1. Yehova ali wamona ki mu bantu bakue?

YEHOVA LEEZA “ali wasekelela mu bantu bakue.” (Malum. 149:4) Kakiine, ezio milandu ili yalengia tusaansamuke saana! Yehova ali wamona mibeele yeetu iweeme; ali wamona buviinde bwetu bwa kukita biweeme kabili ali watupalamika kuli weene. Kine twatwalilila kuya twali ba kisinka kuli weene, wakaba kusiala peepi ni fwefue muyayaya!​—Yoan. 6:44.

2. Juu ya ki bantu bange bali bamona kyakolele kuzumina nangue Yehova abatonene?

² Muntu unge kunti walanda eevi, ‘Manine nangue Yehova atonene bantu bakue bali kikundi, inzi kunti nasininkizia siani nangue Yehova antonene palwane bunke?’ Paange ni kiki kili kulengia muntu epuzie evio? Oksana *, waakyulile saana ku bwanike bwakue. Walanda eevi: “Naaunvuile saana nsaansa musita unabatiziiziwe ni kutendeka miilo ya bupainia. Inzi kisia miaka 15, naatendekele kulanguluka bintu bibiipile byaakitikile ku bwanike bwane. Naatendekele kutontonkania nangue nsikitabiilue kabili kuli Yehova kabili nangue nsyali napalile ata kaniini kutonua kuli weene.” Nkazi umo painia ali wakuutua Yua, ni weene waapatile maavia engi mu bwanike bwakue. Walanda eevi: “Naaipeele kuli Yehova paantu naali natonene kumusaansamusia. Inzi, naali naisininkiziizie nangue taviinda kuntona ata kaniini.”

3. Tuli kusambilila ki mu leeli lyasi?

³ Nga babo bankazi babili ba kisinka batwazimbula, ni weewe umutonene saana Yehova. Inzi, nga beene, paange ni weewe kunti watontonkania nangue Yehova takutonene. Juu ya ki upalile kuya wali ni kisinka nangue ali wakwemena kakiine? Kabili ni kiki kili kukukwasia musita luwatendeka kutontonkania nangue Yehova takutonene? Ale kansi tumone byasuko bya beebio biipuzio.

4. Juu ya ki kutontonkania nangue Yehova tatutonene kubiipile?

⁴ Ntono ni maka ali akinkizia. Kine tusininkiziizie nangue Yehova atutonene kabili nangue ali watukwasia, tuli kukinkiziiwa kumubombela kwa mutima weetu onse anzia kine tuli ni maavia mu buikazi bwetu. Ku lubali lunge, kine twatwisika nangue Leeza teezi kutwemena ‘maka [etu] ali kukeepa.’ (Tus Maf. 24:10) Kine twatioka mutima ni kutendeka kutontokania nangue Leeza tatutonene, tuli kwaluka batope ku miteo yakue Sataana.​—Baef. 6:16.

5. Ni kiki kyaakitikile musita balupua ni bankazi bamo lubaatendekele kutontonkania nangue Yehova tabatonene?

⁵ Kutwisika kuli mukulengia Bakristu ba kisinka mu eno nsiku baaluke batope kimupasi. Lupua umo ali wakuutua James walanda eevi: “Anzia kine naali nabombela ku Beteli ni kusekelela kubombela mu kilonghaano kya lulimi lunge, naali naiipuzia kine kakiine Yehova waali wasekeleele miilo yane. Mu musita umo, naatendekele ni kwiipuzia kine Yehova waali watuilizia mapepo ane.” Eva ali wabomba ni weene mu miilo ya nsita yonse, walanda eevi: “Kutontonkania nangue Yehova tatutonene kubiipile paantu kuli kwalengia muntu tekuti akite buyantanzi. Kutontonkania evio kuli kwalengia muntu tekuti aaluke ni nkulu ya kukita bintu bya kimupasi, kabili kuli kwalengia nsaansa yakue ya kumubombela Yehova ikeepe.” Michael, painia kabili mukote, walanda eevi: “Kine te uzumiine nangue Leeza ali wakwemena, uli kutendeka kwiseeluka bukebuke kufuma kuli Weene.”

6. Tupalile kukita ki kine twatendeka kutontonkania nangue Leeza tatutonene?

⁶ Ezio mifuano yalangilila nangue, kutontonkania nangue Leeza tatutonene kunti kwalengia kiketekelo kyetu kiinooneke. Ale tupalile kukita ki kine twatendeka kutontonkania nangue Leeza tatutonene? Tupali kutukuna azo malanga mu mutue weetu ni kuapoozela kule bila kukokola! Muloombe Yehova akukwasie kupianika azo “malanga ali aemia” na ‘mutende wakue Leeza uli kusuunga mutima obe ni buviinde bobe bwa kutontonkania.’ (Malum. 139:23; Baf. 4:6, 7, NWT) Kabili languluka nangue te weewesie bunke. Ni balupua ni bankazi bange bali mukuluisia azo malanga abiipile. Atasie babombi bakue Yehova ba kale, ni beene, baaluisiizie azo malanga. Mona bintu bituli kuviinda kusambilila kupitila mufuano wakue mutumua Paulo.

7. Paulo abanga wali ni maavia ki?

⁷ Eba, musita unge uli waisaanga wali ni miilo ingi ya kukita ni kisia wamona nangue teuviinda kuifikilizia yonse? Kine ni weewe uli waiunvua evio, kunti wainika vyaali vyaiunvua Paulo. Waali waema apanasie juu ya kilonghaano kimo, inzi juu ya “bilonghaano byonse.” (2 Bakor. 11:23-28) Eba, buavia bobe bwa kuluala-luala buli bwalengia nsaansa yobe yapua? Paulo waali wakyuziiwa na “munga mu mubili” usibanga wafuma. Paange ozo munga ubanga wali buluele, kabili waali watonene saana bamufumie ozo munga. (2 Bakor. 12:7-10) Eba, kusipuililika kobe kuli kwakulengia utioke mutima? Nsita inge, Paulo ni weene waali watioka mutima. Waali waikuuta mwine nangue ‘muntu asyeme’ paantu lyonse abanga waluana na kusipuililika kwakue.​—Bar. 7:21-24.

8. Ni kiki kyaamukwasiizie Paulo asipikizie maavia akue?

⁸ Anzia kine Paulo waasaakeene ni meezio ebeleele ni aali ingi ya kutiona mutima, waatwaliliile kumubombela Yehova. Ni kiki kyaamupeele maka a kukita evio? Anzia kine abanga wamanine buino kusipuililika kwakue, abanga wali ni kiketekelo kyalumine mu kilubula mulandu. Kabili waali wamanine buino bulayo bwakue Yesu bulandile nangue “kubalua muntu wamuketekela [Yesu] . . . aye wali ni bukose bwa muyayaya.” (Yoan. 3:16; Bar. 6:23) Kakiine Paulo waali pakati ka baalia baali balangilila kiketekelo mu kilubula mulandu. Waali wasininkiziizie nangue Yehova atonene saana kweleela atasie baalia bakitile lizaambi likata, kine balapila.​—Malum. 86:5.

9. Twasambilila ki kupitila milandu yakue Paulo ili mu Bagalatia 2:20?

⁹ Kabili, Paulo waali wazumiine nangue Leeza amutonene saana paantu waali wamanine nangue Leeza wamutumine Yesu eeze amufuile. (Soma Bagalatia 2:20.) Mona eezi milandu ili yakoselezia ili ku mpela ya ozo mulongo. Paulo waalandile eevi: ‘Muana wakua Leeza, . . . waantonene ni kunfuila.’ Paulo taali waimwene nangue abiipile saana eevi Leeza tekuti amutone. Taatontonkaniizie ni kulanda nangue, ‘Kunti namona kili kulengia Yehova abatone balupua ni bankazi bange, inzi neene, tali na mwakuntonena.’ Kuliko kukita evio, Paulo waabalangulusiizie Baroma eevi: “Kristu waatufwiliile lutwaali twakili bantu ba bibalo [ao, ba mazaambi].” (Bar. 5:8) Kakiine ntono yakue Leeza te ili na mipaka!

10. Twasambilila ki mu lileembo lya Baroma 8:38, 39?

¹⁰ Soma Baroma 8:38, 39. Paulo waali wasininkiziizie kakiine nangue ntono yakue Leeza ili ni maka. Waaleembele nangue te kuli kintu ‘kyakatufumia ku ntono itutonenue na Leeza.’ Paulo waali wamanine nangue Yehova waabasipikiziizie  saana Baisraeli. Kabili waali wamanine Yehova vyaamulangiliile luse. Pakaako mu milandu inge, Paulo waali wakebele kulanda nangue, ‘Paantu Yehova waamutumine Muana wakue anfuile, nsili na nsaambu ya kutontonkania nangue taantonene.’​—Bar. 8:32.

11. Anzia kine Paulo waakitile mazaambi nga alia alondolwelue mu 1 Timoteo 1:12-15, juu ya ki abanga wali ni kisinka nangue Leeza amutonene?

¹¹ Soma 1 Timoteo 1:12-15. Kipalile Paulo waali waiunvua saana ovio musita lwaali watontonkania palua bintu byaakitile ntaanzi ya kwaluka Mukristu. Te kya kupapia kumana nangue waali waikuuta nangue muntu ‘abiipiisie kukila bonse’! Ntaanzi tanamane kisinka, Paulo waali wakyuzia Bakristu wafuma mu ozu muzi waya ni mu unge. Bamo, waali wabapooza mu buloko ni bange waali waitabizia bepaiwe. (Miil Bat. 26:10, 11) Tontonkania musita Paulo lwabanga wasaakaana ni musepuka Mukristu asibanga na baviazi paantu weene, Paulo, waitabiziizie babo baviazi bepaiwe. Ati, abanga waiunvua siani? Paulo waali waiunvua ovio saana palua bilubo byakue, inzi waali wamanine nangue taviinda kwalulula bintu byaakitile. Waazumiine nangue Kristu waamufuiliile, kabili waaleembele eevi wali ni kisinka: “Ndi mutumua kupitila mu buwame bwakua Leeza.” (1 Bakor. 15:3, 10) Twasambililapo ki? Itabila nangue Kristu waakufuiliile weewe kabili nangue waakusebeele nzila eevi uviinde kwingila mu bukibuza bwa peepi pamo ni Yehova. (Miil Bat. 3:19) Kintu kituli mukukita leenu pamo ni keelia kitwabaka kukita musita uli waiza i ibintu bya mana kuli Leeza, apana bilubo beelia bitwaakitile musita waapitile, ibe tubanga twali Bakasininkizia Bakue Yehova ao abe.​—Is. 1:18.

12. Milandu ili mu lileembo lya 1 Yoane 3:19, 20 kunti yatukwasia siani kine twaimona nangue tuli ba bule ao te tupalile kutonua?

¹² Kine watontonkania nangue Yesu waafuile eevi mazaambi obe eleelue, kunti walanda  eevi, ‘Nsipalile ata kulangililua ozo mukinzi.’ Juu ya ki kunti waiunvua evio? Mutima weetu usipuililikile kunti watubeepa ni kutulengia twimone nangue tuli ba bule kabili nangue te tupalile kutonua. (Soma 1 Yoane 3:19, 20.) Kine twatendeka kutontonkania evio, tupalile kulanguluka nangue ‘Leeza i mukulu kukila fwefue ao kukila mitima yeetu.’ Mibeele ya ntono ni kweleela ili na Baba weetu wa ku muulu, ili ni maka saana kukila malanga abiipile ali aingila mu mutima weetu. Tupalile kwikebela bintu bili byatusininkiziizia nangue Yehova atutonene. Eevi kukita evio, tupalile kusambilila lingi Mulandu wakue, kupepa lyonse, ni kupisia musita pamo ni bantu bali bamupupa. Juu ya ki kukita bebio bintu ni kwa mana saana?

13. Kusambilila Mulandu Wakue Leeza kunti kwatukwasia siani? (Mona ni kisanduku “ Vibali Bakwasiiwa na Mulandu Wakue Leeza.”)

¹³ Sambilila Mulandu Wakue Leeza kila busiku. Kine wakita evio, wakaba kumona paswetele mibeele ingi iweeme yakue Leeza. Wakaba kwinika nangue akutonene saana. Kusoma ni kutontonkania saana kipitu kampanda kya Mulandu Wakue Leeza kila busiku, kunti kwakukwasia ukile kutontonkania buino ni ‘koolola bintu’ mu maano ni mu mutima obe. (2 Tim. 3:16, NWT) Mukote umo wa kilonghaano ali wakuutua Kevin, abanga waluisia malanga a kwimona kuya wali wa bule. Walanda eevi: “Kusoma Malumbo a 103 ni kutontonkania milandu ilimo, kwaankwasiizie koolola malanga ane ni kwinika Yehova vyali watontonkania kakiine palwane.” Eva, nkazi utwazimbulanga ntaanzi, walanda eevi: “Kooba lukali kazikilila, ndi nakwata musita wa kutontonkania Yehova vyali waiunvua. Kukita evio kuli kwandetela mutende ni kukuula kiketekelo kyane.”

14. Kupepa kunti kwatukwasia siani?

¹⁴ Pepa lyonse. (1 Bat. 5:17) Bukibuza bukosele pakati ka bantu babili buli bwaalukako kine bali balanziana lyonse ni kubuilana bili ku mutima. I vili ni bukibuza bwetu pamo ni Yehova. Musita utuli twamubuila mu lipepo, vituli twaiunvua, malanga etu ni bintu bili byatwemia, tuli twalangilila nangue tumuswapiile kabili tumanine nangue atutonene. (Malum. 94:17-19; 1 Yoan. 5:14, 15) Yua, utwazimbulanga ntaanzi walanda eevi: “Musita u ndi napepa, nsizi kumubuilasie bintu byakitikanga kuli neene musita wa koba. Ndi namubuila Yehova byonse bili ku mutima ni vingiunvuile. Bukebuke, nakifikiila kumumona Yehova apana nga mukulu umo eevi emaniine miilo, inzi nga Baba atonene saana baana bakue.”​—Mona kisanduku “ Eba, Waakisomene Kale?”

15. Yehova ali walangilila siani nangue atutonene kila umo palwakue?

¹⁵ Pisia musita pamo ni babibuza ba kisinka. Babibuza ba kisinka ni bupe kufuma kuli Yehova. (Yak. 1:17) Baba weetu wa ku muulu ali watulangilila ntono kila muntu palwakue kupitila kutupeela balupua ni bankazi mu kilonghaano  bali batulangilila “ntono nsita yonse.” (Tus Maf. 17:17) Mu mukanda wakue ku Bakolosai, Paulo waazimbuile Bakristu kampanda babanga bamukwasia, kabili waalandile nangue ‘baamukwasiizie saana.’ (Bakol. 4:10, 11) Kristu Yesu ni weene waatasiizie kukwasiiwa na babibuza bakue, ibe bamalaika ao bantu.​—Luk. 22:28, 43.

16. Babibuza ba kisinka kunti batukwasia siani tukile kumupalama Yehova?

¹⁶ Eba, uli wanoonkelamo mu bupe butupeelue na Yehova bwa babibuza ba kisinka? Kine twamubuila kibuza weetu bintu bili byatwemia, te kulanda nangue tuli batope; kukita evio kunti kwatusuunga. Mona vyalanda James utwazimbulanga ntaanzi: “Kukita bukibuza buweeme pamo ni Bakristu bakosele kimupasi kwaankwasiizie saana. Musita malanga abiipile luali angemia, babo babibuza bakindeeme bali bantuilizia kabili bali bandangulusia nangue bantonene. Musita ubali bakita evio, ndi nainika nangue Yehova antonene kabili ali wangemena.” Kakiine, ni kintu kya mana saana kukuzia ni kusuunga bukibuza bwetu pamo ni balupua ni bankazi ba kimupasi!

17-18. Tupalile kumutuilizia uni, kabili juu ya ki?

¹⁷ Sataana atonene tulekele kwikwinda kukita biweeme. Atonene tuzumine nangue Yehova tatutonene kabili nangue takaba kutupususia paantu te tupalile. Inzi, nga vitwamona, bobo ni bufi.

¹⁸ Yehova akutonene. Uli muntu wa mana saana kuli Weene. Kine wamunakila nga vikitile Yesu, wakaba ‘kwikalilila mu kutona kwakue’ loonse. (Yoan. 15:10) Pakaako, te kumutuilizia Sataana ao kutuilizia mutima obe uli wakulanda nangue Yehova takutonene. Inzi, mutuilizie Yehova, olia ali wamona bintu biweeme mu kila umo weetu. Uye wali ni kisinka nangue “ali wasekelela mu bantu bakue,” ni weewe kumo!