LANDULA GUKHALA MU GUZUMBA GUA YEHOWA
17-18. Nanyi tudi naye gutegelela? Mukunda natshi?
17 Satana wana tshigina egi tubembe gutshita ndaga jiabonga. Wana tshigina egi tukhale mutangiza egi Yehowa anago gutuzumba nu tushigo tuatagana ha guhuluishiwa gudi muene. Uvi gifua luholo tuayimona, ndaga eji jiagasue jidi jia mambo.
18 Yehowa wana guguzumba. Wana khala nu ndando yavula gu meso enji. Gila wamutumagela, ‘mbawukhala mu guzumba guenji’ mayilago, gifua luholo luayitshitshile Yesu. (Yone 15:10) Ukhadigo mutegelela Satana nga gutegelela ndaga mutshima waye udi gugutuma ha gutangiza egi Yehowa anago guguzumba. Landula gutegelela Yehowa, muene wana jiya ndaga jiawaha jidi mu mitshima yetu. Khala musha diago mutshima egi Yehowa ‘wana zumba athu enji,’ nu aye nji!
LUNGIMBO 141 Le miracle de la vie
^ par. 5 Aphangi’etu ako a mala nu a akhetu anago gutshigina egi Yehowa wajiya guazumba. Mu longo edi, tuza guzuelela mukunda natshi tudi naye gusha mutshima egi Yehowa wana zumba muthu wagasue mukatshi dietu. Tuza mumona luko ndaga tuajiya gukalagala gula tudi nu ba dute egi Yehowa ashigo gutuzumba.
^ par. 2 Mu longo edi, majina ako asombegesewe.
^ par. 67 UKOTELESHI WA GIFUANESA: Gutuama egi ajiye giamatshidia, Phaula wambile Aklisto avula mu bologo. Tangua watshiginyile ndaga Yesu akalegele mukunda nu muene, wasombegesele lume nu wakhalele nji muhana aphangi’enji a Aklisto gikhesa, ako mukatshi diawo akhalele nu aphangi’awo muene wamonesele lamba.
