1. Die yen Jihova nẹ sua vwẹ oma rẹ ihwo rọyen?

JIHOVA ỌGHẸNẸ “vwo omavwerhe vwẹ ihwo rọye.” (Une 149:4) Ọnana kẹ avwanre omavwerhovwẹn. Jihova vwo oniso rẹ omamọ uruemu rẹ avwanre vẹ oborẹ avwanre se ru yovwin te; o siẹ avwanre te oma. A da fuevun kẹ ọkieje, o che sikẹrẹ avwanre bẹdẹ!—Jọn 6:44.

2. Diesorọ ihwo evo vwo roro nẹ Jihova vwo ẹguọnọ raye-en?

² Ihwo evo sa ta, ‘Me riẹnre nẹ Jihova vwo ẹguọnọ rẹ ihwo rọyen eje kerẹ ẹko, ẹkẹvuọvo mavọ yen o se vwo muvwẹro nẹ Jihova ni vwe ghanghanre?’ Die yen sa nẹrhẹ ohwo nọ oka rẹ onọ tiọyen? Oksana * rọ rioja mamọ vwẹ ọkiemọ fikirẹ oborẹ ihwo efa ruro, da ta: “Oma vwerhen ovwẹ mamọ ọke mi vwo bromaphiyame ji ton iruo rẹ ọkobaro phiyọ. Ẹkẹvuọvo, ẹgbukpe 15 vwọ wan nu, ke me rhoma karophiyọ erọnvwọn ebrabra re phia kẹ vwẹ ọke me vwọ hẹ omotete. Ki mi no nẹ Jihova rhe vwo ẹguọnọ mẹ-ẹ, me tobọ fo ohwo ro se vwo ẹguọnọ kpahe-en.” Oniọvo aye ọvo rọ dia ọkobaro re se Yua ro ji rhiẹromrẹ ebẹnbẹn vwẹ ọkiemọ, da ta: “Me vwomakpahotọ ki Jihova kidie me guonọre nẹ oma vwerhọn. Ẹkẹvuọvo, mi vwo imuẹro nẹ o che se vwo ẹguọnọ mẹ bẹdẹ-ẹ.”

3. Die yen a cha fuẹrẹn vwẹ uyono nana?

³ Kerẹ iniọvo ivẹ re djunute na, wo vwo ẹguọnọ ri Jihova mamọ, ẹkẹvuọvo wo se vwo ẹwẹn ivivẹ sẹ o vwo ẹguọnọ wẹn. Diesorọ o vwo fo nẹ wo vwo imuẹro nẹ Ọghẹnẹ ghene davwerhọn wẹn? Kẹ, die yen sa chọn wẹ uko siẹrẹ wo de vwo ẹwẹn ivivẹ kpahen ẹguọnọ rọyen? E jẹ a mrẹ ẹkpahọnphiyọ rẹ enọ nana.

4. Diesorọ ọ vwọ dia emu rẹ imuoshọ re vwo vwo ẹwẹn ivivẹ kpahen ẹguọnọ ri Jihova?

⁴ Avwanre de vwo imuẹro nẹ Jihova vwo ẹguọnọ rẹ avwanre, ọyena che mu avwanre vwọ vwẹ ẹga kẹ vwo te asan rẹ ẹgba rẹ avwanre tere, o toro obo re hirharokuẹ-ẹ. Ẹkẹvuọvo, wo de vwo ẹwẹn ivivẹ kpahen ẹguọnọ ri Jihova, kọyen “ogangan wẹn ọhahavwe.” (Isẹ 24:10) Ọ cha bẹn re vwo phi Eshu kparobọ, siẹrẹ avwanre de roro nẹ Ọghẹnẹ vwo ẹguọnọ rẹ avwanre-e.—Ẹfe. 6:16.

5. Die yen phia kẹ iniọvo evo ri vwo ẹwẹn ivivẹ kpahen ẹguọnọ rẹ Ọghẹnẹ?

⁵ Inenikristi evo ri fuevun nonẹna ji roro nẹ Jihova vwo ẹguọnọ raye-en, ọtiọyena esegbuyota rayen rha ga-an. Ọkpako ọvo re se James da ta: “Dede nẹ me ga vwẹ Bẹtẹl je riavwerhen rẹ iruo rẹ aghwoghwo na vwẹ ukoko ra da jẹ ephẹrẹ ọrhorha, mi vwo ẹwẹn ivivẹ sẹ Jihova rhiabọreyọ ẹga mẹ. O rhi vwo te ọke ọvo, ki mi tobọ roro sẹ Jihova kerhọ rẹ ẹrhovwo mẹ.” Oniọvo aye ọvo re se Eva rọ jehẹ ẹga ọkieje da ta: “Me rhe mrẹvughe nẹ imuoshọ herọ siẹrẹ e de vwo ẹwẹn ivivẹ sẹ Jihova vwo ẹguọnọ rẹ avwanre, kidie o djobọte ẹga rẹ ohwo. O se mie ohwo aghọghọ vẹ oruru ro vwo kpahen irueru rẹ ẹga ri Jihova.” Michael rọ dia ọkpako kugbe ọkobaro ọkieje da ta: “Wo rhe vwo imuẹro nẹ Ọghẹnẹ vwẹrote we-e, ọ cha nẹrhẹ wo bo ghwru nẹ ẹga rọyen.”

6. Die yen e che ru siẹrẹ e de roro nẹ Ọghẹnẹ vwo ẹguọnọ rẹ avwanre-e?

⁶ Udje rẹ iniọvo nana ghwe dje imuoshọ rọ herọ siẹrẹ e de vwo ẹwẹn ivivẹ kpahen ẹguọnọ ri Jihova. Ẹkẹvuọvo, die yen e che ru siẹrẹ e de roro nẹ Ọghẹnẹ vwo ẹguọnọ rẹ avwanre-e? E jẹ a sen iroro tiọyena kpakpata! Nẹrhovwo rhe Jihova nẹ ọ chọn wẹ uko vwọ vwẹ “ufuoma rẹ Ọghẹnẹ rọ nọ ẹruọ ejobi” vwo wene “iroro” ọchọchọ yena. (Une 139:23; Fil. 4:6, 7) Karophiyọ nẹ ọ dia owẹ ọvo yen herọ-ọ. Iniọvo efa ji nene iroro echọchọ tiọyena muabọ. Idibo ri Jihova vwẹ ọke awanre je tobọ nene iroro echọchọ tiọyena muabọ. E jẹ a mrẹ obo re se yono vwo nẹ udje rẹ ọyinkọn Pọl.

7. Ebẹnbẹn vọ yen Pọl hirharoku?

⁷ Ofu dje we ọke evo fikirẹ iruo buebun  re vọn wẹ abọ, jẹ wo che se ru ayen re-e? Ọ da dia otiọyen, kọyen wo che vwo ẹruọ rẹ ẹdia rẹ Pọl hepha. Ọ dia iniọvo rehẹ ukoko ọvo goi yen ọ ro ẹnwan kpahe-en, ẹkẹvuọvo ọ ro “ẹnwan rẹ ishọshi [“ukoko,” NW ] na ejobi.” (2 Kọr. 11:23-28) Wo vwo okpọga ọvo ro mie we aghọghọ wẹn vwẹ ẹga ri Jihova? Pọl rhiẹromrẹ ọmiaovwẹ rẹ “unwe” ro duvwo, ọnana sa dia ọga rọ davwẹngba ro vwo sivwin. (2 Kọr. 12:7-10) Ofu dje we ọke evo fikirẹ jẹgba romobọ wẹn? Ọtiọyen ofu ji dje Pọl. O se oma rọyen “orharhe rẹ ohwo” fikirẹ jẹgba romobọ rọyen ro nene muabọ.—Rom 7:21-24.

8. Die yen chọn Pọl uko vwo chirakon rẹ ebẹnbẹn rọyen?

⁸ Dede nẹ Pọl hirharoku ebẹnbẹn nana eje, jẹ ọ dobọ rẹ iruo rẹ ẹga rọyen ji-i. Die yen kẹ rẹ ẹgba ro se vwo chirakon? Dede nẹ ọ riẹnre nẹ ọ gbare-e, jẹ o vwo esegbuyota ọgangan kpahen ọtanhirhe na. Ọ nabọ riẹn ive ri Jesu nana: “Ohwo kohwo ro sere [Jesus] gbuyota . . . ko vwo arhọ ri bẹdẹ.” (Jọn 3:16; Rom 6:23) O muẹro dẹn nẹ Pọl jẹ ọvo usun rẹ ihwo ri vwo esegbuyota kpahen ọtanhirhe na. Ọ nabọ vwo imuẹro nẹ Jihova muegbe ro vwo ghovwo ihwo re tobọ ru umwemwu egangan siẹrẹ ayen de kurhẹriẹ.—Une 86:5.

9. Die yen avwanre yono vwo nẹ eta ri Pọl rehẹ Galesha 2:20?

⁹ Pọl ji vwo esegbuyota nẹ Ọghẹnẹ vwo ẹguọnọ rọyen mamọ, kidie o ji ọmọ rọyen rhi ghwu kẹ. (Se Galesha 2:20.) Vwo oniso rẹ eta rẹ uduephiophiyawọ re vwo ku owọrota yena phiyọ. Pọl da ta: “Ọmọ rẹ Ọghẹnẹ . . . guọnọ ovwẹ rọ da vwẹ oma rọye kẹ vwẹ.” Pọl vwẹ ọke vuọvo vwo roro nẹ ọyen bra te asan rẹ Ọghẹnẹ vwo jẹ ẹguọnọ rọyen evwo-o, kerẹ asan ra da mrẹ nẹ ọ guọnọ tanẹ, ‘Me riẹn oboresorọ rẹ Jihova vwo vwo ẹguọnọ rẹ iniọvo mẹ, ẹkẹvuọvo o che se vwo ẹguọnọ mẹ-ẹ.’ Pọl karophiyọ Inenikristi ri Rom nẹ, “Ọke rẹ avwanre vwọ hẹ iruimwemwu Kristi de rhi ghwu kẹ avwanre.” (Rom 5:8) Ẹguọnọ rẹ Ọghẹnẹ basa-an!

10. Die yen Rom 8:38, 39 yono avwanre?

¹⁰ Se Rom 8:38, 39. Pọl nabọ riẹn oborẹ ẹguọnọ rẹ Ọghẹnẹ gan te. O siri nẹ o vwo emu ọvuọvo rọ sa “hẹriẹ avwanre nẹ ẹguọnọ” rẹ Ọghẹnẹ-ẹ. Pọl riẹn oborẹ Jihova nene ihwo rẹ Izrẹl yerin vẹ odirin. Ọ je riẹn oborẹ Jihova gbe arodọnvwẹ kẹ  komobọ. A sa djẹ ota ri Pọl na koko vwẹ idjerhe tiọna, ‘Rọ vwọ dianẹ Jihova ji Ọmọ rọyen rhi ghwu kẹ vwẹ na, kẹ diesorọ mi vwo roro nẹ o vwo ẹguọnọ mẹ-ẹ?’—Rom 8:32.

11. Dede nẹ Pọl ru oka rẹ imwemwu re djunute vwẹ 1 Timoti 1:12-15, diesorọ o vwo vwo imuẹro nẹ Ọghẹnẹ vwo ẹguọnọ rọyen?

¹¹ Se 1 Timoti 1:12-15. O se vwo ọke evo rẹ ẹwẹn ri Pọl vwo kpokpo mamọ fikirẹ obo ro ruru tavwen ọ ke rhe dia Onenikristi. O se oma rọyen “onotu” rẹ iruimwemwu! Ọyena gbe avwanre unu-u, kidie tavwen ọ ke mrẹ uyota na vughe, Pọl vwọ tua iniọvo na vwo nẹ orere kpo orere, o mu evo phiyọ uwodi, ọ da je rhọnvwe nẹ e hwe evo. (Iruo 26:10, 11) Vwẹ ẹwẹn roro oborẹ oma che ru Pọl siẹrẹ ọ da mrẹ oniọvo rọ dia eghene ro vwo ọsẹ vẹ oni-i, kidie nẹ ọyen ri Pọl yen kuenu kẹ ihwo nẹ a teyen ayen hwe. Pọl viẹ diekpọvwẹ kpahen obo ro ru wanre, ẹkẹvuọvo o vwo obo ro se ru kpahọ-ọn. O vwo esegbuyota nẹ Jesu ghwu kẹ ọyen, kọyensorọ ọ vwọ ta vẹ imuẹro: “Vwẹ ẹserọphẹ rẹ Ọghẹnẹ me vwọ hẹ obo re me epha na.” (1 Kọr. 15:3, 10) Die yen avwanre yonori? Jẹ o muwẹro nẹ Jesu ghwu kẹ wẹ rere wo se vwo vwo omamọ rẹ oyerinkugbe vẹ Jihova. (Iruo 3:19) Obo re ruẹ enẹna vẹ obo re che ru vwẹ ọke rọ cha vwẹ obaro yen ma ghanre kẹ Ọghẹnẹ, ọ dia oruchọ re ru wanre-e, o torori sẹ avwanre Iseri ri Jihova ọke yena yẹrẹ avwanre dia Iseri-i.—Aiz. 1:18.

12. Mavọ yen eta rehẹ 1 Jọn 3:19, 20 sa vwọ chọn avwanre uko ọke re de ni oma kueku?

¹² Wo de roro kpahen ughwu rẹ Jesu ghwuru fikirẹ imwemwu wẹn, ọkiọvo wọ sa ta: ‘Mi fo ohwo ro ghwu kẹ-ẹ.’ Diesorọ wo vwo vwo ẹwẹn tiọyen? Ubiudu rẹ  avwanre ro jẹgba na sa phiẹn avwanre, ọ me nẹrhẹ e ni oma kueku. (Se 1 Jọn 3:19, 20.) Vwẹ ọke tiọyena, ofori nẹ a karophiyọ nẹ “Ọghẹnẹ rhonọ udu rẹ avwanre.” Evwoghovwo vẹ ẹguọnọ ri Jihova ganre dibidibi vrẹ kiroro kiroro echọchọ re sa dia evunrẹ ubiudu rẹ avwanre. Ofori nẹ e vwo imuẹro nẹ Jihova vwo ẹguọnọ rẹ avwanre. E se vwo vwo imuẹro yena, ofori nẹ e yono Baibol na kẹdẹ kẹdẹ, nẹrhovwo kọke kọke, ji kuomakugbe iniọvo na ọkieje. Diesorọ enana vwọ ghanre?

13. Mavọ yen eyono rẹ Ota rẹ Ọghẹnẹ sa vwọ chọn avwanre uko? (Ni ekpeti na “ Oborẹ Ota rẹ Ọghẹnẹ Chọn Ayen Uko Wan.”)

¹³ Yono Ota rẹ Ọghẹnẹ kẹdẹ kẹdẹ, ku wọ cha mrẹ omamọ iruemu ri Jihova vrẹ obo ri jovwo. Wọ cha nabọ vwo ẹruọ rẹ obo ro vwo ẹguọnọ wẹn te. Wo de roro kpahen ẹkpo ri Baibol ọvo kẹdẹ kẹdẹ, ọ cha chọn wẹ uko vwọ ‘rhuẹrẹ’ iroro rẹ ubiudu wẹn phiyọ. (2 Tim. 3:16) Ọkpako ọvo re se Kevin ro nẹ oma rọyen kueku da ta: “Ese vẹ eroro kpahọn rẹ Une Rẹ Ejiro 103 chọn vwẹ uko vwọ kpọ iroro mẹ vi, ji vwo ẹruọ rẹ ẹro rẹ Jihova vwo ni vwe.” Eva re djunute siẹvure da ta: “Vwẹ oba rẹ ẹdẹ ọvuọvo, me ghwọrọ ọke vwo roro kpahen obo re ma ghanre kẹ Jihova. Ọnana nẹrhẹ ẹwẹn mẹ totọ, ọ je bọn esegbuyota mẹ gan.”

14. Mavọ yen ẹrhovwo sa vwọ chọn avwanre uko?

¹⁴ Nẹrhovwo ọkieje. (1 Tẹsa. 5:17) Wọ da guọnọ vwẹ ugbeyan mu ohwo, ofori nẹ wo nene ta ota ọkieje, wọ me je vuẹ obo rehẹ ẹwẹn wẹn. Ọtiọyen oyerinkugbe rẹ avwanre vẹ Jihova je hepha. E se djephia nẹ avwanre vwẹroso Jihova je riẹn nẹ o vwo ẹguọnọ rẹ avwanre, siẹrẹ a da ta ọdavwẹ vẹ iroro rẹ avwanre kẹ vwẹ ẹrhovwo. (Une 94:17-19; 1 Jọn 5:14, 15) Yua re djunute siẹvure da ta: “Ọ dia obo re phia kẹ vwẹ vwẹ ẹdẹ yena ọvo yen me vuẹ Jihova-a, me je vuẹ kpahen iroro vẹ ọdavwẹ mẹ. Ememerha na, ukperẹ me vwọ mrẹ Jihova kerẹ ohwo rode ro vwo ikọmpini, ke me mrẹ kerẹ Ọsẹ ro ghini vwo ẹguọnọ rẹ emọ rọyen.”—Ni ekpeti na “ Wo Sere Jovwo Re?”

15. Mavọ yen Jihova vwo djephia nẹ o vwo ọdavwẹ rẹ avwanre?

¹⁵ Kuomakugbe iniọvo rehẹ ukoko na; ayen igbeyan rẹ Jihova vwo ruẹse kẹ avwanre. (Jems 1:17) Kidie nẹ Jihova vwo ọdavwẹ rẹ avwanre ohwo vuọvo, ọ da kẹ avwanre iniọvo eya vẹ eshare ri vwo “ẹguọnọ kpahe ohwo kọke kọke.” (Isẹ 17:17) Vwẹ ileta ro si vwo rhe iniọvo rehẹ Kọlose, Pọl djunute iniọvo evo re chọn rọ uko, o de se ayen “ivwiroro”  rọyen. (Kọl. 4:10, 11) Oma tobọ vwerhen Jesu vwọ kẹ obicha rọ mrẹre vwo nẹ obọ rẹ emekashe vẹ ihworakpọ re dia igbeyan rọyen.—Luk 22:28, 43.

16. Mavọ yen igbeyan re fuevun sa vwọ chọn avwanre uko vwo sikẹre Jihova?

¹⁶ Wọ mrẹ erere vọnvọn vwo nẹ ukẹcha ro nẹ obọ rẹ iniọvo wẹn cha? Wọ da ta ọdavwẹ wẹn kẹ ugbeyan ro tedje, ọyena dia oka ri jẹ esegbuyota evwo-o, ẹkẹvuọvo ọyena sa sẹro wẹn. James ra ta ota kpahen siẹvure da ta: “Ugbeyan ri mi vwo mu iniọvo ri tedje chọn vwẹ uko mamọ. Iroro echọchọ da rhe, igbeyan mẹ na nabọ kerhọ mẹ je vuẹ vwẹ oborẹ ayen vwo ẹguọnọ mẹ te. Ọnana nẹrhẹ me riẹn nẹ Jihova vwo ẹguọnọ mẹ dẹn.” Ọyen obo re ghanre mamọ re vwo sikẹrẹ iniọvo eya vẹ eshare rehẹ ukoko na!

17-18. Ono yen ofori nẹ avwanre kerhọ kẹ, kẹ diesorọ?

¹⁷ Eshu guọnọre nẹ avwanre ru obo ri yovwiri-in. Ọ guọnọre nẹ e roro nẹ Jihova che se vwo ẹguọnọ rẹ avwanre-e, avwanre ji fo ihwo ro che sivwi-in. Ẹkẹvuọvo, avwanre riẹnre nẹ ọyena dia uyota-a.

¹⁸ Jihova vwo ẹguọnọ wẹn. Wọ pha ghanghanre vwẹ ẹro rọyen. Wọ da kerhọ rọyen, ku wọ cha “dia vwẹ ẹguọnọ rọye” bẹdẹ kerẹ Jesu. (Jọn 15:10) Ọtiọyena, wọ kerhọ rẹ Eshu yẹrẹ ubiudu wẹn ro brorhiẹn hwe we na-a. Ukperẹ ọtiọyen, kerhọ rẹ Jihova rọ mrẹ erhuvwu vwẹ oma rẹ avwanre ohwo ọvuọvo. Jẹ o muwẹro nẹ Jihova “vwo omavwerhe vwẹ ihwo rọye” eje, ji te we!