1. Zvini lezvi Jehovha a zvi wonako ka vanhu vakwe?

JEHOVHA NUNGUNGULU ‘wa va randza a vanhu vakwe’. (2 Kro. 2:11) A  zvo ku tsakisa a ku tiva lezvo! Jehovha wa ma wona matshamela ya hina ya ma nene, ni wumunhu ga gi nene legi zvi kotekako ku hi va nago a tlhela a hi vhuna ku hiva vanghana vakwe. Loku hi simama ku tsumbeka ka yena, hi tava vanghana vakwe kala kupindzuka! — Joh. 6:44.

2. Hikuyini a vokari va kalako va nga kholwi ku Jehovha wa va randza?

² A vokari va nga ti byela lezvi: ‘Ndza zvi tiva ku Jehovha wa va randza futsi a vanhu vakwe kota ntlawa. Kanilezvi a ngaza a ya randza mina; ndzova mani ye mina?’ Cini ci nga mahako ku a munhu a ti zwisa lezvo? Suzana *, a xanisekileko nguvhu na a ha hi n’wanana, i wula lezvi: “Ndzi tsakile nguvhu a cikhati ndzi nga bhabhatiswa ndzi teka wuphayona. Kanilezvi, loku ku hundzile 15 wa malembe, ndzi no sangula ku xaniseka hi ku alakanya lezvi zvi nga ndzi humelela na ndza hi n’wanana. Ndzi sangula ku ti byela ku Jehovha a nga ha xalali hi mina ne a nga ha ndzi randzi.” A phayona go kari ga ku hi Yuna, loyi yenawu xanisekileko nguvhu wun’wananeni gakwe, i wula lezvi: “A cikhati ndzi nga ti nyikela ka Jehovha ndzi wa zvi tiva ku i tsakile. Kanilezvi, ndzi wa ti byela ku a nga ta tshuka a ndzi randza.”

3. Zvini hi to gondza ka ndzima leyi?

³ A ku fana ni vamakabye lava va vambiri, wenawu wa mu randza Jehovha hi mbilu yontlhe. Kanilezvi, zva koteka ku na u kanakana ku yenawu wa ku randza. Makunu ka ndzima leyi, hi ta tiva ku hikuyini u faneleko ku kholwa ku wa ku randza? Kona cini  ci to ku vhuna loku u ti zwisa ku Jehovha a nga ku randzi? A hi kumeni mihlamulo ya kona.

4. Hikuyini zvi kalako zvi nga hi zvi nene a ku kanakana lezvaku Jehovha wa hi randza?

⁴ A lirandzo la nyika ntamu li tlhela li kuca. Loku hi kholwa lezvaku Jehovha wa hi randza a tlhela a hi vhuna, zvi ta hi nyika ntamu wa ku mu tirela hi mbilu yontlhe hambu loku hi kumana ni zvikarato. Kanilezvi, loku hi kanakana ku Jehovha wa khatala hi hina, ‘a ntamu wa [hina wu tava] wu tsongwani’. (Mav. 24:10) Loku hi mbhela ntamu hi tlhela hi nga kholwi ku Jehovha wa hi randza, zvi ta olova nguvhu a ku Sathani a hi phasa. — Efe. 6:16.

5. Zvini zvi nga humelela vokari va nga kanakana ku Jehovha wa va randza?

⁵ A maKristu yo kari masikwini ya hina ma sangulile ku kanakana lezvaku Jehovha wa ma randza, a kukholwa kabye ku hunguleka. A dhota go kari ga ku hi Jakobe gi wula lezvi: “Hambu lezvi ndzi nga tira Bheteli ndzi tlhela ndzi xalala hi ku chumayela ni bandla ga lirimi la tiko gin’wani, ndzi wa ti wutisa ku xana Jehovha wa ku nyika lisima a kutikarata ka mina ke. Ndzi zile ndzi chikela ku ti byela ku Jehovha a nga ingiseli mikhongelo ya mina.” Ivone, loyi yenawu a nga ntirweni wa cikhati contlhe, i wulile lezvi: “Ndzi polile ku a ku kanakana lezvaku Jehovha wa ku randza a hi zvi nene hakuva zvi wonhetela zvontlhe u mahako ntirweni wakwe. U swihala ni kuga zvakuga zva moya u tlhela u nga ha kumi litsako ntirweni wa Jehovha.” Moniz, a nga phayona ga cikhati contlhe tlhelo dhota, i wula lezvi: “Loku u kanakana ku Jehovha wa ku randza, basi, u mu tsikile.”

6. Zvini hi faneleko ku maha loku hi telwa hi maalakanyo ya lezvaku Nungungulu a nga hi randzi?

⁶ A matshango lawa ma komba lezvi a ku kanakana lezvaku Jehovha wa hi randza zvi nga wonhisako zvona a kukholwa ka hina. Kanilezvi zvini hi faneleko ku maha loku hi telwa hi maalakanyo ya lezvaku Jehovha a nga hi randzi? Hi fanele ku ma hlongola hi kuhakisa! Kombela Jehovha kasi a ku vhuna ku vhaleta a “maalakanyo lawo ya hava” hi ‘kurula ka Nungungulu loku ku to hlayisa a mbilu ya wena ni ku pima ka wena’. (Lis. 139:23; Filp. 4:6, 7) Alakanya lezvaku a hi wena wece u lwako ni maalakanyo lawo. Ku na ni vamakabye van’wani vo tsumbeka va lwako ni ku tizwa ka hava. Hambu malandza ya Jehovha ya cikhati ci hundzileko ma kumene ni zvikarato zva tshamela lego. Wona lezvi hi nga gondzako ka cikombiso Mupostoli Pawule.

7. Zvikarato muni lezvi Pawule a nga lwisana nazvo?

⁷ Wa tshuka u ti zwisa ku u ni mitiro yo tala ku hundza hloko ya wena laha ka ku u nga zvi koti ku yi khatalela yontlhe? Loku zvi hi lezvo, u ta zvi zwisisa lezvi Pawule a nga ti zwisa zvona. I wa karatekela vamakabye. I wa nga karatekeli vamakabye va bandla gin’we basi, kanilezvi i wa karatekela vamakabye va “mabandla wontlhe”. (2 Kor. 11:23-28) Wa tolovela ku mbhela litsako hi kota ya mababyi yo kala ma nga hundzi ke? Pawule yenawu i wa xanisiwa hi “muzwa nyameni” wo kala ku hundza, lowu zvi nge khwatsi ma wa hi mababyi yo kari, lawa a nga zvi lava nguvhu a ku ma hundza. (2 Kor. 12:7-10) Wa tshuka u mbhela ntamu hi kota ya zvihoxo zva wena? Pawule yenawu i wa tshuka a ti zwisa lezvo. Hi kota ya lezvi zvi nga mu karatela ku maha zva zvi nene, i zile aku “a khombo ga mina vasan’wina!” — Rom. 7:21-24.

8. Cini ci nga vhuna Pawule a ku lwisana ni zvikarato zvakwe?

⁸ Hambu lezvi Pawule a nga kumana ni zviringo zvo tala a tlhela a lwisana ni zvikarato zvo tala, a nga tsikangi ku tirela Jehovha. I wu kumile kwihi a ntamu wa kona? Hambu lezvi a nga zvi tiva khwatsi a zvihoxo zvakwe, i wa kholwa ka hakhelo ya kutlhatlhisa hi mbilu yontlhe. I wa zvi tiva lezvi Jesu a nga tsumbisa zvaku “ni wihi loyi a kholwako kakwe . . . [i ta] kuma wutomi ga pindzukelwa”. (Joh. 3:16; Rom. 6:23) Pawule i wa hi mun’we wa lava va kholwako ka hakhelo ya kutlhatlhisa. I wa kholwa hi mbilu yontlhe lezvaku Jehovha i longile ku tsetselela hambu lava va nga wonha zva hombe nguvhu loku va ti sola. — Lis. 86:5.

9. Hi gondza yini ka lezvi Pawule a nga wula ka Va Le Galatiya 2:20?

⁹ Pawule kambe i wa kholwa lezvaku Nungungulu wa mu randza nguvhu hakuva i wa zvi tiva ku i rumele N’wana wakwe Jesu a ta fela yena. (Lera Va Le Galatiya 2:20.) Hi nga wona magezu yo tiyisa ma nga magumo ka Va Le Galatiya 2:20. Pawule i te: A ‘N’wana wa Nungungulu, . . . [i] ndzi randzile aza a ti nyikela hi kota ya mina.’ Pawule a nga ti byelangi ku i bihile laha ka kuza Nungungulu a nga mu randzi, kuzvilava a ti byela lezvi: ‘Ndza zvi tiva ku Jehovha wa va randza vamakabye va mina. Kanilezvi mina a nge ndzi randzi.’ I alakanyisile vamakabye va le Roma, aku: “Na ha hi vawonhi, Kristu i no hi fela.” (Rom. 5:8) A ku na leci ci nga vhalelako ku Nungungulu a hi randza!

10. Hi gondza yini ka Va Le Roma 8:38, 39?

¹⁰ Lera Va Le Roma 8:38, 39. Pawule i wa kholwa ku a lirandzo la Nungungulu hi hina la hombe nguvhu. I te a ku na nchumu ci to “zvi  kota ku hi hambanisa ni lirandzo la Nungungulu”. I wa li tiva a lihlazva-mbilu la hombe leli Jehovha a nga kombisa ka vaIzrayeli. I wa gi tiva wuxinji ga hombe legi Jehovha a nga mu mahela kambe. Makunu, hi nga zvi wulisa ku Pawule i te: ‘Lezvi Jehovha a ngaza a rumela N’wana wakwe a ta fela mina, cini ca ha ndzi kanakanisako a ku wa ndzi randza ke?’ — Rom. 8:32.

11. Hambu lezvi Pawule a nga maha zviwonho zvo kota lezvi zvi kumbukiwako ka 1 Timote 1:12-15, hikuyini a nga tiyiseka lezvaku Nungungulu wa mu randza?

¹¹ Lera 1 Timote 1:12-15. Pawule i wa tshuka a karateka nguvhu loku a alakanyela lezvi a nga maha na a nga seva muKristu. I ti vitanile ku “muwonhi wa hombe ku hundza vontlhe”, niku zva zwala a kuva a ti zwisile lezvo! Na a nga seva muKristu, Pawule i hlongolisele maKristu yi nga chayi. A ma hlota ka dhoropa ni dhoropa, a yokari a ma vhalelisa paxweni, a man’wani a seketela ku a ma dawe. (Miti. 26:10, 11) U alakanya ku Pawule i wa ti zwisa kuyini loku a tshuka a tlhangana ni muswa wo kari, loyi a vapswali vakwe va nga dawa hi kota ya yena? I wa tizwa nandzu hi zviwonho zvakwe. Kanilezvi, i wa zvi tiva ku lezvi zvi nga hundza, zvi hundzile. I wa kholwa ku Jesu i fele yena, a tsala na a nga kanakani, aku: “Hi kota ya tipswalo ta Nungungulu ndzi lezvi ndzi nga zvona.” (1 Kor. 15:3, 10) Hi gondza yini? Kholwa lezvaku Jesu i fele wena a tlhela a vhulula ndlela ya ku wena uva ni wunghana ga hombe na Jehovha. (Miti. 3:19) A ca lisima ka Jehovha hi lezvi hi mahako zvezvi, ni lezvi hi to zvi maha; a nga na mhaka ni zvihoxo lezvi hi zvi mahileko kale, kani hi wa va hi Vakustumunyu va Jehovha ka cikhati leco kutani ne. — Isa. 1:18.

12. 1 Johani 3:19, 20 a nga hi vhunisa kuyini loku hi tizwa na hi nga vhuni nchumu kutani loku hi tizwa na zvi nga ringani a ku hi randziwa?

¹² Loku u alakanya lezvaku Jesu i file kasi ku susa zviwonho zva wena, u nga tshuka u ti byela lezvi: ‘Ye mina! Ndzova mani mina a kuza Jesu  a fela mina?’ Cini ci nga mahako ku u ti zwisa lezvo? A mbilu ya hina yo kala ku mbhelela yi nga hi kalavela, hi tizwa na hi nga vhuni nchumu kutani zvi nga ringani a ku hi randziwa. (Lera 1 Johani 3:19, 20.) Loku hi ti zwisa lezvo, zvi lava ku hi ti alakanyisa lezvaku “Nungungulu wa hombe a ku hundza timbilu ta hina”. Hambu loku hi ti kalavela hi ku Jehovha a nga hi randzi niku a nga ta hi tsetselela, yena wa hi randza niku i ta hi tsetselela zvi mbhela. Zvo lava ku hi ti kholwisa basi lezvaku Jehovha wa hi randza. Hi nga maha lezvo hi ku gondza a Mhaka yakwe, hi khongela ni ku ti tlhanganisa ni vamakabye, zvontlhe lezvo hi zvi maha hi kukhandzakanya. Hikuyini zvi nga zva lisima a ku maha lezvo?

13. U nga vhunekisa kuyini hi ku gondza Mhaka ya Nungungulu? (Wona ni kwadru “ Lezvi va vhunekisako zvona hi ku gondza Mhaka ya Nungungulu.”)

¹³ Gondza Bhibhiliya siku ni siku, lezvo zvi ta maha ku uya u ma zwisisa khwatsi a matshamela ya ma nene lawa Jehovha a nga nawo. U ta zvi zwisisa ku wa ku randza nguvhu. Loku u ehleketa hi Mhaka ya Nungungulu siku ni siku, zvi ta ku vhuna ku u wona zvilo hi ndlela ya yi nene, u ‘lulameta’ mawonela ni mbilu ya wena. (2 Tim. 3:16) A dhota go kari ga ku hi Kevin, loyi yenawu a xanisekako hi ku ti wonela hasi, i wula lezvi: “A ku lera Lisimu 103 ndzi tlhela ndzi ehleketa hi lona, zva ndzi vhuna ku cica mawonela ya mina ndzi zvi zwisisa khwatsi lezvi Jehovha a ndzi wonisako zvona.” Ivone, loyi hi mu kumbukileko, i wula lezvi: “Loku ndziya kuetleleni, ndzi ti nyika cikhati ca ku ehleketa hi lezvi Jehovha a ti zwisako zvona. Lezvo zvi ndzi nyika kurula zvi tlhela zvi tiyisa kukholwa ka mina.”

14. A ku khongela zvi nga hi vhunisa kuyini?

¹⁴ Khongela hi kukhandzakanya. (1 Tes. 5:17) Loku u lava kuva ni wunghana go tiya ni munhu, zvi lava ku mu bhula hi kukhandzakanya mu tlhatlhelana zvifuva. Ni wunghana ga hina na Jehovha gi lava lezvo. Loku hi khongela hi mu byela lezvi hi ti zwisako zvona, lezvi hi zvi pimisako, ni lezvi zvi hi karatako, hi komba lezvaku ha mu tsumba niku ha kholwa ku wa hi randza. (Lis. 94:17-19; 1 Joh. 5:14, 15) Yuna, loyi hi mu kumbukileko, i wula lezvi: “Loku ndzi khongela ka Jehovha, ndzi zama ku nga mu byeli lezvi zvi nga ndzi mahekela a siku lego basi. Ndzi vhulula mbilu ya mina, ndzi mu byela lezvi hakunene ndzi ti zwisako zvona. Lezvo zvi ndzi vhunile ku hi kutsongwani-kutsongwani ndzi wona Jehovha kota Papayi loyi a randzako vana vakwe hi mbilu yontlhe, na ku nga hi hosi yi rangelako koponi yo kari.” — Wona kwadru “ Wa tshuka u gi lera ke?”

15. Jehovha i kombisa kuyini lezvaku wa khatala hi hina?

¹⁵ Ti tlhanganisi ni vamakabye va hina va hi randzako. A vamakabye cinyikiwo ci tako hi ka Jehovha. (Jak. 1:17) A Papayi wa hina wa le tilweni i komba ku wa khatala hi hina hi ku hi nyika a  ngango wa vamakabye va hi ‘randzako contlhe cikhati’. (Mav. 17:17) Ka papilo legi Pawule a nga tsalela va le Kolosi, i kumbukile maKristu yo kari ma mu vhuneteleko, aku ma ‘mu tiyisa nguvhu.’ (Kol. 4:10, 11) Hambu Kristu Jesu i bongile nguvhu hi civhuno a nga nyikiwa hi vanghana vakwe — vanhu ni tingilozi. — Luka 22:28, 43.

16. A vamakabye va nga hi vhunisa kuyini ku tiyisa wunghana ga hina na Jehovha?

¹⁶ Wa kombela vamakabye lezvaku va ku vhuna ke? Ahati loku va ti nyiketa ha voce kasi va ku vhuna, wa vhumela ke? A ku ti tlhatlha cifuva ka makabye a buvhileko a zvi bihangi. Hi lisine zvi nga hi vhikela. Wona lezvi zvi wulilweko hi Jakobe, loyi hi mu kumbukileko, i te: “A ku maha wunghana ni maKristu ma buvhileko zva ndzi vhuna nguvhu. Loku ndzi sangula ku ti wona na ndzi nga vhuni nchumu, a vamakabye lava vo randzeka va ndzi ingisela hi lihlazva-mbilu va tlhela va ndzi alakanyisa lezvaku va ndzi randza. Jehovha wa va tirisa kasi ku ndzi komba ku wa ndzi randza a tlhela a khatala hi mina.” Hakunene, zva lisima nguvhu a ku hi maha wunghana go tiya ni vamakabye va hina!

17-18. Hi fanele ku ingisa mani, niku hikuyini?

¹⁷ Sathani i lava ku hiku, ‘matlhari hasi’, hi tsika kulwa kasi hi maha zva zvi nene. I lava ku u kholwa ku Jehovha a nga ku randzi u tlhela u ti wona na u hi cilo leco, ne na zvi nga ringani a ku Jehovha a ku ponisa. Kanilezvi, kota lezvi hi nga zvi wona, lawo mawunwa ya hombe nguvhu.

¹⁸ Jehovha wa ku randza. U wa lisima nguvhu ka yena. Loku u mu ingisa, u ta “tshama lirandzweni lakwe” kala kupindzuka, a ku fana na Jesu. (Joh. 15:10) Hikwalaho, u nga kholwi lezvi Sathani a wulako ne lezvi yi ku kalavelako a mbilu ya wena. Kanilezvi, ingisa Jehovha, loyi a wonako zva zvi nene ka mun’we ni mun’wani wa hina. Tiyiseka lezvaku Jehovha ‘wa va randza a vanhu vakwe’, a ku patsa na wena!