1. Ginani egi Jehovha a gitigo khu vathu vaye?

JEHOVHA NUNGUNGULU “a ngu tsakiswa khu vathu vaye.” (Ndzi. 149:4) Guti isoso si ngu hi tsakisa ngudzu. Jehovha a nguti makhalelo yathu, ati makodzelo yathu nigu a ngu hi phasa gu khala dzipari dzaye. Ha gu simama hi tumbega ga Jehovha uye a na khala pari yathu kala gupindruga. — Joh. 6:44.

2. Khu ginani vambe si va garadzeyago gu khodwa gu khavo Jehovha a ngu va haladza?

² Vambe adzina va nga khavo: ‘Nyi ngu dziti gu kheni Jehovha a ngu haladza vathu vaye kha nga tsawa, ganiolu nyi nga dziti kharini gu kheni a ngu nyi haladza?’ Khu ginani vathu va kanakanago? Oksana * a tshanganidego ni sigaradzo na ngari gyanana wari khuye: “Hwane nyo ba nyi bhabhatisidwe nyi tsakide ngudzu nigu nyi di pheya gu thuma kha nga piyonero. Ganiolu, na gu vbindride 15 myaga, nyi di pheya gu dundrugeya khu silo nya mba sadi si nga nyi dugeleya na nyi ngari gyanana. Isoso si nyi giride nyi pimisa gu kheni kha nyi tsakedwi gambe khu Jehovha nigu kha nyi yedwi gu haladzwa khuye.” Yua, ndriyathu moyo nya nyamayi a gu piyonero, a tshanganidego nuye ni sigaradzo na ngari gyanana wari khuye: “Eni nyi di hendzeledza womi wangu ga Jehovha kholu nyi di gu vbweta gu mu tsakisa. Ganiolu, nyi di gu tiyisega gu kheni Jehovha gima kha na nga nyi haladza.”

3. Ginani hi na hevbulago avba nya ndrima yeyi?

³ Gu fana ni vandriyathu vava nya vavili nya vanyamayi, si nga gira uwe na wu mu haladza ngudzu Jehovha, ganiolu u si tiyisegi gu khuwe uye a ngu gu haladza. Avba nya ndrima yeyi hi na hlamula siwudziso sivili. Nyo pheye, khu ginani u yedego gu tiyisega  gu khuwe Jehovha a ngu gu haladza? Nya wuvili, ginani gi nga gu phasago tepo u pheyago gu pimisa gu khuwe Jehovha kha gu haladzi?

4. Khu ginani si gu na ni mhango gu pheya gu kanakaneya lihaladzo la Jehovha?

⁴ Lihaladzo tshivba yi hi kutsago gu gira silo. Gu tiyisega gu khethu Jehovha a ngu hi haladza ni gu hi seketeya, sa gu hi kutsa gu mu thumeya khu monyo wathu watshavbo ambari na hi gu tshangana ni sigaradzo. Ganiolu, ha gu mba tiyisega gu khethu Nungungulu a ngu khathala khethu, ha gu yeyedza gu khethu ‘kha ha tiya.’ (Mav. 24:10) Nigu ha gu pheya gu pimisa gu khethu Nungungulu kha hi haladzi, si na vbevbuga gu thegeya umo nya milaphwi ya Sathane. — Efes. 6:16.

5. Ginani gi dugeledego vandriyathu nyo khaguri va nga kanakaneya lihaladzo la Jehovha?

⁵ Gu kanakana gu giride vambe vandriyathu va vbeledwa khu gukhodwa. Lidhota limwedo nyo pwane khu James lari khilo: “Nyi di gu thumeya Bheteli nigu nyi di gu phasedzeya ga libandla gu ganedwago lidimi nya estranjeru, ganiolu, nyi di pheya gu pimisa gu kheni ina Jehovha a ngu tsakiswa khu thumo nyi mu gireyago! Nyi di vboha avba nya gu nyi pimisa gu kheni ina Jehovha a ngu engisa milombelo yangu!” Eva a gomogo nuye omu nya thumo nya tepo yatshavbo wari khuye: “Nyi hevbude gu kheni si ni na ni mhango gu pimisa gu khethu Jehovha kha hi haladzi, kholu isoso sa gu khuha ni gevbini u girago thumoni wa Jehovha nigu si nga gu gira u vbungula sighingi thumoni wa Jehovha u bwe u vbeledwa khu litsako.” Michael a gu piyonero nya tepo yatshavbo, a thumago kha nga lidhota wari khuye: “Wa gu pimisa gu khuwe Nungungulu kha khathali khuwe si na gu gira u mu tsukula.”

6. Ha gu pheya gu kanakana gu khethu Jehovha a ngu hi haladza ginani hi yedego gu gira?

⁶ Matshango yaya ma gu yeyedza edzi gukhodwa gwathu gu nga khuhwago khidzo ha gu pheya gu kanakaneya lihaladzo la Jehovha. Ganiolu, ha gu pheya gu pimisa khu ndziya yeyi ginani hi yedego gu gira? Hi yede gu dzegeya gu ghwawula mapimo yoyo. Lomba Jehovha gasi a gu phasa gu tshikedza mapimo yoyo nya guvivbe ‘khu gurula ga Nungungulu gu na sayisago monyo wago ni mapimo yago.’ (Ps. 139:23; Filp. 4:6, 7) Dundruga gu khuwe kha wuri wenga, vambe vandriyathu navo va ngu emisana ni mapimo yaya nya guvivbe. Gudzega ni sithumi sa Jehovha sa gale si emisanide ni sigaradzo soso.  Wona egi hi nga gi hevbulago khu giyeyedzo gya mupostoli Pawulo.

7. Sigaradzo muni esi Pawulo a emisanidego naso?

⁷ Ina dzimbe dzitepo u ngu dzi wona na wu taledwe khu mithumo nyo bwe u pimisa gu khuwe khu na nga si kodza gu yi khathaleya yatshavbo? Abari gu ina, khu lisine u na gi pwisisa gwadi giemo gya Pawulo. Pawulo a di gu garadzega nasiri basi khu libandla limwedo, ganiolu khu “mabandla yatshavbo.” (2 Kor. 11:23-28) Ina u na ni sigaradzo nya madwali si gu duseyago gutsaka? Pawulo a diri ni gigaradzo nya “muba givilini,” adzina saye a gu madwali ma nga ba ma mu tshanisa ngudzu. Pawulo a di gu vbweta ngudzu gu khuye gigaradzo gegi gi vbindra. (2 Kor. 12:7-10) Ina dzimbe dzitepo u ngu vbeya tshivba khu kotani nya gu mba vbeleya gwago? Pawulo dzimbe dzitepo a di gu dzipwa kharato. Uye ganede gu khuye “libango langu likhongolo” kholu tepo yatshavbo a di gu dwana gasi gu gira silo nya sadi. — Rom. 7:21-24.

8. Ginani gi phasidego Pawulo gu timiseya sigaradzo?

⁸ Ambari olu Pawulo a emisanidego ni sigaradzo satshavbo sesi, uye simamide gu thumeya Jehovha. Yi manide hayi tshivba nyo gire isoso? Ambari olu a nga ba a dziti gu khuye a ngu hegedwa, uye a diri ni gu khodwa nyo tiye avba nya dzegiso. Uye a di gu giti gitumbiso gya Jesu nya gu khigyo ‘ni wevbi a khodwago ga [Jesu] a na mana guvbanya nya gupindruge.’ (Joh. 3:16; Rom. 6:23) Khu lisine, Pawulo a di gu khodwa avba nya dzegiso. Pawulo a di gu tiyisega gu khuye Jehovha a dzi emisede gu divaleya ambari vale va giridego sihoso nya sikhongolo, ganiolu, va dzi layidego. — Ndzi. 86:5.

9. Ginani hi gi hevbulago avba nya malito ya Pawulo ma gomogo omu ga Vagalatiya 2:20?

⁹ Pawulo a di gu khodwa gu khuye Nungungulu a ngu mu haladza kholu a di gu dziti gu khuye Nungungulu rumede Jesu gasi a ta mu feya. (Leri Vagalatiya 2:20.) Wona malito nyo tiyise ya Pawulo mahegiso nya livhesi leli: ‘Mwamana wa Nungungulu a nyi haladzide gu kala a ningeya guvbanya gwaye khu kotani yangu.’ Pawulo kha nga ba a pimisa gu khuye lihaladzo la Nungungulu la gu hegeya avba nya vathu nyo khaguri basi nyo kala a ganeya gu khuye ‘si ngu vbevbuga gu wona gu kheni khu ginani Jehovha a haladzago vandriyangu, ganiolu gima kha na nga si kodza gu nyi haladza.’ Pawulo dundrugiside Varoma gu khuye: ‘Kristo a hi fede na hiri sighohi.’ (Rom. 5:8) Gimwalo gi nga tandregisago Nungungulu gu hi haladza.

10. Ginani hi gi hevbulago omu ga Varoma 8:38, 39?

¹⁰ Leri Varoma 8:38, 39. Pawulo a di gu tiyisega  gu khuye lihaladzo la Nungungulu li khongolo ngudzu. Uye lovide khuye gimwalo gi na si kodzago “gu hi hambanisa ni lihaladzo la Nungungulu.” Pawulo a di gu dziti gu khuye Jehovha laphisede monyo vana Israyeli nigu a di gu dundruga gambe edzi Jehovha a va yeyedzidego khidzo wuhindzi. Malito aya Pawulo a lovedego Varoma hi nga ma ganeya khu ndziya yeyi: ‘Kha nga olu Jehovha a rumedego Gyanana gyaye gasi gi ta nyi feya, kha nyi yeli gu kanakana gu kheni uye a ngu nyi haladza.’— Rom. 8:32.

11. Ambari hwane nyo gire sihoso si khumbugwago omu ga 1 Thimoti 1:12-15, khu ginani Pawulo a nga ba a tiyisega gu khuye Jehovha a ngu mu haladza?

¹¹ Leri 1 Thimoti 1:12-15. Adzina Pawulo a di gu garadzega khesi a giridego gale na si gu khali Mukristo. Uye ganede gu khuye “eni kheni gighohi gyakone nya guphele.” Pawulo na si gu hevbuli lisine, a di gu wugeya Makristo madhoropani gwatshavbo, a ma khotheya a bwe a ruma gu khuye mambe ma songwa. (Mith. 26:10, 11) Nga dundrugeya nari khatshi Pawulo a di manana ni lidzaha nya Mukristo li nga tshala nya mba na vavelegi khu kotani yaye! Khu lisine na si mu garadzide ngudzu. Pawulo a di dzi layide khesi a giridego, ganiolu, uye a diri mwalo makodzelo nyo vbindrugedze esi si nga girega. Uye basi a di gu tiyisega gu khuye Kristo fude khu kotani yaye. Pawulo lovide gu khuye: “Khu wuhigo wa Nungungulu nyi womo kha nga idzo nyi gu idzo.” (1 Kor. 15:3, 10) Ginani hi gi hevbulago? Dzumeya gu khuwe Kristo fude khu kotani yago nigu giride gu u manega ni wupari nyo tiye ni Jehovha. (Mith. 3:19) Adzina u ngu dzipwa nandru khu sihoso u giridego na wu si khali Fakazi mwendro hwane nyo khale Fakazi, ganiolu, dundruga gu khuwe Jehovha a gu vega gupima avba nya esi hi girago muhuno ni ga esi hi na girago mindru wa tshigu nasiri ga esi hi giridego gale. — Isa. 1:18.

12. Malito ma gomogo omu ga 1 Johane 3:19, 20, ma nga hi phasa kharini ha gu dzipwa na hi si phasi gilo mwendro na hi si yedwi khu gu haladzwa?

 ¹² Tepo u pimisago gu khuwe Jesu fude gasi gu divaledwa sihoso sago adzina u nga khuwe: ‘Ne, kha nyi yedwi khu giningwa gegi nya lisima.’ Khu ginani adzina u nga dzipwago kharato? Monyo wathu nya mba vbeleya adzina wu nga hi senga, wu hi gira hi pimisa gu khethu kha hiri va gilo mwendro kha hi yedwi gu haladzwa. (Leri 1 Johane 3:19, 20.) Ha gu pheya gu dzipwa khu ndziya yeyi hi yede gu dundruga gu khethu “Nungungulu khongolo guvbindra myonyo yathu.” Lihaladzo eli Papayi wathu wa ndzadzini a gu nalo khethu ni gu dzi emiseya gwaye gu hi divaleya si na ni tshivba ngudzu guvbindra gudzipwa gwathu. Gu vbwetega hi tiyisega gu khethu Jehovha a ngu hi haladza. Gasi hi si kodza gu gira isoso, hi yede gu hevbula Lito la Nungungulu tshigu ni tshigu, hi gombeya gwaye tepo yatshavbo hi bwe hi dzi tshanganisa ni vandriyathu. Khu ginani gu gira isoso si gu na ni lisima?

13. Gu hevbula Bhibhiliya si nga hi phasa kharini? (Wona gambe kwadru yi gu khiyo: “ Edzi Lito la Nungungulu li va phasidego khidzo.”)

¹³ Hebvula Bhibhiliya tshigu ni tshigu, khu kharato u na si kodza guti makhalelo nya yadi ya Jehovha. U na pwisisa gu khuwe uye a ngu gu haladza. Gu dundrugeya khu lowo nyo khaguri tshigu ni tshigu, si na gu phasa gu lulamisa mipimiso yago, “gu luleka” silo mapimoni gwago ni monyoni gwago. (2 Thimoti 3:16) Lidhota limwedo nyo pwani khu Kevin, li nga emisana ni gu dzipwa na li si phasi gilo lari khilo: “Gu leri ni gu dundrugeya khu ndzimo 103, si nyi phaside gu lulamisa mapimiselo yangu ni gu pwisisa esi Jehovha a pimisago kheni.” Eva hi ganedego khuye gu pheyani wari khuye: “Guvbeyani nya litshigu nyo dzi ninga tepo nyo dundrugeye khesi si gu na ni lisima mahoni ga Jehovha. Nigu isoso si ngu nyi phasa gu mana gurula ni gu engedzeya gu khodwa gwangu.”

14. Nombelo wu nga hi phasa kharini?

¹⁴ Gombeya tepo yatshavbo. (1 Tes. 5:17) Ha gu vbweta gu manega ni wupari nyo tiye ni muthu nyo khaguri gu vbwetega hi bhula naye tepo yatshavbo hi mu embeya edzi hi dzipwago khidzo. Khiso sa simweso si giregago ni wupari wathu ni Jehovha. Tepo hi gombeyago ga Jehovha hi mu embeya esi hi si pimisago, edzi hi dzipwago khidzo ni sigaradzo sathu ha gu yeyedza gu khethu hi ngu mu tumba nigu hi ngu dziti gu khethu a ngu hi haladza. (Ndzi. 94:17-19; 1 Joh. 5:14, 15) Yua hi ganedego khuye gupheyani wari khuye: “Tepo nyi gombeyago ga Jehovha kha nyi mu embedzeyi basi esi si nga nyi giregeya litshigu lolo, ganiolu nya gu mu tuleya monyo wangu nyi mu embeya edzi nyi dzipwago khidzo. Vbadugwana-vbadugwana nyo hevbuleya gu wona Jehovha nasiri kha nga muthangeyi nya koponi, ganiolu kha nga Papayi a haladzago  sanana saye.” — Wona kwadru yi gu khiyo: “ U leride libhuku leli?”

15. Jehovha a gu yeyedza kharini gu khuye a ngu khatala khu moyo ni moyo wathu?

¹⁵ Dzitshanganise ni vandriyathu; avo giningwa gi tago khiyo ga Jehovha. (Jak. 1:17) Papayi wathu wa ndzadzini a ngu yeyedza gu khuye a ngu khatala khu moyo ni moyo wathu khu gu hi ninga vandriyathu libandlani ava va yeyedzago lihaladzo “gikhati gyatshavbo.” (Mav. 17:17) Omu nya lidangaliya a lovedego Vakolosi, Pawulo ganede khu Makristo nyo khaguri ma nga mu phasa. Uye ganede gu khuye avo vadi nyi “phasedzela ngudzu.” (Kol. 4:10, 11) Ambari Jesu vbwetide giphaso gya dzipari dzaye nya nga dzingilozi ni vathu nigu uye tsakide khu giphaso gyawe. — Luka 22:28, 43.

16. Vandriyathu va nga hi phasa kharini gu manega ni wupari nyo tiye ni Jehovha?

¹⁶ Ina u ngu dzumeya giphaso gya dzipari dzago libandlani? Gu bhuleya ndriyathu a vidzidwego khu liphuvboni sigaradzo sathu kha si thuli gu khiso gu khodwa gwathu kha ga tiya. Wulangani nya isoso, iso si na hi vhikeya. Wona esi James hi ganedego khuye gupheyani a ganeyago. Uye wari khuye: “Gu manega ni wupari ni vandriyathu va vidzidwego khu liphuvboni si ngu nyi phasa ngudzu. Tepo mipimiso nya mba yadi yi nyi vbedzago tshivba, dzipari dzedzi nyo hathege dzi ngu nyi engiseya khu gu laphisa monyo dzi bwe dzi nyi embeya gu khidzo dzi ngu nyi haladza. Tepo dzi girago isoso, nya gu tiyisega gu kheni Jehovha a ngu nyi haladza nigu a ngu khatala kheni.” Khu lisine, si na ni lisima gu manega ni wupari nyo tiye ni vandriyathu.

17-18. Khu mani hi yedego gu mu engisa nigu khu ginani?

¹⁷ Sathane a gu vbweta gu gu wona na wu tsukula gu dwaneya gu gira silo nya sadi. Uye a gu vbweta gu khuye u khodwa gu khuwe Jehovha kha gu haladzi nigu kha wuri wa gilo gasi gu Jehovha a gu vbulugisa. Ganiolu kha nga hi si wonidego, satshavbo soso malipha nya makhongolo.

¹⁸ Jehovha a ngu gu haladza ngudzu. U na ni lisima mahoni gwaye. Wa gu mu engisa u na ‘simama lihaladzoni laye’ kala gupindruga gu fana ni Jesu. (Joh. 15:10) U nga engisi Sathane mwendro monyo wago tepo wu zamago gu gu gira u dzipwa khatshi kha wuri muthu nya wadi. Wulangani nya isoso, engisa Jehovha oyu a wonago silo nya sadi ga moyo ni moyo wathu. Tiyisega gu khuwe Jehovha “a ngu tsakiswa khu vathu vaye” gu pata ni uwe.