NGANI JAKULIJIGANYA 17
Yehofa Akusiŵanonyela Mnope
“Ambuje akusasangalala nawo ŵandu ŵakwe.”—SAL. 149:4.
NYIMBO NA. 108 Chinonyelo Chisyesyene cha Mlungu
YACHITULIJIGANYE *
Atati ŵetu ŵakwinani “akusasangalala” ni jwalijose jwetuwe (Alole ndime 1)
1. Ana Yehofa akusalolaga chichi mwa ŵandu ŵakwe?
YEHOFA MLUNGU “akusasangalala nawo ŵandu ŵakwe.” (Sal. 149:4) Yeleyitu yili yakusangalasya mnope. Yehofa akusasiwona ndamo syetu syambone soni akusasaka kuti tuŵe najo paunasi wambone. Naga tukupitilisya kuŵa ŵakulupichika, tuchiŵa najo paunasi wambone mpaka kalakala.—Yoh. 6:44.
2. Ligongo chichi abale ni alongo yikusiyasawusya kukulupilila kuti Yehofa akusiŵanonyela?
2 Ŵandu ŵane mpaka aŵecheteje kuti, ‘Ngumanyilila kuti Yehofa akusiŵanonyela ŵandu ŵakwe mpela gulu. Nambo ana mpaka simichisye chamtuli naga Yehofa akusambona pajika kuŵa jwakusosekwa?’ Ligongo chichi mpaka aliwusyeje chiwusyochi? Mlongo Oksana * juŵalwasile ali mwanache jwatite, “Naliji jwakusangalala mnope panabatisidwe soni kutanda upayiniya. Nambo payagambile kumala yaka 15, natandite kulagasika nganisyo mnope pakukumbuchila yindu yayandendechele ndili mwanache. Mwamti natandite kulipikana kuti Yehofa akusambona kuti ndili jwangasosekwa soni kuti jwalakwe ngaŵa mkunonyela une.” Nombe Mlongo Yua jwakutenda upayiniya, jwasimene ni yakusawusya yejinji ali mwanache. Jwalakwe jwatite, “Nalipeleche kwa Yehofa ligongo lyakuti nasakaga kumsangalasya jwalakwe. Nambo nayiwonaga kuti Yehofa ngaŵa mkunonyela une.”
3. Ana chitukambilane chichi munganiji?
3 Mwakulandana ni alongo ŵaŵili ŵatwakolasileŵa, kombolekasoni wawojo akusakayichila yakuti Yehofa akusiŵanonyela atamose kuti wawojo akusamnonyelaga jwalakwe. Ligongo chichi akusosekwa kukulupilila kuti Yehofa akusiŵanonyelaga wawojo? Soni ana chichi champaka chakamuchisye kutyosya nganisyo syangaŵajilwa syakuti Yehofa ngakusiŵanonyela wawojo? Kwende tupate kwanga kwa yiwusyo yeleyi.
TUKAKAYICHILAGA KUTI YEHOFA AKUSATUNONYELA
4. Ligongo chichi kukayichila yakuti Yehofa akusatunonyela kuli kwakogoya?
4 Patuli ŵakusimichisya kuti Yehofa akusatunonyela, ni patukusasaka kumtumichila jwalakwe mwampaka tukombolele, atamose tuli mkusimana ni yakusawusya. Nambo patukayichila kuti Mlungu akusatunonyelaga, nikuti ‘machili getu gachinandipa.’ (Mis. 24:10) Konjechesya pelepa, patutengwiche soni kutanda ganisya kuti Mlungu ngakusatunonyela, yichiŵa yangasawusya kuti Satana atusokonasye.—Aef. 6:16.
5. Ana abale ni alongo ŵakusakayichila yakuti Mlungu akusiŵanonyela, akusasimana ni yamtuli?
5 Masiku agano Aklistu ŵane ŵakulupichika, chikulupi chawo chinandipe machili ligongo lyakayichila yakuti Yehofa akusiŵanonyela. Jwamkulungwa jwa mumpingo jwine lina lyakwe James jwasasile kuti, “Atamose nasangalalaga kutumichila pa Beteli soni kulalichila, nambo nakayichilaga naga Yehofa ŵasangalalaga ni yanatendagayi. Yeleyi yandendekasisyesoni kuti ngayichileje naga Yehofa akusapikanaga mapopelo gangu.” Eva jwali jwakutumichila jwa ndaŵi syosope jwatite, “Kukayichila yakuti Yehofa akusatunonyela kuli kwakogoya mnope, ligongo kukusamtendekasya mundu kuganisya kuti yosope yakutenda pakumtumichila Yehofa yili yangali mate. Yeleyi mpaka yitutendekasye kuti tukayinonyelaga yindu yausimu soni kuti tuŵeje ŵangasangalala. Michael jwali jwamkulungwa jwa mumpingo soni mpayiniya jwakutamilichika jwatite, “Naga ngawukukulupilila yakuti Mlungu akusasamala ya ugwe ni kuti mpaka ugambe kuleka kwene kumtumichila jwalakwe.”
6. Ana tukusosekwa kutenda uli patutandite kukayichila yakuti Mlungu akusatunonyela?
6 Yisyasyo ya ŵandu ŵeleŵa yikulosya kuti chikulupi chetu mpaka chijonasiche naga tuli mkuganisya yakuti Mlungu ngakutunonyela. Nambo ana tukusosekwa kutenda uli patutandite kola nganisyo syakuti Mlungu ngakusatunonyela? Tukusosekwa kusityosya nganisyo syelesi mwachitema. Amŵende Yehofa kuti ŵakamuchisye kutyosya “nganisyo” syelesi, soni kuti aganisyeje ya mtendele wa Mlungu ‘wampaka usunje chenene mitima ni nganisyo syawo.’ (Sal. 139:23; Afil. 4:6, 7) Akumbuchileje kuti nganaŵa jikape, ligongo pana abale ni alongo ŵane ŵakulupichika ŵakusalagasikasoni ni nganisyo syakuliwona kuti Mlungu ngakusiŵanonyela. Kwende tulole yampaka tulijiganye kwa ndumetume Paulo.
YAMPAKA TULIJIGANYE PA YAŴASIMENE NAYO PAULO
7. Ana Paulo jwasimene ni yakusawusya yamtuli?
7 Ana akusalipikana kuti akwete maudindo gejinji, mwamti akusayiwonaga kuti yili yakusawusya kuti atendeje chilichose chenene. Naga yili myoyo, nikuti mpaka ampikanichisye Paulo. Jwalakwe jwadandawulaga yachajile pakujikamuchisya “mipingo josope” jajapali pandaŵijo, ngaŵaga mpingo umpepe. (2 Akoli. 11:23-28) Ana akwete ulwele kapena yakusawusya yine yayikusatendekasyaga kuti akasangalalaga. Naga yili myoyo, nombenajo Paulo jwalasile ni chakusawusya chine chiŵachikolasile kuti chaliji “chakusoma mpela miŵa mchilu” mwakwe. Chakusoma chelechi komboleka kuti chaliji ulwele, mwamti jwaŵendile kuti chityoche. (2 Akoli. 12:7-10) Ana ndaŵi sine akusatengukaga ligongo lya yakulemwa yawo. Nombenajo Paulo jwatengukaga ndaŵi sine. Mwamti jwalakwe ŵayiche pakuŵecheta maloŵe gakulidandawulila gakuti, “Kongwene!” Yaliji myoyo ligongo lyakuti ŵalimbanaga kwandaŵi jelewu ni yakulemwa yakwe.—Alo. 7:21-24.
8. Ana Paulo jwakombwele chamtuli kupilila yakusawusya yaŵasimanaga nayo?
8 Paulo jwapitilisye kumtumichila Yehofa atamose kuti jwasimene ni yakusawusya yejinji. Ana jwakombwele chamtuli yeleyi? Atamose kuti jwalimbanaga mnope ni yakulemwa yakwe, jwakulupililaga mbopesi jakutuwombola. Paulo jwagamanyililaga chenene maloŵe gaŵasasile Yesu kuti, ‘Jwalijose jwakumkulupilila [Yesu] . . . chachikola umi wangamala.’ (Yoh 3:16; Alo. 6:23) Paulo ŵaliji jumo mwa ŵandu ŵaŵakulupililaga mbopesi ja Yesu. Jwalakwe jwamanyililaga kuti Yehofa ali jwakoseka kumkululuchila mundu jwalijose naga ali apitikwiche mtima, atamose kuti jwatesile ulemwa wekulungwa.—Sal. 86:5.
9. Ana tukulijiganya chichi pa maloŵe gaŵaŵechete Paulo pa Agalatiya 2:20?
9 Paulo jwakulupililagasoni kuti chinonyelo cha Mlungu chikwete machili mpela muŵaŵechetele Klistu. (Aŵalanje Agalatiya 2:20.) Alole maloŵe gakulimbikasya gagakusimanikwa kumbesi kwa lilembali. Paulo jwasasile kuti, “Mwanache jwa Mlungu . . . jwanonyele ni kupeleka umi wakwe ligongo lya une.” Paulo nganachiwonaga chinonyelo cha Yehofa kuti chili chamnono, nikuganisyaga kuti, ‘Yehofa akusiŵanonyela abale ni alongo, nambo une nganaŵa anonyele.’ Paulo ŵakumbwisye ŵandu ŵa ku Loma kuti, “Pitwaliji ŵakulemwa, Klistu ŵatuwilile.” (Alo. 5:8) Pangali champaka chimlepelekasye Mlungu kutunonyela.
10. Ana tukulijiganya chichi pa lilemba lya Aloma 8:38, 39?
10 Aŵalanje Aloma 8:38, 39. Paulo jwakulupililaga yakuti Yehofa akusamnonyela, mwamti jwalembile kuti, “Pangali chindu chakutulekanganya . . . ni chinonyelo cha Mlungu.” Jwalakwe jwamanyililaga chenene mwaŵatendele yindu Yehofa ni mtundu wa Aisalaeli. Kupwatika pelepa, jwamanyililagasoni yaŵatite Yehofa pakumlosya chanasa jwalakwe. Mwakata mpaka tujile kuti Paulo jwakwete nganisyo syakuti, ‘Pakuŵa Yehofa jwapeleche mwanache jwakwe kuti awe ligongo lya une, ana panasoni champaka chindendekasye kukayichila yakuti jwalakwejo akusanonyela?’—Alo. 8:32.
Yehofa akusalola yindu yambone yatukutenda apano ni yatuchitenda msogolo, ngaŵaga yakulemwa yatwatesile munyuma (Alole ndime 11) *
11. Atamose kuti Paulo jwatesile yakulemwa yejinji mpela yakuyisala pa 1 Timoteyo 1:12-15, ligongo chichi jwaliji jwakusimichisya kuti Yehofa akusamnonyela jwalakwe?
11 Aŵalanje 1 Timoteyo 1:12-15. Komboleka kuti Paulo jwalagaga ni yindu yakusakala yaŵatesile mkanaŵe kuŵa Mklistu. Mwamti ngatukusimonga kuti jwalakwe jwayiche pakuŵecheta kuti mwa ŵandu wosope ŵakulemwa, jwalakwe ni jwali ‘jwakulemwa mnope.’ Jwalakwe mkanalijiganye usyesyene jwalagasyaga Aklistu ŵa mmisinda jejinji soni kukwisilila nganisyo syakuti ŵane awulajidwe. (Mase. 26:10, 11) Agambe ganisya mwakapikanile mumtima Paulo pakasimene ni Mklistu jwachinyamata jwele achinangolo ŵakwe ŵawulajidwe ligongo lyakuti Paulojo ni juŵajitichisye kuti yeleyi yitendekwe. Jwalakwe jwalijimbaga mnope magambo ligongo lya yakulemwa yaŵatesile. Nambope jwamanyililaga kuti pangali yampaka atende kuti achenje yindu yayalemwechekwe kala. Jwajitichisyaga kuti Klistu ŵawile ligongo lya jwalakwe, mwati jwalembile kuti, “Kupitila mwa umbone mtima wa Mlungu, une ndili mpela mumbelele muno.” (1 Akoli. 15:3, 10) Ana tukulijiganya chichi pelepa? Tujitichisyeje yakuti Yesu ŵawile ligongo lya m’weji. Soni jwalakwe ni juŵatesile yakuti tukombolecheje kuŵa paunasi wambone ni Yehofa. (Mase. 3:19) Yehofa akusalolaga mnope yatukutenda apano ni yatuchitenda kusogolo, ngaŵa yakulemwa yetu yakala. Chinga twalemwisye tuli kala jwa Mboni sya Yehofa kapena mkanituŵe.—Yes. 1:18.
12. Ana maloŵe ga pa 1 Yohane 3:19, 20, mpaka gatukamuchisye chamtuli patukuliwona kuti tuli ŵangasosekwa soni kuti pangali jwakusatunonyela?
12 Pakuganichisya yaŵatesile Yesu pakuwa ligongo lya wawojo, mwine mpaka aliwone kuti nganaŵa ŵakuŵajilwa kupochela mtuka wapenani mpela welewu. Ligongo chichi mpaka tulipikaneje chamti yeleyi? Mtima wetu mpaka utulambusyeje mwakututendekasya kuti tulipikaneje kuŵa ŵangasosekwa soni kuti pangali jwampaka atunonyele. (Aŵalanje 1 Yohane 3:19, 20.) Pandaŵi mpela jeleji, tukusosekwa kukumbuchila kuti Mlungu ali jwamkulungwa kujipunda ‘mitima jetu.’ Chinonyelo chakwete Yehofa soni yakusati pakutukululuchila, yikusaŵa yamachili mnope kupunda kaganisye kalikose kangaŵajilwa kampaka kaŵe mumtima mwetu. Tusimichisyeje mumtima mwetu kuti Yehofa akusatunonyela. Kuti tukombole kutenda yeleyi, tukusosekwa kuŵalangaga Maloŵe ga Mlungu ndaŵi syosope, kupopela kaŵilikaŵili soni kukunguluka ni ŵandu ŵakwe ŵali ŵakulupichika. Ligongo chichi kutenda yeleyi kuli kwakusosekwa mnope?
KUŴALANGA BAIBULO, KUPOPELA, SONI KOLA ACHIMJAWO ŴAKULUPICHIKA MPAKA KWAKAMUCHISYE
13. Ana kulijiganya Baibulo mpaka kutukamuchisye chamtuli? (Alole libokosi lyakuti “ Yagakuti Pakwakamuchisya Maloŵe ga Mlungu Ŵandu Ŵane.”)
13 Alijiganyeje Maloŵe ga Mlungu lisiku lilisyose. Kutenda yeleyi kuchakamuchisya kuti asiwoneje ndamo syambone syakwete Yehofa. Mwamti chachitanda kupikanichisya kuti Mlungu akusiŵanonyela wawojo. Kuganichisya yaŵalasile m’Maloŵe ga Mlungu kuchakamuchisya kuti aganisyeje chenene soni “kongolela yangalumbana” yayili munganisyo ni mumtima mwawo. (2 Tim. 3:16) Jwamkulungwa jwa mumpingo jwine lina lyakwe Kevin, jwalagaga ni nganisyo syakuliwona kuti ali jwangali mate, jwalakwe jwatite, “Kuŵalanga soni kuganichisya lilemba lya Salimo 103 kungamuchisye kuŵambala nganisyo syakuliwona kuŵa jwangali mate soni kupikanichisya mwakusambonela Yehofa.” Eva jwatumkolasile kundanda kula jwasasile kuti, “Lisiku lililyose ngusapata ndaŵi ja kuganichisya ya nganisyo sya Yehofa. Yeleyi yikusangamuchisyaga kuti sangalaleje nambosoni ngole chikulupi chakulimba.”
14. Ana lipopelo mpaka litukamuchisye chamtuli?
14 Apopeleje ndaŵi syosope. (1 Ates. 5:17) Ŵandu ŵali paujakwe soni ŵakusanonyelana, akusasaka pakapitaga ndaŵi mkanaŵechetane. Yeleyi yili yakulandana ni unasi wetu ni Yehofa. Pakupopela amsalileje Yehofa mwakupikanila mumtima. Yeleyi yikusalosya kuti akumdalila jwalakwe soni akumanyilila kuti akusiŵanonyela. (Sal. 94:17-19; 1 Yoh. 5:14, 15) Yua jwatumkolasile kundanda kula jwatite, “Pangupopela ngusamsalila Yehofa yindu yejinji, mmalo mwagamba kusala yayitendekwe palisikulyo. Ngusaŵa jwagopoka kumsalila Yehofa mwangupikanila mumtima. Sambano nguyiwona kuti Yehofa nganaŵa mpela bwana jwa pakampani. Nambo ali mpela Mtati jwakusiŵanonyela ŵanache ŵakwe.”—Alole libokosi lyakuti “ Ana Ŵaŵalasile?”
15. Ana Yehofa akusalosya chamtuli kuti akusatenda chidwi ni m’weji?
15 Akungulucheje ni achimjawo ŵakulupichika, ligongo jemanjaji ali mtuka wakutyochela kwa Yehofa. (Yak. 1:17) Atati ŵetu ŵa kwinani akusalosya kuti akusatunonyela mwakutupa abale ni alongo ŵakusatunonyela “ndaŵi ni ndaŵi.” (Mis. 17:17) M’chikalata chakwe chakwawula kwa Akolose, Paulo ŵasasile ya Aklistu ‘ŵaŵamkamuchisyaga mnope’ jwalakwe. (Akolo. 4:10, 11) Atamose Yesu Klistu jwayamichile yaŵatesile achimjakwe pakumkamuchisya. Ŵaŵamkamuchisyagaŵa pane ŵaliji ŵandu kapena malayika.—Luk. 22:28, 43.
16. Ana achimjetu ŵakulupichika mpaka atukamuchisye chamtuli kuŵa paunasi wambone ni Yehofa?
16 Ana wawojo akupata umbone wuliwose ligongo lya mtuka waŵapele Yehofa ŵakola achimjawo ŵakulupichika? Kumsalila mjawo jwakulupichika mwakupikanila mumtima ngayikusalosya kuti wawojo ali ŵakulepela. Nambo mpaka yakamuchisye mnope wawojo. Alole yaŵasasile James jwatumkolasile kundanda kula. Jwalakwe jwatite, “Kunguluka ni Aklistu ŵali paunasi wambone ni Yehofa kungamuchisye mnope paumi wangu. Naga ngulagasika nganisyo ni yindu yine yakwe, achimjangu ŵeleŵa akusambikanila mwakuwusimana mtima soni kungumbusya kuti akusanonyela. Yakusatenda jemanjaji yikusangamuchisya kumanyilila kuti Yehofa akusanonyela mnope soni akusanganichisya.” Kusala yisyene, tukusosekwa kuŵa paunasi wambone ni abale ni alongo soni kutenda yakuti unasiwo ukamala.
ATENDEJE YINDU YAKUTI YEHOFA APITILISYE KWANONYELA
17-18. Ana tukusosekwa kwapikanila ŵani? Ligongo chichi tukusosekwa kutenda yeleyi?
17 Satana akusasaka kuti tujimiche makono, mwakuleka kutenda yindu yambone. Akusasaka kuti tuganisyeje kuti Yehofa ngakusatunonyela, soni kuti nganituŵa ŵakuŵajilwa kumtumichila. Nambo mpela mwatuyiwonele munganiji, yeleyi nganiyiŵa yikomboleche soni yili yaunami.
18 Yehofa akusiŵanonyela wawojo. Jwalakwe akusiŵawona wawojo kuti ali ŵakusosekwa mnope. Naga akumpikanila, jwalakwe chachipitilisya ‘kwanonyela’ mpaka kalakala mpela muŵatendele ni Yesu. (Yoh. 15:10) Myoyo ngakusosekwa kumpikanila Satana, kapena kuwupikanila mtima wawo wampaka walambusyeje kuti wawojo ali ŵangasosekwa kwa Mlungu. Mmalo mwakwe, ampikanileje Yehofa jwakusalola yiliyose yambone yakusakombola kutenda jwalijose. Aŵeje ŵakusimichisya kuti Yehofa “akusasangalalaga ni ŵandu ŵakwe” kupwatikapo wawojo.
NYIMBO NA. 141 Mtuka Wakusimonjesya wa Umi
^ ndime 5 Abale ni alongo ŵane yikusiyasawusya kukulupilila kuti Yehofa akusiŵanonyela. Mungani ajino chitukambilane ligongo lyakwe mpaka tuŵe ŵakusimichisya kuti Yehofa akusamnonyela jwalijose pajika. Chitukambilanesoni mwampaka tumalane ni nganisyo syakulipikana kuti Yehofa ngakusatunonyela.
^ ndime 2 Mena gane munganiji tugachenjile.
^ ndime 67 KULONDESYA YIWULILI: Paulo mkanaŵe kulijiganya usyesyene, ŵajigalilaga Aklistu kundende. Jwalakwe paŵalijiganyisye yakwamba Yesu jwachenjile ni ŵatandite kwalimbikasya abale ni alongo ŵele komboleka ŵane mwa ŵachibale ŵawo ŵalagasidwe ni Paulojo m’yaka yipiteyo.
