1. Itthu xeeni Yehova oniweha awe atthu awe arina aya?

YEHOVA MULUKU ‘onnaphenta atthu awe’. (Esal. 149:4) Ti voohakalaliha osuwela wira Yehova onniniphenta vanceene. Owo onniweha mikhalelo sahu, onnisuwela itthu ninwerya ahu opaka ni nihinwerya ahu, nave onninikhaliherya okhala apatthani awe. Akhala wira khaninrowa ohiya ororomeleya, nnoovikaniha okhala apatthani a Yehova mahiku otheene.—Yoh. 6:44.

2. Etthu xeeni eniwiiriha atthu akina ohikupali wira Yehova onnaaphenta?

² Atthu akina pooti ohimya wira: ‘Miyo kinnisuwela wira Yehova onnaaphenta atthu awe ntoko ekrupu, etthu xeeni enrowa okikupaliha wira Yehova onnikiphenta miyo?’ Etthu xeeni eniwiiriha atthu akina wiikoha siiso? Oksana, * yoowo aarina mixankiho sinceene okathi aari awe mwaana onihimya so: “Okathi kaapatisiwe aka kaahihakalala vanceene ni kaahipacerya okhala pioneera. Masi nuuvira iyaakha 15 kaahipacerya wuupuwela itthu soohiloka saakikhumelenle kiri ene mwaana, nto eyo yaanikiriipiha murima vanceene. Kaahipacerya wuupuwela wira nkaarina waataana wooloka ni Yehova ni kuupuwela wira nkaaphwanela ophentiwa ni Yehova”. Nave pioneera mmosa yoowo ahaareerena mixankiho okathi aari awe mwaana oniihaniwa Yua, onihimya so: “Kaahiivahererya wa Yehova ni opatisiwa wira kimuhakalaliheke. Masi kuupuwela wira owo khonikhala-khala okiphentaka”.

3. Mwaha ola, makoho xeeni ninrowa ahu waakhula?

³ Ntoko arokora ala anli oororomeleya naalavunle ahu, nyuwo pooti omphenta vanceene Yehova, masi munapacerya waanyiherya akhala wira onnoophentani wala nnaari. Mwaha ola, ninrowa waakhula makoho manli. Makoho ene taala: Xeeni vari aya vooloka okupali wira Yehova onnoophentani? Etthu xeeni enrowa wookhaliheryani oxintta miyuupuwelelo soohiloka?

4. Xeeni vaari aya vootakhala waanyiherya wira Yehova onniniphenta?

⁴ Ophenta onninivaha ikuru wira nipake etthu. Akhala wira ninnikupali wira Yehova onniniphenta ni onninikhaliherya, eyo enniniiriha omukokhorela ni murima ahu wotheene hata nrine ene mixankiho sinceene. Nto akhala wira nnuupuwela wira Yehova khonnikhapelela ni khonniphenta ‘ikuru sahu sinnivukuwa’. (Mir. 24:10) Musuweleke wira akhala wira ninnikhulumuwa ni ninnihiya okupali wira Muluku onniniphenta, vannimukhweela Satana onihapuxa.—aEef. 6:16.

5. Etthu xeeni ewiiranenle anna ni arokora akina mwaha woowaanyiherya akhala wira Yehova onnaaphenta?

⁵ Waanyiherya wootteettheiha waamini wa anna ni arokora akina. Mutokweene oniihaniwa James ohimmye so: “Miyo kaarumeela oBetheli ni kaanikhaliherya muloko ninlavuliwa nttaava na elapo ekina. Masi kaahipacerya wiikoha akhala wira Yehova aaneemererya muteko kanvarela aka. Waahiphiya okathi kaikoha aka wira: ‘Kiireke Yehova onniwiriyana mavekelo aka’?” Murokora Eva, yoowo onivara muteko wa Muluku wa okathi wotheene ohimmye so: “Kinoona wira waanyiherya wira Yehova onniniphenta etthu yootakhala, mwaha woowi eyo ennivukula ikuru sahu. Maana ennivukula oluttuweliwa wahu ovara miteko sa omunepani ni ohakalala vaavo ninvara ahu muteko wa Yehova”. Munna oniihaniwa Michael onirumeela ntoko pioneero ookilaatheya ni mutokweene, onihimya so: “Akhala wira munuupuwela wira Muluku khonookhapelelani, eyo enoowiirihani ohiya omukokhorela”.

6. Vaavo nimpacerya ahu waanyiherya akhala wira Muluku onniniphenta, nihaana opaka exeeni?

⁶ Itthu siwiiranenle anna ni arokora awo, sinnooniherya oratteene wira muupuwelo woohiloka pooti ohonona waamini wahu. Etthu xeeni ninreerela ahu opaka akhala wira miyuupuwelelo soohiloka soopacerya oniiriha waanyiherya akhala wira Muluku onniniphenta? Nihaana okhootta mowaakuveya. Nave nihaana onvekela Yehova wira onikhaliherye orantteliha ‘miyupuwelelo’ soohiloka. Niira siiso, ‘murettele wa Muluku, onoosuka mirima ni miyuupuwelo sahu’. (Esal. 139:23; aFil. 4:6, 7) Musuweleke wira nyuwo khamukhanle mekhinyu. Anna ni arokora akina oororomeleya anniwanana miyuupuwelelo soohiloka. Nave arumeyi akina oororomeleya a khalai a Yehova, yaahikhalana miyuupuwelelo iyo soohiloka. Vano nrowe niwehe itthu ntakiheryo na Paulo ninniixuttiha aya.

7. Mixankiho xeeni Paulo aarina awe?

⁷ Niireke okathi mukina munoona wira khamureere waatteliwa miteko ni khamuniwerya ovara  itthu sotheene? Akhala wira ti siiso, munoowerya oweha etthu yaamuxankiha Paulo. Owo aanixanka ohiya mwaha wa muloko mmosa paahi, masi “mwaha wa miloko” sotheene. (2 aKor. 11:23-28) Niireke murina oretta ohinivoniwa yoowo onooxankihani ni oniwiirihani ohihakalala? Paulo aahikhalana muxankiho, yoowo aahimmye awe wira waakhala ntoko ‘mwiiwa oheliwe mweerutthuni mwawe’. Woonasa wene, muxankiho owo waari oretta wanwereya vanceene Paulo. Nto Paulo aaniphavela wira muxankiho ole waamanle. (2 aKor. 12:7-10) Niireke nyuwo murookhulumuwa mwaha woowi muniwanana soovonya sanyu? Okathi mukina Paulo aahikhalana muxankiho owo. Maana aahimmye wira ‘khaareere otakhaliwa’, mwaha woowi okathi wotheene aahaana wiimananiha opaka itthu sooloka.—aRom. 7:21-24.

8. Etthu xeeni yaamukhalihenrye Paulo owanana mixankiho sawe?

⁸ Paulo aahikhalana mixankiho seeherenrye waamini wawe ni saamukhulumula vanceene. Masi hata vaari siiso, owo khaahiyale omukokhorela Yehova. Etthu xeeni yaamukhaliherya opaka eyo? Nnaamwi aasuwela wira aanivonya, Paulo aanaamini vanceene mukuttho wowoopola wa Yesu. Nave Paulo aanisuwela oratteene yooleiherya ya Yesu yoowi ‘otheene ale anooniherya omwaamini [Yesu] . . . anookhalana okumi woohimala’. (Yoh. 3:16; aRom. 6:23) Moohaanyiherya Paulo aanaamini mukuttho wowoopola wa Yesu. Maana, Paulo aanikupali ni murima wotheene wira Yehova onnaalevelela ale anipaka itampi suulupale anattharuwa ni murima wotheene.—Esal. 86:5.

9. Moolumo a Paulo ari aGalasia 2:20, anniixuttiha exeeni?

⁹ Paulo aanikupali wira aaniphentiwa ni Muluku, mwaha woowi aanisuwela wira aahimuruma Kristu ovaha okumi awe wira omoopole Paulo. (Mmusome aGalasia 2:20.) Nwehe moolumo oohakalaliha a Paulo ari wanikisa wa eversiikulu ela. Owo aahimmye so: “Mwaana a Muluku, yoowo okiphentale ni ovaherenrye okumi awe mwaha wa miyo”. Paulo khoona wira Muluku aaphenta atthu akina paahi, maana owo khuupuwela so: ‘Vannikhweya woona wira Yehova onnaaphenta vanceene anna ni arokora akina, masi khonikhala-khala okiphentaka’. Paulo aahiwuupuxerya maKristau ooRoma wira: “Kristu oonikhwela nlelo nri ene anatampi”. (aRom. 5:8) Tthiri vannooneya wira ophenta wa Muluku khorina mukano!

10. ARoma 8:38, 39, onniixuttiha exeeni?

¹⁰ Mmusome aRoma 8:38, 39. Paulo aanikupali ni murima wotheene wira Muluku aanimphenta vanceene. Owo olempe wira khiivo etthu enwerya “onivalaanya ni ophenta wa Muluku”. Paulo aanuupuwela oratteene moota Yehova aapixenrye awe murima aIsarayeli. Nave aanisuwela wira Yehova khaareere ommorela ikharari. Hiyo pooti olavula mookwasa moolumo aalepenle awe aRoma mwa enamuna ela: ‘Akhala wira Yehova oomuruma  Mwanawe wira okoopole miyo, kiireke yookhala etthu ekhanle ookiiriha waanyiherya wira Yehova onnikiphenta’?—aRom. 8:32.

11. Hata nuumala opaka itthu soohiloka sinilavuliwa 1 Timootheyo 1:12-15, etthu xeeni yaamukupaliha Paulo wira aaniphentiwa ni Yehova?

¹¹ Mmusome 1 Timootheyo 1:12-15. Woonasa wene, Paulo aanixanka mwaha wa itthu soohiloka aapanke awe ohinatthi okhala muKristau. Owo aahimmye wira ‘totepenxe’ okhala natampi! Ohinatthi wiixutta ekeekhai, Paulo aanaalupattha vanceene maKristau ni aanirowa ilapo sinceene wira aavare ni waatthukwa maKristau awo. Nave aaneemererya ni okhaliherya wiiviwa maKristau makina. (Mit. 26:10, 11) Munniwerya wuupuwela moota Paulo oonela awe nuumala omphwanya mmiravo muKristau, yoowo aari ekwaasuni mwaha woowi anamuyari awe yaahiiviwa ni ekrupu ya Paulo? Moohaanyiherya, Paulo aanixanka ni oriipiwa murima vanceene. Ekeekhai wira Paulo aahittharuwa ni murima wotheene itthu aapanke awe khalai, masi khaawerya orukunuxa itthu soohiloka aapanke awe. Hata vaari siiso, Paulo aanikupali ni murima wotheene wira Kristu aahivaha okumi awe wira omoopole. Tivonto Paulo aalempe awe wira: “Oreera murima wuulupale wa Muluku, wookiiriha okhala murummwa”. (1 aKor. 15:3, 10) Ntakiheryo na Paulo ninniixuttiha exeeni? Mukupaliki ni murima anyu wotheene wira Kristu oovaha okumi awe wira owoopoleni ni vanniweryaneya okhalana waataana wooloka ni Yehova. (Mit. 3:19) Woonasa wene, munniivaha nthowa mwaha wa itthu soohiloka mwaapanke anyu muhinatthi ni nuumala okhala Namoona a Yehova. Masi muhiliyale wira Yehova onivaha efaita ele nimpaka ahu niinaano-va ni ele ninrowa ahu opaka muhoolo ohiya itthu soohiloka nipanke ahu khalai.—Yes. 1:18.

12. Akhala wira nnuupuwela wira khanrina efaita ni khanimphwanela ophentiwa ni Yehova, 1 Yohani 3:19, 20, onrowa onikhaliherya sai?

¹² Vaavo munuupuwelela anyu wira Yesu ohookhwa wira ottipihe itampi sanyu, woonasa wene  nyuwo pooti ohimyaka so: ‘Kinoona wira miyo nkimphwanela waakhela mareeliho anikumiheriwa ni mukuttho wa Yesu’. Etthu xeeni woonasa wene eniwiirihani wuupuwela siiso? Murima ahu woowoototha pooti oniirihaka wuupuwela wira khanrina efaita ni khanimphentiwa ni Muluku. (Mmusome 1 Yohani 3:19, 20.) Okathi owo ti vooloka wuupuwela wira “Muluku ti muulupalexa ovikana mirima sahu”. Ophenta ni olevelela wa Tiithi ihu a wiirimu wookhalana owerya wuulupale ovikana miyuupuwelo sahu soohiloka. Nto etthu ninreerela ahu opaka ori weemererya wira Yehova onniniphenta vanceene. Etthu enrowa onikhaliherya opaka eyo ori osoma Nuulumo na Muluku khula nihiku, ovekela ni ottottela mureerelo nikhaliheryo na anna ni arokora. Xeeni vari aya vooloka opaka itthu iyo?

13. Omusoma Biibiliya onrowa wookhaliheryani sai? (Nwehe ekaaxa eni: “ Yaahikhaliheriwa ni Nuulumo na Muluku”.)

¹³ Omusoma Biibiliya khula nihiku, onimookhaliheryani wiixutta mikhalelo soovara murima Yehova orina awe. Munimoona wira Yehova onnoophentani vanceene. Wuupuwelela itthu munisoma anyu khula nihiku Nuulumo na Muluku onimookhaliheryani olokiherya muupuwelo ni wookolola “itthu” soohiloka siri vamurimani vanyu. (2 Tim. 3:16) Mutokweene oniihaniwa Kevin, yoowo uupuwela wira khorina efaita onihimya so: “Osoma ni wuupuwelela Esalimo 103, wookikhaliherya okhalana moonelo wooloka ni osuwela ele Yehova onuupuwela awe aakiwehaka”. Eva nimulavunle ahu wanipacerya onihimya so: “Wanikisa wa nihiku kinnaavya okathi wira kuupuwelele itthu Yehova onivaha awe efaita. Nto eyo ennikiphwanyiha murettele ni ennincererya waamini waka”.

14. Ovekela onnikhaliherya sai?

¹⁴ Nvekeleke ikwaha sinceene. (1 aTes. 5:17) Naaphavelaka okhalana ompatthani woolipa ni mutthu mukina, nihaana ovaanela ni mutthu owo ikwaha sinceene nimuleelaka moonelo ahu. Etthu emosaru enniiraneya ni ompatthani ahu ni Yehova. Vaavo nninvekela ahu Yehova ikwaha sinceene, nimuleelaka muupuwelo ahu, moonelo ahu ni itthu sinnixankiha, ninnimooniherya wira ninnimuroromela ni ninnisuwela wira onniniphenta vanceene. (Esal. 94:17-19; 1 Yoh. 5:14, 15) Yua nimulavunle ahu wanipacerya ohimmye so: “Okathi kininvekela aka Yehova, khahiyo paahi kinimuleela itthu sikikhumelenle nihiku nne. Maana kinnimutthukulela murima aka kimuleelaka moonelo aka. Nto vakhaani-vakhaani kinnimoona Yehova ohiya ntoko xeefi a empresa yuulupale, masi ntoko Tiithi onaaphenta vanceene anaawe”.—Nwehe ekaaxa eni: “ Mootoko Osoma Eliivuru Ela?”

15. Yehova onooniherya sai wira onnimukhapelela khula mmosa a hiyo?

¹⁵ Muttotteleke mureerelo nikhaliheryo na anna. Anna ni arokora yoovaha enikhuma wa Yehova. (Yak. 1:17) Tiithi ahu a wiirimu, onnooniherya wira onnimukhapelela khula mmosa a hiyo, mwaha woowi oonivaha emusi ahu ya omunepani, niire so, anna ni arokora yaawo anniphenta “okathi t’ukathi”. (Mir. 17:17) Okathi aalepenle awe ekarta maKristau a muloko wa aKolosi, Paulo onnaahimya  maKristau yaamukhanlihenrye vanceene. Maana Paulo ohimmye wira “annikilipiha vanceene”. (aKol. 4:10, 11) Musuweleke wira Yesu Kristu aanixukhurela vanceene okhaliheriwa ni apatthani awe akhale malaikha wala apinaatamu.—Luka 22:28, 43.

16. Anna ni arokora anrowa onikhaliherya sai okhalana waataana wooloka ni Yehova?

¹⁶ Niireke nyuwo munnittottela mureerelo yoovaha ela enikhuma wa Yehova? Musuweleke wira omuleela mixankiho sanyu munna oolipa momunepani khontaphulela wira mwa mulolo, ohiya-vo opaka eyo enimookhapelelani vanceene. Nkahaya nwehe ele ohimmye awe James, yoowo nimulavunle ahu wanipacerya. Owo onihimya so: “Okhala ni anna oolipa momunepani onnikikhaliherya vanceene. Okathi kinkhalana aka miyuupuwelelo soohiloka, apatthani aka annikiwiriyana moopixa murima ni annikooniherya wira annikiphenta vanceene. Nto kinnoona wira Yehova onnikithokorerya ni murima wotheene ni onnikiphenta vanceene”. Tthiri ti vooloka okhalana ni olipiha waataana wahu ni anna ni arokora!

17-18. Tani ninreerela ahu onwiriyana ni nthowa xeeni?

¹⁷ Satana oniphavela wira nyuwo muhiye wiimananiha opaka itthu sooloka. Nave oniphavela wira nuupuweleke wira Yehova khonniphenta ni khanimphwanelela woopowa. Masi ntoko niwenhe ahu, vannooneya wira Satana onimootha.

¹⁸ Yehova onnoophentani vanceene. Eyo enooniherya wira onnoovahani efaita yinceene. Akhala wira munoomwiiwelela, ‘munoottottela mureerelo ophenta wawe’ mahiku otheene, ntoko Yesu aattottela awe mureerelo ophenta wa Yehova. (Yoh. 15:10) Nto muhikhala-khale munwiriyanaka Satana ni muheetteleke murima anyu. Ohiya-vo, okathi wotheene munwiriyaneke Yehova, yoowo oniweha itthu sooloka khula mmosa a hiyo onipaka awe. Nto mukupaliki ni murima wotheene wira “Apwiya [Yehova] annaphenta atthu aya”, woohelani muhina nyuwo!