1. Мае адӟе Иегова?

 ИЕГОВАЛЭН «ӟеч эрикез Ас калыкез бордын улэ» (Пс. 149:4). Иеговалэн ужась-тыршисьёсыз туж шумпото Библиысь та кылъёсты лыдӟыны! Иегова адӟе милесьтым умой сямъёсмес, быгатонлыкъёсмес но юрттэ милемлы солэн эшъёсыз луыны. Ми солы оскымон кылимы ке, со пырак дауръёс ӵоже милемын ӵош луоз (Иоанн 6:44).

2. Малы куд-огъёсызлы секыт оскыны, Иегова соосты яратэ шуыса?

² Кин ке но вералоз, дыр: «Мон тодӥсько, Иегова аслэсьтыз калыксэ яратэ шуыса. Но быгатӥсько-а мон оскыны, со монэ но дунъя шуыса?» Малы куд-огъёсызлэн таӵе юанзы кылдэ? Тани мар вера Оксана b, кудӥз пичи дыръяз трос куректонъёсын пумиськиз: «Мон шудо вал, куке пылатӥськи но пионер луыса ужаны-тыршыны кутски. Нош 15 ар ортчыса, монэ туж сюлмаськытыны кутскизы пичи дыры сярысь тодэ ваёнъёс. Мон малпай, Иеговалы ярамон ӧвӧл ни но со монэ уг яраты ни шуыса». Нош тани мар вера Юа нимо сузэр, кудӥз пионер луыса ужа-тырше. Со но пичи дыръяз трос шуг-секытъёсын пумиськиз. Со вера: «Мон аслэсьтым улонме Иеговалы сӥзи, малы ке шуоно сое шумпоттэме потэ вал. Но мон малпай, Иегова монэ ноку но уз яраты шуыса».

3. Мае ми эскеромы та статьяын?

³ Оло нош, тӥ но, та оскымон сузэръёс сямен ик, вань сюлмысьтыды Иеговаез яратӥськоды, но туж ик уд оскиське, со тӥледыз яратэ шуыса. Малы тӥледлы валаны кулэ, Иегова зэмзэ ик тӥледыз дунъя шуыса? Мар кароно, куке малпаськоды, Иегова тӥледыз уг яраты шуыса? Ойдолэ эскеромы та юанъёсты.

4. Малы кышкыт малпаны, Иегова милемыз уг яраты шуыса?

⁴ Яратон — со туж бадӟым кужым, кудӥзлы луыса адями троссэ лэсьтыны быгатэ. Ми оскиськомы ке, Иегова милемыз яратэ но милемлы юрттэ шуыса, соку, шуг-секытъёс шоры учкытэк, ми солы вань сюлмысьтымы ужаломы-тыршомы. Нош ми ум ке оскиське, Инмар милемыз дунъя шуыса, милям кужыммы начар луоз (Мад. 24:10). Зэм, милям мылкыдмы куашказ ке, озьы ик ми ум ке оскиське, Инмар милемыз яратэ шуыса, Шайтанлы милемыз вормыны капчи луоз (Еф. 6:16).

5. Мар луыны быгатэ, малпамы ке, Иегова милемыз уг яраты шуыса?

⁵ Куд-ог вын-агайёс но сузэр-апайёс малпаны кутскизы, Иегова соосты уг яраты но соос сярысь уг сюлмаськы шуыса. Соин ик соослэн осконзы лябӟиз. Тани мар вера Джеймс нимо тӧро: «Мон Вефильын ужай. Мыным кельше вал мукет кылын вераськись кенешын ужаны-тыршыны. Озьы ке но мон юн ӧй оскы, Иегова шумпотэ шуыса солы, мар мон со понна лэсьтӥсько. Кыӵе ке но дыре мон оскемысь но дугдӥ, Иегова мынэсьтым вӧсяськонъёсме кылэ шуыса». Ева, кудӥз озьы ик Вефильын ужа-тырше, вера: «Мон валай, кышкыт малпаны, Иегова тонэ уг яраты шуыса, малы ке шуоно со уродэн шӧдӥське Иеговалы ужан-тыршон вылын. Сыӵе ужъёсын вырыны мылкыд куашка, озьы ик со ӧжытгес но ӧжытгес шумпотон вайыны кутске». Нош тани Майкл нимо агайлэн кылъёсыз, кудӥз пионер но тӧро луыса ужа-тырше: «Тон уд ке оскиськы, Иегова тонэ дунъя шуыса, тон палэнскод солэсь».

6. Мар милемлы кароно, куке малпаны кутскиськомы, Иегова милемыз уг яраты шуыса?

⁶ Та верамъёсысь адӟиське, умойтэм малпанъёс осконмес лябӟытыны быгато шуыса. Нош мар кароно, куке милям та выллем малпанъёсмы кылдо? Милемлы соосты соку ик палэнтоно. Куре Иеговалэсь каньыллыксэ, кудӥз «котькыӵе визьлэсь но вылӥын», со тӥлесьтыд сюлэмдэс но визьдэс мед утёз но сюлмаськытӥсь малпанъёстэс мед палэнтоз шуыса (Пс. 138:23; Флп. 4:6, 7). Тодады возе: тӥ огнады ӧвӧл — Инмарлы оскымон мукет вын-агайёс но, сузэр-апайёс но нюръясько умойтэм шӧдонъёсынызы.  Та выллем шуг-секытъёсын пумиськылӥзы Иеговалэн мукет ужась-тыршисьёсыз но, кудъёсыз вашкала дыръёсы улӥзы. Соос пӧлын апостол Павел. Ойдолэ малпаськомы, малы дышетэ милемыз солэн учырез.

7. Кыӵе шуг-секытъёсыз вал Павеллэн?

⁷ Тӥ куддыръя малпаськоды-а, тӥледлы сётэм ужъёс туж секытэсь но тӥ соосты быдэстыны уд быгатэ шуыса? Озьы ке, тӥледлы валамон луозы апостол Павеллэн шӧдонъёсыз. Со одӥг кенеш сярысь гинэ ӧз сюлмаськы. Со гожтӥз: «Вань черкъёс [«кенешъёс», ВД] сярысь но мыным сюлмаськыны кулэ» (2 Кор. 11:23—28). Курадӟыто-а тӥледыз ялан кыстӥськись висёнъёс? Павеллэн но сыӵе ик шуг-секытэз вал, кудзэ со шиен нимаз но кудӥз туж курадӟытӥз сое. Со тазалыкеныз герӟаськем шуг-секыт вал, дыр. Павеллэн солэсь мозмытскемез туж потэ вал (2 Кор. 12:7—10). Яке тӥледыз сюлмаськыто асьтэлэн тырмымтэосты? Сыӵе ик шӧдонъёсыз вал Павеллэн но. Со ассэ куанер-мискинь адямиен нимаз, малы ке шуоно, шонер ужъёс лэсьтон понна, со ялан асэныз нюръяськиз (Рим. 7:21—24).

8. Мар юрттӥз Павеллы, шуг-секытъёсыз шоры учкытэк, Иеговалы оскымон кыльыны?

⁸ Вань шуг-секытъёсыз шоры учкытэк, Павел Иеговалы ужаз-тыршиз. Мар сое юнматӥз? Со умой тодӥз аслаз тырмымтэосыз сярысь, озьы ке но со дун тыронлы юн оскиз. Солы тодмо вал Иисуслэн кылъёсыз: «Инмар сокем дуннеез яратӥз, Аслэсьтыз одӥг вордӥськем Пизэ сётӥз, котькудӥз но Солы оскись мурт медаз быры, солэн быронтэм улонэз мед луоз шуыса» (Иоанн 3:16; Рим. 6:23). Зэм но, Павеллэн сыӵе осконэз вал. Со юн оскиз: Иегова дась простить карыны соосты но, кинъёс секыт сьӧлыказы, но ӧпкелизы (Пс. 85:5).

9. Малы дышето милемыз Павеллэн кылъёсыз, кудъёсыз гожтэмын Галатъёслы 2:20?

⁹ Павел оскиз, Иегова сое туж яратэ шуыса, малы ке шуоно со тодӥз: Инмар со понна аслэсьтыз Пизэ курбонлы сётӥз. Висъялэ саклыктэс Павеллэн буйгатӥсь кылъёсызлы: «[Инмарлэн Пиез] монэ яратӥз но Ассэ мон понна курбонлы сётӥз». (Лыдӟе Галатъёслы 2:20.) Павел ӧз лыдъя, Инмарлэн яратонэзлы маке но люкетыны быгатэ шуыса. Со ӧз малпа: «Мон валасько, малы Иегова мукет вын-агайёсты но сузэр-апайёсты яратэ. Нош монэ мар понна яратод?»  Римын улӥсь христианъёслы со тодазы вайытӥз: «Христос асьме понна кулӥз, куке асьмеос сьӧлыкоесь на вал!» (Рим. 5:8). Зэм, Иегова вань ужась-тыршисьёссэ яратэ!

10. Малы дышето кылъёс, кудъёсыз гожтэмын Римъёслы 8:38, 39?

¹⁰ Лыдӟе Римъёслы 8:38, 39. Павел юн оскиз, Инмарлэн яратонэз туж кужмо шуыса. Со оскиз: номыр но уз быгаты «асьмемыз Инмарлэн яратонэзлэсь люкыны». Павел тодӥз: Иегова израиль калыклы чиданзэ возьматӥз, нош солы аслыз — гажан-жалянзэ. Мукет кылъёсын вераса, Павел вераз: «Иегова аслэсьтыз Пизэ лэзиз, со мон понна мед кулоз шуыса. Соин ик вань-а мынам мугъёсы малпаны, Инмар монэ уг яраты шуыса?» (Рим. 8:32).

11. Малы, сьӧлыкъёсыз шоры учкытэк, кудъёсыз сярысь гожтэмын 1 Тимофейлы 1:12—15, Павел оскиз, Инмар сое яратэ шуыса?

¹¹ Лыдӟе 1 Тимофейлы 1:12—15. Дырын-дырын Павелэз тодэ ваёнъёсыз сюлэмшугъяськытӥзы. Со ассэ самой сьӧлыко адямиен лыдъяз, малы ке шуоно христиан мурт луэмезлэсь азьло Павел пӧртэм каръёсын Христослэсь дышетскисьёссэ лек уйылӥз-улляз. Куд-огъёссэ со пытсэтэ пуктылӥз, нош куд-огъёссэ виыны косылӥз (Ап. уж. 26:10, 11). Син азе пуктыны луоз, мае шӧдысал Павел, пумитасал ке егит христиан муртэ, кудӥзлэсь анай-атайзэ Павеллэн косэмезъя виизы. Павел жаляз аслаз янгышъёсыз сярысь, нош со тодӥз, ортчемзэ уд берыкты ни. Со оскиз, Иисус со понна кулӥз шуыса, соин ик гожтӥз: «Инмарлэн сётэм дэлетэныз-ӟечлыкеныз мон луи сыӵе, кыӵе али вань» (1 Кор. 15:3, 10). Малы со тӥледыз дышетэ? Тӥледлы оскыны кулэ: Иисус тӥ понна кулӥз но тӥледлы луонлык сётӥз Иеговаен эшъяськыны (Ап. уж. 3:19). Инмар саклыксэ висъя, мае ми али лэсьтӥськомы  но мае ми лэсьтомы вуонояз, нош со саклыксэ уг висъя, кыӵе янгышъёс ми лэсьтӥмы азьвыл, вал-а ми соку Иеговалэн Адӟись-Ивортӥсез яке ӧй вал-а (Ис. 1:18).

12. Кызьы 1 Иоаннлэн 3:19, 20 гожтэм кылъёс милемлы юрттыны быгато, куке ми малпаськомы, ми нокинлы кулэ ӧвӧл но милемыз нокин уз яраты шуыса?

¹² Тӥ малпаськоды, дыр: «Тодӥсько: Христос мон понна кулӥз, но та кузьымез басьтыны мон ярамон ӧвӧл». Малы таӵе малпанъёс кылдыны быгато? Тырбыдэстэм сюлэм быгатэ милемыз пӧяны но малпаськытыны, ми нокинлы кулэ ӧвӧл но милемыз нокин уз яраты шуыса. (Лыдӟе 1 Иоаннлэсь 3:19, 20.) Куке милям таӵе малпанъёсмы кылдо, тодамы возёно: «Инмар асьмелэн сюлэммылэсь бадӟымгес». Астэ оскытыны кулэ, инмысь Атаймы милемыз яратэ но солэн милемыз простить каремез потэ шуыса. Кызьы Иегова ми шоры учке шуыса валан понна, кулэ солэсь Кылзэ ӵемгес эскерыны, солы вӧсяськыны но солэн калыкеныз ялан кусып возьыны. Малы со туж кулэ?

13. Кызьы милемлы юрттэ Инмарлэсь Кылзэ эскерон? (Озьы ик учке « Кызьы соослы юрттэ Инмарлэн Кылыз» рамкаез.)

¹³ Котькуд нунал Инмарлэсь Кылзэ эскере — озьы тӥ умойгес тододы Иеговалэсь паймымон сямъёссэ. Тӥ валалоды, макем зол со тӥледыз яратэ. Котькуд нунал Инмарлэсь Кылзэ мур эскерыса, тӥ быгатоды умойгес малпаськыны, малы ке шуоно со тӥледыз тупатоз, куке тӥляд шонертэм малпанъёсты но шӧдонъёсты кылдозы (2 Тим. 3:16). Тани мар вера Кевин нимо тӧро, кудӥз ассэ ултӥяса возиз: «Мон 102-тӥ Псаломез лыдӟи но со вылын малпаськи. Та юрттӥз мыным ачим шоры мукет сямен учкыны но валаны, кызьы Иегова мон шоры зэмзэ ик учке». Нош Ева, кудӥз сярысь вераськиз ини, шуэ: «Котькуд нунал пумын мон малпаськисько со сярысь, мае Иегова кулэен лыдъя. Со мынэсьтым сюлэмме буйгатэ но осконме юнматэ».

14. Кызьы милемлы юрттэ вӧсяськон?

¹⁴ Ӵем вӧсяське (1 Фес. 5:17). Тӥляд кинэн ке эшъяськемды потэ ке, тӥ соин ӵем вераськоды но солы асьтэлэн шӧдонъёсты сярысь вералоды. Сое ик вераны луэ Иеговаен эшъяськонмы сярысь но. Куке ми вӧсяськыкумы вераськомы солы шӧдонъёсмы, малпанъёсмы но сюлэмшугъяськонъёсмы сярысь, ми возьматӥськомы: солы оскиськомы но тодӥськомы, со милемыз яратэ шуыса (Пс. 93:17—19; 1 Иоанн 5:14, 15). Юа, кудӥз сярысь та статьяын вераськиз ини, шуэ: «Вӧсяськыкум мон Иеговалы уг вераськы сое гинэ, мар луиз монэн нунал куспын. Мон верасько солы аслэсьтым малпанъёсме но шӧдонъёсме. Пумен мон валай: Иегова уж дорысь кузё гинэ ӧвӧл, нош Атай, кудӥз туж яратэ аслэсьтыз нылпиоссэ».  (Учке « Нош тӥ та книгаез лыдӟиды-а?» рамкаез.)

15. Малы ми оскиськомы, Иегова милемыз дунъя шуыса?

¹⁵ Вераське оскымон эшъёсыныды. Соос Иеговалэн кузьымез (Иак. 1:17). Ми оскиськомы, Иегова милемыз дунъя шуыса, малы ке шуоно со кузьмаз милемлы духовной семьяез, кудаз вын-агайёс но сузэр-апайёс милемыз туж ярато (Мад. 17:17). Колоссы карын улӥсьёслы гожтэтаз Павел вераз куд-ог христианъёс сярысь, кудъёсыз солы юрттӥзы но солы шумпотон вайизы (Кол. 4:10, 11). Иисус Христослы но эшъёсызлэн юрттэмзы кулэ вал. Солы юрттӥзы адямиос но, кылчинъёс но. Иисус туж дунъяз соослэсь юрттэмзэс (Лука 22:28, 43).

16. Кызьы оскымон эшъёс юртто милемлы Иеговаен матысь кусыпъёс возьыны?

¹⁶ Куриськоды-а тӥ кенешысь эшъёстылэсь юрттэт но уд палэнтӥське-а сое? Юн осконэн эшмылы сюлэмшугъяськонъёсмес вераммы уг возьматы, милям осконмы ляб шуыса. Юрттэт куреммы милемыз утьыны быгатэ. Тани мар вера Джеймс агай, кудӥз сярысь вераськиз ини: «Юн осконэн христиан муртэн эшъяськон мыным туж юрттэ. Куке монэ умойтэм малпанъёс зӥбо, мынам дуно эшъёсы чидаса монэ кылзо но оскыто, монэ туж ярато шуыса. Соослэн юрттэмзылы луыса мон валасько, Иегова монэ яратэ но мон сярысь сюлмаське шуыса». Макем кулэ вын-агайёсын но сузэр-апайёсын матысь кусыпъёс возьыны!

17, 18. Кинэ милемлы кылзоно но малы?

¹⁷ Шайтанлэн потэ, ми шонер ужъёс медам лэсьтэ но киосмес мед лэзёмы шуыса. Со милемыз оскытыны тырше, Иегова милемыз уг яраты но милемыз уз утьы шуыса. Нош кызьы ми адӟимы, со чик но озьы ӧвӧл.

¹⁸ Иегова тӥледыз яратэ. Со тӥледыз туж дунъя. Тӥ, Иисус сямен, Иеговалэсь кылзӥськиськоды ке, котьку но солэн яратоназ улоды (Иоанн 15:10). Соин ик эн кылзэ Шайтанэз но, асьтэлэсь сюлэмдэс но, кудӥз тӥледыз пыкылэ. Кылзэ Иеговаез, кудӥз котькудмылэсь умойзэ адӟе. Юн оске: тӥ солы дуно потӥськоды!