1. ¿Tuku kuenta tlawa Jehová akxni akxilha xkachikin?

¡LU KINKAMAKGAPAXUWAYAN akxni katsiyaw pi «Jehová makgapaxuwa tuku tlawa xkachikin»! (Sal. 149:4). Xla akxilha xalaktlan kintayatkan, akxilha tuku tlan tlawayaw chu xʼamigos kinkalimaxtuyan. Komo ni namakgatsankgananiyaw xla ankgalhin lakatsu nakinkatawilaniyan (Juan 6:44).

2. ¿Tuku xlakata makgapitsi natalan tuwa makgkatsikgo nakanajlakgo pi Jehová kapaxki?

² Max wi tiku nalakpuwan: «Akit kkatsi pi Jehová paxki xkachikin, pero ¿la nakkatsi pi na kimpaxki?». ¿Tuku xlakata makgapitsi natalan chuna lakpuwankgo? Kaʼakxilhwi tuku wan Oksana, * tiku tuwa titaxtulh akxni stakli, xla wan: «Akxni ktamunulh, precursora klitaxtulh, lu xakpaxuwa uma kilhtamaku. Pero 15 kata alistalh tsukulh min kkintalakapastakni tuku tuwa xaktitaxtunit. Klakpuwa pi nialh xakmakgapaxuwa Jehová chu pi ni xkilakgchan nakimpaxki». Chatum precursora tiku wanikan Yua, tiku na tuwa titaxtulh akxni stakli, kinkawaniyan: «Kmakamaxkilh kilatamat Jehová xlakata xakmakgapaxuwaputun, pero liwana xakkatsi pi xla nikxni xʼama kimpaxki».

3. ¿Tuku takgalhskinin nakgalhtiyaw kʼuma artículo?

³ Chuna la umakgolh chatiy natalan, max akinin na lu paxkiyaw Jehová, pero tuwa makgkatsiyaw nakanajlayaw pi xla kinkapaxkiyan. Kʼuma artículo nakgalhtiyaw umakgolh akgtiy takgalhskinin: ¿tuku xlakata kilikanajlatkan pi xla kinkapaxkiyan? chu ¿tuku tlan natlawayaw akxni nalakpuwanaw pi xla ni kinkapaxkiyan?

4. ¿Tuku xlakata nitlan kitaxtu akxni lakpuwankan pi Jehová ni kinkapaxkiyan?

⁴ Komo kanajlayaw pi Jehová kinkapaxkiyan, nakinkamakgpuwantiniyan nalakskujnaniyaw chuna la matlaniyaw, maski  tuwa tuku natitaxtuyaw kkilatamatkan. Pero komo ni kanajlayaw pi xla kinkapaxkiyan, “ni katikgalhiw litliwakga” (Prov. 24:10). Komo nataxlajwaniyaw chu natsukuyaw lakpuwanaw pi Jehová ni kinkapaxkiyan, Satanás lakapala tuku nakinkatlawaniyaw (Efes. 6:16).

5. ¿Tuku titaxtukgonit makgapitsi natalan tiku xlakpuwankgo pi Dios ni xkapaxki?

⁵ Makgapitsi natalan tiku ni makgatsankgananikgo Dios tsukukgonit lakpuwankgo pi Jehová ni kapaxki chu wa xlakata xtakanajlakan taxlajwaninit. Chatum kgolotsin tiku wanikan James, wan: «Maski xaklakskuja kBetel chu xaklipaxuwa la akxtum xakkatalichuwinan Dios natalan tiku xchuwinankgo atanu tachuwin, xaklakpuwan pi Jehová ni xmakgamakglhtinan tuku xaktlawa. Milh kilhtamaku ktsukulh lakpuwan pi Jehová ni xkgaxmata kiʼoraciones». Eva, tiku na lakskujnani Dios putum kilhtamaku, kinkalitachuwinanan: «Kkatsilh pi lu nitlan kitaxtu lakpuwankan pi Jehová ni kinkapaxkiyan xlakata uma tlawa pi nialh nakgalhiyaw litliwakga chu tapaxuwan xlakata nalakskujnaniyaw». Chu Michael, tiku precursor regular chu kgolotsin, wan: «Komo ni kanajlaya pi Dios lilakgaputsayan, tsinu tsinu natsukuya tamakgatliniya».

6. ¿Tuku tlan natlawayaw akxni nalakpuwanaw pi Dios ni kinkapaxkiyan?

⁶ Tuku wankgo umakgolh kinatalankan kinkamasiyaniyan pi lu nitlan kitaxtu akxni lakpuwankan pi Dios ni kinkapaxkiyan. ¿Tuku tlan natlawayaw akxni chuna nalakpuwanaw? Tunkun natamakxtuyaw kkintalakapastaknikan uma nitlan talakapastakni. Kaskiniw Jehová pi kakinkamaxkin takaksni chu pi kakuentajtlawalh kinakujkan chu kintalakapastaknikan xlakata nialh lu nalakgaputsayaw (Sal. 139:23; nota; Filip. 4:6, 7). Chu ni kapatsankgaw pi lhuwa natalan tiku ni makgxtakgkgo Dios nachuna titaxtumakgo. Asta makgapitsi xlakskujnin Dios xala makgasa nachuna makgkatsikgolh. Kaʼakxilhwi tuku tlan nakatsiniyaw xlakata xliʼakxilhtit apóstol Pablo.

7. ¿Tuku tuwa xtitaxtuma Pablo?

⁷ ¿Lhuwa talakgatay kgalhiyaw chu min kilhtamaku makgkatsiyaw pi nialhla makgantaxtiyaw? Nachuna makgkatsilh apóstol Pablo. Xla wa pi ni kaj akgtum congregación xlilakgaputsama, wata putum congregaciones (2 Cor. 11:23-28). ¿Kgalhiyaw akgtum tajatat nema ni kgalhi xalikuchu chu tlawa pi nialh  napaxuwayaw? Pablo lu xlakgaputsama xlakata nila xmapanu “lhtukun kxmakni”, max akgtum tajatat (2 Cor. 12:7-10). ¿Makgkatsiyaw pi taxlajwaniyaw xlakata makglakgalhinanin akinin chu tlawayaw tuku nitlan? Milh kilhtamaku, Pablo nachuna makgkatsilh. Wa pi lu nitlan xmakgkatsi xlakata ankgalhin lu xliskujat xwanit xlakata namakgantaxti tuku xatlan (Rom. 7:21-24).

8. ¿Tuku makgtayalh Pablo chuntiya naskujnani Jehová maski tuwa tuku xtitaxtuma?

⁸ Maski lhuwa tuku nitlan titaxtulh, Pablo chuntiya skujnanilh Jehová. ¿Niku tiyalh litliwakga? Maski liwana xkatsi tuku nitlan xtlawa, lu xkanajlani talakgmaxtut. Nachuna, liwana xkanajlani tamalaknun nema tlawalh Jesús xlakata putum tiku nalimasiya pi kanajlani nakgalhi latamat nema ni kgalhi xlisputni (Juan 3:16; Rom. 6:23). Liwana tasiya pi Pablo xlikana xkanajlani talakgmaxtut. Liwana xkatsi pi Jehová katapatiputun tiku tlawakgonit akgtum lanka talakgalhin komo nitlan nalimakgkatsikgo chu nialh natlawakgo tuku nitlan tlawakgolh (Sal. 86:5).

9. ¿Tuku kinkamasiyaniyan xtachuwin Pablo nema talhkatawilanit kʼGálatas 2:20?

⁹ Pablo xkatsi pi Dios lu xpaxki xlakata xkatsi pi xmalakgachanit xKgawasa, Jesús, xlakata nani xpalakata. Kaʼakxilhwi tachuwin nema tlan mamakgkatsininan chu min kxlisputni Gálatas 2:20 (kalikgalhtawakga). Pablo wa: «Xkgawasa Dios, [...] kimpaxkilh chu tamakamastalh kimpalakata». Pablo ni xlakpuwan pi Dios ni lu xpaxki, xla ni xlakpuwan: «Kʼakgatekgsa tuku xlakata Jehová kapaxki kinatalan, pero akit nila kimpaxki». Chu asta kamalakapastakalh kstalaninanin Cristo xalak Roma: «Cristo nilh kimpalakatakan akxni chuntiya lakgalhinaninku xwanitaw» (Rom. 5:8). Ni anan tuku natlawa pi Dios ni nakinkapaxkiyan.

10. ¿Tuku kinkamasiyaniyan Romanos 8:38, 39?

¹⁰ (Kalikgalhtawakga Romanos 8:38, 39). Pablo liwana xkatsi tuku tlan tlawa xtapaxkit Dios. Xla tsokgwililh pi nitu katitlawalh pi Dios «nialh nakinkapaxkiyan». Xkatsi pi Jehová ni lakapala xkasitsininit kachikin Israel. Chu na xkatsi pi xlimasiyaninit talakgalhaman. Xtachuna la komo Pablo xkilhwama: «Komo Jehová malakgachalh xKgawasa xlakata nani kimpalakata, ni anan tuku natlawa pi naklakpuwan pi ni kimpaxki» (Rom. 8:32).

11. Maski Pablo xtlawanit talakgalhin chuna la lichuwinan 1 Timoteo 1:12-15, ¿tuku xlakata liwana xkatsi pi Dios xpaxki?

¹¹ (Kalikgalhtawakga 1 Timoteo 1:12-15). Xlikana pi xmin kilhtamaku Pablo lu nitlan  xlimakgkatsi tuku xtlawanit makgasa. Wa pi tlakg nixatlan makglakgalhina xlitaxtu. Akxni nina xlakgapasa xaxlikana, kaputsastalanilh kstalaninanin Cristo klakalhuwa kachikinin, kamatamaknuninalh kpulachin chu makgtayaninalh akxni kamakgnika amakgapitsin (Hech. 26:10, 11). Kalilakpuwanti komo Pablo xlakgapasli chatum kgawasa tiku kamamakgnininalh xnatlatni, tiku kstalaninanin Cristo xwankgonit. ¿La xmakgkatsilh? Pablo lu nitlan xlimakgkatsi xtalakgalhin, pero nila tuku xlakgpali. Liwana katsilh pi Cristo xninit xpalakata chu tsokgwililh uma: «Pero tlan ktlawa uma taskujut xlakata Dios kilimasiyanilh talakgalhaman nema ni anan xtachuna» (1 Cor. 15:3, 10). ¿Tuku katsiniyaw? Pi lu xlakaskinka liwana nakatsiyaw pi Cristo nilh chatunu chatunu kimpalakatakan chu tlawalh pi tlan xtalaliw Jehová (Hech. 3:19). Tuku xlakaskinka akxilha Dios, wa tuku natlawayaw la uku chu kkilhtamaku nema aku mima, chu ni wa tuku nitlan tlawaw makgasa, maski xtatayananin Jehová xwanitaw o nina (Is. 1:18).

12. Chuna la wan 1 Juan 3:19, 20, ¿tuku kilitlawatkan komo makgkatsiyaw pi nitu litaxtuyaw o pi ni lakgchan nakinkapaxkikanan?

¹² Lakgachunin kinakujkan tlan nakinkaʼakgskgawiyan chu nakinkamamakgkatsiniyan pi nitu litaxtuyaw o ni kinkalakgchanan nakinkapaxkikanan (kalikgalhtawakga 1 Juan 3:19, 20). Wa xlakata, max lakgachunin lakpuwanaw pi xtamakamastan Jesús nila tlawa pi nakinkatapatikanan kintalakgalhinkan. Akxni chuna makgkatsiyaw, kalakapastakwi pi «Dios tlakg lanka nixawa kinakujkan». Maski makgkatsiyaw pi kinTlatkan xalak akgapun ni kinkapaxkiyan chu ni kinkatapatiyan, uma ni xlikana, xla lu kinkapaxkiyan chu kinkatapatiyan. Talakaskin natlawayaw pi kinakujkan nakanajla uma. Xlakata tlan chuna natlawayaw talakaskin ankgalhin  nalikgalhtawakgayaw xTachuwin, ankgalhin natlawayaw oración chu nalimaxtuyaw kilhtamaku xlakata akxtum nakatatawilayaw kinatalankan. Kaʼakxilhwi tuku xlakata umakgolh pulaktutu lu xlakaskinka.

13. ¿La kinkamakgtayayan nalikgalhtawakgayaw xTachuwin Dios? (Na kaʼakxilhti recuadro « La kamakgtaya xTachuwin Dios»).

¹³ Kalikgalhtawakgaw xTachuwin Dios chali chali. Komo chuna natlawayaw tlakg liwana nalakgapasaw xalakstlan xtayat Jehová chu naʼakxilhaw la xlilhuwa kinkapaxkiyan. Komo nalilakapastaknanaw Biblia chali chali, uma nakinkamakgtayayan tlakg liwana nalakapastaknanaw chu lakatitum nawiliyaw tuku wi kkintalakapastaknikan chu kkinakujkan (2 Tim. 3:16). Chatum kgolotsin tiku wanikan Kevin, tiku xmakgkatsi pi nitu litaxtu, wan: «Akxni klikgalhtawakga Salmo 103 chu akxni klilakpuwan kimakgtaya putum nakakxilha chuna la xlilat chu nakʼakgatekgsa la kiʼakxilha Jehová». Eva, tiku lichuwinaw kpárrafo 5, wan: «Akgatunu katsisni klimaxtu kilhtamaku xlakata maklilakpuwan tuku xlakaskinka akxilha Jehová. Uma makaksa kinaku chu matliwakglha kintakanajla».

14. ¿La kinkamakgtayayan oración?

¹⁴ Ankgalhin katlawaw oración (1 Tes. 5:17). Xlakata wi tiku tlan natalalinaw, talakaskin liwana chu chali chali natachuwinanaw, chu uma na lu xlakaskinka xlakata tlan natalalinaw Jehová. Akxni waniyaw tuku makgkatsiyaw, tuku lakpuwanaw chu tuku lilakgaputsayaw, limasiyaniyaw pi lipawanaw chu pi katsiyaw pi xla kinkapaxkiyan (Sal. 94:17-19; 1 Juan 5:14, 15). Yua, tiku lichuwinaw kpárrafo 2, wan: «Akxni ktlawa oración, ni kaj klitachuwinan Jehová tuku ktlawalh uma kilhtamaku. Kwani putum tuku wi kkinaku chu klitachuwinan putum tuku kmakgkatsi. Ni kakxilha Jehová chuna la chatum malana tiku kskujnani, tsinu tsinu kkatsininit nakakxilha chuna la chatum tlat tiku xlikana kapaxki xlakkamanan». (Kaʼakxilhti recuadro « ¿Likgalhtawakganita?»).

15. ¿La limasiya Jehová pi kinkalilakgaputsayan kinchatunukan?

¹⁵ Akxtum kakatatawilaw kinatalankan. Xlakan litaxtukgo la akgtum xtamaskiwin Jehová (Sant. 1:17). KinTlatkan xalak akgapun kinkalimasiyaniyan pi kinkapaxkiyan xlakata kinkamaxkinitan akgtum lanka familia xaʼespiritual niku makgtapakgsikgo kinatalankan tiku kinkapaxkikgoyan putum kilhtamaku (Prov. 17:17). Anta kcarta nema kamalakgachanilh colosenses, Pablo kalichuwinalh makgapitsi kstalaninanin Cristo tiku xmakgtayakgonit chu kalichuwinalh: «Xlakan litaxtukgonit tiku tlan kimamakgkatsinikgo» (Col. 4:10, 11). Jesucristo na maklakaskilh chu paxtikatsinilh  xtamakgtaykan xʼamigos, chuna la ángeles chu latamanin (Luc. 22:28, 43).

16. ¿La kinkamakgtayakgoyan kinatalankan natalakatsuwiniyaw Jehová?

¹⁶ ¿Putsayaw chu makgamakglhtinanaw tamakgtay nema tlan kinkamaxkikgoyan natalan xalak congregación? Akxni waniyaw tuku lilakgaputsayaw chatum tala tiku tliwakga wi xtakanajla, ni kilhchanima pi ni lakgtliwakgan akinin, wata uma lu kinkamakgtayayan. Kalilakpuwaw tuku wa James, tiku lichuwinaw kpárrafo 5, xla wan: «Lu kimakgtayanit chuna la kkatalalin natalan tiku tliwakga kgalhikgo xtakanajlakan. Akxni ni tlan kmakgkatsi, umakgolh kiʼamigos liwana kinkgaxmatnikgo chu kimalakapastakakgo pi kimpaxkikgo. Xlakata tuku xlakan tlawakgo, kmakgkatsi pi Jehová kimpaxki chu kililakgaputsa». ¡Lu xlakaskinka pi nakgalhiyaw laktlan amigos anta kcongregación!

17, 18. ¿Tiku nakgaxmatniyaw, chu tuku xlakata?

¹⁷ Satanás lakaskin pi kataxlajwaniw chu pi nialh katlawaw tuku tlan. Lakaskin kalakpuwaw pi Jehová ni kinkapaxkiyan chu lakpuwan pi ni kinkalakgchanan nalakgtaxtuyaw. Pero chuna la akxilhnitaw, uma ni xlikana.

¹⁸ Jehová kinkapaxkiyan chu lu xtapalh kinkaʼakxilhan chatunu akinin. Komo nakgalhakgaxmataw, putum kilhtamaku natamakgxtakgaw kxtapaxkit, chuna la Jesús (Juan 15:10). Wa xlakata, ni kuenta katlawaniw Satanás chu kinakujkan akxni nakinkamalakpuwanikgoyan pi Jehová ni kinkapaxkiyan. Wata wa kakgaxmatniw Jehová, tiku akxilha tuku tlan tlawayaw kinchatunukan. Kakanajlaw pi xla «makgapaxuwa tuku tlawa xkachikin», chu wix na makgapaxuwaya.