1. Ka nyi Yehova ka a nenge a mi ken ior nava?

BIBILO kaa ér, “ior mba TER ve doo Un ishima.” (2 Kron. 2:11) Kwagh ne ka kwagh u nan se msaanyol kpen kpen! Yehova ka a nenge a aeren a ase a dedoo la shi ka a fa injaor i se fatyô u hingir la kpaa, shi a wase se u yan ijende a na. Aluer se za hemen u civir un sha mimi yô, un kpa una lu a vese kôôsôô gbem sha won!—Yoh. 6:44.

2. Er nan ka i taver mbagen kpishi u lumun ér ve doo Yehova ishima?

² Alaghga mbagenev vea kaa ér, ‘M fa Yehova soo ior nav jimin cii, kpa me er nan ve me lu a vangertiôr mer mo kpa m doo Yehova ishima?’ Ka nyi ia na alaghga or a pine mpin nee? Anmgbian u kwase ugen u i yer un ér Oksana, * u yange ya ican kpishi sha ci u afer a ior mbagen shighe u lu iyev la yô kaa ér: “Shighe u m er batisema shi m hii u eren pania la, yange saan mo iyol kpishi. Kpa anyom nga kar er 15 nahan yô, m hii u umbur akaa a vihin a yange erem shighe u m lu wanye la. Maa m kure ikyaa mer Yehova una tsa a lumun mo ga, shi m kera kuma u me doo un ishima kpaa ga.” Anmgbian u kwase ugen u a eren pania, u un kpa yange ya ican kpishi shighe u lu iyev la yô, mba yer un ér Yua. A kaa ér: “Yange m tsegha iyol yam sha ci u Yehova sha ci u m soo mer me na i saan un iyol. Kpa m na jighjigh a ishima i môm mer a tsa kpa me doo un ishima ga.”

3. Ka nyi se lu henen ken ngeren nee?

³ We kpa Yehova doo u ishima er anmgbianev mba kasev mba uhar mba se er kwagh ve la nahan. Kpa alaghga a taver we u lumun wer u doo un ishima er ve kpa lu nahan. Er nan ve i doo u u lu a vangertiôr wer kwagh wou gba Aôndo ishima sha mimi? Man ka nyi ia wase u shighe u i lu u inja er u kera doo Yehova ishima ga laa? De se nenge ase nen mbamlumun mba i ne sha mbampin mban yô.

4. Aluer se mba tan akperan ser se kera doo Yehova ishima ga yô, kwagh la ka kwaghbo sha ci u nyi?

⁴ Dooshima ngu a tahav kpen kpen. Aluer se mba a vangertiôr ser se doo Yehova ishima shi ngu suen yô, kwagh la una mgbegha se u civir un a ishima yase i môm aluer sea tagher a mbamtaver nan nan kpaa. Nahan kpa, aluer se mba a akperan ser Aôndo wa se ikyo ga yô, “agee [ase aa] vese ga.” (Anz. 24:10) Nahan shighe u iyol i kpe se shi se nenge ser se doo Aôndo ishima ga yô, se kera lu a agee a hendan a Satan ga.—Ef. 6:16.

5. Anmgbianev mba nomso man mba kasev mbagen yange ve hen ér ve doo Aôndo ishima ga nahan lu nyi i er ve?

⁵ Anmgbianev asev mbanomso man mbakasev mbagenev yange ve hii u nengen ér ve kera doo Yehova ishima ga, shi we ve ikyo kpaa ga, nahan kwagh la na jighjigh ve kera taver ga. Ortamen ugen u i yer un ér James yô kaa ér: “Er m eren tom shin Betel shi m lu ken tiônnongo u a eren mkombo ken zwa ugen shi kwaghpasen ka a maam iyol nahan kpa, yange m shi lun a akperan mer, shin saan Yehova iyol a tom u m eren un ne je kpaa-o? Hen shighe ugen la je yô, m va hii u pinen mer Yehova shi ongo mbamsen av je kpa?” Anmgbian u kwase ugen u un kpa a eren tom shin Betel, i yer iti na ér Eva yô kaa ér: “M nenge mer ka wea henen wer u doo Yehova ishima ga yô, kwagh la a na iyol i kpe u sha hanma kwagh u u lu eren u civir un cii. Kwagh la ka a na i lu u ape den akaa a u eren u civir Aôndo la, shi i kera saan we iyol u civir un kpaa ga.” Anmgbian ugen u a lu pania shi a lu ortamen kpaa i yer un ér Michael yô kaa ér: “Aluer u na jighjigh wer kwagh wou gba Aôndo ishima ga yô, u kua u kar ihyongo, u kera lu kôôsôô a na ga.”

6. Shighe u se hii u lun a akperan ken ishima ser se doo Aôndo ishima ga yô, ka nyi i gbe u se ere?

⁶ Kwagh u anmgbianev mban ne tese er ka sea hii u henen ser se kera doo Yehova ishima ga ve, jighjigh wase a kera taver ga yô. Kpa ka nyi i doo u se er shighe u se hii u henen ser, se kera doo Yehova ishima ga laa? Doo u se dugh kwagh la ken ishima yase kera fele. Sôn Yehova a wase u dugh “mbamhen” mbara ken ishima you kera, gema iv ishima you a ‘bem u Aôndo u a hembe hanma mkav la sha er una kura ishima you kua mbamhen ou’ yô. (Ps. 139:23; Fil. 4:6, 7) Shi fa wer u ngu tswen ga. Anmgbianev mba nomso man mba kasev mbagenev kpa ashighe agen ka ve hen kwagh dang sha imba gbenda la nahan. Mbacivir Yehova mba sha ayange a tsuaa la kpa, ashighe agen yange ve hen kwagh nahan. Nenge  ase kwagh u se fatyô u henen ken ikyav i apostoli Paulu la.

7. Ka mbamzeyol mba nyi Paulu yange tagher a mi?

⁷ Ashighe agen ka i lu u er u ngu a ityom kpishi i eren shi ka taver we u eren hanma kwagh u i gbe u u er yôô? Aluer ka nahan yô, u lan er Paulu kpa lu un la ga. Yange ishima nyian un sha kwagh u anmgbianev mba ken tiônnongo môm tsô ga, kpa lu anmgbianev mba ken “atôônanongo cii.” (2 Kor. 11:23-28) U gba icôronuange i i ne i kera saan we iyol ga yôô? Paulu kpa yange lu a kwagh u zaan un iyol hanma shighe yô, lu “asaa [u] ken iyol.” Alaghga tsô asaa ne lu ma kwaghnyoon u zaan un iyol shi sar un tsung u kwaghnyoon shon ma a bee kera yô. (2 Kor. 12:7-10) Iyol ka i kpe u sha ci u mbamyen ou wee? Paulu kpa ashighe agen yange i lu un nahan. Er Paulu nôngon a mbamyen nav hanma shighe shi a nôngon kpoghuloo ér una er kwagh u vough yô, a kaa ér, “aye, kwagh tserem” ve!—Rom. 7:21-24.

8. Ka nyi yange i wase Paulu u wan ishima a mbamzeyol mba tagher a mi laa?

⁸ Er Paulu tagher a akaa a karen jighjigh na kposo kposo kua akaa a nan un iyolkpen nahan kpa, a za hemen u civir Yehova her. Yange zua a agee a eren kwagh ne hana? Er Paulu fa mbamyen nav tsembelee nahan kpa, yange na nagh ku ipaan kura jighjigh taveraa. Paulu yange fa ityendezwa i Yesu er ér, “hanma or u nan ne un [Yesu] jighjigh cii nana̱ . . . zua a uma u tsôron” la. (Yoh. 3:16; Rom. 6:23) Paulu yange na nagh ku ipaan kura jighjigh. Yange lu a vangertiôr ér Yehova kegh a kegh iyol u den mba ve er asorabo a vesen je kpaa kwaghbo, aluer ve gema ishima sha mimi yô.—Ps. 86:5.

9. Ka nyi se fatyô u henen ken mkaanem ma Paulu ma i nger ken Mbagalatia 2:20 laa?

⁹ Paulu shi yange na jighjigh ér un doo Aôndo ishima kpishi sha ci u yange tindi Yesu ér a va kpe sha ci na. (Ôr Mbagalatia 2:20.) Nenge ase mkaanem ma taver ishima ma Paulu ôr ken mkur u ivur shon ne la. A kaa ér: “Wan u Aôndo . . . u yange m doo un ishima shi na uma na sha ci wam la.” Paulu yange nenge ér un vihi je gande u una doo Aôndo ishima shin yange hen ér, ‘M nenge a ityôkyaa i anmgbianev av vea doo Aôndo ishima yô, kpa mo yô, mayange me doo un ishima ga ze.’ Paulu yange umbur Mbaroma ér: “Er se lu mbaasorabo her la je, Kristu kpe sha ci wase.” (Rom. 5:8) Se doo Aôndo ishima a ikighir shio!

10. Ka nyi se hen ken Mbaroma 8:38, 39?

¹⁰ Ôr Mbaroma 8:38, 39. Paulu yange fa er se doo Aôndo ishima tsung yô. Yange nger ér kwagh môm “una yange Aôndo u tesen se dooshima”  ga. Paulu yange fa er Yehova wa ishima a ikyurior i Iserael yô. Shi yange fa er Yehova zungwe un mhôônom yô. Se fatyô u ôron mkaanem ma Paulu man sha gbenda ugen ser Paulu lu kaan ér, ‘Er Yehova tindi Wan na va kpe sha ci wam yô, ityôkyaa ngi i me ta akperan mer m doo un ishima ga ze.’—Rom. 8:32.

11. Er Paulu er asorabo kua a i ter ken 1 Timoteu 1:12-15 la nahan kpa, er nan ve lu a vangertiôr ér un doo Aôndo ishima?

¹¹ Ôr 1 Timoteu 1:12-15. Alaghga tsô ashighe agen ishima yange i za Paulu iyol sha akaabo a yange er cii ve va hingir Orkristu la. Ka nahan ve i kera kpiligh se iyol er hii ve kaa ér, ken mbaasorabo cii ka un, un hembe lun “orisholibo” la ga ye. Cii ve Paulu a va fa mimi yô, yange tôvon Mbakristu a ican, a mough hen gar la a yem hen ugen, a wa mbagenev ken purusu. Shi zum u atejir una kuren ikyaa ér i za wua Mbakristu mban mbagenev yô, un kpa a lumun. (Aer. 26:10, 11) Hen ase er alaghga Paulu yange una va nenge a Orkristu ugen u nan lu gumor u yange un lumun i wua mbamaren mba nan ve, a lu un yô. Paulu yange vaa afanyô kpishi sha akaa a yange er ken ijime la, kpa fa wang ér una fatyô u geman akaa a a er a kar la ga. Yange na jighjigh ér Kristu kpe sha ci na shi a nger ér: “Aôndo tesem erdoo u sha mhôôn ve m lu kwagh u m lu ne ye.” (1 Kor. 15:3, 10) Kwagh ne tese se nyi? Gba u u na jighjigh wer Kristu yange kpe sha ci wou nahan a bugh u u gbenda u yan ijende a Yehova kôôsôô. (Aer. 3:19) Kwagh u kwagh a gbe Aôndo sha mi yô, ka kwagh u se eren hegen shi se va er ken hemen la, ka akaa a yange se er ken ijime la ga, aluer ka shighe u yange se va hingir Mbashiada mba Yehova shin se lu a fa mimi ga la je kpaa.—Yes. 1:18.

12. Shighe u se nenge ser se gba kwagh ga shin se vihi gande u se doo Aôndo ishima yô, mkaanem ma i nger ken 1 Yohane 3:19, 20 la ma a wase se nena?

¹² Aluer u hen er Yesu yange kpe sha u cirin asorabo a ou yô, alaghga u kaa wer, ‘M kuma u ma a er kwagh a mo sha icivir nahan ga.’ Er nan  ve alaghga u hen nahana? Alaghga ishima yase i i yen ne ia tsugh se, nahan se yem henen ser se gba kwagh ga, shin se vihi gande u se doo Aôndo ishima. (Ôr 1 Yohane 3:19, 20.) Zum u se hii u henen kwagh nahan yô, doo u se umbur ser “Aôndo hemba ishima yase.” Aluer se hen ser se doo Yehova ishima ga, shin una de se a kwaghbo ga kpa, Ter wase u sha la yô se doo un ishima her shi una de se a kwaghbo wase. Doo u se nôngo tsung se lu a vangertiôr ser se doo Yehova ishima. Nahan kwagh u una wase se u lun a vangertiôr la yô, saa se henen Mkaanem nam hanma shighe shi se eren msen shi se kohol imôngo vea ior nav mba ve civir un sha mimi la hanma shighe cii. Er nan ve i gbe hange hange u se eren akaa nee?

13. Ka sea henen Mkaanem ma Aôndo yô, kwagh la a wase se nena? (Nenge ngeren u kiriki u a lu a itinekwagh ér “Er Mkaanem ma Aôndo Wase Ve La.”)

¹³ Henen Mkaanem ma Aôndo hanma iyange, nahan u lu fan aeren a Yehova a doon tsung la seer a seer. U kav er u doo un ishima kpishi yô. Aluer u ngu ôron Mkaanem ma Aôndo hanma iyange shi henen sha mi zulee yô, kwagh la una wase u u hemba henen kwagh sha inja, nahan “sôron akaa a i er shami ga” la ken mhen wou man ken ishima you. (2 Tim. 3:16) Ortamen ugen u i yer un ér Kevin, u yange a nenge ér un gba kwagh ga yô kaa ér: “Yange m ôr Pasalmi 103 nahan kwagh la wasem u sôron mhen wam shi kaven er Yehova a nengen mo la.” Eva u se vande ôron kwagh na la di kaa ér: “Hanma aikighe yô, ka m tôô shighe m hen sha gbenda u Yehova a nengen akaa la. Kwagh la ka a na m zua a bemshima shi jighjigh wam a seer taver.”

14. Msen una fatyô u wasen se nena?

¹⁴ Eren msen hanma shighe. (1 Tes. 5:17) Ka wea soo u yan ijende a or yô, u lamen vea nan hanma shighe, shi u ôron nan er ishima i lu u ker la. Ijende yase vea Yehova kpa kape i lu vough je la. Ka sea pasen un ishima yase man mbamhen asev kua akaa a nyian se ishima la ken msen yô, se tese ser se na un jighjigh shi se mba a vangertiôr ser se doo un ishima. (Ps. 94:17-19; 1 Yoh. 5:14, 15) Yua u se vande ôron kwagh na la kaa ér: “Ka mea eren msen yô, ka akaa a a erem ken iyange la tseegh ka m ôr Yehova ga, ka m ôr un kwagh u m lu henen la man er ishima i lum ker la vindi vindi. Kwagh la na yô, hegen ne m nengen Yehova inja er ka orvesen u hen kômpeni ga, kpa ka Ter u mbayev nav ve doo un ishima sha mimi shi a we ve ikyo yô.”—Nenge ngeren u kiriki u a lu a itinekwagh ér “ U Ôr U Kpa?” la.

15. Yehova tese ér kwagh wase gba un ishima nena?

¹⁵ Luun imôngo vea azende a mimi, gadia azende a mimi ka iyua i Yehova a ne se yô. (Yak. 1:17) Ter wase u sha la tese ér kwagh wase gba un ishima sha u nan se anmgbianev mba nomso man mba kasev mba se civir un a ve imôngo shi ve tesen hanma shighe ér se ‘doo ve ishima’ yô. (Anz. 17:17) Apostoli Paulu yange ter ati a Mbakristu mbagen mba ve wase un yô, ken washika  u nger hen Mbakolose la. A kaa ér yange ve hingir mba nan un “msurshima kpishi.” (Kol. 4:10, 11) Yesu Kristu je kpa yange lumun iwasen i azende a na, mbatyomov man uumace na un la, shi wuese i kpaa.—Luka 22:28, 43.

16. Azende a mimi aa fatyô u wasen se u seer kporom ikyua a Yehova nena?

¹⁶ We u keren iwasen hen azende a ou a ken tiônnongo shi ka vea na u iwasen yô, u lumun kpa? Shighe u se lam a ma ijende yase i i vie ken jijingi sha mbamzeyol asev yô, ngula tese ér jighjigh wase taver ga ze, kpa kwagh la una gema a kura se. Nenge ase kwagh u James u se vande teren kwagh na la a ôr ne. A kaa ér: “Yange m kôr azende vea Mbakristu mba vian ken jijingi nahan kwagh la wasem kpen kpen. Yange mbamhen mba shami ga mban vea hiin u van mo ken ishima yô, azende am a injaa ne a wa ishima a kegh ato a mo shi ve kaa a mo ér m doo ve ishima. Vea eren a mo nahan yô, kwagh la a wasem u fan er m doo Yehova ishima shi a wem ikyo yô.” Sha mimi yô, gba hange hange u se ya ijende kôôsôô vea anmgbian asev mbanomso man mbakasev mba se civir Yehova imôngo la.

17-18. Ka ana i doo u se na nan jighjigh, man ka sha ci u nyi?

¹⁷ Satan soo ér se de u nôngon ser se er kwagh u vough. A soo ér se na jighjigh ser se doo Yehova ishima ga shi se kuma u una yima se ga. Kpa er se nenge nahan, kwagh la cii ka aie cica.

¹⁸ U doo Yehova ishima. U gba un kwagh je gande. Aluer u ngu ungwan imo na yô, u “[za] hemen u doon un ishima” gbem sha won er Yesu nahan. (Yoh. 15:10) Sha nahan yô, de ne Satan jighjigh ga shi de keghen ato a ishima you i ka i shi sha u nan we ibo ér u doo Yehova ishima ga la ze. Ungwan imo i Yehova u a nengen a akaa a dedoo ken hanma wase la. Lu a vangertiôr wer, “ior mba Ter ve doo un ishima” kua we kpaa!