1. Jehova i lukim wanem samting long lain bilong em?

GOD “JEHOVA i save amamas long ol manmeri bilong em.” (Sng. 149:4) Dispela tok i mekim gut bel bilong yumi, a? Jehova i luksave long ol gutpela pasin bilong yumi na em i luksave olsem yumi inap kamap gutpela man o meri na em i bringim yumi i go klostu long em. Sapos yumi stap gut long em, em bai stap klostu long yumi inap oltaim oltaim!—Jon 6:44.

2. Wai na sampela i pilim hatwok long bilip olsem Jehova i laikim ol?

² Sampela inap tok, ‘Mi save olsem Jehova i laikim ol manmeri bilong em olsem wanpela lain, tasol hau na mi ken save olsem em i laikim mi wanpela?’ Wanem samting inap kirapim wanpela long mekim kain askim olsem? Oksana * husat i bin karim planti hevi tru taim em i liklik, em i tok: “Mi amamas tru taim mi kisim baptais na mi stat long mekim wok painia. Tasol 15 yia bihain, mi stat long tingim gen ol samting nogut i bin painim mi taim mi liklik. Na mi pilim olsem Jehova i no orait long mi na em i no laikim mi moa.” Yua, wanpela painia sista, em tu i bin karim planti hevi taim em i liklik, em i tok: “Mi dediketim laip bilong mi long Jehova, bikos mi laik amamasim em. Tasol mi pilim olsem Jehova i no inap tru long laikim mi.”

3. Long dispela atikol, yumi bai stori long wanem samting?

³ Wankain olsem ol Kristen em yumi stori long ol, yu laikim tru Jehova, tasol nogut yu gat tupela tingting olsem em i no laikim yu. Wai na yu ken bilip tru olsem God i laikim yu tru? Wanem samting i ken helpim yu taim yu gat tupela tingting olsem God i no laikim yu? Yumi ken kisim bekim bilong ol dispela askim.

4. Wai na yumi no ken gat tupela tingting long laikim bilong Jehova?

⁴ Pasin laikim i gat bikpela strong tru. Sapos yumi bilip tru olsem  Jehova i laikim yumi na sambai long yumi, dispela bai kirapim yumi long givim bel olgeta long lotuim Jehova, maski wanem ol hevi i painim yumi. Sapos yumi gat tupela tingting olsem God i no laikim yumi, dispela bai mekim na “strong bilong [yumi] bai pinis.” (Prov. 24:10) Taim yumi bel hevi na yumi no bilip moa olsem God i laikim yumi, em bai isi long Satan i daunim yumi.—Efe. 6:16.

5. Sampela i gat tupela tingting olsem God i no laikim ol na dispela i mekim wanem long ol?

⁵ Pasin bilong i gat tupela tingting i bin pundaunim sampela gutpela Kristen long taim bilong yumi. Wanpela elda nem bilong em James, em i tok: “Mi wok long Betel na mi amamas long wok autim tok wantaim wanpela kongrigesen i save mekim narapela tokples, tasol mi save tingting olsem Jehova i amamas long wok mi mekim o nogat. Wanpela taim mi askim mi yet olsem, ‘Jehova i save harim beten bilong mi o nogat?’” Eva, em tu i insait long fultaim sevis, em i tok: “Mi luksave olsem pasin bilong i gat tupela tingting long laikim bilong Jehova inap nogutim yumi. Dispela inap pinisim amamas bilong yumi na i pasim yumi long mekim wok bilong Jehova.” Michael em wanpela painia oltaim na em mekim wok elda, em i tok: “Sapos yu no bilip olsem God i laikim yu, yu bai trip i go longwe tru long em.”

6. Yumi mas mekim wanem taim yumi holim tupela tingting long laikim bilong God?

⁶ Ol dispela ekspiriens i soim klia olsem pasin bilong i gat tupela tingting olsem God i no laikim yumi, dispela inap pundaunim bilip bilong yumi. Yumi mas mekim wanem taim yumi gat tupela tingting olsem God i no laikim yumi? Wantu tasol yumi mas sakim dispela tingting! Beten askim Jehova long helpim yu long daunim ol samting yu “tingting planti long en” na bai em i givim yu “bel isi bilong God” long lukautim bel na tingting bilong yu. (Sng. 139:23; Fili. 4:6, 7) Tingim, yu no stap wanpis. Ol narapela brata na sista, ol tu i save bel hevi wankain olsem yu. Na ol wokman bilong Jehova long pastaim tu, ol tu i karim wankain hevi olsem yu. Yumi ken stori long wanem skul yumi inap kisim long eksampel bilong aposel Pol.

7. Pol i bungim wanem ol hevi?

⁷ Olsem wanem? Sampela taim yu pilim olsem yu gat planti wok bilong mekim na yu hatwok long pinisim olgeta dispela wok? Sapos olsem, orait yu bai kliagut long samting Pol i  pilim. Pol i save “wari long ol kongrigesen.” (2 Kor. 11:23-28) Olsem wanem? Yu gat wanpela sik longpela taim na dispela i pinisim amamas bilong yu? Pol i gat wanpela sik i stap longpela taim, na i olsem “nil i sutim skin” bilong em na em i gat laik tru long dispela sik i mas pinis. (2 Kor. 12:7-10) Olsem wanem? Ol pasin kranki bilong yu yet i mekim yu bel hevi? Sampela taim, Pol tu i pilim wankain samting. Oltaim em i wok strong long daunim ol pasin kranki bilong em yet, dispela i mekim na em i “pilim nogut tru.”—Rom 7:21-24.

8. Wanem samting i helpim Pol long karim ol hevi bilong em?

⁸ Maski Pol i karim planti hevi, em i wok yet long mekim wok bilong Jehova. Wanem samting i strongim em long mekim olsem? Em i save olsem em i wanpela sinman, tasol em i gat strongpela bilip long pe bilong baim bek man. Na tu, em i save long tok promis bilong Jisas olsem “olgeta man husat i bilip long [Jisas] ol inap . . . kisim laip oltaim.” (Jon 3:16; Rom 6:23) Pol em wanpela bilong ol man i bilip long pe bilong baim bek man. Em i bilip tru olsem Jehova i redi long fogivim ol man i mekim bikpela sin taim ol i tanim bel tru.—Sng. 86:5.

9. Yumi kisim wanem skul long tok bilong Pol i stap long Galesia 2:20?

⁹ Pol i bilip tru olsem God i laikim em bikos em save olsem God i salim Jisas i kam dai bilong baim bek em. (Ritim Galesia 2:20.) Lukim dispela naispela tok i stap long pinis bilong dispela ves. Pol i tok: “Pikinini Bilong God . . . i bin laikim mi tumas na givim em yet bilong helpim mi.” Pol i no ting em i man nogut na God i no inap laikim em, na tu, em i no kisim tingting kranki olsem: ‘Mi save God i laikim tru ol bratasista bilong mi, tasol em i no inap tru laikim mi.’ Pol i tokim ol Kristen long Rom olsem: “Krais i dai bilong helpim yumi taim yumi stap sinman yet.” (Rom 5:8) I no gat wanpela samting inap tekewe yumi long pasin laikim bilong God!

10. Yumi kisim wanem skul long tok bilong Rom 8:38, 39?

¹⁰ Ritim Rom 8:38, 39. Pol i bilip tru olsem pasin laikim bilong God i gat bikpela strong. Pol i tok i no gat wanpela samting “inap tekewe yumi long pasin laikim bilong God.” Pol i save olsem Jehova i no bin les kwik long lain Israel. Na em i save tu olsem Jehova i bin mekim pasin marimari long em. So Pol i laik tok olsem, ‘Jehova i bin salim Pikinini bilong em i kam dai bilong helpim mi, so mi no ken gat tupela tingting olsem em i no laikim mi.’—Rom 8:32.

11. Wan Timoti 1:12-15 i stori long ol sin Pol i bin mekim, so wai na em i bilip tru olsem God i laikim em?

 ¹¹ Ritim 1 Timoti 1:12-15. Ating sampela taim Pol i save bel hevi taim em i tingim ol samting em i bin mekim paslain long em i kamap Kristen. Olsem na yumi no kirap nogut olsem em i kolim em yet olsem “mi man tru bilong mekim sin winim olgeta arapela sinman”! Paslain long Pol i kisim save long tok i tru, em i save mekim nogut tru long ol Kristen—putim sampela long kalabus, na sampela em i tok orait long kilim ol i dai. (Apo. 26:10, 11) Tingim samting Pol bai pilim sapos em i bungim wanpela yangpela Kristen we em i bin givim tok orait long kilim papamama bilong em. Pol i sori tru long ol rong em i bin mekim bipo, tasol em i save em i no inap senisim ol samting i kamap pinis. Em i bilip tru olsem Jisas i dai bilong helpim em, na em i tok: “Long rot bilong bikpela pasin helpim bilong God mi kisim dispela wok.” (1 Kor. 15:3, 10) Yumi inap kisim wanem skul long em? Yu mas bilip tru olsem Jisas i dai bilong helpim yu na dispela i opim rot long yu inap pas gut moa wantaim Jehova. (Apo. 3:19) Bikpela samting long tingting bilong God em ol samting yumi mekim nau na ol samting yumi bai mekim long bihain. Na em i no tingim ol popaia yumi bin mekim long bipo, maski yumi bin stap wanpela Witnes bilong Jehova long dispela taim o nogat.—Ais. 1:18.

12. Olsem wanem tok bilong 1 Jon 3:19, 20 i ken helpim yumi taim yumi pilim olsem yumi no gutpela inap long God i ken laikim yumi?

¹² Taim yu tingim olsem Jisas i dai bilong helpim yu, nogut yu kisim tingting olsem, ‘Mi no gutpela inap long God i ken mekim olsem long mi.’ Wai na yu inap kisim kain tingting olsem? Yumi no gutpela olgeta, olsem na bel bilong yumi inap giamanim yumi olsem yumi no gutpela inap long God i ken laikim yumi. (Ritim 1 Jon 3:19, 20.) Long kain taim olsem, yumi  mas kisim tingting olsem “God i winim tru bel bilong yumi.” Pasin laikim bilong Papa bilong yumi long heven na pasin bilong em long fogivim yumi, i gat bikpela strong moa na inap helpim yumi long daunim ol tingting kranki bilong yumi. Yumi mas lain long bilip olsem Jehova i laikim yumi. Bilong mekim olsem, yumi mas stadi long Baibel, beten oltaim, na oltaim bung wantaim ol manmeri bilong em. Wai na em i bikpela samting long mekim ol dispela samting?

13. Taim yumi stadi long Baibel, dispela inap helpim yumi olsem wanem? (Lukim blok “ Hau Tok Bilong God i Helpim Ol.”)

¹³ Stadi long Baibel long olgeta de, na bai yu inap lukim klia ol gutpela pasin bilong Jehova. Yu bai kliagut olsem em i laikim yu tru. Taim yu tingim tingim ol tok bilong Baibel long olgeta de, dispela inap kliaim tingting bilong yu na “mekim ol samting i kamap stret” long bel na tingting bilong yu. (2 Tim. 3:16) Wanpela elda, nem bilong em Kevin, oltaim em i save pilim olsem em no gutpela tumas, em i tok: “Mi save ritim Buk Song 103 na tingim tingim long bel ol tok bilong en, na dispela i helpim mi long stretim tingting bilong mi, na helpim mi long holim wankain tingting olsem Jehova i gat long mi.” Eva em yumi stori pinis long em i tok: “Long pinis bilong de, mi save stap isi na tingim tingim long bel ol tingting bilong Jehova. Dispela i save givim bel isi long mi na strongim bilip bilong mi.”

14. Olsem wanem beten inap helpim yumi?

¹⁴ Beten oltaim. (1 Tes. 5:17) Bilong stap pren tru bilong wanpela, oltaim yumi mas toktok wantaim em na kamapim bel na tingting bilong yumi. Dispela i wankain long pasin pren bilong yumi wantaim Jehova. Taim yumi beten na kamapim bel, tingting, na ol wari bilong yumi long Jehova, yumi soim olsem yumi bilip long em na yumi save em i laikim yumi. (Sng. 94:17-19; 1 Jon 5:14, 15) Yua em yumi stori pinis long em i tok: “Taim mi beten long Jehova, mi save tokim em long ol samting i kamap long dispela de, na i no dispela tasol. Mi save kamapim tru bel na tingting bilong mi long em. Isi isi mi wok long tingim Jehova olsem wanpela Papa i laikim tru ol pikinini bilong em, na i no olsem wanpela bos bilong kampani.”—Lukim blok “ Yu Bin Ritim Pinis?”

15. Long wanem rot Jehova i soim olsem em i tingim tru yumi wan wan?

¹⁵ Bung wantaim ol pren tru, em ol i presen i kam long Jehova. (Jems 1:17) Papa bilong yumi long heven i soim olsem em i tingim tru yumi na em i givim bikpela lain famili em ol bratasista bilong yumi na ol i save “soim pasin laikim long olgeta taim.” (Prov. 17:17) Long pas Pol i raitim long ol Kristen long Kolosi, em i kolim nem bilong sampela Kristen em ol i bin sapotim em na “ol i stap olsem helpim bilong strongim [em].” (Kol. 4:10, 11) Na Krais Jisas  tu i amamas long helpim em i kisim long ol pren bilong em—em ol ensel na ol man long graun.—Luk 22:28, 43.

16. Olsem wanem ol pren tru inap helpim yumi long go klostu long Jehova?

¹⁶ Yu save askim na kisim helpim long presen i kam long Jehova—em ol pren tru insait long kongrigesen? Taim yumi kamapim bel na tingting bilong yumi long wanpela pren i gat strongpela bilip, dispela i no makim olsem yumi sot long bilip, nogat, em bilong helpim yumi. James em yumi stori pinis long em i tok: “Pasin bilong poroman gut wantaim ol strongpela Kristen i bin helpim mi tru. Taim bel hevi i daunim mi tru, ol dispela pren tru i save putim gut yau long mi na ol i no save les kwik long mi na ol i tokim mi olsem ol i laikim mi. Taim ol i mekim olsem, mi pilim olsem Jehova i laikim mi na tingim mi tru.” Em i bikpela samting long yumi pas gut wantaim ol bratasista Kristen bilong yumi na strongim pasin pren namel long yumi.

17-18. Yumi mas harim tok bilong husat, na bilong wanem?

¹⁷ Satan i laik bai yumi stop long bihainim stretpela pasin. Em i laik bai yumi ting olsem Jehova i no laikim yumi na yumi no gutpela inap long em bai kisim bek yumi. Olsem yumi skelim long dispela atikol, dispela tok em i no tru.

¹⁸ Jehova i laikim yu tru. Na yu dia tumas long ai bilong em. Sapos yu bihainim ol lo bilong em, yu bai “stap insait yet long pasin laikim” bilong em, olsem Jisas i stap. (Jon 15:10) So no ken harim tok bilong Satan na no ken larim bel bilong yu yet i giamanim yu, nogat. Harim tok bilong Jehova, em i save lukim ol gutpela pasin bilong yu. Yu ken bilip tru olsem Jehova i save “amamas long ol manmeri bilong em” na em i amamas long yu tu.