1. Eaa ta Iehova e kite maira i roto i tona iti tangata?

“TE TAU rā Iehova i tona tangata,” me kore te akaperepere ra aia ia ratou. (Sala. 149:4) E manako pumaana tikai teia! Te kite maira a Iehova i to tatou au tu meitaki; ka akavaitata atu ia tatou kiaia. Me vai tiratiratu tatou, ka noo vaitata aia kia tatou e tuatau ua atu!—Ioa. 6:44.

2. Eaa ra i ngatā ei i tetai pae te irinaki e te aroa maira a Iehova ia ratou?

² Karanga tetai pae, ‘Kite au e te aroa maira a Iehova i tona iti tangata, inara akapeea au e papu ei e te aroa maira aia iaku?’ Eaa ratou ka ui ei i teia uianga? Karanga a Oksana *, kua tupu te mamae kiaia i tona tamariki anga: “Mataora au i toku papetitoanga e kua painia atu au. Inara, e 15 mataiti i muri mai, kua akamaara au i te kino tei tupu ana kiaku. Manako au penei e kare a Iehova e mareka akaou ana iaku, e kare au e tau kia aroaia mai.” Akakite tetai tuaine painia ko Yua, kua tupu ana te kino kiaia i tona tamariki anga: “Kua akatapu au i toku oraanga kia Iehova no toku inangaro i te akamareka iaia. Inara, papu iaku e kare aia e aroa mai ana iaku.”

3. Eaa ta tatou ka uriuri i roto i teia atikara?

³ Mei te nga tuaine tiratiratu rai, e aroa maata tikai toou no Iehova, inara penei kua ekoko koe me te aroa maira aia ia koe. Eaa ra ka anoanoia ai kia papu e te aroa maira a Iehova ia koe? Eaa te ka tauturu ia koe me tupu mai te manako ekoko no runga i tona aroa? Ka pau tatou i teia nga uianga.

4. Eaa te kino ka tupu me manako ekoko tatou i to Iehova aroa?

⁴ E mana akakeu ririnui te aroa. Me papu ia tatou e te aroa maira a Iehova ia tatou, ka inangaro rai tatou i te tavini ua rai iaia noatu te au manamanata o te oraanga. Inara, me ekoko tatou i to te Atua aroa no tatou, ka “iti roa [to tatou] maroiroi.” (Mase. 24:10) Me tupu teia manako ekoko, kare e rauka ia tatou i te patoi i te au timataanga a Satani.—Ephe. 6:16.

5. Eaa tei tupu ki tetai pae no tei manako ekoko i to te Atua aroa?

⁵ Kua riro ana te manako ekoko i te akaparuparu i te akarongo o tetai au Kerititiano tiratiratu. Karanga tetai tangata pakari ko James: “Noatu te tavini ra au i Betela e te mataora ra i te tutu aere i roto i tetai putuputuanga reo ke ke, kua manako ana au me te āriki maira a Iehova i taku tavini anga iaia. Me te akarongo maira a Iehova i taku au pure.” Karanga a Eva, e tavini tamou katoa: “Kua kite mai au e mea kino kia manako ekoko tatou i to Iehova aroa, no te mea ka akaparuparu te reira ia tatou. E to tatou inangaro no te au apinga pae vaerua e ta tatou tavini anga ia Iehova.” Karanga a Michael, e painia tamou e e tangata pakari katoa: “Me kare koe e irinaki e te aroa maira te Atua ia koe, ka akamata koe i te aere ke mei iaia.”

6. Eaa ta tatou ka rave me tupu te manako ekoko i to te Atua aroa no tatou?

⁶ Te akaari maira teia au tupuanga i te kino ta te manako ekoko ka akatupu ki to tatou akarongo. Inara, eaa ta tatou ka rave me akamata teia manako ekoko i te tupu mai? Kia viviki tatou i te patoi i te reira! E pati kia Iehova no te tauturu kia taui i toou aerenga “manako” e ‘na te au o te Atua, e paruru i toou ngakau e toou manako.’ (Sala. 139:23; Phili. 4:6, 7) E akamaara, kare ko koe anake ua te manako akapera ra. Kua tupu ana teia manako ekoko ki tetai au taeake e te au tuaine tiratiratu. E pera to Iehova au tavini tiratiratu i taito. Akamanako ana eaa ta tatou ka apii mai mei te akaraanga o te apotetoro ko Paulo.

7. Eaa to Paulo au manamanata?

⁷ Kua manako ana ainei koe i tetai taime e e maata roa taau apainga e kare e rauka ia koe i te rave i te reira? Me koia ïa, ka mārama i reira koe i tei tupu kia Paulo. Kua manamanata aia no te au taeake, kare ua i roto e tai putuputuanga, mari ra “i te au ekalesia katoa.” (2 Kori. 11:23-28) E maki kino ainei toou te ka akaparuparu ia koe i roto i taau tavinianga? E maki to Paulo tei riro ei “tara i roto i [tona] kopapa,” e kua inangaro kia ngaro te reira. (2 Kori. 12:7-10) Kua riro ainei toou tu apa ua i te akaparuparu ia koe? Kua tupu ana rai tera kia Paulo. Kapiki aia iaia uaorai ei “tangata mate maata,” no tona tu apa ua.—Roma 7:21-24.

8. Eaa tei tauturu ia Paulo i tona au manamanata?

⁸ Noatu kua tupu te au manamanata tukeke te ka akaparuparu ia Paulo, kua tavini ua rai aia ia Iehova. Akapeea i rauka ai iaia te rave i te reira? Noatu kua kite aia e e tu apa ua tona, kua vai ketaketa rai tona akarongo ki roto i te atinga oko. Kua kite katoa aia i ta Iesu taputou e ka rauka i te katoatoa tei “akarongo [ia Iesu] . . . te ora mutu kore.” (Ioa. 3:16; Roma 6:23) E akarongo ketaketa tikai to Paulo. Kua papu iaia e te inangaro ra a Iehova i te akakore i te ara a te aronga tei rave i te kino, me tataraara ratou.—Sala. 86:5.

9. Eaa ta tatou ka apii mai mei ta Paulo tuatua ia Galatia 2:20?

⁹ Kua irinaki a Paulo i to te Atua aroa na roto ia Iesu. (E tatau ia Galatia 2:20.) Akamanako i te tuanga openga o tera irava. Karanga a Paulo: “Te Tamaiti a te Atua . . . tei aroa mai iaku, e kua oronga mai iaia uaorai noku.” Kare a Paulo i akakotinga i to te Atua aroa e kare aia i manako, ‘Te kite nei au e te aroa maira a Iehova i toku au taeake, inara kare aia e aroa mai iaku.’ Akakite a Paulo: “I te mea te vai tangata ara ua nei rai tatou, i mate ei te Mesia no tatou nei.” (Roma 5:8) Kare to te Atua aroa i kotingaia!

10. Eaa ta tatou ka apii mai mei ia Roma 8:38, 39?

¹⁰ E tatau ia Roma 8:38, 39. Kua kite a Paulo i te ririnui o to te Atua aroa. Kua tata aia e kare e apinga e “akataka ke ia tatou i te aroa o te Atua.”  Kua kite aia i to Iehova tu akakoromaki ki te iti tangata ngati Iseraela. Kua kite katoa aia akapeea a Iehova te takinga meitaki anga iaia. No reira, te karanga nei a Paulo e, ‘No te mea kua tono mai a Iehova i tana Tamaiti kia mate noku, e tumu ainei tetai kia manako ekoko au i tona aroa?’—Roma 8:32.

11. Noatu kua rave a Paulo i te au kino tei taikuia ia 1 Timoteo 1:12-15, eaa ra i papu ei iaia e te aroa maira te Atua iaia?

¹¹ E tatau ia 1 Timoteo 1:12-15. Penei e tuatau tetai kua taitaia ana a Paulo no te au angaanga tana i rave i mua ana. Kua kapiki a Paulo iaia uaorai ei tangata rave ara “maata”! I mua ake ka kite ei aia i te tuatua mou, kua takinokino a Paulo i te au Kerititiano i roto i te au oire, kua titiri i tetai pae ki roto i te are auri, e kua turu i te tamateanga i tetai pae. (Anga. 26:10, 11) Eaa to Paulo manako me aravei aia i tetai Kerititiano mapu, kua tamateia tona nga metua? Kua tataraara a Paulo no tana au kino i rave, e kua kite aia e kare e rauka i te taui i te reira. Kua āriki aia e kua mate a Iesu nona, e kua tata aia ma te papu: “Toku nei ra tu e vai nei, no te aroa ua ïa o te Atua.” (1 Kori. 15:3, 10) Eaa te apiianga no tatou? E āriki e kua mate a Iesu noou, e na te reira i rauka ai ia tatou i te akatupu i tetai pirianga vaitata kia Iehova. (Anga. 3:19) Ko te mea puapinga ki te Atua, ko ta tatou ka rave i teianei e a te tuatau ki mua, kare ko te au kino ta tatou i rave i mua ana, me e Kite tatou no Iehova i tera taime e me kare.—Isa. 1:18.

12. Akapeea a 1 Ioane 3:19, 20 me tauturu ia tatou me tupu te manako puapinga kore?

¹² Me akamanako koe e kua mate a Iesu no te tutaki i taau ara, penei ka karanga koe, ‘Kare au e tau kia āriki i teia apinga  aroa.’ Eaa koe ka manako akapera ei? Kua akavareia to tatou ngakau apa ua kia manako e e puapinga kore tatou. (E tatau ia 1 Ioane 3:19, 20.) Me tupu mai teia manako, e akamaara e “e maata te Atua i to tatou ngakau.” E ririnui atu te aroa e te tu akakoreanga ara a to tatou Metua i te rangi, i tetai ua atu manako ekoko ka tupu mai. Kia āriki tatou e te aroa maira a Iehova ia tatou. Ka rauka te reira, me apii putuputu tatou i te Pipiria, me pure putuputu, e me kapiti putuputu ki tona iti tangata. Eaa ra i puapinga ai kia rave tatou i te reira?

13. Akapeea te apii anga i te Pipiria me tauturu ia tatou? (Akara katoa i te pia “ Tauturu te Pipiria ia Ratou.”)

¹³ Apii i te Pipiria i te au rā ravarai, e ka kite meitaki koe i to Iehova au tu manea e tona aroa maata noou. Me akamanako oonu koe i taau i apii mai, ka tauturu te reira i te akatikatika i toou au manako ekoko. (2 Timo. 3:16) Karanga a Kevin, e tangata pakari tei manako puapinga kore iaia uaorai: “Te tatau anga au ia Salamo 103 e te akamanako oonu anga i te reira, kua tauturu ia au kia akatano i toku aerenga manako e kia mārama i to Iehova manako no runga iaku.” Karanga a Eva, tei taikuia i mua ana: “I te openga o te au rā, ka akamanako au eaa te mea puapinga kia Iehova. Ka marū toku ngakau e ka matutu atu toku akarongo.”

14. Akapeea te pure me tauturu ia tatou?

¹⁴ Pure putuputu. (1 Tesa. 5:17) Me inangaro koe i te akariro i tetai tangata ei oa noou, ka tuatua putuputu koe kiaia e ka akakite i toou manako. Kua aite rai te reira ki te akariro anga ia Iehova ei oa no tatou. Me akakite tatou i te au mea katoatoa kiaia na roto i te pure, te irinaki ra tatou kiaia ma te kite e te aroa maira aia ia tatou. (Sala. 94:17-19; 1 Ioa. 5:14, 15) Karanga a Yua, tei taikuia i mua ana: “Me pure au, kare au e akakite ua kia Iehova eaa tei tupu kiaku, mari ra ka akakite au eaa tikai to roto i toku ngakau. Aere ua rai, kua kite mai au ia Iehova, kare ei pu no te ngai angaanga, mari ra ei Metua te inangaro ra i tana tamariki.”—Akara i te pia “ Kua Tatau Ana Ainei Koe?”

15. Akapeea a Iehova te akaari anga mai i tona inangaro no tatou?

¹⁵ Kapiti atu ki te au oa tiratiratu; e apinga aroa ratou no ko mai ia Iehova. (Iako. 1:17) Kua oronga mai to tatou Metua i te rangi i te au taeake pae vaerua te ka akaari mai i te “aroa . . . i te au tuatau  katoa ra.” (Mase. 17:17) I roto i tana reta ki to Kolosa, kua taiku a Paulo i tetai au Kerititiano tei tauturu ana iaia, ma te karanga e “ko ratou tei akapumaana mai iaku.” (Kolo. 4:10, 11) Kua anoano katoa a Iesu i tetai tauturu e kua āriki i te reira mei tona au oa, te au angera e te tangata.—Luka 22:28, 43.

16. Akapeea te au oa tiratiratu me tauturu ia tatou kia noo vaitata kia Iehova?

¹⁶ Te kimi ra e te āriki ra ainei koe i te tauturu a toou au oa tiratiratu? Me akakite koe i toou manamanata ki tetai taeake irinakiia, kare te reira i te akairo no te tu paruparu; ka riro ra ei paruruanga. Karanga a James, tei taikuia i mua ana: “Kua tauturu ana toku au oa Kerititiano tukatau iaku. Me maata toku manako taitaia, ka akarongo meitaki mai ratou e ka kite au i to ratou aroa e to Iehova aroa noku.” E mea puapinga i reira kia akatupu e kia tamou tatou i tetai pirianga vaitata ki to tatou au taeake e te au tuaine i roto i te putuputuanga!

17-18. Ka akarongo tatou kiaai, e no teaa ra?

¹⁷ Inangaro a Satani kia kore tatou e rave i te mea tika. Inangaro aia ia tatou kia irinaki e kare a Iehova e aroa mai ana ia tatou, e kare tatou e tau kia akaoraia mai. Inara mei ta tatou i kite mai, e pikikaa te reira.

¹⁸ Te aroa maira e te akaperepere ra a Iehova ia koe. Me akarongo koe kiaia, ka “vai akaperepereia” koe e tuatau ua atu, mei ia Iesu rai. (Ioa. 15:10) No reira, auraka e akarongo kia Satani e ki toou manako ekoko. E akarongo ra kia Iehova, tei kite i te meitaki ia tatou tataki tai. E kia papu ia koe e “te tau rā Iehova i tona tangata,” e koe katoa!