1. Wetin Jehovah de see for e people?

JEHOVAH GOD “dey happy with e people.” (Ps. 149:4) This one de make us over glad! Jehovah de see our fine-fine character. E de see say we fit become better person, and e de help us to be e friend. If we continue to serve Jehovah well, e go continue to be our friend forever!​—John 6:44.

2. Why e de hard some people to believe say Jehovah love them?

² Some people fit talk say, ‘I know say Jehovah love e people as group, but how I fit dey sure say Jehovah really love me?’ Wetin fit make person ask that kind question? One sister wey e name na Oksana * really suffer when e dey small. This sister talk say: “I really glad when I baptize and start to pioneer. But after 15 years, I start to think about the bad things wey I face when I dey small. I tell myself say Jehovah no dey happy with me again, and say I no reach the kind person wey e fit love.” One pioneer sister wey e name na Yua still get plenty problem when e dey small. E talk say: “I give my life to Jehovah because I want make Jehovah happy. But that time, I dey sure say e no fit ever love me.”

3. Wetin we go learn for this article?

³ Like the two sisters wey we just talk about, you really love Jehovah but you fit no dey sure say e really love you. Why you need to dey sure say Jehovah really care about you? And wetin fit help you when you de feel say Jehovah no love you? Make we answer this questions.

4. If we no dey sure say Jehovah love us, why this one fit be danger?

⁴ The power wey love get to make person do something, na really strong one. When we dey sure say Jehovah love us and  de support us, this one go move us to do our best for e service even when life hard. But, if we no dey sure say God love us, we “no go too get power.” (Prov. 24:10) When our condition make us stop to get joy and we start to feel say God no love us, we no go fit fight attack from Satan.​—Eph. 6:16.

5. Wetin don happen to some brothers and sisters wey be think say God no love them?

⁵ Some of our brothers and sisters don start to think say Jehovah no love and care about them. And this one don make their faith weak. One elder wey e name na James talk say: “Even though say I de work for Bethel and I de enjoy preaching with congregation wey de use another language, I be no dey sure say Jehovah de really accept the things wey I de do for e service. One time dey wey I even begin de wonder whether Jehovah de listen to my prayer.” One sister wey e name na Eva, and wey dey full-time service talk say: “I learn say danger dey when we de think say Jehovah no love us. This kind thing fit affect everything wey person de do to serve Jehovah. This one fit make us no want de do things for God, and we go lose our joy as we de serve Jehovah.” One elder and regular pioneer wey e name na Michael talk say: “If you no believe say God care about you, you go de leave God small-small.”

6. Wetin we need to do when we begin de think say God no love us?

⁶ This examples show say if we de think say Jehovah no love us, this one fit really spoil our faith. But wetin we suppose do when we start to think like that? Quick-quick, we must stop to think like that! Beg Jehovah make e help you remove ‘things wey de worry you for mind,’ and put ‘the peace wey God de give wey go protect your heart and how you de think.’ (Ps. 139:23; ftn.; Phil. 4:6, 7) And remember say no be only you dey. Some other brothers and sisters still de face the same problem. Even servants of Jehovah for Bible time still face this kind problem. Make we see wetin we fit learn from the example of apostle Paul.

7. Which problems Paul face?

⁷ Sometimes you de feel say the things wey you get to do too plenty, and say e de hard you to do everything wey you  want do? If na so then you go understand apostle Paul. No be only one congregation Paul worry about. Bible talk say Paul worry about “all the congregations.” (2 Cor. 11:23-28) You get serious sickness and the sickness no de always make you get joy? Paul really suffer from one problem wey e get. This problem fit be sickness and Paul want make this sickness comot for e body. (2 Cor. 12:7-10) You de lose joy because e de hard you to do the correct thing? Na so e be for Paul sometimes. Paul talk for Bible say: “I sorry for myself!” Why? Na because e always struggle to do the correct thing.​—Rom. 7:21-24.

8. Wetin help Paul endure even with the problems wey e face?

⁸ Even as Paul endure all this problems, e continue to serve Jehovah. Wetin give Paul power to do this one? Even as Paul really know say e de make mistake, e continue to get strong faith for the sacrifice of Jesus. E still know about the promise wey Jesus make. Jesus promise say if anybody continue to show “faith” for e sacrifice, the person go live forever. (John 3:16; Rom. 6:23) True-true, Paul dey among people wey de show their faith for the sacrifice of Jesus. Paul dey sure say Jehovah dey ready to forgive people if they repent, even if na serious sin they commit.​—Ps. 86:5.

9. Wetin we learn from the thing wey Paul talk for Galatians 2:⁠20?

⁹ The sacrifice of Jesus really show the power wey the love of God get, and Paul get faith for this power. (Read Galatians 2:20.) The thing wey dey the end of the verse de comfort person. Paul talk say: “The Son of God . . . love me and sacrifice e life for me.” Paul no feel say things dey wey the love wey God get no fit do. E no think say, ‘I see why Jehovah fit love my brothers, but I no sure say e go fit love me.’ Paul remind brothers for Rome say: “When we still be sinners, Christ die for us.” (Rom. 5:⁠8) The love wey God get, no get boundary!

10. Wetin we learn from Romans 8:38, 39?

¹⁰ Read Romans 8:38, 39. Paul really dey sure say God get strong love. E write for Bible say nothing “go fit separate us from the love wey God get.” Paul know how Jehovah be really dey patient with Israel people. Jehovah show pity for Paul, and Paul know this one. So Paul fit de talk say, ‘Since Jehovah send e Son come die for me, I no suppose de doubt say e love me.’​—Rom. 8:32.

11. Even though say Paul don do plenty bad things like the ones wey 1 Timothy 1:12-15 talk about, why e dey sure say e still get the love of God?

 ¹¹ Read 1 Timothy 1:12-15. Sometimes, Paul go don really feel bad because of the things wey e do when e never be Christian. No wonder Paul talk say e “be number one” sinner. Before Paul learn the truth, e de go from city to city de suffer Christians. E de put some of them for prison and e de support the court when they decide say they go kill Christians. (Acts 26:10, 11) Paul go don really feel bad when e meet any young Christian that time wey they kill e papa and mama because of Paul. Paul really dey sorry about the mistake them wey e don do. But e know say e no go fit change wetin don happen. Jesus die for Paul and Paul really believe this one, na why e write say: “But with God favor I be wetin I be.” (1 Cor. 15:3, 10) Wetin this one teach us? Make you really believe say Jesus die for you and because of this one, e dey possible for you to dey tight with Jehovah. (Acts 3:19) The important thing to God na the things wey we de do now and wey we go do for future, no be the mistake wey we don make for past, whether we be Jehovah Witness that time or we never be Jehovah Witness.​—Isa. 1:18.

12. How the thing wey 1 John 3:19, 20 talk fit help us if we de feel say we dey useless or say God no go fit love us?

¹² When you think-am say Jesus die for your sin, you fit talk say, ‘I no feel say I reach the kind person wey suppose get that kind better gift.’ Why you fit de feel like that? Because we no dey perfect, our heart fit deceive us and make us feel say we dey useless or God no fit love us. (Read 1 John 3:19, 20.) When we start to think like that, make we remember say “God big pass our heart.” Even if we de feel for inside our  heart say Jehovah no love us, or e no go forgive us, Jehovah wey be our Papa for heaven still love us and e go forgive us. We need to make ourself believe say Jehovah love us. If we want do this one, we must always de study Bible, de pray to Jehovah everytime, and de always spend time with servants of Jehovah. Why e really dey important make we do this things?

13. When we de study Bible, how this one fit help us? (Still check the box “ How Bible De Help Them?”)

¹³ Make you de study Bible everyday, and you go see more-more say Jehovah get plenty fine-fine character. You go really see say Jehovah get deep love for you. When you de think deep everyday about the things for Bible, this one fit help you de think for clear way pass before, and you go fit “correct” how you de think and feel. (2 Tim. 3:16) One elder wey e name na Kevin be de see e self as useless person sometimes. But e talk say: “As I de read and de think deep about Psalm 103, this one don help me to correct the way I de think and to really understand the thing wey Jehovah de think about me.” Eva wey we talk about before talk say: “For the end of each day, I de take time de think about the way Jehovah de feel. This one de give me peace of mind and e de make my faith de strong.”

14. How prayer fit help us?

¹⁴ Pray everytime. (1 Thess. 5:17) If you want get strong friendship with person, you must always de talk to the person and tell the person how you de feel. Na so our friendship with Jehovah still be. When we de tell Jehovah how we de feel, the things wey we de think, and the things wey de worry us, we de show say we trust Jehovah and we know say e love us. (Ps. 94:17-19; 1 John 5:14, 15) Yua wey we talk about before talk say: “When I de pray, no be only the things wey happen to me that day I de tell Jehovah. I de tell Jehovah everything for my mind and how I de feel. Small-small, I no come de see Jehovah as one manager wey get big company. Instead, I come de see Jehovah as Papa wey really love e children.”​—Still check the box “ You Don Read-am?”

15. How Jehovah de show say e care about each of us?

¹⁵ Spend time with friends for congregation; they be gift from Jehovah. (Jas. 1:17) Jehovah don give us brothers and sisters for congregation wey de show “love all the time.” This one show say Jehovah care about each of us. (Prov. 17:17) For the book of Colossians wey Paul write, e talk about some Christians wey e get support from. Paul talk say: “This people don really  support me.” (Col. 4:10, 11) Even Jesus Christ be need support, and e really like the support wey e receive from e friends wey be angels and people for this earth.​—Luke 22:28, 43.

16. How friends for congregation fit help us dey tight with Jehovah more?

¹⁶ You de really gain from the friends wey Jehovah don give you for congregation as gift? Plenty brothers and sisters for congregation de serve Jehovah well. If some thing de worry us and we tell any of them about-am, this one no mean say our faith weak. Instead, this one fit protect us. Hear wetin James wey we talk about before talk, e say: “As I make friend with people wey de serve Jehovah well for congregation, this one don really help me. When I start to think for way wey no correct, this dear friends de sofri listen to me and de remind me say they love me. With this thing wey them de do, I fit see say Jehovah love me and e de care for me.” E really dey important say make we dey tight with our brothers and sisters for congregation!

17-18. Who we go listen to, and why?

¹⁷ Satan want make we stop to do the correct thing. E want make we believe say Jehovah no love us, and say we no reach the kind person wey Jehovah de save. But we don see say this one na big lie!

¹⁸ Jehovah love you. You really dey important for e eye. If you obey Jehovah, e go continue to love you forever, just as e love Jesus. (John 15:10) So when Satan or your heart de tell you say Jehovah no love you, make you no listen to them. Instead, de listen to Jehovah, the person wey de see the good thing wey each of us fit do. Make you really believe say Jehovah “dey happy with e people,” and you dey among them!