1. Bintu bihi Yehova abona omu bantu bage?

YEHOVA NNAMAHANGA ‘anashagalukire olubaga lwage.’ (Enna. 149:4) Ezo nderho zirhuhire omurhima bwenene! Yehova anabone amorhere girhu minja; anabone obuhashe bwirhu, ananalonze rhube bîra bage. Erhi rhwakabêra bishwekerezi kuli ye, rhwanaba bira bage emyaka n’emyaka!​—Yn. 6:44.

2. Bulya gurhi bantu baguma baguma barhayemera oku Yehova aba abazigire?

² Bantu baguma baguma banaderha ntya: ‘Nyishi oku Yehova anazigire ecigusho c’abantu bage boshi, cikone bici byakanyemeza oku anambone oku ndi wa bulagirire?’ Bici byakarhuma muntu mulebe acidosa er’idoso? Oksana, * walwisize mazibu manji erhi âli mwana, adesire ntya: “Nashagalusire bwenene erhi mbatizibwa n’erhi ntondera omukolo g’obupainiya. Cikone, myaka 15 enyuma z’aho, nakakengera ago mazibu goshi nageragamo amango naciri mwana. Nabona nka ntaliyemerirwe na Yehova n’omu ntyo arhakanzigira.” Yua, mwali wirhu muguma oba painiya walwisagya naye amazibu erhi aciri mwana, adesire ntya: “Nacihânaga emwa Yehova bulya nalilonzize mushagaluse. Cikone nalimanyire oku arhakanzigira ciru n’ehitya.”

3. Bici rhwaganirira mw’eci cigabi?

³ Ak’abo bali birhu babirhi bishwekerezi rhuganirire, nawe oba ozigire Yehova bwenene cikone nkaba hali amango orhanya oku arhaba okuzigire. Bulya gurhi kuli kwa bulagirire oyemere n’obwalagale oku anakushibirire? Na bici byakakurhabala oleke okurhanya oku Yehova arhakuzigira? Rhwaganirira amashuzo g’ago madoso.

4. Bulya gurhi guli murhego okurhanya oku Yehova arharhuzigira?

⁴ Obuzigire bujira misi minji bwenene. Erhi rhwakayemera n’obwalagale oku Yehova aba arhuzigire n’oku anarhurhabale, oko kwanarhuma rhwamukolera n’omurhima goshi ciru akaba rhuli omu mzibu. Lubero n’oko, erhi rhwakaba n’akarhinda oku Nnamahanga arharhushibirira, ‘obuzibu bwirhu bunali ntabwo.’ (Mig. 24:10) Na kandi, erhi rhwakavunika omurhima n’okurhonderha kwarhanya oku Nnamahanga arharhuzigira, rhurhakaciba n’obuhashe b’okuhagalika emirhego ya Shetani.​—Ef. 6:16.

5. Bici okuba n’akarhinda kwalerhire bene wirhu baguma baguma?

⁵ Bene wirhu baguma baguma bishwekerezi ba muli gano mango girhu bakola babà bazamba omu kiroho enyanya z’akarhinda. Mugula muguma ohamagalwa James adesire ntya: “Nali oku Beteli nanalinshagalukire omukolo nakagijira omu cigamba c’olulimi luhyahya, cikone nakagicidosa erhi kobinali Yehova anashagalukire omukolo nakagimujirira. Ciru nahikira aha nakacidosa erhi kobinali Yehova anayumvirhize amasala gani.” Eva, naye oli omu mukolo gw’akasanzi koshi, adesire ntya: “Nabwîne oku okuba n’akarhinda kuyerekera obuzigire Yehova arhujirako guba murhego bulya kunarhume omuntu arhacimukolera n’omurhima goshi. Kanarhume omuntu arhacishagalukire ebintu by’ekiroho na kandi kanarhume aheza omwishingo gw’okukolera Yehova.” Mwene wirhu Michael oba painiya na mugula, adesire ntya: “Erhi akaba orhaba oyemire oku Yehova anakushibirire, wanayishihikira aha waleka okukolera Yehova.”

6. Bici rhushinganine rhujire erhi rhwakarhondera rhwarhanya oku Yehova arharhuzigira?

⁶ Ezo nyiganyo ziyerekine amazibu gakarhuhikira erhi rhwakakarhanya oku Yehova arharhuzigira. Cikone, gurhigi rhwakajira erhi rhwakarhondera rhwarhanya ntyo? Rhushinganine rhuhagalike ezo ntanya ho n’aho! Ohûne Yehova akurhabale okule ezo “ntanya z’okulibuza” omu bwenge bwawe na ntyo ‘omurhûla gwa Nyamuzinda gwanalanga omurhima gwawe n’obukengere bwawe.’ (Enna. 139:23, NWT; amahugûlo g’idako; Fl. 4:6, 7) Na kandi okakengera oku orhali wene, hali bene wirhu na bali birhu nabo bali balwisa ezo entanya mbi. Ciru hali n’abakozi ba Yehova b’omu mango ga mîra balwisize ago  mazibu. Rhulole ebi olwiganyo lwa Paolo lwakarhuyigiriza.

7. Mazibu gahi Paolo agwerhe?

⁷ Ka hali amango obona ogwerhe mikolo minji yakujira na ntyo ociyumve oku orhakahashiyihikiriza yoshi? Akaba okola ociyumvirhe ntyo, wahugûkwa oku Paolo naye aciyumvagya. Akagirhanya bwenene oku malagirire, arhali ga cigamba ciguma cone, ci ga “bigamba byoshi.” (2 Kr. 11:23-28, NWT) K’oba olwazire endwala erhafuma na ntyo yakubulisize omwishingo? Paolo agwerhe “akababo omu mubiri,” nkaba yâli ndwala alilwazire, ananalilonzize ayifume. (2 Kr. 12:7-10) K’amagosa gawe ganahikire aha gakuvuna omurhima? Hali amango Paolo naye akagiciyumva ntyo. Acihamagire oku ali “mulume wa busha” bulya ngasi mango akajira okwage koshi ly’alwisa obuzamba bwage.​—Rm. 7:21-24, NWT.

8. Bici byarhabire Paolo alwise amazibu gage?

⁸ Paolo agendekera ajira omukolo gwa Yehova, ciru akaba akagilwisa mazibu manji n’akanga k’okumuvuna omurhima. Bici byakagimuha emisi y’okujira ntyo? Ciru ankaba alimanyire oku arhali mwimana, agwerhe obuyemere omu ngombôlo. Alimanyire eci ciragane Yezu ahânaga cidesire oku “ngasi yeshi wamuyemera [Yezu] . . . abone obuzine bw’ensiku n’amango.” (Yn. 3:16; Rm. 6:23) Paolo ali muguma wa balya bajira obuyemere omu ngombôlo. Aliyemire n’obwalagale oku Yehova aba mubidu okubabalira ciru abajijire ebyaha bizibu erhi bakaciyunjuza.​—Enna. 86:5.

9. Bici enderho za Paolo ziri omu lwandiko lwa Abagalasiya 2:20, zakarhuyigiriza?

⁹ Paolo aliyemire oku Nnamahanga anamuzigire bwenene bulya arhumire Yezu ly’afâ enyanya z’ebyahya byage. (Osome Abagalasiya 2:20.) Oyumve enderho z’okuhâna omurhima ziri oku buzinda bw’olu lwandiko. Paolo adesire ntya: “Mugala wa Nyamuzinda . . . wanzigiraga anacihâna erhi nie ntuma.” Paolo arharhanyagya oku Nnamahanga arhakamuzigira bulya ali mubi bwenene. Arhaderhaga ntya: ‘Mpugusîrwe bulya gurhi Yehova azigira bene wirhu, cikone birhakahashikana niehe anzigire.’ Paolo akengeza Abaroma ntya: “Kristu arhufîra rhunaciri banya-byaha.” (Rm. 5:8) Obuzigire bwa Nnamahanga burhajira lugero!

10. Bici olwandiko lwa Abaroma 8:38, 39, lurhuyigirizize?

¹⁰ Osome Abaroma 8:38, 39. Paolo aliyemire n’obwalagale obuhashe b’obuzigire bwa Nnamahanga. Ayandika oku nta kantu ‘kakahasha okurhunanûla oku buzigire bwa Nyamuzinda.’ Paolo alimanyire kunganaci Yehova akagilembera ishanja lya Israheli.  Analihugûsirwe bwinja kunganaci Yehova amufirire obonjo. Rhwanahugûla entanya za Paulo kwa bofofi ntya: ‘Okubona Yehova arhumirhe Omugala oku afê erhi nie ntumire, bici byakacirhuma naba n’akarhinda okubiyerekire obuzigire bwage?’​—Rm. 8:32.

11. Ciru akaba Paolo ajijire ebyaha, nk’ebi biganirirwe omu lwandiko lwa 1 Timoteyo 1:12-15, bici byarhumaga ayemera n’obwalagale oku Yehova aba amuzigire?

¹¹ Osome 1 Timoteyo 1:12-15. Byanahashikana hali amango Paolo akagiciyumva kubi lugenda oku alilamire embere abe Mukristu. Rhurhakasomerwa okubona acidesire ye “wa burhanzi” omu banya-byaha. Embere Paolo amanye okuli, akagija lugo oku lundi ly’alibuza Abakristu, akakwêba baguma baguma omu mpamikwa ciru hali n’abandi akagiderha oku bayirhwe. (Ebj. 26:10, 11) Ka wanahashirhanya gurhi Paolo akagiciyumva erhi akarhiganyire omusole Mukristu ababusi bago banigagwa erhi y’erhuma? Paolo akagiciyumva kubi enyanya z’amagosa gage, cikone arhakacishanjire ebyagezire. Ayemera n’obwalagale oku Yezu afîre erhi yerhuma, n’oko kwarhuma ayandika ntya: “Nshôkano ya Nyamuzinda yanjiraga okûla ndi.” (1 Kr. 15:3, 10) Bici oko kwakarhuyigiriza? Okuyemera oku Yezu afîre erhi we orhuma kwanakuhashisa okuba n’obwîra busêzire haguma na Yehova. (Ebj. 3:19) Ebi rhuli rhwajira buno n’omu mango gayisha byo Yehova asegeza k’obwenge, ci arhali amagosa rhwajiraga omu mango ga mîra, abe rhwalikola rhuli Bahamirizi erhi nanga.​—Iz. 1:18.

12. Gurhi enderho ziri omu 1 Yowane 3:19, 20, zakarhurhabala amango rhuli rhwaciyumva oku rhuli ba busha erhi mpu rhurhashinganini okuzigirwa?

¹² Erhi orhanya gurhi Yezu afâga enyanya z’ebyaha birhu, nkaba wanaderha ntya: ‘Nciyumvirhe nka ntalishinganine olo luhembo lwago-lwago.’ Bulya gurhi wakahikira aha waciyumva ntyo? Emirhima yirhu erhali mimana  yanarhurheba, n’okurhujira rhukaciyumva nka rhuli babusha-busha erhi oku rhurhashinganini okuzigirwa. (Osome 1 Yowane 3:19, 20.) Omu kanga ka ntyo rhushinganine rhukakengera oku “Nyamuzinda alushire omurhima gwirhu.” Larha wirhu w’omu mpingu oku arhuzigira n’okurhubabalira kulushire entanya z’akarhinda zikacifulika omu mirhima yirhu. Kuli kwa bulagirire rhuyemere oku Yehova aba arhuzigire. Lyo rhuhikira aho, rhushinganine rhukasoma Akanwa ka Nnamahanga ngasi mango, okushenga burhahusa n’okukaba ngasi mango haguma n’abantu bage bishwekerezi. Bulya gurhi kuli kwa bulagirire okujira ebyo byoshi?

13. Gurhi okuciyigiriza Akanwa ka Nnamahanga kwakarhurhabalamwo? (Olole ecisanduku cidesire “ Gurhi Akanwa ka Nnamahanga Kabarhabala.”)

¹³ Okaciyigiriza Akanwa ka Nnamahanga ngasi lusiku, na ntyo wahugûkwa amorhere ga Yehova. Wahugûkwa kunganaci aba akuzigire. Okurhanya oku cigabi c’Akanwa ka Nnamahanga ngasi lusiku kwanakurhabala obe n’etanya nyinja, n’ “okukubûla ebintu” biri omu murhima n’omu bwenge bwawe. (2 Tm. 3:16, NWT) Mugula muguma ohamagalwa Kevin wakagilwisa entanya z’okucibona wabusha adesire ntya: “Okusoma n’okurhanya oku lwandiko lwa Ennanga 103, kwantabire nkubûle entanya zani n’okuhugûkwa entanya Yehova anjirako.” Eva, rhwaganiriraga embere adesire ntya: “Oku buzinda b’omulegerege nnanonze ehisanzi lyo ntanya lugenda entanya za Yehova. Okujira ntyo kunampe omurhula gw’ekandalala n’okuzibuhya obuyemere bwani.”

14. Gurhi okushenga kwakarhurhabalamwo?

¹⁴ Okashenga burhahusa. (1 Ts. 5:17) Lyo abantu baba n’obwîra busêzire, kuba kwa bulagirire bakaganira ngasi mango n’okubwirana ebiri oku murhima. Ko n’oko lugenda obwîra bwirhu haguma na Yehova. Erhi rhumubwira kugerera isala oku rhuli rhwaciyumva, entanya zirhu n’amazibu girhu, rhunayerekane oku rhumulangalire n’oku rhuyemire oku aba arhuzigire. (Enna. 94:17-19; 1 Yn. 5:14, 15) Yua, rhwaganiriraga embere adesire ntya: “Erhi nshenga, nnanjire bintu binji kulusha okubwira Yehova kone gurhi nagezize omulegerege. Nnamubwire ebindi oku murhima n’oku ndinaciyumva. Nahikire aha nahugûkwa oku Yehova arhaba nka bose wa kompanyi ndebe, cikone aba Larha ozigira abana bage.”​—Olole ecisanduku cidesire “ Ka Wasomire eci Citabu?”

15. Gurhi Yehova ayerekanamwo oku arhushibirire?

¹⁵ Okageza akasanzi haguma n’abîra bishwekerezi; abîra bishwekerezi luba luhembo lurhenga emwa Yehova. (Yk. 1:17) Larha wirhu w’omu mpingu anayerekane oku arhushibirire omu kurhuha omulala gw’ekiroho gwa bene  wirhu na bali birhu ‘barhuzigira ngasi mango.’ (Mig. 17:17) Omu maruba Paolo ayandikiraga Abakolosi, aganiriremo Bakristu baguma baguma bakagimurhabala, adesire oku bo bali “burhulirize” bwage. (Kl. 4:10, 11) Ciru na Yezu Kristu naye akagishagalukira oburhabale abîra bage bakagimuha; bamalahika ciru n’abantu.​—Lk. 22:28, 43.

16. Gurhi abîra bishwekerezi bakarhurhabala lyo rhuyegerera Yehova?

¹⁶ K’onayunguke n’oluhembo lw’abîra bishwekerezi Yehova arhuhîre? Okuganirira omwîra wirhu okuzire kiroho amazibu girhu burhali bazamba, cikone okujira ntyo kwanarhulanga. Rhuyumvagye ebi James, rhwaganiriraga embere, adesire: “Okujira obwîra bwinja haguma n’Abakristu bakuzire kiroho kwantabire bwenene. Erhi entanya mbi zija omu bukengere bwani, abo bîra bananyumvirhize, n’okunkengeza oku babà banzigire bwenene. Kugerera abo bîra, nnambone kunganaci Yehova aba anzigire n’okunshibirira.” Kuli kwa bulagirire bwenene okucijirira obwîra busêzire haguma na bene wirhu na bali birhu n’okubulanga!

17-18. Ndi rhushinganine rhukayumvirhiza, na bulya gurhi?

¹⁷ Shetani arhalonza rhujire ebintu binja. Aba alonzize rhuyemere oku Yehova arharhuzigira n’oku rhurhashiganini obucunguke. Cikone nk’oku rhwanabwine, ebyo byoshi buli bunywesi.

¹⁸ Yehova aba akuzigire. Oba wabulagirire omu masu gage. Erhi wakakamurhumikira, ‘wanabêra omu buzigire bwage’ emyaka n’emyaka, nk’oku Yezu ajiraga. (Yn. 15:10) Co cirhumire orhakagiyumvirhiza entanya za Shetani erhi ebi omurhima gwawe gwakakutumuza. Lubero n’oko, okayumvirhiza Yehova bulya anabone ebinja biri omu murhima gwa ngasi muguma wirhu. Oyemere n’obwalagale oku ‘anashagalukire olubaga lwage,’ ciru na nawe!