ARTÍCULO DE ESTUDIU 17
Nadxii Jehová cada tobi de ca xpinni
«Riuulaʼdxiʼ Jehová ni runi xquidxi» (SAL. 149:4).
CANCIÓN 108 Qué rusaana Dios de gannaxhii
NI ZAZÍʼDINU *
Riuulaʼdxiʼ Bixhózenu ni nuu guibáʼ ni runi cada tobi de laanu. (Biiyaʼ párrafo 1).
1. ¿Ximodo ruuyaʼ Jehová xquidxi?
GUIZÁʼ riéchenu purtiʼ nánnanu «riuulaʼdxiʼ Jehová ni runi xquidxi» (Sal. 149:4). Ruuyabe ca cualidad sicarú nápanu, xi zanda gúninu ne rudiibe lugar gaca xhamígunu laabe. Pa qué guixélenu de Jehová, siempre ziuube gaxha de laanu (Juan 6:44).
2. ¿Xiñee raca nagana para caadxi hermanu guni crecaʼ nadxii Jehová laacaʼ?
2 Zándaca nuu tu laa guiníʼ: «Nannaʼ nadxii Jehová xquidxi, peru ¿ximodo gannaʼ nadxiibe naa yaʼ?». ¿Xiñee nuu hermanu riníʼ ique zacá? Guidúʼyanu xi guníʼ Oksana, * ti hermana ni gudiʼdiʼ ra nagana dxi nahuiiniʼ: «Guyuaaʼ nayecheʼ dxi guyuaanisaʼ ne gucaʼ precursora. Peru 15 iza despué, guyuaaʼ triste purtiʼ bietenaladxeʼ ca cosa ni bizaacaʼ dxiqué. Guníʼ iqueʼ maʼ qué riuulaʼdxiʼ Jehová ca cosa ni runeʼ ne cadi naquiiñeʼ gannaxhiibe naa». Ne ti precursora láʼ Yua ni laaca gudiʼdiʼ ra nagana dxi nahuiiniʼ, guníʼ: «Gucaʼ dedicar Jehová purtiʼ racalaʼdxeʼ gusiecheʼ laa. Peru guníʼ iqueʼ qué ziuu dxi gannaxhiibe naa».
3. ¿Xi pregunta zacábinu lu artículo riʼ?
3 Cásica guiropaʼ hermana riʼ, laanu laaca guizáʼ nadxiinu Jehová peru zándaca gaca nagana para laanu guni crenu nadxiibe laanu. Lu artículo riʼ zacábinu chupa pregunta: ¿xiñee naquiiñeʼ guni crenu nadxii Jehová laanu? ne ¿xi zanda gúninu pa chuʼ dxi guiníʼ íquenu cadi nadxiibe laanu?
TI PELIGRU NGA GUINÍʼ ÍQUENU CADI NADXII JEHOVÁ LAANU
4. ¿Xiñee ti peligru nga guiníʼ íquenu cadi nadxii Jehová laanu?
4 Pa runi crenu dxandíʼ nadxii Jehová laanu, zacané nga laanu gúninu ni nabe neca guidxaagalunu guendanagana. Peru pa guiníʼ íquenu cadi nadxii Jehová laanu la? «zará stipa» stinu (Prov. 24:10). Ne pa guireʼnu gana ne guiníʼ íquenu cadi nadxii Jehová laanu, zaca nagana gudxíʼlunu guiráʼ ni gulaa Binidxabaʼ luguianu (Efes. 6:16).
5. ¿Xi huazaaca caadxi hermanu ni huaníʼ ique cadi nadxii Dios laacaʼ?
5 Nuu hermanu riníʼ ique cadi nadxii Jehová laa ne pur nga rirá fe sticaʼ. Ti ancianu ni láʼ James, guníʼ: «Neca runeʼ servir Betel ne runeʼ predicar ndaaniʼ ti congregación de sti idioma, guníʼ iqueʼ pa riuulaʼdxiʼ Jehová guiráʼ ni runeʼ. Laaca guníʼ iqueʼ maʼ qué rucaadiaga Dios ca oración stinneʼ». Eva, ti hermana ni laaca runi servir de tiempu completu guníʼ: «Bidieeʼ cuenta ti peligru nga guiníʼ íqueluʼ cadi nadxii Jehová lii, purtiʼ maʼ qué zudii gana lii gúniluʼ ni nabe. Ne maʼ qué ziuuluʼ nayecheʼ ora guni servirluʼ laabe dede maʼ qué ridxélaluʼ xi gúniluʼ». Ne ti precursor regular ne ancianu láʼ Michael guníʼ: «Pa guiníʼ íqueluʼ qué rizaalaʼdxiʼ Dios lii, chaahuidugá zaxéleluʼ de laabe».
6. ¿Xi naquiiñeʼ gúninu ora guiníʼ íquenu cadi nadxii Dios laanu yaʼ?
6 Ni guníʼ ca hermanu riʼ zacaneni laanu guiénenu ti peligru nga guiníʼ íquenu cadi nadxii Dios laanu. ¿Xi naquiiñeʼ gúninu ora guiníʼ íquenu cadi nadxii Dios laanu ya? Naquiiñeʼ cueenu ni de ndaaniʼ íquenu nagueendaca. Ne ti cosa ni zanda gúninu nga guinábanu Jehová gudii laanu paz stiʼ, laani zápani ladxidoʼno ne xquendabiaaninu para gucáʼnanu xiixa ni cuchiiñaʼ xquendabiaaninu (Sal. 139:23; nota; Filip. 4:6, 7). Ne cadi guiaandaʼ laanu, laaca nuu xcaadxi hermanu ni cayuni stipa para cadi guiníʼ ique cadi nadxii Jehová laa. Dede guyuu caadxi xpinni Jehová ni bibani dxiqué biʼniʼ sentircaʼ zacá. Guidúʼyanu xi zanda guizíʼdinu de ejemplu stiʼ apóstol Pablo.
NI RIZÍʼDINU DE EJEMPLU STIʼ PABLO
7. ¿Xi guendanagana gupa Pablo?
7 ¿Ñee nápanu stale responsabilidad dede nuu biaje riníʼ íquenu qué zanda guni cumplirnu cani la? Zacaca biʼniʼ sentir apóstol Pablo. Laa guníʼ guizáʼ riuu «xizaa pur ca congregación» (2 Cor. 11:23-28). ¿Ñee cayuni sufrirnu purtiʼ nápanu ti guendahuará ne pur laani maʼ qué riuʼnu nayecheʼ la? Laaca qué nidxela Pablo xi ñuni purtiʼ qué ganda cuee «ti guichi» lu beela ladi, zándaca gúcani ti guendahuará ni gúpabe (2 Cor. 12:7-10). ¿Ñee rireʼnu gana purtiʼ nácanu binni ruchee la? Laaca biree Pablo gana ne guníʼ guizáʼ biʼniʼ stipa para guni ni jneza (Rom. 7:21-24).
8. ¿Xi gucané Pablo para cadi gusaana de guni ni ná Jehová neca gupa guendanagana?
8 Neca gupa Pablo stale guendanagana qué nusaana de ñuni ni ná Jehová. ¿Xi gucané laabe yaʼ? Neca nánnabe xii nga ca cosa ni ribee gana laabe, gúpabe fe guti Cristu pur binni. Ne gunna dxíchibe guiráʼ tu gapa fe Jesús zacaa «guendanabani ni qué zaluxe» (Juan 3:16; Rom. 6:23). Nanna dxíchinu gupa Pablo fe guti Cristu pur binni. Laaca gunna dxíchibe racalaʼdxiʼ Jehová guni perdonar ca ni biʼniʼ xiixa pecadu grave pa maʼ guca arrepentircaʼ de guidubi ladxidoʼcaʼ (Sal. 86:5).
9. ¿Xi rizíʼdinu de ca diidxaʼ bicaa Pablo lu Gálatas 2:20?
9 Biʼniʼ cré Pablo guizáʼ nadxii Dios laa purtiʼ nanna biseendaʼ Dios Jesús gatiʼ pur laa. Guidúʼndanu ca diidxaʼ bicaa Pablo ra maʼ ziluxe Gálatas 2:20 (biindaʼ ni). Pablo guníʼ: «Xiiñiʼ Dios, ni nadxii naa ne ni bidii xpida pur naa». Qué niníʼ ique Pablo zusaana Dios de gannaxhii laa, casi ñaca niníʼ ique: «Rieneʼ xiñee nadxii Jehová ca hermanu stinneʼ, peru nagana gannaxhiibe naa». Lugar de niníʼ íquebe zacá la? sicaríʼ gúdxibe ca romano: «Guti Cristu pur laanu dxi nácarunu pecador» (Rom. 5:8). Qué rusaana Dios de gannaxhii laanu.
10. ¿Xi rusiidiʼ Romanos 8:38, 39 laanu?
10 (Biindaʼ Romanos 8:38, 39). Gunna Pablo guizáʼ nadxii Dios laa, ngue runi bicaa gastiʼ «qué zanda guxheleʼ laanu de guendarannaxhii stiʼ Dios». Gúnnabe gupa Jehová paciencia guidxi Israel. Laaca gúnnabe biá Jehová laabe, casi ñaca niníʼ Pablo: «Pa biseendaʼ Jehová Xiiñiʼ para gatiʼ pur naa, qué gapaʼ xi pur guiníʼ iqueʼ cadi nadxiibe naa» (Rom. 8:32).
Ni rusisaca Dios nga ni rúninu yanna ne lu ca dxi ni zeeda ca ne cadi ca cosa ni cadi jneza bíninu dxiqué. (Biiyaʼ párrafo 11). *
11. Neca biʼniʼ Pablo cosa ni cadi jneza casi ni riete lu 1 Timoteo 1:12-15, ¿xiñee gunna dxíchibe nadxii Dios laabe?
11 (Biindaʼ 1 Timoteo 1:12-15). Nánnanu guyuu biaje biʼniʼ sentir Pablo napa donda pur ca cosa ni cadi jneza biʼniʼ dxiqué. Laabe guniʼbe nácabe «ni jma pecador» lade guiráʼ pecador. Ante gúnibe ni ná Jehová, nabé feu modo guzanándabe ca xpinni Cristu ndaaniʼ stale guidxi, biseguyoobe caadxi de laacaʼ ne bidiibe lugar guuti binni laacaʼ (Hech. 26:10, 11). Guxuíʼlunu dxiqué bidii Pablo lugar guuti binni ti guendaxheelaʼ ni naca xpinni Cristu ne yanna runibiaʼbe xiiñicaʼ. ¿Ximodo biʼniʼ sentir Pablo yaʼ? Guyuube triste pur ca cosa ni cadi jneza bíʼnibe. Peru nánnabe qué zanda gúnibe gastiʼ para gudxiguétabe tiempu. Gunna dxíchibe guti Cristu pur laabe ngue runi gunda bicaabe ca diidxaʼ riʼ: «Yanna maʼ nacaʼ ni nacaʼ purtiʼ guca Dios nachaʼhuiʼ né naa» (1 Cor. 15:3, 10). ¿Xi rizíʼdinu de ejemplu stiʼ Pablo yaʼ? Laaca naquiiñeʼ guni crenu guti Cristu pur cada tobi de laanu ne zacá zanda gaca xhamígunu Jehová (Hech. 3:19). Ni risaca para Dios nga ni gúninu yanna ne lu ca dxi ni zeeda ca, ne cadi ca cosa ni cadi jneza ni bíninu dxiqué neca maʼ nácanu testigu stiʼ Jehová o coʼ (Is. 1:18).
12. Casi ná 1 Juan 3:19, 20, ¿xi caquiiñeʼ gúninu pa runi sentirnu qué risácanu o qué runi merecernu gannaxhiicabe laanu?
12 Nuu biaje zanda quiteʼ ladxidoʼno laanu ne gucaani laanu guni sentirnu qué risácanu o qué runi merecernu gannaxhiicabe laanu (biindaʼ 1 Juan 3:19, 20). Nga runi, zándaca guiníʼ íquenu qué zanda gacané guendaguti stiʼ Jesús laanu. Ora guni sentirnu zacá, guietenaláʼdxinu «jma nandxóʼ Dios que ladxidoʼno». Neca guni sentirnu cadi nadxii ne qué runi perdonar Bixhózenu ni nuu guibáʼ laanu, peru dxandíʼ nadxiibe ne runi perdonarbe laanu. Ne ndiʼ nga ni naquiiñeʼ cuʼnu ndaaniʼ ladxidoʼno. Para ganda gúninu ni la? caquiiñeʼ guni estudiarnu Stiidxabe guiráʼ dxi, cadi gusaana de guni orarnu ne chuʼnu gaxha de ca hermanu stinu. Guidúʼyanu xiñee nabé risaca gúninu guionnaʼ cosa riʼ.
NAQUIIÑEʼ GUNI ESTUDIARNU, GUNI ORARNU NE CHUʼNU GAXHA DE CA HERMANU
13. Pa guni estudiarnu Stiidxaʼ Dios, ¿ximodo zacaneni laanu? (Laaca zanda gúʼyaluʼ cuadru ni láʼ « Ximodo racané Stiidxaʼ Dios laacabe»).
13 Guni estudiarnu stiidxaʼ Dios guiráʼ dxi. Pa gúninu ni la? jma zunibiaʼnu modo naca Jehová ne zudiʼnu cuenta pabiáʼ nadxiibe laanu. Pa guiráʼ dxi guiníʼ íquenu ni zeeda lu Biblia, zacaneni laanu guiníʼ íquenu jma jneza ne zuni «corregirni» xquendabiaaninu ne ladxidoʼno (2 Tim. 3:16). Ti ancianu láʼ Kevin ni guníʼ ique huaxiéʼ risaca guníʼ: «Ora biindaʼ Salmo 103 ne guníʼ ique ni nani gucaneni naa ne bieneʼ ximodo ruuyaʼ Jehová naa». Eva, hermana ni bizéʼtenu lu párrafo gaayuʼ, guníʼ: «Guiráʼ dxi ribeeʼ tiempu para guiníʼ iqueʼ ximodo riníʼ ique Jehová. Nga riguixhedxí ladxiduáʼ ne ruquídxini fe stinneʼ».
14. ¿Ximodo racané oración laanu?
14 Cadi gusaana de guni orarnu (1 Tes. 5:17). Ora nabé xhamigu chupa binni, gatigá riniʼcaʼ xi runi sentircaʼ ne ngaca rizaaca ora xhamígunu Jehová. Ora gábinu laabe xi cayuni sentirnu, xi caníʼ íquenu ne xi naguu xizaa laanu rusihuínninu nápanu confianza laabe ne nánnanu nadxiibe laanu (Sal. 94:17-19; 1 Juan 5:14, 15). Yua, hermana ni bizéʼtenu lu guiropa párrafo que, guníʼ: «Ora runeʼ orar, rabeʼ Jehová guiráʼ xixé ni bineʼ dxi ca. Rabeʼ laabe xi nuu ndaaniʼ ladxiduáʼ ne xi cayuneʼ sentir. Lugar de guuyaʼ Jehová casi ti jefe, chaahuidugá huaziideʼ guuyaʼ laabe casi ti padre ni nadxii ca xiiñiʼ». (Biiyaʼ cuadru ni láʼ « ¿Ñee maʼ biindaluʼ ni la?»).
15. ¿Ximodo rusihuinni Jehová rizaalaʼdxiʼ cada tobi de laanu?
15 Chuʼnu gaxha de ca hermanu stinu. Ti regalu stiʼ Jehová laacabe (Sant. 1:17). Rizaalaʼdxiʼ Bixhózenu ni nuu guibáʼ cada tobi de laanu. Bisihuínnibe ni ra bidiibe laanu ca hermanu ne hermana ni zeeda gaca casi familia stinu ni nadxii laanu guiráʼ ora (Prov. 17:17). Lu carta ni bicaa Pablo para ca hermanu de Colosas bizeetebe caadxi xpinni Cristu ni gucané laabe ne guniʼbe guizáʼ gudixhedxicaʼ ladxidoʼbe (Col. 4:10, 11). Ne ora biquiiñeʼ Jesús tu gacané laa, gucané ca ángel ne ca discípulo stibe laabe purtiʼ xhamígucaʼ laabe, ne bidiibe xquixe peʼ laacaʼ (Luc. 22:28, 43).
16. ¿Ximodo racané ca hermanu stinu laanu chuʼnu gaxha de Jehová?
16 ¿Ñee ruyúbinu gacané ca hermanu de congregación stinu laanu la? Pa gúninu ni, zacanécabe laanu. Cadi guiníʼ íquenu débil laanu pa gábinu ti hermanu xi naguu xizaa laanu. Guzéʼtenu ni guníʼ James, hermanu ni bizéʼtenu lu párrafo gaayuʼ que: «Ra gucaʼ xhamiguaʼ ca hermanu, guizáʼ huayacaneni naa. Ora ruzulú riníʼ iqueʼ cosa ni ribee gana naa nuu ca xhamiguaʼ listu para gucaadiágacaʼ naa né paciencia ne rusietenaláʼdxicaʼ naa nadxiicaʼ naa. Ora racanécabe naa rudieeʼ cuenta nadxii ne rizaalaʼdxiʼ Jehová naa». ¡Guizáʼ risaca gápanu xhamígunu ndaaniʼ congregación!
CADI GUIXÉLENU DE JEHOVÁ
17, 18. ¿Tu naquiiñeʼ gulábinu ne xiñee?
17 Racalaʼdxiʼ Binidxabaʼ guireʼnu gana ne gusaana de gúninu ni jneza. Racaláʼdxibe guiníʼ íquenu cadi nadxii Jehová laanu ne qué runi merecernu gulá Jehová laanu. Peru nánnanu cadi dxandíʼ ni riníʼ Binidxabaʼ.
18 Nadxii ne rusisaca Jehová cada tobi de ca xpinni. Pa guzúʼbanu stiidxabe, laabe ne Jesús qué zusaana de gannaxhiicabe laanu (Juan 15:10). Nga runi, cadi gulábinu Binidxabaʼ ninca ladxidoʼno ora gucaacaʼ laanu guiníʼ íquenu cadi nadxii Jehová laanu. Lugar de nga la? gulábinu Jehová. Purtiʼ laa ruuyaʼ ca cosa galán ni runi cada tobi de laanu. Cadi guiaandaʼ laanu, «riuulaʼdxiʼ Jehová ni runi xquidxi» dede né ni rúniluʼ.
CANCIÓN 141 Ti regalu guizáʼ sicarú
^ párrafo 5 Nuu hermanu riníʼ ique cadi nadxii Jehová laa. Zacané artículo riʼ laanu gánnanu dxandíʼ nadxii Jehová cada tobi de laanu. Laaca zadúʼyanu xi naquiiñeʼ gúninu ora guiníʼ íquenu cadi nadxii Jehová laanu.
^ párrafo 2 Maʼ bidxaa lá caadxi binni.
^ párrafo 67 NI RIHUINNI LU IMAGEN RIʼ: Ante guiziidiʼ Pablo de Jehová biseguyoobe stale xpinni Cristu, peru ora biʼniʼ crebe ni biʼniʼ Jesús pur laabe bichaabe ne bizulú guluube gana ca hermanu. Zándaca familia stiʼ ca hermanu ni guzanándabe nga ca ni guluube gana.
