1. მუს ორწყე იეჰოვა მუშ ხალხშე?

იეჰოვა ღორონთ „ხარენს მუშ ხალხით“ (ფსალმ. 149:4). მუ სახიოლო რე თენა ჩქინო! იეჰოვა ორწყე ჩქინ ჯგირ თვისებეფს; ორწყე, მუნერეფ შემლებნა იპჸუათ დო თინა მოხვარნა, ნამდა დევეახლოვათ. თიშ ართგურობას ვა ვოდინუანთ-და, ირო ხოლოს იჸუაფ ჩქინწკუმა (იოან. 6:44).

2. მუშენ უჭირს ნამთინეს თიშ დაჯერება, ნამდა იეჰოვას უჸორს?

² ნამთინექ შილებე თქუას: „მიჩქ, ნამდა იეჰოვას მუშ ხალხ, მუჭოთ ჯგუფინ თეშ, უჸორს, მარა მუ მარწმუნენს, ნამდა იეჰოვა პირადო მა მაფასენს?“. მუქ შილებე თინეფს თე კითხვა გურჩქინას? ოქსანა, * ნამდგას ტრაგიკულ ბაღანობა უღუდ, იჩიებ: „მანგარ ბედნერ ვორდჷ, მუჟამსით იბნათ დო პიონერო მსახურება დიბჭყჷ. მარა 15 წანაშ უკულ, ბაღანობაშ გლახა მოგონებეფ გუმაშინედ დო გურს მისოფუნდჷ. ფიფქრენდჷ, ნამდა მივოდინე იეჰოვაშ მოწონა დო თიშ ჸოროფაშ ღირს ვა ვორდჷ“. ართ პიონერ დას, იუას, ხოლო გლახა ბაღანობა უღუდ. თინა იჩიებ: „იეჰოვას დუდ თიშენ მეუძღვინ, ნამდა მოკოდ, გუვახარკო თინა. მარა დარწმუნებულ ვორდჷ, ნამდა აშო დღას ვა მიჸოროფუანჷ“.

3. მუს გუვარჩიენთ თე სტატიას?

³ ჟიშე მოშინაფილ ართგურ ქრისტიანეფცალო, თქვა ხოლო მანგარო გიჸორა იეჰოვა, მარა შილებე გოეჭვუდან, თის ქოუჸორთ დო ვარ აშო. მუშენ ოკო რდათ დარწმუნებულ, ნამდა იეჰოვა ნამდვილო ზრუნენს თქვანდე? მუ მიგეხვარებნა, მუჟამსით უარყოფით ფიქრეფ მუგალენა? მორთ გუვარჩუათ თე კითხვეფიშ პასუხეფ.

4. მუშენ რე ოშქურანჯ თიშა ეჭვიშ მიშაღალა, ნამდა იეჰოვას ვუჸორთ?

⁴ ჸოროფა აღმძვრელ ძალა რე. იეჰოვაშ ჸოროფაშა დო ელარნაშა დარწმუნებულ ქუვორეთ-და, თენა აღბძრენა, განსაცდელეფიშ უმკუჯინუო, მთელ გურით ვემსახურათ თის. თეშ გინაწონს, ღორონთიშ ელარნაშა ეჭვ ქიმშამღუნან-და, ძალა ქეშმელიებნა (იგავ. 24:10). თეს გეძინელ, მუჟამსით გურ გომტირხუნა დო თიშ რწმენას მივოდინუანთ, ნამდა ღორონთის ვუჸორთ, ვეშმალებენა, ქივეწინააღმდეგათ სატანას (ეფეს. 6:16).

5. მუჭო იმოქმედ ნამთინეშა ღორონთიშ ჸოროფაშა ეჭვიშ მიშაღალაქ?

⁵ ამდღა ნამთინე ართგურ ქრისტიან ეჭვეფქ სულიერო დასუსტჷ. ართ უხუცეს, ნამდგას ჯეიმზი ჯოხო, იჩიებ: „თიშ უმკუჯინუო, ნამდა ბეთელს ვმსახურენდჷ დო ჩქიმდა ხიოლ მოუღუდ უცხოენოვან კრებას მსახურებას, ფიფქრენდჷ, იეჰოვა მართალო ქიწონუანდჷ დო ვარ ჩქიმ მსხვერპლის. თიშე ფიქრ ხოლო ქიდიბჭყჷ, ქურჩქილედ დო ვარ თინა ჩქიმ ლოცვეფს“. ხოლო ართ სრულ დროთ მსახურ, ნამდგას ევა ჯოხო, იჩიებ: „ქიმეფხვად, ნამდა იეჰოვაშ ჸოროფაშა ეჭვიშ მიშაღალა ოშქურანჯ რე, მუშენდა თენა მოქმედენს ირფელშა, მუდგას თიშ მსახურებას ორთუქ. თენა სულიერ საქმეეფს მონაწილებაშ სურვილს დო იეჰოვაშ მსახურებაშ ხიოლს ოდინუანს“. მაიკლი, ნამუთ სრულ დროთ პიონერო დო უხუცესო მსახურენს, იჩიებ: „ღორონთ თქვანდე ზრუნენსინ, თინა ვარჯერან-და, გეიოჩირთუთ თიშ შარას“.

6. მუ ოკო ვაკეთათ, მუჟამსით ღორონთიშ ჸოროფაშ ეჭვ მირჩქინდუნა?

⁶ თე შემთხვევეფშე იძირე, მუნერ სულიერ ზიან შილებე მიღას უარყოფით ფიქრეფქ. მარა მუ ოკო ვაკეთათ, მუჟამსით ღორონთიშ ჸოროფაშ ეჭვ მირჩქინდუნა? ჩქი ხეთეშე ოკო ჩეფთხინუათ თე ფიქრეფ! ქოთხით იეჰოვას, ქიმგეხვარან, უარყოფით ფიქრეფ დოითირუან ღორონთიშ მშვიდობათ, „ნამუთ დეცვენს თქვან გურ დო გონებას“ (ფსალმ. 139:23; ფილ. 4:6, 7). ვაგგოჭყორდან, თქვა ხვალე ვა რეთ. შხვა და დო ჯიმალეფ ხოლო ობრძოლნა უარყოფით გრძნობეფს. იეჰოვაშ მსახურეფ ულირს ხოლო ობრძოლდეს თეცალ სირთულეეფს. გუვარჩუათ, მუშ გურაფა შემლებნა მოციქულ პავლეშ მაგალითშე.

7. მუ პრობლემეფ უღუდ პავლეს?

⁷ მინშა ხომ ვა ფიქრენთ, ნამდა ბრელ პასუხიშმგებლობა გიღნა დო მანგარ რთულ რე ირფელიშ ართო კეთება? თაშ ქორენ-და, თქვა გარჩქილედან იჸი პავლეშ. თინა ხვალე ართ კრებაშე ვარინ, არძა კრებაშე წუხენდჷ (2 კორ. 11:23—28). ჯამრთელობაშ ქრონიკულ პრობლემა ხომ ვა გიღნა, ნამუთ ხიოლს მიდაიღანა? პავლეს უღუდ პრობლემა, ნამუთ თიშო სხეულს ძიგირცალ რდუ, მუთ შილებე ფიზიკურ ლახალა ჸოფედკო დო თეშ ჩათხინაფა მანგარო ოკოდ (2 კორ. 12:7—10). არასრულყოფილებაშ გურშენ მინშა გურგოტახილ ხომ ვა რეთ? კანკალეშა პავლე ხოლო თაშ რდუ. თის მუშ დუდშა „ცოდა კოჩ“ უჯოხოდ, მუშენდა ირიათო ობრძოლუდ მუშ არასრულყოფილებას (რომ. 7:21—24).

8. მუქ მეხვარ პავლეს პრობლემეფიშ გერჯგინას?

⁸ მართალ რე, პავლე ბრელნერ გამოცდას დო გურიშგუმატახალ სიტუაციეფს შეხვადუდ, მარა იეჰოვაშ მსახურება ვემუტებ. მუქ მეჩჷ თის ძალა თეშ ოკეთებელო? პავლეს ჯგირო არჩქილედ, მუშ არასრულყოფილ მდგომარეობა, მარა თეშ გურშენ გიშაჸიდირალიშ რწმენა ვა დასუსტებ. თის უჩქუდ იესოშ დუნაპირებ, ნამდა „მიდგას თინა [იესო] წანს“, მარადიულ სიცოცხლეს მიღენს (იოან. 3:16; რომ. 6:23). პავლე, მუშო ოკო რაგად, თინეფ შქას რდუ, მით გიშაჸიდირალიშ რწმენას გიმირჩქინანდჷ. თის ჯერდჷ, ნამდა იეჰოვა თინეფიშ პატიებაშო ხოლო რდუ მზათ, მიდგაქ სერიოზულო შეცოდეს, მარა ინანიენდეს (ფსალმ. 86:5).

9. მუს ბგურაფლენთ გალატელეფიშ 2:20-ის ენოჭარილ პავლეშ სიტყვეფშე?

⁹ პავლეს თიშ რწმენა ხოლო უღუდ, ნამდა იეჰოვას მანგარო უჸორდჷ თინა, მუდგაქ ქრისტეშ შეწირუაშე იძირ (წეკითხით გალატელეფიშ 2:20). ყურადღება ქიმიაქცით პავლეშ სიტყვეფს: „ღორონთიშ სქუაშ რწმენათ მიდგჷ შურ, ნამდგაქ ქომიჸოროფუ დო დუდ გაწირ ჩქიმო“. პავლე ვა ფიქრენდჷ, ნამდა თიცალ გლახა პიროვნება რდუ, ღორონთის ვეშულებუდ თიშ ჸოროფა დო ვეჩიებუდ: „ვორწყექ, მუშენ უჸორს იეჰოვას ჩქიმ ჯიმალეფ, მარა თის ვეშულებ, მა ქომიჸოროფუას“. თიქ რომაელეფს გაშინ: „ქრისტექ თიმწკუმა ღურჷ ჩქინო, მუჟამსით დიო ხოლო ცოდვილეფ ვორდით“ (რომ. 5:8). მართალო, ღორონთიშ ჸოროფა ულიებ რე!

10. მუს ბგურაფლენთ რომაელეფიშ 8:38, 39-შე?

¹⁰ წეკითხით რომაელეფიშ 8:38, 39. პავლე სრულაშე რდუ დარწმუნებულ, ნამდა ღორონთის ძალიერ ჸოროფა უღუდ. თიქ ჭარჷ, ნამდა მუთუნს „ვეშიალებე  გენკმოჸოთან ღორონთიშ ჸოროფას“. პავლეს უჩქუდ, მუნერ მოთვინებას დო ჭყოლოფას გიმირჩქინანდჷ იეჰოვა ისრაელეფიშ მიმართ. შხვა სიტყვეფით ქოფთქუათინ, პავლე თეცალ მუდგარენს იჩიებუდ: „თიშ უკულ, მუთ იეჰოვაქ მუშ სქუა ჩქიმო შეწირ, მიღუნო მუთუნნერ მიზეზ, ნამდა ეჭვ გემშებღე თიშ ჸოროფაშა?“ (რომ. 8:32).

11. თიშ უმკუჯინუო, ნამდა პავლეს თიცალ ცოდვეფ აფუდ ნაკეთებ, მუნერით 1 ტიმოთეშ 1:12—15-ის რე მოჩამილ, მუშენ ჯერდჷ, ნამდა იეჰოვას უჸორდჷ თინა?

¹¹ წეკითხით 1 ტიმოთეშ 1:12—15. პავლეს მინშა აწუხენდკონ იჸიდ თინა, მუთ ულირს აფუდ ნაკეთებ. გასაკვირ ვა რე, ნამდა თიქ მუშ დუდის ცოდვილეფშე პირველ გიოდვჷ! ჭეშმარიტებაშ გაგებაშახ პავლე შხვადოშხვა ქალაქის თხოზუდ ქრისტიანეფს, ნამთინეს ციხეს დახუნუანდჷ დო ხუჯის უკინენდჷ თინეფიშ ჸვილუათ დასაჯებას (საქ. 26:10, 11). წერმიდგინით, მუჭო იგინანდჷ პავლე დუდის, მუჟამსით თიცალ ახალგაზრდა ქრისტიანს ქეშეხვადუდ, მიდგაშ მშობლეფიშ ჸვილუაშა ბრალ მიშუძუდ? თინა ნარღენდჷ მუშ შეცდომეფს, მარა უჩქუდ, ულირს მუთუნ ვათირედ. თის ჯერდჷ, ნამდა იესოქ მუშ გურშენ ღურჷ დო ათეშენ ჭარჷ: „ღორონთიშ ჭყოლოფათ ვორექ თინა, მუთ ვორექ“ (1 კორ. 15:3, 10). მუს ბგურაფლენთ თავრეშე? რჯერდან, იესოქ თქვანო ღურჷ დო შარა გოინწყეს, ნამდა იეჰოვაწკუმა ხოლოშიან პირად ურთიერთობა გიღდესკო (საქ. 3:19). ღორონთშო მნიშვნელოვან თინა რე, მუდგას ასე ვორთუთ დო მუდგას მომავალს ვაკეთენთ დო ვართ თი შეცდომეფ, მუთ ულირს მიკეთებნა, ვა უღჷ მნიშვნელობა, ვორდით დო ვარ თიმწკუმა იეჰოვაშ მოწმე (ეს. 1:18).

12. მუჭო შილებე მიმეხვარან 1 იოანეშ 3:19, 20-იქ, მუჟამსით ფიფქრენთ, ნამდა უღირსეფ ვორეთ ვარდა ჸოროფას ვევმსახურენთ?

¹² მუჟამსით თიშე ფიქრენთ, ნამდა იესოქ თქვან ცოდვეფშო ღურჷ, შილებე  თქუათ: „ვა ვორექ მა თე პატიშ ღირს“. მუშენ შილებე თაშ გინაფლენდათ დუდის? ჩქინ არასრულყოფილ გურ შილებე მოჩილითუანდან დო მოფიქრებაფუანდან, ნამდა უღირსეფ ვორეთ ვარდა ჸოროფას ვევმსახურენთ (წეკითხით 1 იოანეშ 3:19, 20). თეცალ დროს ოკო ფშუდან, ნამდა „ღორონთ ჩქინ გურშე უმოს რე“. საჭირო რე, დარწმუნებულ ვორდათ, ნამდა ჩქინ ზეციერ მუმას მანგარო ვუჸორთ დო თის ოკო, მაპატუან. თიშ უჯგუშო გაგებელო, მუნერ დამოკიდებულება უღჷ იეჰოვას, თიშ სიტყვა ირიათო ოკო იბგურუათ, ხშირას იბლოცათ დო თიშ ართგურ ხალხწკუმა რეგულარულ ურთიერთობა მიღდან. მუშენ რე მნიშვნელოვან თეშ კეთება?

13. მუჭო შეულებ ღორონთიშ სიტყვაშ გურაფას ჩქინ მოხვარა? (ქოძირით ჩარჩო  „მუჭო ოხვარ თინეფს ღორონთიშ სიტყვა“)

¹³ ირდღას იგურეთ ღორონთიშ სიტყვა, შედეგო იეჰოვაშ ძვირფას თვისებეფს უმოს არგამათ ქოძირუნთ დო ქიგეგენთ, მუნერ სათუთ გრძნობეფ უღჷ თის თქვან მიმართ. ირდღას ღორონთიშ სიტყვაშე ტომბაშე ფიქრ მიგეხვარებნა, სწორ აზროვნება გიღდან დო გეგშასწორათ თქვან გონება დო გურ (2 ტიმ. 3:16). ართ უხუცეს, კევინი, ნამუთ ობრძოლუდ უღირსობაშ გრძნობას, იჩიებ: „103-ა ფსალმუნიშ კითხირქ დო თიშე ფიქრიქ მიმეხვარ, გეგშამსწორებუდკო აზროვნება დო ქინვანჭკო, სინამდვილეს მუს ფიქრენს იეჰოვა ჩქიმდე“. ევა, ნამუთ ჟიშე მიფშინეთ, იჩიებ: „დღაშ ბოლოს დროს გიმურთუნქ იეჰოვაშ აზროვნებაშე ფიქრის. თენა შინაგან სიმშვიდეს მარზენს დო ამანგარენს ჩქიმ რწმენას“.

14. მუჭო შეულებ ლოცვას ჩქინ მოხვარა?

¹⁴ ხშირას ილოცით (1 თეს. 5:17). ადამიანეფ შქას ჯგირ მეგობრობა გერსხილ რე ხშირ დო გულწრფელ ურთიერთობაშა. თაშ რე იეჰოვაწკუმა მეგობრობაშ დროს ხოლო. მუჟამსით ჩქინ გრძნობეფს, ფიქრეფს დო ოწუხებელს თიწკუმა გიმოფხანტუნთ, ვოძირანთ, ნამდა ვონდუთ დო მიჩქნა, ვუჸორთინ (ფსალმ. 94:17—19; 1 იოან. 5:14, 15). ჟიშე მოშინაფილ იუა იჩიებ: „ლოცვაშ დროს ვოცადუქ, ნამდა იეჰოვას ხვალე მთელ დღაშ დინახლე მოხვალამირ შემთხვევეფიშ გურშენ ვევეჩუე. ვურაგადუქ, მუს ფიფქრენქ დო სინამდვილეს მუს ბგინაფლენქ. ჭიე-ჭიეთ იეჰოვაქ ჩქიმო დიდ კომპანიაშ უნჩაშცალო ვარინ, მუმაცალო გინირთჷ, ნამდგას მართალო უჸორს მუშ სქუალეფ“ (ქოძირით ჩარჩო „წეკითხითო?“).

15. მუჭო გიმირჩქინანს იეჰოვა ჩქინ მიმართ პირად ინტერესის?

¹⁵ ურთიერთობა გიღდან ართგურ მეგობრეფწკუმა; თინეფ ძღვინ რენა იეჰოვაშე (იაკ. 1:17). ჩქინ ზეციერ მუმა პირად ინტერესის გიმირჩქინანს თით, ნამდა მარზენა სულიერ ოჯახის — და დო ჯიმალეფს, მიდგაშე ირიათო ბგინაფლენთ ჸოროფას (იგავ. 17:17). პავლექ კოლოსელეფშა მეჭარილ  წერილს ნამთინე ქრისტიანიშ გურშენ, ნამუთ ელურდჷ თის, თქუ: „თინეფ ჩქიმო გურიშექექაფა რენა“ (კოლ. 4:10, 11). ქრისტეს ხოლო ოსაჭირუდ ელარნა დო აფასენდჷ, მუჟამსით თეს მუშ მეგობრეფშე — ანგელოზეფშე დო ადამიანეფშე ღებულენდჷ (ლუკ. 22:28, 43).

16. მუჭო შეულებნა ხოლოშიან მეგობრეფს მიმეხვარან, ნამდა დევეახლოვათ იეჰოვას?

¹⁶ სრულ სარგებელს ქოღებულენთო ართგურ მეგობრეფიშ ძღვინშე, ნამუთ იეჰოვაქ მერჩეს? მოწიფულ მეგობარწკუმა ჩქინ ოწუხებელიშ გურშენ ჩიება სისუსტეშ ნიშან ვა რე; თექ შილებე დოფთხილუან. დეფიქრით მუს იჩიებ ჯეიმზი, ნამუთ ჟიშე მიფშინეთ: „მოწიფულ ქრისტიანწკუმა ჯგირ მეგობრობაქ ჩქიმო გინმასქილიდაფარქ იჸუ. მუჟამსით უარყოფით ფიქრეფ მუმალე, თე ძვირფას მეგობრეფ შურ დო გურით მირჩქილენა დო გუმოშინანა, მუჭო ვუჸორქ. თინეფიშ ჭყოლოფათ, შემლებ ჩქიმ მიმართ იეჰოვაშ ჸოროფა დო ზრუნვა ქობძირე“. მანგარ მნიშვნელოვან რე, გუვავითარათ დო ვა ვოდინუათ ხოლოშიან მეგობრობა ჩქინ და დო ჯიმალეფწკუმა!

17, 18. მის ოკო ვურჩქილათ დო მუშენ?

¹⁷ სატანას ოკო, მიმოტებაფუან თიშ კეთება, მუთ სწორ რე დო ქუდმოჯერუან, ნამდა იეჰოვას ვა ვუჸორთ დო ვა ვორეთ რსხებაშ ღირს. მარა, მუჭოთ უკვე ბძირით, თენა ვა რე სიმართლე.

¹⁸ იეჰოვას უჸორთ. თიშ თოლს თქვა ძვირფას განძ რეთ. თის ქიდემორჩილებუთ-და, იესოცალო, თქვა ხოლო ვადინუანთ თიშ ჸოროფას მარადიულო (იოან. 15:10). თაშ ნამდა, ვა ურჩქილათ სატანას დო თქვან გურს. თეშ მანგიორო, ურჩქილით იეჰოვას, მით თითოულიშ ჯგირს ორწყე. დარწმუნებულ რდათ, ნამდა თინა „ხარენს მუშ ხალხით“, თინეფ შქას თქვანით ხოლო!