DILONGI 17
Ngie Luvalu Beni Widi Kuidi Yave!
“Yave wunkuangalalanga mu bisadi biandi.”—MINKU. 149:4.
NKUNGA 108 Luzolo Lukuikama lu Nzambi
MAMBU TUANLONGUKA *
Tat’itu yi diyilu wunkuangalalanga mu kadika mutu mu befu (Tala lutangu 1)
1. Mbi Yave Nzambi kammonanga kuidi bisadi biandi?
YAVE NZAMBI, ‘wunkuangalalanga mu bisadi biandi.’ (Minku. 149:4) Ayi mayangi beni kuzaba mawu! Kibila mawu mansundula ti Yave wummonanga zikhadulu zitu zimboti ayi mo tulenda nunga kuvanga. Diawu nandi katu tumisina mu kimvuka kiandi. Befu kutatamana bakuikama mu Yave, Nandi wala tatamana kutu fikama mvu ka mvu!—Yoane 6:44.
2. Kibila mbi bankaka bammuenanga phasi kukikinina ti Yave wu bazolanga?
2 Zikhomba ziwombo bantubanga ti Yave wunzolanga bisadi biandi bioso. Vayi buidi yilenda bela lufiatu ti Yave wuku phuanga nkinza?’ Ayi mbi bilenda vanga khomba kuyivana kiuvu akiokio? Oksana * wuviokila mu mambu ma phasi mu bumuana buandi, wutuba: “Yiyangalala beni bo yi botama ayi yiba ntuami ntuala. Vayi bo vavioka 15 di mimvu yitona kuyindula mambu mambi yiviokila mu bumuana. Diawu yimuena ti yisi ko luvalu va meso ma Yave ayi yisa fuana ko kutambula luzolo luandi.” Yua, widi ntuami ntuala mvandi wuviokila mu mambu ma phasi mu bumuana, wutuba: “Yikivana kuidi Yave kibila yaba tomba kunkuangidika. Vayi yiba divuda boti Yave wuku tsolanga.”
3. Mambu mbi tuenlonguka mu dilongi adidi?
3 Dedi zikhomba aziozio tuma tubila mu matangu mama vioka, ngie wunzolanga Yave vayi ḿba widi divuda ti nandi wuku zolanga. Vayi kibila mbi fueti bela lufiatu ti Yave wuku vuanga nkinza? Ayi mbi fueti vanga ngie kuba mayindula ti Yave kaku zolanga ko? Tuambaka mimvutu mi biuvu abiobio.
WIDI NTAMBU KUBA DIVUDA TI YAVE WU KUZOLANGA
4. Kibila mbi widi ntambu kuba divuda ti Yave wu tuzolanga?
4 Befu kuba lufiatu ti Yave wu tuzolanga, tuala kukivana muingi kunsadila mu ntim’itu woso kheti bo tumviokila mu ziphasi. Vayi befu kuba divuda ti Yave katu zolanga, ‘zingolo zitu ziala mana.’ (Zinga. 24:10) Befu kuba mu kiunda ayi kukhambu kiminu mu luzolo lu Nzambi, tualasa ba ko bakuikama mu mintambu mi Satana.—Efe. 6:16.
5. Mbi bimonika kuidi zikhomba baba divuda ti Yave wu bazolanga?
5 Zikhomba ziwombo mu bilumbu bitu bavonga mu kiphevi kibila baba divuda ti Yave wuba zolanga. Dedi, nkulutu wumueka wu kimvuka bantedilanga James, wutuba: “Kheti minu yinsadilanga ku beteli ayi yikivananga mu kisalu ki kusamuna mu kimvuka bankolukanga mbembu yinkaka, vayi minu yimbanga divuda boti Yave wumvuanga nkinza mambu yimvanganga. Mvandi yikiyuvusanga boti Yave wu nkuwanga minsambu miama.” Eva mvandi widi mu kisalu ki thangu ka thangu wutuba: “Widi ntambu kuyindula ti Yave katu zolanga ko. Kibila malenda kuphutula mbusa mu mamoso yilenda vanga mu kisalu ki Yave.” Mvandi Michael widi ntuami ntuala ayi nkulutu wu kimvuka wutuba: “Ngie kuyindula ti Nzambi ka kuvuanga ko nkinza, malenda kuvanga ngie wuntatuka.”
6. Mbi tufueti vanga befu kuba divuda ti Nzambi wutu zolanga?
6 Bifuani abiobio tuma tubila mu matangu amomo, bimmonisa ti befu kuyindula ti Yave katu zolanga ko, tulenda vongisa kiminu kitu. Vayi mbi tufueti vanga befu kuba mayindu amomo? Dinda lusadusu lu Yave muingi wuba mayindu mamboti ayi ka kuvana ‘ndembama yiviokidi diela dioso, yela kieba ntima’aku ayi mayindu maku.’ (Minku. 139:23; Fili. 4:6, 7) Ayi tebuka moyo ti vadi zikhomba ziwombo badi mu kunuana nzingu wu mayindu amomo mambi. Mvandi vadi bisadi biwombo bi Yave mu thangu yikhulu banuana nzingu awowo. Tala mambu tuanlonguka mu kifuani ki mvula Polo.
MAMBU TUANLONGUKA MUKIFUANI KI MVULA POLO
7. Mambu mbi maphasi mvuala Polo kaviokila?
7 Khumbu zinkaka ngie wummonanga bikaku muingi wununga kuvanga biyeku biaku? Boti buawu, buna ngie wulenda visa mambu mvuala Polo kaviokila. Nandi waba kuazuka beni mu kuba mayindu kubika to mu kimvuka kimueka vayi ‘mu bimvuka bioso.’ (2 Koli. 11:23-28) Mvandi kukhambu ku buvinya bumboti kuaba manisanga mayangi mandi. Diawu katubila ti wuba ‘nsongo mu nsuni’, mawu maba sundula ti wuba kimbevo kingolo kiaba kuntuadisa kiunda ayi ziphasi. (2 Koli. 12:7-10) Ngie widi mu kiunda kibila widi mu kumviokila mu kimbevo voti mu mambu mankaka? Dedi mvuala Polo, ngie ḿba wulenda ba mayindu mo nandi kaba bo katuba, ‘yidi mutu wuphamba.’ Kibila nandi wuviokila mu mambu mawombo ma phasi.—Loma 7:21-24.
8. Mbi bisadisa mvuala Polo kukindama mu mambu kaviokila?
8 Kheti mvuala Polo wuviokila mu mambu mawombo mathota kiminu kiandi, vayi nandi kasa vonga ko kusadila Yave. Mbi binsadisa kabika kuvonga? Kheti wuzaba ti wuba mutu wu masumu, vayi nandi wuba kiminu kingolo mu nkhayilu yi khudulu. Mvandi wuvisa lukanu Yesu kavana bo katuba ‘woso wukunlekila kiminu . . . Wala baka luzingu lu mvu ka mvu.’ (Yoane 3:16; Loma 6:23) Bukiedika, mvuala Polo wuba mu khati dingumba di batu baba kiminu ki ngolo mu nkhayilu yi khudulu. Nandi wuzaba buboti ti Yave wunlemvukilanga mutu benyongina masumu mandi kheti masumu beni madi mangolo.—Minku. 86:5.
9. Mbi tulenda longuka mu mambu mvuala Polo katuba mu Ngalatia 2:20?
9 Mvuala Polo mvandi wuba kiminu mu Nzambi, kibila wukikinina kuvana muan’andi Yesu. (Tanga Ngalatia 2:20.) Tala khindusulu yidi kutsuka lutangu alolo. Mvuala Polo wutuba: ‘Muana Nzambi . . . wu kunzolanga ayi Wufuila mu kibila kiama.’ Mvuala Polo kasa tula ko ndilu mu luzolo Nzambi kaba mu nandi. Diawu kasa yindudila ko phila ayiyi: ‘Yimmonanga ti Nzambi wunzolanga zikhomba zinkaka vayi minu ndamba.’ Vayi nandi wutebula moyo basi Loma bo katuba: ‘Nzambi wutumonisa luzolo luandi buna tukhidi bankua masumu.’ (Loma 5:8) Bukiedika, luzolo lu Nzambi luisi ko ndilu!
10. Mbi tulenda longuka mu matangu ma Loma 8:38, 39?
10 Tanga Loma 8:38, 39. Mvuala Polo wuba lufiatu ti Nzambi wu kunzolanga. Diawu nandi kasonikina ti ‘vasi ko ni kiuma kilenda kutu vambisa mu luzolo lu Nzambi.’ Nandi mvandi wumona phila Yave kamonisina mvibudulu ayi kiadi kuidi dikabu di Isaeli. Diawu, dedi mvuala Polo tulenda tuba mu lufiatu ti, ‘boti Yave wuba wukubama muingi kuvana muan’andi kafuila mu kibila kiama, kibila mbi yifueti bela divuda mu luzolo luandi?’—Loma 8:32.
Kuidi Nzambi, mambu wumvanga bubu ayi mu bilumbu binkuiza, mawu malutidi nkinza, kubika kuandi zinzimbala wuvanga ku mbusa (Tala lutangu 11) *
11. Kheti mvuala Polo wuvanga zinzimbala ziwombo dedi bummonisina 1 Timoteo 1:12-15, kibila mbi nandi kabela lufiatu ti Nzambi waba kunzolanga?
11 Tanga 1 Timoteo 1:12-15. Vaba thangu mvuala Polo kaba banga mu kiunda mu kibila ki zinzimbala kavanga kumbusa. Diawu khumbu zinkaka kayitedila ‘nsumuki wulutidi’! Ayi mawu masi ko maku kuitukila, kibila ava nandi kazaba kiedika waba kuamisanga bakhisto mu bibuangu biwombo ayi bawombo mu bawu waba kuba tulanga mu buloku. Mvandi waba kikininanga bavonda bankaka. (Mava. 26:10, 11) Wulenda yindula khumbu zinkaka buidi mvuala Polo kaba belanga mu kiunda bo kankuenda mu kimvuka ayi kanzaba ditoko wufuilu matata mu kibila ki zikhuamukusu kavangila baklisto ava nandi kaba nlandikini Yesu? Mvuala Polo wunyongina zinzimbala ziandi ayi wuzaba ti kalendi vanga ko ni diambu muingi kubalula mambu kavanga kumbusa. Vayi nandi wukikinina ti Klisto wufuila mu kibila ki masumu mandi ayi wusonika mu lufiatu ti: ‘Boti minu yidi, buna mu kibila ki mamboti ma Nzambi mo yikhambu fuana kutambula.’ (1 Koli. 15:3, 10) Mbi tulenda longuka mu mawu? Kikinina ti Yesu wufuila mu kibila kiaku ayi wuzibula nzila muingi ngie wubaka kikundi kifikama na Yave. (Mava. 3:19) Ayi tebukanga moyo ti kuidi Nzambi mambu wumvanga bubu ayi mu bilumbu binkuiza kuntuala mawu malutidi nkinza, kubika kuandi mambu wuvanga kumbusa kheti wuba Mbangi yi Yave voti ndamba.—Yesa. 1:18.
12. Mu thangu tummona ti tuisi ko luvalu va meso ma Yave, buidi matangu ma 1 Yoane 3:19, 20 malenda kutu sadisila?
12 Bo wunyindula ti ngie wulenda baka nlemvu wu masumu maku mu nzila lufua lu Yesu, mba ngie wulenda tuba: ‘Minu yisa fuana ko kutambula nkhayilu awowo.’ Vayi kibila mbi mutu kalenda yindudila phila ayoyo? Kibila bo tuidi batu ba masumu, khumbu zinkaka tunyindulanga ti tuisi ko luvalu va meso ma Nzambi. (Tanga 1 Yoane 3:19, 20.) Diawu, befu kuba mayindu amomo tufueti tebuka moyo ti ‘Nzambi lutidi kena mintima mitu.’ Nlemvu ayi luzolo lu Tat’itu yi diyilu lulutidi kena mabanza mambi tulenda ba mu ntima. Mvandi, tufueti kuna lufiatu mu befu veka ayi kukikinina phila yimboti Yave katu tadilanga. Diawu muingi tununga kuvanga mawu, tufueti tatamana kulonguka Kibibila, kusambila ayi kukutakananga va kimueka mu zikhutukunu na dikabu di Yave dikuikama. Kibila mbi didi diambu dinkinza kuvanga mawu?
NDONGUKULU YI KIBIBILA, NSAMBU AYI BAKUNDI BAKIEDIKA BALENDA KUTU SADISA
13. Buidi Diambu di Nzambi dilenda kutu sadisila? (Tala quadro yintuba: “ Buidi Diambu di Nzambi di Basadisila?”)
13 Longuka Diambu di Nzambi kadika kilumbu, mawu mala kusadisa kuzaba zikhadulu zi Yave. Kubotula thangu muingi kuyindula mu mambu wuntanga mu Diambu di Nzambi, mala kusadisa kuba ‘mayindu mafuana, kuludika mabanza maku ayi ntim’aku.’ (2 Timo. 3:16) Kevin widi nkulutu kimvuka wunuana nzingu wu mayindu mambi, wutuba: “Kutanga Minkunga 103 ayi kuyindula mu mambu beni, matsadisa kuba mayindu mamboti ayi kuvisa mayindu Yave kadi mu minu.” Eva tube tubila kumbusa wubue tuba: “Kutsuka kilumbu minu yimbotulanga thangu muingi kuyindula mabanza Yave kadi mu minu. Ayi mawu mankuangidikanga ntim’ama, maku phananga ndembama ayi mankindisanga kiminu kiama.”
14. Buidi nsambu wulenda kutu sadisila?
14 Tatamana kusambila. (1 Tesa. 5:17) Muingi kikundi tuidi na mutu wunkaka kiba kingolo, tufueti kolukanga yandi ayi kukambasananga kiedika. Mawu mvandi tufueti vanga mu kikundi kitu na Yave. Befu kuba kikundi kimboti na Yave, tuala kunzabikisa mayindu mitu, mabanza mitu ayi mambu ma tukuazula mu nzila nsambu. Befu kuvanga mawu, tuala monisa ti tukumfiatilanga ayi tuidi lufiatu ti Yave wutu zolanga. (Minku. 94:17-19; 1 Yoane 5:14, 15) Khomba Yua tube tubila mu matangu mabe vioka, wubue tuba: “Bo yinsambila kuidi Yave yinzabikisanga ko to mambu yimvanga mu kilumbu vayi yikunzibudilanga mabanza mama matsi ntima. Buviokila thangu yisa bue tadila ko Yave banga mfumu kikola voti yi kisalu vayi banga tata widi luzolo mu bana bandi.”—Tala quadro yintuba: “ Ngie Wumana Tanga Yawu?”
15. Buidi Yave kammonisinanga ti wumvuanga nkinza kadika mutu mu befu?
15 Ba nkangulu na bakundi bakuikama; bawu badi nkhayilu wu Yave. (Yako. 1:17) Tat’itu yi diyilu wummonisanga ti wutu vuanga nkinza mu kutuvana dikanda di kiphevi didi zikhomba zi babakala ayi zi bakieto ba tumonisanga ‘luzolo zithangu zioso.’ (Zinga. 17:17) Mu nkanda mvuala Polo kasonikina basi Kolosai, nandi wutubila matedi zikhomba ziwombo bambuela mioko ayi wutuba ti bawu baba ‘tho yi khindusulu yi ngolo kuidi nandi.’ (Kolo. 4:10, 11) Yesu mvandi waba kikininanga ayi waba vutulanga matondo mu lusadusu katambula kuidi bakundi bandi, kuba kuandi zimbasi voti batu ba kinsuni.—Luka 22:28, 43.
16. Buidi bakundi bakuikama balenda kutu sadisila kufikama Yave?
16 Ngie widi mu kubaka beni ndandu mu bakundi bakuikama Yave ka kuvana? Kuzabikisa mambu ma tukuazula kuidi nkundi wuyonzuka mu kiphevi, masinsundula ko ti tuidi balebakana. Vayi luawu lulenda ba lusadusu. Tala mambu James tube tubila ku mbusa kabue tuba: “Bakundi bayonzuka mu kiphevi ba kutsadisanga beni bo mayindu mambi ma kukhuizila. Kibila bawu ba kukhuwanga mu mvibudulu ayi bammonisanga luzolo badi mu minu. Mawu ma kutsadisanga kumona bivisa bi lukiebu ayi luzolo Yave kadi mu minu.” Diawu, didi diambu di nkinza kuvanga kikundi kimboti ayi kifikama na zikhomba zitu zi kiphevi!
TATAMANA MU LUZOLO LU YAVE
17-18. Nani tufueti kuwa ayi kibila mbi?
17 Satana wuntomba tuvonga ayi tuvutuka mbusa muingi tubika vanga mambu masulama. Ayi nandi wuntomba tukikinina ti Yave ka tuzolanga ko ayi ka tuvuanga ko nkinza. Mvandi wuntomba tukikinina ti tusa fuana ko kutambula nkhayilu yi khudulu. Vayi dedi bo tuma muena, mawu masi ko makiedika.
18 Yave wu kuzolanga. Zaba ti ngie widi luvalu va meso mandi. Ngie kuntumukina dedi bo Yesu kavangila, wala tatamana mu luzolo luandi mvu ka mvu. (Yoane 15:10) Diawu bika kukuwa mambu Satana kantuba voti mabanza mambi madi mu ntim’aku. Vayi yuwa Yave wummonanga mamboti mu kadika mutu mu befu. Ayi ba lufiatu ti Yave wunkuangalalanga mu bisadi biandi bioso, kubunda mvandi ngiewu!
NKUNGA 141 Mangitukulu Matedi Moyo
^ Lut. 5 Zikhomba ziwombo zi babakala ayi zi bakieto bammonanga phasi kukikinina ti Yave wuba zolanga. Mu dilongi adidi, tunkuiza mona kibila mbi tulenda bela lufiatu ti Yave wunzolanga kadika mutu mu befu. Mvandi tunkuiza fiongunina buidi tulenda manisina divuda tulenda ba ti Yave wutu zolanga.
^ Lut. 2 Babalula mazina mankaka mu dilongi adidi.
^ Lut. 67 MAMBU MADI MU ZIMFIKULA: Kumbusa, mvuala Polo wutula baklisto bawombo mu buloku. Vayi bo kayiza ba nlandikini wu Yesu, nandi wubalula mavanga mandi, wukindisa zikhomba ziandi zi kiphevi ayi bawombo mu bawu, baba makanda ma batu kaba kuamisanga.
